Lama Otema Ayɛ
“Okolamelaki nama utema aye l’eteti, ne dia uma loko katutumbaka teko dia lumu.”—TUKEDI 4:23.
1, 2. Lande na kahombaso nama otema aso?
EKUMANYI kɛmɔtshi ka pami ka lo disɛnga dimɔtshi dia lo Antilles akatombe oma lɛnɛ akandayaombe l’ɔkɔngɔ wa mvula ngembe kɛmɔtshi. Lam’akandêndaka diangɔ diakalanyema la ngembe kɛsɔ, nde akɛnyi dia osongo ɔmɔtshi wa woke waki suke la soko diande wakatshikala l’edja k’ɛnɔnyi akumi wakanyukwe. Nde akayambola ate: ‘Ngande wakoka shakasaka y’osongo nyɛ nyukɔ, ko esongo wa totshitshɛ efula wele sukɛ lawɔ hawonyukwe na?’ Lam’akandende ehekele k’osongo ɔsɔ, nde akakondja okadimwelo. Osongo wa woke ɔsɔ wakɛnamaka dia hawokoke sutshasutshama wakashile koma ofu oto l’atei ndo mvula ngembe akayɔkɛnɛmɔlaka tsho ɛhɔndɛlɔ kɛsɔ kaki kɔmɛnamaka.
2 Mongaka mɛtɛ lonyangu efula etena kakɔ ɔtɛmɔdi wa mɛtɛ wɛnama dia nde ekɔ nge lo mboka k’Okristo l’ohemba wa mbetawɔ. Bible ekɔ la shadiya lam’atatɔ ɔnɛ “tukanyi t’utema w’untu [t]atuyalaka kolo umaka nshi yandi ya dikenda.” (Etatelu 8:21) Kɛsɔ mɛnyaka ɔnɛ naka hatotetemadi la nsɛna wolo, kete kânga otema w’ɔlɔlɔ koka ndjokotɔma dia sala kɛnɛ kele kɔlɔ. Lam’ele otema w’onto tshɛ lele kema kokele kokaka sala kɔlɔ, sho pombaka sala la wolo dia ndjela dako nɛ diata ɔnɛ: “Okolamelaki nama utema aye l’eteti, ne dia uma loko katutumbaka teko dia lumu.” (Tukedi 4:23) Lâsɔ ngande wakokaso nama otema aso wa didjidji na?
Pombaka ndjasɛdingolaka esangɔ l’esangɔ
3, 4. (a) Wembola akɔna wahomba mumbɔma lo dikambo di’otema wa mɛtɛ? (b) Kakɔna kayotokimanyiya dia sɛdingola otema aso wa didjidji?
3 Naka wɛ tshɔ le dɔkɔtɛlɛ dia tɔsɛdinga demba diayɛ, kete ondo nde ayɔsɛdingola doyi diayɛ. Onde demba diayɛ di’otondo mbidja ndo doyi diayɛ, mɛnyaka dia wɛ ekɔ lo ndɛ dimɛna? Ngande weteta dikila diayɛ? Onde doyi diayɛ diekɔ lo toka lo yoho yahombama ndo la wolo? Onde wɛ sutshasutshaka demba lo yoho yakoka? Onde otema ayɛ wekɔ la lonyangu l’efula?
4 Naka otema wa mɛtɛ wekɔ l’ohomba wa sɛdingɔmaka esangɔ l’esangɔ, ko kayotota dikambo di’otema ayɛ wa didjidji na? Jehowa mbatɔsɛdingolaka. (1 Ekondo 29:17) Sho lawɔ pombaka sala woho akɔ wamɛ. Lo woho akɔna na? Lo ndjambola wembola ɛnɛ: Onde otema ami wekɔ lo kondja mbo ya ndɛ ya lo nyuma yahombama oma l’ekimanyielo ka wekelo w’onto ndamɛ ndo ka wɔtwɛlɔ wa lo nsanganya? (Osambu 1:1, 2; Heberu 10:24, 25) Onde losango la Jehowa mongaka l’otema ami oko “dja yadikita, mbambudihama lu weka ami,” ndo tshutshuyakami dia sala olimu w’esambishelo ka Diolelo ndo wa mbetɛ anto ambeki? (Jeremiya 20:9; Mateu 28:19, 20; Romo 1:15, 16) Onde dimi ndjaketembolaka dia kamba elimu ɛmɔtshi wa lo tena tshɛ etena katanema diaaso? (Luka 13:24) Suke la weho akɔna w’akambo wasukanyami otema ami wa didjidji? Onde dimi nyangaka dia monga kamɛ l’anto wele etema awɔ sangana l’ɔtɛmwɛlɔ wa mɛtɛ? (Tukedi 13:20; 1 Koreto 15:33) Tonge suke dia nembetɛ munga tshɛ kɔtɔ l’otema aso ko mbɔsa yɛdikɔ ya kinya aha la tshimbatshimba.
5. Naa oyango ɔmɔtshi w’ohomba wakoka monga l’ehemba wa mbetawɔ kaso?
5 Esangɔ efula mbetawɔ kaso mbɔtɔka l’ehemba. Ehemba ɛsɔ toshaka waaso wa nembetɛ woho wele otema aso. Mɔsɛ akatɛ ase Isariyɛlɛ waki suke la mbɔtɔ lo Nkɛtɛ ya Daka ate: “Nyuho mbuka tshe kakanyolombola [Jehowa Nzambi k]anyu, deku akumi anei ne l’usui wa shɛnga, dia nyukitshakitsha la nyedika, dia mbeya uku aki lu etema anyu, kana nyu nyatulamaka elembe andi kana kema.” (Euhwelu k’Elembe 8:2) Kema sho mambaka mbala efula lo menda tokanyi la nsaki yatongaka laso ndo woho watotosalaka etena kahomanaso l’akambo kana l’ehemba ɛmɔtshi wa la shashimoya? Ehemba wetawɔ Jehowa dia vɔ tokomɛ kokaka mɛtɛ tokimanyiya dia mbishola wɛdu aso ndo toshaka diaaso dia sala ɛlɔngɔswamelo wahombama. (Jakoba 1:2-4) Tatohɛke pondjo dia kanyiya ndo nɔmba lo kɛnɛ kendana la woho wahombaso sala la ntondo k’ehemba.
Kakɔna kɛnya ɛtɛkɛta aso?
6. Kakɔna kakoka akambo weso la mbekelo ka tɛkɛta mɛnya lo kɛnɛ kendana l’otema aso?
6 Ngande wakokaso shikikɛ kɛnɛ kɔsaso la nɛmɔ l’otema aso? Yeso akate ate: “Untu ololo atutundjaka kene keli ololo uma lu eumbelu k’ololo k’uma l’utema andi. Untu a kolo atutundjaka kene keli kolo oma lu eumbelu kandi ka kolo; ne dia unyo andi atoteketaka akambu wa l’utema [ande].” (Luka 6:45) Kɛnɛ keso la mbekelo ka tɛkɛta mɛnyaka mɛtɛ kɛnɛ kalanga otema aso. Onde mbala efula sho tɛkɛtaka lo kɛnɛ kendana la lomombo la l’emunyi ndo l’akambo wasala anto wa l’andja ɔnɛ? Onde asawo aso mendanaka mbala efula l’akambo ndo l’eyango wa lo nyuma? Lo dihole dia sho tɛkɛta dikambo dia munga y’anto akina, onde sho salaka la ngandji tshɛ dia ndjikomba? (Tukedi 10:11, 12) Onde sho tshɔbɔlaka lo kɛnɛ kendana l’anto ndo lo kɛnɛ keta lo nsɛnɔ yawɔ oleki lo kɛnɛ kendana l’akambo wa lo nyuma ndo la lɔkɛwɔ la dimɛna? Kema dikambo sɔ koka mɛnya dia sho ndjatambiyaka amboleka l’akambo akana?—1 Petero 4:15.
7. Wetshelo akɔna wendana l’olamelo w’otema wakokaso kondja oma l’ɔkɔndɔ w’anango Yɔsɛfu dikumi?
7 Tɔsɛdingole kɛnɛ kakakome lo nkumbo kɛmɔtshi ka woke. Ana dikumi wa nondo waki Jakɔba “kumbeya nsawula . . . ntu la memakana” vɔ la Yɔsɛfu ya kosɛwɔ. Lande na? Dikambo wakawokaka kandjema nɛ dia nde aki ɔna lakokamaka ngandji efula oma le shɛwɔ. L’ɔkɔngɔ diko, lam’akayokondjaka Yɔsɛfu diɛsɛ dia nongola waɛnɛlɔ oma le Nzambi, dikambo diakɛnyaka dia Jehowa aki la nde, anango asɔ wakatane ‘ɔkɔkɔ okina wa mbohetsha.’ (Etatelu 37:4, 5, 11) L’esehe tshɛ, vɔ wakasondja ɔnangɛwɔ lo fumbe. Oma lâsɔ, dia pemba mbishɛ kɔlɔ kawɔ, vɔ wakakese shɛwɔ woho wa nde mbetawɔ ɔnɛ Yɔsɛfu akadiakemi oma le nyama ka pango. Anango Yɔsɛfu dikumi asɔ konama etema awɔ lo diaaso sɔ. Naka tekɔ suke dia mɔnyɔla anto akina, onde dikambo sɔ hakoke mɛnya dia tekɔ l’ɔkɔmiya kana la kandjema l’etema aso? Sho pombaka sɛna wolo dia sɛdingola awui watondjaso ndo monga suke dia minya tokanyi ta kɔlɔ tshɛ.
8. Kakɔna kayotokimanyiya dia sɛdingola otema aso naka tambɔkɔ l’ohemba wa mbuta kashi?
8 Kânga mbele “[Nzambi] heyi mvuta kashi,” anto wele kema kokele lo wedi awɔ mongaka suke dia mbuta kashi. (Heberu 6:18) Omembi w’esambo akalele ate: “Antu tshe kashi ketu katawo.” (Osambu 116:11) Kânga ɔpɔstɔlɔ Petero akanguna Yeso mbala shato y’etondo. (Mateu 26:69-75) Mbokɛmaka hwe dia sho pombaka mbewɔ kashi, nɛ dia Jehowa petshaka “lulimi la kashi.” (Tukedi 6:16-19) Naka taki la mbekelo ka mbuta kashi, kete ayonga dimɛna dia sɛdingola kiɔkɔ ya dikambo sɔ. Onde nɛ dia takokaka anto wɔma? Onde wɔma wa kondja dilanya mbaki kiɔkɔ? Ondo dia kokɛ lukumu laso kana lokaki l’efula mbaki lo kiɔkɔ ya dikambo sɔ. Oyadi kakɔna kaki lo kiɔkɔ ya dikambo sɔ, sunganaka mɛtɛ dia sho kana yimba lo dikambo diakɔ, ko mbetawɔ munga kaso la ndjakitshakitsha tshɛ ndo nɔmba edimanyielo ka Jehowa lo nyanga ekimanyielo kande dia tondoya wɔdu akɔ. “Dikumanyi dia [l’etshumanelo]” koka monga anto w’eshika wa mbisha ekimanyielo kɛsɔ.—Jakoba 5:14.
9. Kakɔna kakoka alɔmbɛlɔ aso mɛnya lo kɛnɛ kendana l’otema aso?
9 Jehowa akakadimola Nkumekanga ka dikɛnda Sɔlɔmɔna lam’akandɔlɔmbɛ lomba la ewo ate: “Ne dia dikambu ne mbeli l’utema aye, osoku mbahayalombi engonyi kana ukundji, nemo . . . Dimi lambukusha yimba la ewu. Dimi layukusha ntu ongonyi, ukundji la nemo.” (2 Ekondo 1:11, 12) Oma lo kɛnɛ kakalɔmbɛ Sɔlɔmɔna ndo kakinde kɔnɔmba, Jehowa akeye kɛnɛ kakalangaka otema wa Sɔlɔmɔna. Kakɔna kɛnya alɔmbɛlɔ aso otsha le Nzambi lo kɛnɛ kendana l’otema aso? Onde alɔmbɛlɔ aso mɛnyaka dia tekɔ la mposa ka monga l’ewo, la lomba ndo la shɛnɔdi? (Tukedi 2:1-6; Mateu 5:3) Onde wahɔ wa Diolelo shikimala l’otema aso? (Mateu 6:9, 10) Naka alɔmbɛlɔ aso hawoyosalema oma k’ɛse otema, kete dikambo sɔ mbeyaka monga djembetelo yɛnya ohomba wa tshungola etena ka kana yimba l’etsha waki Jehowa. (Osambu 103:2) Akristo tshɛ pombaka monga suke dia sɛdingola kɛnɛ kɛnya alɔmbɛlɔ awɔ.
Kakɔna kɛnya etsha aso?
10, 11. (a) Oma lende aya monanyi la loseka? (b) Kakɔna kayotokimanyiya di’aha ‘sala monanyi l’otema’?
10 Vɔ mbutaka vate etsha ndeka ɛtɛkɛta. Lo mɛtɛ etsha aso mbaleka mɛnya akambo wele l’atei w’otema aso. Ɛnyɛlɔ, lo kɛnɛ kendana la lɔkɛwɔ, nama otema nɔmbaka akambo efula koko aha tsho mbewɔ loseka kana monanyi. Lo Dako diande dia lo Dikona, Yeso akate ate: “Untu tshe lenda umuntu, ku ndi ambûkumbula, ndi ambunana la ndi l’utema.” (Mateu 5:28) Ngande wakokaso mbewɔ dia sala monanyi kânga l’etei k’otema aso na?
11 Owandji wa nkumbo wa kɔlamelo wakawelɛka Jɔbɔ akasha apami la wamato w’Akristo wambotshukana ɛnyɛlɔ k’ɔlɔlɔ. Aha la tamu, esangɔ efula Jɔbɔ akalaka akambo nde l’esekaseka ndo mbala mɔtshi akâkimanyiyaka l’ɔlɔlɔ tshɛ l’etena kakiwɔ l’ohomba w’ekimanyielo. Koko kanyi ya monga la ngandji kasa pami la womoto otsha le esekaseka ɛsɔ kondja kânga yema lo yimba yaki pami kɛsɔ ka kɔlamelo. Lande na? Nɛ dia nde akɔshi yɛdikɔ yaha kotɔma otsha le womoto. Nde akate ate: “Dimi lakalakana l’ashu ami, diaha nkumbula usekaseka w’emuma pundju.” (Jobo 31:1) Todje sho lawɔ daka dia woho ɔsɔ la washo aso ndo tolame etema aso.
12. Ngande wakokayɛ kamba la Luka 16:10 dia nama otema ayɛ?
12 Ɔna Nzambi akate ate: “One leli la kolamelu lu diango diuleki tshitshe, eko la kolamelu ndu lu diango diuleki efula.” (Luka 16:10) Eelo, sho pombaka sɛdingola dionga diaso l’akambo wɛnama oko wekɔ totshitshɛ wa lo lɔsɛnɔ laso la lushi tshɛ, oyadi wanɛ wasalaso lo shamɛ ato lo mvudu yaso. (Osambu 101:2) Etena keso lo luudu laso, kendaso televiziɔ kana Internet, onde sho sɛnaka wolo dia kitanyiya dako di’oma l’Afundelo diata ɔnɛ: “Munanyi, akambu wa mindu tshe, kana okomiya, akambu aso tawuyalaki l’atei anyu, keli nyuyali uku ekilami. Ndu akambu wa sonyi, eyokayoka la sawusawu, akambu aso hawusungana”? (Efeso 5:3, 4) Ko kayotota dikambo di’awui wa ngala wakokawɔ mɛnya lo televiziɔ kana lo vidɛo na? Omembi w’esambo akate ate: “[Jehowa ndamɛ] atushishimaka untu ololo ndu untu a kolo. Keli utema andi atuhetshaka untu a kolo, ndu one latulangaka akambu wa djawudi.”—Osambu 11:5.
13. Ambowotolaka dia sala etena kakanyiyaso lo kɛnɛ katomba oma l’etema aso?
13 Jeremiya tewolaka ate: “Utema ndeka diango tshe lukesu, vo weko kolo efula.” (Jeremiya 17:9) Lokeso l’otema lɔsɔ koka mɛnama lam’ayangaso tɛkɛ nɛndɛ etena kasalaso munga, lam’ɛnyaso dia ndoko kɔlɔ k’efula kotsheso, lam’ayangaso dia dinyadinya dikɔmɔ diaso dia weke kana etena kalekaso kotola yambalo y’anto l’akambo wasalaso. Otema wa kɔlɔ kokaka nto monga la nimi hiende mbut’ate awui watondjaso hawoyɔtɔnɛ l’etsha aso. (Osambu 12:2; Tukedi 23:7) Ekɔ ohomba efula dia sho monga la losembwe etena kasɛdingolaso kɛnɛ katomba oma l’otema!
Onde tekɔ la sso di’ɔsɛlɛngɛ?
14, 15. (a) Sso di’“ɔsɛlɛngɛ” kɛdikɛdi na? (b) Ngande watokimanyiya sso di’ɔsɛlɛngɛ dia nama otema aso?
14 Yeso akate ate: “Su dieli tala dia dimba.” Nde akakotsha ate: “Naka su diaye dieko (“ɔsɛlɛngɛ,” NW], dimba diaye tshe diayulula too la usasi.” (Mateu 6:22) Sso di’ɔsɛlɛngɛ sembɔnɛka l’oyango kana la sangwelo ɔtɔi to, diɔ hadiekekɔ l’akambo akina. Lo mɛtɛ, sso diaso pombaka sembɔ lo kɛnɛ kakandate ate: “nyutayangi [ntondo] diulelu la ololo wa [Nzambi].” (Mateu 6:33) Kakɔna kakoka komɛ otema aso wa didjidji naka sso diaso bu ɔsɛlɛngɛ na?
15 Tɔsɛdingole kɛnɛ kendana l’oyangelo wa lɔsɛnɔ. Kotsha ehomba wa nkumbo kaso ekɔ tshondo y’ɔkɛndɛ le Okristo. (1 Timote 5:8) Ko ayotota naka tambokotɔma la nsaki ka monga paka la kɛnɛ keke katomba, kaheme tshɛ, ndo koleki tshɛ l’akambo wele oko diangɔ dia ndɛ, ahɔndɔ, dihole dia mbidjasɛ la diangɔ dikina na? Kema kɛsɔ koka mɛtɛ konya otema ndo yimba yaso ɔhɔmbɔ ndo kahanya otema aso l’ahende lo kɛnɛ kendana l’ɔtɛmwɛlɔ aso? (Osambu 119:113; Romo 16:18) Lande na kahombaso ndjasha tshɛ lo kotsha ehomba wa l’emunyi polo ndo lo yɛdikɔ ya lɔsɛnɔ laso l’otondo lendanaka paka la dikambo dia nkumbo, di’okanda kana dia diangɔ dia l’emunyi na? Tohɔ dako nɛ diakasambiyama diata ɔnɛ: “Nyulamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone. Lushi loso, latukuya le nyu shashimuya, uku shuni ya djunga, ne dia osoku mbayuya lushi lako le antu tshe wudjashi ladiku dia kete.”—Luka 21:34, 35.
16. Naa dako diakasha Yeso lo kɛnɛ kendana la sso, ndo lande na?
16 Sso ekɔ ɛngɔ k’ohomba efula kewoya yimba ndo otema akambo. Kɛnɛ kendadiɔ koka monga la shɛngiya ya wolo lo tokanyi, lo nsaki ndo l’etsha aso. Lam’akandakambe l’ɛtɛkɛta wele oko wɛɛla, Yeso akɛnya wolo wele l’ohemba w’oma lo sso ndo akate ate: “Naka su diaye dia lupami diambukutakanya, udikhunduli, udikadja. Ne dia nshisha leke otoi l’uma lu dimba ndeka mbikadjema l’utundu aye tshe lu luwinga la dja ololo.” (Mateu 5:29) Pombaka shimba sso di’aha menda akambo wa mindo. Ɛnyɛlɔ, diɔ hadiohombe kondja diaaso dia tetemala la menda akambo wakoka tshutshuya kana munyiya mposa ndo nsaki ya kɔlɔ.
17. Lo kamba la dako dia lo Kolosai 3:5, ngande wakimanyiyamaso dia nama etema aso?
17 Lo mɛtɛ, aha sso to mbele diwoki diatokimanyiya dia mbeya kɛnɛ keta l’andja. Awoki akina wele oko lokoho ndo atuyi kambaka vɔ lawɔ olimu awɔ, ndo sho pombaka nama tenyi diaso dikina dia demba. Ɔpɔstɔlɔ Paulo tɔlɔmbaka ate: “Nyudiaki akambu wa kolo wa la kete: munanyi, akambu wa mindu, saki ka dimba, lulangu la kolo, okomiya, weli otemwelo wa dikishi.”—Kolosai 3:5.
18. Tɛdikɔ takɔna tahombaso mbɔsa lo kɛnɛ kendana la tokanyi ta kɔlɔ?
18 Nsaki ka kɔlɔ koka tomba oma lo yimba yaso. Mbala efula tetemala monga la nsaki ka kɔlɔ mongaka la shɛngiya l’otema. Diakɔ diata Bible ɔnɛ: “Ku saki kako, lam’atshoto diemi, to kayuta kolo; ku kolo, lam’ulato, to kayuta nyoi.” (Jakoba 1:14, 15) Efula mbetawɔka dia mbala efula woho ɔsɔ mbatotatɛka onto sala esuse. Ekɔ ohomba efula mɛtɛ dia sho ndodjaka timba taso l’akambo wa lo nyuma. (Filipi 4:8) Ndo naka kanyi ya kɔlɔ yambotoyɛ lo yimba, kete sho pombaka sala la wolo dia ndjinya.
‘Tokambe Jehowa l’otema ɔtɔi’
19, 20. Ngande wokokiso tondoya dia kambɛ Jehowa l’otema ɔtɔi?
19 Lam’akandakome osombe, Nkumekanga Davidi akatɛ ɔnande ate: “We on’ami Solomona ulimbiteli [Nzambi k]a sho, ûkambeli ulimu l’utema otoi la lumu tshe, ne dia [Jehowa] atukembaka etema tshe, atulimbitelaka dikanyiakanyia dia tukanyi.” (1 Ekondo 28:9) Sɔlɔmɔna ndamɛ akalɔmbɛ dia monga ‘l’otema w’okitanyiya.’ (1 Khumi ya Dikanga 3:9) Koko, nde aki l’okakatanu wa wolo dia tetemala monga l’otema wa ngasɔ lo lɔsɛnɔ lande l’otondo.
20 Naka sho nangaka tondoya lo dikambo sɔ, kete sho hatohombe monga tsho l’otema wangɛnyangɛnya Jehowa koko sho pombaka nto nama otema akɔ. Dia sala dikambo sɔ, sho pombaka nama waohwelo wa l’Ɔtɛkɛta wa Nzambi l’otema aso, mbut’ate ‘l’atei awɔ.’ (Tukedi 4:20-22) Sho pombaka nto monga la mbekelo ka sɛdingolaka otema aso ndo kanyiyaka lo dɔmbɛlɔ lo kɛnɛ kɛnya ɛtɛkɛta ndo etsha aso. Nɛmɔ diakɔna diakoka monga la kanyi shɔ naka hatoyangi ekimanyielo ka Jehowa dia nɔngɔsɔla weho wa wɛdu tshɛ washolaso na? Ɔnkɔnɛ, ekɔ mɛtɛ ohomba efula dia sho tetemala la sɛna wolo l’akambo wɔtshiyaso l’otema oma lo tshimbo y’awoki aso! Lam’asalaso dikambo sɔ, sho ndjashikikɛka ɔnɛ “ki ka [Nzambi], kuleki yimba tshe, ayulama etema [aso] la tukanyi [taso] le Kristu Jesu.” (Filipi 4:6, 7) Eelo, tɔshi yɛdikɔ ya nama otema aso oleki ɛngɔ kekina tshɛ kokokiso nama ndo ya kambɛ Jehowa l’otema ɔtɔi.
Onde wɛ akohɔ?
• Lande na kele ekɔ ohomba nama otema aso?
• Ngande wele sɛdingola kɛnɛ katɛkɛtaso tokimanyiyaka dia nama otema aso?
• Lande na kahombaso nama sso diaso “ɔsɛlɛngɛ”?
[Esato wa lo lɛkɛ 18]
Awui akɔna weso la mbekelo ka sawolaka l’esambishelo, lo nsanganya ndo la ngelo?
[Esato wa lo lɛkɛ 20]
Sso di’ɔsɛlɛngɛ hadiekekɔ l’akambo efula