Kanyi Y’akristo Lo Dikambo Di’okundelo

NYƆI ka shashimoya k’onto ɔmɔtshi lalangaso efula mbishaka kandji heyama. Tɔ mbishaka onto shɔkɛ ndo wɔɔngɔ pandjɔka. Kandji kakɔ kitakitaka yema lam’avɔ onto lalangaso efula l’ɔkɔngɔ wa nde sowa edja efula la hemɔ, koko lonyangu lele laso lo woho wambotôshisha hashile.

Oyadi nyɔi ka ngande kovwe onto, asek’odo mongaka l’ohomba wa vɔ mbasamba mbakeketsha. Okristo lambovusha mbeyaka mbɔtɔ l’ɔhɛnyɔhɛnyɔ okina oma le anto akina wotshutshuya dia nde ndjela mbekelo y’anto yahɔtɔnɛ l’Afundelo l’awui w’okundelo kana w’otanda. Dikambo sɔ ndekaka tshama efula l’Afrika, koko ndo l’ahole akina.

Kakɔna kayokimanyiya Okristo wambovusha dia nde mbewɔ mbekelo yahɔtɔnɛ l’Afundelo yendana l’okundelo? Ngande wakoka anyande ambetawudi mbokimanyiya lam’ahomanande l’ehemba wa ngasɔ? Okadimwelo a wembola ɛsɔ mendanaka l’onto layakiyanya dia ngɛnyangɛnya Jehowa, nɛ dia “otemwelo weli pudipudi, waha la vadi lu ashu a [Nzambi] Shesu, weko okone: ntsho dia ntenda ana wa tshiki la wadi waki edu lu asui awo, la dia untu ndjalama diaha ndi ndjala la akambu wa kolo wa la kete.”​—⁠Jakoba 1:⁠27.

Mbekelo Yakɔ Fɔnaka lo Dikambo Ɔtɔi

Mbekelo efula yendana l’okundelo fɔnaka lo dikambo ɔtɔi nɛ: anto mbetawɔka ɔnɛ: onto lambovɔ sɛnaka l’andja ɔmɔtshi wahɛnama wa watshɛso. Dia tutsha nkɛlɛ ka wanɛ wakavu, asek’odo fɔnyaka ɔnɛ vɔ pombaka ntsha sɛlɛmɔnyi mɔtshi. Ndo nto, vɔ ntshaka dui sɔ la wɔma w’asukanyi awɔ wata ɔnɛ naka hawotshe selemɔnyi ya ngasɔ, kete wâle ɔmɔtshi wayokomɛ ngelo k’otondo.

Okristo wa mɛtɛ hahombe mboka onto wɔma ko ndjela mbekelo yahangɛnyangɛnya Nzambi. (Tukedi 29:25; Mateu 10:28) Bible mɛnyaka ɔnɛ wanɛ wakavu haweye ndoko dui, nɛ dia tɔ mbutaka ɔnɛ: “Wanɛ wasɛna mbeyaka ɔnɛ wayovɔ; kele wanɛ wambovɔ, haweye ndoko dui . . . Ndoko olimu kana kanyi, ewo kana lomba lo Shɛɔlɛ, dihole diatayatshu.” (Ondaki 9:​5, 10, NW) Omalɔkɔ, Jehowa Nzambi akewola ekambi ande wa lo nshi y’edjedja di’aha vɔ pemba tutsha kɛlɛ ka wanɛ wakavu kana tɛkɛta la wɔ. (Euhwelu k’Elembe 14:1; 18:​10-12; Isaya 8:​19, 20) Akambo wa mɛtɛ wa lo Bible asɔ hawɔtɔnɛ la mbekelo efula y’awui w’okundelo yambokokanɛ l’andja ɔnɛ.

Kayotota dia “Mbɔtsha Omi Kana Wadi Aki Odo”?

Lo wedja ɛmɔtshi wa l’Afrique central, vɔ wekɔ la mbekelo ka wadi lambovusha omi mbeyana l’onto ɔmɔtshi lotɔ l’omɛnde owotɔ wa kasuke. Vɔ mbokaka wɔma w’ɔnɛ: naka hawotshe ngasɔ, kete ɔnɛ diɛwɔ ndjɔhɛnyahɛnya ase nkumbo wotshikadi. Tshelo shɔ mbelɛwɔ “mbɔtsha wadi aki odo.” Koko, Bible mbutaka ɔnɛ dieyanelo tshɛ dia l’andja a diwala ekɔ ‘monanyi.’ Lam’ele Akristo pombaka ‘ndawɔ monanyi,’ vɔ mongaka la dihonga dia tona mbekelo kɛsɔ kahɔtɔnɛ l’Afundelo.​—⁠1 Koreto 6:⁠18.

Tênde kɛnɛ kakakomɛ wadi aki odo ɔmɔtshi lelɛwɔ Mercy.a Lam’akavu omɛnde lo 1989, ewotɔ ande wakalange nde mbeyana l’osek’omɛnde ɔmɔtshi dia mbowɔtsha kana mbɛ̂dia. Nde akatone, ndo akâlembetshiya ɔnɛ Nzambi halange awui wa ngasɔ. Kam’akawoke ngasɔ, ewotɔ ande wakoke nkɛlɛ ko wakawɛnya pâ la lɔtɛngɔ. L’ɔkɔngɔ a ngɔndɔ ɔtɔi, vɔ wakaye nto, wakayomba diangɔ tshɛ dia lo luudu ndo wakalifufola. Vɔ wakawotɛ vate: “Aya ɔtɛmwɛlɔ ayɛ ndjokokimanyiyaka.”

Ase etshumanelo wakasambe Mercy ndo wakawokɛ luudu l’oyoyo. Asukanyi ande wakâmbe heyama, ko amɔtshi wakakitɛ lo mbisha lonya dia mbika luudu lakɔ, mama kɛmɔtshi k’Oseka Mupɛ laki wadi’owandji a ngelo mbaki onto la ntondo la mbela sɔdu dia vɔ ndjôfufɛ luudu. Kɔlamelo yaki Mercy akakeketsha anande. Anɛi l’atei awɔ wakakimɔ nsɛnɔ yawɔ le Jehowa Nzambi ndo ɔnande ɔmɔtshi mala mbɔtɔ lo Kalasa k’Olowanyelo w’Ekambi.

L’ɔkɔkɔ wa mbekelo ka paka vɔ mbeyana ayɛ ko kɔ̂tsha dia kɛ̂dia, Akristo amɔtshi wakayetawɔka tshukana l’apanganu. Ɛnyɛlɔ, pami kɛmɔtshi k’ɛnɔnyi ndekana 70 kakavusha wadiɛnde, akayotshukana esadi eto l’osekaseka ɔmɔtshi wôtɔ la wadiɛnde. Lo ntsha ngasɔ mbakandakoke mbuta ɔnɛ wambowɔtsha kana mbɛdia. Koko, dionga dia ngasɔ hadiɔtɔnɛ la dako dia lo Bible diata ɔnɛ Akristo pombaka ‘tshukana paka lo Nkumadiɔndjɔ.’​—⁠1 Koreto 7:⁠39.

Ndala Ongondo l’Otanda

Lo wedja efula, vɔ ntshaka otanda laka ɔnɛ lovwe ndo ndalaka ongondo. Kawɔ ak’ango mbalɛwɔ mbanɔwɔ ndo mbahomawɔ lomamba. Vɔ fɔnyaka ɔnɛ lo ntsha ngasɔ mbayowotutsha nkɛlɛ k’ɔnɛ lovwe ndo kokɛ ase nkumbo weke la lɔsɛnɔ oma le ɛlɔki. Vɔ tɔtɛtɛmɔlaka ɔnɛ lovwe dia nde mbaoka kɛtshi. Esangɔ ɛmɔtshi ndjak’onto mbida losaka oko dihoka, ko nde memba osambu a nzambi, ko okina ndjâkola ɔtɛkɛta. Mbala efula vɔ mengɔnyaka ngasɔ oto polo la pindjub.

Okristo wa mɛtɛ hahombe ndala ongondo l’otanda nɛ dia Bible mɛnyaka ɔnɛ wanɛ wambovɔ hawokoke kimanyiya kana tshelɛ wanɛ wasɛna kɔlɔ. (Etatelu 3:19; Osambu 146:​3, 4; Joani 11:​11-14) Afundelo tonaka ɔtɛmwɛlɔ w’ɛdiɛngɛ. (Enyelo 9:21; 22:15) Mɛtɛ, wadi aki odo lele Okristo mbeyaka mɛna wolo shimba ase nkumbo akina di’aha vɔ tambɛ l’ɔtɛmwɛlɔ w’ɛdiɛngɛ. Vɔ mbeyaka tɛtɛ dia paka ndala ongondo lâkande. Kakɔna kakoka Akristo akina ntsha dia kimanyiya anyawɔ wambovusha ko wambohomana ndo l’ohemba okina lâdiko na?

Mbala efula, dikumanyi dia l’etshumanelo tongaka l’akoka wa kimanyiya Okristo wambovusha lo kana lomba l’ewotɔ ndo l’asukanyi ande. L’ɔkɔngɔ wa kana la wɔ lomba ngasɔ, anto asɔ mbeyaka mbetawɔ kawola lawakawɔ lo wɔladi tshɛ ko ndjoya la pindju ka lushi lokina dia ndjeka kɛnɛ ka ntsha dia nkundɛ odo. Ko ahombaso ntsha naka amɔtshi wolanga tondja awui w’ata? Mbeyaka ndjâla k’onto lakananyu lande yimba ambotatɛ la ta. ‘Okambi wa Nkumadiɔndjɔ halɔ ata, koko ayakimele l’akambo wa kɔlɔ.’ (2 Timote 2:24) Ɔnkɔnɛ, naka ewotɔ wahalange mboka wotatshu lo wolo wolo, kete ondo kadiyɛso lambovusha kâmɛ ndo anande mbeyaka mbatshika ki. Koko, hawohombe ndjatambiya lo sɛlɛmɔnyi y’esambu awɔ a nzambi kana l’akambo akina wayowotshaka la ngelo, nɛ dia vɔ kitanyiyaka didjango dia lo Bible diata ɔnɛ: ‘Tanyɔsɔhanake la wanɛ wele bu ambetawudi.’​—⁠2 Koreto 6:⁠14.

Dui sɔ mendanaka ndo wonya w’okundelo. Ɛmɛnyi wa Jehowa hawembe lomamba, esambu a nzambi, hawɔlɔmbɛ, kana ndjela sɛlɛmɔnyi yalɔmbwama oma le ose ɔtɛmwɛlɔ wa kashi. Naka Akristo wa lo nkumbo kɛsɔ mɛnaka dia ekɔ ohomba mbasha lonya dia kundɛ onto awɔ, kete vɔ hawohombe ndjatambiya lo mbekelo shɔ y’ashidi.​—⁠2 Koreto 6:17; Enyelo 18:⁠4.

Kɛnɛ Kele Ɔlɔlɔ Tsha Wonya w’Okundelo

Lam’alɔmbɔla Ɛmɛnyi wa Jehowa elimu w’okundelo, vɔ hawonyi dia tutsha kɛlɛ k’ɔnɛ lambovɔ. Vɔ mbishaka dako dimɔtshi diɔsami oma lo Bible lo Mbalasa ka Diolelo, kana laka ɔnɛ lovwe, ko kana la diombo. Oyango wa dako sɔ ele dia samba aseka odo lo mbolembetshiya kɛnɛ kata Bible lo dikambo dia nyɔi ndo di’elongamelo k’eolwelo. (Joani 11:25; Romo 5:12; 2 Petero 3:13) Vɔ mbeyaka memba osambu ɔmɔtshi wɔsami oma l’Afundelo, ndo vɔ kumiyaka dako sɔ la dɔmbɛlɔ di’ekeketshelo.

Atete ndok’edja, vɔ mala kundɛ Ɔmɛnyi ɔmɔtshi wa Jehowa wa omoto lo yoho shɔ, nde aki ɔna koshe l’otema waki waa Nelson Mandela, presida ka l’Afrique du Sud. L’ɔkɔngɔ wa dako, presida akasha ɔtɛkɛtshi losaka efula. Ɛlɔhɛ efula waki lawɔ ndo ewandji w’alembe. Ministrɛ ɔmɔtshi wa omoto akate ate: “Dimi talɛnaka yoho y’okundelo ya dimɛna nganɛ.”

Onde Kɔlɔ Ndɔta Pidi?

Ɛmɛnyi wa Jehowa mbokaka kandji efula lam’avushawɔ anto awɔ wa ngandji efula. L’ɛnyɛlɔ ka Yeso, vɔ mbeyaka ndela. (Joani 11:​35, 36) Koko, vɔ hawɛnyi ohomba wa paka ndɔta pidi ko mɛnya anto akina ɔnɛ vɔ ango walela. (Ɛdika la Mateu 6:​16-18.) Lo wedja efula, vɔ mbutɛka wadi waki edo dia ndɔta ahɔndɔ amɔtshi wa lânde dia tutsha kɛlɛ k’ɔnɛ lambovɔ. Vɔ ndɔtaka ahɔndɔ asɔ ngɔndɔ efula kana yɛdikɔ y’ɔnɔnyi w’otondo ko lushi la ndjokolola pidi, vɔ ndjohandjolaka sandja.

Naka onto ambotona ntsha ngasɔ, kete ɔnɛ nde ekɔ lo mɔnyɔla ɔnɛ lambovɔ. Omalɔkɔ, lo ngelo mɔtshi ya lo wodja wa Swaziland, topita ta nkumbo takatshanya Ɛmɛnyi wa Jehowa oma lo ngelo la nkɛtɛ yawɔ hita. Koko, anangɛso wa lo nyuma wa lo ngelo yosukanyi lawɔ wakalongola Akristo asɔ wa kɔlamelo lawakawɔ.

Tuminadi ta Woke ta la Swaziland akɔshi yɛdikɔ y’ɔlɔlɔ lo dikambo di’Ɛmɛnyi wa Jehowa ɔnɛ vɔ pombaka kawola lawakawɔ. Dikambo dikina diakakomɛ Okristo wakavusha omende diɔ nɛ: l’ɔkɔngɔ wa nde tondja mukanda wakafunde omɛnde ndo bandɛ kasɛtɛ kakatɛkɛta omɛnde ɔnɛ wadiɛnde hahombe ndɔta pidi, vɔ kombôhashahasha. Ngasɔ mbakandakoke mɛnya ɔnɛ nde akalɛnyaka omɛnde.

Ekɔ ohomba efula tatɛkɛtaki akambo wendana l’okundelo dimɛna dimɛna la ntondo ka mvɔ, djekoleko l’ahole wambekɔnɛ mbekelo yahɔtɔnɛ l’Afundelo. Ngasɔ mbakatshe Victor, ɔnangɛsɔ ɔmɔtshi la lo Cameroun. Nde akafunde mukanda wɛnya nganɛ wayowôkundɛ. Lo nkumbo kawɔ, aki anto efula wakalɛmiamaka woho w’anyanya ndo wakalɛnyaka mbekelo y’ashidi yendana l’anto wambovɔ, ndo ɔtɛmwɛlɔ wa mbako y’anto. Lam’ele Victor akalɛmiamaka efula lo nkumbo kawɔ, nde akeyaka ɔnɛ wayoyɔtɛmɔla lowako lande. Ɔnkɔnɛ, nde akɛnya hwe woho wakahombe Ɛmɛnyi wa Jehowa ntsha dia vɔ mbokundɛ. Dikambo sɔ mbakakimanyiya wadiɛnde l’anande ndo ase ngelo kakɔ wakasambishama dimɛna.

Têwɔ Mbekelo Yahɔtɔnɛ l’Afundelo

Anto amɔtshi weya Bible dimɛna koshika tanga la ntondo k’akambo asɔ. Dia mbewɔ ɛhɛnyɔhɛnyɔ, vɔ wakahembe ngɛnyangɛnya asukanyi awɔ lo shimbɛ odo oko atotshaka anto wayela mbekelo y’ashidi. Kânga mbele ekɔ ɔlɔlɔ totondja elungi l’otanda dia samba aseka odo, dui sɔ hɛnya ɔnɛ la ntondo ka vɔ ndjokundɛ la wedi a pindju, wɛ pombaka mɛmba ɔkɛndɛ ɔmɔtshi otsho w’otondo laka diɛwɔ. Naka tayotsha ngasɔ, kete tayotakanya anto watenda, nɛ dia vɔ mbeyaka ndjɛna oko wanɛ wayakimɔ l’elimu ɛsɔ hawetawɔ mɛtɛ kɛnɛ kata Bible lo dikambo dia eongelo ka wanɛ wambovɔ.​—⁠1 Koreto 10:⁠32.

Bible nɔmbaka Akristo dia vɔ mbetsha ɔtɛmwɛlɔ waki Nzambi lo dihole dia ntondo lo nsɛnɔ yawɔ ndo mbeya kamba la wenya awɔ. (Mateu 6:33; Efeso 5:​15, 16) Koko, l’ahole amɔtshi, akatshama dia elimu wa l’etshumanelo kokambema lomingu l’otondo kana ndekana l’ɔtɛ wa nkundɛ onto ɔmɔtshi. Aha l’Afrika oto mbatshawɔ dui sɔ. Lam’akawakundɛ onto ɔmɔtshi l’Amérique du sud, wanɛ wakɛnyi wakate vate: “Lo sanganya shato y’Akristo, paka tɔtɔi t’anto toto mbakɔtɔ. Wakatshike sambisha l’edja ka nshi dikumi la mɔ. Kânga anto wa l’andja w’etshumanelo l’ambeki wa Bible wakambe heyama ndo kɔngɛnangɛna dia mɛna woho wakayasha anɛngɛso l’akadiyɛso amɔtshi l’otanda.”

Lo ndjela mbekelo y’anto amɔtshi, l’ɔkɔngɔ wa vɔ kundɛ onto awɔ la ngandji, ase nkumbo kɔngɔsanyaka angɛnyi awɔ amɔtshi dia ndjosanga la wɔ lonya lo lokenga. Koko, l’ahole efula wa l’Afrika, nkama y’anto yakatshindɛ ase nkumbo la waombo kalolaka laka diɛwɔ l’elongamelo ɔnɛ wayoyodiaka nyama ko katɛ dambo. Akristo amɔtshi wakayôkoyaka mbekelo kɛsɔ, ndo mɛnamaka dia wekɔ lo ntsha alambo dia nyanga ki lam’asawɔ la diɛwɔ.

Wonya walɔmbɔla Ɛmɛnyi wa Jehowa awui w’okundelo w’odo, wanɛ wovushisha hawoleke shisha falanga. Omalɔkɔ, hatongaka ohomba w’anto tshɛ kɔngɔla falanga woho w’otanda mɔta. Naka wadi aki odo bu l’akoka wa tondja akuta wahombama wa kundɛ onto ande la ngandji, kete ase etshumanelo akina wayowokimanyiya l’ɔngɛnɔngɛnɔ tshɛ. Ko naka hawɔlɔmbi ase etshumanelo ekimanyielo kakɔ, kete dikumanyi mbeyaka mbɔsa tɛdikɔ dia kimanyiya wadi waki edo la diangɔ dia l’emunyi, naka vɔ sunganaka nongola ekimanyielo kakɔ.​—⁠1 Timote 5:​3, 4.

Aha mbekelo tshɛ yendana l’okundelo mbahɔtɔnɛ l’Afundelo. Naka yɔ yɔlɔshana l’awui wa lo Bible, kete Akristo la dia ndjela kɛnɛ kata Afundelo.c (Etsha 5:29) Kânga mbakoka dikambo sɔ mbela asui akina, ekambi wa Nzambi efula kokaka mɛnya ɔnɛ wakatondoya ehemba ɛsɔ l’ɔlɔlɔ tshɛ l’ekimanyielo ka Jehowa, ‘Nzambi k’esambelo,’ ndo oma l’ekimanyielo koludi la ngandji k’anyawɔ ambetawudi wanɛ wakâsambe l’asui awɔ.​—⁠2 Koreto 1:​3, 4.

Sibongili ekɔ wadi aki odo ɔmɔtshi l’Okristo ndo lele dihonga efula lo wodja wa Swaziland. Eke esadi wovwe omende, nde akatone ndjela mbekelo yayela anto efula dia tutsha nkɛlɛ k’ɔnɛ lambovɔ. Ɛnyɛlɔ, nde kominya divo. (Euhwelu k’Elembe 14:⁠1) Ase nkumbo kande enanɛi wakomala woho w’anyanya ko wakawonya divo la wolo. Vɔ wakashimbe Ɛmɛnyi wa Jehowa di’aha vɔ ndja dia ndjosamba. Koko, anto akina wanɛ wayasha lo mɛtɛ kendana la Diolelo waki l’ɔngɛnɔngɛnɔ dia ntshɔka atowenda ndo mbɛ̂mbɛka mikanda w’ekeketshelo w’oma le dikumanyi. Lushi lakalongamɛka Sibongili ɔnɛ wayowɔlɔtsha pidi, dikambo dimɔtshi dia diambo diakatombe. Ose nkumbo ɔmɔtshi lakalɛmiamaka efula akatshumanya anango dia vɔ sawola ko mbeya bonde katonande ndjela mbekelo y’ashidi yendana l’otanda.

Sibongili ate: “Vɔ wakamimbola dia kana l’ɔtɛmwɛlɔ ami vɔ mbetawɔka ndɔta pidi dia mɛnya woho wokami ɔnɛ lambovɔ kandji. Lakâlembetshiya nganɛ watshaso, ko wakambutɛ vate: hatotokotshutshuya la wolo. Akamɛnyi nganɛ ko, vɔ tshɛ wambɔnɔmba edimanyielo woho wakawamɛnya pâ ndo minyami divo la wolo. Vɔ tshɛ wakanɔmbɛ edimanyielo.” L’ɔkɔngɔ diko, kos’aki Sibongili la omoto akayetawɔka dia Ɛmɛnyi wa Jehowa mbele l’ɔtɛmwɛlɔ wa mɛtɛ, ko nde akalɔmbɛ dia mbeka la wɔ Bible.

Ɔkɔndɔ okina ɔnɛ: Pami kɛmɔtshi k’Ose Afrique du Sud, kelɛwɔ Benjamin aki l’ɛnɔnyi 29 lam’akandoke losango la nyɔi ka she ka shashimuya. L’etena kɛsɔ, Benjamin oto mbaki Ɔmɛnyi wa Jehowa lo nkumbo kawɔ. Lam’akawakundɛka she, wakalongamɛka di’onto tshɛ mbɔtɔ l’ɔnɔngɔ ko mbidja yema ya nkɛtɛ lo diombo.* L’ɔkɔngɔ wa vɔ mbokundɛ, ase nkumbo tshɛ wakanya avo aha la tshimbatshimba. Lam’ele Benjamin kotsha la wɔ akambo asɔ, asukanyi l’ase nkumbo kawɔ wakate ɔnɛ okishi wa she ayowɔtɔ.

Benjamin ate: “Nɛ dia lakayaɛkɛ le Jehowa, ndoko kakakomɛ.” Ase nkumbo wakɛnyi dia ndoko mpokoso kakôkomɛ. L’edjedja ka wonya, efula l’atei awɔ wakamɛ mbeka Bible l’Ɛmɛnyi wa Jehowa ndo wakɛnya ndjâkimɔ kawɔ le Nzambi lo nongola batismu. Ko Benjamin akandatshe na? Nde akayɔtɔ l’olimu wa lo tena tshɛ. Aya ɛnɔnyi ɛmɔtshi mbambondokondja diɛsɛ dia takeketshaka Ɛmɛnyi wa Jehowa lo tshumanelo diawɔ oko omendji weteta.

[Footnotes]

[Caption]

[Footnotes]

[Caption on page 21]

[Box on page 21]

WAKATSHƆKWAMA NƐ DIA WAKATSHIKALA NGE

[Caption on page 21]

[Footnote in box on page 21]

* Amɔtshi mbeyaka mɛna ɔnɛ kema kɔlɔ mbidja kana monɛ alɛmbɔlɛmbɔ la diombo kana mbokɛ nkɛtɛ lo diombo. Koko, Okristo pombaka mbewɔ totshelo tɔsɔ naka anto titshaka la kanyi ya tutsha nkɛlɛ k’ɔnɛ lambovɔ ko kana ose ɔtɛmwɛlɔ wa kashi mbalɔmbɔla sɛlɛmɔnyi kakɔ.​—⁠Enda Réveillez-vous! wa Ngɔndɔ k’Esambele 22, 1977, lɛkɛ 15.