‘Nyotetemale sungukala’ nɛ dia wonya w’elombwelo wambokoka!
Awui wa lo wekelo ɔnɛ mbɔsama oma lo biukubuku Nyotetemale sungukala! yakatombe lo losanganya la distrikɛ lakasalema l’andja w’otondo lo ɔnɔnyi 2004/2005.
‘Nyotetemale sungukala, nɛ dia nyu hanyeye wonya wayoya Nkumɛnyu.’—MATEU 24:42.
1, 2. Yeso akɛdika oyelo ande la dikambo diakɔna?
OTOYOSALA, otoyeya dia wovi ɔmɔtshi akahombe ndja dia ndjova asukanyi ayɛ? Dia wɛ kokɛ wakiyɛ wa ngandji ndo diangɔ diayɛ di’oshinga wolo, wɛ ototetemala mambalɛ ndo sungukala. Lâdiko dia lâsɔ, wovi hatome mukanda dia mbewoya oyelo ande. Koko nde ndjaka, aha la londjo ndo aha la onto mbeya.
2 Lo waaso efula, Yeso akakambe la ɛnyɛlɔ ka toho tatosalaka wovi dia mbiva. (Luka 10:30; Joani 10:10) Lo kɛnɛ kendana l’akambo wakahombe salema lo nshi y’ekomelo ndo wakahombe konya l’oyelo ande dia mbela elombwelo, Yeso akasha ɔhɛmwɛlɔ ɔnɛ ate: ‘Nyotetemale sungukala, nɛ dia nyu hanyeye lushi layoya Nkumɛnyu. Kele nyeye nyate: Kanga luudu, otondeya wonya wayoya wovi, tshike nde ototetemala sɛna, ndo totondetawɔ dia luudu lande tondwama.’ (Mateu 24:42, 43) Ɔnkɔnɛ, Yeso akɛdika oyelo ande la oyelo wa wovi, mbuta ate nde ayoya aha la onto mbeya.
3, 4. a) Kakɔna kalembetshiya kitanyiya ɔhɛmwɛlɔ waki Yeso wendana la oyelo ande? b) Ambola akɔna wambɔma?
3 Wɛɛla ɔsɔ wakakokaka mɛtɛ, nɛ dia datɛ shikaa dia oyelo wa Yeso hadieyama. Yema la ntondo, lo prɔfɛsiya kakɔ kâmɛ, Yeso akate ate: “Keli nduku untu leya lushi lako kana unya ako, kuyanga andjelo wa l’ulungu, kuyanga Ona, paka Papa ndame.” (Mateu 24:36) Ɔnkɔnɛ, Yeso akakeketsha ampokami ande dia vɔ “ndjalongosola.” (Mateu 24:44) Wanɛ wakitanyiya ɔhɛmwɛlɔ waki Yeso pombaka ndjalɔngɔsɔla lo ndjalɔmbɔla dimɛna oyadi etena kakɔna kayondela elombwelo ka Jehowa.
4 Ambola amɔtshi w’ohomba wambɔma vɔ anɛ: Onde ɔhɛmwɛlɔ waki Yeso mendanaka paka l’anto wa l’andja ɔnɛ ato, kana ndo Akristo wa mɛtɛ mbahomba ‘tetemala sungukala’? Lande na kele ekɔ ohomba efula dia sho ‘tetemala sungukala,’ ndo ngande wakokaso sala dikambo sɔ?
Ɔhɛmwɛlɔ le waa na?
5. Ngande weyaso dia ɔhɛmwɛlɔ w’ɔnɛ ‘nyotetemale sungukala’ mendanaka la Akristo wa mɛtɛ?
5 Ekɔ mɛtɛ dia le anto wa l’andja ɔnɛ, oyelo wa Nkumadiɔndjɔ ayoyala oko woho watoyaka wovi nɛ dia vɔ tonaka mbidja yimba lo ɔhɛmwɛlɔ washama wendana la mpokoso kaya suke. (2 Petero 3:3-7) Ko, kayotota dikambo dia Akristo wa mɛtɛ? Ɔpɔstɔlɔ Paulo akafundɛ asekande ambetawudi ate: “Ne dia nyame nyambushihudia ololo nyati: Lushi la [Jehowa] layuya uku atuyakaka uvi l’utshu.” (1 Tesalonika 5:2) Sho mbetawɔka la eshikikelo tshɛ dia ‘lushi la Jehowa lekɔ lo ndjaye.’ Ko onde dikambo sɔ kitshakitshaka ohomba wa sho tetemala sungukala? Teye dia Yeso, ambeki ande mbakandatɛ ate: “On’a untu ayuya lu unya wahanyalungamela.” (Mateu 24:44, sho mbɛnganyisha alɛta lo sawo nɛ tshɛ.) Lo etatelo, etena kakandakeketshaka ambeki ande dia tetemala nyanga Diolelo, Yeso akâlake ate: “Nyuyalongosole, ne dia On’a untu ayuya lu unya wahanyalungamela.” (Luka 12:31, 40) Shi mbokɛmaka hwe dia Yeso akakanyiyaka dikambo dia ambeki ande etena kakandasha ɔhɛmwɛlɔ w’ɔnɛ: ‘Nyotetemale sungukala’?
6. Lande na kahombaso ‘tetemala sungukala’?
6 Lande na kahombaso ‘tetemala sungukala’ ndo ‘ndjalɔngɔsɔla’? Yeso nembetshiyaka ate: “Antu ahendi wayuyala l’ekambo, wayosa omotshi, ku wayutshika ukina. Amantu ahendi wayohela diango lu dive, wayosa omotshi, ku wayutshika ukina.” (Mateu 24:40, 41) Anto wayalɔngɔsɔla ‘mbayɔsama,’ kana shimbamɛ etena kayolanyema andja ɔnɛ wa kɔlɔ. Akina ‘wayotshikala’ dia nanyema nɛ dia vɔ wekɔ lo tawese wahɔ awɔ hita la lokaki tshɛ. L’atei w’anto asɔ mbeyaka tanema ndo wanɛ waki ntondo l’osase lo tshanda mɔtshi, koko vɔ kotetemala sungukala.
7. Woho wahateye etena kayonga ekomelo tokimanyiyaka dia sho ntsha na?
7 Woho wahateye lushi shikaa la ekomelo ka dikongɛ nɛ di’akambo di’omusu toshaka diaaso dia mɛnya dia tekɔ lo kambɛ Nzambi la eyango wa pudipudi. Lande na? Nɛ dia mbeyaka mɛnama dia ekomelo amboleka mbiviya. Lonyangu ko, Akristo amɔtshi wakanyiya ngasɔ waketawɔ dia kitshakitsha ohetoheto awɔ l’olimu wa Jehowa. Koko, oma lo ndjakimɔ kaso, takayakimɔ shoamɛ la etondo aso tshɛ le Jehowa dia mbokambɛka. Wanɛ weya Jehowa mbeyaka dia ndjonga la ohetoheto paka lo minitɛ k’ekomelo hawâmbiya nɛ dia nde mɛnaka woho wele otema w’onto.—1 Samuele 16:7.
8. Ngande watotshutshuya ngandji kokaso Jehowa dia sho tetemala sungukala?
8 Lam’ele sho nangaka Jehowa mɛtɛ, sho kondjaka ɔngɛnɔngɛnɔ woleki lo sala lolango lande. (Osambu 40:8; Mateu 26:39) Ndo sho nangaka kambɛ Jehowa pondjo pondjo. Elongamelo kɛsɔ katashisha nɛmɔ diatɔ le so l’ɔtɛ w’ɔnɛ takahombe nyomolongamɛ nto yema otsha la ntondo. Kɛnɛ koleki ohomba ele, sho tetemalaka la sungukala nɛ dia tekɔ la mposa k’efula ka ndjɛna kɛnɛ kayolembetshiya lushi la Jehowa lo kɛnɛ kendana la ekotshamelo ka alaka ande. Nsaki kaso k’efula ka ngɛnyangɛnya Nzambi mbatotshutshuya dia kamba l’alako wele l’Ɔtɛkɛta ande ndo mbetsha Diolelo diande lo dihole dia ntondo lo nsɛnɔ yaso. (Mateu 6:33; 1 Joani 5:3) Nyɛsɔ tɔsɛdingole woho wele tetemala sungukala pombaka monga la shɛngiya lo tɛdikɔ tɔsaso ndo lo yoho yasɛnaso lushi la lushi.
Lende ambɛlɛ lɔsɛnɔ layɛ?
9. Lande na kele ekɔ ohomba efula dia anto wa l’andja ɔnɛ shihodia kitshimudi ya tena diasɛnaso nɛ?
9 Ɛlɔ kɛnɛ anto efula mbeyaka dia ekakatanu wa wolo ndo awui wa kɔlɔ efula wekɔ lo salema lushi la lushi, ndo vɔ hawɔngɛnangɛna otsha lɛnɛ ambɛlɛ nsɛnɔ yawɔ hita. Ko onde vɔ mbeyaka kitshimudi ya mɛtɛ y’awui wasalema lo andja ɔnɛ? Onde vɔ mbeyaka dia tekɔ lo sɛna lo ‘nshi y’ekomelo ya dikongɛ nɛ di’akambo’? (Mateu 24:3) Onde vɔ mbeyaka dia woho wambokokanɛ dionga dia lokaki, awui wa ngala, ndo waonga wa kɔlɔ mɛnyaka dia tekɔ lo sɛna lo “nshi y’ekumelu”? (2 Timote 3:1-5) Ɔnkɔnɛ, ekɔ ohomba efula le wɔ dia vɔ shihodia kitshimudi y’akambo asɔ tshɛ ndo sɛdingola otsha lɛnɛ ambɛlɛ nsɛnɔ yawɔ.
10. Kakɔna kahombaso sala dia sho ndjashikikɛ ɔnɛ tekɔ lo tetemala sungukala?
10 Kayotota dikambo diaso? Lushi tshɛ sho pombaka mbɔsa tɛdikɔ tendana l’olimu aso, la yônge yaso ya demba, la nkumbo kaso, ndo la ɔtɛmwɛlɔ aso. Sho mbeyaka kɛnɛ kata Bible, ndo sho salaka la wolo dia kitanyiya kɛnɛ katatɔ. Koko, sho pombaka ndjambola ɔnɛ: ‘Onde dimi mbetawɔka dia ekiyanu wa lo lɔsɛnɔ shishɛmi eyango ami wa lo nyuma? Onde dimi mbetawɔka dia filozofi la tokanyi t’ase andja ɔnɛ, shikikɛmi kɛnɛ kahombami sɔna?’ (Luka 21:34-36; Kolosai 2:8) Paka sho tetemala mɛnya dia sho ndjaɛkɛka le Jehowa l’otema aso tshɛ ndo hatoyaɛkɛ lo yimba yaso hita. (Tukedi 3:5) Lo sala ngasɔ, tayotetemala ‘kukutɛ la wolo tshɛ lɔsɛnɔ la mɛtɛ,’ mbuta ate lɔsɛnɔ la pondjo lo andja w’oyoyo waki Nzambi.—1 Timote 6:12, 19.
11-13. Wetshelo akɔna wakokaso kondja oma lo bɛnyɛlɔ dia kɛnɛ kakasalema a) lo nshi ya Nɔa? b) lo nshi ya Lɔta?
11 Bible kekɔ la bɛnyɛlɔ efula diele la ɔhɛmwɛlɔ diatokimanyiya dia sho tetemala sungukala. Tɔsɛdingole kɛnɛ kakete lo nshi ya Nɔa. Edja efula la ntondo, Nzambi akɔsɛ tɛdikɔ dia ɔhɛmwɛlɔ mbishama. Koko lâdiko dia Nɔa la nkumbo kande, ndoko anto akina wakadje yimba. (2 Petero 2:5) Lo kɛnɛ kendana la dikambo sɔ, Yeso akate ate: “Uku aki lu nshi ya Noa, mbayuyala eyelu ka On’a untu. Lu nshi yako, la ntundu ka elula atayi, antu wakalekaka, wakanokaka, wakatshukanaka, wakatshukamaka, edja ndu lushi lakoto Noa lu watu a luudu. Vo kumbeya, edja ndu lam’akayi elula, akawakhumela tshe. Osoku mbayuyala eyelu ka On’a untu.” (Mateu 24: 37-39) Wetshelo akɔna wakokaso kondja oma lo dikambo sɔ? Naka sho mbetawɔ dia ekiyanu wa lo andja ɔnɛ, kânga elimu wa lo lɔsɛnɔ wele kema kɔlɔ mbɔsa dihole dia elimu wa lo nyuma watokeketsha Nzambi dia sho mbetsha lo dihole dia ntondo, kete sho pombaka kana yimba dimɛna lo dikambo sɔ.—Romo 14:17.
12 Tokane yimba nto lo dikambo dia nshi ya Lɔta. Osomba wa Sɔdɔma, lɛnɛ akasɛnaka Lɔta la nkumbo kande aki osomba waki la ɔngɔnyi efula wa l’emunyi, koko anto wa lɔkɔ komonga la waonga w’ɔlɔlɔ. Jehowa akatome andjelo ande dia tolanya osomba ɔsɔ. Andjelo wakatɛtɛ Lɔta la nkumbo kande dia vɔ ndawɔ oma la Sɔdɔma ndo diaha vɔ mbɛwɔ l’ɔkɔngɔ. Oma lo woho wakâkeketsha andjelo, vɔ wakatombe oma l’osomba. Koko, wadi aki Lɔta akatetemala kanyiya luudu lande la Sɔdɔma. Aha la kitanyiya kɛnɛ kakawawatɛ, nde akɛwɔ l’ɔkɔngɔ, ndo akashisha lɔsɛnɔ lande. (Etatelu 19:15-26) Yeso akate lo ɛtɛkɛta wa prɔfɛsiya ɔnɛ: “Nyuho wadi a Lota.” Onde tekɔ lo sala akambo lo ndjela ɔhɛmwɛlɔ ɔsɔ?—Luka 17:32.
13 Wanɛ wakayele ɔhɛmwɛlɔ wakasha Nzambi wakake. Ngasɔ mbakidiɔ lo dikambo dia Nɔa la nkumbo kande ndo lo dikambo dia Lɔta l’anande wa wamato. (2 Petero 2:9) Etena kakanaso yimba dimɛna lo ɛhɛmwɛlɔ watanema lo bɛnyɛlɔ sɔ, sho keketshamaka la losango la etshungwelo lendana la anangi wa losembwe latanema lo ɛhɛmwɛlɔ ɛsɔ. Dui sɔ ndodjaka etema aso la elongamelo ka shikaa k’ɔnɛ Jehowa ayokotsha daka diande diendana la ‘olongo w’oyoyo la nkɛtɛ k’oyoyo’ lɛnɛ ‘ayonga akambo wa losembwe.’—2 Petero 3:13.
‘Wonya w’elombwelo wambokoka’!
14, 15. a) “Unya” w’elombwelo mbidjaka ndo akambo akɔna? b) Kakɔna kalɔmbama dia ‘mboka Nzambi wɔma ndo mbosha lotombo’?
14 Kakɔna kakokaso nongamɛ, naka sho tetemala sungukala? Dibuku dia Enyelo mɛnyaka woho wayotakotshamaka sangwelo diaki Nzambi yema yema. Sala akambo lo yoho yɔtɔnɛ la kɛnɛ katatɔ ekɔ ohomba dia sho ndjalɔngɔsɔla. Prɔfɛsiya kɛsɔ kɔndɔlaka la ɔlɔlɔ tshɛ akambo wayosalema lo “lushi la Khumadiondjo,” lakatatɛ etena kakahenyama Kristo l’okudi lo 1914. (Enyelo 1:10) Dibuku di’Enyelo kotolaka yambalo yaso le ondjelo ɔmɔtshi wakawasha “lukumu l’ololo la pundju [la mbewoya anto].” Nde ekɔ lo mbuta la dui dia wolo ɔnɛ: “Nyuki [Nzambi] woma, nyûtumbuli, ne dia unya andi w’elumbwelu ambukuka.” (Enyelo 14:6, 7) “Unya” w’elombwelo ɔsɔ ekɔ etena ka mondo kendana la wewoyelo ndo oyelo wa elombwelo kɔtɛkɛtami lo prɔfɛsiya kɛsɔ. Tekɔ lo nsɛna kakianɛ lo etena kɛsɔ.
15 Kakianɛ, la ntondo ka wonya w’elombwelo komɛ, sho keketshamaka dia: ‘Mboka Nzambi wɔma ndo mbosha lotombo.’ Kakɔna kalɔmba dikambo sɔ? Wɔma wa dimɛna wa Nzambi pombaka totshutshuya dia mboka awui wa kɔlɔ ɔkɔngɔ. (Tukedi 8:13) Naka sho nɛmiyaka Nzambi, kete tayowohokamɛka la dilɛmiɛlɔ di’efula. Hatotoyasha tshɛ lo awui akina polo lo pomba etena ka mbadiaka Ɔtɛkɛta ande, mbuta ate Bible mbala la mbala. Hatotɔnyɔla dako diande diendana la wɔtwɛlɔ wa lo nsanganya y’Akristo. (Heberu 10:24, 25) Tayɔsa la nɛmɔ efula diɛsɛ dia lânde diele laso dia sambisha la ohetoheto tshɛ lokumu l’ɔlɔlɔ la Diolelo dia Mɛsiya waki Nzambi. Tayoyaɛkɛ le Jehowa lo tena tshɛ ndo la otema aso tshɛ. (Osambu 62:8) Nɛ dia sho mbeyaka ɔnɛ Jehowa mbele Nkum’Olongo, sho mbɔlɛmiyaka lo ndjela ɛlɔmbwɛlɔ kande lo nsɛnɔ yaso. Onde wɛ mɛtɛ mbokaka Nzambi wɔma ndo mbotombolaka lo toho tɔsɔ tshɛ?
16. Lande na kakokaso mbuta ɔnɛ elombwelo ka Babilɔna ka Woke kɔtɛkɛtami lo Enyelo 14:8 kamboshilaka kotshama?
16 Tshapita ya 14 ya Enyelo kɔndɔlaka akambo akina wahomba salema lo wonya w’elombwelo. Dikambo dia Babilɔna ka Woke, tshunda dia ɛtɛmwɛlɔ wa kashi tshɛ, mbɔtɛkɛtami ntondo ɔnɛ: “Ondjelo ukina a hendi akuyeli ata ati: Babilona ka wuki kambunyuko, kambunyuko!” (Enyelo 14:8) Eelo, lo ndjela kanyi yaki Nzambi, Babilɔna ka Woke kamboshilaka la kɔ. Lo 1919 ekambi waki Jehowa w’akitami wakatshungɔ oma lo lɔhɔmbɔ la wetshelo ndo ditshelo dia Babilɔna. Anto ndo wedja waki ɛhɔmbɔ wa wetshelo ndo ditshelo sɔ l’edja ka nunu di’ɛnɔnyi. (Enyelo 17:1, 15) Oma l’etena kɛsɔ, vɔ wakakoke ndjasha vɔamɛ dia tɔla ɔtɛmwɛlɔ wa mɛtɛ otsha la ntondo. Ndo oma l’etena kɛsɔ mbakatatɛ olimu wa l’andja w’otondo w’esambishelo ka lokumu l’ɔlɔlɔ la Diolelo diaki Nzambi.—Mateu 24:14.
17. Kakɔna kalembetshiya tomba oma lo Babilɔna ka Woke?
17 Koko, elombwelo ka Jehowa otsha le Babilɔna ka Woke hakome lâsɔ ato. Elanyelo katɔ k’ekomelo kaya suke. (Enyelo 18:21) Diakɔ diewoya Bible anto wa l’ahole tshɛ ɔnɛ: “Nyutumbi uma l’atei [wa Babilɔna ka Woke] nyutukuyoto lu kolo yato.” (Enyelo 18:4, 5) Ngande watombaso oma lo Babilɔna ka Woke? Dui sɔ nembetshiyaka akambo efula koko aha tsho pembola diɔtɔnganelo tshɛ la ɛtɛmwɛlɔ wa kashi. Shɛngiya ya Babilɔna mɛnamaka lo waa fɛtɛ ndo lo mbekelo yayasha anto efula, lo dionga diele l’ase andja ɔnɛ dia mbetawɔ awui wa mindo wa dieyanelo ndo lo yoho yamboleka anto nanga tɔkɛnyɔ tele l’awui w’ɛdiɛngɛ ndo awui akina efula wa kɔlɔ. Dia tetemala sungukala, ekɔ ohomba efula dia sho mɛnya oma lo etsha ndo oma lo nsaki ya lo etema aso dia tamboshila mɛtɛ kakitɔna la Babilɔna ka Woke lo toho tshɛ.
18. Lo ndjela kɛnɛ kotami lo Enyelo 14:9, 10, kakɔna kahomba Akristo wele la shɛnɔdi mbewɔ?
18 Lo Enyelo 14:9, 10, sho mbekaka dui dikina nto diendana la ‘wonya w’elombwelo.’ Ondjelo okina ekɔ lo mbuta ate: “Naka untu ayotemola nyama kako la efanelu kato, ndu ayulungula djimbitelu lu fumu kana lu lunya landi, ndi ayono ndu wanu wa kele ka [Nzambi].” Lande na? Nɛ dia ‘nyama ka djawudi ndo efanelo katɔ’ wekɔ didjidji dia ɛlɔmbwɛlɔ k’anto wahetawɔ lowandji laki Jehowa. Akristo wele la shɛnɔdi mbewɔka dia sɛngiyama kana mbidjama djembetelo oyadi oma lo dionga kana oma lo etsha awɔ lo monga oko anto wele l’olimu wa wanɛ watona dia mbetawɔ lowandji laheme tshɛ laki Jehowa Nzambi ka mɛtɛ. Akristo mbeyaka dia Diolelo diaki Nzambi diamboshilaka shikikɛma l’olongo ndo ɔnɛ diɔ diayolanya ndo diayokomiya waolelo tshɛ w’ana w’anto ndo diɔ dwamɛ to mbayotshikala pondjo pondjo.—Danyele 2:44.
Tohɛke dia wɛ pombaka sala akambo la shamanya!
19, 20. a) Oko wambotoleka nyɔngɔmɛ lo nshi y’ekomelo, kakɔna kakokaso ndjashikikɛ ɔnɛ Satana ayokisala? b) Kakɔna kahombaso ndjashikikɛ dia sala?
19 Oko wambotoleka nyɔngɔmɛ lo nshi y’ekomelo, ekakatanu la ehemba wayoleka tafulanɛka tsho. Edja tshɛ kakatasɛnɛ lo dikongɛ nɛ di’akambo di’omusu ndo kadiɛnɛso la eongelo kaso k’anto wele kema kokele, awui wele oko hemɔ, lotshundu, nyɔi ka lakiso la ngandji, tokanyi ta kɔlɔ, wendjodi wele la anto lo welo wadjaso dia sambisha Ɔtɛkɛta wa Nzambi, ndo awui akina efula wayonga la shɛngiya le so. Tatohɛke pondjo dia Satana ngɛnangɛnaka efula kamba la ekakatanu watokomɛ dia toshimba dia sambisha lokumu l’ɔlɔlɔ ndo nsɛna lo yoho yɔtɔnɛ la ɛlɛmbɛ wa Nzambi. (Efeso 6:11-13) Ɔnɛ kema etena ka sho shisha yambalo yaso ya sala awui la shamanya lo kɛnɛ kendana la tena diasɛnaso nɛ!
20 Yeso akeyaka ɔnɛ tayonga l’atei w’ekakatanu watotshutshuya paka dia mpekɔ. Diɔ diakɔ diakandatosha dako nɛ ate: ‘Nyotetemale sungukala, nɛ dia nyu hanyeye wonya wayoya Nkumɛnyu.’ (Mateu 24:42) Nyɛsɔ tâmbalɛke oko wambotoleka nyɔngɔmɛ etale lo tena. Nyɛsɔ toyalamake lo tolonga tshɛ takamba la Satana takoka ndjotɔtɛwɔla kana totakoya oma l’akambo wa mɛtɛ. Nyɛsɔ tɔsɛ yɛdikɔ ya sambishaka lokumu l’ɔlɔlɔ la Diolelo diaki Nzambi la ohetoheto w’efula ndo la eshikikelo tshɛ. Eelo, teyake nshi tshɛ dia ɔnɛ ekɔ etena ka sala akambo la shamanya lo kitanyiya ɔhɛmwɛlɔ waki Yeso wata ɔnɛ: ‘Nyotetemale sungukala.’ Lo ntsha ngasɔ, tayotombola Jehowa ndo tayonga l’atei w’anto wele la elongamelo ka ndjokondja ɛtshɔkɔ wa pondjo oma le nde.
Ngande wayoyokadimola?
• Ngande weyaso dia ɔhɛmwɛlɔ waki Yeso wa ‘tetemala sungukala’ mendanaka la Akristo wa mɛtɛ?
• Bɛnyɛlɔ diakɔna dia ɔhɛmwɛlɔ dia lo Bible diakoka tokimanyiya dia sho ‘tetemala sungukala’?
• Wonya w’elombwelo kɛdikɛdi na, ndo kakɔna kambowotokeketsha dia ntsha la ntondo ka vɔ komɛ?
[Osato wa lo lɛkɛ 26]
Elanyelo ka Babilɔna ka Woke kaya suke