Tokoya ɛnyɛlɔ k’amvutshi—Mika
1. Dimbola diakɔna ondo diakayaokaka Mika, ko lande na kaki esambishelo kande komonga anyanya?
1 ‘Etena kakɔna kayokomɛ dikongɛ di’akambo dia kɔlɔ nɛ?’ Ondo omvutshi Mika akayaokaka dimbola sɔ etena kakandewoyaka diolelo di’Isariyɛlɛ ndo dia Juda nsango yaki Jehowa y’elanyelo kakahombe mbakomɛ. Koko, esambishelo kande komonga anyanya. Lo 740 N.T.D., lo nshi ya Mika, ɛtɛkɛta wa Jehowa wakandate lo dikambo dia Samariya wakakotshama. (Mika 1:6, 7) L’ɔkɔngɔ wa laasɔ, lo 607 N.T.D., Jɛrusalɛma akayolanyemaka. (Mika 3:12) Ngande wakokaso mbokoya Mika etena kakongɛso etena kayela Jehowa elanyelo lo nshi yaso nyɛ?
2. Ngande ndo lande na kɛnyaso dia tekɔ la solo dia lotutsha etena kakongɛso lushi la Jehowa?
2 Tonge la solo dia lotutsha: Mika akafunde ate: “Keli le mi, dimi layenda le [Jehowa], dimi layulungamelaka le [Nzambi k]a panda kami.” (Mika 7:7) Kɛnɛ kele mɛtɛ ele, Mika kɔkɔma anya ko kongɛka ekomelo. Oko wakinde omvutshi wa Jehowa, nde aki l’awui efula wa nsala. Lam’ele ndo sho mbakongɛ lushi la Jehowa, sho pombaka monga la “lɔkɛwɔ l’ekila ndo [la] ditshelo diɛnya dia [t]ekɔ lo mamema Nzambi.” (2 Pet. 3:11, 12) Solo dia lotutsha diele la Jehowa mbishaka anto diaaso dia ndjatshumoya. (2 Pet. 3:9) Diakɔ diele, sho ndjelaka dako dia lo Bible diatɔlɔmba dia mbokoya solo dia lotutsha diaki la omvutshi Mika.—Jas. 5:10.
3. Lande na kahombaso nɔmbaka Jehowa dia nde tosha nyuma kande k’ekila?
3 Toyaɛkɛ lo wolo wa Jehowa: Kaanga mbaki Mika l’ɔkɛndɛ wa wolo, nde akendɛ le Jehowa dia nde mbosha wolo wa mbokotsha. (Mika 3:8) Jehowa mbeyaka dia tekɔ l’ohomba wa wolo w’oma le nde, diakɔ diatokeketshande lo tshimbo ya Bible dia sho mbɔlɔmbawɔ. La lokaho tshɛ, nde mbishaka wanɛ wambɔkɔmɔ wolo wa vɔ nkotsha ɛkɛndɛ awɔ wa l’okongamelo. (Osam. 84:5, 7; Is. 40:28-31) Onde wɛ atɛnaka mɛtɛ ka dui sɔ lo lɔsɛnɔ layɛ etena kakambayɛ olimu w’ekila? Onde wɛ nɔmbaka Jehowa mbala la mbala dia nde kokimanyiya la wolo ande, mbuta ate nyuma k’ekila?—Luka 11:13.
4. Lo woho akɔna wele lɔsɛnɔ la Mika ɛnyɛlɔ ka dimɛna efula le so ɛlɔ kɛnɛ?
4 Osalelo wa lolango laki Nzambi mbaki dui diakaleke ohomba lo lɔsɛnɔ la Mika. Nde akayashikikɛ dia ntshikala la kɔlamelo kaanga mbakandadingama l’anto waki la lɔkɛwɔ la mindo. Woho akɔ waamɛ mbele, kɔlamelo yaso mbidjamaka l’ohemba lushi la lushi. Ɔnkɔnɛ, nyɛsɔ tokeketsha yɛdikɔ yaso ya ‘nkɛndakɛnda lo lokombo la Jehowa Nzambi kaso pondjo pondjo.’—Mika 4:5.