Lotshungɔ La Lotombo L’ana Wa Nzambi Laya Kasuke
“Ditungami diakalembiama lu akambu w’anyanya . . . ne dia lulangu la one . . . lakadisha elungamelu ati: Ditungatunga diayutshungwama uma lu lohombo la ehondelo, dia mboto lu ndjadjasela ka lutumbu la ana a [Nzambi].”—ROMO 8:20, 21.
JEHOWA akakimɔ Ɔnande ɛtɔi lakôtama oko olambo w’etshungwelo wakadihwɛ anto 144000 mboka ka lɔsɛnɔ la l’olongo ndo elongamelo ka lɔsɛnɔ la pondjo la nkɛtɛ le anto akina wotshikadi. (1 Joani 2:1, 2) Oko wakatadioke lo sawo dietshi, olambo wakafute Yeso lo dikambo di’Akristo wakotɔ lo nyuma akɛnamaka lo yoho ya didjidji lam’akalambolaka ɔlɔmbɛdi wa lâdiko wa l’Isariyɛlɛ ɔsɔngɔ a ngɔmbɛ oko olambo w’edimanyielo ka pɛkato lo dikambo diande, dia wa lo luudu lande, ndo dia dioho di’Ase Lɛwi lo Lushi l’Ekesanelo. Ko lushi lakɔ, nde akalambolaka mbudi kɛmɔ oko olambo wa pɛkato dikambo di’Isariyɛlɛ w’otondo, oko woh’ɔnɛ wayokondja anto tshɛ ɛlɔlɔ w’oma l’olambo wa Kristo. Mbudi kekina k’ɔsɛnyu ka didjidji kakatshanyemaka otsha l’oswe wa shɛnga dia tɔ mɛmba pɛkato y’edjadja y’anto tshɛ.a—Akambu w’Asi Lewi 16:7-15, 20-22, 26.
2 L’ɔkɔngɔ wa nde tɛkɛta dikambo di’anto wayoyala ‘ana a Nzambi’ wa l’olongo, ɔpɔstɔlɔ Paulo akate ate: “Ne dia ditungatunga tshe diatulungamelaka la pusa ka wulu dia mena enelo k’ana wa [Nzambi]. Ditungatunga diakalembiama lu akambu w’anyanya, aha ne dia lulangu ladio, keli ne dia lulangu la one lakadilembia, lakadisha elungamelu ati: Ditungatunga diayutshungwama uma lu lohombo la ehondelo, dia mboto lu ndjadjasela ka lutumbu la ana a [Nzambi].” (Romo 8:14, 17, 19-21) Etelo kɛsɔ alembetshiyatɔ?
3 Lam’akatongama tshɛso Adama oko onto a kokele, nde aki “on’a [Nzambi].” (Luka 3:38) L’ɔkɔkɔ wa pɛkato kakandasale, nde akayɔtɔka lo “lohombo la ehondelo” ko akayosambiyɛka anto tshɛ pɛkato kakɔ. (Romo 5:12) Nzambi aketawɔ di’anto mbotɔ lo “akambu w’anyanya” wâkomɛ nɛ dia wakahɛnɛ ekokele, koko nde akawasha elongamelo oma lo tshimbo ya ‘lɔtɔngɔ’ lele Yeso Kristo. (Etatelu 3:15; 22:18; Ngalatiya 3:16) Enyelo 21:1-4 mbutaka di’etena ‘kahoyala nyɔi, otanda, alelo, la fɔnu nto.’ Nɛ dia ɔsɔ ekɔ daka dialakawɔ ‘anto,’ diɔ toshikikɛka ɔnɛ tshunda di’oyoyo di’anto wayɔsɛnaka la nkɛtɛ l’ɛlɔmbwɛlɔ ka Diolelo wayɛna nganɛ wayokadimɔ timba la alemba awɔ nto otsha lo alemba wa wolo ndo monga la lɔsɛnɔ la pondjo oko “an’a [Nzambi]” wa laa nkɛtɛ. Lo Diolelo dia Kristo di’Ɛnɔnyi Kinunu, akanga w’okitanyiya ‘wayotshungɔ oma lo lɔhɔmbɔ l’ɛhɔndɛlɔ.’ Lam’ayowolama kɔlamelo yawɔ le Jehowa l’ohemba w’ekomelo, vɔ wayotshungɔ pondjo oma lo pɛkato la nyɔi kakawahɛnɛ. (Enyelo 20:7-10) Wanɛ wayonga la nkɛtɛ l’etena kɛsɔ ‘wayonga lo lotshungɔ la lotombo l’ana a Nzambi.’
Vɔ Mbutaka Ɔnɛ: “Yaka!”
4 Ande elongamelo ka mamba kambowokitshɛ anto la ntondo lee! Aha la tamu, Akristo w’akitami wakotɔ lo nyuma weke la nkɛtɛ wekɔ ka ntondo l’olimu wa mbutɛ akina dia elongamelo kakɔ l’ohetoheto tshɛ! Oko wewɔ anto wayoyala l’atei wa ‘wadi’aki’ Yeso Kristo, Ɔna Ɔkɔkɔ a lotombo, atshikadi w’akitami mendanaka l’awui wakotshama lo pɔlɔfɛsi kɛnɛ: “Nyuma la utshukami wambuta vati: Yaka! One luka ati ati: Yaka! One leli la pusa ayi! One lalanga ose ashi a lumu wososa.” (Enyelo 21:2, 9; 22:1, 2, 17) He bu, ɛlɔlɔ w’olambo w’etshungwelo waki Yeso hakomɛ paka le akitami 144000 ato. Nyuma ka Nzambi katetemalakɔ kamba lo tshimbo y’atshikadi wa lo olui a wadi weke la nkɛtɛ, lo mbutaka ɔnɛ “Yaka.” Onto tshɛ loka leeta lɔsɔ ndo lele la posa ka losembwe la dia mbuta nde lawɔ ate: “Yaka,” lo ndjakimanyiya la tɛdikɔ t’ɛlɔlɔ takɔshi Jehowa dia mbisha anto panda.
5 Ɛmɛnyi wa Jehowa wekɔ la mbetawɔ lo tɛdikɔ takɔshi Nzambi ta mbisha anto lɔsɛnɔ lo tshimbo ya Yeso Kristo. (Etsha 4:12) Vɔ ngɛnangɛnaka efula dia ndjâla l’akanga w’etema ɔlɔlɔ l’atei awɔ, wanɛ wakombola mbeya asangwelo wa Nzambi ndo sala lolango lande. Hawoshimbe anto walanga ‘ndja dia ndjɔsa ashi wa lɔsɛnɔ wɔsɔsa’ lo Mbalasa yawɔ ya Diolelo lo ‘nshi nyɛ y’ekomelo.’—Danyele 12:4.
Etshikitanu Wakasalema l’Edjedja ka Wonya
6 Nzambi akashikikɛ etena dia kotsha sangwelo diande, ndo dui sɔ mendanaka la woho wongande l’anto. (Undaki 3:1; Etsha 1:7) Kânga mbakakondja ekambi wa Nzambi waki la ntondo ka nshi ya Yeso nyuma kande, Nzambi kombowaota oko anande wa lo nyuma. Koko, tatɛ oma la le Yeso, etena ka Jehowa kamba la nyuma kande dia mbota apami la amato wamboyakimɔ le nde dia tonga ekitɔ wa l’olongo kakakoke. Kayotota dia nshi yaso nyɛ na? Nyuma kakɔ kâmɛ kakambakɔ lo dikambo di’“ekoko ekina” waki Yeso, koko tɔ hawasha elongamelo la saki ka monga la lɔsɛnɔ la l’olongo. (Joani 10:16) Lam’ele vɔ nongamɛka lɔsɛnɔ la pondjo lo paradiso ka la nkɛtɛ oko woshasha w’oma le Nzambi, l’ɔngɛnɔngɛnɔ tshɛ, vɔ sukɛka atshikadi w’akitami lam’ayashawɔ l’olimu w’esambishelo l’etena kɛnɛ katakadimɔ andja, oma lo w’omusu otsha lo andja w’oyoyo waki Nzambi w’osembwe.—2 Petero 3:5-13.
7 Nzambi akatatɛ ‘mbɔtshiya ana efula lo lotombo’ lam’akatshɔma nyuma k’ekila lo Pɛntɛkɔsta ka l’ɔnɔnyi 33 T.D., ndo mɛnamaka dia ndo nde akashikikɛ etena ka shidiya la tshumanya ‘Isariyɛlɛ wa Nzambi’ wa lo nyuma wele l’anto 144000 lo tshɛ tshɛ. (Heberu 2:10; Ngalatiya 6:16; Enyelo 7:1-8) Tatɛ oma lo 1879, Tshoto y’Etangelo yakatɛkɛta mbala efula di’olimu wa dinela wakendanaka l’Akristo w’akitami. Koko Ambeki wa Bible (Ɛmɛnyi wa Jehowa ɛlɔ kɛnɛ) wakeyaka nto ɔnɛ Afundelo mbutaka ndo di’elongamelo ka lɔsɛnɔ la pondjo lo paradiso ka la nkɛtɛ. Oko ɛnyɛlɔ, Tshoto y’Etangelo ya Ngɔndɔ k’Esambele 1883 l’Angɛlɛ yakate ɔnɛ: “Lam’ayoshikikɛ Yeso diolelo diande, ko nanya kanga kɔlɔ, ndo ntsha awui akina, nkɛtɛ kɛnɛ kayokadimɔ paradiso, . . . ko anto tshɛ wele lo waombo wayolɔ dia ndjɔsɛna lɔkɔ. Ndo naka vɔ ndjokitanyiya ɛlɛmbɛ wa lo paradiso kakɔ, kete wayɔsɛna pondjo lɔkɔ.” L’edjedja ka wonya, dinela di’akitami diakakitakita, ko yema yema, anto waki l’elongamelo ka sɛna la nkɛtɛ wakayotatɛka tshumanyema oko dinela oya l’ɔlɔngɔswamelo waki Jehowa. L’etena kɛsɔ, Nzambi akasha ekambi w’akitami, Akristo wambotɔ nto, yimba ya mamba.—Danyele 12:3; Filipi 2:15; Enyelo 14:15, 16.
8 Djekoleko, oma lo 1931 mbakayɔtɔka wanɛ wele la elongamelo ka sɛna la nkɛtɛ l’etshumanelo k’Akristo. L’ɔnɔnyi ɔsɔ, Jehowa akangamula Akristo wakotɔ lo nyuma dia vɔ mɛna ɔnɛ Ezekiyɛlɛ tshapita 9 tɛkɛtaka di’olui ɔsɔ w’anto wayonga la nkɛtɛ, wanɛ wambodjama djembetelo ya panda dia mbɔtɔ lo andja w’oyoyo. Lo 1932, wakakondja kitshimudi y’ɔlɔlɔ ɔnɛ: anto wa ngasɔ wa lo nshi yaso nyɛ, wanɛ wafɔna l’ɛkɔkɔ wekɔ didjidji diaki Jɔnadaba (Jehɔnadaba), ongɛnyi wa Jehu. (2 Khumi ya Dikanga 10:15-17) Lo 1934, wakayohotɔka dimɛna ɔnɛ: “Waa Jɔnadaba” pombaka “ndjasha,” kana ndjakimɔ vamɛ le Nzambi. Lo 1935, ‘lemba la woke,’ kana “ului a wuki w’antu”—wakawakanaka ntondo ɔnɛ vɔ mbele olui wa hende wa lo nyuma, wanɛ wayoyala ‘angɛnyi’ wa wadi a Kristo la l’olongo—wakayeyamaka ɔnɛ vɔ mbele ɛkɔkɔ ekina wele l’elongamelo ka sɛna la nkɛtɛ. (Enyelo 7:4-15; 21:2, 9; Osambu 45:14, 15) Ndo djekoleko oma lo 1935 mbakayotatɛka akitami nyanga akanga wa losembwe wakombola monga la lɔsɛnɔ la pondjo lo paradiso ka la nkɛtɛ.
9 L’ɔkɔngɔ wa 1935, Akristo amɔ wanɛ wakalɛka mapa ndo wakanɔka vinyɔ wakayotshika ndɛ mapa la nnɔ vinyɔ lo Dambo dia Nkumadiɔndjɔ dia la Dikɔlɔ. Lande na? Nɛ dia, vɔ wakayeyaka ɔnɛ wekɔ l’elongamelo ka lɔsɛnɔ la la nkɛtɛ koko aha la l’olongo. Omoto ɔmɔ lakabatizama lo 1930 akate ate: “Lam’ele sho kɔmɛnaka ɔnɛ ekɔ kɔlɔ [ndɛ mapa kana nnɔ vinyɔ], djekoleko le ekambi wa lo tena tshɛ wanɛ waki l’ohetoheto, ndoko lushi lakamayashikikɛ ɔnɛ lambɔsɔnama dia lɔsɛnɔ la l’olongo. Omalɔkɔ, lo 1935, takayomanaka fundo ɔnɛ ɔsɔ aki etena ka tshumanya olui a woke wele l’elongamelo ka lɔsɛnɔ la pondjo laa nkɛtɛ. Efula kaso takangɛnangɛna dia mboka ɔnɛ ase olui ɔsɔ a woke mbeso, ko takatshike ndɛ mapa la nɔ vinyɔ.” Kânga awui wakafundamaka l’ekanda w’Akristo wakayotshikitanaka. Etena kele ekanda w’edjedja wakendanaka ntondo paka l’ambeki wa Yeso wakotɔ lo nyuma, oma lo 1935, Tshoto y’Etangelo l’ekanda ekina w’‘ɔhɔmbɔ wa kɔlamelo’ washakɔ mbo ya ndɛ ya lo nyuma yasungana dia kotsha ehomba w’anto tshɛ, oyadi w’akitami kana wa anyawɔ wele l’elongamelo ka laa nkɛtɛ.—Mateu 24:45-47.
10 Tɔshi di’oko okitami ɔmɔtshi amboshisha kɔlamelo. Onde wayowɔhɛnya? Paulo akatɛkɛta dui sɔ efula l’ekimanyielo k’osongo w’ɔlivɛ wa didjidji. (Romo 11:11-32) Naka ekɔ ohomba wa pɛnya ɔnaki Nzambi ɔmɔtshi lakotɔ lo nyuma, kete lo mɛtɛ, Nzambi ayosha leeta la nde l’otsha l’olongo paka le onto leyama efula oma lo mbetawɔ kande lo woho wambondokamba olimu w’ekila ɛnɔnyi efula.—Ɛdika la Luka 22:28, 29; 1 Petero 1:6, 7.
Tekɔ l’Ɛkɔkɔ Efula wa Monga la Lowando
11 Oyadi lo dihole diakɔna diakambɛso Jehowa la kɔlamelo, nde ayokotsha ehomba aso la nsaki yaso y’amɛna. (Osambu 145:16; Luka 1:67-74) Oyadi kânga tekɔ l’elongamelo k’oshika k’otsha l’olongo kana ka lɔsɛnɔ l’ɔlɔlɔ lanɛ la nkɛtɛ, tekɔ l’ɛkɔkɔ efula wa mandola Nzambi. Nshi tshɛ, nde salaka awui efula di’ɔlɔlɔ w’anto wôlanga. Ombeki Jakɔba akate ate: ‘Losha tshɛ l’ɔlɔlɔ la la kokele ndjâka oma l’olongo, nɛ dia lɔ ndjâka oma le Jehowa Nzambi, She esase wa l’olongo.’ (Jakoba 1:17) Nyɛsɔ tɔsɛdingole weshasha l’ɛtshɔkɔ ɛmɔtshi walongolaso.
12 Jehowa akasha okambi ande tshɛ wa kɔlamelo elongamelo ka diambo. Nde akelɛ amɔtshi lo lɔsɛnɔ la l’olongo. Le Ɛmɛnyi ande waki la ntondo ka Kristo, nde akawasha elongamelo ka dimɛna ka mbolɔ oya lo lɔsɛnɔ la pondjo la nkɛtɛ. Oko ɛnyɛlɔ, Abarahama aki la mbetawɔ lo eolwelo ndo akakongaka “usumba weli la tshina dia wulu”—Diolelo dia l’olongo diele, la tshina di’ɛlɔmbwɛlɔ kadiɔ mbayondolɔ dia ndjɔsɛna la nkɛtɛ. (Heberu 11:10, 17-19) Ndo nto, lo nshi y’ekomelo nyɛ, Nzambi mbishaka miliyɔ y’anto elongamelo ka lɔsɛnɔ la pondjo lo paradiso ka la nkɛtɛ. (Luka 23:43; Joani 17:3) Lo mɛtɛ, onto tshɛ lele Jehowa ambowosha elongamelo ka woke ka ngasɔ la dia mbândola efula.
13 Jehowa mbishaka ekambi ande nyuma k’ekila oko losha. Akristo wele l’elongamelo k’otsha l’olongo wambokitamaka nyuma k’ekila. (1 Joani 2:20; 5:1-4, 18) Koko, ekambi a Nzambi wele l’elongamelo ka lɔsɛnɔ la la nkɛtɛ kimanyiyamaka ndo nɔmbwamaka la nyuma k’ekila. L’atei awɔ, mbaki ndo Mɔsɛ, ɔnɛ laki la nyuma ka Jehowa kâmɛ ndo anto 70 wakasɔnama dia mbokimanyiya. (Walelu 11:24, 25) L’ɛlɔmbwɛlɔ ka nyuma k’ekila, Bɛzalɛlɛ akakambe oko kanga manyi l’elimu wendana l’ohikelo wa tabɛrnakɛlɛ k’Ase Isariyɛlɛ. (Etumbelu 31:1-11) Nyuma ka Nzambi kakaholwɛ Ngidiyɔna, Jafɛta, samsɔna, Davidi, Eliya, Elisha, l’akina. Kânga mbaki kɔmbɔsama anto wa ntondo asɔ otsha lo lotombo la l’olongo, vɔ wakalɔmbwama ndo wakakimanyiyama oma le nyuma k’ekila, oko walɔmbwama ekɔkɔ ekina waki Yeso ɛlɔ kɛnɛ. Omalɔkɔ, monga la nyuma k’ekila kaki Nzambi hɛnya ɔnɛ wambotelɛ otsha l’olongo. Koko, nyuma ka Jehowa tɔlɔmbɔlaka, tokimanyiyaka dia sho sambisha ndo kotsha ɛkɛndɛ ekina watosha Nzambi, tɔ toshaka wolo woleki wɔnɛ wokongaka l’onto, ndo tɔshaka l’etema aso elowa atɔ wele oko: ngandji, ɔngɛnɔngɛnɔ, wɔladi, lotutsha, ɔlɔlɔ w’otema, ɔlɔlɔ, mbetawɔ, wɔlamu la ndjâkimɛ. (Joani 16:13; Etsha 1:8; 2 Koreto 4:7-10; Ngalatiya 5:22, 23) Onde hatokoke mandola Nzambi efula l’ɔtɛ wa losha lɔsɔ loludi la ngandji ka mamba?
14 Ewo la lomba wekɔ weshasha w’oma le Nzambi wahombaso mbokaka losaka, oyadi tekɔ l’elongamelo k’otsha l’olongo kana ka la nkɛtɛ. Ewo k’oshika ka Jehowa tokimanyiyaka dia sho ‘sɛdingola awui woleki ohomba’ la ‘dia sho kɛndakɛnda dimɛna oko alanga Jehowa ndo salaka paka kɛnɛ k’ɔngɛnyangɛnya.’ (Filipi 1:9-11; Kolosai 1:9, 10) Lomba l’oma le Nzambi tokokɛka ndo tɔlɔmbɔlaka lo lɔsɛnɔ. (Tukedi 4:5-7; Undaki 7:12) Ewo k’oshika la lomba tombaka oma lo Dui dia Nzambi, ndo atshikadi tshitshɛ w’akitami kotɔmaka lo yoho ya lânde oma lo kɛnɛ katadiɔ di’elongamelo kawɔ k’otsha l’olongo. Koko, aha naka sho nangaka Dui dia Nzambi kana dimanaka fundo, kete lâsɔ Nzambi ayotelɛ otsha lo lɔsɛnɔ la l’olongo. Anto wele oko Mɔsɛ la Danyɛlɛ, kânga mbakawafunde tenyi dimɔ dia Bible, vɔ wayolɔ oya lo lɔsɛnɔ la la nkɛtɛ. Oyadi tekɔ l’elongamelo k’otsha l’olongo kana ka la nkɛtɛ, sho tshɛ nongolaka mbo ya ndɛ ya lo nyuma oma le “ɔhɔmbɔ wa kɔlamelo ndo wa kɛsɔ” wetawɔma le Jehowa. (Mateo 24:45-47, NW) Ande diando diahombaso monga ladiɔ lo woho wambotokondja ewo ka ngasɔ lee!
15 Losha lɔmɔ loleki woke lakatosha Nzambi ele woho wakandalɔngɔsɔla olambo w’etshungwelo wa Yeso, watosha ɛlɔlɔ oyadi tekɔ l’elongamelo k’otsha l’olongo kana ka la nkɛtɛ. Nzambi akalange andja w’anto ɔnɛ “utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” (Joani 3:16) Ndo nto, ngandji kakoke Yeso anto akosokoya dia nde “mbakimwela [“anima ande,” NW] uku etshungwelu ka antu efula.” (Mateu 20:28) Oko wakadilembetshiya ɔpɔstɔlɔ Joani, Yeso Kristo ekɔ “ulambu wa ntulambwela dia kolo yasu [pɛkato y’akitami], aha ulambu asu shame atu, keli weko ndu wa antu tshe wa la kete.” (1 Joani 2:1, 2) Omalɔkɔ, sho tshɛ la dia monga la diando di’efula lo yɛdikɔ shɔ ya ngandji kande di’anto kondja panda ko kita lɔsɛnɔ la pondjo.b
Onde Wɛ Ayonga Lâwɔ?
16 Diando diele laso lo dikambo dia tshungo (rançon) kakalɔngɔsɔla Nzambi oma lo tshimbo y’Ɔnande la dia tosokoya dia sho monga lo Mbalasa ya Diolelo kana l’ahole akina wayotshumana Ɛmɛnyi wa Jehowa l’ɔkɔngɔ w’ɛɔtwɛlɔ ka wonya lo Ngɔndɔ ka Nɛi 11, 1998 dia mbohɔ nyɔi ka Kristo. Lam’akandamɛ sala difɛstɔ sɔ nde l’apɔstɔlɔ ande wa kɔlamelo l’otsho w’ekomelo wa lɔsɛnɔ lande la la nkɛtɛ, Yeso akate ate: “Kanyutshaki okone, dia mbuhomi.” (Luka 22:19, 20; Mateu 26:26-30) Lemba la tshitshɛ l’atshikadi w’akitami wayɔlɛ mapa waha la wodoya, wele didjidji dia demba dia Yeso diaha la pɛkato ndo wayɔnɔ vinyɔ yahɔtwɛ alikɔlɛ, didjidji dia dikila diande diakatshɔma oko olambo. Paka Akristo wakotɔ lo nyuma ato mbahomba ndɛ la nnɔ nɛ dia vɔ ato mbele lo sheke y’oyoyo ndo lo sheke ya Diolelo ndo vɔ ato mbele la djembetelo ya mɛtɛ y’ɔnɛ vɔ wekɔ la nyuma k’ekila ka Nzambi kâshikikɛ ɔnɛ elongamelo kawɔ ele k’otsha l’olongo. Miliyɔ y’anto akina wayonga lo eohwelo kakɔ oko wanɛ wenda kɛnɛ keta la dilɛmiyɛlɔ tshɛ ndo wele la diando di’efula lo ngandji kakɛnya Nzambi nde la Kristo lo dikambo di’olambo wa Yeso washa anto diaaso dia kondja lɔsɛnɔ la pondjo.—Romo 6:23.
17 Awui w’edjedja waketawɔka onto, kandji k’efula kokande oma lo nyɔi k’olangemi ande ɔmɔ, pâ yɛna anto lo lɔsɛnɔ la lushi la lushi, kana ɔfɔnyɛlɔ w’ɔnɛ Jehowa ambowasha ɛtshɔkɔ ɛmɔ wa lânde kokaka konya anto amɔ lo kana lo yoho ya kɔlɔ ɔnɛ wambowaelɛ otsha lo lɔsɛnɔ la l’olongo. Koko sho tshɛ la dia mbohɔ ɔnɛ: Afundelo hawotɔlɔmbɛ dia sho ndɛ tolembetelo lo Eohwelo dia mɛnya lowando lele laso l’olambo w’etshungwelo waki Kristo. Koko, dikambo dia kitama nyuma “hadiekama lulangu l’untu kuyanga dia elimu andi, keli dio mbekama ketshi ka [Nzambi],” Ɔnɛ lakote Yeso oko Ɔna la lo nyuma ndo lɔtshiya paka ana akina 144000 ato lo lotombo.—Romo 9:16; Isaya 64:8.
18 Le efula k’anto wakambɛ Jehowa lo nshi nyɛ y’ekomelo, elongamelo ka lɔsɛnɔ la pondjo lo paradiso ka la nkɛtɛ mbele losha lambowokondja oma le Nzambi. (2 Timote 3:1-5) Kema edja nto, kete vɔ wambɔtɔ lo paradiso kɛsɔ ka dimɛna efula. L’etena kɛsɔ, ewandji (princes) wayɔlɔmbɔla awui wa la nkɛtɛ la tshina dia lowandji la l’olongo. (Osambu 45:16) Wɔladi wa mɛtɛ wayoyala lam’ayetawɔ ambidjashi wa la nkɛtɛ kitanyiya ɛlɛmbɛ a Nzambi ndo lam’ayoweya awui efula wendana la mboka ya Jehowa. (Isaya 9:6, 7; Enyelo 20:12) Olimu wayoyala efula wa mbika mvudu ndo mbolɛ nkɛtɛ. (Isaya 65:17-25) Ohokanyiya nganɛ wayonga ɔngɛnɔngɛnɔ wa lo nkumbo lam’ayolɔ anto wakavu! (Joani 5:28, 29) L’ɔkɔngɔ w’ohemba wa komelo, awui wa kɔlɔ tshɛ wayoshila. (Enyelo 20:7-10) Ekomelo ko, l’ɔkɔngɔ diko, nkɛtɛ kayolola l’anto wa kokele ‘wayotshungɔ oma lo lɔhɔmbɔ l’ɛhɔndɛlɔ ko ndjâla la lotshungɔ la lotombo l’ana a Nzambi.’
[Footnotes]
a Enda lo dibuku Insight on the Scriptures, Vɔlimɛ 1, lɛkɛ 225-6.
b Enda lo Tshoto y’Etangelo ya Ngɔndɔ ka Sato 15, 1991, lɛkɛ 19 polo 22.
[Study Questions]
1. Ngande wakɛnamaka olambo wa Yeso lo yoho ya didjidji lo Lushi l’Ekesanelo na?
2, 3. Awui wa Paulo wofundami lo Romo 8:20, 21 alembetshiyawɔ?
4. ‘Mbɔsa ashi a lɔsɛnɔ wɔsɔsa’ kɛdikɛdi na?
5. Anto akɔna wele Ɛmɛnyi wa Jehowa ngɛnangɛnaka dia vɔ ndjâla l’atei awɔ?
6. Ngande wakakambe nyuma ka Nzambi olimu lo dikambo di’ekambi wa Jehowa lo deko diotshikitanyi na?
7. Naa olimu a dinela wakendanaka l’Ambeki wa Bible, ndo akaweyaka lo dikambo dia paradiso?
8. Olembetshiyelo akɔna wakakondjama yema yema lo dikambo dia elongamelo ka sɛna la nkɛtɛ l’etatelo k’ɛnɔnyi wa 1930?
9. Lande na kakayotshikaka Akristo amɔ ndɛ mapa ndo nnɔ vinyɔ lo Dambo dia Nkumadiɔndjɔ dia la Dikɔlɔ l’ɔkɔngɔ w’ɔnɔnyi 1935?
10. Ngande wakoka pɛnama okitami ɔmɔtshi wamboshisha kɔlamelo yande?
11. Oyadi elongamelo ka ngande kele laso, Jakoba 1:17 atoshikikɛnde?
12. Lande na kakokaso mbuta ɔnɛ Jehowa akasha okambi ande tshɛ wa kɔlamelo elongamelo ka diambo na?
13. Ngande wakakambe nyuma k’ekila kaki Nzambi olimu lo dikambo di’ekambi ande?
14. Ɛlɔlɔ akɔna wakondjaso oma lo ewo la lomba, weshasha w’oma le Nzambi na?
15. Naa woshasha ɔmɔ waki Nzambi woleki woke, ndo ngande wɔsayɛ woshasha akɔ?
16. Dikambo diakɔna di’ohomba efula diayotohɔ l’ɔkɔngɔ w’ɛɔtwɛlɔ ka wonya lo Ngɔndɔ ka Nɛi 11, 1998, ndo akɔna ahomba ndjâla lawɔ?
17. Ahombaso mbohɔka lo dikambo di’okitamelo wa nyuma?
18. Le efula ka wanɛ wakambɛ Jehowa ɛlɔ kɛnɛ, ɛtshɔkɔ akɔna wâkongɛ la ntondo na?
[Caption]
[Footnotes]
[Caption]
[Questions]
[Caption on page 16]
[Caption on page 16]
Miliyɔ y’anto yakatatɛ ‘mbɔsa ashi wa lɔsɛnɔ wɔsɔsa.’ Ndo wɛ mbele l’atei awɔ?
[Caption on page 20]
[Review on page 20]
Ngande Wayoyokadimola?
◻ ‘Mbɔsa ashi wa lɔsɛnɔ wɔsɔsa’ kɛdikɛdi na?
◻ Oyadi tekɔ l’elongamelo k’otsha l’olongo kana ka la nkɛtɛ, ɛkɔkɔ akɔna wele laso wa mandola Nzambi?
◻ Difɛstɔ diakɔna diohɔso mbala ɔtɔi l’ɔnɔnyi diahombaso monga lawɔ na?
◻ Woho akɔna wa nshi yayaye yakongɛ ekambi wa Jehowa suke la tshɛ?