“Totombole Nzambi L’ɔngɛnɔngɛnɔ”
Losanganya la Distrikɛ l’Ɛmɛnyi wa Jehowa
Nshi shato y’ɔngɛnɔngɛnɔ efula ya wetshelo w’oma lo Bible yekɔ lo kokongɛ. Kâmɛ la sanganya ya weke 180 yakalɔngɔswama dia salema lo wodja w’Etats-Unis oto, ondo losanganya lɔmɔtshi la woke layosalema suke la dihole diodjashiyɛ. Onga lâwɔ lam’ayotatɛ losanganya lakɔ la mishiki l’eshidi divua wa pindju la taahe 40, lushi la Tanu.
L’atei w’ekongelo ka lushi la Tanu la pindju, ayonga awui wa ndjayola anto ndo nyango dako diele l’ɔtɛ a dui w’ɔnɛ: “Wambokitshama Lânde dia Tombola Nzambi l’Ɔngɛnɔngɛnɔ l’Andja w’Otondo.” Ekongelo ka la dikɔlɔ kayɔtɛkɛta dikambo di’ɛlɔngɔlɔngɔ, di’ambutshi, ndo dia wetshelo. Dako dimɔtshi diahatolanga ɛlɔngɔlɔngɔ pandja diekɔ l’ɔtɛ a dui w’ɔnɛ: “Onde Lamboyalɔngɔsɔla dia Tshuka Kana dia Tshukama?” Ambutshi pombaka mpokamɛ l’atui akɔ ahende dako diele l’ɔtɛ a dui w’ɔnɛ: “Ambutshi Wangɛnangɛna le An’awɔ.” Ekongelo ka la dikɔlɔ kayodihiya la dako diele l’ɔtɛ a dui w’ɔnɛ: “Kamba la Wetshelo dia Tombola Jehowa.” Akambo wayowɔtɛkɛta lo dako sɔ wayokimanyiya ɛlɔngɔlɔngɔ dia vɔ pama l’ɔlɔlɔ tshɛ lo kalasa.
L’atei w’ekongelo ka lushi la Samalo la pindju, ayonga batismu ndo dako dimɔtshi diayoshama le wanɛ wele l’akoka wa nongola batismu. La dikɔlɔ, dako dia mɛtɛ mɛtɛ diayoshama, diɔ diayɛnya woho wele, oma ko nshi y’edjedja, Satana ekɔ lo kamba la saki ya dieyanelo dia munda anto lo djonga. Dako dikina dia dimɛna efula diayoshama, diɔ diekɔ l’ɔtɛ a dui w’ɔnɛ: “Têwɔ Tolonga Taki Satana.” Ekongelo ka lushi lakɔ kayodihiya la dako di’ohomba efula diele l’ɔtɛ a dui w’ɔnɛ: “Lande na Kele Anto l’Ohomba w’Ewo ka Nzambi.”
la pindju ka lushi la Lomingu, dako diele la tenyi tenyi diele l’ɔtɛ a dui w’ɔnɛ: “Totombole Nzambi l’Ɔngɛnɔngɛnɔ lo Nshi y’Ekomelo ka Dikongɛ Nɛ” diayokotola yambalo y’anto oya l’akambo wayosutshasutsha andja, akambo wayanga salema kem’edja. Dako diakɔ diayoka epole ɔsɛkɛ l’ohomba wa ndawɔ otsha lo dihole dia panda la ntondo k’etatelo ka “fɔnu ka woke” kakatɛkɛta Yeso Kristo salema, oko wofundamidiɔ lo Mateo 24:21, NW.
Ekongelo ka lushi la Lomingu la pindju kayodihiya la kɛnyɔ ya wetshelo y’ohomba, kɛnyɔ yakɔ yekɔ l’ɔtɛ a dui w’ɔnɛ: “Tɔlɛmiyake Wanɛ Wasungana Nɛmiyama lo Nshi Yawɔ y’Esombe.” Oma lâsɔ, la dikɔlɔ, ko dako dia lo sɛkɛ ndjosalema, dako diakɔ diekɔ l’ɔtɛ a dui w’ɔnɛ: “Totombole Nkumekanga ka Pondjo!” Dako sɔ diayonga djembi ya dikambo lo losanganya lɔsɔ la woke.
Yâlɔngɔsɔla kakianɛ dia wɛ mbɔtɔ lo losanganya lakɔ lɔsɔ. Dia wɛ mbeya lɛnɛ ayosalema losanganya lakɔ la woke lo dihole diosukanyi la lɛnɛ odjashiyɛ, tshɔka otsha lo Mbalasa ka Diolelo k’Ɛmɛnyi wa Jehowa, kana funda mukanda otsha le afundji wa periodikɛ kɛnɛ. Lo Réveillez-vous! wa Mam’ɛkɔngɔ la Tange 8, wayofunda oshilo w’ahole tshɛ wayosalema losanganya la woke lo wodja w’Etats-Unis, la Canada, la Grande-Bretagne, ndo la Irlande.