Etshungwelo Dia Mbɔtɔ L’andja W’oyoyo
“Vɔ mɛtɛ wayɔngɛnangɛnaka hakoke la wɔladi w’efula.”—OSAMBU 37:11, NW.
JEHOWA ekɔ Nzambi k’etshungwelo. Lo nshi y’edjedja, nde akatshungolaka ekambi ande lo tena efula. Koko nde kombatshungolaka lo pondjo nɛ dia ndoko etena kakakotsha Jehowa tɛdikɔ tande lo pondjo dia shidiya l’andja w’otondo waki Satana. Koko lo nshi yaso nyɛ, Jehowa ayanga sala etshungwelo koleki woke tshɛ lo dikambo di’ekambi ande. Mbala kɛnɛ, nde ayolanya dikongɛ dia Satana dia lo nkɛtɛ k’otondo tshɛ, ndoko fushi yadiɔ yayotshikala, ko nde ayɔtshiya ekambi ande l’andja w’oyoyo wa pondjo ndo wa losembwe.—2 Petero 2:9; 3:10-13.
2 Jehowa ekɔ lo tosha daka nɛ ate: “Etenyi ka tshitshe ketu, k’untu a kolo hatanema ntu. . . . Keli akanga a memakana wayukita kete, [ndo vɔ mɛtɛ wayɔngɛnangɛnaka hakoke la wɔladi w’efula, NW].” (Osambu 37:10, 11) L’edja ka nshi ngana na? “Antu w’ololo wayukita kete, wayudjaseka loko pundju.” (Osambu 37:29; Mateu 5:5) Koko la ntondo ka dikambo sɔ salema, andja ɔnɛ wayɔtɔ lo etena koleki woke tshɛ ka fɔnu kahatayalaka ndoko lushi.
“Fɔnu ka Woke”
3 L’ɔnɔnyi 1914, andja ɔnɛ wakɔtɔ lo ‘nshi yawɔ y’ekomelo.’ (2 Timote 3:1-5, 13) Taya nshi nyɛ lo ɔnɔnyi wa 83 tatɛ oma lam’akamɛ etena kɛsɔ, ndo tɔ kayanga komɛ lam’ayosalema kɛnɛ kakatatshi Yeso ate: “[Fɔnu ka woke, NW] kayuya, wuhu wahatayala uma k’etatelu k’andja edja ndu kakiane, ndu wuhu wahayalaki [nto] pundju.” (Mateu 24:21) Mɛtɛ, fɔnu kɛsɔ kayoyala kɔlɔ ka tshɛ, ndeka ndo Ta dia Hende di’Andja w’Otondo diakadiake anto suke la miliyɔ 50. Ɔsɔ mɛtɛ ekɔ etena ka mamba kayasukana esadi esadi!
4 “Fɔnu ka woke” kayoya la shashimoya ya mamba, ‘l’oshidi a tango ɔtɔi.’ (Enyelo 18:10) Fɔnu kɛsɔ kayomɛ lam’ayokotsha Nzambi tɛdikɔ takandɔsɛ ɛtɛmwɛlɔ tshɛ wa kashi welamɛ lo Ɔtɛkɛta wa Nzambi ɔnɛ “Babilona ka Wuki.” (Enyelo 17:1-6, 15) Dikambo diakalekaka mɛnama lo Babilɔna k’edjedja ele ɔtɛmwɛlɔ wa kashi. Babilɔna ka nshi nyɛ kekɔ oko onyatɔ Babilɔna ka lo nshi y’edjedja, ndo tɔ kekɔ didjidji dia diolelo di’ɛtɛmwɛlɔ wa kashi wa l’andja w’otondo. Tɔ kamboyala oko numba lam’ele tɔ mbɔtɔka l’ɔnɔngɔ w’ase pɔlitikɛ. Tɔ sukɛka ata walɔwɔ ndo tshɔkɔlaka asɔlayi wa lo bɛkɛ diakɔ pende dialɔshana, ko anto wa l’ɔtɛmwɛlɔ akɔ ɔtɔi ndjakanaka lam’asawɔ. (Mateu 26:51, 52; 1 Joani 4:20, 21) Tɔ minyaka asho oma lo ditshelo dia kɔlɔ diasala anto atɔ ndo pɛnyahɛnyaka Akristo wa mɛtɛ.—Enyelo 18:5, 24.
5 “Fɔnu ka woke” kayomɛ lam’ayɔlɔshama “Babilona ka Wuki” la shashimoya oma le ase pɔlitikɛ. Vɔ ‘wayohetsha numba kakɔ, wayowohandjola vwa, wayowetɛ otakataka, wayɔlɛ emunyi ande, ndo wayowotshumba tshɛ lo dja.’ (Enyelo 17:16) L’ɔkɔngɔ diko, wanɛ wakôkimanyiyaka ntondo ‘wayolela ndo wayokiyana efula lo dikambo diande.’ (Enyelo 18:9-19) Koko, ekambi wa Jehowa wekɔ lo kongɛ dikambo sɔ oma ko nshi y’edjedja, ndo vɔ wayota l’ɔngɛnɔngɛnɔ tshɛ vate: “[Nyotombole Yah, NW] . . . ndi a[mbu]lumbuya umuntu kanga luseka la mamba, lakalanya kete k’utundu la munanyi kandi. Ndi akôsomboya dia dikila di’ekambi andi.”—Enyelo 19:1, 2.
Ekambi wa Nzambi Wambɔlɔshama
6 L’ɔkɔngɔ wa vɔ nanya ɛtɛmwɛlɔ wa kashi, ase pɔlitikɛ wayokadimwɛ ekambi wa Jehowa dia mbalɔsha. Satana, ɔnɛ lelɛwɔ lo pɔlɔfɛsi kakɔ kɛnɛ ɔnɛ ‘Ngɔngɔ ka lo wodja wa Mangɔngɔ,’ mbutaka ate: “Dimi layutsho le wane weli la mumuya, wudjashi la lutui tshitshi.” Lam’ele nde ayokanaka ate wanɛ dimi kokaka mbanda esadi eto oko nyama yami, nde ayowaɔtwɛ la ‘lemba la woke l’alembe . . . , wate kana wange dia komba nkɛtɛ.’ (Ezekiyele 38:2, 10-16) Ekambi wa Jehowa mbeyaka ɔnɛ ta sɔ diayokita tatala nɛ dia vɔ ndjaɛkɛka le Jehowa.
7 Lam’akakanaka Farawɔ nde l’alembe ande ɔnɛ tambokuka ekambi wa Nzambi lo Ndjale ka Beela, Jehowa akatshungola ekambi ande lo dihindo ko akadiake alembe w’Ase Edjibito. (Etumbelu 14:26-28) Lo “fɔnu ka woke,” lam’ayokana wedja ɔnɛ tambokuka ekambi wa Jehowa, Jehowa ayoya nto lo dihindo dia ndjowatshungola: ‘Lushi lɔsɔ, . . . odudu ami wayodɛ l’ɔhɛmbɛ ami. Ndo l’ohetoheto ami, lo dja ya nkɛlɛ kami, dimi layohomba tɛkɛta.’ (Ezekiyele 38:18, 19) L’etena kɛsɔ kete kondoko ya “fɔnu ka woke” yaya ka suke!
8 L’etena kɛmɔtshi l’ɔkɔngɔ wa ‘fɔnu ka woke’ tatɛ, koko la ntondo ka Jehowa kotsha tɛdikɔ takandɔ̂sɛ tenyi dikina di’andja ɔnɛ, akambo wa mamba wayosalema. Tolembete etombelo wayoyala l’akambo akɔ asɔ. “Ku djimbitelu ya On’a untu yayene l’ulungu. Wedja tshe wa la kete wayulela, wayena On’a untu ayayi lu wangi wa l’ulungu la wulu ndu la lutumbu la wuki.” (Mateu 24:29, 30) “Tulimbitelu tayuyala lu unya, lu ngondo ndu lu toto. . . . Antu wayuka yimba tshimba, ne dia woma la elungamelu k’akambu wayayi la kete.”—Luka 21:25, 26.
“Etshungwelu Kanyu Kaya Suki”
9 L’etena kɛsɔ ka lânde mbayokotshama pɔlɔfɛsi ka Luka 21:28. Yeso akate ate: “Lam’ayutatela akambu aso ndja, kanyuwaleli, kanyedia ete anyu; ne dia etshungwelu kanyu kaya suki.” Atunyi wa Nzambi wayosaka lokomba nɛ dia vɔ wayeya ɔnɛ akambo wa diambo anɛ wasalema ndja oma le Jehowa. Koko, ekambi wa Jehowa wayɔngɛnangɛna nɛ dia vɔ wayeya ɔnɛ etshungwelo kawɔ kambosukana.
10 L’etena kɛsɔ mbayolanya Jehowa andja waki Satana lo pondjo. ‘Dimi [layolomboya Ngɔngɔ] la elando ndo la dikila; dimi layɔlɔsha mvula ya ngembe yela elola, mbɔkɔ, dja la tshɔ lâdiko diande ndo lâdiko di’elui ande . . . Ko vɔ wayohomba mbeya ɔnɛ dimi kele Jehowa.’ (Ezekiyele 38:22, 23) Kɛnɛ kakatshikala oma l’andja wa Satana kayolanyema tshɛ. Tshunda di’anto tshɛ wahadje Nzambi yimba diayoshila oshiki. Ɔsɔ mbelɛwɔ Armagɛdɔna, kɛdikɛdi kondoko ya “fɔnu ka woke.”—Jeremiya 25:31-33; 2 Tesalonika 1:6-8; Enyelo 16:14, 16; 19:11-21.
11 Wanɛ wayotshungɔ oma lo “fɔnu ka woke” ele miliyɔ y’atɛmɔdi wa Jehowa wa lo nkɛtɛ k’otondo. Vɔ mbele “ului a wuki” woye ‘oma lo wedja tshɛ, oma lo dibila tshɛ, oma lo weho tshɛ w’anto ndo oma l’ɛtɛkɛta tshɛ.’ Lande na kayowotshungwama lo yoho shɔ ya diambo ndo ya wɔma efula na? Nɛ dia vɔ kambɛka Jehowa ‘olimu w’ekila ndo la yanyi ndo l’otsho.’ Diɔ diakɔ diayowohandɔ lo ekomelo k’andja ɔnɛ ko mbɔtɔ l’andja w’oyoyo wa losembwe. (Enyelo 7:9-15) Lo yoho shɔ mbayowɛna ekotshamelo ka daka dia Jehowa nɛ: “Ulungamelaki [Jehowa], okolamelaki lu mbuka kandi; ndi ayukum[b]iya dia we nkita kete. We ayena lam’ayunyema antu wa kolo.”—Osambu 37:34.
Andja w’Oyoyo
12 Ande etena k’ɔngɛnɔngɛnɔ wa mamba kayonga lee—akambo wa kɔlɔ wambomɔ ko eleko koleki tshɛ ɔngɛnɔngɛnɔ lo lɔsɛnɔ l’anto kambotatɛ! (Enyelo 20:1-4) Wanɛ wayohandɔ l’Armagɛdɔna wayonga mɛtɛ la lowando efula le Jehowa nɛ dia vɔ wayɔtɔ l’atei wa tshunda di’anto dia dimɛna efula, ndo dia pudipudi diayosala Nzambi ndamɛ, l’andja w’oyoyo, lo nkɛtɛ kayokadimɔ paradiso! (Luka 23:43) Vɔ hawotohomba mvɔ nto pondjo! (Joani 11:26) Mɛtɛ, tatɛ oma l’etena kɛsɔ, vɔ wayonga l’elongamelo ka diambo ndo ka dimɛna efula ka sɛnaka l’edja tshɛ kele Jehowa la lɔsɛnɔ!
13 Yeso, ɔnɛ lakasɔnwama oma le Jehowa dia monga Nkumekanga ka l’olongo, mbayendaka ɛtshɔkɔ wa diambo wayokondja wanɛ wayotshungɔ. Lam’akinde lanɛ la nkɛtɛ, nde akasɛnya asho w’akanga a totshungu, akadihola atoyi w’akanga a mpoke, ndo akakɔnɔlaka ‘weho tshɛ wa hemɔ ndo weho tshɛ wa dikɔmɔ.’ (Mateu 9:35; 15:30, 31) L’andja w’oyoyo, nde ayotosala olimu ɔsɔ nto wa kɔnɔlaka anto, koko lo yɛdikɔ ya lo nkɛtɛ k’otondo. Oko Onyimpala wa Nzambi, nde ayokotsha daka nɛ diata ɔnɛ: “[Nzambi] ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.” (Enyelo 21:4) Anto hawongaki nto pondjo l’ohomba wa dɔkɔtɛlɛ kana w’anto watɔlɔngɔsɔlaka edo dia mbakundɛ!—Isaya 25:8; 33:24.
14 Anto akina nto wayotshungwama ele ekambi tshɛ wa kɔlamelo waki Nzambi wakavu lo nshi yakete. L’andja w’oyoyo, vɔ wayotshungɔ oma l’ɛkɔdi wa diombo. Jehowa ekɔ lo shikikɛ ate: “Eulwelu k’antu w’ololo la antu wa kolo uma lu nyoi kayuyala.” (Etsha 24:15) Ondo mɛtɛ anto “w’ololo” mbayolɔ ntondo ko ndjokimanyiya akina dia nanula Paradiso. Wanɛ wayohandɔ l’Armagɛdɔna wayɔngɛnangɛnaka woho w’anyanya lam’ayowokaka ɛkɔndɔ w’oma le wanɛ wakavu la kɔlamelo lo nshi y’edjedja ko waya la lɔsɛnɔ nto!—Joani 5:28, 29.
15 L’etena kɛsɔ, wanɛ tshɛ wasɛna wayɛna kɛnɛ kakate omembi w’esambu lo dikambo dia Jehowa ate: “We atukhukulaka lunya laye, atulutshaka engo tshe keli la lumu.” (Osambu 145:16) Ndjala honga nto: Nkɛtɛ kayɔlɔngɔswama dia tɔ monga dimɛna lo ahole tshɛ ndo kayɔngɔnyaka diangɔ tshavutshavu. (Osambu 72:16) Ndoko anto wayohomba mvudu ya mbidjasɛ nto: “Vo wayuhika mvudu, wayudjaseka loko,” ndo onto l’onto ayodjasɛ “la tshina di’okodi andi wa vinyo, ndu la tshina dia utamba andi wa fingu. Ku nduku untu ayuwautsha woma.” (Isaya 65:21, 22; Mika 4:4) Wɔma hatoyala nto: Ata, akambo wa ngala, kana awui w’epetenge wayoshila pondjo. (Osambu 46:8, 9; Tukedi 2:22) “Kete tshe yambuyala la mumuya ndu la ki. [Anto] wambutundo la kimbu y’ongengongeno.”—Isaya 14:7.
16 L’andja w’oyoyo, tita nsango tahandjola tokanyi ta Satana tayomɔ. Lo dihole dia mbokaka nsango ya ngasɔ, ‘anto wayodjasɛ la nkɛtɛ wayekaka losembwe mɛtɛ.’ (Isaya 26:9; 54:13) Oma l’olakanyelo wa dimɛna wa lo nyuma ɔnɔnyi l’ɔnɔnyi, ‘nkɛtɛ mɛtɛ ayolola la ewo ka Jehowa oko watololaka ndjale la ashi.’ (Isaya 11:9) Tokanyi t’eshika la ditshelo diakoka keketsha onto mbayodiangana l’atei w’anto. (Filipi 4:8) Ohokanyiya: tshunda di’anto wa l’andja w’otondo waya kema l’akambo a ngala, la lokaki, ndo la kandjema—nkumbo ka l’andja w’otondo k’anto l’ɔnango, lɛnɛ ele onto tshɛ ekɔ l’elowa wa nyuma kaki Nzambi. Mɛtɛ, kânga nshi nyɛ, lemba la woke l’anto wekɔ lo monɛ waonga asɔ l’etema awɔ.—Ngalatiya 5:22, 23.
Bonde Kakongande Edja Nganɛ?
17 Ko lande na kakonga Jehowa edja nganɛ dia nde minya akambo wa kɔlɔ ndo tshungola ekambi ande ko mbaɔtshiya l’andja w’oyoyo na? Tênde kɛnɛ kakahombe salema. Kɛnɛ koleki ohomba ele oyindjamelo wa lowandji laki Jehowa, lotshungɔ lande la monga owandji. Lam’akandatshike dia tshanda y’ɔlɔlɔ mbeta, nde ambɛnya mɛtɛ mɛtɛ ɔnɛ ɛlɔmbwɛlɔ k’onto ndamɛ, aha la mendɛ le Nzambi, ambokita tatala. (Jeremiya 10:23) Ɔnkɔnɛ, kakianɛ Jehowa aya la shadiya tshɛ dia minya ɛlɔmbwɛlɔ k’onto ko mbidja ɛlɔmbwɛlɔ ka Diolelo dia l’olongo dialɔmbwama oma le Kristo.—Danyele 2:44; Mateu 6:9, 10.
18 Kɛnɛ kambosalema l’edja ka deko nɛ tshɛ ekɔ oko kɛnɛ kakasalema lo nshi y’Abarahama. Jehowa akatɛ Abarahama ɔnɛ tokanula tande wayokita nkɛtɛ ya Kanana—koko vɔ wakahombe konga l’edja k’ɛnɔnyi nkama nyɛi, “dikambo [lâsɔ ko] munga k’Ase Amɔra katakoke tshɛ.” (Etatelo 12:1-5; 15:13-16, NW) Lanɛ, ondo tshɛkɛta “Ase Amɔra” (kabila kakaleke efula) nembetshiyaka Ase Kanana lo tshɛ kawɔ. Ɔnkɔnɛ, suke l’ɛnɔnyi nkama nyɛi wakahombe mbeta la ntondo ka Jehowa ndjosha anto ande diaaso dia vɔ mbɔsa nkɛtɛ ya Kanana. L’etena kakɔ kâmɛ, Jehowa akatshike wedja wa Kanana dia vɔ pamia mbekelo yawɔ. Kakɔna kakayotombaka na?
19 Dibuku dimɔtshi (Bible Handbook) diakafunde yɔnɛ Henry Halley mbutaka ɔnɛ lo Megido, wanɛ watshimola nkɛtɛ dia mbekaka emindo wa lo nshi y’edjedja (archéologues) wakashola diangɔ diakatshikala oma l’elanyelo ka tɛmpɛlɔ k’Ashɛtarɔta, jambizambi ya wad’aki Baala. Nde akafunde ate: “Ndjâka wɛ mumɔ mɛtɛlɛ ngana tsho oma lo tɛmpɛlɔ kɛsɔ ko wɛ mɛna dihole diakundɛwɔ edo, lɛnɛ ele mbaka efula yele la bɛtshi di’ana wakawalambolaka lo tɛmpɛlɔ kakɔ. . . . Amvutshi wa Baala la w’Ashɛtarɔta mbaki l’ɔkɛndɛ wa ndjakaka ana w’akɛnda.” “Etshelo kekina ka kɔlɔ efula kakawasalaka [aki] kɛnɛ kakawelɛka ɔnɛ ‘elambo w’etshina ka luudu.’ Etena kakawakaka luudu, wakahombaka nambola ɔna ko pakɛ odo ande l’atei w’ehele ka luudu.”
20 Yɔnɛ Halley ekɔ lo nembetshiya ate: “Ɔtɛmwɛlɔ wa Baala, w’Ashɛtarɔta, ndo wa tozambizambi tokina t’Ase Kanana, waki afɛstɔ wakaleke tshɛ ndola l’awui wa sɔnyi; tɛmpɛlɔ yawɔ yaki ahole wa salaka akambo wa kɔlɔ. . . . Ase Kanana wakatɛmɔlaka tozambizambi tawɔ lo salaka awui a mindo la ntondo katɔ, . . . ndo lo ndjakaka anawɔ wa nondo wakawalambolaka oko elambo le tozambizambi takɔ. Ondo, lo yɛdikɔ ya woke, nkɛtɛ ya Kanana yakayoyala oko woho ɔmɔtshi wa Sɔdɔma la Ngɔmɔra lo wodja w’otondo. . . . Onde tshunda di’anto wa ngasɔ wakasalaka awui wa mindo wa mamba ndo akambo wa ngala oko wa nyama diakakoke tshikala edja? . . . Wa arkeɔlɔgɛ (ambeki w’emindo wa lo nshi y’edjedja) wakatatshimaka nkɛtɛ lo esomba w’Ase Kanana mambaka nganɛ waki Nzambi kombalanya esadi esadi, la ntondo k’etena kakandayowalanyaka.”—Ɛdika la 1 Khumi ya Dikanga 21:25, 26.
21 Kɔlɔ k’Ase Amɔra ‘kakayokoka tshɛ.’ Ɔnkɔnɛ, l’etena kɛsɔ, Jehowa aki la shadiya tshɛ dia mbashila oshiki. Ngasɔ mbele ndo ɛlɔ kɛnɛ. Andja ɔnɛ wambolola l’akambo a ngala, l’awui a mindo, ndo anto wekɔ lo mɛnga ɛlɛmbɛ wa Nzambi diɛngɛku. Lam’ele sho mpetshaka etshelo ka kɔlɔ efula kaki l’Ase Kanana k’edjedja, etshelo ka kimɔka ana w’akɛnda oko elambo, ndo lohetsho lɔsɔ bu kɔlɔ mɛtɛ, kayotota lo dikambo dia woho wakimɔwɔ miliyɔ y’ɛlɔngɔlɔngɔ oko elambo lo ata walɔma l’andja ɔnɛ, ata wa kɔlɔ efula ndeka ndo kɛnɛ tshɛ kakatshamaka la Kanana na? Mɛtɛ, Jehowa ekɔ kakianɛ la shadiya tshɛ dia komiya andja ɔnɛ.
Ekotshamelo ka Dikambo Dikina
22 Oma lo lotutsha lele la Jehowa lo nshi nyɛ y’ekomelo, dikambo dikina nto diekɔ lo salema. Nde ekɔ lo kimɔ etena ka tshumanya ndo ndakanya olui a woke w’anto wamboshila ndekana miliyɔ tshanu. L’ɛlɔmbwɛlɔ ka Jehowa, vɔ wambɔlɔngɔswama dia mbɔtɔ l’atei w’ɔlɔngɔswamelo watatetemala ntshɔ otsha la ntondo. Apami, amato, ndo ɛlɔngɔlɔngɔ wekɔ lo ndowanyema woho wa vɔ mbetsha anto akina awui wa mɛtɛ wa lo Bible. L’ekimanyielo ka nsanganya yawɔ ndo k’ekanda watɛkɛta awui wa lo Bible, vɔ mbekaka mboka ya Nzambi yoludi la ngandji. (Joani 13:34, 35; Kolosai 3:14; Heberu 10:24, 25) Lâdiko dia lâsɔ, vɔ wekɔ lo pamia akoka awɔ lo akambo wa wokelo wa mvudu, w’atɔtɔ, wa fundaka ekanda, ndo l’awui akina dia vɔ keketsha olimu w’esambishelo ka “lukumu l’ololo.” (Mateu 24:14) Ondo mɛtɛ akoka asɔ wa lo wetshelo ndo wa lo wokelo wa mvudu wayotonga ohomba efula l’andja w’oyoyo.
23 Mɛtɛ, Jehowa ekɔ lo nɔngɔsɔla ekambi ande ɛlɔ kɛnɛ dia vɔ tenyanya “fɔnu ka woke” ko mbɔtɔ l’andja w’oyoyo wa losembwe. L’etena kɛsɔ, ndoko Satana kana andja ande wa kɔlɔ wayohomba ndɔshana la so, ndoko hemɔ, ndoko lonyangu, ndoko nyɔi. La wangasanu w’efula ndo l’ɔlɔ wa mamba, ekambi wa Nzambi wayomɛ sala olimu w’ɔngɛnɔngɛnɔ wa kadimola nkɛtɛ paradiso, lɛnɛ ele “ɔngɛnɔngɛnɔ w’efula” wayoyalaka lushi tshɛ. Sho mɛtɛ tekɔ la diɛsɛ dia mamba dia sɛna lo tena nɛ di’ekomelo, tekɔ la shaka ya diɛsɛ dia mbeya Jehowa, mbokambɛ, ndo mbeya ɔnɛ, kem’edja nto, ‘tayedia ɛtɛ aso dikambo etshungwelo kaso kaya suke’!—Luka 21:28; Osambu 146:5.
[Study Questions]
1, 2. (a) Ngande wayotshikitana etshungwelo kayosala Jehowa nshi nyɛ la kɛnɛ kakandasalaka lo nshi y’edjedja? (b) Jehowa ayɔtshiya anto ande l’andja a woho akɔna?
3. Lo ndjela ɛtɛkɛta wa Yeso, ngande wayoyala “fɔnu ka woke”?
4. Lande na kayoya elombwelo ka Nzambi le “Babilona ka Wuki”?
5. Ngande wayomɛ “fɔnu ka woke”?
6, 7. Lande na kahakoke ekambi wa Jehowa kɔmɔ etema lam’ayowowaɔtwɛ dia mbalɔsha lo “fɔnu ka woke”?
8. Naa akambo wa mamba wayosalema la ntondo ka Jehowa ndjaka atshi wa kɔlɔ, ndo etombelo akɔna wayoyala l’akambo akɔ asɔ?
9. Lande na kakoka ekambi wa Jehowa ‘mbedia ɛtɛ awɔ’ lam’ayosalema akambo wa mamba?
10. Ngande wakɔndɔla Dui dia Nzambi kondoko ya “fɔnu ka woke”?
11. Bonde kayotshungɔ ekambi wa Jehowa oma lo “fɔnu ka woke”?
12. Kakɔna kakoka wanɛ wayohandɔ l’Armagɛdɔna kongɛ l’ɔngɛnɔngɛnɔ tshɛ?
13. Ngande wayosala Yeso olimu wa kɔnɔla anto, olimu wakandamɛ sala lam’akinde lanɛ la nkɛtɛ?
14. Etshungwelo kakɔna kayokondja ekambi wa Jehowa wakashile mvɔ?
15. Otote awui amɔtshi wayonga l’andja w’oyoyo.
16. Lande na kayodiangana losembwe l’atei w’andja w’oyoyo w’otondo?
17. Bonde kakonga Jehowa edja nganɛ la ntondo ka nde ndjonya akambo wa kɔlɔ tshɛ na?
18. Etena kakɔna kakahombe tokanula t’Abarahama ndjokita nkɛtɛ ya Kanana?
19, 20. Mbekelo yakɔna yakafulanɛ l’atei w’Ase Kanana?
21. Ngande wafɔna kɛnɛ kakasalaka Ase Kanana la kɛnɛ kasalema nshi nyɛ?
22. Kakɔna kambosalema oma lo lotutsha la Jehowa lo nshi yaso nyɛ?
23. Lande na kele monga la lɔsɛnɔ lo nshi yaso nyɛ ekɔ mɛtɛ tshondo ya diɛsɛ?
[Caption]
[Questions]
[Caption on page 26]
[Caption on page 26]
Nkɛtɛ k’otondo kayokadimɔ paradiso
[Caption on page 29]
[Review on page 29]
Wembola w’Ovuswelo
◻ “Fɔnu ka woke” kɛdikɛdi na, ndo ngande wayomɛ fɔnu kakɔ?
◻ Bonde kele ta diayɔhɔhɔla Ngɔngɔ dia ndɔshana l’ekambi wa Jehowa diayokita tatala?
◻ Ngande wayokomɛ “fɔnu ka woke”?
◻ Naa ɛlɔlɔ wa diambo efula wayotokondja l’andja w’oyoyo?
◻ Bonde kakonga Jehowa edja nganɛ la ntondo ka nde mbela ekomelo k’andja ɔnɛ?