Akristo wekɔ l’ohomba w’asekawɔ Akristo
“Beke dia dimba otoi mbesu, shu tshe untu l’untu.”—EFESO 4:25.
1. Kakɔna kata ansiklopedi ɔmɔtshi dikambo dia demba di’onto?
DEMBA di’onto diekɔ ɛngɔ kɛmɔtshi ka diambo efula ka l’etongelo! Dibuku The World Book Encyclopedia mbutaka ɔnɛ: “Mbala efula anto mbɔsaka demba di’onto oko mashinyi ɔmɔtshi woleki diambo tshɛ l’atei wa waa mashinyi wambosala anto. Lo mɛtɛ, demba di’onto kema mashinyi. Koko diɔ kokaka mbɛdikama la mashinyi lo toho efula. L’ɛnyɛlɔ ka mashinyi, demba di’onto diekɔ la tenyi efula. Etenyi tshɛ ka demba kekɔ lo kamba elimu ɛmɔtshi wa lânde, oko wele etenyi tshɛ ka mashinyi. Koko tenyi diakɔ tshɛ kambaka kamɛ ndo kimanyiyaka dia demba kana mashinyi kɛndakɛnda dimɛna.”
2. Lo yoho yakɔna yafɔna demba di’onto la etshumanelo k’Akristo?
2 Eelo, demba di’onto diekɔ la tenyi efula, ndo etenyi l’etenyi kambaka olimu wahombama. Ndoko oshisha, omunyi kana etenyi kekina ka demba kele bu ohomba. Woho akɔ wamɛ mbele os’etshumanelo tshɛ k’Akristo mbeyaka sala dui dimɔtshi dia tɔ monga la lonyuma la dimɛna ndo di’awui kɛndakɛnda dimɛna. (1 Koreto 12:14-26) Lam’ele ndoko ose etshumanelo lahomba ndjaɔsa oko nde mboleki anto akina, woho akɔ wamɛ mbele ndoko onto lahomba ndjaɛna oko nde bu l’ohomba l’etshumanelo.—Romo 12:3.
3. Ngande wɛnya Efeso 4:25 dia ndoko Okristo wele bu l’ohomba w’asekande Akristo akina na?
3 Oko wakimanyiyana tenyi dia demba mbele Akristo tshɛ wekɔ l’ohomba w’asekawɔ Akristo. Ɔpɔstɔlɔ Paulo akatɛ asekande ambetawudi w’akitami w’esɔ ate: “Nyunya kashi, nyutaneli akambu wa mete, untu la unyandi, ne dia beke dia dimba otoi mbesu, shu tshe untu l’untu.” (Efeso 4:25) Lam’ele vɔ wekɔ ‘demba ɔtɔi,’ wanɛ wakenga Isariyɛlɛ wa lo nyuma, mbut’ate “dimba dia Kristu” wekɔ la diɔtɔnganelo dia dimɛna lam’asawɔ ndo vɔ kambaka lonya lo lonya. Eelo, onto tshɛ l’atei awɔ ekɔ l’ohomba w’asekande akina. (Efeso 4:11-13) L’ɔngɛnɔngɛnɔ tshɛ, Akristo wele l’elongamelo ka nsɛna la nkɛtɛ wambosangana kamɛ la wɔ ndo wekɔ lo kamba la wɔ lonya lo lonya.
4. Lo toho takɔna takoka kimanyiyama eyoyo?
4 Ɔnɔnyi tshɛ, nunu di’anto wele l’elongamelo ka ndjɔsɛna lo paradiso ka lanɛ la nkɛtɛ wekɔ lo batizama. L’ɔngɛnɔngɛnɔ tshɛ, as’etshumanelo akina mbakimanyiyaka dia vɔ koma ‘anto wambotshunda.’ (Heberu 6:1-3) Vɔ mbashaka ekimanyielo kɛsɔ oko lo mbasha ekadimwelo wa wembola awɔ wendana l’awui wa l’Afundelo kana mbakimanyiya l’olimu w’esambishelo. Sho koka kimanyiya eyoyo lo mbasha ɛnyɛlɔ ka dimɛna lo kɛnɛ kendana la woshelo wa kɔmatɛrɛ mbala la mbala lo nsanganya y’Akristo. Lo tena dia pâ, sho kokaka mbakeketsha kana mbâsamba. (1 Tesalonika 5:14, 15) Sho pombaka nyangaka toho takokaso kimanyiya anto akina dia vɔ ‘tetemala kɛndakɛnda l’akambo wa mɛtɛ.’ (3 Joani 4) Oyadi dikɛnda kana opalanga mbeso ndo oyadi teke esadi wa tatɛ kɛndakɛnda l’akambo wa mɛtɛ ko kana taya ɛnɔnyi efula wambotɔkɛndakɛnda l’akambo wa mɛtɛ, sho kokaka kimanyiya asekaso ambetawudi dia vɔ pama lo nyuma, ndo vɔ wekɔ mɛtɛ l’ohomba w’ekimanyielo kaso.
Vɔ wakasha ekimanyielo kaki ohomba
5. Ngande wakakimanyiya Akula la Piriskila Paulo?
5 Akristo wambotshukana wekɔ l’atei wa wanɛ wakondja ɔngɛnɔngɛnɔ lo kimanyiya asekawɔ ambetawudi. Ɛnyɛlɔ, Akula nde la wadɛnde Piriskila (Piriska), wakakimanyiya Paulo. Vɔ wakôhangiya lo luudu lawɔ, wakakambaka kamɛ la nde olimu wa salaka mvudu y’apɛma, ndo wakokimanyiya dia nde keketsha etshumanelo k’oyoyo ka la Kɔrɛtɔ. (Etsha 18:1-4) Lo yoho mɔtshi yele Bible hakɔndɔla, vɔ wakadje nsɛnɔ yawɔ lo wâle dia kokɛ Paulo. Vɔ wakadjasɛka la Rɔma etena kakatɛ Paulo Akristo wa lɛkɔ ate: “Nyumbishiya Piriska la Akula, anyami ekambi lu Kristu Jesu, moyo. Vo wakasundja nyumu yawo dia nshimbela lumu lami. Okone aha dime utu, keli dimi la ekelizia tshe w’asi wedja tambuwauka lusaka.” (Romo 16:3, 4) L’ɛnyɛlɔ kaki Akula la Piriskila, Akristo amɔtshi wa nshi nyɛ wekɔ lo keketsha tshumanelo ndo wekɔ lo kimanyiya asekawɔ ambetawudi lo toho totshikitanyi, mbala mɔtshi lo mbidja nsɛnɔ yawɔ hita lo wâle l’oyango waha ekambi ekina waki Nzambi pɛnyahɛnyama ndo kânga ndjakema oma le wanɛ wasoya.
6. Ekimanyielo kakɔna kakalongola Apolo na?
6 Akula la Piriskila wakakimanyiya nto Apolo, Okristo wakɛ̂saka l’onyɔ, ɔnɛ laketshaka ase Ɛfɛsɔ akambo wendana la Yeso Kristo. L’etena kɛsɔ, Apolo akeyaka paka awui wendana la batismu kakabatizaka Joani oko djembetelo ya ndjatshumoya lo pɛkato yendana la sheke y’Ɛlɛmbɛ. Lam’akawɛnyi dia Apolo aki l’ohomba w’ekimanyielo, Akula la Piriskila “wakulimbitshiya mbuka ka [Nzambi] ololo.” Ondo vɔ wakolembetshiya dimɛna dia batismu k’Okristo akalɔmbaka di’onto ndindjama la tshondo l’ashi ndo nongola nyuma k’ekila. Apolo akakambe la kɛnɛ kakawawetsha. L’ɔkɔngɔ diko, lam’akinde l’Akaya “ndi akaleki nkimanyia wane waketawo uma lu ngandji ka mamba, ne dia ndi akakaluya asi Juda aui la wulu lu seke, awaenya lu afundelu ati: Jesu keli Kristu.” (Etsha 18:24-28) Kɔmatɛrɛ yasha asekaso ambetawudi mbeyaka mbala mɔtshi tokimanyiya dia sho nyomoleka pamia eokelo kaso k’Ɔtɛkɛta wa Nzambi. Ndo lo dikambo sɔ nto, tekɔ l’ohomba w’asekaso Akristo akina.
Woshelo w’ekimanyielo ka l’emunyi
7. Ngande wakasale ase Filipi lam’akawoke di’Akristo w’asekawɔ waki l’ohomba w’ekimanyielo ka l’emunyi?
7 Anto wa l’etshumanelo k’Akristo ka la Filipi wakalangaka Paulo heyama ndo wakotomɛ diangɔ dia l’emunyi diaki lande ohomba lam’akinde la Tɛsalɔnika. (Filipi 4:15, 16) Lam’aki anangɛso wa la Jerusalɛma l’ohomba wa diangɔ dia l’emunyi, ase Filipi wakakimɔ la ngandji tshɛ weshasha woleki ndo kɛnɛ kaki l’anto asɔ ohomba. Paulo aki la lowando heyama lo dionga di’ɔlɔlɔ diaki l’anango ndo l’akadiyɛnde wa la Filipi, diakɔ diakandâshile oko ɛnyɛlɔ kahomba ambetawudi akina ndjela.—2 Koreto 8:1-6.
8. Naa dionga diaki l’Epaforodito?
8 Lam’aki Paulo lo lokanu, ase Filipi kombotomɛ tsho weshasha wa l’emunyi, koko vɔ wakatome ndo Epaforodito lo lokombo lawɔ. Paulo akate ate: “[Epaforodito] akayala lasuki la nyoi dia ulimu wa Kristu. Ndi akayakimo las’eku la nyoi dia nkutsha kene kakahumbama l’ulimu anyu le mi.” (Filipi 2:25-30; 4:18) Hawototɛ dia kana Epaforodito aki ekumanyi kana okambi w’olimu. Koko, nde aki Okristo waki la yimba ya ndjahombia ndo ya kimanyiyana, ndo Paulo aki mɛtɛ l’ohomba ande. Onde anto amɔtshi wele oko Epaforodito wekɔ l’etshumanelo kanyu?
Vɔ waki ‘ekimanyielo kakeketsha’
9. Naa ɛnyɛlɔ kakatotshikɛ Aristarako?
9 Anangɛso l’akadiyɛso woludi la ngandji oko Akula, Piriskila, ndo Epaforodito mbɔsamaka la nɛmɔ di’efula l’oseka etshumanelo tshɛ. Asekaso atɛmɔdi amɔtshi mbeyaka fɔna efula l’Okristo wa lo ntambe ka ntondo wakawelɛka Aristarako. Nde la Akristo akina waki ‘ekimanyielo kakeketsha,’ nɛ dia ondo vɔ waki kiɔkɔ y’esambelo kana y’ekimanyielo l’akambo amɔtshi w’ohomba. (Kolosai 4:10, 11) Lo kimanyiya Paulo, Aristarako akɛnya dia nde ekɔ ɔngɛnyi ande wa mɛtɛ lo tena diakinde lo dihombo. Nde aki woho w’onto watawɔ lo Tukedi 17:17 ɔnɛ: “Ongenyi atukaka untu ngandji tena tshe. Ndu lu nshi ya pa ndi atuyalaka uku onangu.” Shi sho tshɛ pombaka sala la wolo dia monga ‘ekimanyielo kakeketsha’ le asekaso Akristo? Sho pombaka kimanyiya djekoleko wanɛ wasowa kana wele la pâ.
10. Ɛnyɛlɔ kakɔna kakasha Petero dikumanyi di’Akristo?
10 Lo yoho ya lânde, dikumanyi di’Akristo mbahomba monga ekimanyielo kakeketsha le anangɛwɔ l’akadiyɛwɔ wa lo nyuma. Kristo akatɛ ɔpɔstɔlɔ Petero ate: ‘kokeketsha ananyɔ.’ (Luka 22:32) Petero akakoke sala dikambo sɔ nɛ dia nde akɛnya waonga wa wolo oko dive, djekoleko l’ɔkɔngɔ w’eolwelo ka Yeso. Dikumanyi le, lo weho akɔ tshɛ nyosale la wolo dia sala dikambo sɔ la lolango ndo la kɛtshi le asekanyu ambetawudi nɛ dia vɔ wekɔ l’ohomba anyu.—Etsha 20:28-30; 1 Petero 5:2, 3.
11. Ngande wakokaso kondja wahɔ lo sɛdingola woho wa yimba yaki la Timɔtɛ?
11 Timɔtɛ k’ɔngɛnyi waki Paulo aki ekumanyi kakayakiyanyaka efula dikambo di’Akristo akina. Kânga mbakinde la tohemɔ hemɔ, Timɔtɛ aki la mbetawɔ ka nge ndo ‘akakambe oko ɔhɔmbɔ nde la Paulo dia tɔla lokumu l’ɔlɔlɔ otsha la ntondo.’ Diakɔ diakakoke ɔpɔstɔlɔ ɔsɔ mbutɛ ase Filipi ate: “Dimi kema la untu ukina l’ololo uku ndi, layunyukanela mete.” (Filipi 2:20, 22; 1 Timote 5:23; 2 Timote 1:5) Sho kokaka monga ɔtshɔkɔ le asekaso atɛmɔdi wa Jehowa lo mɛnya woho wa yimba yakɛnya Timɔtɛ. Mɛtɛ sho pombaka shamɛ mbikikɛ wɛɔdu w’alemba aso ndo ehemba wotshikitanyi, koko sho lawɔ kokaka ndo pombaka monga la mbetawɔ ka nge ndo ndjakiyanya la ngandji dikambo di’anangɛso l’akadiyɛso. Sho pombaka mbohɔka lushi tshɛ dia vɔ wekɔ l’ohomba aso.
Wamato wakakimanyiya anto akina
12. Wetshelo akɔna wakokaso kondja oma l’ɛnyɛlɔ kaki Dɔrɔka na?
12 Dɔrɔka aki l’atei wa wamato wakokaka Nzambi wɔma wakakimanyiya anto akina. Lam’akandavu, ambeki wakete Petero ndo wakadɛ la nde lo luudu la ladiko. Lekɔ “wadi waki edu tshe wakemala la suki la ndi, walela; wakawenya akoti la ahondo wakatshi Doroka lam’akindi lawo.” Dɔrɔka akolwama ndo aha la tâmu, nde akatetemala ‘ndjasha l’elimu w’ɔlɔlɔ ndo la mbisha anto weshasha wa kɛtshi.’ Ɛlɔ kɛnɛ, l’etshumanelo k’Akristo, tekɔ la wamato wele oko Dɔrɔka wakoka tɛlɛ anto wele lo dihombo ahɔndɔ kana mbasalɛ akambo akina woludi la ngandji. Koko, elimu awɔ w’ɔlɔlɔ pombaka ntondo mendana l’ɔtɔlɛlɔ wa wahɔ wa Diolelo otsha la ntondo ndo l’okambelo w’olimu wa mbetɛ anto ambeki.—Etsha 9:36-42; Mateu 6:33; 28:19, 20.
13. Ngande wakɛnya Ludiya dia nde ndjakiyanyaka dikambo di’asekande Akristo?
13 Womoto ɔmɔtshi lakokaka Nzambi wɔma lakawetaka Ludiya akakimanyiyaka anto akina. Nde akotɔ la Tuyatura, koko nde akadjasɛka la Filipi etena kakasambishaka Paulo lo wodja ɔsɔ l’ɔnɔnyi 50 T.D. Ondo Ludiya aki ombetawudi w’ose wodja wakayɔtɔka l’ɔtɛmwɛlɔ w’ase Juda, koko ondo ase Juda waki yema tshitshɛ la Filipi ndo ndoko shinangɔnga kaki lɛkɔ. Nde la wamato akina wakayashaka le Nzambi wakatshumana l’omamu w’ɔkɛdi ɔmɔtshi lam’akâsambishaka Paulo lokumu l’ɔlɔlɔ. Ɔkɔndɔ mbutaka dia: “[Jehowa akadihola otema waki Ludiya] dia ndi mpukama akambu wakati Paulu. Lam’akandashili batizama, ndi la wa lu luudu landi, ndi akatosengasenga ati: Naka nyu nkanakami nyati: Dimi leko la kolamelu le [Jehowa], nyuyi lakami, nyuyuhangi. Ku ndi akatetawuya.” (Etsha 16:12-15) Lam’ele Ludiya akalangaka salɛ anto akina akambo w’ɔlɔlɔ, nde akatondoya dia mbetawoya Paulo ndo asekande dia vɔ panga lakande. Sho ngɛnangɛnaka efula lam’atolongola Akristo wa nshi nyɛ wele l’etema w’ɔlɔlɔ ndo la ngandji lawakawɔ!—Romo 12:13; 1 Petero 4:9.
Akɛnda lee, tekɔ l’ohomba anyu
14. Dionga dia ngande diaki la Yeso otsha le ana w’akɛnda na?
14 Yeso Kristo, Ɔna Nzambi laki l’otema w’ɔlɔlɔ ndo la ngandji mbaki onto la ntondo la l’etshumanelo k’Akristo. Anto wakangɛnangɛnaka monga suke la nde nɛ dia nde aki la ngandji ndo la kɛtshi. Mbala kɛmɔtshi, lam’akatatɛ anto amɔtshi mbela Yeso anawɔ, ambeki ande wakayange dia mbashimba. Koko Yeso akate ate: “Nyete tokendakenda wayi le mi, tanyâsikeki, ne dia diulelu dia [Nzambi] dieli dia antu uku vo. Mete kanyutelami nti: untu tshe lahalungula diulelu dia [Nzambi] uku kiendakenda, mete ndi hoto loko.” (Mako 10:13-15) Dia sho kondja ɛtshɔkɔ wa Diolelo, sho pombaka monga la ndjakitshakitsha ndo mbetawɔ mbetshama oko ana w’akɛnda. Yeso akɛnya ngandji kakandokaka ana w’akɛnda lo mbaɛmba l’anya ande ndo lo mbatshɔkɔla. (Mako 10:16) Ko kayotota dikambo dianyu, nyu akɛnda wa nshi nyɛ na? Nyeye dia nyu nangemaka ndo etshumanelo kekɔ l’ohomba anyu.
15. Akambo akɔna wendana la lɔsɛnɔ la Yeso wɔkɔndwami lo Luka 2:40-52, ndo ɛnyɛlɔ kakɔna kakandatshikɛ akɛnda?
15 Kânga lam’akinde eke dikɛnda, Yeso akɛnya woho wakandalangaka Nzambi kamɛ ndo Afundelo. Lam’akinde l’ɛnɔnyi 12, nde l’ambutshi ande, mbut’ate Yɔsɛfu la Mariya wakande lɔkɛndɔ oma la Nazarɛtɛ, otsha la Jerusalɛma dia tɔlɛ fɛtɛ ka Pasaka. Lam’akawayakalolaka, ambutshi waki Yeso wakɛnyi dia Yeso bu l’ɔnɔngɔ w’anto wakayakalolaka. L’ɔkɔngɔ diko, vɔ wakatôtanaka odjashi l’etei ka tɛmpɛlɔ, ahokamɛ ndo ôka embetsha w’ase Juda wembola. Lo mamba woho wele Yɔsɛfu la Mariya kombeyaka dihole diahombande tanema, nde akawambola ate: “Nyu hanyeyi nyati: Dieli la mi dia ndjala lu luudu la Papa?” Nde akakalola l’ambutshi ande otsha la ngelo kawɔ, akatetemala la mbakitanyiya ndo akatetemala la pama lo lomba ndo lo demba. (Luka 2:40-52) Ɔsɔ ekɔ mɛtɛ ɛnyɛlɔ ka dimɛna kakatshikɛ Yeso anaso w’akɛnda! Eelo, vɔ pombaka nɛnya ambutshi awɔ, ndo ngɛnangɛna mbeka akambo wa lo nyuma.—Euhwelu k’Elembe 5:16; Efeso 6:1-3.
16. (a) Ngande wakahangɔhangɔka akɛnda amɔtshi lam’akasambishaka Yeso lo tɛmpɛlɔ? (b) Naa diɛsɛ diele l’akɛnda w’Akristo ɛlɔ kɛnɛ na?
16 Oko wenyu akɛnda, nyu kokaka sambisha akambo wendana la Jehowa la kalasa kana lo luudu la luudu kamɛ l’ambutshi anyu. (Isaya 43:10-12; Etsha 20:20, 21) Etena kakasambishaka Yeso ndo kakandakɔnɔlaka anto lo tɛmpɛlɔ yema tshitshɛ la ntondo ka nyɔi kande, ana amɔtshi wakahangɔhangɔka vate: “Hosana le Kanula ya Davidi!” Ewandji w’ɛtɛmwɛlɔ la afundji wakoke nkɛlɛ lo dikambo sɔ, ko wakawotɛ vate: “We mbukaka okone wata akenda aso?” Yeso akakadimola ate “Elu; nyu nyatali nyati: “We akaluwanya diandu l’enyo wa ana w’ashashi la waloma’?” (Mateu 21:15-17) L’ɛnyɛlɔ k’ana asɔ, nyu akɛnda wa l’etshumanelo nyekɔ la diɛsɛ dia mamba dia ntombola Nzambi ndo Ɔnande. Sho nangaka ndo kombolaka dia nyu kamba kamɛ la so oko apandjudi wa Diolelo.
Etena katomba ekakatanu
17, 18. (a) Lande na kakalɔngɔsɔla Paulo dia tshumanya weshasha dikambo di’Akristo waki la Judeya? (b) Shɛngiya yakɔna yaki la weshasha wakakimɔma la lolango dikambo di’ase Judeya le ase Juda kana le ase Wedja?
17 Oyadi akambo wele laso, ngandji totshutshuyaka dia kimanyiya asekaso Akristo wele lo dihombo. (Joani 13:34, 35; Jakoba 2:14-17) Ngandji kaki la Paulo otsha le anango l’akadiyɛnde wa la Judeya mbakotshutshuya dia nde nɔngɔsɔla woho wa tshumanya weshasha wakakimɔ tshumanelo dia l’Akaya, Ngalatiya, Makedɔniya ndo dia lo distrikɛ di’Asiya dikambo diawɔ. Ondo, ɛhɛnyɔhɛnyɔ, ata, ndo ndjala ka kasha kakakomɛ ambeki la Jerusalɛma mbakete Paulo ate ‘asui, pâ ndo ɔhɔtwɛlɔ wa diangɔ.’ (Heberu 10:32-34; Etsha 11:27–12:1) Ɔnkɔnɛ, nde mbaki l’ɔkɛndɛ wa nama falanga yakombamaka lo dikambo di’Akristo wa la Judeya waki lo dihombo.—1 Koreto 16:1-3; 2 Koreto 8:1-4, 13-15; 9:1, 2, 7.
18 Weshasha wa la lolango wakakimɔmaka dikambo di’ekilami waki la Judeya akɛnyaka dimama dia ngandji k’anto l’ɔnango diaki l’asa ase Juda ndo ambetawudi w’ase Wedja wakatɛmɔlaka Jehowa. Weshasha ɛsɔ akakimanyiya Akristo w’ase Wedja dia vɔ mɛnya asekawɔ atɛmɔdi w’ase Judeya lowando lawɔ l’ɔtɛ w’angadimu wa lo nyuma wakawalongola oma le wɔ. Omalɔkɔ, vɔ wakashanaka weshasha wa l’emunyi ndo wa lo nyuma. (Romo 15:26, 27) Weshasha wakimɔma ɛlɔ kɛnɛ dikambo di’ambetawudi w’asekaso wele lo dihombo wekɔ weshasha wakimɔma la lolango ndo oma lo ngandji. (Mako 12:28-31) Tekɔ l’ohomba w’Akristo w’asekaso ndo lo dikambo sɔ nto woho wa wɛdimo monga di’aha ‘ɔnɛ lele la yema tshitshɛ pomba.’—2 Koreto 8:15.
19, 20. Sha ɛnyɛlɔ kɛnya woho wakimanyiyana ekambi waki Jehowa etena katomba mpokoso.
19 Lo mbeya dia ekɔ ohomba sho kimanyiyana lam’asaso oko weso Akristo, sho mongaka suke dia kimanyiya anangɛso l’akadiyɛso wa lo mbetawɔ. Ɛnyɛlɔ, tende kɛnɛ kakete lam’akasalema didimu dia nkɛtɛ ndo wakadinde ɛtshi kɛmɔtshi ka El Salvador la dola di’ashi l’etatelo k’ɔnɔnyi 2001. Alapɔlɔ ɔmɔtshi mbutaka ɔnɛ: “Anangɛso w’oma l’ahole tshɛ wa El Salvador waketawɔ dia mbisha lonya dia kimanyiya anangɛwɔ. Elui w’anangɛso w’oma la Guatemala, oma l’États-Unis, ndo oma lo Canada wakaye dia ndjosha lonya. . . . Ndekana mvudu 500 ndo Mbalasa ya Diolelo 3 y’amɛna efula yakakama esadi wa mamba. Esambishelo ka mamba kakashama oma l’olimu wa wolo wakakambe anangɛsɔ waki la yimba ya ndjahombia dia kimanyiya anto ndo lo woho wakawakambaka lonya lo lonya.”
20 Alapɔlɔ ɔmɔtshi w’oma l’Afrique du Sud mbutaka ɔnɛ: “Dola dia mamba diakananda etenyi ka woke ka wodja wa Mozambique. Mpokoso kɛsɔ kakakomɛ nto anangɛso w’Akristo efula. Filialɛ ka la Mozambique kakɔshi yɛdikɔ dia kotsha ehomba awɔ efula. Koko Filialɛ ka la Mozambique akatɔlɔmbɛ dia sho tomɛ anangɛso waki lo dihombo ahɔndɔ. Ɔnkɔnɛ, takatshumanya ahɔndɔ ko tomɛ anangɛsɔ asɔ kɔtɛnɛrɛ ka mɛtɛlɛ 12 kaki l’ahɔndɔ mɛkɛ.” Eelo, lo toho tɔsɔ nto tekɔ nto l’ohomba w’Akristo w’asekaso.
21. Kakɔna kayotɔsɛdingola lo sawo diayela?
21 Oko wakataditɛkɛtshi ntondo, tenyi tshɛ dia demba di’onto diekɔ ohomba. Ɔsɔku mbediɔ ndo lo kɛnɛ kendana l’etshumanelo k’Akristo. Ndoko ose etshumanelo laha bu l’ohomba w’osekande Okristo. Vɔ pombaka tetemala la kamba kamɛ. Sawo diayela diayɛnya akambo amɔtshi wakimanyiya dia vɔ sala dikambo sɔ.
Ngande wayoyokadimola?
• Ngande wafɔna demba di’onto l’etshumanelo k’Akristo?
• Kakɔna kakasale Akristo wa lo ntambe ka ntondo lam’akayala asekawɔ ambetawudi l’ohomba w’ekimanyielo?
• Naa bɛnyɛlɔ dimɔtshi di’oma l’Afundelo diɛnya di’Akristo pombaka ndo kimanyiyanaka lam’asawɔ?
[Osato wa lo lɛkɛ 10]
Akula la Piriskila wakakimanyiyaka anto akina
[Esato wa lo lɛkɛ 12]
Ekambi wa Jehowa kimanyiyanaka lam’asawɔ ndo kimanyiyaka anto akina etena katomba mpokoso