Onde wɛ ambolongolaka ‘nyuma k’akambo wa mɛtɛ’?
‘Papa . . . ayonyosha okimanyedi okina, nyuma k’akambo wa mɛtɛ dia monga kamɛ lanyu pondjo pondjo.’—JOANI 14:16, 17.
1. Naa dui di’ohomba diakewoya Yeso ambeki ande lo wenya w’ekomelo wakinde la wɔ lo luudu la la diko na?
“KUMADIONDJO, lendi atayatshu?” Ɔsɔ aki ɔtɔi ɔmɔtshi l’atei wa wembola wakalongola Yeso oma le apɔstɔlɔ ande lo wenya w’ekomelo wakandetsha kamɛ la wɔ lo luudu la la diko la Jerusalɛma. (Joani 13:36) Lam’akatetemala losanganya lɔsɔ, Yeso akawaewoya dia kakianɛ etena kambokoka dia nde mbatshika dia kawola otsha le She. (Joani 14:28; 16:28) Nde hatonga la wɔ nto lo yoho yɛnama nganɛ dia mbaetsha ndo kadimola lo wembola awɔ. Koko, nde akashikikɛ ate: “Dimi layolomba Papa, ku ndi ayunyusha Ukimanyidi [kana, okeketshi] ukina, one layuyala lanyu pundju.”—Joani 14:16.
2. Kakɔna kakalake Yeso dia tomɛ ambeki ande l’ɔkɔngɔ w’otshwelo ande?
2 Yeso akahonolɛ ele okimanyedi akɔ ɔsɔ ndo akalembetshiya woho wayokimanyiya okimanyedi ɔsɔ ambeki ande. Nde akawatɛ ate: “Dimi kunyutela akambu aso l’etatelu, ne dia dimi laki la nyu. Keli kakiane, dimi lutatshu le One lakantumi. . . . Keli dimi lambunyutela mete nti: Ololo dimi nyutshwela. Naka dimi hatshu, ku Ukimanyidi hayi le nyu. Keli naka dime lambutsho, layunyutumelandi. Keli lam’ayuya [n]yuma ka mete, ndi ayunyolombola lu akambu wa mete tshe.”—Joani 16:4, 5, 7, 13.
3. (a) Etena kakɔna kakawatomɛ Akristo wa ntondo ‘nyuma k’akambo wa mɛtɛ’? (b) Lo yoho yakɔna mɔtshi y’ohomba efula yaki nyuma “ukimanyedi” le wɔ?
3 Daka sɔ diakakotshama lo Pɛntɛkɔsta ka l’ɔnɔnyi wa 33 T.D., oko wakadishikikɛ ɔpɔstɔlɔ Petero ate: “[Nzambi] akulula Jesu ako. Shu tshe teko emenyi wa dikambu diako. Okone ndi akambiyama lu lunya la pami la [Nzambi], ndu akalungula daka dia [nyuma k’ekila] uma le Shi; ndi akaditshulula uku wenanyu la wukanyu.” (Etsha 2:32, 33) Oko wayotodiɛna l’ɔkɔngɔ, nyuma k’ekila kakalongola Akristo wa ntondo lo Pɛntɛkɔsta akasalɛ akambo efula. Koko Yeso akalake dia ‘nyuma k’akambo wa mɛtɛ’ ‘kayowaohola akambo tshɛ wakandawatɛ.’ (Joani 14:26) Tɔ kakahombe mbakimanyiya dia mbohɔ olimu ndo wetshelo waki Yeso, kânga etondo w’ɛtɛkɛta wakandatɛkɛta woho wa vɔ mbafunda. Lo yoho ya lânde, dui sɔ diakahombe kimanyiya ɔpɔstɔlɔ w’osombe Joani l’ekomelo ka ntambe ka ntondo ka lo tena diaso nɛ, lam’akandatatɛ funda Evanjiliɔ ande. Ɔkɔndɔ ɔsɔ waki ndo l’alako w’ohomba efula wakasha Yeso lam’akandahɔhɔla Eohwelo ka nyɔi kande.—Joani, tshapita 13-17.
4. Ngande wakakimanyiya ‘nyuma k’akambo wa mɛtɛ’ Akristo w’akitami w’esɔ wa ntondo na?
4 Yeso akalake ambeki wa ntondo asɔ nto dia nyuma ‘kayowaetsha akambo tshɛ’ ndo ‘mbalɔmbɔla l’akambo tshɛ wa mɛtɛ.’ Nyuma kakahombe mbakimanyiya dia shihodia akambo w’ohomba efula wa l’Afundelo dimɛna ndo kokɛ kamɛ kawɔ ka lo tokanyi, ka lo eokelo, ndo ka lo sangwelo. (1 Koreto 2:10; Efeso 4:3) Ɔnkɔnɛ, nyuma k’ekila kakasha Akristo wa ntondo wolo wa kamba lo tshɛ kawɔ oko ‘ɔhɔmbɔ wa kɔlamelo ndo wa kɛsɔ’ dia mbisha ɔm’ɔmɔ w’Akristo w’akitami w’esɔ ‘mbo ya ndɛ ya lo nyuma l’etena kadiɔ.’—Mateu 24:45.
Nyuma mɛnyaka
5. (a) Naa elongamelo k’oyoyo kakewoya Yeso ambeki ande l’otsho wa Ngɔndɔ ka Nisana 14, 33 T.D.? (b) Olimu akɔna wakahombe kamba nyuma k’ekila dia kotsha daka diaki Yeso?
5 L’otsho wa Ngɔndɔ ka Nisana 14, 33 T.D., Yeso akatɛ ambeki ande la ngandji tshɛ dia nde ayoyalongola l’ɔkɔngɔ dia vɔ todjasɛ la nde ndo la She l’olongo. Nde akawatɛ ate: “Lu luudu la Papa eko mvudu efula. Utunduyala aha osoku, tshiki lakanyutela, ne dia dimi lambutsho dia ntunyolongoswela dihuli. Naka dimi lambutsho dia ntunyolongoswela dihuli, dimi layukalula dia ndjunyulungula, dia nyu ndjala lene ayumuyala.” (Joani 13:36; 14:2, 3) Vɔ wayolɛ la nde lo Diolelo diande. (Luka 22:28-30) Dia vɔ nongola elongamelo kɛsɔ k’otsha l’olongo, vɔ pombaka ‘mbotɔ le nyuma’ oko ana wa Nzambi wa lo nyuma ndo monga akitami w’esɔ dia tokamba oko nkumi ya dikanga ndo ɛlɔmbɛdi wa Kristo l’olongo.—Joani 3:5-8; 2 Koreto 1:21, 22; Tito 3:5-7; 1 Petero 1:3, 4; Enyelo 20:6.
6. (a) Etena kakɔna kakamɛ leeta l’otsha l’olongo, ndo anto angana walongola leeta lakɔ? (b) Wanɛ wakalongola leeta lɔsɔ batizamaka lo na?
6 ‘Leeta l’otsha l’olongo’ lɔsɔ lakatatɛ lo Pɛntɛkɔsta ka l’ɔnɔnyi 33 T.D., ndo mɛnamaka ondo dia lɔ lakakomɛ l’ɔnɔnyi wa 1935. (Heberu 3:1) Lofulo la wanɛ wakadjama djembetelo oma le nyuma k’ekila dia monga anto wa l’Isariyɛlɛ wa lo nyuma lekɔ anto 144 000 ‘wakasombama oma l’atei w’anto.’ (Enyelo 7:4; 14:1-4) Vɔ wakabatizama lo demba dia nyuma diaki Kristo, lo etshumanelo kande, ndo lo nyɔi kande. (Romo 6:3; 1 Koreto 12:12, 13, 27; Efeso 1:22, 23) L’ɔkɔngɔ wa batismu kawɔ ka l’ashi ndo wa vɔ kitama esɔ ka nyuma k’ekila, vɔ tatɛka sɛna yoho ya lɔsɛnɔ ya ndjalambola, mbut’ate sɛna la kɔlamelo tshɛ polo lo nyɔi kawɔ.—Romo 6:4, 5.
7. Lande na kele paka Akristo w’akitami w’esɔ ato mbele la lotshungɔ la ndɛ mapa ndo nɔ vinyɔ lo Eohwelo?
7 Oko wewɔ ase Isariyɛlɛ wa lo nyuma, Akristo w’akitami w’esɔ asɔ waki lo sheke y’oyoyo yakadjama lam’asa Jehowa nde ‘l’Isariyɛlɛ waki Nzambi.’ (Ngalatiya 6:16; Jeremiya 31:31-34) Sheke y’oyoyo shɔ yakashikikɛma diɛsɛ oma lo dikila diakatshola Kristo. Yeso akatɛkɛta dikambo sɔ lam’akandahɔhɔla Eohwelo ka nyɔi kande. Luka mbutaka ate: “Ndi akose ukama wa ma; lam’akanduki lusaka, ndi akawatula, akawasha. Ndi akati ati: Dimba diami ne! Diambukimwama dikambu dianyu. Kanyutshaki okone, dia mbuhomi. Ndu l’okongo wa ma dia dikolo, ndi akose dikoho; akati ati: Dikoho ne, dieli sheki y’uyuyu ya lu dikila diami, diambutshulwama dikambu dianyu.” (Luka 22:19, 20) Atshikadi wa l’atei w’anto 144 000 weke lanɛ la nkɛtɛ mbele la lotshungɔ la ndɛ mapa ndo nɔ vinyɔ lo Eohwelo ka nyɔi ka Kristo.
8. Ngande weya akitami w’esɔ dia vɔ wambolongola leeta l’otsha l’olongo?
8 Ngande weya akitami w’esɔ dia vɔ wakalongola leeta l’otsha l’olongo? Nyuma k’ekila mbashikikɛ dia vɔ wambolongola leeta lɔsɔ. Ɔpɔstɔlɔ Paulo akafundɛ anto asɔ ate: “Ne dia wane tshe watolombwamaka le Nyuma ka [Nzambi] mbeli ana wa [Nzambi]. . . . Nyuma [“mɛnyaka,”NW] nyuma yasu ati: Ana wa [Nzambi] mbesu. Naka shu tambuyala ana, keti ndu ekito mbesu. Shu teko ekito wa [Nzambi], ndu ekito kame la Kristu; naka shu tatusuwaka kame la ndi, keti tayutumbwama kame la ndi.” (Romo 8:14-17) Nyuma mbaɛnyaka la wolo tshɛ woho ɔnɛ wele, wanɛ wele kânga la yema ya tâmu tshitshɛ lo kɛnɛ kendana la leeta l’otsha l’olongo koka mbuta aha la vɔ ndjakesa dia vɔ hawendana la leeta lɔsɔ, ɔnkɔnɛ, vɔ ndjotshikaka dia ndɛ mapa la nɔ vinyɔ lo Eohwelo.
Nyuma la Ɛkɔkɔ Ekina
9. Naa elui ehende wotshikitanyi w’anto watɛkɛtawɔ l’Evanjiliɔ ndo lo dibuku di’Enyelo?
9 Oko wakandeyaka lofulo la tshitshɛ l’Akristo wakelamɛ dia kenga Isariyɛlɛ wa lo nyuma, Yeso akawaelɛ ɔnɛ ‘lemba la tshitshɛ l’ɛkɔkɔ.’ Vɔ wambetawɔma dia ‘mbɔtɔ’ lo sheke y’oyoyo, otshikitanyi la lofulo laheyama mbadia l’‘ɛkɔkɔ ekina,’ wakate Yeso dia nde pombaka mbatshumanya ndo vɔ lawɔ. (Luka 12:32; Joani 10:16) Ɛkɔkɔ ekina wanɛ wele lo tshumanyema l’etena kɛnɛ k’ekomelo mbayokenga ‘lemba la woke’ layohanda lo ‘fɔnu ka woke,’ wanɛ wele l’elongamelo ka sɛna pondjo pondjo lo paradiso ka la nkɛtɛ. Ɛnɛlɔ kakalongola Joani l’ekomelo ka ntambe ka ntondo ka lo tena diaso nɛ mɛnyaka otshikitanu wele lam’asa lemba lɔsɔ la woke la anto 144 000 wakenga Isariyɛlɛ wa lo nyuma. (Enyelo 7:4, 9, 14) Onde ndo ɛkɔkɔ ekina mbalongola nyuma k’ekila? Naka eelo, shɛngiya yakɔna yele latɔ lo nsɛnɔ yawɔ?
10. Ngande wabatizama ɛkɔkɔ ekina “lu lukumbu la Papa ndu l’Ona ndu la [nyuma k’ekila]”?
10 Nyuma k’ekila kekɔ lo kamba olimu w’ohomba efula lo nsɛnɔ y’ɛkɔkɔ ekina. Vɔ nambolaka nsɛnɔ yawɔ le Jehowa lo batizama “lu lukumbu la Papa ndu l’Ona ndu la [nyuma k’ekila].” (Mateu 28:19) Vɔ mbetawɔka lowandji laki Jehowa, ndjakitshakitshaka l’ɛse ka Kristo oko Nkumekanga ndo Otshungodi awɔ, ndo mbetawɔka olimu wakamba nyuma kaki Nzambi, kana wolo wakamba olimu lo nsɛnɔ yawɔ. Lushi la lushi, vɔ salaka la wolo dia kɛnɛmɔla ‘elowa wa nyuma,’ wele “ngandji, ongenongeno, ki, ndjakimela, ketshi, ololo, kolamelu, memakana, ndjaenda.”—Ngalatiya 5:22, 23.
11, 12. (a) Ngande wakidiama akitami w’esɔ lo yoho yotshikitanyi efula? (b) Lo yoho yakɔna yakidiama ɛkɔkɔ ekina ndo yakomawɔ ekila?
11 Ɛkɔkɔ ekina pombaka mbetawɔ nto di’Ɔtɛkɛta wa Nzambi la nyuma kande k’ekila mbaɛdia kana mbakidia. Akitami w’esɔ wamboshilaka mbɛdiama lo yoho yotshikitanyi, lo mbɔsama oko anto wosembwe ndo w’ekila oko wewɔ otshukami wa Kristo. (Joani 17:17; 1 Koreto 6:11; Efeso 5:23-27) Omvutshi Danyɛlɛ akatɛkɛta dikambo diawɔ oko “ekilami wa Khum’Ulungu,” wanɛ wakalongola Diolelo dialɔmbɔma oma le ‘ɔna onto,’ Yeso Kristo. (Danyele 7:13, 14, 18, 27) L’etatelo, Jehowa akatɛ wodja w’Isariyɛlɛ lo tshimbo ya Mɔsɛ nde l’Arɔna ate: “Dimi keli [Jehowa Nzambi k]anyu. Okone nyuyakidia, nyuyali ekila, ne dia dimi leli ekila.”—Akambu w’Asi Lewi 11:44.
12 Tshɛkɛta “okidiamelo” nembetshiyaka mɛtɛ mɛtɛ “tshelo ya mbetɛ ekila, kakitola, kana kitshama lânde dikambo di’olimu waki Jehowa Nzambi; eongelo k’onto lele ekila, lambokidiama, kana lambɛdiama.” L’etatelo k’ɔnɔnyi 1938, Tshoto y’Etangelo yakate dia olui wa Jɔnadaba, kana ɛkɔkɔ ekina, “pombaka mbeka dia ndjakimɔ ndo onto tshɛ lahomba koma ɔmɔtshi la l’atei wa lemba la woke ndo sɛna lanɛ la nkɛtɛ pombaka kidiama.” Lo ɛnɛlɔ ka lemba la woke l’anto kofundami lo dibuku di’Enyelo, vɔ tɛkɛta dikambo diawɔ oko anto “wakotsha ahondo awo, wakawaedia la dikila dia Ona-Okoko” ndo wekɔ lo kambɛ Jehowa ‘olimu w’ekila ndo la yanyi ndo l’otsho.’ (Enyelo 7:9, 14, 15) L’ekimanyielo ka nyuma k’ekila, ɛkɔkɔ ekina salaka la wolo awɔ tshɛ dia kotsha ɛlɛmbɛ waki Jehowa wendana la monga ekila.—2 Koreto 7:1.
Tosale anango wa Kristo ɔlɔlɔ
13, 14. (a) Lo ndjela wɛla waki Yeso w’ɛkɔkɔ la mbudi, panda k’ɛkɔkɔ nemanɛka la dikambo diakɔna? (b) L’etena k’ekomelo kɛnɛ, ngande wakasukɛ ɛkɔkɔ ekina anango Kristo?
13 Yeso akake epole ɔsɛkɛ lo dimama diele lam’asa ɛkɔkɔ ekina la lemba la tshitshɛ l’ɛkɔkɔ lo wɛla ande w’ɛkɔkɔ la mbudi, ndo lo prɔfɛsiya kande kendana l’‘ekomelo ka dikongɛ nɛ di’akambo.’ Lo wɛla ɔsɔ, Kristo akɛnya hwe dia panda k’ɛkɔkɔ ekina nemanɛka efula la dionga diawɔ otsha le akitami w’esɔ, wele nde akawaelɛ ate “analingu.” Nde akate ate: “Ku Khum’ekanga ayutela wane weli lu lunya landi la pami ati: Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja. . . . Mete kanyutelami nti: Uku akanyatshela otoi omotshi a wane wuleki tshitshe l’atei w’analingu ane, dimi uku akanyatshela.”—Mateu 24:3; 25:31-34, 40.
14 Etelo k’ɔnɛ “uku akanyatshela” mendanaka l’osukɔ wa la ngandji washawɔ anango Kristo wa lo nyuma, wele andja ɔnɛ waki Satana mbaɔsaka oko angɛndangɛnda, ndo komaka polo ndo lo mbidja amɔtshi wa l’atei awɔ lo nkanu. Vɔ waki l’ohomba wa mbo ya ndɛ, w’ahɔndɔ wa ndɔta, ndo w’ekokelo ka lo demba. (Mateu 25:35, 36, nɔtɛ) L’etena k’ekomelo kɛnɛ, tatɛ oma l’ɔnɔnyi 1914, efula ka l’atei w’akitami w’esɔ wakatanema l’atei w’ehomba ɛsɔ. Ɔkɔndɔ wa nshi nyɛ w’Ɛmɛnyi wa Jehowa mɛnyaka dia vɔ wakakondja ekimanyielo oma le anyawɔ, mbut’ate ɛkɔkɔ ekina, nɛ dia vɔ wakatshutshuyama la nyuma.
15, 16. (a) L’olimu akɔna wele ɛkɔkɔ ekina wambokimanyiya anango Kristo weke lanɛ la nkɛtɛ lo yoho ya lânde na? (b) Ngande wakɛnya akitami w’esɔ lowando lawɔ otsha le ɛkɔkɔ ekina?
15 Anango Kristo w’akitami w’esɔ weke lanɛ la nkɛtɛ l’etena kɛnɛ k’ekomelo wekɔ lo nongola osukɔ oma le ɛkɔkɔ ekina lo yoho ya lânde lam’akotshawɔ olimu wakawasha Nzambi wa ‘sambisha lokumu l’ɔlɔlɔ la diolelo lo nkɛtɛ k’otondo oko ɔmɛnyi le wedja tshɛ.’ (Mateu 24:14; Joani 14:12) Etena kele lofulo l’akitami w’esɔ weke lanɛ la nkɛtɛ lekɔ lo takitakita ɛnɔnyi l’ɛnɔnyi, lofulo l’ɛkɔkɔ ekina lekɔ lo tadɛ polo ndo lo waa miliyɔ. Nunu dia l’atei awɔ wekɔ lo kamba oko esambisha wa lo tena tshɛ, mbut’ate oko ambatshi mboka ndo oko wa misiɔnɛrɛ dia dianganya lokumu l’ɔlɔlɔ la Diolelo ‘polo ndo lo tokoma ta nkɛtɛ.’ (Etsha 1:8) Akina mbishaka lonya l’olimu w’esambishelo lo yɛdikɔ yɛdimi l’akoka awɔ ndo sukɛka olimu ɔsɔ w’ohomba l’ɔngɛnɔngɛnɔ tshɛ l’akuta awɔ.
16 Anango Kristo w’akitami w’esɔ wekɔ la lowando efula lo woho wasukɛ la kɔlamelo anyawɔ ɛkɔkɔ ekina! Woho wayaokawɔ mɛnyama dimɛna lo dibuku Sécurité universelle sous le Règne du “Prince de paix,” diakatondja olui w’ɔhɔmbɔ l’ɔnɔnyi wa 1986. Diɔ mbutaka ɔnɛ: “Tatɛ oma lo Ta dia Hende di’Andja w’Otondo, ekotshamelo ka prɔfɛsiya kaki Yeso kendana l’‘ekomelo ka dikongɛ nɛ di’akambo’ mendanaka efula l’ɔkɛndɛ wele la ‘lemba la woke’ l’‘ɛkɔkɔ ekina,’ . . . Ɔnkɔnɛ, sho kawoyaka ‘lemba la woke’ lotumbi oma lo weho w’ɛtɛkɛta efula l’andja w’otondo losaka lo woho wakawasha lonya lo ekotshamelo ka prɔfɛsiya kaki [Yeso] ka lo Mateu 24:14.”
‘Watokolowana naka aha oma le so’
17. Lo woho akɔna wele akanga wa kɔlamelo wa lo nshi y’edjedja wayolwama lanɛ la nkɛtɛ ‘hawotokoma kokele naka aha oma le’ akitami w’esɔ?
17 Lo tɛkɛta oko ɔmɔtshi wa l’atei w’akitami w’esɔ ndo lo dikambo di’apami ndo wamato wa kɔlamelo wakasɛnɛ la ntondo ka Kristo, ɔpɔstɔlɔ Paulo akafunde ate: “Wane tshe wakeyama dia mbetawo kawo, kunungula daka. [Nzambi] akatolongoswela dikambu diuleki ololo, dia vo watukuluwana aha uma le su.” (Heberu 11:35, 39, 40) Lo Ɛlɔmbwɛlɔ k’Ɛnɔnyi Kinunu, Kristo nde l’anango w’akitami w’esɔ 144 000 wayɔlɔmbɔla oko nkumi ya dikanga ndo ɛlɔmbɛdi l’olongo ndo wayotshululɛ anto ɛtshɔkɔ w’oma l’olambo waki Kristo lanɛ la nkɛtɛ. Lâsɔ mbayokoma ɛkɔkɔ ekina ‘kokele’ lo demba ndo lo yimba.—Enyelo 22:1, 2.
18. (a) Akambo wa lo Bible pombaka kimanyiya ɛkɔkɔ ekina dia shihodia dikambo diakɔna? (b) Kakɔna kalongamɛ ɛkɔkɔ ekina lo “enelo k’ana wa [Nzambi]”?
18 Awui asɔ tshɛ pombaka tshutshuya ɛkɔkɔ ekina dia vɔ kana yimba ɔlɔlɔ dia shihodia bonde kele Afundelo w’Akristo wa lo Grɛkɛ ndeka kotola yambalo oya le Kristo l’anango w’akitami w’esɔ ndo l’ɔkɛndɛ wayonga lawɔ lo ekotshamelo k’asangwelo waki Jehowa. Ɛkɔkɔ ekina mbɔsaka dia le wɔ ekɔ tshondo ya diɛsɛ dia vɔ sukɛ olui w’akitami w’esɔ lo weho tshɛ etena kewɔ lo kongɛ “enelo k’ana wa [Nzambi]” lo Aramangɛdɔna ndo lo Ɛlɔmbwɛlɔ k’Ɛnɔnyi Kinunu. Vɔ koka nongamɛ dia “tshungwama uma lu lohombo la ehondelo, dia mboto lu ndjadjasela ka lutumbu la ana a [Nzambi].”—Romo 8:19-21.
Wambosangana lo nyuma lo Eohwelo
19. Kakɔna kambosalɛ ‘nyuma k’akambo wa mɛtɛ’ akitami w’esɔ vɔ la anyawɔ ɛkɔkɔ ekina, ndo ngande wayowonga kamɛ lo yoho ya lânde la dikɔlɔ dia Ngɔndɔ ka Sato 28?
19 Lo dɔmbɛlɔ diande dia ndjihelo l’otsho wa Ngɔndɔ ka Nisana 14, 33 T.D., Yeso akate ate: ‘Dimi lambɔlɔmba . . . dia vɔ tshɛ wayale ɔtɔi. Papa, oko weyɛ l’otema ami, la dimi l’otema ayɛ, ndo vɔ wayale l’etema aso. Kele wa la nkɛtɛ wetawɔ vate wɛ mbakatome.’ (Joani 17:20, 21) Oma lo ngandji kande, Nzambi akatome Ɔnande dia kimɔ lɔsɛnɔ lande dikambo dia panda k’akitami w’esɔ ndo k’anto wa l’andja w’otondo wele l’okitanyiya. (1 Joani 2:2) ‘Nyuma k’akambo wa mɛtɛ’ ambosanganya anango Kristo vɔ la ɛkɔkɔ ekina wa anyawɔ kamɛ. La dikɔlɔ dia Ngɔndɔ ka Sato 28, l’ɔkɔngɔ wa ɛɔtwɛlɔ ka wonya, elui akɔ ehende wayosangana kamɛ dia mbohɔ nyɔi ka Kristo ndo kɛnɛ tshɛ kakâsalɛ Jehowa oma l’ekimanyielo k’olambo w’Ɔnande la ngandji, Yeso Kristo. Ɔnkɔnɛ, osanganelo awɔ lo diaaso sɔ wakeketsha kamɛ kawɔ ndo nyomokeketsha yɛdikɔ yawɔ ya tetemala la sala lolango la Nzambi, lo mɛnya dia vɔ wekɔ l’ɔngɛnɔngɛnɔ dia monga l’atei w’anto wokama ngandji oma le Jehowa.
Wembola w’ovuswelo
• Etena kakɔna kakawatomɛ Akristo wa ntondo, ‘nyuma k’akambo wa mɛtɛ,’ ndo ngande wakonge nyuma kɛsɔ “ukimanyedi” mɛtɛ?
• Ngande weya akitami w’esɔ dia vɔ wakalongola leeta l’otsha l’olongo?
• Lo toho takɔna takamba nyuma ka Nzambi olimu le ɛkɔkɔ ekina?
• Ngande wele ɛkɔkɔ ekina wakasalɛ anango Kristo akambo w’ɔlɔlɔ, ndo lande na ‘kahawatokoma kokele naka aha oma le’ akitami w’esɔ?
[Osato wa lo lɛkɛ 29]
Ambeki wakalongola ‘nyuma k’akambo wa mɛtɛ’ lo Pɛntɛkɔsta ka l’ɔnɔnyi 33 T.D.
[Osato wa lo lɛkɛ 31]
Ɛkɔkɔ ekina wakasalɛ anango Kristo ɔlɔlɔ lo mbasukɛ l’olimu w’esambishelo wakawasha Nzambi