Tayɔkɛndakɛndaka lo lokombo la Jehowa pondjo pondjo!
‘Tayɔkɛndakɛndaka lo lokombo la Jehowa pondjo pondjo.’—MIKA 4:5.
1. Nsango yakɔna yatanema lo tshapita 3 polo 5 ya prɔfɛsiya ka Mika?
JEHOWA ekɔ la dikambo dimɔtshi dia mbewoya ekambi ande, ndo nde ambokamba la Mika oko omvutshi ande. Sangwelo diaki Nzambi ele dia mbɔsɛ atshi wa kɔlɔ yɛdikɔ. Nde ayanga mbisha Isariyɛlɛ dilanya l’ɔtɛ wakawayasha l’ɔtɛmwɛlɔ wa dikishi. Koko, diɛsɛ ko Jehowa ayɔtshɔkɔla wanɛ wakɛndakɛnda lo lokombo lande. Nsango shɔ mɛnyama hwe tatɛ lo tshapita 3 polo 5 ya prɔfɛsiya ka Mika.
2, 3. (a) Ɛnɔmbɔdi w’Isariyɛlɛ wakahombe monga la dionga diakɔna, ko kakɔna mɛtɛ kakawasalaka? (b) Ngande wakokayɛ nembetshiya yoho y’ɛtɛkɛta yokambiwɔ lawɔ lo Mika 3:2, 3?
2 Omvutshi waki Nzambi mbutaka ate: “Nyulungi, nyu ete wa Jakoba, la embuledi wa khumbu ka Isariyele! Undi, nyu hanyuhumbi mbeya dialelu di’ololo?” Eelo mɛtɛ, ɔsɔ aki dikambo diakawahombe mbeya, ko kakɔna kewɔ lo sala mɛtɛ na? Mika mbutaka ate: “Nyu nyeli wane watuhetshaka [kɛnɛ kele] ololo, ku nyatulangaka [kɛnɛ kele] kolo. Nyu nyeli wane watuhatulaka antu ami wauwu, la emunyi uma lu weka awo. Nyu nyeli wane watolekaka ndu emunyi awo; watuwauwulaka wauwu, watuwaokolaka weka, watâsesaka tufunda tufunda, uku atuwosesaka nyama ya nkate lu puki, uku nyama lu puki ka wuki.”—Mika 3:1-3.
3 Lo mɛtɛ, ɛnɔmbɔdi ɛsɔ wekɔ lo pɛnyahɛnya ase wola, wanɛ waha l’ekokelo! Yoho y’ɛtɛkɛta wokambi lawɔ lanɛ yakokɛmaka hwe le wanɛ wakahokamɛka Mika. La ntondo ka katɛ nyama k’ɔkɔkɔ, pombaka ntondotondo mbokidiaka, ko minya lokoho, oma lâsɔ ko vɔ ndjokisɛsa. Mbala mɔtshi vɔ tɛtshatɛtshaka weka dia mbɔsa ehihɔ. Vɔ tɔkutshaka oyadi emunyi kana weka lo mpoke ka woke, oko kɛnɛ kakatɛkɛta Mika. (Ezekiyele 24:3-6, 10) Ɔsɔ ekɔ ɛnyɛlɔ ka dimɛna efula kɛnya woho wahɛnyahɛnyama anto oma le ɛnɔmbɔdi awɔ wa kɔlɔ!
Jehowa nongamɛka dia sho monga la losembwe
4. Otshikitanu akɔna waki lam’asa Jehowa l’ɛnɔmbɔdi w’Isariyɛlɛ?
4 Otshikitanu wa woke wakikɔ lam’asa Jehowa, Olami w’ɛkɔkɔ woludi la ngandji la ɛnɔmbɔdi w’ase Isariyɛlɛ. L’ɔtɛ wakiwɔ komonga la losembwe, vɔ kokotsha ɔkɛndɛ awɔ wa kokɛ ɛkɔkɔ. Koko la lokaki tshɛ, vɔ wakahɛnyahɛnyaka ɛkɔkɔ ɛsɔ wa didjidji nɛ dia vɔ kombasalombolɛka enongo la losembwe ndo vɔ wakâtshutshuyaka dia ‘mbitshola akila w’anto,’ oko wadiɛnya Mika 3:10. Wetshelo akɔna wakondjaso oma lo dikambo sɔ?
5. Kakɔna kalongamɛ Jehowa le wanɛ walɔmbɔla ekambi ande na?
5 Nzambi nongamɛka dia wanɛ wele l’ɛkɛndɛ l’atei w’ekambi ande sambola akambo la losembwe. Kɛsɔ mbasalema l’atei w’ekambi waki Jehowa ɛlɔ kɛnɛ. Ndo nto, dikambo sɔ mbɔtɔnɛka l’Isaya 32:1, lɛnɛ adiaso ɔnɛ: “Enda, khum’ekanga ayulela la sambu k’ololo, la ewandji wayolombola antu lu akambu w’usimbwi.” Ko kakɔna kaketaka lo nshi ya Mika na? ‘Wanɛ watohetshaka kɛnɛ kele ɔlɔlɔ, ndo watolangaka kɛnɛ kele kɔlɔ’ waki lo tetemala la sambola akambo aha la losembwe.
Alɔmbɛlɔ w’anto akɔna wakadimola Nzambi?
6, 7. Naa dikambo di’ohomba di’ɔtɛkɛtami lo Mika 3:4?
6 Onde anto wa kɔlɔ wakasɛnaka lo nshi ya Mika wakakokaka nongamɛ mpomɔ lokolo l’ɔlɔ lo washo wa Jehowa? Ndooko! Mika 3:4 mbutaka ɔnɛ: “Ku nyu nyayule[le]la [Jehowa], keli ndi hunyukela. L’etena keso ndi ayushe elundji kandi uma le nyu, ne dia nyu nyakafudia etsha anyu wa kolo.” Ɛtɛkɛta ɛsɔ mbikaka epole ɔsɛkɛ lo dikambo dimɔtshi di’ohomba efula.
7 Jehowa hatoka alɔmbɛlɔ aso naka tekɔ lo sala pɛkato. Kɛsɔ mbayokoma mɛtɛ naka tekɔ lo sɛna lɔsɛnɔ la dungi pende, mbut’ate, tekɔ lo mbishɛ etsha aso wa kɔlɔ etena kasɛmaso dia tekɔ lo kambɛ Nzambi la kɔlamelo. L’Osambu 26:4, Davidi akembe ate: “Dimi hatudjaseka kame l’akanga a kashi, kuyanga mengola kame l’akanga a lukesu.” Jehowa hatokadimola alɔmbɛlɔ waki anto wɔnyɔla Ɔtɛkɛta ande l’okonda!
Tambolodiama la nyuma ka Nzambi
8. Ɔhɛmwɛlɔ akɔna wakawasha amvutshi wa kashi wakasɛnaka lo nshi ya Mika?
8 Ɛnɔmbɔdi efula wa lo nyuma wa l’Isariyɛlɛ wekɔ lo sala mɛtɛ akambo amɔtshi wa kɔlɔ efula! Amvutshi wa kashi wekɔ lo minganyiya ekambi waki Nzambi lo nyuma. Ɛnɔmbɔdi wa lokaki watohangɔhangɔka ɔnɛ ‘wɔladi’ wayale koko l’etena kakɔ kâmɛ vɔ ‘watoyalɔngɔsɔlaka dia ndɔ la wanɛ wahawasha yangɔ ya vɔ ndɛ.’ Diakɔ diata Jehowa ate: “Utshu wayuya le nyu waha la enelo, ndu udjima wayuyala le nyu waha la diendjelu. Unya wayudjela amvutshi, yanyi yayuyala udjima ladiku diawo. Amenyi wayutshama sonyi, la wane watendjaka wayolombo la sonyi. Vo tshe wayukumba elomo awo.”—Mika 3:5-7a.
9, 10. ‘Ndiha ɛlɔmɔ’ kɛdikɛdi na, ndo lande na kaki Mika komonga l’ɔkɔkɔ wa sala dikambo sɔ?
9 Lande na ‘kayowokomba ɛlɛmɔ’ na? Ɔsɔ ekɔ dikambo diakasale anto wa kɔlɔ wa lo nshi ya Mika nɛ dia vɔ wakalɔwɛ la sɔnyi. Ndo anto wa kɔlɔ asɔ pombaka mɛtɛ mboka sɔnyi. “Nduku diui [diaya] uma le [Nzambi]” lo kɛnɛ kendana l’anto wa kɔlɔ asɔ. (Mika 3:7b) Jehowa hahokamɛ alɔmbɛlɔ w’anto wa kɔlɔ wele la lotamanya.
10 Mika komonga ndoko l’ɔkɔkɔ wa ‘diha ɛlɔmɔ ande.’ Nde komonga la sɔnyi. Jehowa akoke alɔmbɛlɔ ande. Tolembete kɛnɛ kele lo Mika 3:8, lɛnɛ ata omvutshi wa kɔlamelo ɔsɔ ate: “Keli le mi, dimi lambuludiama la wulu, la nyuma ka [Jehowa], la dialelu di’ololo, ndu la khudu tshe.” Mika akahombe mɛtɛ monga la lowando efula nɛ di’oma l’olimu w’edja ndo wa kɔlamelo wakandakambe, nde ‘akalodiamaka wonya tshɛ la nkudu ndo la nyuma ka Jehowa’! Dui sɔ diakawosha wolo wa “mvutela Jakoba uhedia andi, la Isariyele kolo kandi.”
11. Ngande wakondja anto wolo wa sambisha nsango yaki Nzambi?
11 Mika aki l’ohomba wa wolo woleki wɔnɛ wokongaka l’onto dia nde mbewoya losango laki Nzambi lendana l’elanyelo. Nde aki l’ohomba wa nyuma kaki Jehowa. Ko kayotota dikambo diaso na? Paka oma lo wolo watosha Jehowa l’ekimanyielo ka nyuma kande mbakokaso kotsha olimu aso wa sambisha. Ekɔ wolo sho tondoya olimu w’esambishelo naka tekɔ lo sala pɛkato l’okonda. Naka sho sala ɔsɔku, kete Nzambi hatoka alɔmbɛlɔ wɔlɔmbaso dia nde tosha wolo wa kamba olimu ɔsɔ. Sho hatokoke mɛtɛ mbewoya nsango y’elanyelo k’oma le Shɛso lele l’olongo naka sho kema la ‘nyuma ka Jehowa.’ Oma l’alɔmbɛlɔ wokɛma ndo l’ekimanyielo ka nyuma k’ekila, tekɔ l’akoka wa mbewoya ɔtɛkɛta wa Nzambi la dihonga tshɛ oko Mika.
12. Lande na kaki ambeki waki Yeso wa lo ntambe ka ntondo l’akoka wa ‘tetemala la sambisha ɔtɛkɛta wa Nzambi la dihonga tshɛ’?
12 Ondo wɛ akohɔ ɔkɔndɔ wa l’Etsha 4:23-31. Ohoyaɔsa oko ombeki ɔmɔtshi waki Yeso wa lo ntambe ka ntondo. Ko asoyanyi wekɔ lo nyanga dia shimba ambeki wa Kristo di’aha vɔ sambisha. Koko akanga wa kɔlamelo asɔ wambɔlɔmba Nkum’Olongo vate: “Khumadiondjo, kakiane, ulungi aui awo wa dianelu. Usha ekambi aye dia vo mvuta diui la dihunga tshe.” Kakɔna kakatombe na? Lam’akawalɔmbɛ, dihole diakawasangana diakasutshasutshama, vɔ tshɛ wakalodiama la nyuma k’ekila ndo wakatɛkɛta ɔtɛkɛta wa Nzambi la dihonga tshɛ. Nyɛsɔ toyaɛkɛke le Jehowa lo dɔmbɛlɔ ndo toyaɛkɛke l’ekimanyielo katoshande lo tshimbo ya nyuma kande dia sho kotsha olimu aso.
13. Kakɔna kayokomɛ Jerusalɛma la Juda, ndo lande na?
13 Tokanyiya kakianɛ kɛnɛ kaketaka lo nshi ya Mika. Mika 3:9-12, mɛnyaka dia ɛnɔmbɔdi wa wodja wele l’onongo w’akila w’anto watolomboshaka dia kondja mbo y’otsho, ɛlɔmbɛdi watetshaka dia kondja difuto ndo amvutshi wa kashi watotaka akambo wahataye dia kondja falanga. Diakɔ diele, aha la tâmu, Nzambi akate dia Jerusalɛma, kapitalɛ ka Juda ‘ayotshikala tɔngɔ to’! Lam’ele ɔtɛmwɛlɔ wa kashi wakafulanɛ nto l’Isariyɛlɛ ndo anto wakaleke monga la lɔkɛwɔ la kɔlɔ, Mika akasokoyama dia mbewola anto dia Nzambi ayetɛ Samariya oko “tuta di’elanyelu.” (Mika 1:6) Ɔnkɔnɛ, Mika akɛnyi woho wakalanyema Samariya oma le alembe w’ase Asuriya l’ɔnɔnyi 740 N.T.D. (2 Khumi ya Dikanga 17:5, 6; 25:1-21) Ekɔ mɛtɛ dia losango l’ohomba lendana l’elanyelo ka Jerusalɛma la Samariya lɔsɔ lakahombe mbewoyama paka oma lo wolo w’oma le Jehowa.
14. Ngande wakakotshama prɔfɛsiya kele lo Mika 3:12, ndo shɛngiya yakɔna yahomba monga la dikambo sɔ le so?
14 Juda lawɔ hatohandɔ dia nanyema oma le Jehowa. L’ekotshamelo ka prɔfɛsiya kofundami lo Mika 3:12, Siɔna “ayukambema uku ekambo,” ndo Jerusalɛma ayokoma oko “tuta di’elanyelu.” Oma l’eokelo kele laso lo ntambe ka 21 kɛnɛ, sho mbeyaka di’akambo asɔ wakakotshama etena kakalanya ase Babilɔna Juda ndo Jerusalɛma lo 607 N.T.D. Dikambo sɔ diakasalema ɛnɔnyi ndekana lokama l’ɔkɔngɔ wa Mika mbewoya awui asɔ, koko nde aki l’eshikikelo ɔnɛ awui akɔ wayokotshama. Lo mɛtɛ, sho pombaka monga l’eshikikelo ɔnɛ dikongɛ nɛ di’akambo dia kɔlɔ diayolanyema lo ‘lushi laki Jehowa’ lakalakema.—2 Petero 3:11, 12.
Jehowa ambodja akambo l’ɔnɔngɔ
15. Ngande wakokayɛ nembetshiya l’ɛtɛkɛta ayɛ hita prɔfɛsiya kele lo Mika 4:1-4?
15 Naka tayoka washo l’ɔkɔngɔ, kete tayɛna di’oma lâsɔ, Mika akewoya losango l’ɔngɛnɔngɛnɔ efula lasha elongamelo. Lo Mika 4:1-4, sho tanaka ɛtɛkɛta wakeketsha mɛtɛ! Mika mbutaka tshenyi mɔtshi tsho ate: “Keli lu nshi yayayi, ukungu wa luudu la [Jehowa] wayushikikala l’ete w’ekungu. Vo wayediama ladiku dia akuna, antu wayumbela loko. . . . Ndi ayulumbuya wedja efula, ayusambula akambu wa wedja a wulu w’etali. Vo wayutshula tombo tawo kungu, la akonga awo tukuwa ta loho. Wudja hawuyedia tombo tawo dia ndo la wudja ukina, kuyanga mbeka akambu wa ta ntu. Keli vo wayudjase, untu l’untu la tshina di’okodi andi wa vinyo, ndu la tshina dia utamba andi wa fingu. Ku nduku untu ayuwautsha woma, ne dia unyo wa [Jehowa] Kanga lulimbilimbi wakati dikambo diako.”
16, 17. Ngande wakotshama Mika 4:1-4 ɛlɔ kɛnɛ?
16 Waa na wele “wedja efula” ndo “wedja a wulu” watɛkɛtawɔ lanɛ na? Aha wedja ndo mandji ya l’andja ɔnɛ. Koko prɔfɛsiya kɛsɔ kekɔ lo tɛkɛta dikambo di’anto w’oma lo wedja tshɛ wambosangana kakianɛ l’olimu w’ekila lo dikona di’ɔtɛmwɛlɔ wa mɛtɛ wa Jehowa.
17 Lo ndjela prɔfɛsiya ka Mika, kem’edja ɔtɛmwɛlɔ wa pudipudi waki Jehowa wayokokanɛ lo nkɛtɛ k’otondo. Ɛlɔ kɛnɛ, ‘anto wakoka kondja lɔsɛnɔ la pondjo’ wekɔ lo mbetshama mboka yaki Jehowa. (Etsha 13:48) Jehowa ekɔ lo nombosha ndo mbidja akambo l’ɔnɔngɔ lo yoho ya lo nyuma dikambo di’ambetawudi weta la Diolelo wedi. Vɔ wayoka ‘lo fɔnu ka woke’ nɛ dia wekɔ anto wa lo ‘lemba la woke.’ (Enyelo 7:9, 14) Oko wambowotshula tɔɔmbɔ tawɔ nkongo, kânga ndo ɛlɔ kɛnɛ vɔ sɛnaka lo wɔladi vɔ l’Ɛmɛnyi wa Jehowa w’asekawɔ ndo vɔ l’anto akina. Ekɔ mɛtɛ ɔngɛnɔngɛnɔ monga l’atei awɔ!
Tamboyashikikɛ dia nkɛndakɛnda lo lokombo laki Jehowa
18. ‘Mbidjasɛ la tshina dia vinyɔ ndo k’otamba wa fingo’ alangande mɛnya’?
18 Lo nshi yaso nyɛ, yele anto tshɛ wa lanɛ la nkɛtɛ wekɔ lo sɛna lo wɔma, tekɔ l’ɔngɛnɔngɛnɔ lo woho weka anto efula mboka ya Jehowa. Tekɔ lo nongamɛ l’asolo walomɔlomɔ etena kɛnɛ kaya suke kele anto tshɛ woka Nzambi ngandji hawoteka ata nto, koko wayodjasɛ onto l’onto l’ekambɔ kande ka vinyɔ ndo la tshina di’otamba ande wa fingo. Ɛkɔdi wa fingo monɛmaka mbala efula l’ekambɔ ka vinyɔ. (Luka 13:6) Mbidjasɛ la tshina dia vinyɔ ndo k’otamba wa fingo mɛnyaka di’onto ekɔ lo wɔladi, ekɔ lo sɛna l’ɔngɔnyi ndo lo lotui tshitshi. Kânga kakianɛ, diɔtɔnganelo diasaso la Jehowa toshaka wɔladi wa lo yimba ndo ekokelo ka lo nyuma. Lam’ayonga anto la yoho ya lɔsɛnɔ la ngasɔ l’ɛlɔmbwɛlɔ ka Diolelo, hatotonga kânga la yema ya wɔma ndo tayonga la lotui tshitshi la tshɛ.
19. Kakɔna kalembetshiya kɛndakɛnda lo lokombo la Jehowa?
19 Dia mbetawɔma le Jehowa, sho pombaka kɛndakɛnda lo lokombo lande. Kɛsɔ mbatɛnyawɔ la wolo tshɛ lo Mika 4:5, lɛnɛ ata omvutshi ɔsɔ ate: ‘Wedja tshɛ, wodja la wodja watɔkɛndakɛndaka lo lokombo la jambizambi yawɔ, kele sho, tayɔkɛndakɛnda lo lokombo la Jehowa Nzambi kaso pondjo pondjo.’ Kɛndakɛnda lo lokombo la Jehowa halembetshiya mbuta tsho ɔnɛ nde kele Nzambi kaso. Kɛsɔ halɔmbɛ tsho mbishaka kɔmatɛrɛ lo nsanganya y’Akristo kana ndjasha l’olimu w’esambishelo kânga mbele akambo asɔ wekɔ nto ohomba efula. Naka talanga kɛndakɛndaka lo lokombo la Jehowa, sho la dia ndjakimɔ le nde ndo sala la wolo tshɛ dia mbokambɛ la kɔlamelo, la ngandji ndo l’anima aso tshɛ. (Mateu 22:37) Ndo oko weso atɛmɔdi wa mɛtɛ, tambɔsa yɛdikɔ ya kɛndakɛnda lo lokombo la Jehowa Nzambi kaso pondjo pondjo.
20. Kakɔna kakatɛkɛtama lo Mika 4:6-13?
20 Kakianɛ, nyɛsɔ tɔsɛdingole ɛtɛkɛta wa prɔfɛsiya wele lo Mika 4:6-13. “Ona umuntu a Siona” ayɔtɔlama lo lɔhɔmbɔ ‘etale efula la Babilɔna.’ Kɛsɔ mbakakomɛ ase Jerusalɛma lo ntambe k’esambele N.T.D. Koko, prɔfɛsiya ka Mika mɛnyaka di’atshikadi wakahombe kawola la Juda, ndo lo ɛlɔngɔswɛlɔ ka Siɔna, Jehowa ayoyashikikɛ dia atunyi wa Siɔna wambolanyema.
21, 22. Ngande wakakotshama Mika 5:2?
21 Mika tshapita 5 akate akambo akina wa diambo wakahombe kotshama. Ɛnyɛlɔ, tende kɛnɛ kotami lo Mika 5:2-4. Mika akate di’Ɔnɔmbɔdi wakasɔnama oma le Nzambi, “[w]akatongo umaka nshi y’edjedja,” ayotomba oma la Bɛtɛlɛhɛma. Nde ayolɛ oko olami w’ɛkɔkɔ ‘lo wolo wa Jehowa.’ Ndo nto, Ɔnɔmbɔdi ɔsɔ ayonga woke, aha tsho l’Isariyɛlɛ, koko “ndu lu [to]kuma [t]a kete.” Anto wa l’andja ɔnɛ lo tshɛ kawɔ koka monga ko haweye Ɔnɔmbɔdi ɔsɔ, koko sho mbêyaka dimɛna.
22 Onto akɔna lakotɔ la Bɛtɛlɛhɛma lakaleke lokumu na? Ndo onto akɔna ‘ayoyala woke polo ndo lo tokoma ta nkɛtɛ’? Onto ɔsɔ ekɔ paka Mɛsiya, Yeso Kristo! Lam’akambola Herɔdɛ wa Woke ewandji w’ɛlɔmbɛdi ndo afundji lɛnɛ akahombe Mɛsiya mbotɔ, vɔ wakokadimola vate: “La Betelehema ka la Judiya.” Vɔ wakavusola ɛtɛkɛta wa lo Mika 5:2. (Mateu 2:3-6) Anto k’anto amɔtshi wakeyaka vɔ lawɔ dikambo sɔ, nɛ dia Joani 7:42 vusolaka kɛnɛ kakawate ɔnɛ: “Undi, efundelu hati ati: Kristu ayuyala kanula ya Davidi, ayuya uma la Betelehema, lu ngelu kaki Davidi?”
Ekeketshelo ka mɛtɛ le anto
23. Kakɔna kasalema nshi nyɛ l’ekotshamelo ka Mika 5:7?
23 Mika 5:5-15 tɛkɛtaka woho wakatondoya yema tsho ase Asuriya dia mbɔtwɛ ase Juda la ta, ndo mɛnyaka dia Nzambi ayosha wedja w’ehedia dilanya. Mika 5:7 ndakaka dikambo diendana l’okalwelo w’atshikadi w’ase Juda wakayatshumoya lo wodja awɔ wa lôtɔ, koko ɛtɛkɛta ɛsɔ mendanaka nto la so ɛlɔ kɛnɛ. Mika akate ate: “Ku atshikadi wa Jakoba wayuyala l’atei a wedja efula, uku dihohe di’uma le [Jehowa], uku apopo w’ashi ladiku dia adiyu, wahatutshimbatshimbaka dikambu dia antu kuyanga nkunga dikambu dia ana w’antu.” Mika akakambe l’ɛtɛkɛta wa didjidji woludi la ngandji ɛsɔ dia mɛnya di’atshikadi wa Jakɔba wa lo nyuma, kana Isariyɛlɛ, wayonga ɔtshɔkɔ w’oma le Nzambi le ekambi ande. “Ekoko ekina” waki Yeso wanɛ wele l’elongamelo ka sɛna lanɛ la nkɛtɛ, wekɔ l’ɔngɛnɔngɛnɔ dia kamba dihɛka lo dihɛka l’atshikadi wa “Isariyele wa [Nzambi],” dia kimanyiya dia keketsha anto akina lo nyuma. (Joani 10:16; Ngalatiya 6:16; Zefaniya 3:9) Lo dikambo sɔ, ekɔ dui dikina nto diahombama kana yimba. Oko weso apandjudi wa Diolelo, sho tshɛ pombaka ngɛnangɛna diɛsɛ diele laso dia mbisha anto ekeketshelo ka mɛtɛ.
24. Naa awui amɔtshi w’oma lo tshapita ya 3 polo 5 wa lo prɔfɛsiya ka Mika wambokambia?
24 Wetshelo akɔna wamboyokondja oma lo tshapita 3 polo ya 5 ya prɔfɛsiya ka Mika? Ondo wetshelo ɛnɛ: (1) Nzambi nongamɛka dia wanɛ wele l’ɛkɛndɛ l’atei w’ekambi ande monga la losembwe. (2) Jehowa hatoka alɔmbɛlɔ aso naka sho salaka pɛkato l’okonda. (3) Sho koka kotsha ɔkɛndɛ aso wa sambisha paka oma lo wolo watosha Jehowa l’ekimanyielo ka nyuma kande k’ekila. (4) Dia sho mbetawɔma le Nzambi, sho pombaka ndjashikikɛ dia kɛndakɛnda lo lokombo la Jehowa. (5) Oko weso apandjudi wa Diolelo, sho pombaka ngɛnangɛna diɛsɛ diele laso dia mbisha anto ekeketshelo ka mɛtɛ. Ekɔ akambo akina wele ondo wakongi la shɛngiya le so. Ko kakɔna kakokaso mbeka nto oma lo dibuku nɛ dia lo Bible diele l’awui wa prɔfɛsiya na? Wekelo wa mbala kayaye wayotokimanyiya dia kondja wetshelo w’amɛna oma lo totshapita tohende ta prɔfɛsiya ka Mika kakeketsha mbetawɔ Mika tshapita 6, 7.
Ngande wayoyokadimola?
• Kakɔna kalongamɛ Nzambi le wanɛ walɔmbɔla ekambi ande?
• Lande na kele dɔmbɛlɔ ndo nyuma k’ekila ohomba lo kɛnɛ kendana l’olimu wakambɛso Jehowa?
• Ngande ‘wakɛndakɛnda anto lo lokombo la Jehowa’?
[Osato wa lo lɛkɛ 12]
Onde wɛ koka nembetshiya ɛnyɛlɔ kakakambe la Mika kendana la mpoke kakatɛwɔ?
[Esato wa lo lɛkɛ 15]
L’ɛnyɛlɔ ka Mika sho tekɔ lo kamba olimu aso la dihonga