Jehowa: Nzambi Kashola Toseke
“Ekɔ Nzambi kɛmɔtshi l’elongo kele Ombishodi wa toseke.”—DANYƐLƐ 2:28, NW.
JEHOWA, Nzambi kaheme l’andja w’otondo ndo koludi la ngandji, ndamɛ oto mbele Otungi, ndo nde ekɔ Nzambi ka lomba ndo ka losembwe. Nde bu l’ohomba wa ndjashɛshɛ ɔnɛ kele aha anto mbêya, ndo nde hɛnyi ndoko ohomba wa mbishɛ elimu ande kana awui wasangoyande ntsha. Ndamɛ ndjasholaka l’etena kalangande ndo lo yoho yɛnande ɔlɔlɔ. Lo yoho shɔ mbotshikitanyinde l’Ɔndɔshi ande, Satana Diabolo, ɔnɛ latoyangaka dia mbishɛ tokanyi tande ndo ndjashɛshɛ ɔnɛ kele aha anto mbêya.
2 Woho wotshikitanyi Jehowa nde la Satana mbotshikitanyi ndo atɛmɔdi awɔ. Wanɛ wɔtɔ lo lokolo la Satana wekɔ anto wa dungi pende ndo wa lokeso. Vɔ nyangaka ndjaɛnya oko anto w’ɛlɔlɔ, ko tete vɔ ntshaka ndo akambo wa lo wodjima. Paulo akatɛ Akristo wa la Kɔrɛtɔ di’aha vɔ mamba dikambo sɔ. “Antu [wa ngasɔ] weli atumami wa kashi, ekambi wa lukesu, wambuyakadimula uku atumami wa Kristu. Oso kema dikambu dia mamba, ne dia ndu Satana katukadimoka uku ondjelo a yanyi.” (2 Koreto 11:13, 14) Akristo, vɔ mbɔsaka Kristo oko Ɔnɔmbɔdi awɔ. Lam’akinde lanɛ la nkɛtɛ, nde akakɛnɛmɔlaka lonto la Jehowa Nzambi, She, lo yɛdikɔ ya kokele. (Heberu 1:1-3) Ɔnkɔnɛ, lam’ayelawɔ ɛnyɛlɔ ka Kristo, Akristo wekɔ lo mbokoya Jehowa, Nzambi k’akambo wa mɛtɛ, Nzambi k’osase ndo katondja awui lo sɛkɛ. Ndo vɔ lawɔ nto hawɛnyi ohomba mbishɛ lonto lawɔ, elimu awɔ, kana awui wasangoyawɔ ntsha.—Efeso 4:17-19; 5:1, 2.
3 L’etena kɛnande ɔnɛ etena koleki ɔlɔlɔ tɔ kɛnɛ, Jehowa mbisholɛka anto akambo wakiwɔ kombeyaka ntondo lo kɛnɛ kendana l’asangwelo ande ndo l’awui wayosalema lo nshi yayaye. Lo yoho shɔ mbende Nzambi katosholaka toseke. Ɔnkɔnɛ, wanɛ walanga mbokambɛ nɔmbamaka—ndo kɔkɔmiyamaka—dia mbeka akambo asɔ washolande. L’ɔnɔnyi wa 1994, wakakɔnya Ɛmɛnyi wa Jehowa ndekana 145000 lo wodja ɔmɔtshi wa l’Erɔpɛ ko wakɛnyi ɔnɛ, lo yɛdikɔ ya l’atei atei, ɔm’ɔmɔ la l’atei awɔ ndamɛ akasɛdingola wetshelo w’Ɛmɛnyi wa Jehowa ɛnɔnyi esato la ntondo ka nde ndjɔsa tɛdikɔ dia ndjoyala Ɔmɛnyi wa Jehowa. Vɔ wakayɔsaka tɛdikɔ tɔsɔ oma lo lolango lawɔ vamɛ, ndoko onto lakâsokoya. Ndo vɔ wakatetemala monga la lotshungɔ la sɔna kana ntsha kɛnɛ kalangawɔ. Ɛnyɛlɔ oko l’ɔtɛ wayotonaka anto amɔtshi ɛlɛmbɛ wa lâdiko wendana la lɔkɛwɔ l’Akristo, anto asɔ ndjɔ̂saka tɛdikɔ l’ɔkɔngɔ di’aha tetemala monga Ɛmɛnyi wa Jehowa. Dikambo dia diambo ko, lo ɛnɔnyi etanu ɛnɛ wetshi, efula k’anto asɔ, wanɛ waki ntondo Ɛmɛnyi wa Jehowa ko ndjomɔ, wakayɔsa tɛdikɔ tahombama dia vɔ kalola l’ɔnɔngɔ w’Ɛmɛnyi wa Jehowa.
4 Lo mɛtɛ, aha anto tshɛ watomba oma l’atei w’Ɛmɛnyi wa Jehowa mbayokalolaka, ndo amɔtshi wa l’atei awɔ waki l’ɛkɛndɛ a weke l’atei w’etshumanelo k’Akristo la ntondo ka vɔ ndjotomba. Ɔsɔ bu dikambo diahombaso mamba nɛ dia kânga ɔpɔstɔlɔ Judasɛ, ɔmɔtshi a l’atei w’ambeki wa Yeso wakalekaka nangema, akayotakɔ mboka. (Mateu 26:14-16, 20-25) Onde ɔsɔ ekɔ dui diahomba tosha okiyanu lo dikambo di’ɔtɛmwɛlɔ w’Akristo? Onde dui sɔ mɛnyaka ɔnɛ olimu w’olakanyelo wakamba Ɛmɛnyi wa Jehowa wekɔ anyanya? Ndoko, woho akɔ wâmɛ mbele kânga lokeso lakasale Judasɛ Isakariyɔtɛ komemadja ekotshamelo k’asangwelo wa Nzambi.
Ele Kanga-Nkudu-Tshɛ ko Ele ndo Kanga Ngandji
5 Jehowa ekɔ Nzambi ka ngandji. Nde ndjakiyanyaka dikambo di’anto. (1 Joani 4:7-11) Koyanga mbende lo dihole dia lâdiko, nde ngɛnangɛnaka mbɔtɔ l’anto ɔngɛnyi. Lo dikambo di’okambi ande ɔmɔtshi wa lo nshi y’edjedja, sho mbadiaka ɔnɛ: “Abarahama aketawo [Nzambi]. Wakawadiya mbetawo kandi uku ololo andi; wakaweti vati: Ongenyi a [Nzambi].” (Jakoba 2:23; 2 Ekondo 20:7; Isaya 41:8) Oko watotanɛka angɛnyi awui wa woshamu, kana toseke, woho akɔ wâmɛ mbatewoyaka Jehowa angɛnyi ande toseke tande. Yeso akokoya She lo dikambo sɔ, nɛ dia nde akɔtɔ l’ambeki ɔngɛnyi ndo akawatɛka toseke. Nde akawatɛ ate: “Dimi hanyeti ntu nti: Ekambi, ne dia ukambi heyi katsha uwandji andi. Keli dimi lambunyeta nti: Engenyi, ne dia lambunyewuya akambu tshe wakamuki le Papa.” (Joani 15:15) Akambo wa lo woshamu, kana “toseke” teya Jehowa nde l’Ɔnande la angɛnyi awɔ mbakakatanyaka lo dimama dia ngandji ndo dia diokanelo diahakoke pembɔ.—Kolosai 3:14.
6 Lokombo Jehowa lekɔ la kitshimudi y’ɔnɛ: “Nde Salaka dia Ndjâla”; kitshimudi shɔ mɛnyaka ɔnɛ nde kokaka ndjâla kɛnɛ tshɛ kahombande ndjâla dia kotsha kɛnɛ kakandasangoya. Jehowa bu ndoko l’ohomba wa mbishɛ eyango ande, oko ɔnkɔnɛ watosalaka anto, la wɔma w’ɔnɛ anto akina mbeyaka ndjosala di’aha akambo akɔ kotshama. Kɛdikɛdi, nde hakokaki kita tatala, diɔ diakɔ diasholande efula k’awui wasangoyande sala l’atei a Bible, Dui diande. Nde ekɔ lo tosha daka nɛ ɔnɛ: “Diui diatutumbaka uma l’unyo ami . . . hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”—Isaya 55:11.
7 Yema l’ɔkɔngɔ w’ɔtɔmbɔkwɛlɔ wakasalema l’Ɛdɛna, Jehowa akɛnya, lo tshena pe, lɛnɛ ayotokomɛ owanu wasande l’Ɔndɔshi ande, Satana. Lɔtɔngɔ lakalake Nzambi akahombe ndjominolama ko mboka kandji, koko aha lo pondjo; koko Satana ayohomba ndjominolama ko ndjodiakema lo pondjo. (Etatelu 3:15) L’ɔnɔnyi wa 33 lo tena diaso nɛ, Diabolo mɛtɛ akaminola Lɔtɔngɔ, lele Kristo Yeso, lam’akandawodiakisha. Lo yoho shɔ mbakakotsha Satana kɛnɛ kata Afundelo ndo, l’etena kakɔ kâmɛ, nde akɛnya ɔnɛ Jehowa ekɔ Nzambi k’awui wa mɛtɛ, koyanga mbele Satana mɛtɛ komonga la kanyi shɔ. Lohetsho lahetshande awui wa mɛtɛ ndo wa losembwe, ndo lotamanya lande la dionga diande diaha la ndjatshumoya, akayowokonyaka lo nde ndjosala kɛnɛ tshɛ kakatatshi Nzambi ɔnɛ Satana ayoyosala. Eelo, oyadi le atunyi w’akambo wa mɛtɛ koyanga le Satana ndamɛ, dui nɛ kotshamaka: “Shu kema la wulu a ntsha dikambu diutshikitanyi la akambu wa mete, paka dia mbudia akambu wa mete.”—2 Koreto 13:8.
8 Divɛsa nɛ di’Enyelo 12:12 diakakotshama tatɛ oma lam’akamɛ Diolelo dia Nzambi mbolɛ lo yoho yahɛnama l’ɔnɔnyi wa 1914: “Ulungu li, ongenengene, ndu wane watudjaseka loko. Fono kayuyala la kete ndu l’ashi a wuki, ne dia [“Diabolo,” NW] akayi le nyu. Ndi eko la kele ka wuki; ndi mbeyaka ati: Etena kami kambusukana.” Ko onde Satana ambokadimola dionga diande lam’eyande ɔnɛ etena ka tshitshɛ keto mbambotshikalɛ? Naka Satana ntsha ngasɔ, kete dui sɔ diayɛnya ɔnɛ nde ambetawɔ ɔnɛ Jehowa mbele Nzambi k’awui wa mɛtɛ ndo ndamɛ oto mbasungana tɛmɔlama lam’ele nde mbele Owandji Waheme Lâdiko dia Tshɛ. Koko, Diabolo halange mbetawɔ ɔnɛ wambowodja otshumba, oyadi kânga mbeyande kɛnɛ kele mɛtɛ.
9 Jehowa mɛnyaka kɛnɛ kayosalema lam’ayoya Kristo dia ndjolomboya andja ɔnɛ waki Satana. (Mateu 24:29-31; 25:31-46) Lo dikambo sɔ, Dui diande mbutaka ɔnkɔnɛ lo kɛnɛ kendana l’emboledi w’andja ɔnɛ: “Lam’ayowota vate: ‘Wɔladi la lotui tshitshi!’ lâsɔ ko elanyelo ka shashimoya ndja le wɔ wonya akɔ wâmɛ, oko lɔɔnɔ le omoto lele la diemi.” (1 Tɛsalɔnika 5:3, NW) Wanɛ wayela ɛnyɛlɔ ka Satana mɔnyɔlaka diewoyelo sɔ diokɛma hwe. Vɔ wekɔ totshungu nɛ dia etema awɔ wekɔ kɔlɔ, ndo dikambo sɔ mbashimbaka dia vɔ ndjatshumoya oma lo kɔlɔ yawɔ ndo tshikitanya eyango awɔ la awui wayatshutshuyawɔ dia ntsha ɔnɛ kele aha asangwelo wa Jehowa kotshama.
10 Wekɔ lo tɛkɛta awui efula lo dikambo dia wɔladi la lotui tshitshi l’andja ɔnɛ djekoleko tatɛ oma l’ɔnɔnyi wa 1986, ɔnɔnyi wakelamɛ oma le O.N.U. ɔnɛ Ɔnɔnyi wa Wɔladi l’Andja w’Otondo. Wakɔshi tɛdikɔ t’eshika dia mbidja wɔladi l’andja w’otondo, ndo tɛdikɔ takɔ tɔsɔ mɛtɛ mɛnamaka di’oko takayala l’etombelo ɛmɔtshi w’ɛlɔlɔ. Onde ɔsɔ mbele ekotshamelo k’otondo ka pɔlɔfɛsi kɛsɔ, ko kana tonyomokongɛ diewoyelo dikina dia diambo dia woho ɔsɔ? Jehowa ayohotola dikambo sɔ l’etena kakandashikikɛ. L’etena kɛnɛ, aha sho ndala djɔ lo nyuma, ‘tokongɛke wôngelo wa lushi la Jehowa ndo tolilamake lo timba taso.’ (2 Petero 3:12) Lam’ele nshi yekɔ lo teete ndo anto wekɔ lo taleke tɛkɛta dikambo dia wɔladi la lotui tshitshi, anto amɔtshi weya diewoyelo sɔ, koko diɔnyɔlaka l’okonda, mbeyaka ndjoleka monga la dihonga dia mbuta ɔnɛ Jehowa hatokotsha dui diande kana ɔnɛ nde hakoke dikotsha. (Ɛdika la Undaki 8:11-13; 2 Petero 3:3, 4.) Koko Akristo wa mɛtɛ mbeyaka ɔnɛ Jehowa ayokotsha kɛnɛ kakandasangoya!
Dilɛmiɛlɔ Diasungana le Anto Wɔsama oma le Jehowa oko Dihomɔ Diande
11 Nkumekanga Nɛbukadinɛza, owandji wa Diolelo dia woke dia Babilɔna, lam’akandɛnyi dɔ dimɔtshi diakôtshindja yimba efula ndo diakinde kokoka mbohɔ nto, nde akayange ekimanyielo. Ɛlɔmbɛdi ande, akanga w’alɔhɔ ndo akanga w’alɔka kokoka mbosakolɛ dɔ diakɔ koyanga mbolembetshiya kitshimudi yadiɔ. Koko Danyɛlɛ, okambi wa Nzambi, akakoke mbosakolɛdiɔ ndo mbolembetshiyadiɔ, kânga mbakandetawɔ l’otema ɔtɔi ɔnɛ aha oma lo lomba lande mbayondôsakolɛ dɔ diakɔ ko mbolembetshiya ndo kitshimudi yadiɔ. Danyɛlɛ akate ate: “[Nzambi] leli l’ulungu, atushulaka akambu wushami. Ndi akakenya, we khum’ekanga Nebukadineza, akambu wayuyala lu nshi yayayi.” (Danyele 2:1-30) Ɛnɔnyi nkama la ntondo, Yɔsɛfu, omvutshi okina waki Nzambi, akɛnyi woho akɔ wâmɛ ɔnɛ Jehowa mbele Ombishodi wa toseke.—Etatelu 40:8-22; Amose 3:7, 8.
12 Yeso mbele omvutshi wa Jehowa woleki woke tshɛ wakakambe olimu lanɛ la nkɛtɛ. (Etsha 3:19-24) Paulo akate ate: “Lu nshi y’edjedja, [Nzambi] akatelaka watshesu aui andi l’enyo w’amvutshi lu akambu efula la wehu efula wa ditelu. Keli l’ekumelu ka nshi yako, ndi akatutela diui l’unyo w’On’andi, lakandasonola ukito a diango tshe, uma le ndi mbakandatungi andja.”—Heberu 1:1, 2.
13 Jehowa akatɛkɛta l’Akristo wa ntondo lo tshimbo y’Ɔnande Yeso, ɔnɛ lakayowaewoya toseke ta Nzambi. Yeso akawatɛ ate: “Wakanyusha dia mbeya [“toseke t’ekila ta,” NW] diulelu dia [Nzambi].” (Luka 8:10) L’ɔkɔngɔ diko, Paulo akayɔtɛkɛta dikambo di’Akristo w’akitami ɔnɛ vɔ wekɔ ‘l’ɛse ka Kristo ndo wekɔ alami wa toseke t’ekila taki Nzambi.’ (1 Koreto 4:1) Ɛlɔ kɛnɛ, Akristo w’akitami wekɔ lo tetemala kamba olimu ɔsɔ, ndo vɔ mbele ɔhɔmbɔ wa kɔlamelo ndo wa kɛsɔ wakimɔ mbo ya ndɛ ya lo nyuma lo tena diasungana lo tshimbo y’Olui awɔ Walɔmbɔla (Collège central). (Mateu 24:45-47) Naka sho mbɔsaka amvutshi wa Nzambi wa lo nshi ya ntondo, djekoleko Ɔna Nzambi, la nɛmɔ di’efula, onde lâsɔ hatokoke nɛmiya anto anɛ wɔsama oma le Jehowa nshi nyɛ oko dihomɔ diande dia mbisholaka awui wa lo Bible wele ohomba efula le akambi ande lo tena nɛ dia wolo?
Tondjaka Akambo lo Sɛkɛ Kana Namaka Toseke?
14 Onde woho watotondjaka Jehowa akambo lo sɛkɛ mɛnyaka ɔnɛ Akristo pombaka mbisholaka kiambokambo tshɛ yeyawɔ nshi tshɛ? Akristo mɛtɛ wekɔ lo ndjela dako diakasha Yeso apɔstɔlɔ ande ɔnɛ ‘nyoyale la yewo oko eluyi ndo memakana oko tokudumba.’ (Mateu 10:16) Naka wambowatɛ di’aha vɔ tɛmɔla Nzambi oko ɔnkɔnɛ awafundɛ nkum’etema yawɔ, Akristo tetemalaka ‘kitanyiya awui wa Nzambi,’ nɛ dia vɔ mbeyaka ɔnɛ ndoko onto lele la lotshungɔ la mbidjɛ anto ɛlɛmbɛ lo woho wahombawɔ tɛmɔla Jehowa. (Etsha 5:29) Yeso ndamɛ akɛnya ɔnɛ dikambo sɔ sunganaka. Bible totɛka ɔnɛ: “L’okongo w’akambu aso, Jesu akakindula la Ngalili. Ndi kunanga nkindula la Judiya, ne dia asi Juda wakayangaka dia mbudiaka. Lushi la wuki l’asi Juda, la dambu dia Tutumbutumbu, laki lasuki. Ku Jesu [akatɛ anango wa l’emunyi waki kombetawɔka] ati: . . . Nyutshu lu dambu. Dimi halutsho lu dambu diako, ne dia etena kami atakuki. Lam’akandawatela aui aso, ndi akatshikala la Ngalili. Lam’akatshu anangu lu dambu, Jesu akayutsho l’okongo diku; ndi kuntumba seke, keli aki uku lu usheshe.”—Joani 7:1, 2, 6, 8-10.
Ekɔ Ɔlɔlɔ Mbishola Dikambo Kana Momba Sheke?
15 Lo tena dimɔtshi, nama dikambo dia lo woshamu ekɔ djembetelo ya lomba ndo ya ngandji. Tɔ̂shi ɛnyɛlɔ ka Yɔsɛfu, papa ka Yeso ka lôdia, kakɔna kakandasale lam’akandeye ɔnɛ omambedi ande Mariya ambotshɔ diemi na? Bible totɛka ɔnɛ: “Umendi Josefu aki untu ololo. Ndi kunanga mbenyanya, akalangi mbukimo lu usheshe.” (Mateu 1:18, 19, sho mbɛnganyisha alɛta ango.) Otondoyala Yɔsɛfu akôtondja sɛkɛ, kana mbohandjola lokumu, tshike otɛnama mɛtɛ dia nde komonga l’otema w’ɔlɔlɔ.
16 Akambo wa woshamu wakoka ndjodja ɔnɛ lakakotɛwɔ l’okakatanu kana ndjowosha pâ lo lumu hakoke mbewoyama le anto akina wele bu la lotshungɔ la mbeya akambo akɔ. Dikumanyi di’Akristo mbohɔka dikambo sɔ nshi tshɛ l’etena kahombawɔ ndaka anyawɔ Akristo, mbasamba kana mbasha dilanya naka vɔ wambosalɛ Jehowa pɛkato kɛmɔtshi ka woke. Ekɔ ohomba vɔ ntshaka akambo asɔ lo yoho yɔtɔnɛ la Bible; kema ohomba mbutɛka anto akina toseke takana, ndo ɔsɔ bu djembetelo ya ngandji. Lo mɛtɛ, ase etshumanelo k’Akristo hawokoke nyanga dia mbishola toseke oma le dikumanyi, koko vɔ pombaka nɛmiya ɔkɛndɛ wa dikumanyi wa mombaka toseke. Tukedi 25:9 mbutaka ɔnɛ: “Usimbuli la unyaye dikambu, tusanyaki diui dia lu usheshe le untu ukina.”
17 Dui sɔ dia mombaka toseke mendanaka ndo l’ase nkumbo kana angɛnyi wokana efula. Ekɔ ohomba mombaka toseke tɔmɔtshi dia mbewɔ mindjo kana di’aha lɔngɛnyi lanyu ndjɔyɛkayɛka. “Lopepe l’uma la ngel’a kushi latelaka mvula. Ndu lulimi la lotendo [“latosholaka sheke,” NW], latutungaka elundji ka kele.” (Tukedi 25:23) Mɛtɛ, oma lo kɔlamelo yele laso le Jehowa ndo lo awui ande wosembwe ndo oma lo ngandji kokaso anto wasala pɛkato, mbeyaka ndjɛnama ohomba lo tena dimɔtshi dia paka mbishola koyanga toseke tɔmɔtshi le ambutshi, le dikumanyi di’Akristo, kana le anto akina wahomba mbeya awui akɔ.a Koko lo tena efula, Akristo mombaka toseke takana oko atowombaka toseke tawɔ vamɛ.
18 Lo tshena pe, Okristo mbokoyaka Jehowa lo namaka akambo amɔtshi toseke l’etena kahombama, ndo lo mbatondjaka lo sɛkɛ l’etena kasungana. Yimba ya ndjakitshakitsha, mbetawɔ ndo ngandji ekɔ waonga wakimanyiya Okristo dia nde mbeya kɛnɛ kahombande sanyɛ anto akina kana momba sheke. Ndjakitshakitsha mboshimbaka di’aha nde ndjadiya, lo nyanga dia mambia anto akina, oyadi lo mbatɛ oseka dikambo tshɛ dieyande kana lo mbaɛnyaka pâ la mbasanyɛka toseke tende bu la dikimɔ dia mbatɛ. Mbetawɔ lo Dui dia Jehowa ndo le etshumanelo k’Akristo mbotshutshuyaka dia nde sambisha awui w’oma le Nzambi wofundami lo Bible ndo mbewɔ di’aha mbuta akambo wakoka mbisha anto pâ l’asolo l’etatelo. Eelo, ngandji mbotshutshuyaka dia nde sanyɛka anto tshɛ awui watombola Nzambi ndo wahomba anto mbeya dia vɔ kondja lɔsɛnɔ. Koko nde mombaka toseke takana, nɛ dia nde mbeyaka ɔnɛ, lo tena efula, naka nde tishola, kete ayoyɛnama dia nde bu la ngandji.
19 Oma lo dionga sɔ mbeyama Akristo wa mɛtɛ. Vɔ hawoshɛshɛ Nzambi, lo mbewɔ dia nimola lokombo lande kana lo mbɔsa wetshelo wa Losanto l’Osato, wetshelo waheyama ndo ɔtɛ l’ekoko welɛwɔ ɔnɛ ehekesa dikambo ka dietawɔ. Ɛtɛmwɛlɔ wa kashi mbele la nzambi yaheyama, koko aha ɔtɛmwɛlɔ wa mɛtɛ. (Enda lo Etsha 17:22, 23.) Ɛmɛnyi wa Jehowa w’akitami mɛtɛ mbɔsaka diɛsɛ diele lawɔ la nɛmɔ, diɛsɛ dia monga ‘elami wa toseke t’ekila taki Nzambi.’ Lam’asanyɛwɔ anto akina toseke tɔsɔ, vɔ kimanyiyaka akanga w’etema w’ɛlɔlɔ dia vɔ nyanga woho wa mbɔtɔ la Jehowa ɔngɛnyi.—1 Koreto 4:1; 14:22-25; Zekariya 8:23; Malaki 3:18.
[Footnote]
a Enda lo sawo diele l’ɔtɛ a dui ɔnɛ: “Aha Wɛ Mbɔtɔ lo Pɛkato y’Anto Akina,” lo Tshoto y’Etangelo ya Tshaka Fudu 15, 1985 (lo Falase).
[Study Questions]
1, 2. (a) Ngande wotshikitanyi Jehowa nde l’Ɔndɔshi ande wa woke? (b) Ngande wɛnama otshikitanu ɔsɔ le anto?
3. Ngande wakokaso mɛnya kashi k’awui watotaka anto ɔnɛ wanɛ wayala Ɛmɛnyi wa Jehowa sokoyamaka la wolo dia vɔ mbɔtɔ lo “ɔtɛmwɛlɔ w’ambatɔmi wa lo woshɛshɛ”?
4. Kakɔna kahahombe kiyanya Akristo wa kɔlamelo, ndo lande na?
5. Ngande weyaso ɔnɛ Jehowa nde la Yeso mbokaka anto ngandji, ndo ngande wakawɛnya ngandji kɛsɔ?
6. Bonde kele Jehowa hɛnyi ohomba mbishɛ kɛnɛ kasangoyande ntsha?
7. (a) Jehowa akandatatshi l’ekambɔ k’Ɛdɛna, ndo ngande wakɛnya Satana ɔnɛ Nzambi ekɔ kanga mɛtɛ? (b) Ngande wɛnama dui dia lo 2 Koreto 13:8 nshi tshɛ ɔnɛ diekɔ dui dia mɛtɛ?
8, 9. (a) Kakɔna keya Satana, ko onde dui sɔ shimbaka asangwelo wa Jehowa di’aha vɔ kotshama? (b) Naa diewoyelo diokɛma hwe diele atunyi wa Jehowa wekɔ lo mɔnyɔla, ndo lande na kadiɔnyɔlawɔ?
10. (a) Lo yɛdikɔ yakɔna yakakotshama 1 Tesalonika 5:3 ondo, ko ekambi wa Jehowa ahombawɔ ntsha? (b) Lande na kayokoka anto waha la mbetawɔ ndeka monga la dihonga lo nshi yayaye dia vɔ ndɔshana l’ekambi wa Nzambi?
11. Danyɛlɛ nde la Yɔsɛfu akaweye lo dikambo dia Jehowa?
12, 13. (a) Akɔna aki omvutshi wa Nzambi woleki woke tshɛ, ndo bonde kakadimolayɛ ngasɔ? (b) Ɛlɔ kɛnɛ wa na wele ‘alami wa toseke t’ekila taki Nzambi,’ ndo ngande wahombaso mbaɔsa?
14. Etena kakɔna katosalaka Akristo elimu awɔ lo woshɛshɛ, ndo lo yoho shɔ vɔ ndjelaka ɛnyɛlɔ kaki na?
15. Ngande wakɛnya Yɔsɛfu ɔnɛ momba sheke, lo tena dimɔtshi, ekɔ djembetelo ya ngandji?
16. Ɔkɛndɛ akɔna wele la dikumanyi ndo anto akina tshɛ wa l’etshumanelo lo kɛnɛ kendana la toseke?
17. Lo tena efula, lande na katolamaka Akristo akambo amɔtshi toseke, ndo lande na kele aha nshi tshɛ mbahombawɔ salaka ngasɔ oto?
18. Naa waonga asato w’Okristo wakoka tokimanyiya dia sho mbeya kɛnɛ kahombaso sanyɛ anto akina kana momba oko sheke?
19. Oma lo dionga diakɔna dieyama Akristo wa mɛtɛ, ndo kakɔna katomba oma lo dionga sɔ?
[Caption on page 24]
Jehowa mbisholaka toseke lo tshimbo ya Dui diande
[Caption]
[Footnotes]
[Caption]
[Questions]
[Caption on page 25]
[Review on page 25]
Ngande Wayoyokadimola?
◻ Bonde kele Jehowa bu l’ohomba wa mbishɛ kɛnɛ kasangoyande?
◻ Jehowa wa na watɛnde toseke tande?
◻ Ɔkɛndɛ akɔna wele l’Akristo lo kɛnɛ kendana la toseke?
◻ Naa waonga asato wayokimanyiya Akristo dia vɔ mbeya kɛnɛ kakokawɔ ndo kahawakoke sanyɛ anto akina?