Ekadimwelo Lo Wembola Anyu

◼ Naka wambɔlɔmba etshumanelo dia tɔ nɔngɔsɔla awui w’okundelo, wembola wa nganɛ mbeyaka mimbɔma:

Ayosala Dako dia Okundelo? Ase nkumbo mbahomba mbɔsa yɛdikɔ shɔ. Vɔ kokaka sɔna ɔnangɛso ɔmɔtshi lambobatizamaka lele la lokumu l’ɔlɔlɔ. Naka wambɔlɔmba olui wa dikumanyi dia mbasha ɔtɛkɛtshi, kete olui akɔ pombaka sɔna ekumanyi ka manamana dia mbisha dako diakakongɛ la Société. Aha tombola onto lambovɔ kana mbɔtɛtɛmɔla, koko ondo ayosungana mbuta waonga amɔtshi w’ɔlɔlɔ waki la nde.

Onde Kokaka Sala lo Mbalasa ka Diolelo? Kokaka naka olui wa dikumanyi wambetawɔ ndo naka dui diakɔ hadiotosalema lo wonya wokosalaka etshumanelo nsanganya yawɔ. Kokaka sala dako lo mbalasa naka onto lovwe aki la lokumu l’ɔlɔlɔ ndo aki ose etshumanelo kakɔ, ndo kana ɔnɛ lovwe aki ɔn’aki ose etshumanelo ɔmɔtshi leke dikɛnda. Naka anto tshɛ mbeyaka ɔnɛ onto akɔ komonga la lɔkɛwɔ l’Okristo, kana naka l’ɛkɔkɔ ekina lokumu l’etshumanelo kokaka ndjolana, kete ondo dikumanyi hawotetawɔ dia sala dako lo Mbalasa ka Diolelo.​—⁠Enda lo dibuku Notre ministère, lɛkɛ 62.

Suke l’esangɔ tshɛ, hawotɔsaka Mbalasa ka Diolelo dia sala awui w’okundelo w’anto wele bu Ɛmɛnyi wa Jehowa. Onyake kana aseka odo wekɔ apandjudi wambobatizamaka wasasa, naka odo akeyamaka le anangɛso l’akadiyɛso efula oko onto lalanga awui wa mɛtɛ ndo akeyamaka oko onto lele la lɔkɛwɔ l’ɔlɔlɔ, ndo naka selemɔnyi kakɔ bu ndoko la mbekelo y’anto wa l’andja ɔnɛ.

Naka dikumanyi wambetawɔ dia sala dako lo mbalasa, kete vɔ pombaka ndjambola dia mbeya kana vɔ tɔtɔlaka dibaya di’odo lo mbalasa dia sala selemɔnyi k’okundelo. Naka ekɔ ɔsɔku, kete vɔ kokaka mbetawɔ dia mɛmba dibaya lɛkɔ.

Ko Kayotota di’Awui w’Okundelo w’Anto Wele Bu Ɛmɛnyi wa Jehowa Na? Naka onto lovwe aki la lokumu l’ɔlɔlɔ l’etenyi kawɔ ka ngelo, kete kokaka dia ɔnangɛso ɔmɔtshi mbisha dako di’ekeketshelo oma lo Bible la ntondo ka ntshɔ la waombo kana la diombo. Etshumanelo hatetawɔ dia sala awui w’okundelo w’onto lakeyamaka oma lo lɔkɛwɔ lande la mindo kana lahɔtɔnɛ l’ɛlɛmbɛ, kana laki la lɔsɛnɔ lahɔtɔnɛ l’awui wa lo Bible kânga yema. Ɔnangɛso hatolanga mɛtɛ dia ndjasɔhanya l’owandji ɔmɔtshi w’ɛtɛmwɛlɔ dia sala selemɔnyi y’osanga kana nɔmbɔla awui w’okundelo lo luudu la Nzambi la Babilɔna ka Woke.

Ahombaso Sala Naka Onto Lovwe Akatshanyema oma l’Etshumanelo Na? Etshumanelo hatenda awui w’okundelo w’onto la ngasɔ, ndo hawokoke sala dako lo Mbalasa ka Diolelo. Naka onto akɔ akɛnyaka tshumu kande ndo aki la saki ka kaloyama l’etshumanelo, kete nkum’otema k’ɔnangɛso ɔmɔtshi mbeyaka mbosokoya ondo dia sala dako di’oma lo Bible la ntondo ka ntshɔ la waombo kana la diombo l’oyango wa sambisha wanɛ wele lawɔ waha Ɛmɛnyi ndo dia keketsha nkumbo kande. Koko, la ntondo ka mbɔsa yɛdikɔ shɔ, ayonga dimɛna dia ɔnangɛso akɔ mbutɛ olui wa dikumanyi dui diakɔ ndo ndjela kɛnɛ kayowota lo dikambo diakɔ. Naka, lo menda awui amɔtshi, kema dimɛna dia ɔnangɛso ɔsɔ mbisha dako, kete ondo ayosungana dia ɔnangɛso lele lo nkumbo k’aseka odo mbisha dako dia samba wanɛ wôtɔ la nde.

Nyayotana awui akina wa ndjela lo numɛlɔ ya Tshoto y’Etangelo ya Kɔlɛkɔlɛ 15, 1990, lɛkɛ 30-1; Diɛla Woke 15, 1981, lɛkɛ 29-30; Mam’ɛkɔngɔ la Tange 15, 1980, lɛkɛ 5-7; Lovula 1, 1978, lɛkɛ 5-8; Lovula 1, 1977, lɛkɛ 539-40; Tshango 1, 1971, lɛkɛ 31-2 (tshɛ lo Falase); ndo ya Réveillez-vous ! wa Lovula 8, 1990, lɛkɛ 22-3; Lotena Eduwa 22, 1977, lɛkɛ 12-15.