Mbetawɔ ndo wɔma wa Nzambi tokimanyiyaka dia monga la dihonga
‘Oyale la dihonga ndo la wolo nɛ dia Jehowa Nzambi kayɛ ekɔ kâmɛ la yɛ.’—JASHUA 1:9.
1, 2. a) Lo ndjela kanyi y’anto, onde ase Isariyɛlɛ wakakoke nongamɛ dia mbidja ase Kanana otshumba? b) Eshikikelo kakɔna kakalongola Jashua?
LO ƆNƆNYI 1473 ntondo ka tena diaso nɛ, wodja w’Isariyɛlɛ waki suke la mbɔtɔ lo Nkɛtɛ ya daka. Lo dikambo di’ekakatanu waki la ntondo kawɔ, Mɔsɛ akohola wodja ate: “Elo, nyuteho Jorodana dia ntohotola wedja wunyuleki waki ndu wulu kete, esumba a waki la wudingami kumbu pulu ndu l’ulungu, w’antu a waki ndu etali, asi Anaka, weyanyu ndu wakanyuki lukumu lawo wata vati: Akona eya memala la ntundu k’asi Anaka?” (Euhwelu k’Elembe 9:1, 2) Lo mɛtɛ andɔshi w’ata w’akongote asɔ wakeyamaka dimɛna! Ndo nto, ase Kanana amɔtshi waki la dihomɔ tshɛ dia ta diahombama, ndo la pusupusu ya ta ya mbolo.—Embadi 4:13.
2 Ase Isariyɛlɛ lo wedi awɔ, waki wodja w’ɛhɔmbɔ ndo waki mala mbetsha ɛnɔnyi 40 l’oswe wa shɛnga. Omalɔkɔ, lo ndjela kanyi y’anto, takawakoke mbidja otshumba lo ta. Koko, Mɔsɛ aki la mbetawɔ; nde akakoke ‘mɛna’ woho wakatawalɔmbɔlaka Jehowa. (Heberu 11:27) Mɔsɛ akatɛ wodja ate: “[Jehowa Nzambi k]anyu, ayokendakenda la ntundu kanyu uku dja ya dikita. Ndi kayâlanya, kayâkitshakitsha la ntundu kanyu.” (Euhwelu k’Elembe 9:3; Osambu 33:16, 17) L’ɔkɔngɔ wa nyɔi ka Mɔsɛ, Jehowa akashikikɛ Jashua dia nde ayowokimanyiya, lo mbotɛ ate: “Uneli, uteho Jorodana nye, we la wudja one tshe utsha lu kete yamumuwasha, vo asi Isariyele. Nduku untu ayuyala la wulu wa memala la ntundu kaye lu nshi tshe ya lumu laye. Dimi layuyalaka la ye, uku akimi la Mose.”—Jashua 1:2, 5.
3. Kakɔna kakakimanyiya Jashua dia monga la mbetawɔ ndo la dihonga?
3 Dia Jehowa mbokimanyiya ndo mbɔlɔmbɔla, Jashua akahombe mbadiaka ndo kanaka yimba la Ɛlɛmbɛ wa Nzambi ndo kamba la wɔ. Jehowa akawotɛ ate: “Osoku mbayuyuluwanya elimu aye ndu mbayuyuhumo lukulu l’olo lu akambu tshe wayuyutshaka. Dimi kunkutela? Ukikitali, uyali la dihunga. Tateki asulu, tukaki woma, ne dia [Jehowa, Nzambi k]aye, ayutayalaka la ye lu ahuli tshe wayuyutatshokaka.” (Jashua 1:8, 9) Lam’ele Jashua akakitanyiya Nzambi, nde akonge la dihonga, la wolo ndo akadje otshumba. Koko, anto efula wa lo lɔlɔnga lande, komonga l’okitanyiya. Etombelo waki la dui sɔ ele, vɔ kopomɔ lokolo l’ɔlɔ lo washo wa Nzambi ndo wakavu l’oswe wa shɛnga.
Anto waki komonga la mbetawɔ komonga la dihonga
4, 5. a) Woho akɔna waki dionga diaki atɔpi dikumi lo diɛdika la diaki la Jashua nde la Kalɛba? b) Jehowa akandatɛ wodja waki komonga la mbetawɔ?
4 Ɛnɔnyi akumi anɛi la ntondo, etena kakasukana ase Isariyɛlɛ mbala ka ntondo la wodja wa Kanana, Mɔsɛ akatome atɔpi 12 dia tokemba nkɛtɛ. Dikumi l’atei awɔ wakakalola la wɔma. Vɔ wakade ekoko vate: “Antu tshe wakatatena, waki akunguti atu (ana wa Anaka, wakayi uma lu wudja w’akunguti). Shu takenama lu ashu asu ndu lu ashu awo uku tukatakata.” Onde “antu tshe” mbaki akongote, mbuta ate aha paka ase Anaka ato? Ndooko. Onde ase Anaka waki tokanula ta wa Nefilimɛ wakasɛnɛ la ntondo ka Mvula k’elola? Ndooko! Koko, l’ɔtɛ wa woho wakadje atɔpi dikumi oshimu esɔ, ase pango tshɛ wakandama la wɔma. Wodja wakakombola kalola l’Edjibito lɛnɛ akiwɔ lo lɔhɔmbɔ!—Walelu 13:31–14:4.
5 Koko, apami ahende l’atei w’atɔpi, mbuta ate Jashua nde la Kalɛba, wakakombola efula dia mbɔtɔ lo Nkɛtɛ ya daka. Vɔ wakate vate: Ase Kanana “wayuyala ma diasu. Vo kema la usuko wa mbasukela ntu. [Jehowa] eko la su; tanyuwaukaki woma.” (Walelu 14:9) Onde Jashua nde la Kalɛba waki dinginya dia mɛna akambo la sso di’ɔlɔlɔ? Ndooko. Vɔ wakɛnyi kâmɛ la ase wodja akina, woho wakakitshakitsha Jehowa Edjibito wodja wakaleke wolo ndo wakandasha tozambizambi tawɔ sɔnyi lo mbatomɛ Asui dikumi. Oma lâsɔ vɔ wakɛnyi woho wakadiake Jehowa Farawɔ la alembe ande wa wolo lo Ndjale ka Beela. (Osambu 136:15) Lo mɛtɛ, atɔpi dikumi ndo wanɛ wakasɛngiyama oma le wɔ wakokaka wɔma wokoka. Lo mɛnya lonyangu l’efula laki lande, Jehowa akate ate: “Etena kakona kayuwumbetawo, kuyanga aha uma lu tulimbitelu ta mamba tone, takamatshi l’atei awo?”—Walelu 14:11.
6. Lo yoho yakɔna yele dihonga kakatana la mbetawɔ, ndo ngande wɛnama dikambo sɔ nshi nyɛ?
6 Jehowa akatondola okanda djɛsɛ lo mbuta ate dionga dia wɔma diaki l’anto diakɛnyaka dia vɔ komonga la mbetawɔ. Lo mɛtɛ, mbetawɔ la dihonga kakatana lam’asawɔ, diɔ diakɔ diakakoke ɔpɔstɔlɔ Joani funda lo dikambo di’etshumanelo k’Akristo ndo dia yonge yatɔ ya lo nyuma ate: “Engo kuleki akambu wa la kete wulu eko mbetawo kasu.” (1 Joani 5:4) Ɛlɔ kɛnɛ, mbetawɔ kele oko kaki la Jashua nde la Kalɛba kambokimanyiya dia lokumu l’ɔlɔlɔ la Diolelo sambishama l’andja w’otondo oma le Ɛmɛnyi wa Jehowa ndekana miliyɔ shamalo, ɛlɔngɔlɔngɔ la epalanga, wanɛ wele wolo ndo wanɛ wele wɔdu. Ndoko otunyi ɔtɔi wakakoke memadia alembe asɔ wele la wolo ndo la dihonga.—Romo 8:31.
Tatokalolake “ekongokongo”
7. Kakɔna kalembetshiya ‘kalola ɛkɔngɔkɔngɔ’?
7 Ɛlɔ kɛnɛ, Ɛmɛnyi wa Jehowa wekɔ lo sambisha lokumu l’ɔlɔlɔ la dihonga tshɛ nɛ dia wekɔ la kanyi yâmɛ vɔ la ɔpɔstɔlɔ Paulo lakafunde ate: “Shu kema l’atei a wane watsho ekongokongo edja ndu l’eshishwelu, keli teko l’atei a wane weli la mbetawo ka nshimbela nyumu yawo.” (Heberu 10:39) Oko wakate Paulo ‘kalola ɛkɔngɔkɔngɔ’ halembetshiya tsho monga la wɔma wa lo tshanda mɔtshi, nɛ dia ekambi efula wa Nzambi wakonge la wɔma lo tena dimɔtshi. (1 Samuele 21:12; 1 Khumi ya Dikanga 19:1-4) Koko lo ndjela diksiɔnɛrɛ dimɔtshi di’awui wa lo Bible, dui sɔ nembetshiyaka “mpekɔ, ndawɔ” kana “minya akambo wa mɛtɛ yimba.” Diɔ kotshaka lo kɛnɛ kendana la olimu wa Nzambi dia tshɛkɛta ‘kalola ɛkɔngɔkɔngɔ’ koka mbɛdikama la “woho watowokaka longo la masuwa l’ashi dia kitshakitsha lowango la masuwa.” Lâsɔ onto lakalola ɛkɔngɔkɔngɔ ekɔ onto lakitshakitsha ohetoheto ande l’olimu wa Nzambi. Lo mɛtɛ, wanɛ wele la mbetawɔ ka wolo ‘hawokalola ɛkɔngɔkɔngɔ’ etena katomba ekakatanu wa lo lɔsɛnɔ ɛnyɛlɔ oko ɛhɛnyɔhɛnyɔ, hemɔ ndo weho ekina w’ekakatanu. Koko, vɔ ndjatshutshuyaka dia kambɛ Jehowa, weya dia nde ayowakokɛ ndo ɔnɛ nde mbeyaka elelo awɔ. (Esambu 55:22; 103:14) Onde wɛ ekɔ la woho wa mbetawɔ ka ngasɔ?
8, 9. a) Ngande wakakeketsha Jehowa mbetawɔ k’Akristo wa lo ntambe ka ntondo? b) Kakɔna kahombaso sala dia keketsha mbetawɔ kaso?
8 L’etena kɛmɔtshi apɔstɔlɔ wakoke dia waya bu la mbetawɔ, ɔnkɔnɛ vɔ wakalɔmbɛ Yeso vate: “Ufudia mbetawo kasu.” (Luka 17:5) Vɔ wakakondja okadimwelo lo dɔmbɛlɔ diawɔ dia l’otema ɔtɔi, djekoleko lo Pɛntɛkɔsta ka l’ɔnɔnyi 33 T.D., etena kakalongola ambeki nyuma k’ekila kakawalake ndo tɔ kakakimanyiya dia ndeka shihodia Ɔtɛkɛta wa Nzambi ndo sangwelo diande. (Joani 14:26; Etsha 2:1-4) Etena kakakeketala mbetawɔ kawɔ, ambeki wakayasha tshɛ dia sambisha lokumu l’ɔlɔlɔ “l’etungelu tshe la tshina di’ulungu” oyadi l’atei w’ɔlɔshamelo.—Kolosai 1:23; Etsha 1:8; 28:22.
9 Dia keketsha mbetawɔ kaso ndo tetemala l’olimu aso, sho lawɔ la dia mbekaka ndo kanaka yimba l’Afundelo ndo nɔmbaka dia kondja nyuma k’ekila. Paka sho mbokakatshiyisha akambo wa mɛtɛ wa Nzambi lo timba ndo l’etema aso oko wakasale Jashua la Kalɛba, ndo Akristo wa lo ntambe ka ntondo mbakokaso monga la mbetawɔ kayotosha dihonga diele laso ohomba dia tetemala ndɔ ta diaso dia lo nyuma ndo mbidja otshumba.—Romo 10:17.
Aha naka onto ambetawɔ ɔnɛ Nzambi ekɔ kete lâsɔ ambokoka
10. Mbetawɔ ka mɛtɛ nɔmbaka awui akɔna?
10 Oko wakadiɛnya anto wa lo nshi y’edjedja wakalame olowanyi awɔ, mbetawɔ kakimanyiya onto dia monga la dihonga ndo la etete, nɔmbaka awui efula koko aha paka mbetawɔ tsho ɔnɛ Nzambi ekɔ. (Jakoba 2:19) Mbetawɔ ka ngasɔ nɔmbaka dia sho mbeya ɔnɛ Jehowa ekɔ onto la mɛtɛ ndo nɔmbaka dia sho ndjaɛkɛ tshɛ le nde. (Osambu 78:5-8; Tukedi 3:5, 6) Tɔ nembetshiyaka mbetawɔ l’otema aso tshɛ ɔnɛ ɛlɛmbɛ ndo atɔndɔ wa Nzambi wekɔ dikambo dia wahɔ aso shoamɛ. (Isaya 48:17, 18) Mbetawɔ kɛsɔ nɔmbaka nto dia sho monga la eshikikelo k’efula ɔnɛ Jehowa ayokotsha alaka ande tshɛ ndo nde ekɔ “ufutshi a wane watûyangaka.”—Heberu 11:1, 6; Isaya 55:11.
11. Ngande wakatshɔkwama Jashua nde la Kalɛba oma lo kɔlamelo ndo dihonga diawɔ?
11 Mbetawɔ ka ngasɔ pamaka. Tɔ pamaka etena kɔtɔnganyiyaso nsɛnɔ yaso l’akambo wa mɛtɛ, etena ‘kɛnaso’ ɛlɔlɔ atɔ, kɛnaso woho wakadimwama alɔmbɛlɔ aso, ndo lo toho tokina etena kɛnaso ɛlɔmbwɛlɔ ka Jehowa lo nsɛnɔ yaso. (Osambu 34:8; 1 Joani 5:14, 15) Sho kokaka ndjashikikɛ dia mbetawɔ ka Jashua nde la Kalɛba kaki nge etena kakawaɛnya Nzambi ɔlɔlɔ ande w’otema. (Jashua 23:14) Tɔsɛdingole awui anɛ: Vɔ wakatshikala la lɔsɛnɔ lo ɛnɔnyi 40 wakawetsha l’oswe wa shɛnga, oko wakalake Nzambi. (Walelu 14:27-30; 32:11, 12) Vɔ wakayasha tshɛ lo ɛnɔnyi esamalo wakawalɔsha ase Kanana. L’ekomelo, vɔ wakonge la lɔsɛnɔ l’otale ndo la yônge y’ɔlɔlɔ ndo vɔ tshɛ onto l’onto akalongola etenyi kande k’okitɔ. Ande woho wafuta Jehowa anto tshɛ wokambɛ la kɔlamelo ndo la dihonga lee!—Jashua 14:6, 9-14; 19:49, 50; 24:29.
12. Ngande ‘walɛmiya Jehowa dui diande’?
12 Ngandji ka lɔsɛngɔ kaki la Jehowa otsha le Jashua nde la Kalɛba toholaka ɛtɛkɛta ɛnɛ wa omembi w’esambo: “We akalemia diui diaye la lukumbu laye ladiku di’akambu tshe.” (Osambu 138:2) Etena kakamba Jehowa la lokombo lande dia kotsha daka dimɔtshi, daka diakɔ kotshamaka lo yoho ya ‘diambo’ yoleki ndo kɛnɛ kakatalongamɛka. (Efeso 3:20) Eelo, Jehowa hashaki wanɛ tshɛ ‘wangɛnangɛna’ le nde sɔnyi pondjo.—Osambu 37:3, 4.
Pami ‘kakangɛnyangɛnya Nzambi dimɛna’
13, 14. Lande na kaki Ɛnɔka l’ohomba wa mbetawɔ ndo wa dihonga?
13 Sho koka mbeka awui efula lo dikambo dia mbetawɔ ndo dia dihonga lo sɛdingola ɛnyɛlɔ k’ɔmɛnyi okina wakasɛnɛ la ntondo ka Akristo, mbuta ate Ɛnɔka. Kânga la ntondo ka nde tatɛ mbuta awui wahataye, Ɛnɔka akeyaka dia mbetawɔ kande ndo dihonga diande diayodjama l’ohemba. Lo woho akɔna? Lo woho ɔnɛ wele Jehowa akatatshi lo Ɛdɛna dia lohetsho layoyala lam’asa wanɛ wakambɛ Nzambi la wanɛ wakambɛ Satana Diabolo. (Etatelu 3:15) Ɛnɔka akeyaka nto dia lohetsho lɔsɔ lakonge l’etatelo k’ɔkɔndɔ w’anto etena kakadiake Kɛna ɔnango Abɛlɛ. Lo mɛtɛ, shɛwɔ Adama, akasɛnɛ suke la ɛnɔnyi 310 l’ɔkɔngɔ wa eotwelo ka Ɛnɔka.—Etatelu 5:3-18.
14 Koko, l’atei w’awui asɔ tshɛ, la dihonga tshɛ Ɛnɔka “akakendakenda la [Nzambi]” ndo akânya “tengo tshe” yakatɛngaka anto wa kɔlɔ Jehowa. (Etatelu 5:22; Jude 14, 15) Woho wakasukɛ Ɛnɔka ɔtɛmwɛlɔ wa mɛtɛ la dihonga tshɛ mbakakonya dia nde monga l’atunyi efula ndo lɔsɛnɔ lande monga lo wâle. L’etena kɛsɔ, Jehowa akashimbɛ ɔprɔfɛta ande oma lo nyɔi ka kɔlɔ efula. L’ɔkɔngɔ wa nde mɛnya Ɛnɔka dia “ndi akangenyangenya [Nzambi],” Jehowa “akôsekola” oma lo lɔsɛnɔ otsha lo nyɔi, ondo lo yoho ya prɔfɛsiya.—Heberu 11:5, 13; Etatelu 5:24.
15. Ɛnyɛlɔ kakɔna k’ɔlɔlɔ kakatshikɛ Ɛnɔka ekambi tshɛ wa Jehowa wa nshi nyɛ?
15 Mbala kakɔ ɔtɔi l’ɔkɔngɔ wa nde tɛkɛta dia woho wakasɛkwama Ɛnɔka, Paulo akatɛtɛ nto dia ohomba wa mbetawɔ, lo mbuta ate: “Untu laha la mbetawo, heyi [ngɛnyangɛnya Nzambi].” (Heberu 11:6) Eelo, mbetawɔ akasha Ɛnɔka dihonga dia kɛndakɛnda la Jehowa ndo mbewoya losango Lande l’elombwelo l’andja wa kɔlɔ. Lo dikambo sɔ, Ɛnɔka akatotshikɛ ɛnyɛlɔ k’ɔlɔlɔ. Tekɔ l’olimu a woho akɔ wâmɛ wa kamba l’andja ɔnɛ walɔshana l’ɔtɛmwɛlɔ wa mɛtɛ ndo wambolola la weho tshɛ w’awui wa kɔlɔ.—Osambu 92:7; Mateu 24:14; Enyelo 12:17.
Dihonga ndjaka oma lo wɔma wa Nzambi
16, 17. Obadiya akinde, ndo l’atei w’awui akɔna wakandatanema?
16 Lâdiko dia mbetawɔ, ekɔ dionga dikina diakimanyiya onto dia monga la dihonga, dionga diakɔ ko wɔma woludi la dilɛmiɛlɔ wa Nzambi. Nyɛsɔ tɔsɛdingole ɛnyɛlɔ kɛmɔtshi k’ɔlɔlɔ k’onto lakokaka Nzambi wɔma lakasɛnaka lo nshi y’ɔprɔfɛta Elidja ndo ya nkumekanga Ahaba, ɔnɛ lakolɛka lo diolelo dia nɔrdɛ di’Isariyɛlɛ. Lo lowandji laki Ahaba, ɔtɛmwɛlɔ wa Baala wakalanya diolelo dia lo nɔrdɛ lo yoho yoleki tshɛ kɔlɔ. Ɔnkɔnɛ, aprɔfɛta wa Baala 450 ndo aprɔfɛta 400 wa ekundji k’ekila, ‘wakalɛka lo mɛsa wa Jezabɛlɛ,’ ya wadi aki Ahaba.—1 Khumi ya Dikanga 16:30-33; 18:19.
17 Oko wakinde otunyi wa wolo wa Jehowa, Jezabɛlɛ akasale tshɛ dia minya ɔtɛmwɛlɔ wa mɛtɛ oma lo wodja. Nde akadiake aprɔfɛta amɔtshi wa Jehowa ndo akayange dia ndjaka Elidja, lele oma l’ɛlɔmbwɛlɔ kaki Nzambi akalawɔ lo ntshɔ la wedi wa Jɔrɔdana. (1 Khumi ya Dikanga 17:1-3; 18:13) Shi mɛnamaka dia l’etena kɛsɔ aki wolo di’onto sukɛ ɔtɛmwɛlɔ wa pudipudi lo diolelo dia nɔrdɛ? Ohɔsa dia wɛ akakambaka lo mbalasa ka nkumekanga, shi dui sɔ diotoleka monga wolo le yɛ? Awui asɔ mbakakomɛ Obadiyaa pami kakokaka Nzambi wɔma, olami wa luudu laki Ahaba.—1 Khumi ya Dikanga 18:3.
18. Kakɔna kaketɛ Obadiya ɔtɛmɔdi wa Jehowa wa lânde?
18 Aha la tâmu, Obadiya aki la yewo ndo la shɛnɔdi lo woho wakandatɛmɔlaka Jehowa. Ndo nde kosekola ɛlɛmbɛ wa Jehowa. Diakɔ diata 1 Khumi ya Dikanga 18:3 ɔnɛ: ‘Obadiya akokaka Jehowa wɔma w’efula.’ Eelo, Obadiya akokaka Jehowa wɔma wa lânde! Wɔma w’oshika ɔsɔ, akawosha dihonga, oko wakɛnama dikambo sɔ mbala kakɔ ɔtɔi l’ɔkɔngɔ wa Jezabɛlɛ ndjaka aprɔfɛta wa Jehowa.
19. Kakɔna kakasale Obadiya kakɛnyaka dia nde aki la dihonga?
19 Sho mbadiaka ɔnɛ: “Lam’akadiaki Jezebele amvutshi wa [Jehowa], Obadiya akose amvutshi lukama, akatuwashe akumi atanu, atanu lu weuku; ndi akawashaka ma la ashi.” (1 Khumi ya Dikanga 18:4) Oko wakokayɛ kanyiya, ndesha apami lokama lo woshɛshɛ aki olimu wa wâle efula. Obadiya takandahombe tsho mbewɔ diaha Ahaba la Jezabɛlɛ mbɛna, koko nde akahombe nto sala tshɛ diaha aprɔfɛta wa kashi 850 wakayaka mbala la mbala lo mbalasa ka nkumekanga mbɛna. Ndo nto, atɛmɔdi efula wa kashi wa lo wodja ndo weho w’anto tshɛ, wotokoka kamba la diaaso tshɛ dia todja Obadiya sɛkɛ dia vɔ pomɔ lokolo l’ɔlɔ le nkumekanga Ahaba la wadɛnde. Koko, l’atei w’atɛmɔdi wa dikishi asɔ tshɛ, Obadiya akakotsha ehomba w’aprɔfɛta wa Jehowa la dihonga tshɛ aha la atunyi asɔ mboshola. Ande wolo wakoka monga la wɔma wa Nzambi lee!
20. Ngande wakakimanyiya wɔma wa Nzambi Obadiya, ndo ngande wakokimanyiya ɛnyɛlɔ kande?
20 Lam’ele Obadiya akakɛnɛmɔla dihonga oma lo wɔma wa Nzambi, Jehowa akokokɛ oma le atunyi ande. Tukedi 29:25 mbutaka ɔnɛ: “Woma w’untu watuwambaka djunga. Keli one latekamaka [Jehowa], ayushimbamela.” Obadiya aki onto oko sho; nde akokaka wɔma wa mindama ndo ndjakema, oko wakokaso mboka sho lawɔ. (1 Khumi ya Dikanga 18:7-9, 12) Koko, wɔma wakandokaka Nzambi akawosha dihonga dia mbidja wɔma tshɛ wakandakoke mboka anto otshumba. Obadiya ekɔ ɛnyɛlɔ k’ɔlɔlɔ le so sho tshɛ, djekoleko le wanɛ watɛmɔla Jehowa lo mbidja lotshungɔ lawɔ kana nsɛnɔ yawɔ lo wâle. (Mateu 24:9) Nyɛsɔ sho tshɛ toyatshutshuya dia kambɛ Jehowa la “kenemo la woma.”—Heberu 12:28.
21. Kakɔna kayotɔsɛdingola lo sawo diayela?
21 Aha paka mbetawɔ la wɔma wa Nzambi mbasha onto dihonga; ngandji kokaka monga la shɛngiya ya wolo efula. Paulo akafunde ate: “[Nzambi] kuntusha utema a woma, keli ndi akatusha utema a wulu la wa ngandji ndu wa ndjakimela.” (2 Timote 1:7) Lo sawo diayela, tayɛna woho wakoka ngandji tokimanyiya dia sho kambɛ Jehowa la dihonga lo nshi y’ekomelo ya pâ nyɛ.—2 Timote 3:1.
[Nɔte ka l’ɛse ka dikatshi]
a Aha ɔprɔfɛta Obadiya.
Onde wɛ kokaka kadimola?
• Kakɔna kakakimanyiya Jashua la Kalɛba dia vɔ monga la dihonga?
• Mbetawɔ ka mɛtɛ nɔmbaka awui akɔna?
• Lande na kakewoya Ɛnɔka losango lendana la elombwelo kaki Nzambi la dihonga tshɛ?
• Ngande wakimanyiya wɔma wa Nzambi onto dia monga la dihonga?
[Osato wa lo lɛkɛ 15]
Jehowa akadjangɛ Jashua ate: “Ukikitali, uyali la dihunga”
[Esato wa lo lɛkɛ 17]
Ɛnɔka akewoya ɔtɛkɛta wa Nzambi la dihonga tshɛ