Kem’edja Diolelo diaki Nzambi diayanga totshungola!
“Diulelu diaye diayi. Lulangu laye latshami la kete uku atshamalo l’ulungu.”—MAT. 6:10.
1. Naa wetshelo w’ohomba waketsha Yeso?
ETENA kakasha Yeso Kristo Dako diande dia lo dikona, nde akadje ndo dɔmbɛlɔ dia ɛnyɛlɔ diɛnya lo tshena pe wetshelo ande w’ohomba. Nde aketsha ambeki ande dia nɔmbaka ɔnɛ: “Diulelu diaye diayi. Lulangu laye latshami la kete uku atshamalo l’ulungu.” (Mat. 6:9-13) Yeso “akatakindulaka l’esumba ndu lu ngelu, atasambisha lukumu l’ololo la diulelu dia [Nzambi].” (Luka 8:1) Kristo akakeketsha ambeki ande dia vɔ ‘tetemala nyanga ntondo diolelo la ɔlɔlɔ wa Nzambi.’ (Mat. 6:33) Etena kekayɛ sawo nɛ, yanga toho ta kamba la awui wa lɔkɔ lo esambishelo. Ɛnyɛlɔ, enda woho wakokayɛ kadimola lo ambola anɛ: Naa ohomba wa losango la Diolelo? Anto wekɔ l’ohomba wa tshungɔ oma lo na? Ndo ngande wayototshungola Diolelo diaki Nzambi?
2. Ohomba akɔna wele la losango la Diolelo?
2 Yeso akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mat. 24:14) Lokumu l’ɔlɔlɔ lendana la Diolelo diaki Nzambi lekɔ ohomba efula. Lɔ lekɔ mɛtɛ losango loleki ohomba lo andja w’otondo! Lo tshumanelo ndekana 100 000 di’Ɛmɛnyi wa Jehowa wa lo nkɛtɛ k’otondo, ekambi waki Nzambi suke la miliyɔ esambele wekɔ lo kamba olimu w’esambishelo lo yoho yahatasalemaka ndoko lushi. Vɔ mbewoyaka anto akina dia Diolelo diamboshikikɛmaka. Oshikikelo adiɔ ekɔ lokumu l’ɔlɔlɔ, nɛ dia vɔ nembetshiyaka dia Nzambi amboshikikɛ lowandji lɔmɔtshi l’olongo dia nɔmbɔla awui wa la nkɛtɛ tshɛ. Lo ɛlɔmbwɛlɔ ka Diolelo, lolango laki Jehowa layotshama la nkɛtɛ oko atshamalɔ l’olongo.
3, 4. Kakɔna kayotomba etena kayotshama lolango laki Nzambi la nkɛtɛ?
3 Kakɔna kayokomɛ anto etena kayosalema lolango laki Nzambi la nkɛtɛ? Jehowa “ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji.” (Eny. 21:4) Anto hawototata nto kana mvɔ l’ɔtɛ wa pɛkato ndo eongelo ka kema kokele kakatahowɔ. Wanɛ wakavu wele lo yimba yaki Nzambi wayokondja diaaso dia ndjɔsɛna pondjo pondjo, nɛ dia Bible ndakaka ɔnɛ: “Eulwelu k’antu w’ololo la antu wa kolo uma lu nyoi kayuyala.” (Etsha 24:15) Ata, hemɔ ndo ndjala hatoyala nto, ndo nkɛtɛ kayokadimɔ paradiso. Kânga nyama yele ngala nshi nyɛ yayɔsɛna lo wɔladi la anto ndo lam’asayɔ.—Osam. 46:9; 72:16; Is. 11:6-9; 33:24; Luka 23:43.
4 L’ɔtɛ w’ɛtshɔkɔ wa diambo ɛsɔ wayoya oma lo ɛlɔmbwɛlɔ ka Diolelo, bu dui dia diambo dia prɔfɛsiya ka lo Bible mɛnya woho wayonga lɔsɛnɔ lo nshi shɔ lo kamba la ɛtɛkɛta wakeketsha ɛnɛ: “Akanga a memakana wayukita kete, ndu wayongenangena la etshoko efula wa ki.” Ko kayotota dikambo di’anto wa kɔlɔ? Afundelo wakatatshi ɔnɛ: “Etenyi ka tshitshe ketu, k’untu a kolo hatanema ntu.” Koko, “wane watulungamelaka [Jehowa] wayukita kete.”—Osam. 37:9-11.
5. Kakɔna kayanga komɛ dikongɛ nɛ di’akambo?
5 Di’akambo asɔ tshɛ salema, dikongɛ di’akambo dia nshi nyɛ ndo mandji yadiɔ yalɔshana, ɛtɛmwɛlɔ adiɔ ndo awui adiɔ w’okanda pombaka minyɛma. Ndo kɛsɔ mɛtɛ kayosala lowandji la l’olongo. Ɔprɔfɛta Danyɛlɛ akasambiyama dia mbuta ɔnɛ: “Lu nshi ya khumi ya dikanga yako [yalɔmbɔla kakianɛ], [Nzambi] leli l’ulungu ayutundja diulelu [dia l’olongo] diahalanaki pundju. Dio hadiuyala l’okongo a wudja ukina. Dio diayulanya waulelu ako tshe [wa nshi nyɛ], diayâshila ushiki, ku dio diame diayushikikala pundju.” (Dan. 2:44) Lo etena kɛsɔ, Diolelo diaki Nzambi, mbuta ate lowandji l’oyoyo la l’olongo layɔlɔmbɔla tshunda di’anto dia lo nkɛtɛ k’otondo. Ayoyala “ulungu w’uyuyu la kete y’uyuyu, lene udjashi akambu w’ololo.”—2 Pet. 3:13.
Nshi nyɛ mbamboleka ohomba wa etshungwelo
6. Ngande wɛnya Bible woho wasalema awui wa kɔlɔ lo andja wa kɔlɔ ɔnɛ?
6 Etena kakatɔmbɔkwɛ Satana ndo Adama la Eva Nzambi lo nyanga dia vɔamɛ shikikɛ kɛnɛ kele ɔlɔlɔ la kɔlɔ, mbakatatɛ ofukutanu mbɔtɔ lo lɔsɛnɔ l’ana w’anto. La ntondo ka Mvula k’elola ka lo andja w’otondo, ɛnɔnyi ndekana 1 600 l’ɔkɔngɔ w’ɔtɔmbɔkwɛlɔ, ‘kɔlɔ k’anto kakahame efula la nkɛtɛ ndo tokanyi t’etema awɔ taki tshɛ kɔlɔ.’ (Etat. 6:5) Ɛnɔnyi oko 1 300 l’ɔkɔngɔ wa Mvula k’elola, Sɔlɔmɔna akɛnyi di’awui waki paka kɔlɔ diakɔ diakandafunde ate: “Dimi lakandula wane wakavu edja uleki wane wasena, weki la lumu. Ee, dimi lakaleki ntumbula one lahatayala, ndu lahatenyi akambu wa kolo watutshamaka la tshina di’ulungu.” (Und. 4:2, 3) Ɛlɔ kɛnɛ, ɛnɔnyi oko 3 000 oma lâsɔ, kɔlɔ kekɔ lo tatetemala pama.
7. Lande na kele nshi nyɛ mbamboleka ohomba wa Nzambi totshungola?
7 Lam’ele awui wa kɔlɔ waya edja efula, nshi nyɛ mbamboleka ohomba wa Diolelo diaki Nzambi totshungola. Awui wakaleke tshɛ kɔlɔ lo ɛnɔnyi 100 wetshi ɛnɛ ndo awui akɔ wekɔ lo tatetemala ndana. Ɛnyɛlɔ, tshunda dimɔtshi dielɛwɔ Worldwatch Institute mbutaka ɔnɛ: “Ata wakalɔma lo ntambe [20] wakadiake anto efula mbala shato ndeka ata tshɛ wakalɔma oma lo ntambe ka ntondo polo 1899.” Tatɛ oma lo 1914 anto ndekana miliyɔ 100 wakadiakema lo ata! Dibuku dimɔtshi mbɔsaka dia anto miliyɔ 60 wakadiakema lo Ta dia hende dia lo andja w’otondo. Lam’ele wedja ɛmɔtshi waya la waa bɔmbɛ atɔmikɛ, anto waya la akoka wa shila efula k’anto oshiki. Ndo kânga mbele ehamelo wambosalema lo awui wa siansɛ ndo w’aseka enganga, ɔnɔnyi tshɛ ana miliyɔ tshanu wekɔ lo mvɔ la ndjala.—Enda tshapita 9 ya dibuku Bible etshatɔ mɛtɛ?
8. Kakɔna kambɛnya ɛnɔnyi nunu wambɔlɔmbɔla anto?
8 Welo wadja anto dia shidiya akambo wa kɔlɔ wambokita tatala. Ase pɔlitikɛ, amundji w’okanda ndo atshunda w’ɛtɛmwɛlɔ wa lo andja ɔnɛ hawokotshɛ anto ehomba awɔ woleki wele oko wɔladi, lɔsɛnɔ la dimɛna ndo esakelo. Lo dihole dia kandola ekakatanu wa weke wele la anto, atshunda asɔ wekɔ lo kotshɛ anto ekakatanu ekina. Aha la tâmu, ɛnɔnyi nunu wambɔlɔmbɔla anto shikikɛka mɛtɛ k’ɛtɛkɛta ɛnɛ: “Untu hakendakenda lu mbuka uma lu wulu andi! Lam’atundokendakendaka, ndi ndame heyi nombola ekulu andi.” (Jer. 10:23) Eelo, “untu mbulela[ka] unyandi dia mbusuya.” (Und. 8:9) Ndo nto, “Ditungatunga tshe diatukhumaka akhumu ndu diatutataka nyono lu diutelu.”—Romo 8:22.
9. Awui akɔna walongamɛ Akristo wa mɛtɛ dia mɛna lo “nshi y’ekumelu” nyɛ?
9 Lo kɛnɛ kendana la tena diaso, Bible kakatatshi ɔnɛ: “Lu nshi y’ekumelu, tena dia wulu diayuyala.” L’ɔkɔngɔ wa kɔndɔla woho wayonga lɔsɛnɔ lo nshi y’ekomelo, prɔfɛsiya kakɔ mbutaka ɔnɛ: “Antu wa kolo la akanga a lukesu wayuhama lu akambu awo wa kolo.” (Adia 2 Timote 3:1-5, 13.) Kɛsɔ kalongamɛ Akristo, nɛ dia “wa la kete tshe weko lu wulu wa kanga kolo,” Satana. (1 Joa. 5:19) Koko, losango l’ɔlɔlɔ ele Nzambi ayanga tshungola wanɛ tshɛ wawoka ngandji. Vɔ wayanga tshungɔ oma lo andja ɔnɛ wataleke ntshɔ otsha lo kɔlɔ.
Onto ɔtɔi lakoka totshungola
10. Lande na kele Jehowa oto mbakoka totshungola?
10 Etena kasambishayɛ lokumu l’ɔlɔlɔ, ɛnya dia Jehowa oto mbakoka totshungola. Ndamɛ oto mbele la wolo ndo la nsaki ka tshungola ekambi ande oma lo awui tshɛ wa kɔlɔ. (Etsha 4:24, 31; Eny. 4:11) Sho kokaka ndjashikikɛ dia Jehowa ayotshungolaka nshi tshɛ anto ande ndo ayokotsha sangwelo diande, nɛ dia nde akatshimbe ate: “Kene kakamakani, kayuyala.” Ɔtɛkɛta ande ‘hawotokalola le nde okalolakalola.’—Adia Isaya 14:24, 25; 55:10, 11.
11, 12. Eshikikelo kakɔna kasha Nzambi ekambi ande?
11 Jehowa akashikikɛ dia nde ayotshungola ekambi ande etena kayondolanya anto wa kɔlɔ. Etena kakandatome ɔprɔfɛta Jeremiya dia nde tosambisha la dihonga tshɛ atshi wa kɔlɔ, Nzambi akate ate: “Tuwaukaki woma.” Lande na? “Dimi leko kame laye dia nkutshungula.” (Jer. 1:8) Woho akɔ wâmɛ mbele etena kaki Jehowa suke la ndanya Sɔdɔma la Ngɔmɔra, nde akatome andjelo ahende dia totondja Lɔta la nkumbo kande oma lo dihole sɔ. “[Jehowa] akaloshiya Sodoma la Ngomora ekama wa tsho kame la dja uma l’ulungu.”—Etat. 19:15, 24, 25.
12 Kânga lo tshɛ kawɔ, Jehowa kokaka tshungola wanɛ wasala lolango lande. Etena kakandalanya andja wa kɔlɔ wa lo nshi y’edjedja la Mvula k’elola, nde “akashimbela Noa, umvutshi w’akambu w’ololo, la antu akina esambeli.” (2 Pet. 2:5) Jehowa ayotshungola nto anto w’ɔlɔlɔ etena kayondolanya dikongɛ dia kɔlɔ nɛ. Ɔnkɔnɛ, Ɔtɛkɛta ande mbutaka ɔnɛ: “Nyuyangi [Jehowa], nyu akanga a memakana tshe wa la kete, . . . nyuyangi akambu w’ololo, nyuyangi memakana. Undu, nyu mbeyaka mpanda lu lushi la kele ka [Jehowa].” (Zef. 2:3) L’ɔkɔngɔ w’elanyelo k’andja w’otondo, “antu w’uluwanyi wayukita kete. . . . Keli antu wa kolo wayunyema uma la kete.”—Tuk. 2:21, 22.
13. Ngande wayotshungɔ ekambi waki Jehowa wakavu?
13 Koko, ekambi waki Nzambi efula wamboshilaka la mvɔ la hemɔ, la ɛhɛnyɔhɛnyɔ ndo oma lo awui akina. (Mat. 24:9) Ngande wayotshungɔ anto asɔ tshɛ? Oko wakatadiɛnyi, “eulwelu k’antu w’ololo . . . uma lu nyoi kayuyala.” (Etsha 24:15) Ekɔ mɛtɛ ekeketshelo dia mbeya dia ndoko kakoka shimba Jehowa dia nde tshungola ekambi ande!
Lowandji l’ɔlɔlɔ
14. Lande na kashikikɛso dia Diolelo diaki Nzambi diekɔ lowandji l’ɔlɔlɔ?
14 Etena kasambishayɛ, wɛ kokaka nembetshiya anto dia Diolelo diaki Jehowa dia l’olongo diekɔ lowandji l’ɔlɔlɔ. Ekɔ ngasɔ nɛ dia diɔ kɛnɛmɔlaka waonga wa diambo waki Nzambi wele oko losembwe, ɔlɔlɔ ndo ngandji. (Euh. 32:4; 1 Joa. 4:8) Nzambi akasha Yeso Kristo ɔnɛ lele l’akoka woleki tshɛ wa nɔmbɔla nkɛtɛ Diolelo. Jehowa akakongɛ nto dia Akristo w’akitami 144 000 mbɔsama oma la nkɛtɛ dia tolɛ kâmɛ la Kristo l’olongo dia nɔmbɔla nkɛtɛ.—Eny. 14:1-5.
15. Ɛnya otshikitanu wele lam’asa Diolelo diaki Nzambi la ɛlɔmbwɛlɔ k’anto.
15 Ande otshikitanu wayoyala lam’asa ɛlɔmbwɛlɔ ka Yeso kâmɛ la anto 144 000 la ɛlɔmbwɛlɔ k’anto lee! Ewandji wa lo dikongɛ nɛ di’akambo kambaka mbala efula la awui wa ngala ndo konyaka ambolami awɔ lo ata wadiaka miliyɔ y’anto. Diakɔ diatolaka Afundelo diaha sho ndjaɛkɛ le onto, ‘laheye toshimbela.’ (Osam. 146:3) Koko, Kristo ayɔlɔmbɔla lo yoho yɔtɔnɛ la dionga diande dia dimɛna! Yeso akate ate: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu, ne dia lokoho lami leko ololo, la ushiko ami weko usadi.”—Mat. 11:28-30.
Nshi y’ekomelo yayanga komɛ!
16. Ngande wayokomɛ nshi y’ekomelo nyɛ?
16 Tatɛ lo 1914, andja ɔnɛ wakɔtɔ lo nshi yawɔ y’ekomelo kana “ekumelu k’etena kene.” (Mat. 24:3) Kem’edja, kɛnɛ kakelɛ Yeso ɔnɛ ‘fɔnu ka woke’ kayoya. (Adia Mateu 24:21.) Woho wa fɔnu kɛsɔ kahatayalaka ndoko lushi kayolanya andja waki Satana tshɛ. Ko ngande wayotatɛ fɔnu ka woke? Ndo ngande wayotokomɛ?
17. Kakɔna kata Bible kayosalema l’etatelo ka fɔnu ka woke?
17 Fɔnu ka woke kayotatɛ la shashimoya. Eelo, ‘lushi la Jehowa’ layoya aha la anto mbeya “lam’ata antu vati: Eko ki la lutui tshitshi.” (Adia 1 Tesalonika 5:2, 3.) Fɔnu kakatɛkɛtama kayotatɛ etena kayɛna wedja dia wekɔ suke la kandola ekakatanu awɔ ɛmɔtshi wa weke. Elanyelo ka shashimoya ka “Babilona ka Wuki,” mbuta ate tshunda dia lo andja w’otondo di’ɛtɛmwɛlɔ wa kashi kayokashimola anto. Nkumi ya dikanga ndo anto akina wayamba etena kayolanyema Babilɔna ka Woke.—Eny. 17:1-6, 18; 18:9, 10, 15, 16, 19.
18. Ngande wayosala Jehowa etena kayɔlɔsha Satana ekambi Ande?
18 Lam’ayokoma awui tshɛ lo kondoko, “tulimbitelu tayuyala lu unya lu ngondo la lu toto,” ndo “djimbitelu ya On’a untu yayene l’ulungu.” Lâsɔ, tayokoka ‘mbedia ɛtɛ aso nɛ dia etshungwelo kaso kaya suke.’ (Luka 21:25-28; Mat. 24:29, 30) Satana kana Ngɔngɔ la anto ande wayɔlɔsha ekambi waki Nzambi. Koko lo kɛnɛ kendana la wanɛ wayɔlɔsha ekambi ande wa kɔlamelo, Jehowa mbutaka ɔnɛ: ‘Ɔnɛ lanyonanda ambonanda ɔna sso diami.’ (Zek. 2:8) Ɔnkɔnɛ, welo wayodja Satana dia mbalɔsha wayokita tatala. Lande na? Nɛ dia Nkumadiɔndjɔ Jehowa ayotshungola ekambi ande aha la tshimbatshimba.—Ezek. 38:9, 18.
19. Lande na kakokaso monga l’eshikikelo dia alembe waki Nzambi wayolanya dikongɛ diaki Satana?
19 Etena kayolanya Nzambi wedja, ‘vɔ wayeya dia nde kele Jehowa.’ (Ezek. 36:23) Nde ayotoma alembe ande, mbuta ate nunu nunu dia ditongami dia lo nyuma diayɔlɔmbwama oma le Kristo Yeso dia ndanya etenyi kayotshikala ka dikongɛ diaki Satana dia la nkɛtɛ. (Eny. 19:11-19) Etena kohɔso dia lo diaaso dimɔtshi, l’otsho ɔtɔi ondjelo ɔtɔi oto ‘akadiake’ atunyi waki Nzambi ‘nunu lokama la akumi enanɛi la tanu,’ sho kokaka monga la eshikikelo dia alembe wa l’olongo wayolanya esadi eto awui tshɛ wendana la dikongɛ diaki Satana dia la nkɛtɛ etena kayokoma fɔnu kɛsɔ lo kondoko lo Aramangɛdɔna. (2 Khum. 19:35; Eny. 16:14, 16) Satana la ɛdiɛngɛ ande wayodjama lo lokanu l’edja k’ɛnɔnyi kinunu ndo l’ekomelo vɔ wayodiakema.—Eny. 20:1-3.
20. Kakɔna kayosala Jehowa lo tshimbo ya Diolelo?
20 Olongo la nkɛtɛ wayɛdiama oma lo akambo wa kɔlɔ ndo anto w’ɔlɔlɔ wayɔsɛna pondjo pondjo la nkɛtɛ. Jehowa ayɛnya dia nde ekɔ Otshungodi wa Woke. (Osam. 145:20) Lo tshimbo ya Diolelo, nde ayoyindja lowandji lande, ayokidia lokombo lande l’ekila ndo ayokotsha sangwelo diande dia woke diendana la nkɛtɛ. Onga la ɔngɛnɔngɛnɔ w’efula lo esambishelo kayɛ etena kewoyayɛ anto akina lokumu l’ɔlɔlɔ ndo kakimanyiyayɛ ‘anto wakoka kondja lɔsɛnɔ la pondjo’ dia vɔ shihodia dia kem’edja Diolelo diaki Nzambi diayanga totshungola!—Etsha 13:48.
Onde wɛ âkohɔ?
• Ngande wakɛnya Yeso ohomba wa Diolelo?
• Lande na kamboleka ohomba w’etshungwelo nshi nyɛ?
• Akambo akɔna wakokaso nongamɛ etena kayoya fɔnu ka woke?
• Ngande wɛnya Jehowa dia nde ekɔ Otshungodi wa Woke?
[Esato wa lo lɛkɛ 12, 13]
Ɔtɛkɛta wa Nzambi wakatatshi dia olimu w’esambishelo wa l’andja w’otondo wayosalema lo nshi yaso nyɛ lo yoho yahatasalemaka
[Osato wa lo lɛkɛ 15]
Oko wakatshungola Jehowa Nɔa la nkumbo kande, Nde koka totshungola
[Osato wa lo lɛkɛ 16]
Jehowa “ayukitula asoi tshe; . . . nyoi hayuyala ntu.”—Eny. 21:4