He Yaka Lo Losanganya La Distrikɛ

“MBETAWƆ LO DUI DIA NZAMBI”!

MILIYƆ efula y’anto wayonga lo ahole nkama wayosalema losanganya lɔsɔ l’andja w’otondo. Lo Burundi lo Congo la lo Zaïre oto, ayosalema nsanganya 53. Lɔnɛ la ntondo layosalema lo ngɔndɔ ka Lotena Eduwa 11-13 ko la komelo lo ngɔndɔ ka Lovula 19-21. Nsanganya shɔ tshɛ ya nshi shato shato​—⁠mbut’ate oma lo Lushi la Tanu polo la Lomingu​—⁠yayosalema l’osomba wahanganyi etale la lakayɛ.

Wɛ ayotokondja ɛlɔlɔ oma lo lokema la wetshelo w’oshika w’oma lo Bible. L’ahole efula losanganya layomɛka pindju tshɛ la mishiki lo 9h30. La pindju ka Lushi la Tanu ayonga ɛkɔnya l’edja ka taahe 25, wayɔkɔnya anto wele nsɛnɔ yawɔ sɛngiyamaka efula oma lo mbetawɔ kele lawɔ lo Dui dia Nzambi. Etenyi kɛsɔ ka ntondo ka losanganya kayokomɛ la nyango dako diele l’ɔtɛ a dui ɔnɛ: “Tɔkɛndakɛndake la Mbetawɔ, Koko Aha la Lɛɛnɔ.”

Dako dia ntondo diayoshama Lushi la Tanu l’ɔkɔngɔ a midi diayɔtɛkɛta dikambo dia dihole di’ohomba diele l’ɛlɔngɔlɔngɔ l’atei w’etshumanelo k’Akristo. Tenyi sato dia dako dia tenyi tenyi diayoyela diayolembetshiya woho wendana ɛlɛmbɛ wa lo Bible la lɔkɛwɔ l’Okristo lo ɛtɛkɛta, lo ditshelo, ndo lo ɛnamelo ka lo demba. Oma lâsɔ ko dako diata ɔnɛ “Toyalame di’Aha Pomba Mbetawɔ” la nɛ diata ɔnɛ “Dui dia Nzambi Diekɔ la Lɔsɛnɔ” diayoyoka epole ɔsɛkɛ lo dako dia dimɛna efula diele lo Hɛbɛru tshapita 3 la 4. Losanganya la Lushi la Tanu layokomɛ la dako diele l’ɔtɛ a dui w’ɔnɛ: “Dibuku dia Ɔlɔlɔ w’Anto Tshɛ.”

Dako dia ntondo diayoshama la pindju ka Lushi la Samalo diekɔ l’ɔtɛ a dui w’ɔnɛ: “Mbetawɔ Kaha l’Etsha Kambovɔ.” Dako dikina di’ohomba efula diayoshama la pindju ka lushi lɔsɔ mbutaka ɔnɛ “Toke Edio ndo Toshikikale lo Akambo wa Mɛtɛ,” mɛnyaka woho wakoka onto pama lo nyuma. Etenyi kɛsɔ ka losanganya kayokomɛ la woho ɔmɔtshi wa dako diatoshamaka tena tshɛ lo losanganya diata ɔnɛ “Mbetawɔ lo Dui dia Nzambi Konyaka Onto lo Batismu,” ko l’ɔkɔngɔ adiɔ wayɔsa tɛdikɔ dia ambeki w’eyoyo batizama.

Dako diayomɛ Lushi la Samalo l’ɔkɔngɔ a midi diata ɔnɛ “Lɔka Ta Wolo lo Dikambo dia Mbetawɔ,” tɛkɛtaka kɛnɛ kendana l’alako wa lo dibuku dia lo Bible dielɛwɔ Jude. Dako dia tenyi tenyi diayoviya oshidi ɔtɔi a tango diele l’ɔtɛ a dui w’ɔnɛ: “Nyɛsɔ Totshu Otsha lo Luudu la Jehowa,” diayɛnya ɛlɔlɔ waya oma lo nsanganya y’Akristo. Losanganya la lushi lɔsɔ layokomɛ la dako di’ɔnɛ “Mbetawɔ Kayɛ Kambohembama Kakianɛ dia Menda Kana Tɔ Kekɔ Shikaa.”

La pindju ka Lushi la Lomingu ayonga tenyi sato dia dako dia tenyi tenyi diayɔtɛkɛta dia dibuku dia lo Bible dielɛwɔ Jɔɛlɛ kâmɛ ndo woho wendanadiɔ la nshi yaso nyɛ. Oma lâsɔ ko kɛnyɔ ya wetshelo w’oma lo Bible yele l’ɔtɛ a dui w’ɔnɛ: “Lamaka Sso Diayɛ Ɔsɛlɛngɛ.” Losanganya lakɔ layokita dikuma l’ɔkɔngɔ a midi etena kayoshama dako dia lo sɛkɛ diele l’ɔtɛ a dui w’ɔnɛ: “Mbetawɔ la Lɔsɛnɔ Layɛ la lo Nshi Yayaye.”

Mɛtɛ wɛ ayokondja ɛlɔlɔ efula wa lo nyuma naka wɛ monga lo losanganya lakɔ. Tayokolongola l’ɔngɛnɔngɛnɔ l’etenyi tshɛ ka losanganya kayoyoya. Sala ekongelo kakianɛ dia wɛ mbɔtɔ lo losanganya lɔsɔ. Dia wɛ mbeya dihole diayosalema losanganya layonga suke la lakayɛ, mbola lo Mbalasa ka Diolelo k’Ɛmɛnyi wa Jehowa kele lo ngelo kanyu kana fundɛ afundi wa jurunalɛ nyɛ mukanda.

Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “ Les Témoins de Jéhovah “ mukanda lo B.P. 634 Limete, Kinshasa, Zaïre.

[Caption on page 32]

[Box on page 32]

Wɛ Nangaka Onto Ndjokenda?