Ekambi wa Jehowa wekɔ l’elongamelo ka mɛtɛ
‘Atshikadi wa Jakɔbɔ wayoyala l’atei wa wedja efula oko lɔpɔpɔ l’oma le Jehowa, hawotokitsha elongamelo kawɔ le onto.’—MIKA 5:7.
1. Ngande wele Isariyɛlɛ wa lo nyuma kiɔkɔ y’ekeketshelo ka lo nyuma?
JEHOWA mbele Otungi wa woke wa mvula ndo wa longe. Ekɔ anyanya kitsha elongamelo kaso le anto dia vɔ ndɔsha longe kana mvula. Omvutshi Mika akafunde ate: “Ku atshikadi wa Jakoba wayuyala l’atei a wedja efula, uku dihohe di’uma le [Jehowa], uku apopo w’ashi ladiku dia adiyu, wahatutshimbatshimbaka dikambu dia antu, kuyanga nkunga dikambu dia ana w’antu.” (Mika 5:7) Waa na wele ‘atshikadi wa Jakɔbɔ’ wa nshi nyɛ? Ekɔ Isariyɛlɛ wa lo nyuma, mbut’ate atshikadi wa “Isariyele wa [Nzambi].” (Ngalatiya 6:16) Vɔ wekɔ le “wedja efula” wa la nkɛtɛ oko “dihohe di’uma le [Jehowa], uku apopo w’ashi ladiku dia adiyu.” Eelo, atshikadi w’akitami w’esɔ weke la lɔsɛnɔ lanɛ la nkɛtɛ wekɔ ɔtshɔkɔ w’oma le Nzambi le anto. Oko wewɔ apandjudi wa Diolelo, Jehowa ekɔ lo kamba la wɔ dia vɔ mbewoya anto losango lasha elongamelo ka mɛtɛ.
2. Lande na keso l’elongamelo ka mɛtɛ kânga mbasɛnaso l’andja w’ofukutanu?
2 Ekɔ mɛtɛ di’andja ɔnɛ kema l’elongamelo ka mɛtɛ. Efukutanu wendana l’awui wa pɔlitikɛ, olanelo wa nkɛwɔ y’anto, awui wa ngala, ekakatanu wendana l’ekondjelo, awui wa terɔrismɛ ndo ata mbele akambo wahombaso nongamɛ l’andja ɔnɛ walɔmbwama oma le Satana Diabolo. (1 Joani 5:19) Anto efula wekɔ la wɔma lo kɛnɛ kendana la kɛnɛ kakoka mbakomɛ lo nshi yayaye. Koko, oko weso atɛmɔdi wa Jehowa, sho hatoke wɔma, nɛ dia tekɔ l’elongamelo ka shikaa lo kɛnɛ kendana la nshi yayaye. Elongamelo kaso kekɔ ka mɛtɛ nɛ dia tɔ mbika etshina l’Ɔtɛkɛta wa Nzambi. Tekɔ la mbetawɔ le Jehowa ndo l’Ɔtɛkɛta ande nɛ dia kɛnɛ tshɛ katande kotshamaka nshi tshɛ.
3. (a) Lande na kakayange Jehowa mbɔsɛ Isariyɛlɛ la Juda yɛdikɔ? (b) Lande na kendana ɛtɛkɛta wa Mika la nshi yaso nyɛ?
3 Prɔfɛsiya ka Mika kakasambiyama tokeketshaka dia kɛndakɛnda lo lokombo la Jehowa ndo tɔ toshaka kiɔkɔ y’elongamelo ka mɛtɛ. Lo ntambe k’Enanɛi N.T.D., lam’akafundaka Mika prɔfɛsiya kande, wodja wakadje la Nzambi sheke wakâtɔna lo wedja ehende, Isariyɛlɛ la Juda, ndo vɔ tshɛ wakɔnyɔla sheke yakawadje la Nzambi. Etombelo wakonge la dikambo sɔ ele waolelo akɔ ahende wakayoyashaka l’awui wa kɔlɔ, lo apɔstazi, ndo l’oyango wa tshambandeko wa lomombo la l’emunyi. Omalɔkɔ, Jehowa akawaewoya dia nde ayowaɔsɛ yɛdikɔ. Lo mɛtɛ, ɛhɛmwɛlɔ waki Nzambi wakendanaka l’anto wakasɛnaka lo nshi ya Mika. Koko, lam’ele awui weta lo nshi yaso nyɛ mbɔtɔnɛka l’awui waketaka lo nshi ya Mika, ɛtɛkɛta ɛsɔ mendanaka nto l’etena kaso kɛnɛ. Kɛsɔ mbayangaso mɛna lam’ayangaso sɛdingola akambo amɔtshi w’ohomba wa lo totshapita esambele ta dibuku dia Mika.
Kɛnɛ kɛnya ɔsɛdingwelo wa lo tshena pe wa dibuku dia Mika
4. Akambo akɔna wele lo tshapita 1 polo 3 ya Mika?
4 Nyɛsɔ tɔsɛdingole lo tshena pe ɛtɛ w’awui wofundami lo dibuku dia Mika. Lo Mika tshapita 1, Jehowa ekɔ lo mɛnya woho wakatɔmbɔkɔ Isariyɛlɛ la Juda. L’ɔtɛ wa lɔkɛwɔ lawɔ la kɔlɔ, Isariyɛlɛ ayolanyema ndo dilanya dia Juda diayokoma polo ndo lo soko dia Jerusalɛma. Mika Tshapita 2 mɛnyaka di’akanga w’ɛngɔnyi ndo akanga wa lokumu wekɔ lo pɛnyɔla ase wola ndo wanɛ waha l’ekimanyielo. Koko, lɔkɔ sho tanaka nto daka dimɔtshi di’oma le Nzambi. Ekambi waki Nzambi wayotshumanyema kâmɛ. Mika Tshapita 3 kɔndɔlaka alanya waki Nzambi otsha le ɛnɔmbɔdi wa wodja ndo otsha le amvutshi wa kɔlɔ. Ɛnɔmbɔdi hawosambola akambo la losembwe, ndo amvutshi wekɔ lo mbuta awui wa kashi. Kânga mbaki akambo ngasɔ, Mika akalodiama la wolo wa nyuma ka Jehowa dia mbewoya elombwelo ka Jehowa kaki lo ndjaye.
5. Naa dikambo di’ohomba diele lo Mika tshapita ya 4 ndo 5?
5 Mika Tshapita 4 mbutaka dia lo nshi y’ekomelo, wedja tshɛ wayoya oya l’okongo wa luudu la Jehowa dia ndjetshama oma le nde. Koko la ntondo ka dikambo sɔ, ase Juda wayɔtɔlama lo lɔhɔmbɔ la Babilɔna, ko l’ɔkɔngɔ diko Jehowa ndjatshungola. Mika Tshapita 5 mɛnyaka dia Mɛsiya ayotɔ la Bɛtɛlɛhɛma ka la Juda. Nde ayɔlɔmbɔla ɛkɔkɔ ande ndo ayowatshungola oma le wedja wa ngala.
6, 7. Akambo akɔna wele lo tshapita ya 6 la 7 ya prɔfɛsiya ka Mika?
6 Mika tshapita 6 kɔndɔlaka woho wâwa Jehowa ekambi ande oko onto lambowaeta l’elombwelo. Kakɔna kakasale Jehowa kakakonya ekambi ande dia tɔmbɔkɔ? Ndoko dikambo. Lo mɛtɛ, kɛnɛ kalɔmbande kema tshambandeko. Nde nangaka di’atɛmɔdi ande monga la losembwe, l’ɔlɔlɔ w’otema, ndo la ndjakitshakitsha lam’atawakɛndakɛnda kâmɛ la nde. Koko lo dihole dia vɔ sala ngasɔ, Isariyɛlɛ la Juda wakatɔmbɔkɔ, diakɔ diakawahombe diɛnɛ l’etombelo wa kɔlɔ w’oma lo dikambo sɔ.
7 Lo tshapita ya komelo ya prɔfɛsiya kande Mika 7 , Mika akatɛkɛta dikambo di’akambo wa kɔlɔ wakasalaka anto wa lo nshi yande. Koko nde kɔkɔmɔ otema. Nde akayashikikɛ dia monga la ‘solo dia lotutsha’ le Jehowa. (Mika 7:7) Dibuku nɛ komɛ l’ɛtɛkɛta waki Mika wɛnya dia nde akayashikikɛ dia Jehowa akahombe mboka ekambi ande kɛtshi. Ɔkɔndɔ wa lɔsɛnɔ l’anto mɛnyaka di’elongamelo kaki la Mika kakakotshama. L’ɔnɔnyi 537 N.T.D., lam’akakomɛ dilanya diakasha Jehowa ekambi ande, oma lo kɛtshi kande, nde akakawoya atshikadi oya lo nkɛtɛ yawɔ ya lôtɔ.
8. Ngande wakokayɛ shila lo tshena pe ɛtɛ w’awui wele lo dibuku dia Mika?
8 Jehowa akasholɛ Mika akambo w’ohomba efula mɛtɛ! Dibuku diakasambiya sɔ diekɔ la bɛnyɛlɔ di’ɔhɛmwɛlɔ diɛnya dionga diele la Jehowa otsha le anto wasɛma dia vɔ mbɔtɛmɔlaka koko vɔ bu la kɔlamelo. Diɔ tɛkɛtaka akambo weta lo nshi yaso nyɛ. Ndo diɔ diekɔ l’alako waki Nzambi wɛnya woho wahombaso ndjalɔmbɔla lo tena dia wolo nɛ ndo dia keketsha elongamelo kaso.
Jehowa Nkum’Olongo ekɔ lo tɛkɛta
9. Lo ndjela Mika 1:2, kakɔna kaki Jehowa suke la sala?
9 Nyɛsɔke tɔsɛdingole kakianɛ dibuku dia Mika dimɛna dimɛna. Lo Mika tshapita 1 divɛsa 2, sho mbadiaka ɔnɛ: “Nyulungi, nyu antu tshe. Kete la kene tshe keli loko nyuhukami. Khumadiondjo, [Jehowa] ayali omenyi. Lu dikambu dianyu uma l’etemwelo kandi k’ekila.” Ohondonga wɛ akasɛnaka lo nshi ya Mika, tshike mɛtɛ ɛtɛkɛta ɛsɔ wotokotola yambalo yayɛ. Lo mɛtɛ, vɔ kotolaka yambalo yayɛ nɛ dia Jehowa ekɔ lo tɛkɛta oma lo tɛmpɛlɔ kande k’ekila ndo aha Isariyɛlɛ la Juda ato mbakandatɛka ɛtɛkɛta ɛsɔ, koko anto wa l’ahole tshɛ. Lo nshi ya Mika, anto wakɔnyɔla Nkum’Olongo Jehowa edja efula. Kombet’edja, dikambo sɔ diakahombe tshikitana. Jehowa akayashikikɛ dia mbaɔsɛ yɛdikɔ ya wolo.
10. Lande na kele ɛtɛkɛta wele lo Mika 1:2 wekɔ ohomba le so ɛlɔ kɛnɛ?
10 Ɔsɔku mbediɔ ndo lo nshi yaso nyɛ. Enyelo 14:18-20 mɛnyaka dia Jehowa ekɔ lo tɛkɛta nto oma lo tɛmpɛlɔ kande k’ekila. Kem’edja, Jehowa ayɔsa yɛdikɔ ya wolo, ndo akambo wa mamba wayosutshasutsha anto nto. L’etena kɛsɔ, ‘elowa wa kɔlɔ w’ɛkɔdi wa la nkɛtɛ’ wayolanyema tshɛ lam’ayoya nkɛlɛ ka mamba kaki Jehowa kayoyoshidiya elanyelo ka dikongɛ di’akambo dia kɔlɔ diaki Satana.
11. Ɛtɛkɛta wele lo Mika 1:3, 4 alangawɔ nembetshiya?
11 Tohokame kɛnɛ kayanga sala Jehowa. Mika tshapita 1, divɛsa 3 la 4 mbutaka ɔnɛ: “Nyendi, [Jehowa] lu ndjayi lu dihuli diandi. Ndi ayuhulo, ayokendakenda l’ahuli wa ladiku wa la kete. Ekungu wayolelo la tshina diandi, ndu ekidi way[a]tate elonge. Uku elungu lasuki la dja, uku ashi mbambuwutshula l’ehulula.” Onde Jehowa akahombe tshika dihole diadjasɛnde l’olongo ko kɛndakɛnda lâdiko w’akona ndo ekidi wa mɛtɛ mɛtɛ wa lo Nkɛtɛ ya Daka? Kema. Nde komonga l’ohomba wa sala dikambo sɔ. Nde akakotola tsho yambalo yande oya la nkɛtɛ dia lolango lande kotshama. Ndo nto, aha nkɛtɛ yakamɛso nyɛ mbatawɔ lanɛ, koko wekɔ lo tɛkɛta dikambo di’anto wayodiɛnɛ l’akambo wɔkɔndwami l’avɛsa asɔ. Lam’ayɔsa Jehowa yɛdikɔ, mpokoso ka mamba kayokomɛ anto waha la kɔlamelo, watekana oko akona mambɔlɛlɔ ndo oko ekidi mambatɛ ɛlɔngɛ la didimu dia nkɛtɛ.
12, 13. Lo ndjela 2 Petero 3:10-12, kakɔna kashikikɛ elongamelo kaso?
12 Ɛtɛkɛta wa prɔfɛsiya wa lo Mika 1:3, 4 mbeyaka tohola prɔfɛsiya kekina kakasambiyama oma le Nzambi kendana l’awui wa kɔlɔ wayotomba lanɛ la nkɛtɛ. Oko wofundamidiɔ lo 2 Petero 3:10, ɔpɔstɔlɔ Petero akafunde ate: “Lushi la [Jehowa] layuya uku uvi. Lu lushi lako, ulungu ayushisho la lundju la wulu. Diango diayolelo la dja ya wulu; ndu kete ndu diango tshe dieli loko, [“diayoshɔma,”NW].” Lo yoho yɔtɔnɛ la prɔfɛsiya ka Mika, ɛtɛkɛta wa Petero hawendana l’olongo ndo la nkɛtɛ ya mɛtɛ mɛtɛ. Ɛtɛkɛta ɛsɔ mendanaka la fɔnu ka woke kayokomɛ dikongɛ nɛ di’akambo dia kɔlɔ.
13 Kânga mbayaye mpokoso ka woke kɛsɔ, Akristo kokaka monga l’eshikikelo lo kɛnɛ kendana la nshi yayaye l’ɛnyɛlɔ ka Mika. Woho akɔna na? Ele lo ndjela dako diatanema l’avɛsa wayela wa mukanda waki Petero. Ɔpɔstɔlɔ akate ate: ‘Woho akɔna w’anto wahombanyu monga l’etsha wa lɔkɛwɔ l’ekila ndo lo ditshelo di’anto wamamema Nzambi etena kenyu lo kongɛ ndo nama wôngelo wa lushi la Jehowa lo yimba!’ (2 Petero 3:11, 12) Elongamelo kaso lo kɛnɛ kendana la nshi yayaye kayonga shikaa naka sho monga l’otema w’okitanyiya ndo ndjashikikɛ dia lɔkɛwɔ laso lekɔ ekila ndo ɔnɛ lɔsɛnɔ laso ndola l’etsha w’anto wamamema Nzambi. Dia shikikɛ elongamelo kaso, sho pombaka nto mbohɔka dia lo weho akɔ tshɛ, lushi la Jehowa layoya.
14. Lande na kakasungana Isariyɛlɛ la Juda kondja dilanya?
14 Jehowa ekɔ lo nembetshiya bonde kakahombe ekambi ande w’edjedja nongola dilanya. Mika 1:5 mbutaka ɔnɛ: “Akambu ane tshe wambuyala ne dia uhedia wa Jakoba, ndu ne dia kolo ka khumbu ka Isariyele. Na uhedia wa Jakoba? Aha Samariya? Na ahuli wa ladiku wa Juda? Aha Jerusalema?” As’Isariyɛlɛ l’ase Juda wakahombaka mbeya dia Jehowa mbakâtonge. Koko, vɔ wakɔtɔmbɔkwɛ, ndo ɔtɔmbɔkwɛlɔ awɔ wakakome polo lo kapitalɛ yawɔ hita, mbut’ate Samariya la Jerusalɛma.
Ditshelo dia kɔlɔ diambofulanɛ
15, 16. Onongo w’akambo akɔna wa kɔlɔ waki l’anto wakasɛnaka lo nshi ya Mika?
15 Ɛnyɛlɔ k’akambo wa kɔlɔ wakasalaka anto wa lo nshi ya Mika kɔndwama l’ɔlɔlɔ tshɛ lo Mika 2:1, 2, ɔnɛ: “Mananu kayali le wane watukanaka akambu wa kolo, watutshaka kolo lu tangi yawo! Lam’atuhutoka unya, vo watukitshaka, ne dia to keko lu wulu w’anya awo. Vo watokomiyaka dikambo, watudiosaka, ndu mvudu, ku watuyihotolaka. Vo watusuyaka untu la khumbu kandi, untu la ukito andi.”
16 Akanga wa lokaki asɔ sungukalaka otsho w’otondo dia kanyiya woho wahombawɔ mpɔtɔla anyawɔ dikambɔ ndo mvudu yawɔ. La pindju, vɔ watetɔka dia kotsha eyango awɔ. Totowosala akambo wa kɔlɔ wa ngasɔ otondonga wakohɔka sheke yakawadje la Jehowa. Ɛlɛmbɛ wa Mɔsɛ wakikɔ la tɛdikɔ takakokɛka ose wola. Lo ndjela ɛlɛmbɛ ɛsɔ, ndoko nkumbo ɔtɔi kakahombaka shisha okitɔ atɔ lo pondjo. Koko, akanga wa lokaki asɔ kombidjaka yimba lo dikambo sɔ. Vɔ wakɔnyɔla ɛtɛkɛta wa l’Akambu w’Asi Lewi 19:18, wata ɔnɛ: “Keli ulangi unyaye uku ayalangaye.”
17. Kakɔna kakoka tomba naka wanɛ wata ɔnɛ Nzambi mbatɛmɔlawɔ wambetsha diangɔ dia l’emunyi lo dihole dia ntondo lo lɔsɛnɔ lawɔ?
17 Dikambo sɔ mɛnyaka kɛnɛ kakoka tomba naka wanɛ wasɛma dia wekɔ lo tɛmɔla Nzambi wambonya yimba oma l’eyango wa lo nyuma ko woyanga ntondo diangɔ dia l’emunyi. Paulo akewola Akristo wa lo nshi yande ate: “Keli wane wakomiya ndjala engonyi, wayoko lu uhimba la lu djunga ndu lu saki ya dinginya yatutshelaka antu kolo, yayudi[ndja] antu lu elanyelu la eshishwelu.” (1 Timote 6:9) Naka onto ambetɛ okondjelo wa falanga oyango woleki ohomba lo lɔsɛnɔ lande, kete nde ɔtɛmɔla jambizambi mɔtshi ya kashi, mbut’ate okundji. Jambizambi ya kashi shɔ hasha elongamelo k’oshika lo kɛnɛ kendana la nshi yayaye.—Mateu 6:24.
18. Kakɔna kaki suke la komɛ anto wakasɛnaka lo nshi ya Mika, wanɛ wakayashaka l’eyango wa diangɔ dia l’emunyi ko minya yimba l’akambo wa lo nyuma?
18 Anto efula wa lo nshi ya Mika wakakondja wetshelo oma lo mpokoso yakâkomɛ ɔnɛ ndjaɛkɛ lo lomombo la l’emunyi ekɔ anyanya. Lo ndjela Mika 2:4, Jehowa mbutaka ate: “Lushi loso, wayunyukela yukedi, wayulela delu di’okei; wayuta vati: Shu tambushila ushiki. Ndi ambukadimula etenyi ka wudja ami. Ndi wuhu ambundukinya uma le mi li! Ndi ambukahanya dikambo diasu le akanga w’uhedia.” Eelo, wevi wa mvudu ndo wa dikambɔ ɛsɔ wayoshisha okitɔ wa nkumbo yawɔ hita. Vɔ wayɔtɔlama lo wodja w’angɛndangɛnda, ndo diangɔ diawɔ diayokoma diangɔ dia dimbo di’“akanga w’uhedia,” kana ase wedja. Elongamelo tshɛ kaki lawɔ ka ngɔna lo nshi yayaye kayɔtɔ l’ashi.
19, 20. Kakɔna kakakomɛ ase Juda wakayaɛkɛka le Jehowa?
19 Koko, elongamelo ka wanɛ wayaɛkɛ le Jehowa hatɔtɔ l’ashi. Jehowa ekɔ la kɔlamelo lo toseke takandadje nde l’Abarahama la Davidi, ndo nde ekɔ la kɛtshi le wanɛ wele oko Mika wawoka ngandji ndo wayakiyanya lo menda woho wamboyanganya anyawɔ oma le Nzambi. Lo wahɔ w’anto asɔ, mbayonga ɔlɔngɔswɛlɔ kana okalwelo l’etena kakashikikɛ Nzambi.
20 Dikambo sɔ diakasalema l’ɔnɔnyi 537 N.T.D., l’ɔkɔngɔ w’ɔkwɛlɔ wa Babilɔna ndo etena kakakawola atshikadi w’ase Juda oya lo wodja awɔ wa lôtɔ. L’etena kɛsɔ, ɛtɛkɛta wa lo Mika 2:12 wakonge l’ekotshamelo ka ntondo. Jehowa mbutaka ate: “Mete, dimi layusanganya utundu aye tshe, we Jakoba. Mete, dimi layusanganya atshikadi wa Isariyele. Dimi layâmotsha kame uku ekoko weli l’ukutu, uku limba la dungalunga lu dihuli diawo di’elelu. Vo wayu[dj]a lundju la wuki lu dikambu di’ului w’antu.” Jehowa ekɔ mɛtɛ Nzambi ka ngandji! L’ɔkɔngɔ wa nde mbisha ekambi ande ohokwelo, nde akasha atshikadi diaaso dia vɔ kawola lo nkɛtɛ yawɔ ndo dia ndjôkambɛ lo waombo waki watshɛwɔ.
Awui wakasalemaka nshi ya Mika mbɔtɔnɛka efula la wasalema nshi nyɛ
21. Ngande wafɔna akambo wasalema nshi nyɛ la wakasalemaka lo nshi ya Mika?
21 Oko wambotɔsɛdingola avɛsa anɛ oma lo totshapita tohende t’etatelo ta dibuku dia Mika tshapita 1, 2, onde hatambe dia mɛna dia weho w’akambo asɔ wekɔ lo salema ɛlɔ kɛnɛ? Oko wakidiɔ lo nshi ya Mika, anto efula sɛmaka ɛlɔ kɛnɛ dia wekɔ lo kambɛ Nzambi. Koko l’ɛnyɛlɔ ka Juda la Isariyɛlɛ, diatɔnelo diekɔ l’atei awɔ ndo wekɔ lo ndɔshana ata lam’asawɔ. Akanga w’ɛngɔnyi wa lo Lokristokristo wekɔ lo pɛnyahɛnya ase wola. Ndo ewandji w’ɛtɛmwɛlɔ mbetawɔka mbala efula ditshelo diahetawɔma kânga yema lo Bible. Diɔ diakɔ diata Jehowa dia kem’edja, Lokristokristo layanga ndanyema, kâmɛ la tenyi dikina dia “Babilona ka Wuki,” mbut’ate, tshunda dia l’andja w’otondo di’ɛtɛmwɛlɔ wa kashi! (Enyelo 18:1-5) Koko, lo ndjela ɛnyɛlɔ ka lo nshi ya Mika, Jehowa ekekɔ l’ekambi wa kɔlamelo lanɛ la nkɛtɛ.
22. Naa elui ehende wambodja elongamelo kawɔ lo Diolelo diaki Nzambi na?
22 L’ɔnɔnyi 1919, Akristo wa kɔlamelo w’akitami w’esɔ wakayanganya lo pondjo oma lo Lokristokristo ndo wakatatɛ mbewoya wedja tshɛ lokumu l’ɔlɔlɔ la Diolelo. (Mateu 24:14) Ntondotondo, vɔ wakayange atshikadi w’Isariyɛlɛ wa lo nyuma. Oma lâsɔ, “ekoko ekina” wakatatɛ tshumanyema, ndo elui akɔ ehende ɛsɔ wakakome “ului otoi ndu ulami otoi.” (Joani 10:16) Kânga mbakambɛwɔ Nzambi ɛlɔ kɛnɛ lo wedja 234, atɛmɔdi wa kɔlamelo asɔ tshɛ wekɔ mɛtɛ ‘kâmɛ.’ Ndo ɛlɔ kɛnɛ, ɛkɔkɔ ɛsɔ “wayu[dj]a lundju la wuki lu dikambu di’ului w’antu,” oko watodjaka wamato l’ana londjo. Vɔ wambodja elongamelo kawɔ aha lo dikongɛ nɛ di’akambo dia kɔlɔ, koko lo Diolelo diaki Nzambi, diele kem’edja diɔ diayanga mbela Paradiso lanɛ la nkɛtɛ.
23. Lande na kashikikɛyɛ di’ɔnɛ elongamelo kayɛ kekɔ elongamelo ka shikaa?
23 Lo kɛnɛ kendana l’atɛmɔdi wa Jehowa wa kɔlamelo, divɛsa dia komelo dia Mika tshapita 2 divɛsa 13 mbutaka ɔnɛ: “Khum’ekanga kawo aketi la ntundu kawo, ku [“Jehowa ɔnɔmbɔdi awɔ,” NW].” Onde shoamɛ ndjaɛnaka l’ɔnɔngɔ wa lokidi l’anto wayanga mbidja otshumba asɔ, tatayele Nkumekanga kaso, Yeso Kristo, ndo Jehowa ndamɛ atatɔlɔmbɔla? Naka eelo, kete eya dia tekɔ suke mɛtɛ la mbidja otshumba ndo elongamelo kayɛ kekɔ ka shikaa. Tayoleka shikikɛ dikambo sɔ lam’ayangaso nyomɔsɛdingola akambo akina w’ohomba wele lo prɔfɛsiya ka Mika.
Ngande wayoyokadimola?
• Lande na kakɔsɛ Jehowa Juda la Isariyɛlɛ yɛdikɔ lo nshi ya Mika?
• Kakɔna kakoka tomba naka wanɛ wata dia Nzambi mbakambɛwɔ wambetsha eyango wa lomombo la l’emunyi lo dihole dia ntondo lo lɔsɛnɔ lawɔ?
• L’ɔkɔngɔ wa sho sɛdingola Mika tshapita ya 1 la 2, bonde kamboyoyashikikɛ di’elongamelo kayɛ keko elongamelo ka shikaa?
[Osato wa lo lɛkɛ 6]
Prɔfɛsiya ka Mika tokeketshaka lo nyuma
[Esato wa lo lɛkɛ 7]
L’ɛnyɛlɔ k’atshikadi w’ase Juda wakasɛnaka lo 537 N.T.D., ase Isariyɛlɛ wa lo nyuma ndo asekawɔ sukɛka ɔtɛmwɛlɔ wa mɛtɛ