Elongamelo pombaka toshikimadia ndo ngandji totshutshuya

“Ambutshikala mbetawo, la elungamelu, la ngandji. Akambu aso asatu, dikambu diuleki wuki l’atei awo ku ngandji.”​—⁠1 KORETO 13:⁠13.

1. Dui diakɔna diatewola ɔpɔstɔlɔ Paulo?

ƆPƆSTƆLƆ Paulo ekɔ lo têwola ɔnɛ mbetawɔ kaso kokaka ndjoshishɔ oko masuwa wambodita l’ashi. Nde ekɔ lo tɛkɛta dia ‘kimɛ mbetawɔ la nkum’otema k’ɔlɔlɔ kakakasha anto amɔtshi ko wakashisha mbetawɔ kawɔ oko masuwa wambodita l’ashi.’ (1 Timote 1:19) L’eleko ka ntondo ka lo tena diaso nɛ, wakasɛlaka masuwa l’abaya. Dia masuwa akɔ kɛndakɛnda dimɛna lâdiko di’ashi, akahombamaka vɔ sɛlama dimɛna dimɛna l’abaya w’ɛlɔlɔ efula.

2. Bonde kahomba masuwa wa mbetawɔ kaso sɛlama dimɛna, ndo ahombaso ntsha lo dikambo sɔ?

² Kɛnɛ kakokaso mbelɛ ɔnɛ masuwa wa mbetawɔ kaso pombaka tehaka nshi tshɛ lâdiko di’ashi w’osukusuku w’anto wa l’andja ɔnɛ. (Isaya 57:20; Enyelo 17:15) Ɔnkɔnɛ, masuwa akɔ pombaka sɛlama dimɛna, ndo dikambo sɔ nemanɛka la so. Etena kakayoleka “ashi” w’Ase Juda la w’Ase Rɔmɔ monga osukusuku efula le Akristo wa ntondo, Judɛ akafunde ate: “Elangimi ami, nyuyaudia lu mbetawo kanyu kuleki ekila; nyolombaki [“la nyuma k’ekila,” NW]. Nyuyalamaki lu ngandji ka [Nzambi], nyulungamelaki ketshi ka Khumesu Jesu Kristu, edja ndu lu lumu la pundju.” (Jude 20, 21) Lam’ele Judɛ akatɛkɛta ndo dia ndwɛ ‘mbetawɔ kakawasha ekilami’ ta, ondo ‘mbetawɔ koleki ekila’ katande lanɛ kɛdikɛdi olui a wetshelo tshɛ w’Akristo, kâmɛ ndo lokumu l’ɔlɔlɔ la panda. (Jude 3) Kristo mbele etshina ka mbetawɔ kɛsɔ. Mbetawɔ ka wolo kekɔ ohomba dia sho kukutɛ mbetawɔ ka mɛtɛ k’Akristo.

Toshike tanga lo mpɛpɛ ya “wɔma wa tâto t’ɛtɛmwɛlɔ”

3. Anto amɔtshi ngande wakambawɔ la kɛnɛ kelɛwɔ ɔnɛ “wɔma wa tâto t’ɛtɛmwɛlɔ”?

³ L’ɛnɔnyi wêke kaa mbeta ɛnɛ, akambo efula wa kɔlɔ ka mamba wakasalema: lokema l’anto wakayadiake, anto wakadiakana ndo waa bandi wakahɛnyahɛnya anto​—⁠awui asɔ tshɛ wakasalemaka ndo oma le ase tolui ta totshitshɛ t’ɛtɛmwɛlɔ. Diɔ diakɔ mɛtɛ diele anto efula, ndo kânga ewandji ɛmɔtshi wa pɔlitikɛ w’etema ɔlɔlɔ, ndjâkiyanyaka efula dia kokɛ anto waha l’onongo, djekoleko ana w’akɛnda, oma lo tâto t’ɛtɛmwɛlɔ ta ngasɔ tasalɛ anto kɔlɔ. Aha la tamu, ‘nzambi k’andja ɔnɛ’ mbatshutshuya anto dia vɔ ntsha awui wa kɔlɔ efula ngasɔ ko ambotonga kɛnɛ kelɛ anto amɔtshi ɔnɛ wɔma wa tâto t’ɛtɛmwɛlɔ, ndo nde ekɔ lo kamba la dikambo sɔ dia ndɔshana l’ekambi wa Jehowa. (2 Koreto 4:4; Enyelo 12:12) Amɔtshi kambaka la dui sɔ dia ndɔshana l’olimu aso. Lo wedja ɛmɔtshi, wakalɔngɔsɔla dia ntsha olimu ɔmɔtshi wa woke waki l’oyango wa kokɛ anto oma le “tâto t’ɛtɛmwɛlɔ ta wâle” ko mbidjaka ndo Ɛmɛnyi wa Jehowa wodjadja l’ɔnɔngɔ wa tâto t’ɛtɛmwɛlɔ tɔsɔ, lâsɔ ko mɛnyaka lo mayɛlɛ di’oko ndo sho mbatsha awui wa kɔlɔ watshawɔ. Oma lo dikambo sɔ, olimu w’esambishelo ka lo luudu la luudu aya wolo wa mamba lo wedja ɛmɔtshi wa l’Erɔpɛ ndo anto amɔtshi wambekaka la so Bible hawoyeka nto. Ɔnkɔnɛ, dui sɔ diambɔkɔmɔla etema w’anangɛso amɔtshi.

4. Lande na kahatahombe nkɔmɔ otema kânga lam’alɔshanawɔ la so?

⁴ Koko, lo dihole di’etema aso nkɔmɔ l’ɔtɛ walɔshanawɔ la so, dui sɔ pombaka keketsha eshikikelo kaso k’ɔnɛ tekɔ lo Lokristo la mɛtɛ. (Mateu 5:​11, 12) Wakamamatanyiyɛka Akristo wa ntondo ɔnɛ vɔ wekɔ yâto y’ɔtɛmwɛlɔ yatɔmbɔsha anto, ndo ‘wakatɛkɛtaka kɔlɔ’ lo lokombo lawɔ ahole tshɛ. (Etsha 24:5; 28:22) Koko, ɔpɔstɔlɔ Petero akakeketsha asekande ambetawudi lam’akandafunde ate: “Elangimi ami, tanyambaki dia akambu wa wulu weli l’atei anyu, wambuya le nyu dia nyuhimba, nyati: Dikambu di’uyuyu diambuya le su. Keli nyongenengene, ne dia nyu nyambusuwa la Kristu, ne dia nyu mbeya ngenangena l’ongenongeno utamanya l’enyelo ka lutumbu landi.” (1 Petero 4:​12, 13) Lo yoho yakɔ yâmɛ, ɔmɔtshi a l’atei w’olui wakalɔmbɔlaka ambetawudi wa l’eleko ka ntondo akafunde ate: “Anyami, nyali ongenongeno tshe lam’ayunyutana wehu efula w’ehimba; nyeyi nyati: Ehimbelu ka mbetawo kanyu katutungaka etetemalu. Etetemalu aluwanya ulimu ato, dia nyu nduwana la nkukiama, uku wane wahahumbi engo.” (Jakoba 1:​2-4) Oko watohembaka mpɛpɛ ya wolo oshikikalo wa masuwa lâdiko di’ashi, mpɛpɛ ya woho walɔshanawɔ la so yayɛnya kana wɔdu ɔmɔtshi wekɔ lo masuwa wa mbetawɔ kaso.

Asui mbelaka etetemalo

5. Ngande wakokaso ntsha dia mbetawɔ kaso shikimala l’atei w’asui?

⁵ Paka l’ɔkɔngɔ wa vɔ shika tanga lo mpɛpɛ y’asui mbakoka Akristo shikikɛ etetemalo kawɔ ndo mɛna ɔnɛ mɛtɛ mbetawɔ kawɔ kekɔ nge. Etetemalo kaso ‘kayoshidiya olimu atɔ’ l’atei a ndjale kasutshasutshama la lɔpɛpɛ paka naka sho ‘koyadi kokele, aha l’ɛkɔmɔ l’akambo tshɛ, ndo hatohombe ndoko ɛngɔ,’ ndo tekɔ la mbetawɔ ka wolo. Paulo akafunde ate: “Lu akambu tshe, shu tatuyaenyaka uku ekambi wa [Nzambi]: lu ekikelu ka mamba, lu asui, lu ehumba, lu akambu wa penyo.”​—⁠2 Koreto 6:⁠4.

6. Lande na kahombaso ‘ngɛnangɛnaka lam’eso l’asui,’ ndo dui sɔ ngande wakeketshadiɔ elongamelo kaso?

⁶ Asui wakoka tokomɛ lo tena dimɔtshi wate kana mpɛpɛ ya wolo kokaka mbɔsama oko waaso wa sho mɛnya ɔnɛ masuwa aso wa mbetawɔ wekɔ ɔlɔlɔ ndo shikaa. Paulo akafundɛ Akristo waki la Rɔmɔ ate: “Shu tatongenangenaka lu asui asu. Shu mbeyaka shati: Asui watutungaka etetemalu. Etetemalu atutungaka lokewo l’ololo, la lokewo l’ololo latutungaka elungamelu. Elungamelu hatutsha sonyi.” (Romo 5:​3-5) Naka sho tshikala nge l’atei w’ehemba, kete Jehowa ayotɔngɛnangɛna. Ko naka nde ambotɔngɛnangɛna, kete elongamelo kaso kambokeketala.

Lande na kayongaka amɔtshi oko masuwa wambodita l’ashi?

7. (a) Oko wadiɛnya ɛtɛkɛta wa Paulo, amɔtshi ngande wakawashisha lonyuma lawɔ oko masuwa wambodita l’ashi? (b) Nshi nyɛ ngande watakɔ amɔtshi mboka k’akambo wa mɛtɛ?

⁷ Lam’akewolaka Paulo asekande di’aha vɔ ndjoyala oko ‘masuwa wambodita l’ashi,’ nde akakanyiyaka dikambo di’anto amɔtshi ‘wakakasha’ nkum’otema kawɔ k’ɔlɔlɔ ndo wakashisha mbetawɔ kawɔ. (1 Timote 1:19) L’atei w’anto asɔ mbaki ndo Humenaya la Alɛsandɛrɛ, wanɛ wakayokomaka ɛtɔlɔki, ndo wakayɛtɔla oma lo mboka k’akambo wa mɛtɛ ko ndjotatɛ tɛkɛta awui wa kɔlɔ. (1 Timote 1:20; 2 Timote 2:​17, 18) Lo nshi yaso nyɛ, ɛtɔlɔki, wanɛ watakɔ mboka k’akambo wa mɛtɛ, kɔmɔlaka ‘okambi wa kɔlamelo ndo wa kɛsɔ’ l’ɛtɛkɛta awɔ; okambi wambâleshaka mma dia lo nyuma ɔsɔ owɔkɔmɔla ngasɔ. Amɔtshi fɔnaka la ‘ose olimu wa kɔlɔ,’ wata l’otema ɔnɛ: ‘Nkumɛmi ambotshimbatshimba.’ (Mateu 24:​44-49; 2 Timote 4:​14, 15) Vɔ hawetawɔ ɔnɛ ekomelo k’andja ɔnɛ wa kɔlɔ kaya suke ndo wekɔ lo mɔnyɔla olui w’ɔhɔmbɔ wasungukala lo nyuma nɛ dia vɔ wekɔ lo keketsha ekambi wa Jehowa dia vɔ mɛnaka nshi tshɛ ɔnɛ ekomelo kaya k’onyɔ. (Isaya 1:⁠3) Ɛtɔlɔki wa ngasɔ ‘wakafukutanya mbetawɔ y’amɔtshi,’ ko ndjowaetɛ oko masuwa wambodita l’ashi.​—⁠2 Timote 2:⁠18.

8. Kakɔna kakayokonya amɔtshi dia vɔ dindja masuwa wa mbetawɔ kawɔ?

⁸ Masuwa wa mbetawɔ k’Akristo amɔtshi wakayakimɔ le Nzambi wakadite l’ashi nɛ dia vɔ kombetawɔ mpokamɛ nkum’otema kawɔ ndo wakayasha l’oyango w’ɛngɛnɔngɛnɔ wa tshambandeko w’andja ɔnɛ ndo l’akambo wa loseka kana monanyi. (2 Petero 2:​20-22) Masuwa wa mbetawɔ k’akina nto dindaka l’ashi nɛ dia vɔ mɛnaka di’oko andja w’oyoyo weke etale ka mamba. Lam’ele vɔ hawokoke kamba akumi ko mbeya etena kayokotshama prɔfɛsiya mɔtshi, ndo lam’ele vɔ minyaka ‘lushi la Jehowa’ oma lo timba tawɔ, vɔ ndjotakɔka ɔtɛmwɛlɔ wa mɛtɛ. (2 Petero 3:​10-13; 1 Petero 1:⁠9) Kem’edja, vamɛ ndjoyaɛnaka dia wambokalola l’ashi wa tshududu ndo w’osukusuku w’andja ɔnɛ. (Isaya 17:​12, 13; 57:20) Amɔtshi wanɛ wakayâtondja oma l’etshumanelo k’Akristo mbetawɔka polo ndo ɛlɔ ɔnɛ lɔkɔ mbele ɔtɛmwɛlɔ wa mɛtɛ. Koko vɔ mɛtɛ kombikikɛ solo ndo komonga l’etetemalo kahombama dia konga andja w’oyoyo wakalake Jehowa. Vɔ mɛnaka dia lɔsɛnɔ la lo Paradiso haye esadi.

9. Akristo amɔtshi wakayakimɔ le Nzambi atshawɔ, ndo akambo asɔ pombaka totshutshuyaka dia sho menda awui akɔna?

⁹ L’ahole amɔtshi wa l’andja ɔnɛ, Akristo amɔtshi wakayakimɔ le Nzambi mɛnamaka di’oko wambotutsha lowango la masuwa awɔ wa mbetawɔ. Masuwa watâdinde l’ashi, koko lo dihole dia vɔ tetemala ntshɔ otsha la ntondo la mbetawɔ tshɛ, wotatshɔka paka ɔkɔkɛ ɔkɔkɛ. Oko akawakotwama l’elongamelo k’ɔnɛ “Paradiso kaya kaa ndja,” amɔtshi wakayalɔngɔsɔla dia ndjâketembola lo weho akɔ tshɛ dia mbɔtɔ lɔkɔ​—⁠waki l’ohetoheto l’olimu w’esambishelo ndo vɔ kombetshaka ndoko losanganya ɔtɔi, oyadi nsanganya ya l’etshumanelo kana ya weke. Wonya ɔnɛ, lam’owokanyiya ɔnɛ awui walongamɛwɔ wayoyokotshama edja efula l’ɔkɔngɔ, aha oko ɔnkɔnɛ akawafɔnyaka, vɔ hawoyolanga ndjasha efula. Dui sɔ mɛnamaka hwe lo ekitekitelo k’olimu w’esambishelo, lo woho ɔnɛ wetsha anto nsanganya mɔtshi ndo watowolangaka pandja tenyi dimɔtshi dia nsanganya y’etshimbedi kana nkina ya weke. Akina wekɔ lo mbetsha wenya efula lo tɔkɛnyɔ ndo l’oyango wa lomombo la l’emunyi. Akambo asɔ totshutshuyaka dia sho menda kɛnɛ kahomba monga la shɛngiya ya wolo lo nsɛnɔ yaso lo kɛnɛ kendana la woho wakatayakimɔ le Jehowa. Onde ohetoheto aso l’olimu ande pombaka nemanɛ l’elongamelo k’ɔnɛ “Paradiso kaya kaa ndja”?

Elongamelo kambɛdikama la loongo la masuwa

10, 11. Paulo akɛdika elongamelo kaso l’ɛngɔ kakɔna, ndo lande na mɛtɛ kakasungana wɛdikelo ɔsɔ?

¹⁰ Paulo akatɛkɛta ɔnɛ Jehowa akalake ɛtshɔkɔ wahomba ndja lo tshimbo y’Abarahama. Oma lâsɔ ko nde ndjolembetshiya ate: “[Nzambi] . . . akahanya etshibelu ladiku, ne dia akambu ako ahendi hawukadimo, la [Nzambi] heyi mvuta kashi lu akambu ako. Shu la dikambu dieya ntukikitsha, shu ane wakalawo dia nungula elungamelu kakawatukitshiya. Elungamelu kako keko uku lungu la mashua [“la anima,” NW], keli mete la eteti.” (Heberu 6:​17-19; Etatelu 22:​16-18) Elongamelo kakakitshama la ntondo k’Akristo w’akitami ele lɔsɛnɔ lahakoke komɛ l’olongo. Ɛlɔ kɛnɛ, lemba loleki woke l’ekambi wa Jehowa wekɔ l’elongamelo ka dimɛna efula ka lɔsɛnɔ la pondjo lo paradiso ka laa nkɛtɛ. (Luka 23:43) Naka ndoko elongamelo ka ngasɔ kete onto hakoke monga la mbetawɔ.

¹¹ Loongo la masuwa ekɔ ɛngɔ kɛmɔtshi ka wolo efula kele ohomba dia shikikɛ masuwa lo dihole dimɔtshi di’aha vɔ kɛla l’ashi. Ndoko ose masuwa lakoka minda lɔkɛndɔ la masuwa naka loongo la masuwa bu. Lam’ele Paulo akambɔ la masuwa mbala efula, nde akalembetɛ oma l’akambo wakandɛnyi ɔnɛ esangɔ efula nsɛnɔ y’ase masuwa nemanɛka la nkongo ya masuwa awɔ. (Etsha 27:​29, 39, 40; 2 Koreto 11:25) L’eleko ka ntondo, masuwa kondjalaka ndoko l’ehomɔ kakakokaka kimanyiya kapitɛnyi dia nde mbɔtɔla lɛnɛ alangande tshɛ. Onyake paka masuwa w’ata wa loduka, nɛ dia vɔ wakalemanɛka paka la lɔpɛpɛ dia mbeya lɛkɛ la ntshɔ. Naka masuwa wayanga kɔmama l’ave, ndoko kɛnɛ kakakokaka kapitɛnyi ntsha ele paka nkɔsha loongo la masuwa l’elongamelo k’ɔnɛ lɔ layoshikimala wolo lo lɔkɔngɔ, ko masuwa shimbamɛ oma lo lɔpɛpɛ la wolo. Diɔ diakɔ diakɛdika Paulo elongamelo k’Okristo la ‘loongo la masuwa la anima, la shikaa ndo la nge.’ (Heberu 6:19) Lam’ahɛnyahɛnyamaso l’ɔlɔshamelo wele oko mpɛpɛ ya wolo kana lam’ɛnaso pâ l’ehemba ekina, elongamelo kaso ka diambo kekɔ oko loongo la masuwa latoshikimadia oko anima wasɛna, woho w’aha masuwa aso wa mbetawɔ kɛla otsha lɛnɛ ele ashi bu dingunda ko tokakatɛ, mbut’ate sho ndjokoma lo mbidja tamu kana ndjɔtɔlɔkɔ, dui diele oko ave wa wâle efula.​—⁠Heberu 2:1; Jude 8-13.

12. Ngande wakokaso mbewɔ di’aha mangana la Jehowa?

¹² Paulo akewola Akristo w’Ase Hɛbɛru ate: “Anyasu, nyewo, untu omotshi l’atei anyu atukuyala la utema wa kolo waha la mbetawo, la ntombokwela [“Nzambi kasɛna,” NW].” (Heberu 3:12) L’efundelo wa lo Grɛkɛ, tshɛkɛta yokadimwami lanɛ ɔnɛ “ntombokwela” nembetshiyaka lo yoho ya mɛtɛ mɛtɛ ɔnɛ “ndjâkakitola,” mbut’ate monga ɔtɔlɔki. Koko, sho kokaka mbewɔ di’aha ndjotakɔ mboka lo yɛdikɔ ya ngasɔ. Mbetawɔ la elongamelo ayotokimanyiya dia sho mamema Jehowa oyadi kânga l’atei w’ehemba woleki tshɛ wolo, wele oko mpɛpɛ ya wolo. (Euhwelu k’Elembe 4:4; 30:​19, 20) Mbetawɔ kaso hatoyala oko masuwa wasutshasutshama la mpɛpɛ ya wolo ya wetshelo w’ɛtɔlɔki. (Efeso 4:​13, 14) Ndo nto, lam’ele elongamelo ekɔ oko loongo laso la masuwa, tayokoka shika tanga lo mpɛpɛ ya wolo ya lɔsɛnɔ lasɛnaso oko ekambi wa Jehowa.

Tekɔ lo tshutshuyama la ngandji ndo la nyuma k’ekila

13, 14. (a) Bonde kele loongo la masuwa l’elongamelo kaso lwamɛ loto hakoke? (b) Kakɔna kahomba totshutshuya dia kambɛ Jehowa olimu w’ekila, ndo lande na?

¹³ Okristo hatokoma polo ndo l’andja w’oyoyo naka nde kambɛka Jehowa paka l’ɔtɛ w’elongamelo ka sɛna pondjo pondjo lo paradiso ka laa nkɛtɛ. L’etena kalama Okristo loongo lande la masuwa, mbut’ate elongamelo, oko lɔkɔhɔ lôshikimadia lo lɔsɛnɔ lande, nde pombaka kotsha ndo shɛngiya ya wolo ya ngandji lɔkɔ ndo lo mbetawɔ kande. Paulo akatɛtɛ dikambo sɔ lam’akandafunde ate: “Ambutshikala mbetawo, la elungamelu, la ngandji. Akambu aso asatu, dikambu diuleki wuki l’atei awo ku ngandji.”​—⁠1 Koreto 13:⁠13.

¹⁴ Kɛnɛ kahomba totshutshuya dia kambɛka Jehowa olimu w’ekila ele ngandji kawokaso oma k’ɛse otema, lo menda ngandji katokande kaheyama ndo mbɛdikola. Ɔpɔstɔlɔ Joani akafunde ate: ‘Onto tshɛ lahokana ngandji ateye Nzambi, nɛ dia Nzambi ekɔ ngandji. Oma lo dikambo nɛ mbakɛnama ngandji ka Nzambi le so, nɛ dia Nzambi akatome Ɔnande ɛtɔi lakandôte oya l’andja dia sho ndjokondja lɔsɛnɔ oma le nde. Oko le so, sho mbokaka ngandji, nɛ dia nde mbakatôke ngandji ntondo.’ (1 Joani 4:​8, 9, 19) Dia sho mɛnya lowando lele la so otsha le Jehowa, hatohombe ndjâkiyanya ntondo dia ndjâkondjɛ panda kaso shamɛ koko dia mɛna woho ɔnɛ wayetɛma lokombo lande ekila ndo wayoyindjama lowandji lande la losembwe.

15. Ngandji kokaso Jehowa ngande wendanatɔ la dui dia lowandji lakinde?

¹⁵ Jehowa nangaka sho mbokambɛ l’ɔtɛ wa ngandji kawokaso, koko aha paka l’ɔtɛ wa Paradiso oto. Ansiklopedi wa Bible welɛwɔ Étude perspicace des Écrituresa mbutaka ɔnɛ: “Jehowa ngɛnangɛnaka efula nɛ dia ditongami diande sukɛka lowandji lande oma lo ngandji kawokawɔ. Nde nangaka paka wanɛ wangɛnangɛna lowandji lande ndo waleka lilanga la ntondo k’awui akina tshɛ l’ɔtɛ a waonga ande w’amɛna efula ndo nɛ dia lowandji lande lekɔ losembwe. (1Kor 2:⁠9) Lam’ele anto asɔ mbeyaka Nzambi, mbeyaka ndo ngandji kande, losembwe lande la lomba lande, ndo vɔ mɛnaka ɔnɛ waonga asɔ ndeka wakiwɔ etale efula, vɔ ndeka nanga ndjâkitsha l’ɛse ka lowandji lande lo dihole dia ntshaka akambo oko walangawɔ vamɛ. (Osa 84:​10, 11)”​—⁠Etenyi 1, lɛkɛ 108.

16. Ngandji kokaso Yeso ngande wetɔ la shɛngiya ya wolo lo nsɛnɔ yaso?

¹⁶ Oko weso Akristo, sho mbokaka ndo Yeso ngandji lo menda ngandji katokande. Paulo akate ate: “Ngandji ka Kristu [“tosokoyaka,” NW], ne dia shu mbetawoka shati: Otoi kakavwela tshe, okone tshe wakavu. Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakâvwela, lakulwama dikambu diawo.” (2 Koreto 5:​14, 15) Kristo mɛtɛ mbele etshina kohikami nsɛnɔ yaso ya lo nyuma, mbetawɔ kaso la elongamelo kaso. Ngandji kokaso Kristo Yeso keketshaka elongamelo kaso ndo shikimadiaka mbetawɔ kaso, djekoleko lo tena di’ehemba wele oko mpɛpɛ ya wolo.​—⁠1 Koreto 3:11; Kolosai 1:23; 2:​6, 7. 

17. Wolo akɔna watosha Jehowa, ndo ngande wɛnama ohomba a wolo akɔ l’Etsha 1:8 la l’Efeso 3:⁠16?

¹⁷ Kânga mbele ngandji kokaso Nzambi ndo kokaso Ɔnande mbele shɛngiya ya ntondo lo nsɛnɔ yaso y’Akristo, Jehowa toshaka ɛngɔ kekina nto katosokoya, katosalanganya ndo katosha wolo wa sho ntshɔ otsha la ntondo l’olimu ande. Ɛngɔ kakɔ kɛsɔ ko wolo ande wakamba olimu, welɛwɔ ɔnɛ nyuma k’ekila. Tɔtɛkɛta ta lo Hɛbɛru la Grɛkɛ takadimwama ɔnɛ “nyuma” mendanaka ntondotondo la weteto wa lɔhɛlɛlɛ, ɛnyɛlɔ oko lɔpɛpɛ lafufa. Masuwa wele oko wɛnɛ wakɔtɔka Paulo wakalemanɛka paka la wolo wahɛnama wa lɔpɛpɛ dia vɔ koma l’ahole wakawatatshɔka. Lo yoho yakɔ yâmɛ, sho tekɔ l’ohomba wa ngandji ndo wa wolo wahɛnama waki Nzambi dia masuwa wakiso wa mbetawɔ ntshɔ otsha la ntondo l’olimu wa Jehowa.​—⁠Etsha 1:8; Efeso 3:⁠16.

Totatshɔka tsho otsha lo dihole diatatatshu!

18. Kakɔna kayotokimanyiya dia sho mbikikɛ kɛnɛ tshɛ kayotomba lo nshi yayaye dia mbidja mbetawɔ kaso l’ohemba?

¹⁸ Mbetawɔ kaso ndo ngandji kaso mbeyaka mbidjama l’ehemba a wolo la ntondo ka sho koma l’andja w’oyoyo. Koko Jehowa akatosha loongo la masuwa ‘la shikaa ndo la nge’​—⁠loongo lakɔ ko elongamelo kaso ka dimɛna efula. (Heberu 6:19; Romo 15:​4, 13) Naka tambɔhɛnyahɛnyama l’ɔlɔshamelo kana l’ehemba ekina, sho kokaka mbikikɛ naka mbetawɔ kaso toshikimadia oko loongo la masuwa. L’ɔkɔngɔ wa lɔpɛpɛ lɔmɔtshi la wolo tuta ko lokina lataye, tɔ̂shi tɛdikɔ dia keketsha elongamelo kaso ndo mbetɛ mbetawɔ kaso nge.

19. Ngande wakoka masuwa wa mbetawɔ kaso tetemala lo lɔkɛndɔ ko koma lo dihole dia diomuyelo, l’andja w’oyoyo waki Nzambi?

¹⁹ La ntondo ka nde tɛkɛta dia ‘loongo la masuwa la anima,’ Paulo akate ate: “Shu nangaka nyu tshe untu l’untu ntetemala dia ndjala la ukalanganu one lu akambu tshe w’elungamelu edja ndu l’ekumelu, diaha nyu ndjala tusuasua. Keli nyukuya wane wambukita alaka ne dia mbetawo la etetemalu kawo.” (Heberu 6:​11, 12) Oko wasokoyamaso la ngandji kokaso Jehowa la Ɔnande ndo oko wakeketshamaso la nyuma k’ekila, nyɛsɔ totshu tsho la masuwa wa mbetawɔ kaso edja ndo lam’ayotokoma l’andja w’oyoyo wakatolake Nzambi.

[Footnote]

[Caption]

[Footnote]

[Caption]

Ovuswelo

◻ Paulo akandatewola lo kɛnɛ kendana la mbetawɔ kaso?

◻ Amɔtshi ngande wakawashisha lonyuma lawɔ oko masuwa wambodita l’ashi, ndo akina ngande wowotatutsha lɔkɛndɔ?

◻ Naa dionga diɔtɔnɛ la lolango la Nzambi diahomba kotshama lâdiko dia mbetawɔ kaso?

◻ Kakɔna kayotokimanyiya dia sho koma lo dihole dia diomuyelo, l’andja w’oyoyo wakatolake Nzambi?

[Caption]

[Study Questions]

[Caption on page 16]

[Picture on page 16]

Masuwa wa mbetawɔ kasopombaka sɛlama dimɛna dia vɔ shika tanga lo mpɛpɛ ya wolo ya lɔsɛnɔ

[Caption on page 17]

[Picture on page 17]

Mbetawɔ kaso kokaka ndjoshishɔ oko masuwa wambodita l’ashi

[Caption on page 18]

[Picture on page 18]

Mbetawɔ mbele loongo la masuwa lo lɔsɛnɔ laso l’Akristo