Dia shihodia Bible—Kakɔna kahombama?
YESO akatɛ She lele l’olongo ate: “We akashe akambu ane le akanga a tumba la ewu, ku ambuwashula le tokendakenda.” (Luka 10:21) Ɛtɛkɛta wa Yeso ɛsɔ mɛnyaka ɔnɛ, dia sho shihodia Bible, paka sho ndjala la dionga di’ɔlɔlɔ. Lomba laki Jehowa lekɔ lo mɛnama lo woho wakandasha anto dibuku diele paka anto wele la okitshakitsha ndo walanga mbeka ato mbakoka mɛtɛ dishihodia.
Efula ka l’atei aso mɛnaka dia ekɔ wolo monga la okitshakitsha. Sho tshɛ mbotɔka la lumu l’otako. Lâdiko dia lâsɔ, tekɔ lo nsɛna lo “nshi y’ekumelu,” l’atei w’anto “[wa]yalanga, . . . akanga a puki, akanga a ndjambiya.” (2 Timote 3:1-4) Ɔsɔ ekɔ waonga watoshimba dia shihodia Ɔtɛkɛta wa Nzambi. Lonyangu ko, sho tshɛ sɛngiyamaka lo yɛdikɔ mɔtshi oma le anto wotodingi. Ko lâsɔ, ngande wakokɛ ndjala la dionga diahombama dia shihodia Bible?
Lɔngɔsɔla otema ndo yimba yayɛ
Ɛzɛra, ɔnɔmbɔdi w’edjedja w’ekambi waki Nzambi, ‘akalɔngɔsɔla otema ande dia mbeka ɛlɛmbɛ wa Jehowa.’ (Ezera 7:10) Onde ekɔ yoho mɔtshi yakokaso nɔngɔsɔla otema aso? Eelo. Sho koka tatɛ nɔngɔsɔla otema aso lo monga la kanyi y’ɔlɔlɔ lo kɛnɛ kendana la Afundelo. Ɔpɔstɔlɔ Paulo akafundɛ asekande Akristo ate: “Lam’akanyalungula diui dia [Nzambi] diakatanyutela, nyu kudietawo uku diui di’antu, keli nyakadietawo uku diui dia [Nzambi].” (1 Tesalonika 2:13) Kânga mbele Nzambi akakambe l’anto dia funda Bible, kɛnɛ kakawafunde kakaye oma le nde. Mbeya ɔnɛ kɛnɛ kele lo Bible kakaye oma le Jehowa ayotokimanyiya dia ndeka mbetawɔ kɛnɛ kadiaso.—2 Timote 3:16.
Yoho kina ya nɔngɔsɔla otema aso ele lo dɔmbɛlɔ. Lam’ele Nzambi akakambe la nyuma k’ekila di’anto funda Bible, tɔ koka tokimanyiya dia shihodia Bible. Sho la dia nɔmbaka Nzambi dia nde tokimanyiya. Tende woho wakayakiyanyaka omembi w’esambo lo dikambo sɔ. Nde akafunde ate: “Umbisha yimba, ku layulamaka elembe aye, layêlamaka l’utema tshe.” (Osambu 119:34) Sho nɔmbaka aha paka dia monga l’akoka wa lo yimba wa mboka tsho kɛnɛ kofundami, koko ndo dia sho nɔngɔsɔla otema aso dia mbetawɔ kɛnɛ kata Bible. Dia shihodia Bible, sho la dia monga suke dia mbetawɔ kɛnɛ kele mɛtɛ.
Etena kakanayɛ yimba dia monga la dionga di’ɔlɔlɔ, sɛdingola kɛnɛ kakoka kosalɛ wekelo wa Bible. Tekɔ la toshadiya efula t’ɔlɔlɔ tatotshutshuya dia mbadia Ɔtɛkɛta wa Nzambi, koko kɛnɛ koleki tshɛ ele dikambo sɔ tosukanyaka la Nzambi. (Jakoba 4:8) Etena kadiaso woho watosalaka Jehowa lo akambo wotshikitanyi, woho wɔsande wanɛ wawoka ngandji la nɛmɔ, ndo woho wasalande la wanɛ wawoka ɔkɔngɔ, sho shihodiaka woho w’onto wende. Oyango wa ntondo wahomba monga laso lam’adiaso Bible ele dia monga la diɔtɔnganelo di’ɔlɔlɔ la Nzambi ndo dia keketsha diɔtɔnganelo diakɔ.
Kɛnɛ katoshimba dia monga la dionga di’ɔlɔlɔ
Kakɔna kakoka toshimba diaha sho shihodia Bible? Wekamu ɔmɔtshi ele mbetawɔ tokanyi t’anto wɛnama oko wekɔ la kɔlamelo. Ɛnyɛlɔ, wɛ koka mbetawɔ tokanyi taki anto amɔtshi wele lo ahole wa lâdiko. Ko kakɔna kayoyosala naka anto asɔ hawetawɔ ndo hawɔshi Ɔtɛkɛta wa Nzambi la nɛmɔ? Lo weho w’akambo wa ngasɔ, mbeyaka monga tshondo y’okakatanu dia monga la eokelo ka kɛnɛ ketsha Bible mɛtɛ. Ɔnkɔnɛ, Bible tokeketshaka dia sho sɛdingolaka dimɛna akambo wakawatetsha.—1 Tesalonika 5:21.
Mariya wa nyango Yeso akahomana la woho w’okakatanu wa ngasɔ. Nde akodiama lo ndjela mbekelo y’ase Juda. Nde akakitanyiyaka dimɛna dimɛna Ɛlɛmbɛ wa Mɔsɛ ndo aha la tâmu nde akatshɔka lo shinangɔnga. Yema l’ɔkɔngɔ, lo lɔsɛnɔ lande, nde akayeyaka dia yoho y’ɔtɛmwɛlɔ yakawetsha ambutshi ande kombetawɔmaka le Nzambi. Etombelo wakayala ele, Mariya aketawɔ wetshelo waki Yeso ndo nde aki ɔtɔi ɔmɔtshi wa l’atei w’anto wa ntondo wa lo etshumanelo k’Akristo. (Etsha 1:13, 14) Kɛsɔ kɔmɛnyaka ɔnɛ nde kɔnɛmiyaka ambutshi ande ndo mbekelo yawɔ, koko ɔsɔ aki djembetelo ya ngandji kakandokaka Nzambi. Lo ɛnyɛlɔ ka Mariya, dia sho kondja wahɔ oma lo Bible, sho pombaka mbetsha kɔlamelo yaso otsha le Nzambi lo dihole dia ntondo.
Lonyangu ko, efula k’anto hawɔshi akambo wa mɛtɛ wa lo Bible la nɛmɔ di’efula. Amɔtshi nangaka paka ndjela ɛtɛmwɛlɔ w’ashidi woki edio l’akambo wa kashi. Akina mɔnyɔlaka akambo wa mɛtɛ lo ɛtɛkɛta awɔ ndo lo yoho yawɔ ya lɔsɛnɔ. Oma lɔkɔ, mbetawɔ akambo wa mɛtɛ wa lo Bible nɔmbaka dia ndjahondja akambo amɔtshi: Dui sɔ mbeyaka kela lohetsho oma le angɛnyi ayɛ, asekayɛ, asekayɛ wa l’olimu, ndo mbala mɔtshi oma le ase nkumbo kayɛ. (Joani 17:14) Koko, Sɔlɔmɔna, nkumekanga ka lomba akafunde ate: “Ukundja mete, keli tukisundjaki.” (Tukedi 23:23) Naka wɛ mbɔsa akambo wa mɛtɛ la nɛmɔ di’efula, kete Jehowa ayokokimanyiya dia wɛ shihodia Bible.
Wekamu okina watoshimba diaha shihodia losango lele lo Bible ele tona kamba la kɛnɛ katatɔ. Yeso akatɛ ambeki ande ate: “Wakanyusha dia nyu mbeya akambu wushami wa diulelu dia l’ulungu, keli kumbasha. Ne dia etema w’antu ane wakayala wetshu, atui awo weko puki.” (Mateu 13:11, 15) Efula k’anto wakasambishama oma le Yeso kombetawɔ losango ndo kokadimola etema. Ande otshikitanu la ose okanda lakatɛkɛta Yeso dikambo diande lo wɛla ɔmɔtshi lee! Yeso ate etena kakandatane lɔwɔkɔ l’oshinga wolo, aha la tshimbatshimba, ose okanda ɔsɔ akasondja kɛnɛ tshɛ kaki lande dia lisomba! Eokelo ka akambo wa mɛtɛ wa lo Bible pombaka monga la nɛmɔ dia woho ɔsɔ le so.—Mateu 13:45, 46.
Okakatanu wa mbetawɔ dia mbeka
Mbetawɔ dia mbeka ekɔ okakatanu wa woke dia shihodia Bible. Onto mbeyaka mboka wolo mbetawɔ tokanyi t’eyoyo t’oma le onto lɛnande dia ekɔ onto l’anyanya. Koko, apɔstɔlɔ waki Yeso waki “haweyi mukanda, [ndo] antu k’antu.” (Etsha 4:13) Dia nembetshiya lande na kakiwɔ anto k’anto, Paulo akafunde ate: “Anyasu, nyukani dia leta lanyu! Aha akanga a yimba y’alimba efula, kuyanga akanga a wulu efula, kuyanga eshilambu efula mbaketama, keli [Nzambi] akasonola akanga a dinginya, wa la kete dia ndi mbutsha akanga yimba sonyi.” (1 Koreto 1:26, 27) Naka wɛ mbɔsaka dia ekɔ wolo le yɛ dia wɛ ndjakitshakitsha dia mbetawɔ mbetshama oma le onto k’onto, kete ohɔ dia Nzambi mbakamba la nde dia ketsha. Onde ekɔ diɛsɛ dimɔtshi dioleki nɛ dia mbetshama oma le Jehowa, ‘Ombetsha aso wa Woke’?—Isaya 30:20; 54:13.
Namana, ɔnɔmbɔdi ɔmɔtshi w’alembe w’ose Suriya, aki onto ɔmɔtshi lakoke wolo nonga awui oma le onto k’onto. Lam’akandatayangaka onto lakoka mbɔkɔnɔla sudi kaki lande, nde akatshu dia tɛnana la Elisha, umvutshi waki Jehowa. Koko Nzambi akahombe mbotɛ kɛnɛ kakandahombe sala lo tshimbo y’ose olimu. Lam’ele Namana kondjakitshakitsha, aki dikambo dia wolo le nde dia nonga awui oma le ose olimu, nde akatone ntondo dia kitanyiya ɛtɛkɛta w’oma le umvutshi waki Nzambi. Kombeta edja, Namana akayotshikitanyaka dionga diande, mbuta ate akayolonga, akakitanyiya, ko nde akakɔnɔ. (2 Khumi ya Dikanga 5:9-14) Sho lawɔ pomanaka l’okakatanu wa ngasɔ wonya wekaso Bible. Sho pombaka mbeya ɔnɛ, dia sho kɔnɔ lo nyuma ndo lo lɔkɛwɔ, sho pombaka ndjela yoho ya lɔsɛnɔ l’oyoyo. Onde tayonga la okitshakitsha dia mbetawɔ onto ɔmɔtshi tetsha kɛnɛ kahombaso sala? Paka wanɛ walanga mbeka ato mbakoka kishihodia.
Owandji wa lɛɛta ɔmɔtshi, mbuta ate ɔlɛnga w’ose Etiyɔpiya akɛnya woho wakinde la dionga di’ɔlɔlɔ. Nde akayakalolaka l’Afrikɛ lo pusupusu kande etena kakaye Filipɛ oya le nde. Filipɛ akawombola dia kana nde akokaka kɛnɛ kakandadiaka. Nde aki la okitshakitsha ko akôkadimola ate: “Ukundi eyami nimbitela, aha paka untu konombodi?” L’ɔkɔngɔ wa nde shihodia Ɔtɛkɛta wa Nzambi, pami kɛsɔ akabatizama. Oma lâsɔ, “ndi akatshu, atangenangena.”—Etsha 8:27-39.
Lo tshɛ kawɔ, Ɛmɛnyi wa Jehowa wekɔ anto k’anto. Lomingu tshɛ, vɔ nɔmbɔlaka wekelo wa Bible wa la ngelo ndekana miliyɔ shamalo. Lam’ele Bible mbetshaka yoho ya lɔsɛnɔ yoleki ɔlɔlɔ, nembetshiyaka elongamelo kâmɛ kele la anto, ndo mɛnyaka woho wa mbeya Nzambi dimɛna, miliyɔ y’anto wambɛna dia mbeka Bible ndo shihodia kɛnɛ katatɔ mbishaka ɔngɛnɔngɛnɔ woleki tshɛ. Ɔsɔ ekɔ ɔngɛnɔngɛnɔ wakokayɛ ndo wɛ monga la wɔ.
[Osato wa lo lɛkɛ 7]
Namana kombetawɔ nonga awui oma le ose olimu l’anyanya
[Osato wa lo lɛkɛ 7]
Oshihodielo wa Bible salanganyaka etema aso