Wembola w’oma le ambadi

Naka onto ɔmɔtshi amboyadiaka, onde ekɔ dimɛna di’okambi ɔmɔtshi w’Okristo mbisha dako di’okundelo?

Okambi tshɛ w’Okristo ndamɛ mbahomba mbɔsa yɛdikɔ dia kana nkum’otema k’ɔlɔlɔ kele lande la ntondo ka Nzambi koka mbotshutshuya dia mbisha dako di’okundelo dikambo di’onto lɛnama dia ndamɛ mboyadiaki. Etena kɔsande yɛdikɔ, nde pombaka kana yimba la wembola wayela ɛnɛ: Ngande wɔsa Jehowa tshelo y’onto ndjadiaka? Onde mɛtɛ onto ɔsɔ akayadiaki ndamɛ? Onde hemɔ kɛmɔtshi ka l’ɔtɛ mbakotshutshuyisha dia nde ndjadiaka? Ngande wɔsa anto wa lo ngelo kanyu tshelo y’onto ndjadiaka?

Oko weso Akristo, sho ndjashaka dia mbeya woho wɔsa Jehowa tshelo ya ndjadiaka. Le Jehowa, lɔsɛnɔ l’onto lekɔ ɛngɔ k’oshinga wolo ndo k’ekila. (Etatelu 9:5; Osambu 36:9) Tshelo y’onto ndamɛ ndjadiaka la lolango lande ekɔ ndjasha nyɔi, ndo yɔ hayɔngɛnyangɛnya Nzambi. (Etumbelu 20:13; 1 Joani 3:15) Onde dikambo sɔ mɛnyaka dia hakoke mbisha dako di’okundelo dikambo di’onto loyadiaki?

Tɔshi ɛnyɛlɔ ka Nkumekanga Saulo ka l’Isariyɛlɛ. Lam’akandɛnyi dia nde hatoka lo ta dia komelo diakawalɔ l’ase Filistiya, lo dihole dia nde mbetawɔ di’atunyi ande ndjosoya lo yoho ya kɔlɔ, “Saulu akose yombo yandi, akayahumanya ladiku diayo.” Lam’akatane ase Filistiya odo ande, vɔ wakahanɛ odo akɔ l’ehele ka Bɛtɛ-Shaba. Lam’akawɛnyi kɛnɛ kakasale ase Filistiya, ase Jebɛshɛ-Ngiliyadɛ wakahanula odo ande ko wakotshumbe. Vɔ wakakundɛ weka ande. Vɔ wakakile ndo mbo ya ndɛ nshi esambele, lo ndjela mbekelo k’ase Isariyɛlɛ. (1 Samuele 31:4, 8-13; Etatelu 50:10) Lam’akɛnyi Davidi laki okitami w’esɔ waki Jehowa, kɛnɛ kakasale ase Jebɛshɛ-Ngiliyadɛ, nde akate ate: “[Jehowa] anyotshokole, ne dia nyu nyakenya khumenyu Saulu kolamelu yanyu, nyakûkhunde. Kakiane [Jehowa] anyenya ngandji ka shikaa la kolamelu.” (2 Samuele 2:5, 6) Ɔkɔndɔ wa lo Bible hɛnya dia kana ase Jebɛshɛ-Ngiliyadɛ wakanyema lo woho wakawatshe kɛnɛ kakakoke mbɔsama oko ditshelo di’otanda lo dikambo dia Nkumekanga Saulo. Ɛdika dikambo sɔ la dikambo dia wanɛ wakiwɔ kokundɛ l’ɔtɛ wetsha awɔ wa kɔlɔ. (Jeremiya 25:32, 33) Okambi w’Okristo koka sɛdingola ɔkɔndɔ wa Saulo etena kayangande mbɔsa yɛdikɔ ya kana koka nde mbisha dako di’okundelo dikambo di’onto loyadiaki.

Nde pombaka nto mbeya oyango wa dako di’okundelo. Otshikitanyi l’anto wetawɔ di’anima hawovu, Ɛmɛnyi wa Jehowa hawosha dako di’okundelo la kanyi ya kɔlɔ ya toma ɔnɛ lambovɔ otsha l’andja okina. Oyango wa woke wa dako sɔ ele dia keketsha wanɛ wambovusha ndo dia sambisha wanɛ woye lo dihole sɔ akambo wa mɛtɛ wendana la eongelo k’onto lambovɔ, koko aha di’ɔnɛ lambovɔ kondja wahɔ ɔmɔtshi oma lɔkɔ. (Undaki 9:5, 10; 2 Koreto 1:3-5) Ɔkɔkɔ okina w’ohomba wa dako di’okundelo ele dia kimanyiya wanɛ woye lo dihole sɔ dia kanyiya woho wele lɔsɛnɔ laso mondo. (Undaki 7:2) Onde eyango ɛsɔ wayokotshama naka dako di’okundelo mbishama lo dikambo di’ɔnɛ loyadiaki?

Lo mɛtɛ, anto amɔtshi mbeyaka fɔnya di’onto ɔsɔ akayadiaki l’okonda, ndo akatshe pɛkato l’okonda la ntondo ka Jehowa. Ko onde ekɔ yoho mɔtshi ya shikikɛ kanyi shɔ? Onde ekɔ dui dimɔtshi diakotshutshuya dia nde ndjadiaka? Anto amɔtshi wakayange ndjadiaka wakayotshikitanyaka yɛdikɔ yawɔ ndo vɔ kondjoyadiaka nto. Onto hakoke ndjoyatshumoya lo kɛnɛ kakandatshe l’ɔkɔngɔ wa nyɔi.

Dikambo dikina di’ohomba mendanaka la hemɔ kana efukutanu ɛmɔtshi wa l’ɔtɛ wakonya anto efula dia ndjadiaka. Anto asɔ koka mbɔsama mɛtɛ dia wamboyadiaka. Lo ndjela eyangelo ɛmɔtshi wakasalema, pursa 90 ya wanɛ wakayadiake waki la weho ɛmɔtshi w’efukutanu l’ɔtɛ kana ekakatanu ekina. Onde Jehowa koka kimwɛ onto layadiaka l’ɔtɛ w’efukutanu wa ngasɔ wele lande l’ɔtɛ? Aha sho mbashikikɛ dia kana ɔnɛ lambovɔ akatshe pɛkato kakoka dimanyiyama kana kahakoke dimanyiyama la ntondo ka Jehowa. Okambi w’Okristo pombaka sɛdingola akambo wakayokonya onto lo dikambo sɔ ndo ɔkɔndɔ wa hemɔ waki ɔnɛ lambovɔ etena kalangande shikikɛ dia kana kokaka mbisha dako di’okundelo dikambo di’onto loyadiaki.

Ekɔ dikambo dikina nto diasungana sɛdingɔma: Anto wa lo ngelo ngande wɔsawɔ tshelo ya ndjadiaka ndo nyɔi k’onto loyadiaki? Dikumanyi pombaka ndeka mbidja yimba lo dikambo sɔ, nɛ dia vɔ mbaleka ndjakiyanya dia lokumu lele l’etshumanelo k’Ɛmɛnyi wa Jehowa. Lo ndjela woho wɔsama tshelo ya ndjadiaka lo ngelo, ndo djekoleko lo dikambo di’ɔnɛ loyadiaki, dikumanyi mbeyaka mɛna dia bu dimɛna vɔ tshutshuya onto dia dako di’okundelo mbishama kana sala dikambo sɔ lo Mbalasa ka Diolelo.

Koko, naka Okristo ɔmɔtshi ambɔlɔmbama dia mbisha dako di’okundelo, nde koka mɛna dia nde koka disha lo ndamɛ, aha la mbidja ase etshumanelo lɔkɔ. Naka nde ambɔsa yɛdikɔ ya sala dikambo sɔ, kete nde pombaka sɛna wolo di’aha tondja ɛtɛkɛta ɛmɔtshi wɛnya shikaa di’onto ɔsɔ ayolwama. Elongamelo kele la ntondo kendana l’onto ɔsɔ lambovɔ kekɔ l’anya wa Jehowa, ndo ndoko onto lakoka mbuta dia kana onto lambovɔ ayolɔ kana kema. Okambi ɔsɔ koka ndjasha lo mbuta akambo wa mɛtɛ wa lo Bible wendana la nyɔi ndo keketsha wanɛ wambovusha.