Ɛmɛnyi w’akristo la ngelo kawɔ ka l’olongo
“[Oko le so, “NW”] lakasu eko l’ulungu.”—Filipi 3:20.
1. Sangwelo diakɔna dia diambo diele la Jehowa lo dikambo di’anto amɔtshi?
ANTO wakotɔ lanɛ la kɛtɛ wayotolɛ oko nkumi ya dikanga kana oko ɛlɔmbɛdi l’olongo, wayotolɛ kânga andjelo. (1 Koreto 6:2, 3; Enyelo 20:6) Ande dui dia mɛtɛ dia diambo dia ngasɔ lee! Ɔsɔ ekɔ sangwelo diakasale Jehowa, ndo nde ekɔ lo kotsha dikambo sɔ oma lo tshimbo y’Ɔn’ande ɛtɔi lakandote, Yeso Kristo. Lande na kayoyala Otungi aso woho wa dikambo dia ngasɔ? Ndo lande na kele mbeya dui sɔ ekɔ la shɛngiya le Okristo ɛlɔ kɛnɛ na? Nyɛsɔ tende woho wakadimola Bible wembola ɛsɔ.
2. Dikambo diakɔna di’oyoyo diakewoya Joani Obatizanyi diakahombe Yeso sala, ndo kakɔna kakendanaka la dikambo diakɔ di’oyoyo sɔ?
2 Lam’akalɔngɔsɔlɛka Joani Obatizanyi Yeso mboka, nde akatewoyisha ate: Yeso ayoyosala dui dimɔtshi di’oyoyo. Ɔnkɔnɛ mbata ɔkɔndɔ akɔ: “[Joani] akasambishaka ati: One layayi l’okongo ami, ambundeka wulu. Dimi kema ololo wukukimi nkhusama la nkelekula ekodi wa sabata yandi. Dimi lakanyubatiza la ashi, keli ndi ayunyubatiza la [nyuma k’ekila, NW].” (Mako 1:7, 8) La ntondo k’etena kɛsɔ, ndoko onto lakabatizama la nyuma k’ekila. Ɔsɔ aki yɛdikɔ y’oyoyo yakendanaka la nyuma k’ekila, ndo yɔ yakahombe mendana la sangwelo diaki Jehowa diaki suke la kɛnɛmɔlama woho wa nɔngɔsɔla anto amɔtshi dia vɔ tôlɛ l’olongo.
‘Mbotɔ Nto’
3. Awui akɔna w’eyoyo w’endana la Diolelo wakalembetshiya Yeso Nikɔdɛmɔ na?
3 Lam’akandahomana nde la Ofarisɛ ɔmɔtshi wa lokumu lo oshɛshɛ, Yeso akakɛnɛmɔla awui efula w’endana la sangwelo diakɔ diaki Nzambi sɔ. Nikɔdɛmɔ, Ofarisɛ, akaye le Yeso l’otsho, ko Yeso akawotɛ ate: “Untu heyi mena diulelu dia [Nzambi, NW], tshikima ndi ambuto ntu.” (Joani 3:3) Lam’ele Nikɔdɛmɔ aki Ofarisɛ, mɛtɛ nde akashile la mbeka Afundelo wa lo Hɛbɛru, omalɔkɔ, nde akeyaka awui amɔtshi wa mɛtɛ k’ohomba efula k’endana la Diolelo diaki Nzambi. Dibuku dia Danyele diakewoya la ntondo ɔnɛ: Diolelo diayoshama le “one lufanyi la on’a untu” ndo le “wudja w’ekilami wa Khum’Ulungu.” (Danyele 7:13, 14, 27) Diolelo diakɔ diaki la dia ‘nanya ndo shidiya’ waolelo akina tshɛ oshiki ko diɔ shikikala pondjo. (Danyele 2:44) Ondo mɛtɛ Nikɔdɛmɔ akakanyiyaka ɔnɛ pɔlɔfɛsi shɔ yayokotshama lo dikambo dia wodja w’Ase Juda; koko Yeso akate ɔnɛ: di’onto mɛna Diolelo, nde pombaka mbotɔ nto. Nikɔdɛmɔ kopotɔ dui sɔ, omalɔkɔ, Yeso akatetemala mbotela ate: “Untu heyi mboto lo diulelu dia [Nzambi, NW], tshikima ndi ambuto le ashi la le [n]yuma.”—Joani 3:5.
4. Le wanɛ wambotɔ oma le nyuma k’ekila, woho akɔna wahomba diokanelo diasawɔ la Jehowa tshikitana na?
4 Joani Obatizanyi akatɛkɛtaka dikambo dia batismu ka la nyuma k’ekila. Kakianɛ, Yeso ambokotsha ɔnɛ: onto pombaka mbotɔ oma le nyuma k’ekila naka nde nangaka mbɔtɔ lo Diolelo diaki Nzambi. Oma lo diotwelo sɔ diotshikitanyi la waotwelo akina, apami la amato wele kema kokele mbɔtɔka ɔngɛnyi vɔ la Jehowa Nzambi lo woho wa lânde. Vɔ komaka an’ande wa yanyi. Ɔnkɔnɛ mbalaso: “Ndi akasha wane [wakalongola Yeso], ndu watetawoka lukumbu landi wulu wa vo ndjala ana wa [Nzambi, NW]; wane waki kumbuto uma lu dikila kana uma lu lulangu la dimba, kuyanga uma lu lulangu l’untu, keli uma lu lulangu la [Nzambi, NW].”—Joani 1:12, 13; Romo 8:15.
Ana wa Nzambi
5. Etena kakɔna kakabatizama ambeki wa kɔlamelo la nyuma k’ekila, ndo awui akɔna w’endana la nyuma k’ekila wakatshama l’etena kɛsɔ na?
5 Etena kakatɛkɛtaka Yeso la Nikɔdɛmɔ, lâsɔ ko nde amboshila la kitama nyuma k’ekila dia nde ndjâla owandji wa Diolelo diaki Nzambi dia lo nshi yayaye, ndo Nzambi aketawɔ dui sɔ lo sɛkɛ ɔnɛ Yeso aki Ɔn’ande. (Mateu 3:16, 17) Jehowa akote ana akina efula wa lo nyuma lo Pɛntɛkɔsta ka l’ɔnɔnyi 33 T.D. Ambeki wa kɔlamelo wakatshumana lo luudu la la diko la Jerusalɛma wakabatizama la nyuma k’ekila. L’etena kakɔ, vɔ wakotɔ nto oma le nyuma k’ekila dia ndjâla ana wa Nzambi wa lo nyuma. (Etsha 2:2-4, 38; Romo 8:15) Lâdiko dia lâsɔ, vɔ wakakitama nyuma k’ekila l’oyango wa kita sango dia l’olongo lo nshi yayaye, ndo wakadjama djembetelo la nyuma k’ekila oko ɔkɔlɛ washikikɛ elongamelo kawɔ k’otsha l’olongo.—2 Koreto 1:21, 22.
6. Sangwelo diakɔna diele la Jehowa lo dikambo dia Diolelo dia l’olongo, ndo lande na kasunganadiɔ di’anto amɔtshi monga l’olimu wa sala lo diolelo diakɔ?
6 Anto asɔ mbaki anto wa ntondo w’ekokele wakasɔnɛ Nzambi dia vɔ mbɔtɔ lo Diolelo. Dia dikambo diakɔ, l’ɔkɔngɔ wa nyɔi la eolwelo kawɔ, vɔ wayohomba monga l’atei w’ɔlɔngɔswamelo wa Diolelo dia l’olongo diayolɛ anto la andjelo. Jehowa ekɔ la sangwelo di’ɔnɛ oma lo tshimbo ya Diolelo diakɔ sɔ mbayokidiama lokombo lande la woke ndo mbayoyindjama lowandji lande la ntondo k’etongelo tshɛ. (Mateu 6:9, 10; Joani 12:28) Ande woho wasunganadiɔ di’anto asɔ monga l’atei a Diolelo sɔ lee! Satana akayakimanyiya l’anto lam’akandadje tɔfwɛfwɛ lo lowandji laki Jehowa mbala ka ntondo l’ekambɔ k’Ɛdɛna, ndo ɛlɔ kɛnɛ, Jehowa ekɔ la sangwelo di’ɔnɛ anto wayekama l’atei dia kaloya Satana dui lo tɔfwɛfwɛ tɔsɔ. (Etatelu 3:1-6; Joani 8:44) Ɔpɔstɔlɔ Petero akafundɛ anto akɔ wakasɔnama dia mbolɛ lo Diolelo diakɔ sɔ ate: “Watumbuli [Nzambi, NW] Shi Khumesu Jesu Kristu! Ndi akatuti ntu uma lu ketshi kandi ka wuki, dia shu ndjala la elungamelu ka lumu ne dia eulwelu ka Jesu Kristu uma lu nyoi; dia shu ndjala la sangu diahahonde, diahalana, diahashisho, diakawanyukitshiya l’ulungu.”—1 Petero 1:3, 4.
7. Diokanelo diakɔna dia lânde diele l’asa Yeso la wanɛ wakabatizama la nyuma k’ekila na?
7 Oko an’a yanyi wa Nzambi, Akristo akɔ asɔ wakasɔnama wakayokoma anango Yeso Kristo. (Romo 8:16, 17; 9:4, 26; Heberu 2:11) Lam’ele Yeso akɛnya dia nde mbaki Osangɔ w’Abarahama wakalakema, Akristo w’akitami wa nyuma asɔ wambosangana lande, kana wekɔ akimanyedi ande, mbuta ate etenyi kɛmɔtshi k’Osangɔ wayela anto wele la mbetawɔ ɔtshɔkɔ. (Etatelu 22:17, 18; Ngalatiya 3:16, 26, 29) Ɔtshɔkɔ akɔna? Diaaso dia tshungɔ oma lo pɛkato, dia mbokana nto la Nzambi ndo dia mbokambɛ oma kakianɛ ndo pondjo pondjo. (Mateu 4:23; 20:28; Joani 3:16, 36; 1 Joani 2:1, 2) Akristo w’akitami wa la kɛtɛ wekɔ lo kotola akanga w’etema w’ɔlɔlɔ otsha lo ɔtshɔkɔ ɔsɔ lam’asambishawɔ akambo w’endana la Yeso Kristo, ɔnangɛwɔ la lo nyuma, ndo la Jehowa Nzambi Shɛwɔ ka yanyi.—Etsha 1:8; Heberu 13:15.
8. Ele “enelo” k’an’a yanyi wa Nzambi wa lo nyuma na?
8 Bible tɛkɛtaka dikambo dia “enelo” k’ana a yanyi wa Nzambi wa lo nyuma asɔ. (Romo 8:19) Oko wewɔ nkumi ya dikanga yambosangana la Yeso lo Diolelo, vɔ wekɔ lo mbisha lonya lo dikambo di’elanyelo ka dikongɛ nɛ di’andja waki Satana. L’ɔkɔngɔ diko, l’edja k’ɛnɔnyi kinunu, vɔ wayosha lonya dia mbela nkumbo k’anto ɛlɔlɔ w’olambo w’etshungwelo ndo oma lo dikambo sɔ, wayokonya anto lo lokokele lakashisha Adama. (2 Tesalonika 1:8-10; Enyelo 2:26, 27; 20:6; 22:1, 2) Ɛnɛlɔ kawɔ mendanaka l’awui tshɛ womiso la shila. Tɔ kekɔ ɛngɔ kɛmɔtshi kakongɛ anto wele la mbetawɔ l’asolo lokoloko.
9. Ngande welamɛ olui w’Akristo w’akitami wa l’andja w’otondo lo Bible na?
9 Olui w’Akristo w’akitami wa l’andja w’otondo mbele “ekelizia wa ana wa nundu wambufundama kumbu yawo l’ulungu.” (Heberu 12:23) Vɔ mbele anto wa ntondo wakondja ɛlɔlɔ oma l’olambo w’etshungwelo waki Yeso. Vɔ wekɔ nto “dimba dia Kristu,” dui sɔ mɛnyaka diokanelo dia ma ma diele lam’asawɔ ndo l’asawɔ la Yeso. (1 Koreto 12:27) Paulo akafunde ate: “Uku eli dimba otoi, ndu edio la beke efula, la beke dia dimba, kuyanga mbedio efula, dieko dimba otoi; osoku mbeli ndu Kristu. Shu tshe takabatizama lu [n]yuma otoi dia shu ndjala dimba otoi—asi Juda kana asi Ngirika, kana fumbi kana wuyadjasedi—shu tshe takanoshama uma le [n]yuma otoi.”—1 Koreto 12:12, 13; Romo 12:5; Efeso 1:22, 23; 3:6.
“Isariyele wa [Nzambi, NW]”
10, 11. Lande na kaki Isariyɛlɛ w’oyoyo ohomba l’eleko ka ntondo, ndo wa na wakakenge wodja akɔ w’oyoyo ɔsɔ?
10 L’edja kolekanyi ɛnɔnyi 1 500 la ntondo ka Yeso ndja oko Mɛsiya wakalakema, wodja w’Isariyɛlɛ wa l’emunyi waki wodja waki Jehowa wa lânde. Kânga mbakawawaoholaka mbala la mbala, wodja w’otondo wakayaɛnya dia vɔ konama kɔlamelo yawɔ. Lam’akaye Yeso, wodja akɔ kombêtawɔ. (Joani 1:11) Diakɔ mbakatɛ Yeso ewandji w’ɛtɛmwɛlɔ w’Ase Juda ate: “Wayunyokosola diulelu dia [Nzambi, NW], ku wayudisha wudja watotokaka elua adio.” (Mateu 21:43) Dia kondja panda, sho pombaka mbeya “wudja [ɔsɔ] watotokaka elua [wa Diolelo].”
11 Wodja w’oyoyo ko etshumanelo k’Akristo w’akitami wakotɔ lo Pɛntɛkɔsta ka l’ɔnɔnyi 33 T.D. Anto wa ntondo wa l’atei w’etshumanelo kɛsɔ waki ambeki wa Yeso w’Ase Juda, wanɛ wakawetawɔ oko Nkumekanga kawɔ ka l’olongo. (Etsha 2:5, 32-36) Koko, vɔ waki ase wodja w’oyoyo waki Nzambi, aha l’ɔtɛ w’ɔnɛ vɔ waki Ase Juda wa lotɔ, koko l’ɔtɛ wa mbetawɔ le Yeso. Ɔnkɔsɔ mbakayala Isariyɛlɛ w’oyoyo waki Nzambi ɛngɔ kɛmɔtshi ka lânde—wodja wa lo nyuma. Lam’akatone efula k’Ase Juda mbetawɔ Yeso, leeta la ndjâla ose wodja w’oyoyo lakayodianganaka le Ase Samariya, ko l’ɔkɔngɔ diko le Ase Wedja. Wodja w’oyoyo wakelamɛ ɔnɛ: “Isariyele wa [Nzambi, NW].”—Ngalatiya 6:16.
12, 13. Woho akɔna wakayoshihodiamaka akambo ɔlɔlɔ ɔnɛ Isariyɛlɛ w’oyoyo takiwɔ djui mɔtshi y’ɔtɛmwɛlɔ yakakakitɔna l’ɔtɛmwɛlɔ w’Ase Juda?
12 Lo Isariyɛlɛ w’edjedja, lam’akakomaka wanɛ waha Ase Juda ambetawudi, vɔ waki la dia kitanyiya Ɛlɛmbɛ wa Mɔsɛ, ndo apami wakahombaka mɛnya djembetelo ya dikambo sɔ lo mbahema ohekele. (Etumbelu 12:48, 49) Akristo amɔtshi w’Ase Juda wakakanyiyaka ɔnɛ anto waha Ase Juda wele l’atei w’Isariyɛlɛ wa Nzambi pombaka ndjela awui asɔ. Koko, Jehowa aki la kanyi kina yotshikitanyi lo yimba yande. Nyuma k’ekila kakalɔmbɔla ɔpɔstɔlɔ Petero otsha laka Kɔnɛliyo, Ose Wodja. Lam’aketawɔ Kɔnɛliyo la wa lo luudu lande esambishelo kaki Petero, vɔ wakalongola nyuma k’ekila—kânga mbakiwɔ watalongola batismu ka l’ashi. Dui sɔ diakɛnya hwe ɔnɛ Jehowa aketawɔ Ase Wedja asɔ oko Ase Isariyɛlɛ wa Nzambi aha la mpika dia vɔ ndjela Ɛlɛmbɛ wa Mɔsɛ.—Etsha 10:21-48.
13 Ambetawudi amɔtshi wakɛnyi wolo mbetawɔ dikambo sɔ, ko aha la tshimbatshimba, apɔstɔlɔ la dikumanyi dia la Jerusalɛma wakahombe sawola lo dikambo diakɔ. Olui w’anto ɔsɔ wakalongola lowandji la mbɔsa tɛdikɔ tɔmɔtshi wakahokamɛ akambo lo ɔm’ɔmɔ woho akɔna wakakambaka nyuma k’ekila olimu le ambetawudi waha Ase Juda. Eyangelo kakawasale lo Bible akɛnya dia dui sɔ diaki ekotshamelo ka pɔlɔfɛsi kakasambiyama oma le Nzambi. (Isaya 55:5; Amose 9:11, 12) Wakayokomɛka lo mbetawɔ yɛdikɔ y’oshika nyɛ ɔnɛ: Akristo waha Ase Juda takiwɔ la dia kitanyiya Ɛlɛmbɛ wa Mɔsɛ. (Etsha 15:1, 6-29) Diakɔ mbele, mɛtɛ Isariyɛlɛ wa lo nyuma waki wodja w’oyoyo ndo vɔ komonga oko djui mɔtshi y’ɔtɛmwɛlɔ yakakakitɔna l’ɔtɛmwɛlɔ w’Ase Juda.
14. Kakɔna kakalange mbuta Jakɔba lam’akandelɛ etshumanelo k’Akristo ɔnɛ: “wauhu dikumi la ahendi wakahandjo” na?
14 Lo mbɔtɔnganɛ la dikambo sɔ, ombeki Jakɔba akatɔlɔnganya awui ande otsha le “wauhu dikumi la ahendi wakahandjo” lam’akandafundɛka Akristo w’akitami wa l’eleko ka ntondo mukanda ande. (Jakoba 1:1; Enyelo 7:3-8) Mɛtɛ, Ase Isariyɛlɛ w’oyoyo kofundama dia monga paka lo nkumbo mɔtshi yeyama. Ndoko diatɔnelo diaki l’atei a nkumbo 12 yotshikitanyi l’Isariyɛlɛ wa lo nyuma oko wakidiɔ lo Isariyɛlɛ wa l’emunyi. Koko, ɛtɛkɛta ɛsɔ waki Jakɔba wakosambiya Nzambi mɛnyaka dia lo asho waki Jehowa, Isariyɛlɛ wa Nzambi akashile la pɛna nkumbo 12 y’Isariyɛlɛ wa l’emunyi. Naka Ose Isariyɛlɛ ɔmɔtshi la lotɔ ambokoma ose wodja w’oyoyo, kete ɔlɔndji ande wa dioho wa l’emunyi—oyadi kânga nde ekɔ ose nkumbo ka Juda kana ka Lɛwi—kema ohomba.—Ngalatiya 3:28; Filipi 3:5, 6.
Sheke y’Oyoyo
15, 16. (a) Ngande wɔsa Jehowa wanɛ waha Ase Juda wa lotɔ wele l’atei w’Isariyɛlɛ wa Nzambi na? (b) Dikambo diakɔna dieyama diakakimanyiya woho w’Isariyɛlɛ w’oyoyo shikikɛma?
15 Lo asho wa Jehowa, anto wa l’atei a wodja w’oyoyo waha Ase Isariyɛlɛ wa lotɔ wekɔ Ase Juda wa lo nyuma wa mɛtɛ mɛtɛ! Ɔpɔstɔlɔ Paulo akalembetshiya ate: “Untu kema usi Juda, ne dia akambu watenamaka l’andja. Ahemelu k’uhekeli ka l’utema kema kene kambenama lu dimba. Keli untu eli usi Juda dia akambu wa l’utema. Ahemelu k’uhekeli ka mete keli ka l’utema uma le [n]yuma, aha la aui [wakafundama, NW]. Diandu diandi diaha uma le antu. Dio dieli uma le [Nzambi, NW].” (Romo 2:28, 29) Ase Wedja efula waketawɔ lo leeta la ndjâla Ase Isariyɛlɛ wa Nzambi, ndo dikambo sɔ diakakotsha pɔlɔfɛsi ka lo Bible. Ɛnyɛlɔ oko, omvutshi Hɔsea akafunde ate: “Layuka one laki kumbukama ketshi ketshi. Ndu dimi layeta one laha wudja ami nti: Wudja ami, ku vo wayuta vati: We keli [Nzambi kaso, NW].”—Hosea 2:23; Romo 11:25, 26.
16 Naka Ase Isariyɛlɛ wa lo nyuma komonga la tshina di’Ɛlɛmbɛ wa Mɔsɛ, kakɔna kakashikikɛka ɔnɛ vɔ waki ase wodja w’oyoyo na? Jehowa akadje la wodja akɔ wa lo nyuma ɔsɔ sheke y’oyoyo oma lo tshimbo ya Yeso. (Heberu 9:15) Lam’akatonge Yeso Eohwelo ka nyɔi kande lo ngɔndɔ ka Nisana 14, 33 T.D., nde akasha apɔstɔlɔ ande 11 wa kɔlamelo mapa la vinyɔ ndo akate ate: vinyɔ yaki djembetelo ya ‘dikila dia sheke.’ (Mateu 26:28; Jeremiya 31:31-34) Oko wɔkɔndwamidiɔ l’ɔkɔndɔ waki Luka, Yeso akate ate: dikɔhɔ dia vinyɔ diaki djembetelo ya “sheki y’uyuyu.” (Luka 22:20) Dia kotsha ɛtɛkɛta a Yeso ɛsɔ, lam’akatshulwama nyuma k’ekila lo Pɛntɛkɔsta ndo etena kakotɔ Isariyɛlɛ wa Nzambi lo Pɛntɛkɔsta, wakakɔsɔla Isariyɛlɛ wa l’emunyi Diolelo ko wakadisha wodja w’oyoyo wa lo nyuma. Lo dihole di’Isariyɛlɛ wa l’emunyi, wodja w’oyoyo ɔsɔ wakakome okambi wa Jehowa l’etena kɛsɔ, wakakengama l’ɛmɛnyi ande.—Isaya 43:10, 11.
“Jerusalema y’Uyuyu”
17, 18. Olembetshiyelo akɔna watanema lo dibuku di’Enyelo lo kɛnɛ k’endana la lotombo lakongɛ Akristo w’akitami na?
17 Ande lotombo layonga la wanɛ wele la diɛsɛ dia kondja leeta la l’olongo lee! Ande ɔlɔ nto dia mbeya akambo wa diambo wâkongɛ lee! Dibuku di’Enyelo toshaka ɛnɛlɔ ka dikambo sɔ lo tshena pe lo kɛnɛ k’endana la sango diawɔ dia l’olongo. Ɛnyɛlɔ oko, lo Enyelo 4:4, sho mbalaka ɔnɛ: “Kiti kina ya diulelu akumi ahendi la nyei yakadingi kiti kako ka diulelu [kaki Jehowa]. Dimi lakenyi dikumanyi akumi ahendi la nei wudjashi lu kiti yako, wolotshi ahondo a wema, wulimbe [alɛmbɔ wa koso wa, NW] paunyi.” Dikumanyi 24 sɔ diekɔ Akristo w’akitami, wanɛ wambolɔ wamboshila la mbɔsa ahole awɔ wa l’olongo wakâlake Jehowa. Alɛmbɔ awɔ wa koso la kiti yawɔ ya diolelo toholaka kɛnɛ k’endana la lowandji lawɔ. Ohotokokanyiya dikambo dia diɛsɛ diawɔ dia mamba dia kamba suke suke la kiti ka diolelo kaki Jehowa!
18 Lo Enyelo 14:1, sho kondjaka ɛnɛlɔ kekina ka lo tshena pe k’endana lawɔ: “Dimi lakendi, menyi ku Ona-Okoko emadi l’Ukungu a Siona, ndu antu nunu lukama la akumi anei la nei waki la lukumbu landi, la lukumbu la Shi lufundami lu fumu yawo.” Tambɛna lanɛ dia lofulo l’akitami akɔ pembetɛ l’anto—144 000. Kɛnɛ kɛnya di’ɔnɛ nkumi ya dikanga mbewɔ mɛnamaka oma lo woho wemadiwɔ la Nkumekanga kaki Jehowa kambahema l’ekudi, Yeso “Ona-Okoko.” Ndo, vɔ wekɔ l’Okongo wa Siɔna wa l’olongo. Okongo wa Siɔna wa la kɛtɛ aki dihole diakahikama Jerusalɛma, osomba wakadjasɛka nkumekanga ka l’Isariyɛlɛ. Okongo wa Siɔna wa l’olongo ekɔ didjidji dia dihole dia lotombo diaki Yeso nde la ekitɔ wosangani lande, wanɛ wakenga Jerusalɛma ya l’olongo.—2 Ekondo 5:2; Osambu 2:6.
19, 20. (a) Akristo w’akitami wayonga l’atei w’ɔlɔngɔswamelo akɔna wa l’olongo? (b) Lo edja ka tena dingana diakatatɛ Jehowa sɔnɔla wanɛ wayonga la ngelo kawɔ l’elongo?
19 Lo mbɔtɔnganɛ la dui sɔ, akitami waya l’ahole awɔ wa lotombo wa l’olongo mbelamɛka ɔnɛ: “Jerusalema y’uyuyu.” (Enyelo 21:2) Jerusalɛma ya la kɛtɛ yaki “usumba wa khum’ekanga ka wuki” ndo dihole diakahikama tɛmpɛlɔ. (Mateu 5:35) Jerusalɛma y’Oyoyo ya l’olongo yekɔ ɔlɔngɔswamelo wokengami la nkumi ya dikanga ya Diolelo ndo oma lo tshimbo y’osomba akɔ mbôlɛ Jehowa, Omboledi a woke ɛlɔ kɛnɛ kâmɛ la Yeso, Nkumekanga kakandasɔnɛ ndo lɛkɔ mbakambema olimu w’ɔlɔmbɛdi lam’afukɔfukɔka ɛtshɔkɔ w’efula oma lo kiti ka diolelo kaki Jehowa lo dikambo di’ɛkɔnwɛlɔ k’anto. (Enyelo 21:10, 11; 22:1-5) Lo ɛnɛlɔ kekina, Joani akoke welɛ akitami, Akristo wa kɔlamelo ndo wamboshila la mbolɔ ɔnɛ: ‘wadi aki Ɔn’Ɔkɔkɔ.’ Ande ɛnɛlɔ ka kɛtsha asolo ka ngasɔ k’endana la diokanelo dia ma ma diayonga lam’asawɔ la Yeso ndo woho wayowoyakitshakitsha la lolango la tshina diande lee! Ohokanyiya ɔngɛnɔngɛnɔ wayoyala l’olongo etena kayolongola ɔtɔi wa ndjihelo wa l’atei awɔ difuto diande dia l’olongo. L’ɔkɔngɔ diko mbayoyosalema “diwala dia Ona-Okoko”! L’etena kɛsɔ mbayokoka ɔlɔngɔswamelo wa lowandji la l’olongo kokele.—Enyelo 19:6-8.
20 Eelo, ɛtshɔkɔ wa mamba wambombama lo dikambo dia wanɛ wakate ɔpɔstɔlɔ Paulo lo dikambo diakiwɔ ate: “Ne dia [oko le so, NW] lakasu eko l’ulungu.” (Filipi 3:20) Aya suke la koka ɛnɔnyi nunu pende mbatshumanya Jehowa an’ande wa lo nyuma asɔ ndo mbâlɔngɔsɔlande dia vɔ kita sango diawɔ dia l’olongo. Lo ndjela tolembetelo tɔsɔ tshɛ, olimu w’ɔsɔnwɛlɔ ndo w’ɛlɔngɔswɛlɔ ɔsɔ aya suke la komɛ. Koko, awui akina wa mbesa wekekɔ, oko akawɛnya Joani lo ɛnɛlɔ kande kakafundama lo Enyelo tshapita 7. Kakianɛ, yambalo yaso yayanga kitshama lâdiko di’olui okina w’Akristo, ndo tayɔtɛkɛta dikambo di’olui akɔ ɔsɔ lo sawo diayela.
Onde Wɛ Mbohɔka?
◻ Naa awui amɔtshi watsha nyuma kele lâdiko wa wanɛ wele la sango di’otsha l’olongo?
◻ Diokanelo diakɔna dia ma ma diele l’asa akitami vɔ la Jehowa? ndo vɔ la Yeso?
◻ Ngande welamɛ etshumanelo k’Akristo w’akitami lo Bible na?
◻ Dikambo diakɔna dieyama diakakimanyiya Isariyɛlɛ w’oyoyo waki Nzambi dia vɔ shikikɛma na?
◻ Waɛsɛ akɔna wa l’olongo wakongɛ Akristo w’akitami na?
[Caption]
Aya suke l’ɛnɔnyi nunu pende mbasɔna Jehowa wanɛ wayolɛ lo Diolelo dia l’olongo