“Mboka Ka Nzambi Ka Lɔsɛnɔ”

Kem’edja Tayɔtɔ Lo Losanganya La Woke 1998-1999!

LO Burundi, Congo-Brazzaville la Congo-Kinshasa oto, wayɔtɔ nsanganya ya weke 59, tatɛ oma lo Ngɔndɔ K’Enanɛi polo ka Divwa. Ondo, ɔtɔi ɔmɔtshi l’atei wa nsanganya shɔ ya nshi shato layotshama suke la ngelo kanyu. L’ahole efula, ekongelo kayomɛka lushi tshɛ la mishiki l’eshidi 9:30 wa pindju​—⁠tatɛ Lushi la Tanu polo la Samalo.

Ekongelo ka Lushi la Tanu la pindju ayɔtɛtɛ lo kɛnɛ kendana l’ehamelo k’esambishelo ka Diolelo l’ahole wotshikitanyi wa l’andja. Ɔtɛ a dui wa losanganya wayolembetshiyama dimɛna dimɛna oma lo tshimbo ya nyango dako diele l’ɔtɛ a dui ɔnɛ: “Tshungo ka Kristo​—⁠Mboka ka Nzambi ka Panda.”

La dikɔlɔ, dako dia tenyi tenyi diata ɔnɛ: “Ambutshi​—⁠Nyolakanya Ananyu Mboka ka Nzambi,” diayotosha alako lo woho wakokaso tshutshuya ɛlɔngɔlɔngɔ l’esekaseka dia vɔ mboka Jehowa ngandji ndo mbokambɛ. Ekongelo ka la dikɔlɔ kayokomɛ la dako nɛ: “Onde Onto Nsɛnaka l’Ɔkɔngɔ a Nyɔi?”

Ekongelo ka Lushi la Samalo la pindju ayɔtɛkɛta di’olimu w’Ɛmɛnyi wa Jehowa wa mbetɛ anto ambeki lo tenyi nɛ sato: “Tokimanyiya Anto dia Vɔ Ndjela Mboka ka Lɔsɛnɔ,” “Totondoya Ohemba wa Pomana l’Anto wa Sambisha,” ndo “Têtsha Ambeki Kɛnɛ Tshɛ Kakatodjangɛ Kristo.” L’ekomelo k’ekongelo ka la pindju, ambeki w’eyoyo wanɛ wayobatizama wayolongola alako.

Dako dia mbɔtwɛlɔ dia la dikɔlɔ dia Lushi la Samalo diata ɔnɛ: “Tokambe l’Oyango wa Kondja Lɔsɛnɔ Laha l’Ekomelo,” ayotokeketsha dia monga la tokanyi t’ɛlɔlɔ lo kɛnɛ kendana l’ɛkɔkɔ wakambɛso Nzambi. Dako diata ɔnɛ: “Tɔngɛnɛngɛnɛ ‘Anto Wele oko Weshasha,’ Wanɛ Watetsha Mboka ka Nzambi” ndo dikina diata ɔnɛ: “Tokolole Lonto l’Edjedja ndo Tɔlɔtɛ Lonto l’Oyoyo” ayotolembetshiya dimɛna dimɛna divɛsa la divɛsa di’Efeso tshapita 4. Oma lâsɔ, tayolongola alako wamɛna w’oma l’Afundelo lo tshimbo ya dako nɛ: “Yâlama di’aha Mbɔtɔ Vadi y’oma l’Andja ɔnɛ” ndo lo tshimbo ya dako dia tenyi tenyi di’ɔnɛ: “Ɛlɔngɔlɔngɔ l’Esekaseka​—⁠Nyoyele Mboka ka Nzambi.” Ekongelo ka la dikɔlɔ koyokomɛ la dako nɛ: “Otungi​—⁠Lonto ndo Mboka Yande.”

Ekongelo ka Lushi la Lomingu la pindju kayonga la dako dia tenyi tenyi diayɔtɛkɛta dia totshapita t’ekomelo ta dibuku dia lo Bible di’Ezekiyele ndo dia ekotshamelo ka pɔlɔfɛsi ya lɔkɔ. Ekongelo ka la pindju kayokomɛ la kɛnyɔ ya wetshelo ya dimɛna efula yendana la kɔlamelo y’ɛlɔngɔlɔngɔ esato w’Ase Hɛbɛru. La dikɔlɔ, losanganya layokoma lo kondoko yalɔ la dako dia lo sɛkɛ diata ɔnɛ: “Ɔtɔi a Mboka Katɔla Otsha lo Lɔsɛnɔ la Pondjo.”

Lo mɛtɛ, naka wɛ monga lo nshi yakɔ shato, kete wɛ ayɔngɔna efula lo nyuma. Tambokokombolɛ oyelo w’ɔlɔlɔ lo etenyi tshɛ ka losanganya [lakɔ], aha la tamu, hawotokɔlɔmba ndoko ɛngɔ dia liɔtɔ. Dia wɛ mbeya losanganya layowɔtɔ suke la ngelo kanyu, tshɔka lo Mbalasa ka Diolelo k’Ɛmɛnyi wa Jehowa kana tomɛ afundi wa periodikɛ kɛnɛ mukanda.

[Caption on page 32]

[Caption on page 32]

MBOKAka NZAMBI ka LƆSƐNƆ

LOSANGANYA

L’ƐMƐNYI WA JEHOWA

1998-1999

EKONGELO

Nsanganya ya Distrikɛ la ya Wedja Efula Yayosalema l’Andja w’Otondo