Totombole Nzambi

“La Onyɔ Ɔtɔi” “Totombole Nzambi, She Nkumɛso Yeso Kristo la onyɔ ɔtɔi.” ​—Romo 15:6, NW.

1. Wetshelo akɔna wakasha Paulo asekande ambetawudi lo dikambo dia kandola ekakatanu wendana la tokanyi totshikitanyi?

AHA Akristo tshɛ mbasala ɛsɔnwɛlɔ wa woho ɔtɔi kana mbele la nango yâmɛ. Koko, Akristo tshɛ pombaka kɛndakɛnda kâmɛ lo mboka k’otsha lo lɔsɛnɔ. Onde dikambo sɔ kokaka salema? Eelo, naka hatetawe di’ekakatanu wa totshitshɛ koma akambo wa weke. Ɔsɔ mbaki wetshelo wakasha ɔpɔstɔlɔ Paulo asekande ambetawudi wa lo ntambe ka ntondo. Ngande wakandalembetshiya dikambo sɔ di’ohomba efula na? Ndo ngande wakokaso kamba la dako diande diakasambiyama sɔ ɛlɔ kɛnɛ?

Ohomba wa kâmɛ k’akristo

2. Ngande wakɛnya Paulo ohomba wa kâmɛ?

² Paulo akeyaka dia kâmɛ k’Akristo kekɔ ohomba efula, ndo nde akasha dako di’oshika dia kimanyiya Akristo dia vɔ mbikikanɛ kɔlɔ la ngandji. (Efeso 4:1-3; Kolosai 3:12-14) Koko, l’ɔkɔngɔ wa nde mbata tshumanelo efula ndo wa nde membola dikina l’edja k’ɛnɔnyi ndekana 20, nde akeye dia nama kâmɛ kokaka monga tshondo y’okakatanu. (1 Koreto 1:11-13; Ngalatiya 2:11-14) Ɔnkɔnɛ, nde akakeketsha asekande ambetawudi wakasɛnaka la Rɔma ate: “[Nzambi k]’etetemalu ndu [k]a ekikitshelu anyukimanyia . . . dia nyu tshe ntumbula [Nzambi], Shi Khumesu Jesu Kristu, [“la onyɔ ɔtɔi,” NW].” (Romo 15:5, 6) Ɛlɔ kɛnɛ, sho lawɔ pombaka tombola Jehowa Nzambi “la onyɔ ɔtɔi” oko olui wele kâmɛ w’ekambi ande. Polo lo yɛdikɔ yakɔna yatombolaso Jehowa “la onyɔ ɔtɔi”?

3, 4. (a) Akristo wa la Rɔma wakaye oma l’ahole akɔna wotshikitanyi? (b) Ngande wakakoke Akristo wa la Rɔma monga l’akoka wa kambɛ Jehowa “la onyɔ ɔtɔi”?

³ Akristo efula wa la Rɔma waki angɛnyi wa Paulo. (Romo 16:​3-16) Kânga mbele vɔ wakaye oma l’ahole wotshikitanyi, Paulo akɔsaka anango tshɛ oko “elangimi wa [Nzambi].” Nde akafunde ate: “Dimi lambuka [Nzambi k]ami lusaka uma le Jesu Kristu lu dikambu dia nyu tshe, ne dia lukumu la mbetawo kanyu lambudiangana lu andja w’utundu.” Mbokɛmaka hwe, dia ase Rɔma wakashaka ɛnyɛlɔ k’ɔlɔlɔ lo toho efula. (Romo 1:7, 8; 15:14) Koko, aki nto mɛtɛ di’anto amɔtshi wa l’atei w’etshumanelo waki la tokanyi totshikitanyi l’akambo amɔtshi. Lam’ele ɛlɔ kɛnɛ Akristo ndja oma l’ahole wotshikitanyi ndo wekɔ la mbekelo yotshikitanyi, wekelo wa dako diaki Paulo diakasambiyama diendana la woho wa kandola ekakatanu kokaka mbakimanyiya dia tɛkɛta “la onyɔ ɔtɔi.”

⁴ Ambetawudi w’ase Juda la w’ase Wedja waki la Rɔma. (Romo 4:1; 11:13) Akɛnamaka di’ase Juda amɔtshi kotshika mbekelo mɔtshi yakawayelaka lo Ɛlɛmbɛ wa Mɔsɛ, kânga mbakawahombe mbeya dia ditshelo dia ngasɔ komonga ohomba dia kondja panda. Lo wedi okina, Akristo amɔtshi w’ase Juda waketawɔ dia olambo wa Kristo akâtshungola oma l’ɛlɛmbɛ ɛmɔtshi wakawasɛdingolaka la ntondo ka vɔ koma Akristo. Diɔ diakɔ diele, vɔ wakatshikitanya waonga ndo ditshelo diawɔ dimɔtshi. (Ngalatiya 4:8-11) Koko, oko wakadiɛnya Paulo, vɔ tshɛ waki “elangimi wa [Nzambi].” Vɔ tshɛ wakakokaka tombola Nzambi “la onyɔ ɔtɔi” naka vɔ monga la yimba y’ɔlɔlɔ onto l’onto otsha le onyande. Sho kokaka monga la tokanyi totshikitanyi l’akambo amɔtshi ɛlɔ kɛnɛ. Ɔnkɔnɛ, ayonga dimɛna sho sɛdingola la yambalo tshɛ woho wakalembetshiya Paulo tɔndɔ sɔ di’ohomba efula.​—Romo 15:4.

‘Tolongwanake’

5, 6. Lande na kaki tokanyi efula totshikitanyi l’etshumanelo ka la Rɔma?

⁵ Lo mukanda ande otsha le ase Rɔma, Paulo akatɛkɛta dia dikambo dimɔtshi diaki anto la tokanyi totshikitanyi. Nde akafunde ate: “Untu omotshi mbetawoka nde wehu tshe wa mbu ya nde. Keli one leli wodu lu mbetawo atolekaka paka akatshikatshi atu.” Lande na kakidiɔ ɔsɔku? Eelo, lo Ɛlɛmbɛ wa Mɔsɛ sombo kakasekɛma. (Romo 14:2; Akambu w’Asi Lewi 11:7) Koko, l’ɔkɔngɔ wa nyɔi ka Yeso Ɛlɛmbɛ ɛsɔ komonga nto ohomba. (Efeso 2:15) Oma lâsɔ, ɛnɔnyi esato l’etenyi l’ɔkɔngɔ wa nyɔi ka Yeso, ondjelo ɔmɔtshi akayotɛka Petero dia ndoko mbo ya ndɛ yele wɔnɔnyi lo washo wa Nzambi. (Etsha 11:7-12) Oko wakaweyaka akambo asɔ, ondo Akristo amɔtshi w’ase Juda wakɛnyi dia vɔ kokaka ndɛ sombo kana mbo ya ndɛ mɔtshi yakashimbamaka lo Ɛlɛmbɛ.

⁶ Koko, Akristo akina w’ase Juda wakatonaka kanyi ya ndɛ mbo ya ndɛ shɔ yakɔsamaka ntondotondo oko mindo. Ondo Akristo w’ase Juda asɔ waki l’etema wa shase wakakokaka monga la lonyangu mbala tshɛ kakawɛnaka anangɛwɔ akina walɛ diangɔ sɔ. Ndo nto, ondo Akristo amɔtshi w’ase Wedja wele ɛtɛmwɛlɔ wakiwɔ ntondo kombasekɛka ndoko ɛngɔ ka ndɛ, waki l’okandokando dia mɛna onto ɔmɔtshi asɛka mbo ya ndɛ. Lo mɛtɛ, komongaka kɔlɔ di’onto tona ndɛ diangɔ dimɔtshi, naka nde kɔtɛtɛ̂ka dia otonelo ande waki ohomba dia kondja panda. Koko, tokanyi totshikitanyi takakokaka tondja ewanu esadi eto l’atei w’etshumanelo. Akristo wa la Rɔma wakahombe monga la shɛnɔdi di’aha etshikitanu wa ngasɔ mbashimba dia tombola Nzambi “la onyɔ ɔtɔi.”

7. Naa tokanyi totshikitanyi taki l’anto lo dikambo di’ɔsɛdingwelo wa lushi lɔmɔtshi la lânde la lo lomingu tshɛ?

⁷ Paulo akasha ɛnyɛlɔ ka hende lo mbut’ate: “Untu omotshi atolemiaka lushi lomotshi ladiku dia lukina. Untu ukina atolemiaka nshi tshe pupu.” (Romo 14:5a) Lo Ɛlɛmbɛ wa Mɔsɛ, ndoko olimu wakakambemaka lushi la Sabato. Kânga munda lɔkɛndɔ akasekɛmaka lushi lɔsɔ. (Etumbelu 20:8-10; Mateu 24:20; Etsha 1:12) Koko, etena kakatɔ Ɛlɛmbɛ awui wakasekɛma asɔ kosekɛma nto. Kele, Akristo amɔtshi w’ase Juda komonga l’ɔngɛnɔngɛnɔ dia kamba woho w’olimu akɔna tshɛ kana munda lɔkɛndɔ l’otale lushi lɔsɔ lakawɔsaka ntondo oko ekila. Kânga l’ɔkɔngɔ wa vɔ koma Akristo, ondo vɔ wakakitsha lushi l’esambele paka dikambo di’eyango wa lo nyuma, kânga mbele lo washo wa Nzambi lushi la Sabato komonga la nɛmɔ nto. Onde vɔ waki la munga dia sala dikambo sɔ? Ndoko, naka vɔ kɔtɛtɛ̂ka ɔnɛ Nzambi mbakalɔmbaka dia nɛmiya lushi la Sabato. Omalɔkɔ, dia nɛmiya nkum’etema y’anango w’Akristo, Paulo akafunde ate: “Untu l’untu alimbiteli kene ketawondi lu [“yimba yande,” NW].”​—Romo 14:5b.

8. Kânga mbakawahombaka nɛmiya nkum’etema y’anto akina, kakɔna kaki kôsalaka Akristo wa la Rɔma?

⁸ Koko, kânga mbakandakeketsha anango dia monga la solo dia lotutsha otsha le wanɛ wakalɔshanaka l’akambo wendana la nkum’otema, Paulo akâmia la wolo tshɛ wanɛ wakahembaka tshutshuya asekawɔ ambetawudi dia kitanyiya Ɛlɛmbɛ wa Mɔsɛ ɔnɛ kɛsɔ kalɔmbama dia kondja panda. Ɛnyɛlɔ, oya l’ɔnɔnyi 61, tena diaso (T.D.), Paulo akafunde dibuku dia Heberu, mukanda waki la shɛngiya ya wolo otsha le Akristo w’ase Juda, wakalembetshiyaka hwe dia kitanyiya Ɛlɛmbɛ wa Mɔsɛ komonga kânga la yema ya nɛmɔ nɛ dia Akristo wekɔ l’elongamelo ka lâdiko koki etshina l’olambo wa tshungo wa Yeso.​—Ngalatiya 5:1-12; Tito 1:10, 11; Heberu 10:1-17.

9, 10. Kakɔna kahomba Akristo tona dia sala? Lembetshiya.

⁹ Oko wakatadiɛnyi, Paulo mbutaka dia sala ɛsɔnwɛlɔ wotshikitanyi hatonga wâle lo kâmɛ naka ndoko tɔndɔ di’Okristo diɔnywami lo yoho yɛnama hwe. Omalɔkɔ, Paulo ekɔ lo mimbola Akristo wele la nkum’etema ya wɔdu ate: “Ya we, ukundi alumbuyaye onanyo na?” Ko nde mimbola wanɛ wele la nkum’etema ya nge (ondo wanɛ wele nkum’etema yawɔ mbetawɔka dia vɔ ndɛ diangɔ dimɔtshi diakasekɛmaka lo Ɛlɛmbɛ kana dia kamba olimu wa l’emunyi lushi la Sabato) ate: “Ukundi w[ɔ]nyolaye onanyo na?” (Romo 14:10) Lo ndjela Paulo, Akristo wele la nkum’etema ya wɔdu pombaka tona dia manya anangɛwɔ wele la nkum’etema ya nge. Woho akɔ wâmɛ mbele, Akristo wele nge, hawohombe mɔnyɔla wanɛ wele nkum’etema yawɔ yeke wɔdu l’akambo amɔtshi. Vɔ tshɛ pombaka nɛmiya tokanyi t’akina ndo hawohombe ‘tamanya ndjâkana.’​—Romo 12:3, 18.

¹⁰ Paulo akalembetshiya kanyi yele la wɛdimo yahomba monga lawɔ, ate: “One latolekaka wehu tshe wa mbu ya nde, tonyolaki one lahatolekaka. One lahatolekaka wehu tshe wa mbu ya nde, talumbuyaki one latolekaka, ne dia [Nzambi] ambûlungulaka.” Ndo nto, nde akate ate: ‘Kristo akatolongola nde lawɔ dikambo dia lotombo la Nzambi.’ Lam’ele Nzambi nde la Kristo mbetawɔka oyadi wanɛ wele la wolo kana wele wɔdu l’akambo wendana la nkum’otema, sho lawɔ pombaka monga la dionga diakɔ diâmɛ ndo ‘nongwanaka.’ (Romo 14:3; 15:7) Akɔna akoka tona dikambo sɔ na?

Ngandji k’onto l’ɔnango mbotaka kâmɛ ɛlɔ kɛnɛ

11. Dikambo diakɔna dia lânde diaki lo nshi ya Paulo?

¹¹ Lo mukanda ande otsha le ase Rɔma, Paulo akatɛkɛta dia dikambo dimɔtshi dia lânde. Jehowa aki oma la ndanya sheke mɔtshi ko shikikɛ kina y’oyoyo. Amɔtshi waki l’okakatanu dia ndjaɔtɔnganyiya la sheke shɔ y’oyoyo. Dikambo dia ngasɔ hasalema ɛlɔ kɛnɛ, koko awui wa woho akɔ wâmɛ kokaka tomba tena dimɔtshi.

12, 13. Lo akambo akɔna amɔtshi wakoka Akristo mɛnya dia vɔ nɛmiyaka nkum’etema y’anangɛwɔ ɛlɔ kɛnɛ?

¹² Ɛnyɛlɔ, Okristo ɔmɔtshi wa womoto aki ondo l’ɔtɛmwɛlɔ ɔmɔtshi wakakɔkɔmiyaka di’aha ndjalɛnga lo ɔlɔtɔ kana lo ɛnamelo. Lam’akandetawɔ akambo wa mɛtɛ, ondo nde aki l’okakatanu dia mbetawɔ kanyi y’ɔnɛ hasekɛmi ndɔta ahɔndɔ w’oshinga wolo la wɛdimo lo waaso amɔtshi wakoka, kana ndjalɛnga lo yoho yasungana. Lam’ele ndoko tɔndɔ dia lo Bible diendana la dikambo sɔ, honga dimɛna dia onto ɔmɔtshi pemba dia mbetawoya kadiyɛso k’Okristo kɛsɔ dia sala dikambo diahɔtɔnganɛ la nkum’otema kande. Woho akɔ wâmɛ mbele, nde hahombe tɛkɛta kɔlɔ lo dikambo dia wamato w’Akristo wele nkum’etema yawɔ mbetawɔka dia vɔ kamba la diangɔ sɔ.

¹³ Tɔsɛdingole ɛnyɛlɔ kekina. Mbeyaka monga ko Okristo ɔmɔtshi wa pami akôle lo dihole diakawasekɛ ɔnwɛlɔ wa wanu. L’ɔkɔngɔ wa nde kondja ewo k’akambo wa mɛtɛ, nde amboyeya kanyi ya Bible yɛnya ɔnɛ wanu ekɔ losha l’oma le Nzambi ndo onto kokaka mbanɔ la wɛdimo. (Osambu 104:15) Nde ambetawɔ kanyi shɔ, koko l’ɔtɛ wa dihole diakandole, nde mɛnaka ɔlɔlɔ di’aha nɔ kânga pɔpɔ ya wânu. Koko, nde hɔnyɔla wanɛ wanɔ wanu la wɛdimo. Ɔnkɔnɛ, nde kotshaka ɛtɛkɛta wa Paulo wata ɔnɛ: “Tuyeli akambu watutungaka ki, ndu akambu weyasu mbudianya la wo.”​—Romo 14:19.

14. L’akambo akɔna wakoka Akristo kamba la dako diakasambiyama diaki Paulo otsha le ase Rɔma?

¹⁴ Akambo akina walɔmba dia kamba la dako dia Paulo le ase Rɔma tombaka. Etshumanelo k’Akristo kengama l’anto efula ndo onto l’onto ekɔ l’akambo walangande. Omalɔkɔ, vɔ kokaka sala ɛsɔnwɛlɔ wotshikitanyi, ɛnyɛlɔ lo woho wa mbɛla kana minya divo ndo lo ɔlɔtɔ awɔ. Lo mɛtɛ, Bible mɛnyaka hwe atɔndɔ wahomba Akristo tshɛ w’eshika ndjela. Ndoko onto la l’atei aso lahomba ndɔta kana mbɛla ndo minya divo lo yoho yaha la wɛdimo kana yatɔfɔnya l’anto wa kɔlɔ wa l’andja ɔnɛ. (1 Joani 2:15-17) Akristo mbohɔka tena tshɛ dia kânga lam’ɔsawɔ yema ya lɔpɛpɛ, vɔ wekɔ ekambi, mbuta ate enyimpala wa Lowandji laki Nzambi la l’Andja w’Otondo. (Isaya 43:10; Joani 17:16; 1 Timote 2:9, 10) Koko, l’akambo efula vɔ kokaka sala ɛsɔnwɛlɔ wetawɔma le Akristo.a

Têwɔ dia takanya anto akina

15. Lo mbidja yimba lo wahɔ w’anango, etena kakɔna kahomba Okristo tshika dia sala dikambo dimɔtshi diende la lotshungɔ la sala?

¹⁵ Paulo kotolaka yambalo yaso lo tɔndɔ dikina dia lo dako diande diakandasha Akristo wa la Rɔma. Tena dimɔtshi, Okristo wele la nkum’otema kambetshamaka dimɛna mbeyaka tona dia sala dikambo dimɔtshi diele kema kɔlɔ. Lande na? Nɛ dia nde mbeyaka dia naka nde sala dikambo sɔ kete nde mbeyaka salɛ akina kɔlɔ. L’etena kɛsɔ kakɔna kahombaso sala? Paulo mbutaka ate: “Kema ololo nde unatshi, kana no wanu kana ntsha dikambu dikina, diukuki ntakanya onanyo.” (Romo 14:14, 20, 21) Ɔnkɔnɛ, “shu wane weli la wulu, dieli lasu dia memba wutshu a wane weli weodu, aha dia shu ndjangenyangenya shu shame. Untu l’untu l’atei asu angenyangenya unyandi lu akambu weli ololo, weya mbûdia.” (Romo 15:1, 2) Naka kɛnɛ kasalaso fukutanyaka nkum’otema k’Okristo ɔmɔtshi w’osekaso, kete ngandji k’onto l’ɔnango ayototshutshuya dia sho nɛmiya nkum’otema kande ndo tona sala akambo wakoka mbonyangiya. Ɛnyɛlɔ ka dikambo sɔ mbeyaka monga ɔnwɛlɔ wa wanu. Okristo ekɔ la lotshungɔ la nnɔ wanu la wɛdimo. Koko, naka ɔnwɛlɔ ɔsɔ kokaka takanya asekande akina, kete nde atɔtɛtɛke di’ɔnɛ nde pombaka tetemala nnɔ wanu nɛ dia nde ekɔ la lotshungɔ.

16. Ngande wakokaso mɛnya dilɛmiɛlɔ le anto wa l’ɛtshi kaso ka nkɛtɛ?

¹⁶ Tɔndɔ sɔ kokaka kambema nto lo woho wasɛnaso l’anto wa l’andja w’etshumanelo k’Akristo. Ɛnyɛlɔ, mbeyaka monga ko tekɔ lo sɛna lo ngelo kele ɔtɛmwɛlɔ woleki woke lɔkɔ mbetshaka anto awɔ dia mbɔsaka lushi lɔmɔtshi la lo lomingu oko lushi la diomuyelo. L’ɔkɔkɔ ɔsɔ, di’aha sho takanya asukanyi aso ndo di’aha mbidja wekamu l’olimu w’esambishelo, tayewɔ lo yɛdikɔ yɛnaso ɔnɛ kokaka di’aha sala ndoko dikambo lushi lɔsɔ diakoka takanya asukanyi aso. Tɔshi ɛnyɛlɔ kekina, Okristo ɔmɔtshi wele l’ɔngɔnyi koka monɔ dia ntshɔ tokamba lɛnɛ ele ohomba efula w’apandjudi, koko anto wa l’ɛtshi kakɔ ka nkɛtɛ bu l’ekondjelo k’efula. Nde kokaka mɛnya dilɛmiɛlɔ otsha le asukanyi ande asɔ w’eyoyo lo ndɔta la wɛdimo kana lo monga la lɔsɛnɔ l’ɔsɛlɛngɛ kânga mbende l’ekondjelo k’efula.

17. Lande na kele ekɔ ohomba kanɛ anto akina lo ɛsɔnwɛlɔ wasalaso?

¹⁷ Onde sunganaka nongamɛ dia “wane weli la wulu” sala etshikitanu wa ngasɔ? Nyɛsɔ tokane yimba la ɛnyɛlɔ kɛnɛ: Lam’atatakɛndjakɛndja mutuka l’otadimbo ɔmɔtshi wa woke, ko tambɛna la ntondo kaso ana amɔtshi watakɛndakɛnda suke suke l’otadimbo ndo wekɔ lo wâle. Onde tayotetemala kɛndjakɛndja la vitɛsɛ ya woho akɔ wâmɛ y’efula nɛ dia tekɔ la lotshungɔ la sala dikambo sɔ? Ndoko, sho tayokitshakitsha vitɛsɛ dia mbewɔ di’aha wâle komɛ ana asɔ. Woho akɔ wâmɛ mbele, sho mbeyaka mbetawɔ dia tona dia sala dikambo dimɔtshi l’ɔtɛ wa diɔtɔnganelo diasaso l’asekaso ambetawudi kana l’anto akina. Mbeyaka monga ko tekɔ lo sala dikambo dimɔtshi dieso la lotshungɔ tshɛ dia sala. Ndo ndoko tɔndɔ dia lo Bible diɔnywama. Koko, naka dikambo diakɔ diayokoka nyangiya akina kana salɛ wanɛ wele la nkum’etema ya wɛdu kɔlɔ, kete ngandji k’Okristo kayototshutshuya dia sala akambo la yeewo. (Romo 14:13, 15) Nama kâmɛ ndo tɔla wahɔ wa Diolelo otsha la ntondo ekɔ ohomba efula oleki sala kɛnɛ keso la lotshungɔ la sala.

18, 19. (a) Lo kanɛ anto akina, ngande wayelaso ɛnyɛlɔ ka Yeso? (b) L’akambo akɔna w’eso la tokanyi tâmɛ, ndo kakɔna kayotɔsɛdingola lo sawo diayela?

¹⁸ Etena kasalaso akambo lo yoho shɔ, sho ndjelaka ɛnyɛlɔ koleki ɔlɔlɔ tshɛ. Paulo mbutaka ate: “Ne dia Kristu kundjangenyangenya ndame. Keli uku akafundama ati: Tengo yakawakotengaka, we [Nzambi], yakayala l’ote ami.” Yeso aki suke dia kimɔ lɔsɛnɔ lande oko olambo dikambo diaso. Lo mɛtɛ, sho tekɔ suke dia mbetawɔ tshika sala akambo amɔtshi weso la lotshungɔ la sala naka vɔ kokaka kimanyiya “wane wele weodu” dia tombola Nzambi kâmɛ la so. Lo mɛtɛ, kanɛ Akristo wele la nkum’otema ka wɔdu ndo monga la dionga di’ɔlɔlɔ otsha le wɔ, mbut’ate tona dia sala ɛsɔnwɛlɔ ɛmɔtshi aha la tɛtɛ lo lotshungɔ lele laso mɛnyaka dia tekɔ la ‘yimba yâmɛ yele oko yaki la Kristo.’​—Romo 15:1-5.

¹⁹ Kânga mbakokaso monga la tokanyi totshikitanyi yema l’akambo wahendana l’atɔndɔ wa l’Afundelo, l’akambo wendana l’ɔtɛmwɛlɔ sho mongaka la tokanyi tâmɛ. (1 Koreto 1:10) Kâmɛ ka ngasɔ mɛnamaka, ɛnyɛlɔ lo woho wasalaso akambo la ntondo ka wanɛ walɔshana l’ɔtɛmwɛlɔ wa mɛtɛ. Ɔtɛkɛta waki Nzambi mbelɛka atunyi asɔ ɔnɛ anto akina ndo vɔ tɔhɛmɔlaka dia mbewɔ “diui dia antu akina.” (Joani 10:5) Ngande wakokaso mbeya anto akina asɔ na? Dionga diakɔna diahombaso monga ladiɔ otsha le wɔ? Wembola ɛsɔ wayɔsɛdingwama lo sawo diayela.

[Nɔtɛ ka l’ɛse ka dikatshi]

Ngande Wayoyokadimola?

• Lande na kele monga la tokanyi totshikitanyi l’akambo wendana l’onto ndamɛ hadje kâmɛ kaso lo wâle?

• Oko weso Akristo bonde kahombaso kananɛ la ngandji tshɛ na?

• Naa weho ɛmɔtshi wakokaso kamba la dako diaki Paulo diendana la kâmɛ ɛlɔ kɛnɛ, ndo kakɔna kayototshutshuya dia sala dikambo sɔ?

[Osato wa lo lɛkɛ 24]

Dako diaki Paulo diendana la kâmɛ diaki ohomba efula le etshumanelo

[Osato wa lo lɛkɛ 24]

Akristo wekɔ kâmɛ kânga mboyewɔ oma l’ahole wotshikitanyi