Nɛmɔ di’onto ekɔ dui diɔnywama efula

“Kɛnɛ kakokami mbuta lo dikambo dia lɔsɛnɔ lo mpango ya nkanu ele onto kɔmbɔsamaka la nɛmɔ ndo akasɔkishamaka.”​—KƐSƆ MBAKATE MAGDALENA KUSSEROW REUTER, LAKI KOMVƆ LO MPANGO KA LOKANU K’ASE NAZI.

LO NSHI yakalɔmaka Ta dia hende di’andja w’otondo, anto wakasɔkishama lo yoho yoleki tshɛ kɔlɔ lo mpango ya lokanu y’ase Nazi, koko, ɛhɛnyɔhɛnyɔ ɛsɔ komonga etatelo kana ekomelo ka woho walɔshama nɛmɔ di’onto. Oyadi sho mboka sso lo kɛnɛ kakete kana kɛnɛ kasalema nshi nyɛ, sho mɛnaka hwe dia aya edja efula kele “anto wekɔ lo mbishama sɔnyi ndo hawɔsama la nɛmɔ.”

Koko, woho wɔnywama nɛmɔ di’onto hakome tsho lo akambo wa l’esehe wakasalema l’ɔkɔndɔ w’anto. Nɛmɔ di’onto diekɔ lo mɔnywama mbala la mbala lo toho tokina. Ohokanyiya dikambo dia ɔna lɔnywama l’ɔtɛ w’ɛkɔmɔ kɛmɔtshi kele lande lo demba. Kana dikambo dia angɛndangɛnda wɔnywama l’ɔtɛ wele mbekelo yawɔ tshikitana la ya lo wodja wewɔ. Kana dikambo dia anto wɛngiyawɔ l’ɔtɛ wa lokoho lawɔ la demba kana wa wodja awɔ. Wanɛ wɔnyɔla nɛmɔ di’onto mbeyaka mbɔsa dikambo sɔ oko shɛkɛsɛkɛ, koko pâ ndo sɔnyi kashama wanɛ wɔnywama bu dui dia tɔkɛnyɔ.​—Tukedi 26:18, 19.

Nɛmɔ di’onto kɛdikɛdi na?

Lo ndjela diksiɔnɛrɛ dimɔtshi, mbɔsama la nɛmɔ “kɛdikɛdi mbɔsama la wotsho, nɛmiyama.” Lâsɔ, nɛmɔ di’onto mendanaka la woho wayaɔsaso shoamɛ ndo watɔsa anto akina. Awui efula koka monga la shɛngiya lo woho wayaɔsaso shoamɛ. Koko lo lɔsɛnɔ laso la lushi la lushi, woho watɔsa ndo watosalɛ anto akina akambo ekɔ la shɛngiya y’efula lo lonto ndo lo nɛmɔ diaso.

Lo tshunda di’anto tshɛ, sho tanaka ase wola, ndo wanɛ wahakoke ndjakokɛ. Koko, hatokoke mbuta ɔnɛ weho akɔ tshɛ toho ta lɔsɛnɔ tɔsɔ mbakitshakitsha nɛmɔ di’onto. Ɔnkɔnɛ dionga ndo kɛnɛ kasala anto akina mbakoka nanya nɛmɔ di’onto. Lonyangu ele kɛnɛ keta mɛnyaka dia anto wele la pâ mbahaleke mbɔsama la nɛmɔ. Sho mbokaka mbala la mbala ɛtɛkɛta wele oko, “tshioto y’anyanya,” “djele,” watondjɛwɔ esombe, ase wola ndo anto wele la hemɔ!

Lande na kashana anto sɔnyi? Onde nɛmɔ di’onto diokɔlɛnyama lushi lɔmɔtshi? Sawo diayela diayosha ekadimwelo w’amɛna w’oma lo Ɔtɛkɛta wa Nzambi, Bible lo ambola asɔ.