Monga la lomba kɛdikɛdi mboka Nzambi wɔma!
‘Wɔma wa Jehowa wele etatelo ka lomba.’—TUKEDI 9:10.
1. Lande na kɛna anto efula wolo shihodia kanyi ya mboka Nzambi wɔma?
AKI etena kɛmɔtshi kele onto akokaka ɔlɔ etena kakataka anto akina lo lokombo lande ɔnɛ nde mbokaka Nzambi wɔma. Ɛlɔ kɛnɛ anto mbɔsaka kanyi ya mboka Nzambi wɔma oko dikambo diambeta lowe ndo diele wolo shihodia. Vɔ koka ndjambola ɔnɛ: ‘Naka Nzambi ekɔ ngandji, lande na kahombaso mbôka wɔma?’ Le wɔ, wɔma ekɔ dikambo dia kɔlɔ ndo diasongola anto demba. Koko, wɔma wa mɛtɛ wa Nzambi wekɔ la tokitshimudi efula ndo oko wayotodiɛna, vɔ bu esasesase konga l’onto la ntondo ka dikambo dimɔtshi.
2, 3. Kakɔna kalembetshiya wɔma w’oshika wa Nzambi?
2 Wɔma wa Nzambi watɛkɛtama lo Bible wekɔ dikambo dia dimɛna. (Isaya 11:3) Vɔ wekɔ dilɛmiɛlɔ di’efula diele l’onto otsha le Nzambi ndo nsaki k’efula kaha mbonyangiya. (Osambu 115:11) Wɔma ɔsɔ mendanaka nto la okitanyielo wa dimɛna wa ɛlɛmbɛ wa Nzambi wendana la lɔkɛwɔ ndo nsaki ka nsɛna lo yoho yɔtɔnɛ la kɛnɛ kata Nzambi ɔnɛ kekɔ dimɛna kana kekɔ kɔlɔ. Dibuku dimɔtshi mbutaka dia wɔma wa l’otema ɔtɔi ɔsɔ mɛnyaka “dionga di’ohomba efula diahomba onto monga ladiɔ otsha le Nzambi, mbuta ate dionga diakimanyiya dia onto monga la lɔkɛwɔ la dimɛna ndo mbewɔ awui wa kɔlɔ tshɛ.” Diakɔ diata Ɔtɛkɛta wa Nzambi ɔnɛ: ‘Wɔma wa Jehowa wele etatelo ka lomba.’—Tukedi 9:10.
3 Eelo, wɔma wa Nzambi mendanaka l’awui tshɛ wa lo lɔsɛnɔ l’onto. Vɔ kakatana aha tsho la lomba, koko ndo la ɔngɛnɔngɛnɔ, wɔladi, ɔngɔnyi, lolombe, elongamelo ndo wɛkamu. (Osambu 2:11; Tukedi 1:7; 10:27; 14:26; 22:4; 23:17, 18; Etsha 9:31) Vɔ kakatana efula la mbetawɔ ndo la ngandji. Ɔnkɔnɛ, vɔ mendanaka l’oseka dui tshɛ diendana la diɔtɔnganelo diasaso la Nzambi ndo l’asekaso anto. (Euhwelu k’Elembe 10:12; Jobo 6:14; Heberu 11:7) Wɔma wa Nzambi mendanaka nto la eshikikelo kele laso k’ɔnɛ Shɛso lele l’olongo ndjakiyanyaka dikambo diaso ndo ekɔ suke dia todimanyiya munga yaso. (Osambu 130:4) Paka atshi wa kɔlɔ wahayatshumoya mbahomba nsaka lokomba la wɔma la ntondo ka Nzambi.a—Heberu 10:26-31.
Teke dia mboka Jehowa wɔma
4. Kakɔna kayotokimanyiya dia sho ‘mbeka dia mboka Jehowa wɔma’?
4 Lam’ele wɔma wa Nzambi wekɔ dikambo di’ohomba efula diatokimanyiya dia mbɔsa tɛdikɔ t’amɛna ndo dia nongola ɛtshɔkɔ oma le Nzambi, ngande wakokaso ‘mbeka dia mboka Jehowa wɔma’ w’oshika? (Euhwelu k’Elembe 17:19) Bɛnyɛlɔ efula dia apami la wamato wakokaka Nzambi wɔma diakafundama lo Bible dia “ntulakanya.” (Romo 15:4) Dia tokimanyiya dia sho shihodia dimɛna kɛnɛ kalembetshiya mɛtɛ mboka Nzambi wɔma, nyɛsɔ tokane yimba lo lɔsɛnɔ la onto ɔmɔtshi l’atei awɔ, mbuta ate nkumekanga Davidi ka lo Isariyɛlɛ w’edjedja.
5. Ngande wakakimanyiya olimu wa nama ɛkɔkɔ Davidi dia nde mbeka dia mboka Jehowa wɔma?
5 Jehowa akatone Saulo, nkumekanga ka ntondo k’Isariyɛlɛ lo woho wakandoke anto wɔma lo dihole dia Jehowa. (1 Samuele 15:24-26) Lo wedi okina, yoho ya lɔsɛnɔ yaki la Davidi ndo diɔtɔnganelo dia dimɛna diaki lam’asande la Jehowa akɛnya dia nde aki pami kakokaka Nzambi wɔma. Oma ko dikɛnda diande, Davidi aketshaka wenya efula lo namaka ɛkɔkɔ wa she. (1 Samuele 16:11) Etsho efula wakandetshaka lo namaka ɛkɔkɔ akakimanyiya Davidi dia nde shihodia wɔma wa Jehowa. Kânga mbakɛnyi Davidi paka yema tshitshɛ tsho ya woke woke w’andja, nde akashikikɛ l’ɔlɔlɔ tshɛ dia Nzambi mbahombaso nɛnya ndo tɛmɔla. Nde akayofunda l’ɔkɔngɔ ate: “Lam’atumendaka ulungu, ulimu w’anya aye, ngondo la toto takayatungi, untu eli na, dia we mbukanela? La ona untu eli na, dia we mbekesanela la ndi?”—Osambu 8:3, 4.
6. Ngande wakayaoke Davidi lam’akandɛnyi woke woke wa Jehowa?
6 Eelo mɛtɛ, Davidi akâmbe heyama lam’akandɛdika tshitshɛ yande la woke woke w’olongo ɔnɛ wɛnama. Lo dihole dia mbosha wɔma, ewo kɛsɔ akotshutshuya dia tombola Jehowa ndo nde akate ate: “Ulungu atusanyaka lutumbu la [Nzambi]; diango dia l’ulungu diatutenyaka ulimu w’anya andi.” (Osambu 19:1) Dilɛmiɛlɔ diaki lande otsha le Nzambi diakokimanyiya dia nde ndeka ndjasukanya la Nzambi ndo mbosha mposa ka mbeka dia ndjela mboka yande ya kokele. Ohokanyiya woho wakayaoke Davidi etena kakandembɛ Jehowa ɔnɛ: “Ne dia we keli wuki, katutshaka akambu wa mamba; we weme keli [Nzambi. Jehowa] li, unimbitshiya mbuka kaye, ku dimi layokendakendaka lu mete kaye. Olongosole utema ami, dia dimi mbuka lukumbu laye woma.”—Osambu 86:10, 11.
7. Ngande wakakimanyiya wɔma wa Nzambi Davidi dia nde ndɔ la Ngɔliyatɛ?
7 Etena kakɔtwɛ ase Filistiya wodja w’Isariyɛlɛ la ta, Ngɔliyatɛ dihoka diawɔ diaki l’otale wa suke la mɛtɛlɛ shato akadje ase Isariyɛlɛ tɔfwɛfwɛ, lo mbuta ate: ‘Nyɔsɔnɛ pami kahomba ndɔ la mi! Naka nde ambɔnɛndja, sho tayonga as’olimu anyu.’ (1 Samuele 17:4-10) Saulo ndo alembe ande tshɛ wakasake lokomba la wɔma, koko Davidi komboka wɔma. Nde akeyaka dia nde hahombe mboka onto wɔma, oyadi wolo akɔna wele lande. Davidi akatɛ Ngɔliyatɛ ate: “Dimi lambuya le ye paka lu lukumbu la [Jehowa], Kanga lulimbilimbi. Ku ului one tshe w’antu wayeya vati: Aha la yombo kana la dikonga, mbatushimbelaka [Jehowa] antu, ne dia ta ne dieli dia [Jehowa].” La yoka ave yande ndo la dive diamɛ, ndo oma l’ekimanyielo ka Jehowa, Davidi akadiake dikongote sɔ.—1 Samuele 17:45-47.
8. Wetshelo akɔna wakondjaso oma lo bɛnyɛlɔ dia lo Bible dia anto wakokaka Nzambi wɔma?
8 Mbeyaka monga ko tekɔ lo ndɔshana l’ekakatanu kana l’atunyi wa wolo oko wanɛ wakalɔshana la Davidi. Kakɔna kakokaso sala? Sho mbeyaka ndɔshana la wɔ lo sala kɛnɛ kakasale Davidi ndo anto akina w’edjedja waki la kɔlamelo, mbuta ate la wɔma wa Nzambi. Wɔma wa Nzambi mbeyaka mbahemɛ wɔma w’onto. Nehemiya laki okambi wa kɔlamelo waki Nzambi akakeketsha asekande ase Isariyɛlɛ wakahɛnyahɛnyamaka oma le antunyi ate: “Tanyuwaukaki woma. Nyuho Khumadiondjo, leli wuki ndu leli woma.” (Nehemiya 4:14) Oma l’ekimanyielo ka Jehowa, Davidi, Nehemiya ndo ekambi ekina wa kɔlamelo waki Nzambi wakatondoya dia kotsha ɛkɛndɛ wakawasha Jehowa. Kɛsɔ mbakokaso ndo sho lawɔ sala oma lo wɔma wa Nzambi.
Tɔlɔshana l’ekakatanu la wɔma wa Nzambi
9. L’atei w’akambo akɔna wakɛnya Davidi dia nde akokaka Nzambi wɔma?
9 L’ɔkɔngɔ wa Davidi ndjaka Ngɔliyatɛ, Jehowa akokimanyiya dia nde mbidja etshumba lo ata akina. Koko, Saulo laki la kandjema akayange dia ndjaka Davidi, ntondo la shashimoya, oma lâsɔ, la mayɛlɛ, ndo l’ekomelo la asɔlayi. Kânga mbakashikikɛ Jehowa Davidi dia nde ayonga nkumekanga, l’edja k’ɛnɔnyi efula, Davidi akahombe talawɔlawɔka, ndɔ ata ndo kongɛ etena kakashikikɛ Jehowa dia mbodja nkumekanga. L’akambo asɔ tshɛ, Davidi akɛnya dia nde akokaka Nzambi ka mɛtɛ wɔma.—1 Samuele 18:9, 11, 17; 24:2.
10. Ngande wakɛnya Davidi wɔma wakandokaka Nzambi etena kakinde lo wâle?
10 Lo diaaso dimɔtshi, Davidi akalawɔ dia toyashɛ laka Akishi, owandji wa l’osomba w’ase Filistiya wa Ngata, osomba wakotɔ Ngɔliyatɛ. (1 Samuele 21:10-15) As’olimu waki Akishi wakate dia Davidi aki otunyi wa wodja awɔ. Kakɔna kakasale Davidi la ntondo ka dikambo dia wâle sɔ? Nde akalɔmbɛ Jehowa l’etete. (Osambu 56:1-4, 11-13) Kânga mbakandadimbiya dadi dia nde kondja woho wa ndawɔ, Davidi akeye dia Jehowa mɛtɛ mbakotshungola lo tshɔkɔla welo wakandadje. Woho wakayaɛkɛ Davidi l’otema ɔtɔi le Jehowa akɛnya dia Davidi akokaka mɛtɛ Nzambi wɔma.—Osambu 34:4-6, 9-11.
11. Ngande wakokaso mɛnya wɔma wa Nzambi l’etena keso l’ekakatanu oko wakasale Davidi?
11 L’ɛnyɛlɔ ka Davidi, sho koka mɛnya wɔma wokaso Nzambi lo ndjaɛkɛ lo daka diande dia tokimanyiya dia sho ndɔshana l’ekakatanu. Davidi akate ate: “Uyakimo le [Jehowa], ekamaki le ndi, ku ndi ayukutshela dikambu diako.” (Osambu 37:5) Kɛsɔ halembetshiya dia sho pombaka kɛkɛtshiya Jehowa ekakatanu aso ko sho kɔma anya aha la sala ndoko dui ko nongamɛ dia nde kandola ekakatanu akɔ. Davidi kɔnɔmba Nzambi dia mbokimanyiya ko nde kɔma anya. Nde akakambe la wolo wa demba ndo la yimba yakawosha Jehowa dia nde kandola ekakatanu waki lande. Koko, Davidi akeyaka dia aha oma lo wolo ande hita mbakoka onto kandola ekakatanu ande. Ngasɔ mbediɔ ndo lo dikambo diaso. L’ɔkɔngɔ wa sho sala kɛnɛ tshɛ kakokaso sala, sho pombaka tshika akambo akina l’anya wa Jehowa. Lo mɛtɛ, mbala efula ndoko kakokaso sala lâdiko dia tshika tshɛ l’anya wa Jehowa. L’etena kɛsɔ mbahombaso mɛnya wɔma wokaso Nzambi. Sho koka keketshama oma l’ɛtɛkɛta ɛnɛ wakate Davidi l’otema ɔtɔi ate: “Ekesanelu ka [Jehowa] keko le wane watuwukaka woma.”—Osambu 25:14.
12. Bonde kahombaso mbɔsa alɔmbɛlɔ aso oko dikambo di’ohomba efula, ndo dionga diakɔna diahatahombe pondjo monga ladiɔ?
12 Ɔnkɔnɛ, sho pombaka mbɔsa alɔmbɛlɔ aso ndo diɔtɔnganelo diasaso la Jehowa oko akambo w’ohomba efula. Etena kalɔmbaso Jehowa, sho pombaka ‘mbetawɔ dia nde ekɔ ndo di’ɔnɛ nde ekɔ ofutshi wa wanɛ watôyangaka l’otema ɔtɔi.’ (Heberu 11:6; Jakoba 1:5-8) Ndo etena katokimanyiyande, sho pombaka ‘monga la lowando,’ oko wakatolake ɔpɔstɔlɔ Paulo. (Kolosai 3:15, 17) Hatohombe monga pondjo oko anto watɛkɛta Okristo ɔmɔtshi w’okitami wambohokɔ akambo lo dikambo diawɔ ate: “Vɔ mbɔsaka Nzambi oko os’olimu ɔmɔtshi lele l’olongo, etena kɛwɔ l’ohomba w’ɛngɔ, vɔ nɔmbaka Nzambi ndo nongamɛka okadimwelo paka wonya akɔ. Koko etena kakondjawɔ kɛnɛ kayangawɔ, vɔ bu nto l’ohomba wa Nzambi.” Dionga dia ngasɔ mɛnyaka dia vɔ bu la wɔma wa Nzambi.
Etena kashisha onto wɔma wa Nzambi
13. Lo diaaso diakɔna diele Davidi kokitanyiya Ɛlɛmbɛ wa Nzambi?
13 Woho wakôkimanyiya Jehowa lo tena di’asui akakimanyiya Davidi dia ndeka mboka Nzambi wɔma ndo dui sɔ diakakeketsha wɛkamu ande le Nzambi. (Osambu 31:22-24) Koko, lo waaso asato, Davidi akashisha wɔma wakandokaka Nzambi ndo dui sɔ diakonge l’etombelo wa kɔlɔ efula le nde. Diaaso dia ntondo ekɔ lam’akandalɔngɔsɔla dia mɛmba ɔshɛtɛ wa sheke wa Jehowa otsha la Jerusalɛma lo pusupusu lo dihole dia vɔ mɛmbama l’ahɛka w’ase Lɛwi, oko wakadjangaka Ɛlɛmbɛ wa Nzambi. Etena kakakimɛ Uza lakatatshindjiyaka pusupusu Ɔshɛtɛ diaha vɔ kɔ, nde akavu ko wonya akɔ l’ɔtɛ wa ‘tshelo yaha la dilɛmiɛlɔ shɔ.’ Eelo, Uza akasale pɛkato ka woke, koko lo dikambo sɔ, woho waki Davidi kokitanyiya dimɛna Ɛlɛmbɛ wa Nzambi mbaki lo kiɔkɔ y’etombelo wa kɔlɔ ɛsɔ. Mboka Nzambi wɔma kɛdikɛdi sala akambo lo yoho yɔtɔnɛ la lolango lande.—2 Samuele 6:2-9; Walelu 4:15; 7:9.
14. Kakɔna kakatombe oma lo woho wakâdia Davidi ase Isariyɛlɛ?
14 L’ɔkɔngɔ diko, oko wakandayotshutshuyama oma le Satana, Davidi akâdia apami w’ase Isariyɛlɛ wakalɔka ata. (1 Ekondo 21:1) Lo sala ngasɔ, Davidi komboka Nzambi wɔma, ndo l’ɔtɛ wa dikambo sɔ ase Isariyɛlɛ 70000 wakadiakema. Kânga mbakayatshumoya Davidi la ntondo ka Jehowa, nde l’anto ande wakɛnyi ɛhɔlɛ.—2 Samuele 24:1-16.
15. Kakɔna kakayokonya Davidi dia sala pɛkato ka loseka?
15 Diaaso dikina diakashisha Davidi lo tshanda mɔtshi wɔma wa Nzambi akokonya lo sala awui wa mindo wa dieyanelo la Batɛshɛba ka wadi aki Uriya. Davidi akeyaka dia loseka ndo kânga kɔmiya wadi’akana aki kɔlɔ. (Etumbelu 20:14, 17) Ena ka ntondo ka kɔlɔ kakatakola Davidi ele woho wakandende Batɛshɛba tɛɛ wonya wakandɔkaka. Wɔma w’oshika wa Nzambi akahombe tshutshuya Davidi dia nde minya washo ndo yimba mbala kakɔ ɔtɔi oma le womoto ɔsɔ. Lo dihole dia sala ngasɔ, mɛnamaka dia Davidi ‘akatetemala la menda’ womoto akɔ polo ndo lo mposa ka mbeyana la nde ndjahemɛ wɔma wa Nzambi. (Mateu 5:28; 2 Samuele 11:1-4) Davidi akayohɛ dia Nzambi akendaka oseka dikambo tshɛ diakandasalaka.—Osambu 139:1-7.
16. Etombelo akɔna wa kɔlɔ wakakondja Davidi l’ɔtɛ wa kɔlɔ kakandasale?
16 Davidi akote nde la Batɛshɛba ɔna pami oma lo loseka. Yema l’ɔkɔngɔ wa lâsɔ, Jehowa akatome ɔprɔfɛta ande Natana dia ndjɛnya Davidi pɛkato kande. L’ɔkɔngɔ wa yimba yande shikimala nto, Davidi akayongaka nto la wɔma wokongaka lande otsha le Nzambi ndo akayatshumoya. Nde akalɔmbɛ Jehowa diaha nde mbodiaka kana minya nyuma Kande k’ekila le nde. (Osambu 51:7, 11) Jehowa akadimanyiya Davidi ndo akakitshakitsha dilanya diakandahombe mbisha Davidi, koko nde kombohandoya oma l’etombelo tshɛ wa kɔlɔ wa etsha ande. Ɔnaki Davidi akavu, ndo oma l’etena kɛsɔ asui ndo fɔnu kondjangana nto oma lo nkumbo ka Davidi. Oshishelo wa wɔma wa Nzambi wakonge l’etombelo w’ololo oko kondjo!—2 Samuele 12:10-14; 13:10-14; 15:14.
17. Sha ɛnyɛlɔ ka lɔkɔnyɔ laya oma lo pɛkato.
17 Ɛlɔ kɛnɛ, tona dia mboka Nzambi wɔma l’awui wendana la lɔkɛwɔ mbeyaka woho akɔ wâmɛ mbela onto etombelo wa kɔlɔ ndo wahandohɛki. Ohokanyiya lɔkɔnyɔ laki la osekaseka ɔmɔtshi etena kakandoke dia omɛnde ambosala loseka lɛnɛ akambande olimu lo wodja okina. Oma lo pâ ndo lɔkɔnyɔ lakawosha losango lɔsɔ, nde akafɛ elungi l’anya ande ndo akalele. Edja ka ngande kayohombama dia nde ndjoyaɛkɛ nto le omɛnde ndo mbɔlɛmiya nto na? Sho koka mbewɔ etombelo wa kɔlɔ wa ngasɔ lo mboka Nzambi wɔma.—1 Koreto 6:18.
Wɔma wa Nzambi toshimbaka dia sala pɛkato
18. Oyango akɔna wele la Satana ndo yoho yakɔna yakambande dia mbokotsha?
18 Satana ekɔ lo talanya la shamanya efula ɛlɛmbɛ wendana la lɔkɛwɔ wa l’andja ɔnɛ, ndo nde ndeka sɔma Akristo wa mɛtɛ dia mbanganyiya. Dia sala dikambo sɔ, nde kambaka la kɛnɛ kɔtshiya mbala kakɔ ɔtɔi awui l’etema ndo lo tomba taso, mbuta ate awoki aso, djekoleko washo la atui. (Efeso 4:17-19) Kakɔna kayoyosala naka aha la wɛ mbeya wɛ ambɛna alɛdi wa kɔlɔ, amboka ɛtɛkɛta wa kɔlɔ kana ambohomana l’anto wa kɔlɔ?
19. Ngande wakakimanyiya wɔma wa Nzambi Okristo ɔmɔtshi dia tondoya ohemba?
19 Tɔshi ɛnyɛlɔ kaki André,b ekumanyi k’Okristo, papa ka nkumbo kele dɔkɔtɛlɛ lo wodja ɔmɔtshi wa l’Erɔpɛ. Etena kakakambaka André l’otsho lo lopitadi, wamato wakakambaka la nde wakamamaka lo dihɔndɔ diande tokatshi tele l’awui wa ngandji ka lam’asa pami la womoto ndo wakayangaka dia sala la nde awui wa mindo wa dieyanelo. André akatone la wolo tshɛ dia sala dikambo sɔ. Ndo nto, dia nde mimɔ suke l’anto wa ngasɔ, nde akayange olimu dihole dikina. Mboka Nzambi wɔma aki dikambo dia dimɛna efula diakandasale ndo kɛsɔ akawela ɛtshɔkɔ efula, ɛnyɛlɔ, ɛlɔ kɛnɛ André ekɔ lo kamba tena dimɔtshi lo Bɛtɛlɛ k’Ɛmɛnyi wa Jehowa ka lo wodja ande.
20, 21. a) Ngande wakoka wɔma wa Nzambi tokimanyiya dia mbewɔ sala pɛkato? b) Kakɔna kayotɔsɛdingola lo sawo diayela?
20 Kakatshiya tokanyi ta kɔlɔ lo yimba mbeyaka ndjokonya dia onto mbetawɔ shisha diɔtɔnganelo dia dimɛna diele lam’asande la Jehowa dia kondja ɛngɔ kende bu la lotshungɔ. (Jakoba 1:14, 15) Lo wedi okina, naka sho mbokaka Jehowa wɔma, kete tayewɔ anto, ahole, elimu ndo tɔkɛnyɔ takoka kitshakitsha yambalo yadjaso dia monga la lɔkɛwɔ la pudipudi. (Tukedi 22:3) Ndeka dimɛna mbishama sɔnyi kana ndjahombia awui amɔtshi lo dihole dia shisha diɔtɔnganelo diele lam’asaso la Nzambi. (Mateu 5:29, 30) Mboka Nzambi wɔma mɛnyaka dia hatohombe pondjo mbetawɔ ndjadja lo wâle wendana la awui wa mindo, mbidja ndo menda alɛdi wɛnyawɔ anto etakataka lo toho tawɔ tshɛ, koko tayosala ‘diaha washo aso menda kɛnɛ kele kɔlɔ.’ Naka sho sala ngasɔ, kete tayokoka ndjaɛkɛ le Jehowa dia nde ‘tolama la lɔsɛnɔ’ ndo tosha kɛnɛ tshɛ keso latɔ ohomba.—Osambu 84:11; 119:37.
21 Eelo, sala akambo lo yoho yɔtɔnɛ la wɔma wa Nzambi ekɔ nshi tshɛ dikambo dia lomba. Dikambo sɔ mbishaka nto ɔngɛnɔngɛnɔ wa mɛtɛ. (Osambu 34:9) Kɛsɔ kayolembetshiyama dimɛna lo sawo diayela.
[Nɔte ka l’ɛse ka dikatshi]
a Enda lo sawo diele l’ɔtɛ a dui ɔnɛ “D’après la Bible. . . Craindre un Dieu d’amour : en quel sens ?” lo Réveillez-vous! wa Ngɔndɔ ka ntondo 8, 1998, wakatondja Ɛmɛnyi wa Jehowa.
b Lokombo lakatshikitanyema.
Onde wɛ kokaka nembetshiya?
• Waonga akɔna wokakatanyi la wɔma wa Nzambi?
• Ngande wanya wɔma wa Nzambi wɔma w’onto?
• Ngande wakokaso mɛnya dia tekɔ la kanyi ya dimɛna lo dikambo dia dɔmbɛlɔ?
• Ngande watoshimba wɔma wa Nzambi dia sala pɛkato?
[Osato wa lo lɛkɛ 25]
Davidi akeke dia mboka Nzambi wɔma lo sɛdingola diangɔ diakandatonge
[Esato wa lo lɛkɛ 26]
Ngande wayoyosala naka aha la wɛ nongamɛ wɛ ambohomana l’ohemba?