Yeso Kristo ekɔ Misiɔnɛrɛ woleki woke

“Dimi lambuya uma le ndi, Ndi kakantumi.”​—JOA. 7:29.

1, 2. Elɛwɔ misiɔnɛrɛ, ndo onto akɔna akoka mbelamɛ Misiɔnɛrɛ woleki woke?

KAKƆNA katoyɛ lo yimba etena kokaso tshɛkɛta misiɔnɛrɛ? Anto amɔtshi kanyiyaka dia waa misiɔnɛrɛ ya lo Lokristokristo, wele efula ka l’atei awɔ ndjatambiyaka lo awui wa pɔlitikɛ ndo wa falanga wa lo wedja wakambawɔ. Koko, oko weso Ɛmɛnyi wa Jehowa, ondo sho kanyiyaka dia waa misiɔnɛrɛ yatoma Olui-walɔmbɔla dia tosambisha lokumu l’ɔlɔlɔ lo wedja wotshikitanyi wa la nkɛtɛ. (Mat. 24:14) Waa misiɔnɛrɛ shɔ ndjakimɔka la lolango lawɔ l’olimu wa nɛmɔ efula wa kimanyiya anto dia vɔ ndjasukanya la Jehowa Nzambi ndo monga la diɔtɔnganelo dia lânde lam’asawɔ la nde.​—Jak. 4:8.

² Tshɛkɛta “misiɔnɛrɛ” ndo “waa misiɔnɛrɛ” hayotanema lo Bible ka l’Ɔtɛtɛla. Koko, lo Efeso 4:11 tshɛkɛta ya lo Grɛkɛ yokadimɔmi ɔnɛ ‘esambisha wa lokumu l’ɔlɔlɔ’ kokaka kadimɔma nto ɔnɛ “waa misiɔnɛrɛ.” Jehowa ekɔ Osambisha woleki woke, koko nde hakoke mbelamɛ ɔnɛ Misiɔnɛrɛ woleki woke, nɛ dia ndoko onto lakotome. Lo dikambo dia She lele l’olongo, Yeso Kristo akate ate: “Dimi lambuya uma le ndi, ndi kakantumi.” (Joa. 7:29) Dia mɛnya ngandji k’efula kokande anto, Jehowa akatome Ɔnande ɛtɔi lakandote la nkɛtɛ. (Joa. 3:16) Yeso kokaka mbelamɛ Misiɔnɛrɛ woleki woke, woleki dimɛna, nɛ dia ɔkɔkɔ ɔmɔtshi wakandatomama la nkɛtɛ aki wa “mvuta akambu wa mete.” (Joa. 18:37) Nde akasambisha lokumu l’ɔlɔlɔ la Diolelo dimɛna dimɛna ndo anto wakatetemala kondja wahɔ lo olimu wakandakambe. Ɛnyɛlɔ, sho kokaka kamba la toho tande ta mbetsha lo olimu aso w’esambishelo oyadi misiɔnɛrɛ mbeso kana kema.

3. Ambola akɔna wayangaso sɛdingola?

³ Ɔkɛndɛ waki Yeso w’opandjudi wa Diolelo monyiyaka ambola wele oko anɛ: Awui akɔna wakahomana la Yeso la nkɛtɛ? Lande na kaki wetshelo ande la etombelo w’ɛlɔlɔ? Ndo kakɔna kaketɛ olimu ande dimɛna?

Yeso aki l’ohomba wa yimba ya ndjasha la lolango dia sambisha lo ahole w’eyoyo

4-6. Naa etshikitanu ɛmɔtshi wakasalema lo lɔsɛnɔ laki Yeso etena kakandatomama la nkɛtɛ?

⁴ Waa misiɔnɛrɛ ya nshi nyɛ ndo Akristo amɔtshi watshɔ lɛnɛ ele ohomba efula wa apandjudi wa Diolelo pombaka ndjaekesanyiya la yoho ya lɔsɛnɔ yahɛdimi la lɔnɛ laki lawɔ lɛnɛ akiwɔ. Hatokoke mbɛdika kânga yema tshitshɛ lɔsɛnɔ laki la Yeso la nkɛtɛ la lɔnɛ laki lande l’olongo, lɛnɛ akandasɛnaka la She l’atei w’andjelo wakakambɛka Jehowa la eyango wa pudipudi. (Jobo 38:7) Dui sɔ diakatshikitana efula la nsɛna l’atei w’anto wakasalaka pɛkato lo andja ɔnɛ wa kɔlɔ. (Mako 7:20-23) Yeso akahombe mbikikɛ nto shɛmanedi yaki lam’asa ambeki ande. (Luka 20:46; 22:24) Lo mɛtɛ, nde akeyaka dimɛna dimɛna kɛnɛ ka sala la ntondo k’oseka dikambo tshɛ diakokomɛka la nkɛtɛ.

⁵ Yeso kotatɛ tɛkɛta ɔtɛkɛta w’anto lo dihindo, koko nde akatatɛ mbêka etena kakinde êke ɔna ashashi. Onto lakalɔmbɔlaka andjelo l’olongo, koko aya ɔna ashashi lahomba mbeka ɔtɛkɛta. Ɔsɔ aki mɛtɛ otshikitanu wa woke! Etena kakinde la nkɛtɛ, Yeso akatɛkɛtaka ɔtɛkɛta ɔtɔi kana ndekana “l’eteketa w’antu.” Dui sɔ diakatshikitana tshɛ lo tshɛ la ‘ɛtɛkɛta wa andjelo.’ (1 Kor. 13:1) Ndoko onto lakakambe la ɛtɛkɛta w’amɛna, ko mbɛdima la Yeso.​—Luka 4:22.

⁶ Tɔsɛdingole toho tokina takatshikitana awui lo yɛdikɔ y’efula lo lɔsɛnɔ laki Ɔna Nzambi etena kakandaye la nkɛtɛ. Kânga mbaki Yeso kompowɔ pɛkato oma le Adama, nde akakome onto oko wanɛ wakahombe ndjokoma l’ɔkɔngɔ diko “anyandi,” kana ambeki ande w’akitami. (Adia Heberu 2:17, 18.) L’otsho w’ekomelo wa lɔsɛnɔ lande la lanɛ la nkɛtɛ, Yeso kɔnɔmba She lele l’olongo dia mbotomɛ “andjelo wuleki elui dikumi l’ehendi.” Koko tokanyiya lowandji laki lande lâdiko dia andjelo oko wende Mikaɛlɛ Arkandjelo! (Mat. 26:53; Jude 9) Eelo, Yeso akasale ahindo efula, koko kɛnɛ kakandasale etena kakinde la nkɛtɛ kɔmbɛdima kânga yema tshitshɛ la kɛnɛ kakinde l’akoka wa sala l’olongo.

7. Ngande wakasale ase Juda akambo lo yoho yotshikitanyi efula la ɛlɛmbɛ?

⁷ La ntondo ka nde ndjotɔ oko onto lâsɔ ko nde ele “Diui,” ondo Yeso mbaki Yɛmb’awui yaki Nzambi yakalɔmbɔla ase Isariyɛlɛ lo oswe wa shɛnga. (Joa. 1:1; Etum. 23:20-23) Koko, vɔ wakalongola “elembe uku akandjanga ondjelo, keli [vɔ] kumbekitanyia.” (Etsha 7:53; Heb. 2:2, 3) Ɔnkɔnɛ, ewandji w’ɛtɛmwɛlɔ w’ase Juda wa lo ntambe ka ntondo koshihodia oyango wa mɛtɛ waki la Ɛlɛmbɛ. Ɛnyɛlɔ, tɔsɛdingole ɔlɛmbɛ wendana la Sabato. (Adia Mako 3:4-6.) Afundji ndo Afarisɛ wakɔnyɔlaka “akambu wuleki waki lu elembe, uku [“losembwe, kɛtshi la kɔlamelo,” NW].” (Mat. 23:23) Koko, Yeso kombahekɔ ndo nde akatetemala mbewoya akambo wa mɛtɛ.

8. Lande na kakoka Yeso tokimanyiya?

⁸ Yeso aki la yimba ya ndjasha la lolango. Ngandji kakandokaka anto ndo nsaki k’efula kaki lande ka mbakimanyiya mbakotshutshuyaka dia monga la yimba ya ndjasha la lolango le anto. Ndoko lushi lakandashisha nsaki ka sambisha. Ndo l’ɔtɛ wa kɔlamelo yande le Jehowa etena kakinde la nkɛtɛ, Yeso “akayala utungi a panda ka pundju le wane tshe watûkitanyiaka.” Ndo nto, “ndame akasuyama ndu akahimbama, mbeyandi nkimanyia wane wambuhimbama [oko sho].”​—Heb. 2:18; 5:8, 9.

Nde aketshama dimɛna oko Ombetsha

9, 10. Woho akɔna wa wetshelo wakalongola Yeso la ntondo ka nde tomama la nkɛtɛ?

⁹ La ntondo ka Akristo wa nshi nyɛ tomama oko waa misiɔnɛrɛ, Olui-walɔmbɔla nɔngɔsɔlaka dia vɔ mbetshama. Onde Yeso Kristo aketshama? Eelo, koko nde kɔmbɔtɔ kalasa y’ambewi w’ɛlɛmbɛ w’ase Juda la ntondo ka nde kitama esɔ oko Mɛsiya ndo nde kombetshama oma le ewandji ɛmɔtshi w’ɛtɛmwɛlɔ wa lokumu. (Joa. 7:15; ɛdika Etsha 22:3.) Lâsɔ, lande na kaki Yeso l’akoka wa mbetsha?

¹⁰ Oyadi kɛnɛ kakeke Yeso oma le Mariya wa nyango kana oma le Yɔsɛfu ya she ka lodia, nde akalongola wetshelo ande woleki ohomba oma le Jehowa, ɔnɛ laki la akoka woleki tshɛ wa mbêtsha. Lo dikambo sɔ, Yeso akate ate: “Dimi kundjata dime. Keli Papa lakantumi, kakambisha olembe uku ayumuta ndu wuhu wayumoteketa.” (Joa. 12:49) Tolembete dia Ɔna akalongola wetshelo wa shikaa wendana la kɛnɛ kakandahombe mbetsha. La ntondo ka nde ndja la nkɛtɛ, aha la tâmu, Yeso aketsha wenya efula dia mpokamɛ wetshelo waki She. Shi nde mɛtɛ akalongola wetshelo wa dimɛna efula?

11. Polo lo yɛdikɔ yakɔna yakakɛnɛmɔla Yeso dionga diaki She otsha le anto?

¹¹ Oma ko etena kakandatongama, Ɔna aki la diɔtɔnganelo dia ma ma lam’asande la She. La ntondo ka nde ndjotɔ oko onto, Yeso akashihodia dionga diaki la Jehowa otsha le anto lo sɛdingola woho wakandâsalɛka akambo. Ɔna akakɛnɛmɔla woho wa ngandji ka ngasɔ otsha le anto, woho ɔnɛ wele, oko lomba lɔsama oko onto, nde akakoke mbuta ate: “Ndu lakayala la ongenongeno ami kame l’antu.”​—Tuk. 8:22, 31.

12, 13. a) Ngande wakeke Yeso lo menda woho wakasalɛka She ase Isariyɛlɛ akambo? b) Ngande wakakambe Yeso la wetshelo wakandalongola?

¹² Wetshelo wakalongola Ɔna aki ndo wa menda woho wakakandolaka She ekakatanu wa wolo. Ɛnyɛlɔ, tɔsɛdingole kɛnɛ kakasalɛ Jehowa ase Isariyɛlɛ w’atɔmbɔki. Nehemiya 9:28 mbutaka ɔnɛ: “Lam’akawakundja mumuya, vo wakatshi ntu [kɔlɔ] la ntundu kaye. Okone we akâtshiki lu anya w’atunyi awo dia vo mbaulela. Ku lam’akawakalulaka le ye, ndu lam’akawakulelelaka, we akukaka uma l’ulungu. Uma lu ketshi kaye ka mamba, mbakayâtshungulaka tena efula.” Lo kamba kâmɛ la Jehowa ndo lo sɛdingola kɛnɛ kakandasalaka, Yeso akakɛnɛmɔla kɛtshi ka woho akɔ wâmɛ otsha le anto wa lo ɛtshi kande ka nkɛtɛ.​—Joa. 5:19.

¹³ Yeso akakambe la wetshelo wakandalongola lo salɛ ambeki ande akambo la kɛtshi tshɛ. L’otsho wa la ntondo ka nyɔi kande, apɔstɔlɔ ande tshɛ wakandokaka ngandji k’efula “wakûtshiki, wakalawo.” (Mat. 26:56; Joa. 13:1) Ɔpɔstɔlɔ Petero akakome lo manguna Kristo mbala shato y’etondo! Koko, Yeso akatshikɛ apɔstɔlɔ ande diaaso dia vɔ kalola oya le nde. Nde akatɛ Petero ate: ‘Dimi lakalɔmbɛ efula lo dikambo diayɛ diaha mbetawɔ kayɛ nkɔmɔ; ɔnkɔnɛ, lam’ayoyokalola, kokeketsha ananyɔ.’ (Luka 22:32) Isariyɛlɛ wa lo nyuma wakatatɛ dimɛna dimɛna la ‘apɔstɔlɔ wa kɔlamelo,’ ndo ave w’ehikelo ka ehele ka Jerusalɛma y’oyoyo kaki la nkombo 12 y’apɔstɔlɔ wa kɔlamelo waki Ɔn’ɔkɔkɔ Yeso Kristo. Ɛlɔ kɛnɛ, akitami w’Akristo kâmɛ la “ekoko ekina” w’asekawɔ wakayakimɔ, wekɔ lo tahame lo olimu awɔ w’esambishelo ka Diolelo lo ɛlɔmbwɛlɔ kaki Nzambi ndo k’Ɔnande la ngandji.​—Ef. 2:20; Joa. 10:16; Eny. 21:14.

Woho waketshaka Yeso

14, 15. Lo toho takɔna takatshikitana wetshelo waki Yeso la wɔnɛ waki afundji la Afarisɛ?

¹⁴ Ngande wakakambe Yeso la wetshelo wakandalongola etena kakandetshaka ambeki ande? Etena kɛdikaso yoho yaketshaka Yeso ndo yaketshaka ewandji w’ɛtɛmwɛlɔ w’ase Juda, sho mɛnaka hwe dia yoho yaketshaka Yeso akaleke yoho yakawetshaka la fwa. Afundji ndo Afarisɛ ‘wakalanya ɔtɛkɛta wa Nzambi l’ɔtɛ wa mbekelo yawɔ.’ Lo wedi okina, kɛnɛ kakataka Yeso kondja oma le nde, koko nde aketshaka mbala tshɛ ɔtɛkɛta kana losango laki Nzambi. (Mat. 15:6; Joa. 14:10) Sho lawɔ pombaka sala ngasɔ.

¹⁵ Ekɔ dui dikina diakatshikitanya Yeso la ewandji w’ɛtɛmwɛlɔ tshɛ lo tshɛ. Lo dikambo di’afundji la Afarisɛ, nde akate ate: “Nyutshaki ndu nyetawoki akambu tshe wanyutelawo. Keli tanyutshaki uku atuwutshaka, ne dia vo watusambishaka, keli hawutshi.” (Mat. 23:3) Yeso akakambaka la kɛnɛ kakandetshaka. Nyɛsɔ tɔsɛdingole ɛnyɛlɔ kɛmɔtshi kɛnya mɛtɛ ka dikambo sɔ.

16. Lande na kakokaso mbuta dia Yeso akasɛnɛ lo yoho yɔtɔnɛ la ɛtɛkɛta ande wele lo Mateu 6:19-21?

¹⁶ Yeso akakeketsha ambeki ande ate: “Nyuyaumbeli diango l’ulungu.” (Adia Mateu 6:19-21.) Onde Yeso akasɛnɛ lo yoho yɔtɔnɛ la dako sɔ? Eelo, nɛ dia nde akakoke mbuta lo dikambo diande ndamɛ la mɛtɛ tshɛ ate: “Mbulu yeko la afuku, fudu ya l’ulungu yeko la kefu, keli On’a untu kema la lama mbetamia ote andi.” (Luka 9:58) Yeso aki la lɔsɛnɔ l’ɔsɛlɛngɛ. Nde akayasha ntondo dia sambisha lokumu l’ɔlɔlɔ la Diolelo ndo nde akɛnya mɛtɛ kɛnɛ kalembetshiya ndjatshungola oma lo ekiyanu waya oma lo ndjaombɛ diangɔ dia nɛmɔ la nkɛtɛ. Yeso akɛnya dia ekɔ dimɛna efula ndjaombɛ diangɔ dia nɛmɔ l’olongo, “lene aheyi tumumbu kana matadi dilanya, lene aheyi evi mbula mvudu la diva.” Onde sho ndjelaka dako diaki Yeso diata dia ndjaombɛ diangɔ dia nɛmɔ l’olongo?

Waonga wakatshutshuyaka anto dia mboka Yeso ngandji

17. Waonga akɔna waketɛ Yeso osambisha wa diambo?

¹⁷ Waonga akɔna waketɛ Yeso osambisha wa diambo? Ɔmɔtshi l’atei wa waonga asɔ ko woho wakandɔsaka anto wakandakimanyiyaka. L’atei wa waonga w’amɛna waki Jehowa wakakɛnɛmɔla Yeso mbaki ndo okitshakitsha, ngandji ndo kɛtshi. Tende woho wakakotola waonga asɔ anto efula oya le Yeso.

18. Lande na kakokaso mbuta ɔnɛ Yeso aki l’okitshakitsha?

¹⁸ L’ɔtɛ wakandetawɔ dia ndja la nkɛtɛ, Yeso “akayanya uma lu lutumbu, akayala uku ukambi, akuto lu efanelu k’antu.” (Fil. 2:7) Ɔsɔ aki tshelo y’okitshakitsha. Ndo nto, Yeso kɔmɔnyɔlaka anto. Nde kombutaka ɔnɛ: ‘Dimi oma l’olongo mboyemi, nyu pombaka mpokamɛmi.’ Otshikitanyi la anto wakayataka ɔnɛ waa mɛsiya mbakiwɔ, Yeso kotahomaka mbeka lo toshinga lo kɛnɛ kendana la ɔkɛndɛ ande wa Mɛsiya wa mɛtɛ. Mbala mɔtshi, nde akatɛ anto diaha vɔ mbutɛ anto akina onto akɔna âkinde kana kɛnɛ kakandasale. (Mat. 12:15-21) Yeso akakombolaka di’anto mbɔsa yɛdikɔ yawɔ vɔamɛ ya mboyela lo ndjela kɛnɛ kakawɛnyi la washo awɔ vɔamɛ. Ambeki ande wakakeketshama mɛtɛ lo woho waki Nkumɛwɔ konongamɛka dia vɔ monga oko waa andjelo wa kokele waki la nde l’olongo!

19, 20. Ngande wakatshutshuya ngandji ndo kɛtshi Yeso dia nde kimanyiya anto?

¹⁹ Yeso Kristo akakɛnɛmɔla nto ngandji, mbuta ate dionga dimɔtshi dioleki woke lo waonga waki She lele l’olongo. (1 Joa. 4:8) Ngandji mbakatshutshuyaka Yeso dia mbetsha ampokami ande. Ɛnyɛlɔ, tende woho wakandayaoke lo dikambo di’owandji ɔmɔtshi wa dikɛnda. (Adia Mako 10:17-22.) Yeso “akawuki ngandji” ndo akakombola dia mbokimanyiya, koko owandji wa dikɛnda ɔsɔ kokombolaka tshika lomombo l’efula laki lande dia koma ombeki waki Kristo.

²⁰ L’atei wa waonga waki Yeso wakakotolaka anto oya le nde mbaki ndo kɛtshi kande. Lo ɛnyɛlɔ k’anto tshɛ wele kema kokele, wanɛ waketawɔka wetshelo ande wakadiɛnɛka la ekakatanu. Lam’ele nde akeyaka dui sɔ, Yeso akawaetshaka la kɛtshi. Ɛnyɛlɔ: Lo diaaso dimɔtshi, Yeso nde la ambeki ande waki l’awui efula wa sala woho ɔnɛ wele wakahombe ndo etena ka ndɛ yangɔ. Ko ngande wakayaoke Yeso etena kakandɛnyi olui w’anto wotshumanyi? “Ndi akawauki ketshi, ne dia vo waki uku ekoko waha la ulami; akatatela mbaetsha akambu efula.” (Mako 6:34, sho mbɛnganyisha alɛta ango.) Yeso akɛnyi pâ kaki la anto wa lo ɛtshi kande ka nkɛtɛ ndo akakambe la wolo ande dia mbaetsha ndo sala ahindo dikambo dia wahɔ awɔ. Anto amɔtshi wakakotwama la waonga ande w’ɛlɔlɔ, wakakeketshama oma le ɛtɛkɛta ande ndo wakakome ambeki ande.

21. Kakɔna kayotɔsɛdingola lo sawo diayela?

²¹ Ekɔ awui efula wakokaso mbeka lo kɛnɛ kendana la olimu wakasale Yeso la nkɛtɛ oko wayodiɛnya sawo diayela. Lo toho takɔna nto takokaso mbokoya Yeso Kristo, Misiɔnɛrɛ woleki woke?

Ngande wayoyokadimola?

• Wetshelo akɔna wakalongola Yeso la ntondo ka nde ndja la nkɛtɛ?

• Ngande wakaleke yoho ya mbetsha yaki Yeso yoho yaketshaka afundji la Afarisɛ?

• Waonga akɔna wakakotola anto oya le Yeso?

[Osato wa lo lɛkɛ 15]

Ngande waketshaka Yeso elui w’anto?