Tɔkɛndakɛndake oko wakakɛndakɛndaka Yeso Kristo
“Untu lata ati: dimi leko [kâmɛ la Nzambi] dieli la ndi dia nkendakenda uku akandakendakendaka [Yeso].”—1 JOANI 2:6.
1, 2. Kakɔna kalembetshiya mbika washo le Yeso?
ƆPƆSTƆLƆ Paulo akafunde ate: “Tusaki esakelu kasu ka luwangu keli la ntundu l’eteti. [Toke washo le] Jesu, utatedi la unduwanyi wa mbetawo kasu.” (Heberu 12:1, 2) Dia monga la lɔsɛnɔ la kɔlamelo, sho pombaka mbika washo aso le Yeso Kristo.
2 Tshɛkɛta yokambi la wɔ lo Afundelo w’Akristo wa lo Grɛkɛ ndo yokadimɔmi lanɛ ɔnɛ “mbika washo” nembetshiyaka lo ɔtɛkɛta w’etatelo ɔnɛ “mbidja yambalo aha la mbekola yimba,” “minya washo oma lo ɛngɔ kɛmɔtshi dia menda ɛngɔ kekina,” “kana mbika washo tɛɛ lo ɛngɔ kɛmɔtshi.” Dibuku dimɔtshi mbutaka ɔnɛ: “Le ondawi w’ose Ngirika kama wanyande yimba oma lo dihole diatandalawɔ ndo lo oshidi w’ekomelo watandafufe dia koma lɛkɔ lo washo wa nyemba y’anto wa wenda, mbakitakita lowango lande. Ngasɔ mbediɔ ndo lo dikambo dia Okristo.” Awui wekola yimba koka mbidja wekamu lo ohamelo aso wa lo nyuma. Sho pombaka mbika washo le Yeso Kristo. Ko kakɔna kendaso le Otatedi aso na? Tshɛkɛta ya lo Grɛkɛ yokadimɔmi ɔnɛ “utatedi” nembetshiyaka “ɔnɔmbɔdi woleki, mbuta ate onto leta la ntondo lo dikambo dimɔtshi ndo lasha ɛnyɛlɔ.” Mbika washo le Yeso nembetshiyaka ndjela ɛnyɛlɔ kande.
3, 4. a) Kɛndakɛnda oko wakakɛndakɛndaka Yeso Kristo nembetshiyaka na? b) Ambola akɔna wahombaso mbidja yimba lɔkɔ?
3 Bible mbutaka ɔnɛ: “Untu lata ati: dimi leko [kâmɛ la Nzambi], dieli la ndi dia nkendakenda uku akandakendakendaka [Yeso].” (1 Joani 2:6) Sho pombaka tshikala kâmɛ la Nzambi lo sɛdingolaka wadjango waki Yeso oko wakandasɛdingolaka waki She.—Joani 15:10.
4 Omalɔkɔ, kɛndakɛnda oko wakakɛndakɛndaka Yeso nɔmbaka dia sho mbɔsɛdingolaka dimɛna oko Ɔnɔmbɔdi woleki ndo ndjela wanya ande la kɔlamelo tshɛ. Ambola w’ohomba wahombaso sɛdingola lo dikambo sɔ vɔanɛ: Ngande watɔlɔmbɔla Kristo ɛlɔ kɛnɛ na? Ngande wayotɛnya dia sho ndjelaka yoho yande ya kɛndakɛnda? Ɛlɔlɔ akɔna waya lo ndjela ɛnyɛlɔ kakatshike Yeso Kristo na?
Woho walɔmbɔla Kristo ambeki ande
5. La ntondo ka nde mbudɛ l’olongo, daka diakɔna diakasha Yeso ambeki ande?
5 La ntondo ka nde mbudɛ l’olongo, Yeso Kristo lakolwama akɛnama le ambeki ande ndo akawasha olimu w’ohomba efula. Nde akate ate: ‘Nyotshu ndo nyetɛ anto wa lo wedja tshɛ ambeki.’ Lo diaaso sɔ, Ɔnɔmbɔdi woleki akâlake nto dia nde ayonga kâmɛ la wɔ etena kayowokotshaka ɔkɛndɛ ɔsɔ lo mbatɛ ate: “Nyulungi, dimi leko la nyu nshi tshe edja ndu ekumelu k’andja.” (Mateu 28:19, 20) Ngande wele Yeso Kristo kâmɛ la ambeki ande lo nshi nyɛ y’ekomelo ka dikongɛ nɛ dia akambo na?
6, 7. Ngande watɔlɔmbɔla Yeso oma lo ekimanyielo ka nyuma k’ekila?
6 Yeso akate ate: “Ukimanyidi, [nyuma k’ekila], layutuma Papa lu lukumbu lami, ndi ayunyetsha akambu tshe, ayunyuhula aui tshe wakamanyutelaka.” (Joani 14:26) Nyuma k’ekila, katomama lo lokombo la Yeso, tɔlɔmbɔlaka ndo tokeketshaka ɛlɔ kɛnɛ. Tɔ tɔhɛtshɛka osase lo nyuma ndo tokimanyiyaka dia sho shihodia “akambu a waki wa [Nzambi].” (1 Koreto 2:10) Lâdiko dia lâsɔ, waonga waki Nzambi, mbuta ate “ngandji, ongenongeno, ki, ndjakimela, ketshi, ololo, kolamelu, memakana, ndjaenda” wekɔ “elua wa nyuma.” (Ngalatiya 5:22, 23) Oma l’ekimanyielo ka nyuma k’ekila, sho koka monga la waonga asɔ.
7 Etena kekaso Afundelo ndo kayatshutshuyaso dia kamba olimu la kɛnɛ kekaso, nyuma ka Jehowa tokimanyiyaka dia pama lo lomba, shɛnɔdi, yimba, ewo, tokanyi, ndo lo dikoka dia kana yimba. (Tukedi 2:1-11) Nyuma k’ekila tokimanyiyaka nto dia mbikikɛ ehemba ndo ekakatanu. (1 Koreto 10:13; 2 Koreto 4:7; Filipi 4:13) Akristo keketshamaka dia ‘ndjaɛdia vɔamɛ oma lo mindo tshɛ ya demba ndo ya yimba, lo koma lo eongelo k’ekila.’ (2 Koreto 7:1) Onde sho koka mɛtɛ nsɛna lo yoho yɔtɔnɛ la didjango diaki Nzambi sɔ diendana la ekila, kana pudipudi, aha la ekimanyielo ka nyuma k’ekila? Jehowa Nzambi akasha Ɔnande lotshungɔ la kamba la nyuma k’ekila ndo tɔ kekɔ ehomɔ kɛmɔtshi kakamba la Yeso dia tɔlɔmbɔla ɛlɔ kɛnɛ.—Mateu 28:18.
8, 9. Ngande wakamba Kristo la ‘ɔhɔmbɔ wa kɔlamelo ndo wa kɛsɔ’ dia nɔmbɔla etshumanelo?
8 Tɔsɛdingole ehomɔ kekina kakamba la Kristo dia nɔmbɔla etshumanelo ɛlɔ kɛnɛ. Lo tɛkɛta dikambo dia wôngelo ande ndo dia ekomelo ka dikongɛ nɛ di’akambo, Yeso akate ate: “[Ɔhɔmbɔ] akona weli la kolamelu la yimba, wakakitsha khumendi ladiku dia antu wa luudu landi, dia mbashaka mbu ya nde yawo lu tena diayo? Lam’ayuya khumendi, lam’ayundûtana atsha osoku, [ɔhɔmbɔ] oso ayuyala la otshoko. Mete kanyutelami nti: Ndi ayûkitsha ladiku dia diango diandi tshe.”—Mateu 24:3, 45-47.
9 ‘Nkumi’ kɛsɔ ko Yeso Kristo. ‘Ɔhɔmbɔ’ ekɔ olui w’Akristo w’akitami wele la nkɛtɛ. Olui w’ɔhɔmbɔ ɔsɔ akalongola ɔkɛndɛ wa kokɛ wahɔ wa Yeso wa la nkɛtɛ ndo wa mbisha mbo ya ndɛ ya lo nyuma lo tena diayɔ. Olui wa tshitshɛ wa emendji wele l’akoka w’oma l’atei wa wanɛ wakenga ‘ɔhɔmbɔ wa kɔlamelo ndo wa kɛsɔ’ mbakenga Olui-walɔmbɔla, wakamba oko onyimpala waki olui w’ɔhɔmbɔ. Anangɛso asɔ mbalɔmbɔla olimu wa Diolelo wa l’andja w’otondo, mbuta ate olimu w’esambishelo ndo wa mbisha mbo ya ndɛ ya lo nyuma lo tena diayɔ. Ngasɔ mbalɔmbɔla Kristo etshumanelo oma lo tshimbo ya Akristo w’akitami wa nyuma, mbuta ate ‘ɔhɔmbɔ wa kɔlamelo ndo wa kɛsɔ’ ndo Olui atɔ walɔmbɔla.
10. Dionga diakɔna diahombaso monga ladiɔ otsha le dikumanyi, ndo lande na?
10 Yoho kina nto yɛnama ɛlɔmbwɛlɔ ka Kristo ele oma lo tshimbo ya ‘apami wele oko weshasha,’ mbuta ate dikumanyi, kana emendji wa lo etshumanelo k’Akristo. Vɔ wakalongola ɔkɛndɛ wa “nduwanya ekilami, dia ntsha ulimu wa nkimanyiya akina, dia mpika dimba dia Kristu.” (Efeso 4:8, 11, 12) Lo dikambo diawɔ, Heberu 13:7 mbutaka ɔnɛ: “Nyuhoki elombodi anyu, wakanyutelaka diui dia [Nzambi]. Nyukani yimba ya ditshelu diawo, nyukuya mbetawo kawo.” Dikumanyi nɔmbɔlaka etshumanelo. Lam’ele vɔ mbokoyaka Kristo Yeso, ekɔ ɔlɔlɔ mbokoya mbetawɔ kawɔ. (1 Koreto 11:1) Sho koka mɛnya lowando laso lo yɛdikɔ shɔ lo monga la okitanyiya le ‘apami wele oko weshasha.’—Heberu 13:17.
11. Dihomɔ diakɔna diakamba la Kristo dia nɔmbɔla ambeki ande ɛlɔ kɛnɛ, ndo ahombaso sala dia kɛndakɛnda oko wakandakɛndakɛndaka?
11 Lo nshi yaso nyɛ, Yeso Kristo ekɔ lo nɔmbɔla ambeki ande lo ekimanyielo ka nyuma k’ekila, ka ‘ɔhɔmbɔ wa kɔlamelo ndo wa kɛsɔ,’ ndo ka dikumanyi dia lo tshumanelo. Dia kɛndakɛnda woho wakakɛndakɛndaka Yeso, sho pombaka shihodia yoho yatɔlɔmbɔlande ndo ndjela ɛlɔmbwɛlɔ kakɔ. Dui sɔ nembetshiyaka nto mbokoya yoho yande ya kɛndakɛnda. Ɔpɔstɔlɔ Petero akafunde ate: “Nyu nyaketama dia dikambu diako, ne dia Kristu akanyusuwela, akanyutshikela djimbitelu, dia nyu mbuyela lu wanya andi.” (1 Petero 2:21) Ngande wayotɛnya dia sho mbokoyaka ɛnyɛlɔ ka kokele kakatotshikɛ Yeso?
Kamba la lowandji layɛ la ekanelo k’ɔlɔlɔ
12. Naa dui dimɔtshi diendana la ɛnyɛlɔ ka Kristo kendana lo yoho ya lânde la dikumanyi?
12 Kânga mbakalongola Yeso lowandji loleki tshɛ oma le She, nde aki la ekanelo k’ɔlɔlɔ lo yoho yakandakambaka la lɔ. Anto tshɛ l’atei w’etshumanelo, djekoleko emendji pombaka ndjashikikɛ dia ‘ekanelo kawɔ k’ɔlɔlɔ kekɔ lo mbeyama le anto tshɛ.’ (Filipi 4:5; 1 Timote 3:2, 3) Lam’ele dikumanyi wekɔ la yema ya lowandji l’atei w’etshumanelo, ekɔ ohomba efula dia vɔ ndjela wanya waki Kristo lo yoho ya kamba la lowandji lawɔ.
13, 14. Ngande wakoka dikumanyi mbokoya Kristo etena kakeketshawɔ anto akina dia kambɛ Nzambi?
13 Yeso akadjaka yimba lo elelo waki la ambeki ande. Nde kombalɔmbaka kɛnɛ kakiwɔ komonga la akoka wa sala. (Joani 16:12) Aha la nde mbatshutshuya la wolo, Yeso akakeketsha ambeki ande dia ‘vɔ mbidja welo’ dia ntsha lolango laki Nzambi. (Luka 13:24) Nde akasale dui sɔ lo mbasha ɛnyɛlɔ ndo lo minanda etema awɔ. Woho akɔ wâmɛ mbele ɛlɔ kɛnɛ, dikumanyi dia Akristo hawotshutshuya anto akina la wolo dia vɔ kambɛ Nzambi. Koko, vɔ mbakeketshaka dia kambɛ Jehowa oma lo ngandji kawaokawɔ ndo kokawɔ Yeso la asekawɔ anto.—Mateu 22:37-39.
14 Yeso kokamba lo yoho ya kɔlɔ la lowandji lakawawosha lo mbahemɛ nsɛnɔ y’ambeki ande. Ndoko lushi lakandawadjɛ eyango wakiwɔ kokoka kotsha kana ɛlɛmbɛ wamboleka efula. Koko nde aki la oyango wa mbatshutshuya dia mbɔsa yɛdikɔ lo munanda etema awɔ la atɔndɔ w’oma lo ɛlɛmbɛ wakashama lo tshimbo ya Mɔsɛ. (Mateu 5:27, 28) Lo mbokoya Yeso Kristo, dikumanyi ndjalamaka diaha mbidja ɛlɛmbɛ awɔ hita kana tshininala lo tokanyi tawɔ hita. L’akambo wendana la ɔlɔtɔ, wonyelo kana ɔlɔngɔswɛlɔ wa divo, ɔkɔkwɛlɔ wa demba ndo tɔkɛnyɔ, dikumanyi ndjatshutshuyaka dia munanda etema lo kamba la atɔndɔ waki Nzambi, oko atɔndɔ wele lo Mika 6:8; 1 Koreto 10:31-33; ndo 1 Timote 2:9, 10.
Tokane kɛtshi ndo todimanyiyanake
15. Ngande wakasalaka Yeso la ntondo ka munga ya ambeki ande?
15 Kristo akatotshikɛ ɛnyɛlɔ lo yoho yakandasalaka la ntondo ka wandja ndo munga ya ambeki ande. Tɔsɛdingole akambo ahende wakete l’otsho w’ekomelo wa lɔsɛnɔ lande la lanɛ la nkɛtɛ oko onto. L’ɔkɔngɔ wa vɔ koma la Ngɛtɛsɛmanɛ, Yeso “akatshu la Petero, Jakoba, la Joani,” ndo akawatɛ ate: “Nyosenaki.” Oma lâsɔ, “ndi akamutsho yema, akayakosha la kete, akalombe.” Etena kakandakalola le apɔstɔlɔ ande asato, “ndi akayâtana wuladi djo.” Kakɔna kakatshe Yeso? Nde akate ate: “Mete, utema nangaka, keli dimba mbeli wodu.” (Mako 14:32-38) Lo dihole dia nde pangwɛ Petero, Jakɔba ndo Joani, nde akawaoke kɛtshi! L’otsho akɔ wâmɛ ɔsɔ, Petero akanguna Yeso mbala shato. (Mako 14:66-72) Dionga diakɔna diakayongaka la Yeso otsha le Petero l’ɔkɔngɔ na? “Khumadiondjo ambulo, ndi akene le Simona [Petero].” (Luka 24:34) Bible mbutaka ɔnɛ: “Ndi akene le Kefasi; l’okongo diku le ambeki dikumi l’ahendi.” (1 Koreto 15:5) Lo dihole dia nde mbômbɛ tokumbɛkumbɛ, Yeso akadimanyiya ɔpɔstɔlɔ ɔsɔ wakayatshumoya ndo akokeketsha. L’ɔkɔngɔ diko, Yeso akayoshaka Petero ɛkɛndɛ wa weke efula.—Etsha 2:14; 8:14-17; 10:44, 45.
16. Ngande wakokaso kɛndakɛnda oko wakakɛndakɛndaka Yeso etena katosalɛ asekaso ambetawudi kɔlɔ lo toho tɔmɔtshi?
16 Etena katosalɛ asekaso ambetawudi kɔlɔ lo toho tɔmɔtshi l’ɔtɛ wewɔ kema kokele, onde sho lawɔ hatohombe mbaoka kɛtshi ndo mbadimanyiya oko wakatshe Yeso? Petero akakeketsha asekande ambetawudi ate: “Nyu tshe, nyuyali la utema otoi. Nyukani ketshi, nyukani ngandji uku untu l’onangu. Nyuyali la etema wa memakana, nyuyakitshakitsha. Tanyukaluyaki kolo lu kolo, kuyanga lotengo lu lotengo, keli nyotshokwani, ne dia nyaketama dia dikambu ne, dia nyu nkita otshoko.” (1 Petero 3:8, 9) Kakɔna kayototsha naka onto okina hatosalɛ akambo woho wototosalɛ Yeso, lo tona dia toka kɛtshi kana todimanyiya na? Kânga l’etena kɛsɔ, tekɔ l’ɔkɛndɛ wa mbokoya Yeso ndo mbosalɛ akambo oko wotosalɛ Yeso.—1 Joani 3:16.
Tetsha wahɔ wa Diolelo la ntondo
17. Kakɔna kɛnya ɔnɛ Yeso aketshaka osalelo wa lolango la Nzambi lo dihole dia ntondo lo lɔsɛnɔ lande?
17 Ekɔ yoho kina nto yahombaso kɛndakɛnda oko wakakɛndakɛndaka Yeso Kristo. Esambishelo ka lokumu l’ɔlɔlɔ la Diolelo diaki Nzambi akɔsaka dihole dia ntondo lo lɔsɛnɔ la Yeso. L’ɔkɔngɔ wa nde sambisha womoto l’ose Samariya suke la osomba wa Sukara la Samariya, Yeso akatɛ ambeki ande ate: “Ma diami, dieli ntsha lulangu la one lakantumi, la dia nshidiya ulimu andi.” (Joani 4:34) Osalelo wa lolango laki She akasukɛka Yeso. Le nde, dui sɔ diakikɔ oko ma dia ndɛ diasha wolo, ɔngɛnɔngɛnɔ ndo diakeketsha. Shi onto lokoya Yeso lo ndjasha tshɛ dia sala lolango laki Nzambi mongaka la lɔsɛnɔ l’ɔngɔnyu ndo l’ɔngɛnɔngɛnɔ?
18. Ɛtshɔkɔ akɔna wonga etena kakeketshawɔ ana dia kamba olimu wa lo tena tshɛ?
18 Etena kakeketsha ambutshi anawɔ dia kamba olimu wa lo tena tshɛ, vɔ ndo anawɔ kondjaka ɛtshɔkɔ efula. Ombutshi ɔmɔtshi lakikɔ la ana wa waasa ahende akâkeketsha oma ko totshitshɛ tawɔ dia vɔ ndjadjɛ oyango wa ndjokamba olimu w’ombatshi mboka. L’ɔkɔngɔ wa vɔ shidiya kalasa, ana akɔ ahende wakakome ambatshi mboka. Lo kanyiya ɔngɛnɔngɛnɔ wakawosha dikambo sɔ, papa kɛsɔ akafunde ate: “Anaso w’apami kotosha sɔnyi. La lowando tshɛ sho koka mbuta ɔnɛ: ‘Ana wekɔ sango di’oma le Jehowa.’ ” (Osambu 127:3) Ko ɛlɔlɔ akɔna wakondja ana oma l’olimu wa lo tena tshɛ? Mama kɛmɔtshi kele la ana atanu mbutaka ate: “Olimu w’ombatshi mboka wakakimanyiya anami tshɛ dia ndjasukanya la Jehowa ndo dia monga la mbekelo y’ɔlɔlɔ ya wekelo w’onto ndamɛ ndo akakimanyiya nto dia kamba la wenya awɔ la lomba ndo dia mbetsha awui wa lo nyuma lo dihole dia ntondo lo nsɛnɔ yawɔ. Kânga mbele vɔ tshɛ wakahombe sala etshikitanu w’efula, ndoko ɔtɔi l’atei awɔ la nyanga lo woho wakawasɔnɛ dia ndjela yoho ya lɔsɛnɔ shɔ.”
19. Eyango akɔna wa lo nshi yayaye wahomba ɛlɔngɔlɔngɔ la esekaseka ndjadjɛ?
19 Ɛlɔngɔlɔngɔ la esekaseka, ayonyosala lo nshi yayaye? Onde nyu nyangaka dia koma tomanyi lo elimu ɛmɔtshi wa l’andja ɔnɛ? Kana onde nyekɔ lo ndjalɔngɔsɔla dia ndjokamba olimu wa lo tena tshɛ? Paulo tolakaka ate: “Nyewo ololo uku akendakendanyu, aha uku dinginya, keli uku akanga a yimba. Nyuyatshungweli etena, ne dia nshi nye yeko kolo.” Nde akakotsha ate: “Okone tanyuyalaki uku dinginya, keli nyushihudia lulangu la Khumadiondjo.”—Efeso 5:15-17.
Tonge la kɔlamelo
20, 21. Lo yoho yakɔna yaki Yeso la kɔlamelo, ndo ngande wakokaso mbokoya kɔlamelo yande?
20 Dia kɛndakɛnda woho wakakɛndakɛndaka Yeso, sho pombaka mbokoya kɔlamelo yande. Lo kɛnɛ kendana la kɔlamelo yaki Yeso, Bible mbutaka ɔnɛ: “Kuyanga ndi aki lu efanelu ka [Nzambi], ndi kunkana ati: Mbedima pupu la [Nzambi] eko engo ka dimi munda. Keli ndi akayanya uma lu lutumbu, akayala uku ukambi, akuto lu efanelu k’antu. Lam’akandayala uku untu, ndi akayakitshakitsha, akayala la ukitanyia edja ndu lu nyoi, ee, nyoi ka l’utamba [w’asui].” La kɔlamelo tshɛ Yeso akasukɛ lowandji laki Jehowa lo kitanyiya lolango la Nzambi dikambo diande. Nde akonge la okitanyiya polo ndo lo nyɔi ka l’otamba w’asui. Sho pombaka ‘monga la woho wa yimba shɔ’ ndo mbetawɔ sala lolango laki Nzambi la kɔlamelo tshɛ.—Filipi 2:5-8.
21 Yeso akɛnya kɔlamelo nto otsha le apɔstɔlɔ ande wa kɔlamelo. Kânga mbakiwɔ la wɛɔdu ndo la munga, Yeso akawaoke ngandji “edja ndu l’ekumelu.” (Joani 13:1) Woho akɔ wâmɛ mbele, hatohombe monga la dionga dia diɔnyɔ otsha le anangɛso l’ɔtɛ wa munga yawɔ.
Toyele ɛnyɛlɔ kakatotshikɛ Yeso
22, 23. Ɛlɔlɔ akɔna waya oma lo ndjela ɛnyɛlɔ kakatshike Yeso?
22 Lo mɛtɛ, oko weso anto wele kema kokele, sho hatokoke kɛndakɛnda tshɛ lo tshɛ lo wanya waki Ɛnyɛlɔ kaso ka kokele. Koko, sho koka sala la wolo dia ndjela wanya ande la kɔlamelo tshɛ. Dia sho sala dui sɔ, sho pombaka shihodia ndo ndjela yoho yalɔmbɔla Kristo ndo ndjela ɛnyɛlɔ kakandatotshikɛ.
23 Mbokoya Kristo mbelaka ɛtshɔkɔ efula. Nsɛnɔ yaso mongaka l’oyango wa shikaa ndo l’ɔngɛnɔngɛnɔ nɛ dia sho ndjashaka tshɛ dia sala lolango laki Nzambi lo dihole dia lakiso hita. (Joani 5:30; 6:38) Tekɔ la nkum’otema ka pudipudi. Yoho yakɛndakɛndaso ndjoshaka anto akina ɛnyɛlɔ k’ɔlɔlɔ. Yeso akelɛ anto tshɛ wakadiɛnɛka ndo waki la wetsho dia vɔ ndja le nde dia ndjokondja ekeketshelo dikambo dia anima awɔ. (Mateu 11:28-30) Naka sho ndjela ɛnyɛlɔ kaki Yeso, kete sho lawɔ koka mbisha anto waya le so ekeketshelo. Ɔnkɔnɛ, nyɛsɔ tɔkɛndakɛndake oko wakakɛndakɛndaka Yeso.
Onde wɛ âkohɔ?
• Ngande walɔmbɔla Kristo ambeki ande ɛlɔ kɛnɛ?
• Ngande wakoka dikumanyi mbokoya Kristo etena kakambawɔ la lowandji lakawasha Nzambi?
• Ngande wakokaso ndjela ɛnyɛlɔ kaki Yeso etena katosalɛ asekaso kɔlɔ?
• Ngande wakoka ɛlɔngɔlɔngɔ la esekaseka mbetsha wahɔ wa Diolelo la ntondo?
[Osato wa lo lɛkɛ 15]
Dikumanyi tokimanyiyaka dia ndjela ɛlɔmbwɛlɔ ka Kristo
[Osato wa lo lɛkɛ 16]
Nyu akɛnda, onde nyu ndjadjɛka eyango wayonyokimanyiya dia ndjonga la lɔsɛnɔ l’Okristo l’ɔngɛnɔngɛnɔ?