Ɛlɔlɔ w’oma lo ngandji k’ɔtɛkɛta wa Nzambi
‘Olange [lomba] ko lɔ layokokokɛ. . . . Lɔ layokotombola nɛ dia wɛ lokumbatɛ.’—TUKEDI 4:6, 8.
1. Ahombama mɛtɛ di’onto mɛnya ɔnɛ nde nangaka Ɔtɛkɛta wa Nzambi?
WADIELO wa Bible wekɔ ohomba efula le Okristo. Koko, wadielo oto hɛnya ɔnɛ onto ekɔ la ngandji k’Ɔtɛkɛta wa Nzambi. Kayotota naka onto mbadiaka Bible koko ntshaka akambo watona Bible na? Mbokɛmaka lâsɔ dia nde halange Ɔtɛkɛta wa Nzambi woho wakôlangaka ofundji w’Osambu wa 119. Ngandji kakandokaka Ɔtɛkɛta wa Nzambi akôtshutshuya dia nde ndjaɔtɔnganyiya la kɛnɛ kalɔmbama lɔkɔ.—Osambu 119:97, 101, 105.
2. Ɛlɔlɔ akɔna wakondja onto oma lo lomba lele l’Ɔtɛkɛta wa Nzambi?
2 Di’onto ndjaɔtɔnganyiya l’Ɔtɛkɛta wa Nzambi nde pombaka nɔngɔsɔlaka tokanyi tande la yoho yande ya lɔsɛnɔ tena tshɛ. Ɔsɔ ekɔ dionga di’onto lele la lomba l’oma le Nzambi, lomba lakɔ kɛdikɛdi kamba l’ewo ndo la yimba y’oma lo wekelo wa Bible. ‘Olange [lomba], ko lɔ layokokokɛ. Olɔsake la nɛmɔ di’efula, ko lɔ layokodiya. Lɔ layokotombola nɛ dia wɛ lokumbatɛ. Lɔ layosha ɔtɛ wakiyɛ ɛlɛngalɛnga ka shunganyi; lɔ layokɔlɛnga la dɛmbɔ dia koso dia dimɛna.’ (Tukedi 4:6, 8, 9) Ɛtɛkɛta ɛsɔ mɛtɛ tokeketshaka dimɛna dia sho pamia ngandji k’Ɔtɛkɛta wa Nzambi l’etema aso ndo nɔmbwama la wɔ. Akɔna ahalange kokamɛ, mbudiyama ndo kondja lotombo na?
Tambokokamɛ oma lo wâle wa pondjo
3. Bonde kele Akristo l’ohomba wa kokamɛ nshi nyɛ oleki nshi ya ntondo, ndo l’ɔtɛ w’onto akɔna ahombawɔ kokamɛ?
3 Lomba lakondja onto oma lo wekelo la okitanyielo w’Ɔtɛkɛta wa Nzambi mbokokɛka lo yoho yakɔna na? Ntondotondo, nde kokamɛka di’aha mundama le Satana Diabolo. Yeso akalakanya ambeki ande dia vɔ nɔmbaka dia tshungɔ oma le kanga kɔlɔ, Satana. (Mateu 6:13) Ɛlɔ kɛnɛ, ohomba wa mbidjaka dui sɔ l’alɔmbɛlɔ aso wambɔtɛkɔya mɛtɛ. Satana nde l’ɛdiɛngɛ ande wakakadjema oma l’olongo l’ɔkɔngɔ w’ɔnɔnyi wa 1914; ɔnkɔnɛ, Satana ekɔ la ‘nkɛlɛ ka woke dikambo nde mbeyaka ɔnɛ etena kande kambotshikala yema tshitshɛ.’ (Enyelo 12:9, 10, 12) Nshi nyɛ, nkɛlɛ kande kamboleka mbudɔdɔ lam’ele nde ambohekɔ ndɔsha ‘wanɛ wakitanyiya ɛlɛmbɛ wa Nzambi ndo wele l’olimu wa sambisha awui wa Yeso’ koko hâlɛndja.—Enyelo 12:17.
4. Ngande wakokamɛ Akristo oma lo tɔsɛngiya la tolonga ta Satana?
4 Lo nkɛlɛ kande, Satana ekɔ lo tatetemala nyangɛ ekambi ɛsɔ w’Akristo efutanu ndo ekɔ lo mbaela ɛhɛnyɔhɛnyɔ kana mbadjɛ wekamu ekina l’olimu awɔ. Nde nangaka nto kotola esambisha wa Diolelo dia vɔ ndeka ndjasha efula lo akambo wele oko monga la lokumu l’andja ɔnɛ, ngandji ka ndjângɛnyangɛnya, okondjelo wa lomombo la l’emunyi, ndo tawesaka ɛngɛnɔngɛnɔ w’andja ɔnɛ koko aha ndjasha l’olimu w’esambishelo ka Diolelo. Kakɔna kakokɛ ekambi wa Nzambi wa kɔlamelo di’aha vɔ nkɔ lo tɔsɛngiya ta Satana kana tala lo tolonga tande na? Dɔmbɛlɔ, diokanelo di’ɔlɔlɔ la Jehowa ndo mbetawɔ k’ɔnɛ alaka wakinde wekɔ shikaa ekɔ mɛtɛ ohomba. Koko, akambo asɔ tshɛ kakatana l’ewo kɛmɔtshi ndo la woho wayashikikɛ onto dia ndjela alako wa l’Ɔtɛkɛta wa Nzambi. Sho kondjaka alako asɔ oma lo wadielo wa Bible la ekanda watokimanyiya dia sho mbeka Bible, oma lo wɔtwɛlɔ wa nsanganya y’Akristo, lam’atosha osekaso ombetawodi dako dimɔtshi di’oma l’Afundelo, kana lo nɔmbaka ndo lo kanaka yimba l’awui amɔtshi wa Bible watohola nyuma ka Nzambi.—Isaya 30:21; Joani 14:26; 1 Joani 2:15-17.
5. Ngande watokokɛ lomba la l’Ɔtɛkɛta wa Nzambi?
5 Wanɛ walanga Ɔtɛkɛta wa Nzambi kondjaka ekokelo ndo lo weho ekina nto. Ɛnyɛlɔ, vɔ mbewɔka efutanu wa lo yimba ndo hemɔ ya lo demba yaya oma l’akambo wele oko ɔnwɛlɔ wa didjoyadjoya, ɔnwɛlɔ wa mfɔka la akambo wa mindo wa dieyanelo. (1 Koreto 5:11; 2 Koreto 7:1) Vɔ hawodje lohetsho kana efutanu lo diokanelo diasa onto la onyande lo tatshɔbɔlaka awui wahendana la wɔ kana lo tondjanɛ ɛtɛtɛla wa kɔlɔ. (Efeso 4:31) Vɔ hawoyokomaka ambidji tamu l’ɔtɛ wa tatshimolaka filozofi ya lokeso ya lomba l’andja ɔnɛ. (1 Koreto 3:19) Oma lo ngandji kawɔ k’Ɔtɛkɛta wa Nzambi, vɔ wambokokamɛ oma l’akambo wakoka fukutanya diokanelo diasawɔ la Nzambi ndo mbashishɛ elongamelo ka lɔsɛnɔ la pondjo. Vɔ wekɔ wonya tshɛ l’olimu wa kimanyiya asekawɔ anto dia monga la mbetawɔ lo alaka w’amɛna efula wele lo Bible, aha la mbohɛ ɔnɛ lam’atshawɔ ɔsɔku, vɔ ‘wayoyashimbɛ vamɛ kâmɛ ndo wanɛ wâhokamɛ.’—1 Timote 4:16.
6. Ngande wakoka lomba la l’Ɔtɛkɛta wa Nzambi tokokɛ kânga l’atei w’ekakatanu wa wolo?
6 Eelo mɛtɛ, onto tshɛ, oyadi kânga wanɛ walanga Ɔtɛkɛta wa Nzambi, kokaka pomana la “tena ndo akambo wa shashimoya.” (Ondaki 9:11, NW) Ndoko woho, amɔtshi wa l’atei aso wayohomɔ mpokoso kɛmɔtshi k’oma lo diangɔ diakatongama, wayoka hemɔ ya wolo, wayokala wâle, kana wayovɔ nyɔi k’osondjo. Koko, tekɔ lo kokamɛ. Ndoko mpokoso kakoka salɛ onto lalanga Ɔtɛkɛta wa Nzambi mɛtɛ kɔlɔ kahashile. Ɔnkɔnɛ, hatohombe ndjâkiyanya ɔtɛkɔya lo kɛnɛ kakoka tomba lo nshi yayaye. L’ɔkɔngɔ wa sho mbɔsa tɛdikɔ tshɛ takoka dia ndjâkokɛ, ekɔ ɔlɔlɔ kitsha akambo tshɛ l’anya wa Jehowa ndo aha mbetawɔ osukusuku wa lɔsɛnɔ la nshi nyɛ minya wɔladi oma lo yimba yaso. (Mateu 6:33, 34; Filipi 4:6, 7) Ohɔka nshi tshɛ ɔnɛ eolwelo ekɔ elongamelo ka mɛtɛ ndo ka shikaa ndo kanyiyaka lɔsɛnɔ l’ɔlɔlɔ ‘lam’ayetɛ [Nzambi] diangɔ tshɛ eyoyo.’—Enyelo 21:5; Joani 11:25.
Ɛnya dia wɛ ekɔ ‘nkɛtɛ y’ɔlɔlɔ’
7. Wɛɛla akɔna wakokela Yeso elui w’anto wakaye dia ndjôlonga?
7 Lo wɛɛla ande ɔmɔtshi, Yeso akatɔtɔmiya ohomba wa mbɔsaka Ɔtɛkɛta wa Nzambi la nɛmɔ. Lam’akasambishaka Yeso lokumu l’ɔlɔlɔ lo Palɛstina k’otondo, nyemba y’anto wakatshumana dia mbôhokamɛ. (Luka 8:1, 4) Koko, aha vɔ tshɛ mɛtɛ mbakalangaka Ɔtɛkɛta wa Nzambi. Ndooko tâmu dia anto efula wakayaka dia ndjôhokamɛ dikambo vɔ wakalangaka mɛna ahindo kana wakangɛnangɛnaka yoho ya dimɛna efula yakandalakanyaka. Diɔ diakɔ diakokela Yeso elui w’anto wɛɛla ɔnɛ ate: “Umbuki a wuhu akatshu dia ntuka wuhu andi. Lam’akandatukaka, emotshi wakako l’umamu a mbuka. Antu wakawekamela l’ekulu, fudu ya l’ulungu yakêkomola. Wehu ekina wakako ladiku dia dive; lam’akawatumbi, wakalengela, ne dia tawaki la ashi. Wehu ekina wakako l’atei w’atende. Atende wakuli la wo, wakêtshidia. Wehu ekina wakako lu kete y’ololo, wakuli, wakadji tongo lukama lukama.”—Luka 8:5-8.
8. Ele lɔtɔngɔ la lo wɛɛla wa Yeso?
8 Wɛɛla wa Yeso ɔsɔ akɛnyaka ɔnɛ anto wayolongola esambishelo ka lokumu l’ɔlɔlɔ lo weho wotshikitanyi, lo ndjela otema w’ɔnɛ loka losango. Lɔtɔngɔ lonɛma kɛdikɛdi ‘ɔtɛkɛta wa Nzambi.’ (Luka 8:11) Kana, oko wadita ɔkɔndɔ okina wa wɛɛla akɔ, lɔtɔngɔ ele ‘ɔtɛkɛta wa Diolelo.’ (Mateu 13:19) Yeso akakoke tɛkɛta wotelo ɔmɔtshi l’atei w’ehende ɛsɔ, lam’ele ɔtɛ a dui w’Ɔtɛkɛta wa Nzambi ele Diolelo dia l’olongo dialɔmbɔla Yeso Kristo oko Nkumekanga, oma lo tshimbo ya diolelo diakɔ mbayoyindja Jehowa lowandji lande ndo mbetɛ lokombo lande ekila. (Mateu 6:9, 10) Lâsɔ, lɔtɔngɔ ele losango la lokumu l’ɔlɔlɔ latanema l’Ɔtɛkɛta waki Nzambi welɛso Bible. Ɛmɛnyi wa Jehowa mbikaka epole ɔsɛkɛ lo losango lɔsɔ la Diolelo lam’atawonɛ woho lo ndjela ɛnyɛlɔ k’Ɔnɛ lakatatɛ monɛ woho, Yeso Kristo. Anto ngande walongolawɔ losango lawɔ na?
9. Weho w’anto akɔna wele oko ntɔngɔ yakakɔ (a) l’omamu wa mboka? (b) lâdiko di’ave? (c) lo nkɛtɛ y’atɛndɛ?
9 Yeso akate ɔnɛ ntɔngɔ mɔtshi yakakɔ l’omamu a mboka ko anto wakayikamɛ l’ekolo. Ntɔngɔ shɔ kɛdikɛdi anto wele la wesanu efula ko lɔtɔngɔ la Diolelo hakoke ndo nsɔnga edio l’etema awɔ. La ntondo ka vɔ pamia ngandji k’Ɔtɛkɛta wa Nzambi l’etema awɔ, ‘Diabolo ndjâka ko minyaka ɔtɛkɛta oma l’etema awɔ di’aha vɔ mbetawɔ ko ndjoshimbamela.’ (Luka 8:12) Ntɔngɔ mɔtshi nkɔka lâdiko di’ave. Ntɔngɔ shɔ ele anto wangɛnangɛna losango la Bible koko hawolotshike lɔ munanda etema awɔ. Lam’ahomanawɔ l’ɛlɔshamelo kana lam’ɛnawɔ ɔnɛ ekɔ wolo ndjela dako dia Bible, ‘vɔ totakɔka mboka’ dikambo vɔ ndooko l’edio. (Luka 8:13) Oma lâsɔ, ekɔ ndo wanɛ woka ɔtɛkɛta koko wamboyatambiya la tshondo l’‘ekiyanu, l’ekundji ndo l’ɛngɛnɔngɛnɔ wa lɔsɛnɔ lɔnɛ.’ L’edjedja ka wonya, oko tombatomba diadingana l’atɛndɛ, ‘vɔ ndjosemaka tshɛ.’—Luka 8:14.
10, 11. (a) Weho w’anto akɔna wele oko nkɛtɛ y’ɔlɔlɔ? (b) Ahombaso ntsha dia ‘nkimela’ Ɔtɛkɛta wa Nzambi l’etema aso?
10 Ntɔngɔ nkina nkɔka lo nkɛtɛ y’ɔlɔlɔ. Ntɔngɔ shɔ kɛdikɛdi anto walongola losango ‘l’otema wa dimɛna ndo w’ɔlɔlɔ.’ Onto tshɛ la l’atei aso kanaka ɔnɛ nde mɛtɛ ekɔ l’atei wa ntɔngɔ shɔ. Koko, paka kanyi ya Nzambi mbahomba ndjohembola dikambo, ndjɛ̂nya kana kɛnɛ kakanaso kekɔ mɛtɛ kana bu. (Tukedi 17:3; 1 Koreto 4:4, 5) Ɔtɛkɛta wakinde mbutaka ɔnɛ monga ‘l’otema wa dimɛna ndo w’ɔlɔlɔ’ ekɔ dui diɛnyaso oma l’etsha aso oma ko kakianɛ polo ndo lo nyɔi kaso kana polo ndo lam’ayoyolanya Nzambi andja ɔnɛ wa kɔlɔ. Naka tambomɛ nongola losango la Diolelo lo yoho ya dimɛna, lâsɔ kete ekɔ dimɛna efula. Koko, wanɛ wele l’otema wa dimɛna ndo w’ɔlɔlɔ mbetawɔka Ɔtɛkɛta wa Nzambi, ndo ‘watôkimelaka wolo ndo watɔtɔka elowa l’ekikelo tshɛ.’—Luka 8:15.
11 Yoho yâmɛ yoleki dimɛna yakokaso kimɛ Ɔtɛkɛta wa Nzambi l’otema aso ele mbâdiaka ndo mbêkaka oyadi l’onto ndamɛ kana kâmɛ l’asekaso ambetawodi. Sho nɔmbamaka lâsɔ dia ndɛka mbo ya ndɛ ya lo nyuma yatoshawɔ lo tshimbo y’ehomɔ kakasɔnama dia nama wahɔ wa lo nyuma w’ambeki wa Yeso wa mɛtɛ. (Mateu 24:45-47) Lo weho ɛsɔ, wanɛ wakimela Ɔtɛkɛta wa Nzambi l’etema awɔ sokoyamaka la ngandji dia ‘ntɔ elowa l’ekikelo tshɛ.’
12. Elowa akɔna wahombaso ntɔ l’ekikelo tshɛ?
12 Elowa akɔna watondja nkɛtɛ y’ɔlɔlɔ na? Lo nkɛtɛ ya mɛtɛ mɛtɛ, ntɔngɔ mbolaka ko ndjokomaka tombatomba diatɔ elowa wa woho akɔ wa lɔtɔngɔ; ntɔngɔ shɔ kokaka ndjodianganyema ko nyomoyɔtɔ elowa ekina. Popo ndo le wanɛ wele l’etema w’amɛna ndo w’ɛlɔlɔ, lɔtɔngɔ l’ɔtɛkɛta mbolaka l’etema awɔ, mbahamiaka lo nyuma edja ndo vɔ lawɔ ndjokoka monɛ ntɔngɔ l’etema w’anto akina. (Mateu 28:19, 20) Ndo olimu awɔ wa monɛ salemaka l’ekikelo. Yeso akɛnya ohomba w’ekikelo l’olimu wa monɛ lam’akandate ate: “Ɔnɛ layokikɛ polo ndo lo nkomeelo, nde ayoka. Lokumu lɔnɛ l’Ɔlɔɔlɔ la Dyoolela layolakanyema lo nkɛtɛ k’otondo oko jembetelo lee nkumbo cɛɛ; ko l’ɔkɔngɔ kayooyaala nkomeelo.”—Mateyo 24:13, 14, Dyookaneelo dy’Oyooyo.
‘Ntɔ elowa l’olimu tshɛ w’ɔlɔlɔ’
13. Dɔmbɛlɔ diakɔna diakasale Paulo diakakatanya elowa la ewo k’Ɔtɛkɛta wa Nzambi?
13 Ɔpɔstɔlɔ Paulo ndo nde lawɔ akɛnya ohomba wa ntɔ elowa, ndo nde akakakatanya ɔtwɛlɔ w’elowa la Ɔtɛkɛta wa Nzambi. Nde akalɔmbɛ di’asekande ambetawodi ‘ndodiama la ewo k’oshika ka lolango la Nzambi lo lomba tshɛ ndo lo yimba ya lo nyuma, dia vɔ kɛndakɛndaka woho wakoka la Jehowa dia mbɔngɛnyangɛnya lo tshɛ lam’atanyatetemala la ntɔ elowa l’olimu tshɛ w’ɔlɔlɔ.’—Kolosai 1:9, 10; Filipi 1:9-11.
14-16. Lo ndjela dɔmbɛlɔ dia Paulo, elowa akɔna watɔ wanɛ walanga Ɔtɛkɛta wa Nzambi?
14 Ɔnkɔnɛ, Paulo ekɔ lo mɛnya ɔnɛ kondja ewo ka Bible keema oyango wa komelo. Koko, ngandji k’Ɔtɛkɛta wa Nzambi totshutshuyaka dia ‘kɛndakɛnda woho wasungana la Jehowa’ lo tetemalaka ‘ntɔ elowa l’olimu tshɛ w’ɔlɔlɔ.’ Olimu akɔna w’ɔlɔlɔ na? Sambisha lokumu l’ɔlɔlɔ la Diolelo ekɔ ɔkɛndɛ wa woke efula wakalongola Akristo lo nshi nyɛ y’ekomelo. (Mako 13:10) Lâdiko dia lâsɔ, wanɛ walanga Ɔtɛkɛta wa Nzambi ntshaka la wolo awɔ tshɛ dia sukɛ olimu ɔsɔ lo nkimɔka falanga yawɔ mbala la mbala. Vɔ ngɛnangɛnaka diɛsɛ sɔ, nɛ dia vɔ mbeyaka ɔnɛ ‘Nzambi nangaka ɔnɛ lasha l’ɔngɛnɔngɛnɔ.’ (2 Koreto 9:7) Weshasha wakiwɔ ntshɔka lo falanga yahombama dia kɛndjakɛndja olimu wa lo mvudu ya Bɛtɛlɛ ndekana lokama yalɔmbɔla olimu w’esambishelo ka Diolelo ndo lo Bɛtɛlɛ mɔtshi Bible l’ekanda walembetshiya awui wa Bible wekɔ lo tomba. Oma lo weshasha awɔ nto mbakondjama falanga yalɔngɔsɔma nsanganya ya weke y’Akristo ndo mbatomama emendji weteta, wa misiɔnɛrɛ la ekambi ekina wa lo tena tshɛ.
15 Elimu ekina w’ɔlɔlɔ mendanaka la mbika ndo nɔngɔsɔla mvudu y’ɔtɛmwɛlɔ wa mɛtɛ. Ngandji k’Ɔtɛkɛta wa Nzambi tshutshuyaka atɛmɔdi ande di’aha vɔ mbohɛ Mbalasa ya Nsanganya ya Weke la Mbalasa ya Diolelo. (Enda lo Nehemiya 10:39.) Lam’ele lokombo la Nzambi fundama bamba lo mvudu shɔ, ekɔ ohomba efula dia yɔ mongaka pudipudi l’etei ndo l’andja ndo ndjâla mvudu y’amɛna ndo anto watɛmɔla Nzambi l’etei ka mvudu shɔ pombaka monga la lɔkɛwɔ l’ɔlɔlɔ. (2 Koreto 6:3) Akristo amɔtshi wekɔ l’akoka wa ntsha efula, aha paka lâsɔ ato. Ngandji k’Ɔtɛkɛta wa Nzambi mbatshutshuyaka dia vɔ munda nkɛndɔ y’etale dia todja lonya lo wokelo wa mvudu y’eyoyo y’ɔtɛmwɛlɔ lo wedja wele ohomba wekɔ nɛ dia anangɛso keema l’ekondjelo ndo bu tomanamana lo wokelo wa mvudu.—2 Koreto 8:14.
16 ‘Ntɔ elowa l’olimu tshɛ w’ɔlɔlɔ’ nɔmbaka nto dia kotshaka ɛkɛndɛ wa lo nkumbo ndo kanɛka asekaso Akristo. Ngandji k’Ɔtɛkɛta wa Nzambi totshutshuyaka di’aha sho minya yimba oma l’ehomba a wanɛ ‘wôtɔ la so lo mbetawɔ’ ndo dia sho ‘mɛnya woho wamamemaso Nzambi l’atei a wa lo luudu’ laso hita. (Ngalatiya 6:10; 1 Timote 5:4, 8) Lo dikambo sɔ, tayotsha olimu w’ɔlɔlɔ lo membolaka wanɛ watata hemɔ ndo sambaka wanɛ wambovusha. Dikumanyi dia l’etshumanelo la ase Kɔmite ka Diɔtɔnganelo la Lopitadi ntshaka olimu w’ɔlɔlɔ lam’akimanyiyawɔ wanɛ watanema l’asa lɔkɔnga la pakahaka l’akambo w’esakelo. (Etsha 15:29) Ekɔ nto ndo mpokoso efula yatomba, mɔtshi ndjâka oma lo diangɔ diakatongama, nkina oma lo dinginya di’anto. L’ekimanyielo ka nyuma ka Nzambi, Ɛmɛnyi wa Jehowa wambokondja lokumu l’ɔlɔlɔ lo wedja efula lo woho wahawatshimbatshimba dia tomɛ asekawɔ ambetawodi la anto akina wahomɔ mpokoso kana wokala wâle ekimanyielo. Awui asɔ tshɛ wekɔ elowa w’ɔlɔlɔ wakɛnɛmɔla wanɛ walanga Ɔtɛkɛta wa Nzambi.
Ɛlɔlɔ wa mamba wa lo nshi yayaye
17, 18. (a) Kakɔna kasalema oma l’olimu wa monɛ lɔtɔngɔ la Diolelo? (b) Akambo akɔna wa weke weke wayanga mɛna wanɛ walanga Ɔtɛkɛta wa Nzambi?
17 Olimu wa monɛ lɔtɔngɔ la Diolelo wekɔ lo tatetemala mbela anto ɛlɔlɔ wa weke efula. L’ɛnɔnyi ɛnɛ weke ka mbeta, ɔnɔnyi tshɛ anto ndekana 300000 waketawɔ losango la Bible mbika edio l’etema awɔ polo ndo lo vɔ ndjokimɔ nsɛnɔ yawɔ le Jehowa ndo ndjɛnya dikambo sɔ lo sɛkɛ lo nongola batismu ka l’ashi. Anto asɔ mɛtɛ wekɔ lo kongɛ nshi yayaye y’ɔngɛnɔngɛnɔ efula!
18 Kem’edja nto, anangi w’Ɔtɛkɛta wa Nzambi mbeyaka ɔnɛ Jehowa ayonela dia mɛnya woke woke wa lokombo lande. “Babilona ka Wuki,” etshumanelo k’ɛtɛmwɛlɔ wa kashi wa l’andja w’otondo, ayolanyema. (Enyelo 18:2, 8) Oma lâsɔ, wanɛ watona mbɔtɔnganyiya nsɛnɔ yawɔ l’Ɔtɛkɛta wa Nzambi wayodiakema oma le Nkumekanga Yeso Kristo. (Osambu 2:9-11; Danyele 2:44) L’ɔkɔngɔ wa lâsɔ, Diolelo dia Nzambi diayotshungola anto lo pondjo oma l’akambo wa ngala, ata ndo mpokoso nkina. Ndooko ohomba wayonga nto wa samba anto l’ɔtɛ wa pâ, elando la nyɔi.—Enyelo 21:3, 4.
19, 20. Lɔsɛnɔ lakɔna la dimɛna efula lo nshi yayaye lambowolamɛ wanɛ mɛtɛ walanga Ɔtɛkɛta wa Nzambi?
19 L’etena kɛsɔ, wanɛ walanga Ɔtɛkɛta wa Nzambi wayosala elimu w’ɔlɔlɔ wa mamba. Wanɛ wayohandɔ l’Aramangɛdɔna wayomɛ kamba olimu w’ɔngɛnɔngɛnɔ wa kadimola nkɛtɛ kɛnɛ paradiso. Wayonga la diɛsɛ dia mamba dia nɔngɔsɔla ehomba w’anto womuya nshi nyɛ lo waombo ndo wolamemi lo yimba ya Nzambi, wanɛ wele l’elongamelo ka ndjôlɔ l’eolwelo ka wanɛ wakavu. (Joani 5:28, 29) L’etena kɛsɔ, ɛlɔmbwɛlɔ ka kokele kayoyaka oya le anto wa laa nkɛtɛ oma le Nkumadiɔndjɔ Omboledi wa Tshɛ, Jehowa, lo tshimbo y’Ɔnande lele la lotombo, Yeso Kristo. ‘Wɛɔmbɔ w’abuku wayodihwama,’ dia mɛnya awui wa Jehowa wendana la lɔsɛnɔ la l’andja w’oyoyo.—Enyelo 20:12.
20 L’etena kakashikikɛ Jehowa, olui w’Akristo tshɛ w’akitami w’esɔ wayonga l’olongo ko wayokondja difuto dia monga ‘ekitɔ kâmɛ la Kristo.’ (Romo 8:17) Lo Lowandji l’Ɛnɔnyi Kinunu laki Kristo, anto tshɛ wa laa nkɛtɛ walanga Ɔtɛkɛta wa Nzambi wayokoma kokele lo yimba ndo lo demba. L’ɔkɔngɔ wa vɔ tshikala la kɔlamelo l’ohemba wa komelo, vɔ wayolongola difuto dia lɔsɛnɔ la pondjo ndo wayoyɔngɛnangɛna la ‘lotshungɔ la lotombo l’ana wa Nzambi.’ (Romo 8:21; Enyelo 20:1-3, 7-10) Ɔsɔ mɛtɛ ayonga etena k’ɔlɔ wa mamba! Eelo mɛtɛ, oyadi Jehowa akatosha elongamelo k’otsha l’olongo kana ka sɛna laa nkɛtɛ, ngandji ka pondjo k’Ɔtɛkɛta ande ndo ndjaɔsɛ tɛdikɔ dia ndjaɔtɔnganyiya la lomba la Nzambi ayotokokɛ oma ko kakianɛ. Ndo lo nshi yayaye lɔ ‘layotosha lotombo nɛ dia sho lokumbatɛ.’—Tukedi 4:6, 8.
[Caption]
Onde wɛ kokaka nembetshiya?
◻ Ngandji k’Ɔtɛkɛta wa Nzambi kayotokokɛ lo yoho yakɔna?
◻ Lɔtɔngɔ la lo wɛɛla wa Yeso kɛdikɛdi na, ndo ngande wonɛmalɔ?
◻ Ngande wakokaso mɛnya ɔnɛ tekɔ ‘nkɛtɛ y’ɔlɔlɔ’?
◻ Ɛlɔlɔ akɔna wakoka wanɛ walanga Ɔtɛkɛta wa Nzambi kongɛ l’ɔngɛnɔngɛnɔ tshɛ?
[Caption]
[Study Questions]
[Caption on page 26]
[Picture on page 26]
Lɔtɔngɔ la lo wɛɛla wa Yeso kɛdikɛdi losango la lokumu l’ɔlɔlɔ lele l’Ɔtɛkɛta wa Nzambi
[Credit Line]
Garo Nalbandian
[Caption on page 27]
[Picture on page 27]
Ɛmɛnyi wa Jehowa wekɔ lo mbokoya Omboki wa Woho wa Woke
[Caption on page 30]
[Picture on page 30]
Wanɛ wayohandɔ l’Aramangɛdɔna wayɔngɛnangɛna l’elowa wa lo nkɛtɛ