“Ndi ayusukana le nyu”
“[Nzambi] kema etali uma le untu la untu.”—ETSHA 17:27.
1, 2. (a) Lam’endaso olongo woludi la tɔɔtɔ, wombola akɔna wakokaso ndjambola lo dikambo di’Otungi? (b) Ngande watoshikikɛ Bible di’ɔnɛ anto wekɔ la nɛmɔ lo washo wa Jehowa?
ONDE wɛ atawalɛka l’olongo l’otsho wa tshɛnɛkɔ ko mamba heyama lo mɛna lokema la tɔɔtɔ tele lɔkɔ? Efula ka tɔɔtɔ ndo woke woke w’andja ekɔ dikambo diahomba tolodja la wɔma wosanganyi la dilɛmiɛlɔ. L’andja ɔnɛ wa woke woke, nkɛtɛ kekɔ tsho kiama ya tshitshɛ heyama. Onde dui sɔ hɛnya di’Otungi, ‘Omboledi w’andja w’otondo’ ekɔ lo dihole dia lâdiko efula diahandakoke ndjakiyanya dikambo di’anto ndo ɔnɛ nde ekɔ etale efula l’anto, woho wele heyana ndo woho wakoka anto mbeya?—Osambu 83:18.
2 Bible toshikikɛka di’anto wekɔ la nɛmɔ lo washo wa Jehowa. Ɔtɛkɛta wa Nzambi tokeketshaka dia mboyanga, lo mbuta dia: “Ndi kema etali uma le untu la untu.” (Etsha 17:27; 1 Ekondo 28:9) Lo mɛtɛ, naka sho takola wanya dia ndjasukanya le Nzambi, kete nde ayɔtshɔkɔla welo wadjaso lo dikambo sɔ. Lo yoho yakɔna? Ɛtɛkɛta wa lo divɛsa diaso di’ɔnɔnyi wa 2003 mbishaka okadimwelo wasalanganya otema ɔnɛ: “Ndi ayusukana le nyu.” (Jakoba 4:8) Nyɛsɔ tɔsɛdingole weshasha ɛmɔtshi wa diambo washa Jehowa la lokaho tshɛ wanɛ wele suke la nde.
Woshasha washa Jehowa onto l’onto
3. Woshasha akɔna washa Jehowa wanɛ wayasukanya le nde?
3 Ntondotondo, ekambi waki Jehowa wekɔ la woshasha w’oshinga wolo wakandawaombɛ. Ndoko lowandji, ɔngɔnyu ndo kalasa ka lo dikongɛ nɛ di’akambo kakoka tosha woshasha ɔsɔ. Vɔ wekɔ woshasha wendana l’onto l’onto washa Jehowa paka anto wele suke la nde. Woshasha akɔna ɔsɔ? Ɔtɛkɛta wa Nzambi kadimolaka ɔnɛ: ‘Naka . . . wɛ ayowolelela dia kondja shɛnɔdi, naka wɛ ayoyiyanga oko fɛsa, ndo ayoyanga [shɛnɔdi] la wolo oko diangɔ di’oshinga wolo dioshami, kete wɛ ayolembetela wɔma wa Jehowa ndo wɛ ayotana ewo k’oshika kaki Nzambi. Nɛ dia Jehowa ndamɛmɛ mbatoshaka anto lomba.’ (Tukedi 2:3-6) Ohokanyiya di’anto wele bu kokele kokaka tana ‘ewo k’oshika kaki Nzambi’! Woshasha ɔsɔ, mbut’ate ewo katanema l’Ɔtɛkɛta wa Nzambi mbɛdikamaka la ‘diangɔ di’oshinga wolo dioshami.’ Lande na?
4, 5. Lande na kakoka ‘ewo k’oshika kaki Nzambi’ mbɛdikama la ‘diangɔ di’oshinga wolo di’oshami’? Sha ɛnyɛlɔ.
4 Ntondotondo, ewo kaki Nzambi kekɔ la nɛmɔ heyama. Ɔtshɔkɔ ɔmɔtshi woleki oshinga wolo waya oma l’ewo kɛsɔ ko elongamelo ka lɔsɛnɔ la pondjo. (Joani 17:3) Koko ewo kɛsɔ ngɔnyaka lɔsɛnɔ laso kânga oma ko kakianɛ. Ɛnyɛlɔ, diɛsɛ oma lo wekelo aso wa l’otema ɔtɔi w’Ɔtɛkɛta wa Nzambi, tambokondja ekadimwelo lo wembola w’ohomba wele oko: Ele lokombo la Nzambi? (Osambu 83:18) Ngande wele mɛtɛ anto wambovɔ? (Undaki 9:5, 10) Naa lolango laki Nzambi lo dikambo dia nkɛtɛ ndo di’anto na? (Isaya 45:18) Tamboyokoma nto lo mbeya dia yoho yoleki dimɛna ya sɛna ele kitanyiya alako wa lomba w’oma lo Bible. (Isaya 30:20, 21; 48:17, 18) Tekɔ l’ɛlɔmbwɛlɔ ka shikaa katokimanyiya dia ndɔshana l’ekiyanu wa lo lɔsɛnɔ ndo nsɛna yoho ya lɔsɛnɔ yayotela ɔngɛnɔngɛnɔ. Lâdiko w’akambo asɔ tshɛ, wekelo aso w’Ɔtɛkɛta wa Nzambi wamboyotokimanyiya dia mbeya waonga wa diambo waki Jehowa ndo tosukanya oya le nde. Onde ekɔ ɛngɔ kɛmɔtshi koleki diɔtɔnganelo di’ɔlɔlɔ diele lam’asa onto nde la Jehowa dioye oma l’‘ewo k’oshika kaki Nzambi’ nɛmɔ?
5 Tekɔ l’ɔkɔkɔ okina wakoka ewo kaki Nzambi mbɛdikama la ‘diangɔ di’oshinga wolo dioshami.’ L’ɛnyɛlɔ ka diangɔ efula di’oshinga wolo, ewo kɛsɔ haleke tanema l’andja ɔnɛ. L’atei wa miliyara shamalo y’anto wele l’andja w’otondo, paka yɛdikɔ ya miliyɔ shamalo y’atɛmɔdi wa Jehowa ato, mbut’ate onto ɔtɔi l’atei w’anto 1 000 mbambotana ‘ewo k’oshika kaki Nzambi.’ Dia mɛnya ɔnɛ ekɔ diɛsɛ dia woke mbeya akambo wa mɛtɛ wa l’Ɔtɛkɛta wa Nzambi, tɔshi ɛnyɛlɔ ka wombola ɔtɔi ɔnɛ oto w’oma lo Bible: Kakɔna keta l’ɔkɔngɔ wa nyɔi? Sho mbeyaka oma l’ekimanyielo k’Afundelo dia anima mvɔka ndo anto wambovɔ haweye ndoko dikambo. (Ezekiyele 18:4) Koko ɛtɛmwɛlɔ efula wa l’andja ɔnɛ mbetawɔka di’ɛngɔ kɛmɔtshi kele l’etei ka demba di’onto tetemalaka la nsɛna l’ɔkɔngɔ wa nyɔi k’onto. Ɔsɔ ekɔ wetshelo ɔmɔtshi w’ohomba wa l’ɛtɛmwɛlɔ wa lo Lokristokristo. Wetshelo ɔsɔ wambokokanɛ nto l’ɔtɛmwɛlɔ w’ase Buddha, w’Ahindu, w’aseka Jaina, w’ase Juda, le waa Mizilma, waa Shinto, waa Sikh ndo aseka Tao. Ohokanyiya yema, miliyara y’anto wambonganyiyama paka la wetshelo wa kashi ɔsɔ oto!
6, 7. (a) Anto akɔna wele paka vɔ ato mbambotana ‘ewo k’oshika kaki Nzambi’? (b) Ɛnyɛlɔ kakɔna kɛnya dia Jehowa ambotɔtshɔkɔla lo tosha yimba yele “akanga a yimba la ewu” wa l’andja ɔnɛ bu la yɔ?
6 Bonde kele anto efula watatane ‘ewo k’oshika kaki Nzambi’? Ekɔ nɛ dia ndoko onto lakoka shihodia kitshimudi y’Ɔtɛkɛta wa Nzambi aha l’ekimanyielo Kande. Tatohɛke di’ewo kɛsɔ ekɔ woshasha ɔmɔtshi. Jehowa mbokishaka paka le anto wakiyanga l’Ɔtɛkɛta ande l’otema ɔtɔi ndo la ndjakitshakitsha. Anto asɔ mbeyaka monga ko vɔ bu la ‘tomba lo yoho ya lo demba.’ (1 Koreto 1:26) Efula l’atei awɔ mbeyaka mbɔsama oko ‘anto waheye mukanda kana anto k’anto’ oma le as’andja ɔnɛ. (Etsha 4:13) Koko aha diewo dia mukanda mboleki ohomba. Jehowa toshaka ‘ewo kande k’oshika’ l’ɔtɛ wa waonga wɛnande l’etema aso.
7 Tɔshi ɛnyɛlɔ kɛmɔtshi. Waa nomb’ewo efula ya lo Lokristokristo wambotondja lokema l’ekanda watɛkɛta awui wa lo Bible. Ekanda ɛsɔ mbeyaka nembetshiya ahole wakete akambo amɔtshi, tokitshimudi ta tɔtɛkɛta ta lo Hɛbɛru la ta lo Grɛkɛ, ndo awui akina. Lo kɛsɔ tshɛ kamboweka, onde waa nomb’ewo shɔ wambotana mɛtɛ ‘ewo k’oshika kaki Nzambi’? Onde vɔ shihodiaka dimɛna lokanyi loleki ohomba la lo Bible, mbut’ate—oyindjamelo wa lowandji laki Jehowa oma lo tshimbo ya Diolelo diande dia l’olongo? Onde vɔ mbeyaka dia Jehowa Nzambi bu etenyi kɛmɔtshi ka lo Losato l’Osanto? Sho mɛtɛ tekɔ l’eokelo k’oshika k’akambo asɔ. Lande na? Jehowa ambotosha shɛnɔdi yendana l’akambo wa mɛtɛ wa lo nyuma yele “akanga a yimba la ewu” wa l’andja ɔnɛ bu la yɔ. (Mateu 11:25) Jehowa tshɔkɔlaka mɛtɛ anto wayasukanya la nde!
“[Jehowa] atulamaka wane tshe watuwukaka ngandji”
8, 9. (a) Ngande wakakɔndɔla Davidi ɔtshɔkɔ okina wakondja anto wayasukanya oya le Jehowa? (b) Lande na kele Akristo wa mɛtɛ wekɔ l’ohomba w’ekokelo kaki Nzambi?
8 Wanɛ wasukana oya le Jehowa kondjaka ɔtshɔkɔ okina, ɔtshɔkɔ akɔ ko ekokelo Kande. Omembi w’esambu Davidi lakahomana l’ekakatanu efula lo lɔsɛnɔ akafunde ate: “[Jehowa] eli lasuki la wane tshe watuwetaka, ee, lasuki la waku tshe watuwetaka lu mete. Ndi atukutshaka nangu ya waku watuwukaka woma, atukaka delu diawo, atâshimbelaka. [Jehowa] atulamaka wane tshe watuwukaka ngandji.” (Osambu 145:18-20) Eelo, Jehowa ekɔ suke la wanɛ wawoka ngandji ndo nde koka monga suke dia mbasha ekimanyielo kele lawɔ ohomba.
9 Lande na keso l’ohomba w’ekokelo kaki Nzambi? Lâdiko wa tohiha tawaokiya dia wekɔ lo ‘tena nɛ dia pâ ndo dia wolo mbikikɛ,’ Akristo wa mɛtɛ sɔmamaka lo yoho ya lânde oma le Otunyi waki Jehowa woleki tshɛ, Satana Diabolo. (2 Timote 3:1) Otunyi wa mayɛlɛ ɔsɔ ekɔ lo sala tshɛ dia ‘tɔlɛ.’ (1 Petero 5:8) Satana tɔhɛnyahɛnyaka, tosoyaka ndo tohembaka. Nde mendaka nto kɛnɛ kele lo timba ndo l’otema aso dia nde kamba latɔ woho wa tonganyiya. Oyango wele lande vɔ ɔnɛ: tɛwɔla mbetawɔ kaso ndo nanya lonyuma laso. (Enyelo 12:12, 17) Lam’ele tekɔ lo ndɔshanya l’otunyi wa wolo ngasɔ, kema ekɔ ekeketshelo dia mbeya ɔnɛ “[Jehowa] atulamaka wane tshe watuwukaka ngandji”?
10. (a) Ngande wakokɛ Jehowa ekambi ande? (b) Naa woho w’ekokelo koleki ohomba ndo lande na?
10 Ngande wakokɛ Jehowa ekambi ande? Daka diande diendana l’ekokelo hɛnya dia hatotohomana nto l’ekakatanu wa lɔsɛnɔ la lo dikongɛ nɛ di’akambo; kana mbuta dia Nzambi pombaka sala lo wahɔ aso. Ndo nto, Jehowa hakokɛ ekambi ande lo lemba. Koko lo weho tshɛ, nde hetawɔki pondjo dia Diabolo shila ekambi ande tshɛ oshiki lanɛ la nkɛtɛ! (2 Petero 2:9) Lâdiko w’akambo asɔ tshɛ, Jehowa toshaka ekokelo ka lo nyuma. Nde toshaka kɛnɛ kele laso ohomba dia mbikikɛ ehemba ndo nama diɔtɔnganelo diasaso la nde. L’ekomelo, ekokelo ka lo nyuma mbele ekokelo koleki tshɛ ohomba. Lande na? Nɛ dia edja tshɛ keso la diɔtɔnganelo dia dimɛna lam’asaso la Jehowa, ndoko ɛngɔ, oyadi kânga nyɔi kakoka tolanya pondjo pondjo.—Mateu 10:28.
11. Tɛdikɔ takɔna takɔshi Jehowa dikambo di’ekokelo ka lo nyuma k’ekambi ande?
11 Jehowa mbɔsaka tɛdikɔ efula dikambo di’ekokelo ka lo nyuma ka wanɛ wayasukanya oya le nde. L’Ɔtɛkɛta ande, mbut’ate lo Bible, nde toshaka lomba latokimanyiya dia shika tanga la ntondo k’ehemba wa weho la weho. (Jakoba 1:2-5) Okambelo wa l’alako w’amɛna wele l’Afundelo ekɔ tshondo y’ekokelo. Ndo nto, Jehowa mbishaka ‘nyuma k’ekila le wanɛ wɔlɔmbatɔ.’ (Luka 11:13) Nyuma kɛsɔ ekɔ wolo waheme tshɛ l’andja, ɔnkɔnɛ, tɔ koka mɛtɛ tokimanyiya dia sho tondoya okakatanu kana ohemba tshɛ wakoka tokomɛ. Oma lo tshimbo ya Kristo, Jehowa toshaka ‘apami wele oko weshasha.’ (Efeso 4:8) Apami asɔ wele l’akoka wa lo nyuma wahombama salaka tshɛ dia mbokoya kɛtshi kaki Jehowa etena kakimanyiyawɔ asekawɔ ambetawudi.—Jakoba 5:14, 15.
12, 13. (a) Lo toho takɔna tatosha Jehowa mbo ya ndɛ ya lo nyuma la wonya na? (b) Ngande wayaokaso lo kɛnɛ kendana la tɛdikɔ tɔsa Jehowa dia sho monga la lonyuma la dimɛna?
12 Jehowa toshaka ɛngɔ kekina nto dia tokokɛ, ɛngɔ kakɔ ko: mbo ya ndɛ ya lo nyuma yalongolaso la wonya. (Mateu 24:45) Oma l’ekimanyielo k’ekanda watondjama, mbidja ndo Tshoto y’Etangelo la Réveillez-vous !, ndo oma lo nsanganya ya totshitshɛ ndo ya wake, Jehowa toshaka kɛnɛ tshɛ keso l’ohomba lo wonya weso la tɔ ohomba. Onde wɛ koka mbohɔ mbala kɛmɔtshi kakayoke dikambo dimɔtshi lo losanganya lɔmɔtshi l’Akristo diakananda otema ayɛ ndo diakakokeketsha? Onde wɛ atadiaka sawo dimɔtshi oma lo tojurunalɛ toshidiso la diko tongo ko wɛ mboka dia sawo diakɔ diakafundama mɛtɛ dikambo diayɛ?
13 Okoma woleki tshɛ wakamba la Satana ko ɔkɔmwɛlɔ w’otema, ndo dikambo sɔ koka tokomɛ sho tshɛ. Nde mbeyaka dimɛna dia naka sho ndjaoka l’etena k’otale dia taya bu l’elongamelo, kete dikambo sɔ mbeyaka toshishɛ wolo aso, ndo têtɛ anto wakokande kɔsha esadi eto. (Tukedi 24:10) Lam’ele Satana nyangaka dia tɔkɔsha oma l’ɔkɔmwɛlɔ w’otema, tekɔ l’ohomba w’ekimanyielo. Sho tanaka mbala la mbala lo Tshoto y’Etangelo la Réveillez-vous ! asawo wakoka tokimanyiya dia sho ndɔshana l’ɔkɔmwɛlɔ w’otema. Lo dikambo dia sawo dimɔtshi dia ngasɔ, kadiyɛso kɛmɔtshi k’Okristo akafunde ate: “Lekɔ lo mbadia sawo sɔ suke la lushi tshɛ, ndo mbala tshɛ kadiadami dimi kɛdjaka ndo asɔi. Dimi diombaka suke la mbeto kami woho wa dimi kiadia wonya tshɛ wokami oko lambɔkɔmɔ otema. Oma l’asawo wa woho ɔsɔ, dimi mbokaka woho wakokɛ Jehowa.”a Onde sho kema la lowando le Jehowa lo woho watoshande mbo ya ndɛ ya lo nyuma la wonya? Tatohɛke dia tɛdikɔ tɔsande dia sho monga la lonyuma la dimɛna mɛnyaka dia nde ekɔ suke la so ndo ekɔ lo tokokɛ.
Tekɔ la diaaso dia sawola la “ɔnɛ loka alɔmbɛlɔ”
14, 15. (a) Naa ɔtshɔkɔ wele l’onto l’onto wakasha Jehowa wanɛ wayasukanya oya le nde? (b) Lande na kele lotshungɔ lele laso la sawolaka la Jehowa lo dɔmbɛlɔ ekɔ diɛsɛ dia woke?
14 Onde wɛ atɛnaka di’etena kakoma anto la wolo kana la lowandji l’efula, mbala efula vɔ hawetawɔ dia mbidja anto walɔmbɔlawɔ lo demba? Ko kayotota lo dikambo diaki Jehowa Nzambi na? Onde nde hadje yimba lo kɛnɛ kɔlɔmba anto l’ɔtɛ wanganyinde la wɔ etale efula oka? Ndooko! Woshasha wa dɔmbɛlɔ ekɔ ɔtshɔkɔ okina washa Jehowa wanɛ wayasukanya oya le nde. Monga la lotshungɔ la sawola l’‘Ɔnɛ latokaka alɔmbɛlɔ’ ekɔ mɛtɛ diɛsɛ dia woke. (Osambu 65:2) Lande na?
15 Ɛnyɛlɔ: Owandji wa lo kɔmpanyi ka woke ekɔ l’ɛkɛndɛ efula. Nde mbeyaka akambo wahombande ndamɛ kandola ndo akambo wakokande mbisha anto akina lotshungɔ la vɔ mbakandola. Woho akɔ wamɛ mbele, Omboledi w’andja w’otondo ekɔ la lotshungɔ la shikikɛ akambo wahombande kandola ndamɛ la wakokande kimɔ l’anya w’anto dia vɔ mbakandola. Tende akambo tshɛ wakakimɔ Jehowa l’anya w’Ɔnande la ngandji Yeso Kristo dia nde mbakandolaka. Nde akasha Ɔnande ‘lotshungɔ la nombosha.’ (Joani 5:27) Andjelo “wakayala l’okongo andi.” (1 Petero 3:22) Jehowa akasha Yeso wolo wa nyuma kande k’ekila dia nde nɔmbɔla ambeki ande lanɛ la nkɛtɛ. (Joani 15:26; 16:7) Diakɔ diele Yeso akakoke mbuta ate: “Wakambisha wulu tshe ndu l’ulungu ndu la kete.” (Mateu 28:18) Koko lo kɛnɛ kendana l’alɔmbɛlɔ aso, Jehowa ndamɛ menda dikambo sɔ. Diakɔ diatɔlɔmba Bible dia tomaka alɔmbɛlɔ aso paka le Jehowa ndamɛ lo tshimbo ya Yeso.—Osambu 69:13; Joani 14:6, 13.
16. Lande na kakokaso monga l’eshikikelo dia Jehowa mbokaka mɛtɛ alɔmbɛlɔ aso?
16 Onde mɛtɛ Jehowa mpokamɛka alɔmbɛlɔ aso? Otondonga nde hadje yimba l’alɔmbɛlɔ aso, tshike nde hatokeketsha dia ‘tetemala la nɔmba’ kana totɛ dia sho kitsha wetsho ndo ekiyanu aso le nde. (Romo 12:12; Osambu 55:22; 1 Petero 5:7) Ekambi waki Nzambi wa kɔlamelo wa lo nshi yakafundamaka Bible waki l’eshikikelo tshɛ dia Jehowa mbokaka alɔmbɛlɔ. (1 Joani 5:14) Omembi w’esambo Davidi akate ate: “[Jehowa] ayumbukela.” (Osambu 55:17) Sho lawɔ kokaka mɛtɛ monga l’eshikikelo ɔnɛ Jehowa ekɔ suke la so, ndo ekɔ suke dia mboka ekiyanu aso tshɛ.
Jehowa futaka ekambi ande
17, 18. (a) Ngande wayaoka Jehowa lo kɛnɛ kendana l’elimu wa la kɔlamelo wôkambɛ ditongami diande diele la timba? (b) Lembetshiya woho wɛnya Tukedi 19:17 dia Jehowa mɛnaka etsha aso wa kɛtshi.
17 Kɛnɛ kasala kana katona anto dia sala hasalɛ Jehowa ɔnɛ lele Omboledi w’Andja w’otondo ndoko dikambo. Koko Jehowa ekɔ Nzambi kele la lowando. Nde mbɔsaka la nɛmɔ ndo ngɛnangɛnaka olimu wa la kɔlamelo wokambɛ ditongami diande diele la timba. (Osambu 147:11) Ɔsɔ ekɔ nto ɔtshɔkɔ okina wakondja wanɛ wayasukanya oya le Nzambi: Nde futaka ekambi ande.—Heberu 11:6.
18 Bible mɛnyɛka hwe dia Jehowa mbɔsaka kɛnɛ kasala atɛmɔdi ande la nɛmɔ. Ɛnyɛlɔ, sho mbadiaka ɛtɛkɛta ɛnɛ: “One latukaka usi wula ketshi, atosondjaka [Jehowa] diango, ndi ako layûfutaka uku ololo wakandatshi.” (Tukedi 19:17) Ɛlɛmbɛ wa Mɔsɛ wakakɛnɛmɔlaka kɛtshi kaki la Jehowa otsha le ase wola. (Akambu w’Ase Lewi 14:21; 19:15) Ngande woka Jehowa etena kawokoyaso lo mboka ase wola kɛtshi? Etena kashaso ose wola ɛngɔ aha la nongamɛ ndoko ɛngɔ oma le nde, Jehowa mbɔsaka tshelo shɔ oko Nde mambotɔsɔndja. Jehowa ndakaka dia nde ayɔsɔmbɔla dibasa sɔ l’otema ɔtɔi ndo lo totshulwɛ ɛtshɔkɔ. (Tukedi 10:22; Mateu 6:3, 4; Luka 14:12-14) Eelo, etena kokaso osekaso ombetawudi lele lo dihombo kɛtshi, dikambo sɔ minandaka mɛtɛ otema wa Jehowa. Ekɔ mɛtɛ ɔngɛnɔngɛnɔ efula dia mbeya dia Shɛso lele l’olongo mbidjaka yimba l’etsha aso wa kɛtshi!—Mateu 5:7.
19. (a) Lande na kakokaso monga l’eshikikelo dia Jehowa ngɛnangɛnaka kɛnɛ kasalaso l’olimu w’esambishelo ndo wa mbetɛ anto ambeki? (b) Ngande wafuta Jehowa kɛnɛ kasalaso dia sukɛ Diolelo diande?
19 Lo yoho ya lânde, Jehowa mbɔsaka la nɛmɔ kɛnɛ kasalaso dikambo dia wahɔ wa Diolelo diande. Lam’ayasukanyaso oya le Jehowa, dui sɔ mɛnyaka dia sho nangaka kamba la wenya, la wolo, ndo l’ɔngɔnyu aso dia sho nyomoleka ndjasha l’olimu w’esambishelo ndo wa mbetɛ anto ambeki lo yɛdikɔ yɛdimi l’akoka aso. (Mateu 28:19, 20) Esangɔ ɛmɔtshi, sho mbeyaka mɛna di’oko ndoko k’ɔlɔ kasalaso. Otema aso wele bu kokele mbeyaka ndjotokonya lo ndjambola dia kana Jehowa ngɛnangɛnaka welo wadjaso. (1 Joani 3:19, 20) Koko Jehowa ngɛnangɛnaka oseka woshasha tshɛ, oyadi tshitshɛ yakɔna yewɔ naka vɔ ndja oma l’otema woludi la ngandji. (Mako 12:41-44) Bible toshikikɛka dia: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi.” (Heberu 6:10) Lo mɛtɛ, Jehowa mbohɔka ndo futaka onto kânga lo tshelo yoleki tshitshɛ yakandasale dia sukɛ Diolelo diande. Lâdiko di’ɛtshɔkɔ wa lo nyuma walongolaso ɛlɔ kɛnɛ, sho koka nongamɛ ɛngɛnɔngɛnɔ wa lo lɔsɛnɔ l’andja w’oyoyo wayaye, lɛnɛ ayodihola Jehowa lonya lande la lokaho tshɛ dia kotsha nsaki ka wanɛ tshɛ wayasukanya oya le nde!—Osambu 145:16; 2 Petero 3:13.
20. L’ɔnɔnyi wa 2003, ngande wayotohɔka ɛtɛkɛta wa divɛsa diaso di’ɔnɔnyi, ndo etombelo akɔna wayonga la dikambo sɔ?
20 L’ɔnɔnyi wa 2003 w’otondo, nyɛsɔ toyambolake dia kana tekɔ lo tetemala la sala la wolo dia ndjasukanya le Shɛso lele l’olongo. Naka tekɔ lo sala ɔsɔku, kete sho koka monga l’eshikikelo dia nde ayosukana la so oko walakande. Teye dia ‘Nzambi hakoke mbuta kashi.’ (Tito 1:2) Naka sho ndjasukanya oya le nde, kete nde ayosukana oya le so. (Jakoba 4:8) Ko etombelo akɔna wayonga la dikambo sɔ na? Tayolongola lokema l’ɛtshɔkɔ ɛlɔ kɛnɛ ndo elongamelo ka nyomoleka ndjasukanya la Jehowa pondjo pondjo!
[Nɔte ka l’ɛse ka dikatshi]
a Woho wakayaoke kadiyɛso kɛmɔtshi lo kɛnɛ kendana la sawo diele l’ɔtɛ a dui ɔnɛ: “Jehowa ndeka otema aso woke,” dia lo Tshoto y’Etangelo ya Ngɔndɔ ka Tanu 1, 2000, lɛkɛ 28-31, lo Falase.
Onde wɛ akohɔ?
• Woshasha akɔna washa Jehowa wanɛ wayasukanya oya le nde?
• Tɛdikɔ takɔna tɔsa Jehowa dikambo di’ekokelo ka lo nyuma k’ekambi ande?
• Lande na kele lotshungɔ lele laso la sawola la Jehowa lo dɔmbɛlɔ ekɔ diɛsɛ dia woke?
• Ngande wɛnya Bible dia Jehowa ngɛnangɛnaka olimu wa la kɔlamelo wokambɛ ditongami diande diele la timba?
[Osato wa lo lɛkɛ 15]
Jehowa ambotosha shɛnɔdi y’akambo wa mɛtɛ wa lo nyuma
[Esato wa lo lɛkɛ 16, 17]
Jehowa toshaka ekokelo ka lo nyuma
[Osato wa lo lɛkɛ 18]
Jehowa ekɔ suke la so, ndo suke dia mboka alɔmbɛlɔ aso tshɛ