‘Tɔngɛnangɛnake le Jehowa’

“Ongenangenaki le [Jehowa], ku ndi ayukusha kene kalanga utema aye.”​—Osambu 37:4.

1, 2. Ele Kiɔkɔ y’ɔngɛnɔngɛnɔ wa mɛtɛ, ndo ngande wakakotola Nkumekanga Davidi yambalo yaso lo dikambo sɔ?

‘WANƐ weya dia wekɔ wola lo nyuma wekɔ l’ɔngɛnɔngɛnɔ, . . . wanɛ wele l’etema wa kɛtshi wekɔ l’ɔngɛnɔngɛnɔ, . . . akanga wa wɔladi wekɔ l’ɔngɛnɔngɛnɔ.’ Ɛtɛkɛta ɛsɔ kâmɛ l’awui akina asamalo wendana la wanɛ wele l’ɔngɛnɔngɛnɔ, mbakenga mbɔtwɛlɔ ka dimɛna ka Dako dia diambo dia lo Dikona diakasha Yeso, oko wofundamidiɔ l’evanjiliɔ wakafunde Mateo. (Mateu 5:3-11) Ɛtɛkɛta waki Yeso mbishaka eshikikelo dia sho kokaka monga l’ɔngɛnɔngɛnɔ.

² Osambo ɔmɔtshi wakafundama oma le Nkumekanga Davidi ka l’Isariyɛlɛ w’edjedja kotolaka yambalo yaso otsha le ɔnɛ lele kiɔkɔ y’ɔngɛnɔngɛnɔ wa mɛtɛ, mbut’ate Jehowa. Davidi akate ate: “Ongenangenaki le [Jehowa], ku ndi ayukusha kene kalanga utema aye.” (Osambu 37:4) Bonde kele mbeya Jehowa ndo awui efula wendana la lonto lande toshaka ‘ɔngɛnɔngɛnɔ’? Ngande wele ɔsɛdingwelo wa kɛnɛ kakandasale ndo kayondosala dia kotsha sangwelo diande koshaka elongamelo ka nongola “kene kalanga utema aye”? Ɔsɛdingwelo wa la yambalo tshɛ w’​Osambu 37, divɛsa 1 polo 11, mbishaka ekadimwelo lo wembola ɛsɔ.

“Tukaki . . . kandjema”

3, 4. Oko wofundamidiɔ l’​Osambu 37:1, dako diakɔna diakasha Davidi, ndo lande na kediɔ ohomba ɛlɔ kɛnɛ?

³ Tekɔ lo sɛna lo “tena dia wulu,” ndo awui wa kɔlɔ wekɔ lo tafulanɛ. Tambɛna ekotshamelo k’ɛtɛkɛta waki ɔpɔstɔlɔ Paulo wata ɔnɛ: “Antu wa kolo la akanga a lukesu wayuhama lu akambu awo wa kolo; vo wayukesana, ku wayukesama.” (2 Timote 3:1, 13) Lɔsɛnɔ lɛnama oko l’ɔngɔnyi lele l’anto wa kɔlɔ kokaka esadi eto monga la shɛngiya le so! Awui asɔ tshɛ kokaka tekola timba, ndo dikambo sɔ mbeyaka fukutanya ɛnɛlɔ kaso ka lo nyuma. Tolembete woho watewola ɛtɛkɛta wa mbɔtwɛlɔ w’Osambu 37 oma lo wâle ɔsɔ wakoka tokomɛ ɔnɛ: “Tuyatshumuyaki ne dia atshi wa kolo, tukaki wane watutshaka kolo kandjema.”

⁴ Lushi tshɛ tekɔ lo nongola lokema la nsango ya lonyangu yendana l’awui wa kɔlɔ wasalema lo tita sango. Amundji w’ekanda wa lokeso wekɔ lo tahame l’ekanda awɔ paka la lokeso. Dengalenga wekɔ lo mɛngiya wanɛ wele bu l’ekokelo. Andjakanyi wekɔ lo tatetemala ndjaka anto aha la nongola dilanya. Bɛnyɛlɔ sɔ tshɛ diɛnya woho wahayoyela anto losembwe kokaka tosha kɛlɛ kana fukutanya ki kaso ka lo yimba. Sho mbeyaka kânga ndjɔkɔmiya yoho ya lɔsɛnɔ lɛnama oko l’ɔngɔnyi lele l’atshi wa kɔlɔ. Ko onde ekiyanu aso mbayoshidiya akambo asɔ? Onde kandjema kakokaso monga la tɔ lo dikambo dia lɔsɛnɔ lɛnama oko l’ɔngɔnyi lele l’anto wa kɔlɔ kokaka tshikitanya kɛnɛ kahomba mbakomɛ? Ndooko! Ndo sho bu l’ohomba wa ‘ndjatshumoya.’ Lande na?

5. Lande na kele atshi wa kɔlɔ wekɔ oko adiyo?

⁵ Omembi w’esambo ekɔ lo kadimola ate: “Vo wayuhimbwama esadi uku adiyu, wayolengela uku adiyu w’eyuyu.” (Osambu 37:2) Adiyo w’ɔmɔngɛla wekɔ amɛna lo washo, koko hawɔkɔhɛ la nɛngɛ ndo la mvɔ. Ɔsɔku mbele ndo atshi wa kɔlɔ. Yoho yawɔ ya lɔsɛnɔ lɛnama oko ɔngɔnyi ekɔ paka la tshanda mɔtshi tsho. Lam’avɔwɔ, diangɔ diakawakondja lo yoho ya kɔlɔ hatâkimanyiyaka. L’ekomelo onto tshɛ nongolaka kɛnɛ kalɔmba losembwe. Paulo akafunde ate: “Difutu di’akambu wa kolo ele nyoi.” (Romo 6:23) L’ekomelo atshi wa kɔlɔ ndo wanɛ wele bu la losembwe wayolongola “difutu” diawɔ dia pondjo. Ɔsɔ mɛtɛ ekɔ yoho ya lɔsɛnɔ yele kema la wahɔ!​—Esambu 37:35, 36; 49:16, 17.

6. Wetshelo akɔna wakokaso kondja oma l’​Osambu 37:1, 2?

⁶ Ko lâsɔ, onde sho kokaka mbetawɔ di’ɔngɔnyi wahaviya wele l’atshi wa kɔlɔ totshindja timba? Wetshelo w’oma l’avɛsa ahende w’etatelo w’Osambu 37 vɔ ɔnɛ: Tetawɔke di’ɔngɔnyi awɔ kotakoya mboka kakayasɔnɛ dia kambɛ Jehowa. Tetemala mbidja yimba l’ɛtshɔkɔ ndo l’eyango wa lo nyuma.​—Tukedi 23:17.

“Ekamaki [Jehowa], utshaki ololo”

7. Lande na kahombaso ndjaɛkɛ le Jehowa?

⁷ Omembi w’esambo ekɔ lo tokeketsha ate: “Ekamaki [Jehowa], utshaki ololo.” (Osambu 37:3a) Lam’adiɛnɛso l’ekiyanu kana l’akambo amɔtshi wavɔso tshɔda, sho pombaka ndjaɛkɛ tshɛ le Jehowa. Nde mbele Ɔnɛ latoshaka ekokelo ka lo nyuma. Mɔsɛ akafunde ate: “One latudjaseka lu ekumbelu ka Khum’Ulungu, kayuyala lu didjidji dia Kanga–Wulu-Tshe.” (Osambu 91:1) Lam’ayakiyanyaso l’ɔtɛ w’ɛɔnywɛlɔ k’ɛlɛmbɛ katatetemala pama lo dikongɛ di’akambo nɛ, tekɔ l’ohomba wa ndjaɛkɛ tshɛ le Jehowa. Naka tambosekɔ lokolo, tayɔngɛnangɛna di’ɔngɛnyi aso ɔmɔtshi tosukɛ. Woho akɔ wâmɛ, lam’ayaketembolaso dia kɛndakɛnda la kɔlamelo, sho mongaka l’ohomba w’esukelo kaki Jehowa.​—Isaya 50:10.

8. Ngande wakoka woho wayashaso l’olimu w’Okristo tokimanyiyaka dia mbewɔ ndjakiyanya l’ɔtɛ w’ɔngɔnyi wele l’atshi wa kɔlɔ?

⁸ Di’aha sho ndjakiyanya l’ɔtɛ wa lɔsɛnɔ l’ɔngɔnyi lele l’atshi wa kɔlɔ, sho pombaka ndjasha dia nyanga ndo kimanyiya anto wele oko ɛkɔkɔ dia vɔ koma l’ewo k’oshika ka sangwelo dia Jehowa. Lo menda woho watafulanɛ awui wa kɔlɔ, sho pombaka ndjasha tshɛ dia kimanyiya akina. Ɔpɔstɔlɔ Paulo akate ate: “Tanyuhelaki ntshanela ololo la nkimanyanyiana, ne dia [Nzambi] atongenangenaka l’elambu wa wuhu oso.” “Ololo” woleki woke wokokiso sala ele sambisha akina losango la diambo ndo l’ɔlɔlɔ la Diolelo diaki Nzambi. Esambishelo kaso ka lo sɛkɛ ekɔ mɛtɛ ‘olambo wa lotombo.’​—Heberu 13:15, 16; Ngalatiya 6:10.

9. Lembetshiya dako diaki Davidi diata ɔnɛ: “We ayudjase la kete.”

⁹ Davidi ekɔ lo tetemala ate: “We ayudjase la kete, ayulutshama uma lu kolamelu.” (Osambu 37:3b) Lo nshi ya Davidi, tshɛkɛta “kete” yakalembetshiyaka ɛtshi ka nkɛtɛ kakasha Jehowa ase Isariyɛlɛ, mbut’ate, Nkɛtɛ ya Daka. Lo Diolelo dia Nkumekanga Sɔlɔmɔna, olelo ayɔ waki oma la Danɛ lo nɔrdɛ polo la Bɛrɛ-Shɛba lo sudɛ. Ɔsɔ mbaki edjaselo k’Isariyɛlɛ. (1 Khumi ya Dikanga 4:25) Ɛlɔ kɛnɛ, l’oseka dihole tshɛ diasɛnaso lanɛ la nkɛtɛ, tekɔ lo kongɛ etena kayokadimɔ nkɛtɛ k’otondo paradiso l’andja w’oyoyo wa losembwe. Lam’akatakongɛ etena kɛsɔ, tekɔ lo nsɛna l’ekokelo ka lo nyuma.​—Isaya 65:13, 14.

10. Kakɔna kayotolongola ‘lam’asalaso akambo la kɔlamelo’?

¹⁰ Etombelo akɔna wayotokondja naka tayonga la “kolamelu”? Yokedi mɔtshi yakasambiyama oma le Nzambi toholaka ɔnɛ: “Kanga kolamelu atuludiamaka l’etshoko.” (Tukedi 28:20) Woho watetemalaso la kɔlamelo tshɛ l’esambishelo ka lokumu l’ɔlɔlɔ l’oseka dihole tshɛ dieso ndo woho wasambishaso onto tshɛ kokaka mɛtɛ tela ɛtshɔkɔ oma le Jehowa. Oko ɛnyɛlɔ, Frank nde la wadɛnde Rose, wakɔshi ɔkɛndɛ wa kamba oko ambatshi mboka ambeta oko ɛnɔnyi 40 lo nɔrdɛ ka wodja wa Ecosse. Yema y’anto tshitshɛ wakɛnya mposa l’akambo wa mɛtɛ wakatakɔ mboka la ntondo k’atshukanyi asɔ tomama lɛkɔ. Aha la kɔmɔ otema, atshukanyi asɔ w’ambatshi mboka wakatatɛ sambisha ndo mbetɛ anto ambeki. Ɛlɔ kɛnɛ etshumanelo katafulanɛ kekɔ lo wodja ɔsɔ. Atshukanyi asɔ wa kɔlamelo wakakondja mɛtɛ ɛtshɔkɔ oma le Jehowa. La ndjâkitshakitsha tshɛ, Frank ekɔ lo mbut’ate: “Ɔtshɔkɔ woleki woke tshɛ ele tekɔ lo tetemala lo mɛtɛ ndo Jehowa akakoke kamba la so.” Eelo, ‘lam’asalaso akambo la kɔlamelo,’ sho nongolaka ɛtshɔkɔ efula ndo sho ngɛnangɛnaka ɛtshɔkɔ akɔ.

‘Tɔngɛnangɛnake le Jehowa’

11, 12. (a) Ngande wakokaso ‘ngɛnangɛnaka le Jehowa’? (b) Oyango akɔna wakokayɛ ndjadjɛ lo kɛnɛ kendana la wekelo w’onto ndamɛ, ndo etombelo akɔna wakokayɛ kondja?

¹¹ Dia keketsha diokanelo diele lam’asaso la Jehowa ndo dia tetemala ndjaɛkɛ le nde, sho pombaka ‘ngɛnangɛnaka le Jehowa.’ (Osambu 37:4a) Ngande wakokaso sala dikambo sɔ? Lo dihole dia sho ndjakiyanyaka paka l’ekakatanu aso hita, oyadi wolo wa ngande wewɔ, sho pombaka ndjakiyanyaka dikambo dia Jehowa. Yoho mɔtshi yakokaso sala dikambo sɔ ele lo tshungola etena ka mbadiaka Ɔtɛkɛta ande. (Osambu 1:1, 2) Onde wadielo ayɛ wa Bible kelaka ɔngɛnɔngɛnɔ? Vɔ wayokela ɔngɛnɔngɛnɔ naka wɛ ayadiaka l’oyango wa mbeka awui efula wendana la Jehowa. Lande na kahayomuya yema l’ɔkɔngɔ wa wɛ mbadia etenyi kɛmɔtshi ka Bible ko wɛ ndjambola wate: ‘Kakɔna kambetsha divɛsa sɔ lo kɛnɛ kendana la Jehowa?’ Wɛ mbeyaka mɛna ohomba monga la kalupɛ ya tafundaka awui, kana akatshi amɔtshi l’anya wonya wadiɛyɛ Bible. Wonya tshɛ wemalayɛ dia kana yimba lo kitshimudi y’olembetshiyelo wa kɛnɛ komayɛ la mbadia, funda ɔnɔngɔ ɔmɔtshi wakohola dionga dia Nzambi dimɔtshi diakɔngɛnyangɛnya. L’osambo okina, Davidi akembe ɔnɛ: “Aui wa unyo ami la tukanyi t’utema ami wayali ololo lu ashu aye, we [Jehowa], Dive diami la Utshungudi ami.” (Osambu 19:14) Jehowa ngɛnangɛnaka etena kayashaso tshɛ l’Ɔtɛkɛta ande ndo dikambo sɔ tɔngɛnyangɛnyaka sho lawɔ.

¹² Ngande wakokaso kondja ɔngɛnɔngɛnɔ oma lo wekelo aso ndo oma l’okanelo aso wa yimba? Sho kokaka ndjadjɛ oyango wa mbeka awui efula lo dikambo dia Jehowa ndo dia mboka yande. Abuku wele oko Onto Loleki Woke lo Tena Tshɛ ndo Approchez-vous de Jéhovaha mbishaka alako efula wakokaso kana lawɔ yimba la lowando tshɛ. Lo wedi okina, Davidi ekɔ lo shikikɛ akanga wa losembwe dia Jehowa ‘ayowasha kɛnɛ kalanga etema awɔ.’ (Osambu 37:4b) Ekɔ paka eshikikelo ka ngasɔ mbakatshutshuya ɔpɔstɔlɔ Joani dia nde funda ɛtɛkɛta ɛnɛ ɔnɛ: “Dihunga ne mbeli la su le ndi shati: Naka shu tayolomba engo uku lulangu landi, ndi ayutukela. Naka shu tambeya shati: Ndi atutukelaka lu kene katutôlombaka, shu mbeyaka shati: Shu tambulungula kene kakatalombe.”​—1 Joani 5:14, 15.

13. L’ɛnɔnyi weke ka mbeta ɛnɛ, ohamelo akɔna wendana l’esambishelo ka Diolelo wakasalema lo wedja efula?

¹³ Oko weso anto walama olowanyi, kɛnɛ kolekiso ngɛnangɛna ele mɛna woho wayindjama lowandji laki Jehowa. (Tukedi 27:11) Kema etema aso fukɔfukɔka l’ɔngɛnɔngɛnɔ lam’okaso dikambo di’esambishelo ka woke kasala anangɛso wele lo wedja walɔmbwama oma le mandji ya tohadi? Sho nongamɛka l’asolo walomɔlomɔ dia nyomokondja lotshungɔ nto la ntondo. Ekambi wa Jehowa efula wa lo wedja wele la lotshungɔ la kamba olimu awɔ w’Okristo, wekɔ lo ndjasha dia sambisha ambeki, ase dawo, ndo anto akina wele lo wedja awɔ lo tshanda mɔtshi ndo wekɔ lo ngɛnangɛna la lotshungɔ l’ɔtɛmwɛlɔ. Sho kombolaka mɛtɛ di’anto asɔ totetemala la pɛtsha osase w’akambo wa mɛtɛ lam’akalolawɔ lo ngelo yawɔ, lɛnɛ ele olimu awɔ w’Okristo amboshimbamaka.​—Mateu 5:14-16.

‘Oyakimɔ le Jehowa’

14. Djembetelo yakɔna yɛnya dia sho kokaka ndjaɛkɛ le Jehowa?

¹⁴ Ekɔ mɛtɛ ekeketshelo dia mbeya ɔnɛ ekiyanu aso ndo kɛnɛ kakokaso mɛna oko wɛngiya kokaka shila! Ngande wayoshila akambo asɔ na? Davidi ekɔ lo mbuta ɔnɛ: “Uyakimo le [Jehowa], ekamaki le ndi, ku ndi ayukutshela dikambu diako.” (Osambu 37:5) Tekɔ la djembetelo ya hwe lo tshumanelo diaso yɛnya dia sho kokaka ndjaɛkɛ le Jehowa dia nyanga esukelo. (Osambu 55:22) Wanɛ wele l’olimu wa lo tena tshɛ, mbut’ate ambatshi mboka, emendji w’eteta, waa misiɔnɛrɛ, kana wanɛ wakayakimɔ la lolango lawɔ dia kamba lo Bɛtɛlɛ, vɔ tshɛ mbishaka djembetelo ya hwe yɛnya dia Jehowa tokanɛka. Bonde kahayasawola l’ɔmɔtshi l’atei awɔ ndo mombola ngande wâkimanyiya Jehowa? Aha la tâmu wɛ ayoka bɛnyɛlɔ diɛnya dia kânga lo tena dia wolo, lonya la Jehowa hongaka mondo dia mbakimanyiya. Nde atowashaka mbala tshɛ kɛnɛ kele ohomba lo lɔsɛnɔ.​—Osambu 37:25; Mateu 6:25-34.

15. Ngande wangamula losembwe l’ekambi waki Nzambi?

¹⁵ Naka sho ndjaɛkɛ tshɛ le Jehowa, kete tayɛna mɛtɛ k’ɛtɛkɛta ekina waki omembi w’esambo wata ɔnɛ: “Ndi ayudianganya sambu kaye k’ololo uku usasi, la ololo aye uku yanyi ya midi.” (Osambu 37:6) Oko weso Ɛmɛnyi wa Jehowa, mbala efula vɔ mbutaka awui wa kashi lo lokombo laso. Koko Jehowa ekɔ lo ndihola washo w’anto wele l’etema w’ɔlɔlɔ dia mbakimanyiya dia vɔ mbeya ɔnɛ ngandji kaso otsha le nde ndo le asekaso anto mbatotshutshuya dia kamba olimu aso wa lo sɛkɛ. L’etena kakɔ kâmɛ, dionga diaso di’ɔlɔlɔ mɛnamaka hwe kânga mbata anto efula awui wa kashi lo lokombo laso. Jehowa tosukɛka oma lo weho tshɛ w’ɔlɔshamelo ndo w’ɛhɛnyɔhɛnyɔ. Oko etombelo, losembwe l’ekambi waki Nzambi lekɔ lo ngamula oko watongamulaka wonya la midi.​—1 Petero 2:12.

‘Oyale ki, okongɛ̂ke la nsaki k’efula’

16, 17. Lo ndjela kɛnɛ kele l’​Osambu 37:7, ɔnɛ ekɔ etena kakɔna, ndo lande na?

¹⁶ Ɛtɛkɛta wayela w’omembi w’esambo vɔ ɛnɛ: “Uyali ki la ntundu ka [Jehowa], [okongɛ̂ke la nsaki k’efula]. Tuyatshumuyaki ne dia one latuhumoka lukulu l’olo lu mbuka yandi, latushidiyaka sangweyu diandi dia kolo.” (Osambu 37:7) Lanɛ Davidi ekɔ lo mbika epole ɔsɛkɛ l’ohomba wa sho kongɛka l’asolo wa lotutsha dia Jehowa ndamɛ ntsha akambo. Kânga mbele ekomelo ka dikongɛ nɛ kataye, ɔsɔ bu dikambo dia ngunanguna. Onde sho tatɛnyi dia kɛtshi ndo solo dia lotutsha dia Jehowa amboleka woke efula oleki ndo woho wakatakanaka ntondo? Onde hatokoke mɛnya ndo sho lawɔ dia tekɔ lo kongɛ la solo dia lotutsha l’esambishelo ka lokumu l’ɔlɔlɔ la ntondo k’ekomelo ndja? (Mako 13:10) Ɔnɛ ekɔ etena ka mbewɔ ditshelo di’aha kane yimba diakoka toshishɛ ɔngɛnɔngɛnɔ aso ndo ekokelo kaso ka lo nyuma. Ɔnɛ ekɔ nto etena kahombaso shika tanga la wolo tshɛ la ntondo ka shɛngiya ya kɔlɔ y’andja ɔnɛ waki Satana. Ɔnɛ ekɔ etena ka nama lɔkɛwɔ la pudipudi ndo kahatahombe pondjo mbidja eongelo kaso ka losembwe kele laso la ntondo ka Jehowa lo wâle. Nyɛsɔ totetemale la petsha tokanyi ta mindo ndo mbewɔ ditshelo dia kɔlɔ otsha le wanɛ wele bu apami kana wamato oko sho kana otsha le wanɛ wele apami kana wamato oko sho.​—Kolosai 3:5.

¹⁷ Davidi ekɔ lo tolaka ate: “Ukimo kele, oseke yenyi. Tuyatshumuyaki, ne dia tshumu tolaka untu utsha lu kolo. Atshi wa kolo wayuhimbwama, kele wane watulungamelaka [Jehowa] wayukita kete.” (Osambu 37:8, 9) Eelo, l’eshikikelo tshɛ sho kokaka tetemala kongɛ etena kɛnɛ kayanga Jehowa minya kɔlɔ tshɛ oma la nkɛtɛ ndo wanɛ wakisala.

“Etenyi ka tshitshe ketu”

18, 19. Ekeketshelo kakɔna kamboyokondja oma l’​Osambu 37:10?

¹⁸ “Etenyi ka tshitshe ketu, k’untu a kolo hatanema ntu. Kuyanga ayushishima lu dihuli diandi, ndi henama ntu.” (Osambu 37:10) Ɛtɛkɛta ɛsɔ tokeketshaka mɛtɛ oko watatasukana l’ekomelo ka dikongɛ di’akambo nɛ ndo ekomelo ka dipanda dia kɔlɔ diakayange anto oma le Jehowa! Lowandji kana ɛlɔmbwɛlɔ tshɛ kambokamba l’anto kambokita tatala. Kakianɛ tekɔ suke l’etena kayɔlɔmbwama anto oma le Nzambi, mbut’ate Diolelo dia Jehowa l’anya wa Yeso Kristo. Diɔ mbayɔlɔmbɔla akambo tshɛ wa l’andja w’otondo ndo diayonya andɔshi wa Diolelo diaki Nzambi.​—Danyele 2:44.

¹⁹ L’andja w’oyoyo, mbut’ate lo ɛlɔmbwɛlɔ ka Diolelo diaki Nzambi, wɛ ayoshishima kele wɛ hotana “untu a kolo.” Lo mɛtɛ, onto tshɛ latɔmbɔkwɛ Jehowa ayonyɛma esadi eto. Ndoko onto lalɔsha lowandji lande kana lahayakitshakitsha l’ɛse k’ɛlɔmbwɛlɔ ka Nzambi layonga lɛkɔ. Asukanyi ayɛ tshɛ wayonga la kanyi tshɔi ndo la mposa ka ngɛnyangɛnya Jehowa. Ande lotui tshitshi layela Diolelo sɔ lee, sapi aya bu, tokengete taya bu, ndoko ɛngɔ kayolanya wɛkamu ndo ɔngɛnɔngɛnɔ aso tshɛ!​—Isaya 65:20; Mika 4:4; 2 Petero 3:13.

20, 21. (a) Waa na wele “akanga a memakana” wa l’​Osambu 37:11, ndo lende akondjawɔ “etshoko efula wa ki”? (b) Ɛtshɔkɔ akɔna wayotokondja naka tayokoya Davidi dia Woke?

²⁰ Ɔnkɔnɛ, “akanga a memakana wayukita kete.” (Osambu 37:11a) Ko waa na wele “akanga a memakana”? Tshɛkɛta yakakadimɔma lanɛ ɔnɛ “memakana” ndja oma lo tshɛkɛta yalembetshiya “sui, ndjâkitshakitsha kana mɔnywama.” Eelo, akanga a memakana ekɔ wanɛ watokongɛka Jehowa la ndjâkitshakitsha tshɛ dia nde mbanyɛ akambo wa kɔlɔ wawaɛnya pâ. “[Vɔ] wayongenangena la etshoko efula wa ki.” (Osambu 37:11b) Kânga kakianɛ, tekɔ l’ɛtshɔkɔ efula wa ki lo paradiso ka lo nyuma kele kâmɛ l’etshumanelo ka mɛtɛ k’Akristo.

²¹ Kânga mbele tatatshungɔ oma l’asui, sho sukanɛka lam’asaso ndo tekɔ lo keketsha wanɛ wambɔkɔmɔ. Etombelo wele la dikambo sɔ ko, ɔngɛnɔngɛnɔ wa mɛtɛ wekɔ l’atei w’ekambi wa Jehowa. Anangɛso wakasɔnwama oko elami w’ɛkɔkɔ wekɔ lo kamba la ngandji tshɛ dikambo di’ehomba aso wa lo nyuma ndo lo tena dimɔtshi kânga ndo di’ehomba aso wa lo demba, dia tokimanyiyaka dia mbikikɛ asui wahomana laso l’ɔtɛ w’akambo w’ɔlɔlɔ. (1 Tesalonika 2:7, 11; 1 Petero 5:2, 3) Ki kɛsɔ ekɔ mɛtɛ ɛngɔ k’ohomba efula! Sho tekɔ nto l’elongamelo ka lɔsɛnɔ la pondjo lo Paradiso ka ki kaya suke. Ɔnkɔnɛ, nyɛsɔ tokoya Davidi dia Woke mbut’ate, Yeso Kristo lakatshutshuyama oma l’ohetoheto wakinde lawɔ otsha le Jehowa dia mbokambɛ la kɔlamelo polo l’ekomelo. (1 Petero 2:21) Lo sala ngasɔ, tayotetemala monga l’ɔngɛnɔngɛnɔ ndo tombola ɔnɛ langɛnangɛnaso le nde mbut’ate Nzambi kaso Jehowa.

[Nɔte ya l’ɛse ka dikatshi]

Onde wɛ kokaka kadimola?

• Wetshelo akɔna wakayakondja oma l’Osambu 37:1, 2?

• Ngande wakokayɛ ‘ngɛnangɛna le Jehowa’?

• Djembetelo yakɔna yɛnya dia sho kokaka ndjaɛkɛ le Jehowa?

[Osato wa lo lɛkɛ 23]

“Ekamaki [Jehowa], utshaki ololo”

[Osato wa lo lɛkɛ 25]

“Akanga a memakana wayukita kete”