Aramangɛdɔna ayonga ekomelo ka andja ka wɔma?

ARAMANGƐDƆNA! Onde tshɛkɛta shɔ mbelaka kanyi ya elanyelo ka nyemba y’anto kana ka andja w’otondo la dja? Tɔtɛkɛta tɔmɔtshi ta lo Bible mbidja ndo “Aramangɛdɔna” tonyanyemaka lushi tshɛ lo enyɔ w’anto. Anto efula kambaka la tshɛkɛta shɔ dia mɛnya elongamelo ka kɔlɔ kele la ntondo ka anto. Filmɛ, televiziɔ ndo vidɛo ndodjaka timba t’anto la awui wa kɔlɔ efula wendana la oyelo wa “Aramangɛdɔna.” Tshɛkɛta shɔ yekɔ ehekesa le anto ndo mbɔsamaka lo yoho ya kɔlɔ. Kânga mbaya tokanyi efula lo kɛnɛ kendana la kitshimudi ya tshɛkɛta shɔ, efula l’atei atɔ hatɔtɔnɛ la kɛnɛ ketsha Bible, kiɔkɔ ya tshɛkɛta yakɔ lo kɛnɛ kendana la Aramangɛdɔna.

Lam’ele Bible kakatanyaka Aramangɛdɔna la “nkomeelo k’anja,” onde wɛ hetawɔ ɔnɛ ekɔ ohomba monga la eokelo k’ɔlɔlɔ ka kɛnɛ kalembetshiya mɛtɛ tshɛkɛta Aramangɛdɔna? (Mateyo 24:3, Dyookaneelo dy’Oyooyo) Shi ekɔ dimɛna sho kadimɔ otsha le kiɔkɔ ya lâdiko dia tshɛ y’akambo wa mɛtɛ, mbuta ate Ɔtɛkɛta wa Nzambi, dia kondja ekadimwelo lo kɛnɛ kendana la kitshimudi ya Aramangɛdɔna ndo kɛnɛ kayolembetshiya tshɛkɛta shɔ le yɛ ndo le nkumbo kayɛ?

Ɔsɛdingwelo ɔsɔ wayɛnya dia Aramangɛdɔna kema ekomelo ka wɔma efula ka andja, koko tɔ kayonga etatelo k’ɔngɛnɔngɛnɔ le anto walanga nsɛna ndo monga la lɔsɛnɔ lo andja w’oyoyo wosembwe. Wɛ ayokondja eokelo k’ɔlɔlɔ ka mɛtɛ ka lo Afundelo kɛsɔ k’ohomba efula etena kasɛdingolayɛ ɔkɛtshanyelo wa kitshimudi ya mɛtɛ ya Aramangɛdɔna lo sawo diayela.

[Kiombo/Osato wa lo lɛkɛ 3]

OKO LE YƐ, ARAMANGƐDƆNA EKƆ NA?

• Lomanu l’anto la waa bɔmbɛ atɔmikɛ

• Elanyelo k’ahole wadjasɛ anto

• Ɔkɔmwanelo wa ɛngɔ kɛmɔtshi k’oma l’olongo la nkɛtɛ

• Elanyelo kaki Nzambi k’anto wa kɔlɔ