Tɔngɛnɛngɛnɛ Lo elongamelo kaso
“[Tekɔ la] elungamelu ka lumu la pundju, le [Nzambi k]aheyi mvuta kashi, uku akandalaki lu deku diaketi.”—TITO 1:2.
OVUSWELO
Lande na kataso ɔnɛ ɔngɛnɔngɛnɔ mongaka l’olongo etena kavɔ Okristo w’okitami la kɔlamelo?
Lande na kahomba ɛkɔkɔ ekina nshihodia elongamelo kele l’akitami?
Dia sho ndjɛna ekotshamelo k’elongamelo kaso, lɔkɛwɔ la ngande lahombaso monga la lɔ?
1. Elongamelo kakatosha Jehowa tokimanyiyaka dia nsala na?
LAM’ELE Jehowa ekɔ ‘Nzambi kasha elongamelo,’ ɔpɔstɔlɔ Paulo akate ate nde kokaka ‘tolodia l’ɔngɛnɔngɛnɔ ndo la wɔladi l’ɔtɛ wayaɛkɛso le nde dia sho monga l’elongamelo k’efula l’ekimanyielo ka wolo wa nyuma k’ekila.’ (Romo 15:13) Naka sho monga l’elongamelo k’efula, kete tayokikɛ ehemba wakokaso mpomana la wɔ ndo tayonga l’ɔngɛnɔngɛnɔ ndo la wɔladi. Akristo w’akitami ndo ɛkɔkɔ ekina mbɔsaka elongamelo kɛsɔ oko “lungu la mashua l’utema, [l]eli la mete la eteti.” (Heb. 6:18, 19) Sho pombaka nkukutɛ elongamelo kaso lo tena di’ehemba nɛ dia tɔ kayotokimanyiya diaha sho ndjoshisha mbetawɔ.—Adia Heberu 2:1; 6:11.
2. Naa weho ehende w’elongamelo wele l’Akristo ɛlɔ kɛnɛ, ndo lande na kahomba ɛkɔkɔ ekina nshihodia elongamelo kele l’akitami?
2 Okristo tshɛ ekɔ l’elongamelo kɛmɔtshi. Atshikadi wa lo “limba la tshitshe l’ekoko” wekɔ l’elongamelo ka tokondja lɔsɛnɔ lahavu l’olongo ndo tonga nkumi ya dikanga ndo ɛlɔmbɛdi kâmɛ la Kristo lo Diolelo diande. (Luka 12:32; Eny. 5:9, 10) “Ului a wuki” wa “ekoko ekina” wekɔ vɔ lawɔ l’elongamelo ka ndjɔsɛna lo Paradiso ka la nkɛtɛ l’ɛlɔmbwɛlɔ ka Diolelo dia Mɛsiya. (Eny. 7:9, 10; Joa. 10:16) Ɛkɔkɔ ekina hawohombe mbohɛ pondjo dia panda kawɔ nemanɛka la woho wasukɛwɔ ‘anango’ Kristo w’akitami weke la nkɛtɛ. (Mat. 25:34-40) Oyadi Akristo w’akitami kana ɛkɔkɔ ekina, vɔ tshɛ wayolongola difuto diawɔ. (Adia Heberu 11:39, 40.) Koko nyɛsɔ tɔsɛdingole ntondo elongamelo kele l’akitami.
“ELUNGAMELU KA LUMU” KELE L’AKRISTO W’AKITAMI
3, 4. Ngande ‘wotɔ Akristo w’akitami mbala ka hende’ dia monga la “elungamelu ka lumu,” ndo naa elongamelo kakɔ?
3 Ɔpɔstɔlɔ Petero akafundɛ Akristo w’akitami mikanda ehende w’etondo ndo nde akawaelɛ ɔnɛ wanɛ “wakasonama.” (1 Pet. 1:1, 2) Nde akatɛkɛta awui efula wendana l’elongamelo kawɔ. Lo mukanda ande wa ntondo, Petero akafunde ate: “Watumbuli [Nzambi] Shi Khumesu Jesu Kristu. Ndi akatuti ntu uma lu ketshi kandi ka wuki, dia shu ndjala la elungamelu ka lumu ne dia eulwelu ka Jesu Kristu uma lu nyoi; dia shu ndjala la sangu diahahonde, diahalana, diahashisho, diakawanyukitshiya l’ulungu. Nyu ane wambulamema lu wulu a [Nzambi] dia mbetawo kanyu, nyayuyala la panda kayenyama le nyu l’etena k’ekumelu. Dikambu ne diambunyongenyangenya efula.”—1 Pet. 1:3-6.
4 Jehowa akasɔnɛ djui y’Akristo w’akitami dia vɔ tolɛ kâmɛ la Kristo l’olongo ndo dia vɔ ‘mbotɔ mbala ka hende’ l’oyango wa vɔ nkoma anande wa lo nyuma dia tonga nkumi ya dikanga ndo ɛlɔmbɛdi l’olongo kâmɛ la Kristo. (Eny. 20:6) Bible mɛnyaka ɔnɛ ‘kam’otɔwɔ mbala ka hende,’ vɔ mongaka la “elungamelu ka lumu” kelamɛ ɔnɛ “sangu diahahonde, diahalana, diahashisho” diakawalamɛ “l’ulungu.” (1 Pet. 1:3) Kema dui dia diambo di’akitami ‘monga l’ɔngɛnɔngɛnɔ w’efula’ l’ɔtɛ w’elongamelo kawɔ kɛsɔ. Koko dia vɔ ndjokondja difuto, vɔ pombaka ntetemala monga la kɔlamelo polo lo nyɔi.
5, 6. Lande na kahomba Akristo w’akitami nsala la wolo dia vɔ nkukutɛ leeta lawɔ l’otsha l’olongo?
5 Lo mukanda wa hende wakandâfundɛ, Petero akahɛmɔla Akristo w’akitami dia vɔ ‘nsala kɛnɛ tshɛ kakokawɔ nsala dia nkukutɛ diɛsɛ dia mbelamɛ ndo sɔnama.’ (2 Pet. 1:10) Vɔ pombaka nkɛnɛmɔla waonga w’Okristo wele oko mbetawɔ, kɔlamelo ndo ngandji. Petero akawatɛ ate: “Naka akambu ane wambuhama lu etema anyu, vo hawunyete tusuasua kana uku antu wahato elua dia nimbitela Khumesu Jesu Kristu.”—Adia 2 Petero 1:5-8.
6 Kristo akatɛ dikumanyi di’akitami diaki l’etshumanelo ka la Filadɛlɛfiya lo Asie Mineure ate: “Ne dia we akakitanyia diui di’etetemalu kami, dimi layukulama uma lu unya uku w’ehimba, wayuya le wa la kete tshe, ne dia mpimba wane wudjashi la kete. Dimi layuya esadi. Ukimeli kele laye wulu, untu takokosolaki dembo daye dia kusu.” (Eny. 3:10, 11) Naka Okristo w’okitami ɔmɔtshi nshisha kɔlamelo yande, kete nde holongola “dembo dia kusu dia lutumbu” diakawalake wanɛ watshikala la kɔlamelo edja ndo lo nyɔi.—1 Pet. 5:4; Eny. 2:10.
WAKELAMƐ DIA MBƆTƆ LO DIOLELO
7. Naa elongamelo ka lânde kakafunde Judɛ lo mukanda ande?
7 Oya l’ɔnɔnyi 65 T.D., Judɛ y’ɔnango Yeso akafundɛ wanyande Akristo w’akitami mukanda ndo nde akawaelɛ ɔnɛ “wane wambetama.” (Jude 1; ɛdika la Heberu 3:1.) Lo mukanda akɔ, nde akaleke ntɛkɛta di’elongamelo ka panda kele l’Akristo w’akitami tshɛ. (Jude 3) Kânga mbakinde l’awui efula w’ohomba wa mbafundɛ, ɛtɛkɛta w’ekomelo wa lo mukanda ande tɛkɛtaka di’elongamelo kele la wɔ vɔ tshɛ ɔnɛ: “One leya nyulama diaha nyu ntakana, leya nyukitsha nyaha la vadi la ntundu ka lutumbu landi la ongenongeno utamanya, [Nzambi k]ame, [Nzambi k]asu, ayali la lutumbu, la wuki, la diulelu, la wulu la ntundu k’etatelu, ndu kakiane, ndu pundju, uma le Jesu Kristu Khumesu. Ayali osoku.”—Jude 24, 25.
8. Lo ndjela Jude 24, kakɔna kɛnya di’ɔngɛnɔngɛnɔ mongaka l’olongo etena kavɔ Okristo w’okitami la kɔlamelo?
8 Lo mɛtɛ, Akristo w’akitami wele la kɔlamelo hawokombola nshisha kɔlamelo yawɔ l’onto ndo l’onto. Bible mɛnyaka dia Yeso Kristo ayowaolola ndo ayowakonya kokele lo nyuma l’oyango wa tɛnama la ntondo ka Nzambi wele l’ɔngɛnɔngɛnɔ w’efula. Naka Okristo w’okitami mvɔ la kɔlamelo, kete nde kokaka monga l’elongamelo ka ‘ndjolwama la demba dia lo nyuma’ ndo ‘diahahɔndɛ lo lotombo.’ (1 Kor. 15:42-44) Lam’ele “ongenongeno [mongaka] utamanya l’ulungu lu dikambu dia untu a kolo otoi lukadimudi utema,” ɔngɛnɔngɛnɔ w’efula mongaka etena kavɔ Okristo w’okitami la kɔlamelo. (Luka 15:7) Jehowa kâmɛ l’andjelo ngɛnangɛnaka efula etena kalongola Okristo w’okitami difuto diande la “ongenongeno utamanya.”—Adia 1 Joani 3:2.
9. Ɛtshɔkɔ akɔna wayokondja Akristo w’akitami ‘lam’ayowɔtɔ lo Diolelo’ diaki Nzambi, ndo shɛngiya yakɔna yele la dui sɔ le akitami weke la nkɛtɛ?
9 Petero nde lawɔ akate dia naka Akristo w’akitami ntetemala nkukutɛ leeta lawɔ lo ntshikala la kɔlamelo polo lo nyɔi, kete vɔ “[wayɔtɔ] lu diulelu dia pundju dia Khumesu, Ushimbedi Jesu Kristu.” (2 Pet. 1:10, 11) Vɔ wayɔtɔ “lu diulelu dia pundju” diaki Nzambi nɛ dia vɔ wayotetemala nkɛnɛmɔla waonga w’Okristo l’ɔngɛnɔngɛnɔ tshɛ. ‘Wɔtwɛlɔ’ ɔsɔ mendanaka ndo l’ɔngɛnɔngɛnɔ w’efula wayonga la wɔ lo woho wayowoshidiya esakelo kawɔ ka lowango la kɔlamelo. Vɔ wayohɔka l’ɔngɛnɔngɛnɔ ndo la lowando tshɛ woho wakawatshikala la kɔlamelo. Aha la tâmu, elongamelo kɛsɔ mbishaka Akristo w’akitami weke la nkɛtɛ wolo wa vɔ ‘monga la yimba ya nkamba olimu wa Nzambi.’—1 Pet. 1:13.
ELONGAMELO KELE L’ƐKƆKƆ EKINA
10, 11. a) Elongamelo kakɔna kele l’ɛkɔkɔ ekina? b) Ngande wendana ekotshamelo k’elongamelo kɛsɔ la Kristo ndo l’ɛnamelo ka “ana a [Nzambi]”?
10 Ɔpɔstɔlɔ Paulo akate di’Akristo w’akitami wekɔ “ana a [Nzambi]” ndo “ekito kame” la Kristo. L’ɔkɔngɔ diko, nde akayɔtɛkɛta di’elongamelo kekina ka dimɛna efula kele la lemba la woke l’ɛkɔkɔ lo mbuta ɔnɛ: “Ditungatunga tshe diatulungamelaka la pusa ka wulu dia mena enelo k’ana wa [Nzambi, akitami]. Ditungatunga diakalembiama lu akambu w’anyanya, aha ne dia lulangu ladio, keli ne dia lulangu la one lakadilembia, ladisha elungamelu ati: Ditungatunga diayutshungwama uma lu lohombo la ehondelo, dia mboto lu ndjadjasela ka lutumbu la ana a [Nzambi].”—Romo 8:14-21.
11 Jehowa toshaka “elungamelu” nɛ dia nde ndakaka dia ntshungola anto tshɛ oma lo lɔhɔmbɔ laki Satana Diabolo “ului ako a wuki w’edjedja” lo tshimbo ya ‘kanula’ yakalakema. (Eny. 12:9; Etat. 3:15) Yeso mbele etenyi ka ntondo ka “kanula” shɔ. (Ngal. 3:16) Oma lo tshimbo ya nyɔi ndo y’eolwelo kande, Yeso mbishaka anto tshɛ elongamelo ka ntshungɔ oma lo pɛkato la nyɔi. Ekotshamelo k’elongamelo kɛsɔ mendanaka ndo la “en[am]elo k’ana a [Nzambi].” Vɔ mbakenga etenyi ka hende ka “kanula” yakalakema ndo ‘wayɛnama’ lo yoho yayowokimanyiya Kristo dia ndanya dikongɛ nɛ dia kɔlɔ diaki Satana. (Eny. 2:26, 27) Dui sɔ diayonga tshondo y’etshungwelo le ɛkɔkɔ ekina wayoya oma lo fɔnu ka woke.—Eny. 7:9, 10, 14.
12. Ɛtshɔkɔ akɔna wayela ɛnamelo k’Akristo w’akitami le anto wa l’andja w’otondo?
12 Lo mɛtɛ, “ditungatunga” tshɛ diayotshungɔ l’edja k’Ɛlɔmbwɛlɔ k’ɛnɔnyi kinunu ka Kristo. L’etena kɛsɔ, “ana a [Nzambi]” ‘wayoshɔma’ nto etena kayowokamba oko ɛlɔmbɛdi kâmɛ la Kristo ndo kayowɔtshɔkɔla anto wa l’andja w’otondo lo tshimbo y’olambo wa tshungo waki Yeso. Oko wayowonga l’ɛse k’ɛlɔmbwɛlɔ ka Diolelo dia l’olongo, “ditungatunga” tshɛ diayotshungɔ oma l’etombelo wa kɔlɔ w’oma lo pɛkato la nyɔi. Anto wele l’okitanyiya wayotshungɔ “uma lu lohombo la ehondelo.” Naka vɔ ntshikala la kɔlamelo le Jehowa l’edja k’Ɛlɔmbwɛlɔ k’ɛnɔnyi kinunu ndo l’ohemba w’ekomelo wayonga l’ekomelo k’etena kɛsɔ, kete nkombo yawɔ yayotshikala pondjo lo “buku dia lumu.” Vɔ wayɔtɔ lo “ndjadjasela ka lutumbu la ana a [Nzambi].” (Eny. 20:7, 8, 11, 12) Ɔsɔ ayonga mɛtɛ elongamelo ka diambo efula.
TOTETEMALE NAMA ELONGAMELO KASO
13. Elongamelo kakɔna kele la so, ndo etena kakɔna kayoshɔma Yeso?
13 Lo mikanda ande ehende wakandafundɛ Akristo w’akitami ndo ɛkɔkɔ ekina, Petero akâkeketsha dia vɔ tshɛ ntetemala nama elongamelo kawɔ. Nde akɛnya diaha l’ɔtɛ w’etsha awɔ w’amɛna mbakawakondja elongamelo kɛsɔ, koko l’ɔtɛ wa ngandji ka mamba kaki Jehowa. Nde akafunde ate: “Nyolame akoka anyu w’ekanelo ka yimba dimɛna dimɛna. Nyokitsha elongamelo kanyu lo ngandji ka mamba kayowonyoka lo woshwelo wa Yeso Kristo.” (1 Pet. 1:13, NW) Kristo ayoshɔma etena kayondoya dia ndjofuta ambeki ande wa kɔlamelo ndo kayondoyolanya anto wa kɔlɔ.—Adia 2 Tesalonika 1:6-10.
14, 15. a) Dia ntetemala nama elongamelo kaso, ahombaso mbohɔka? b) Dako diakɔna diakasha Petero lo dikambo sɔ?
14 Dia sho ntetemala nama elongamelo kaso, sho pombaka mbohɔka oyelo wa ‘lushi la Jehowa.’ Lo lushi lɔsɔ, Jehowa ayolanya “ulungu” wa nshi nyɛ, mbuta ate mandji y’ana w’anto ndo “kete” yalembetshiya anto wa kɔlɔ ndo “diango tshe dieli loko.” Petero akafunde ate: “Wuhu akona w’antu wayunyuyala . . . , lam’alungamelanyu lushi l’eyelu ka [Nzambi], lu lushi lako layulungula ulungu dja; ndu diango tshe dieli loko, diayolelo la dja ya wulu!”—2 Pet. 3:10-12.
15 “Ulungu” ndo “kete” nyɛ yayɔhɛnyama la “ulungu w’uyuyu [Diolelo diaki Kristo]” ndo “kete y’uyuyu [tshunda dia la nkɛtɛ di’anto w’ɛlɔlɔ].” (2 Pet. 3:13) L’ɔkɔngɔ diko, Petero akasha dako di’oshika diendana la woho wahombaso ‘kongɛ’ akambo asɔ ndo ntetemala nama elongamelo kaso lo mbuta ate: “Okone, elangimi ami, ne dia nyu nyambulungamela akambu ane, nyutetemali dia nyu ntanema la ki, aha la vadi, aha la unungu lu ashu andi.”—2 Pet. 3:14.
TOSALAKE AKAMBO LO YOHO YƆTƆNƐ L’ELONGAMELO KASO
16, 17. a) ‘Etsha wa lɔkɛwɔ l’ekila’ ndo ‘etsha w’anto wamamema Nzambi’ kɛdikɛdi na? b) Awui akɔna wahombaso nsala dia sho ndjɛna ekotshamelo k’elongamelo kaso?
16 Hatohombe nkomɛ lo nama elongamelo kaso, koko sho pombaka nto nsala akambo lo yoho yɔtɔnɛ la tɔ, mbuta ate nama lonyuma laso dimɛna. Monga la ‘etsha wa lɔkɛwɔ l’ekila’ nembetshiyaka monga la ‘lɔkɛwɔ la dimɛna l’atei w’ase wedja.’ (2 Pet. 3:11; 1 Pet. 2:12) Sho pombaka ‘mbokana ngandji lam’asaso.’ Dui sɔ nembetshiyaka dia sho pombaka nsala kɛnɛ tshɛ kakokaso nsala dia nama kâmɛ kele lo nkumbo kaso k’onto l’ɔnango ka l’andja w’otondo ndo ka l’atei w’etshumanelo. (Joa. 13:35) Dia monga la diɔtɔnganelo dia dimɛna la Jehowa, sho pombaka ‘monga la ditshelo diɛnya dia sho mbomamemaka.’ Kɛsɔ mendanaka ndo la woho wɔlɔmbaso, wadiaso Bible, wasalaso wekelo w’onto ndamɛ, wasalaso Ɔtɛmwɛlɔ wa lo nkumbo ndo wayashaso l’esambishelo ka ‘lokumu l’ɔlɔlɔ la Diolelo.’—Mat. 24:14.
17 Onto tshɛ la l’atei aso kombolaka mbetawɔma le Jehowa ndo ndjoshimbamɛ etena kayondolanya dikongɛ nɛ dia kɔlɔ. Ɔnkɔnɛ, tayonga l’ɔngɛnɔngɛnɔ etena kayokotshama “elungamelu [kaso] ka lumu la pundju, le [Nzambi k]aheyi mvuta kashi, uku akandalaki lu deku diaketi.”—Tito 1:2.
[Osato wa lo lɛkɛ 22]
Akristo w’akitami ‘mbotɔka mbala ka hende’
[Osato wa lo lɛkɛ 24]
Nyolamake elongamelo ka lɔsɛnɔ la pondjo lo nkumbo kanyu