Totombole Jehowa lo kɛnɛmɔla kɛnɛmɔ
“Elimu [wa Jehowa] watuyalaka la nemo la lutumbu.”—OSAM. 111:3.
1, 2. a) Ngande wakokayɛ nembetshiya tshɛkɛta “kɛnɛmɔ”? b) Ambola akɔna wayotɔsɛdingola lo sawo nɛ?
ETENA kakawawombola dia nde nembetshiya tshɛkɛta yelɛwɔ “ndjasha nɛmɔ,” yana ya yimato mɔtshi y’ɛnɔnyi dikumi yelɛwɔ Madison akakadimola mbala kakɔ ɔtɔi ate yɔ nembetshiyaka “ndɔta dimɛna.” Ondo yana ya yimato shɔ kombeyaka dia Bible mbutaka lo kɛnɛ kendana la Nzambi ɔnɛ nde ‘ndɔta nɛmɔ la lotombo.’ (Osam. 104:1) Le anto efula, ndjasha nɛmɔ mendanaka mbala mɔtshi la ndɔta dimɛna. Ɛnyɛlɔ, ɔpɔstɔlɔ Paulo akakombolaka dia wamato w’Akristo ‘ndjalɛnga l’ɔlɔtɔ wa dimɛna, la ndjakitshakitsha ndo la ekanelo k’ɔlɔlɔ, koko aha la wɛlɛlɔ wa divo kana la ɔlɔtɛlɔ wa paonyi ndo w’ahɔndɔ w’oshinga wolo.’ (1 Tim. 2:9) Koko lɔkɛwɔ la dimɛna lasha Jehowa ‘nɛmɔ ndo lotombo’ ndeka diangɔ sɔ.—Osam. 111:3.
2 Lo Bible, tshɛkɛta ya lo Hɛbɛru yakakadimɔma ɔnɛ “kɛnɛmɔ” kokaka nto kadimɔma ɔnɛ “lɔnɛnɛ,” “lotombo,” la “lokumu.” Lo ndjela diksiɔnɛrɛ dimɔtshi, tshɛkɛta “kɛnɛmɔ” nembetshiyaka “eongelo k’onto l’oshika, lalɛnyama ndo lɔsama la nɛmɔ efula.” Ndo ndoko onto lakoka nongola lotombo ndo nɛmɔ di’efula oleki Jehowa. Koko oko weso ekambi ande, sho pombaka tɛkɛta ndo sala akambo lo yoho yawosha nɛmɔ. Ko lande na kele anto l’akoka wa sala akambo la kɛnɛmɔ? Ngande wɛnama nɛmɔ ndo lɔnɛnɛ laki Jehowa? Shɛngiya yakɔna yahomba monga la kɛnɛmɔ kaki Nzambi le so? Wetshelo akɔna wakokaso kondja oma le Yeso Kristo lo kɛnɛ kendana l’ɔkɛnɛmwɛlɔ wa dionga sɔ? Ndo ngande wakokaso kɛnɛmɔla kɛnɛmɔ ka dimɛna?
Sho kokaka sala akambo la kɛnɛmɔ
3, 4. a) Kakɔna kahombaso sala lo woho watosha Jehowa nɛmɔ? b) Lo yoho ya didjidji Osambu 8:5-9 mendanaka la onto akɔna? (Enda nɔtɛ ka l’ɛse ka dikatshi.) c) Jehowa waa na wakandasha kɛnɛmɔ lo nshi y’edjedja?
3 Oko wakawatongama lo efanelo kaki Nzambi, anto kokaka salaka akambo la kɛnɛmɔ. Jehowa akasha pami ka ntondo nɛmɔ lo mbosha ɔkɛndɛ wa namaka nkɛtɛ. (Etat. 1:26, 27) Kânga l’ɔkɔngɔ w’onto shisha eongelo kande ka kokele, Jehowa akanyomɛnya ɔkɛndɛ wele l’onto lo kɛnɛ kendana la nkɛtɛ. Ɔnkɔnɛ, Nzambi ekɔ lo tetemala ‘mbisha’ anto kɛnɛmɔ. (Adia Osambu 8:5-9.)a Kɛnɛmɔ katoshande totshutshuyaka sho lawɔ dia tombola lokombo la woke laki Jehowa la wɔma wɔsɔhanyemi la dilɛmiɛlɔ ndo la nɛmɔ.
4 Jehowa mbishaka wanɛ wôkambɛ olimu w’ekila kɛnɛmɔ lo yoho ya lânde. Nzambi akasha Abɛlɛ kɛnɛmɔ lo mbetawɔ olambo ande ndo lo tona olambo wa Kɛna k’ɔnango. (Etat. 4:4, 5) Jehowa akatɛ Mɔsɛ dia mbisha Jashua, pami kakahombe ndjɔ̂hɛna oko ɔnɔmbɔdi w’ase Isariyɛlɛ ‘yema mɔtshi ya kɛnɛmɔ kaki lande.’ (Wal. 27:20) Bible mbutaka lo kɛnɛ kendana la Sɔlɔmɔna k’ɔnaki Davidi ɔnɛ: “[Jehowa] akasha Solomona lukumu la wuki lu ashu wa Isariyele tshe. Ndi akôlemia otekoya wuhu waki nkonemiama nduku khum’ekanga kaki la ntundu kandi lu Isariyele.” (1 Ek. 29:25) Nzambi ayosha Akristo w’akitami wambolwama wakewoya la kɔlamelo tshɛ “lutumbu la diulelu [diande]” kɛnɛmɔ ka lânde. (Osam. 145:11-13) Lo tombola Jehowa lo yoho shɔ, olui watatetemala pama wa “ekoko ekina” waki Yeso wekɔ la ɔkɛndɛ wa diambo ndo wa nɛmɔ efula.—Joa. 10:16.
Kɛnɛmɔ ndo lɔnɛnɛ laki Jehowa lambɛnama
5. Kɛnɛmɔ ka ngande kele la Jehowa?
5 Lo osambo ɔmɔtshi wɛnya otshikitanu wele lam’asa woke woke waki Nzambi la totshikitiki tele anto, omembi w’esambo Davidi akembe ate: “[Jehowa] Khum’esu li, lukumbu laye leli dimena otekoya lu kete tshe, ndu lutumbu laye lambumbela ladiku di’ulungu!” (Osam. 8:1) Tatɛ la ntondo k’etongelo ka “ulungu la kete” polo ndo l’ɔkɔngɔ w’ekotshamelo ka woke ka sangwelo diaki Nzambi dia kadimola nkɛtɛ paradiso ndo konya anto lo eongelo ka kokele, mbuta ate oma ko mɔmbɔkɔmbɔla ndo pondjo pondjo, Jehowa Nzambi mbele Onto lele la lɔnɛnɛ ndo kɛnɛmɔ koleki tshɛ l’andja w’otondo.—Etat. 1:1; 1 Kor. 15:24-28; Eny. 21:1-5.
6. Lande na kakate omembi w’esambo ɔnɛ Jehowa ndɔta kɛnɛmɔ?
6 Omembi w’esambo ɔsɔ wakokaka Nzambi wɔma akanandema efula lam’akandendaka olongo wa woke woludi la tɔɔtɔ l’otsho, mbuta ate la lokema la diangɔ diangayima l’olongo. Oko wakinde la diambo di’efula lo menda woho ‘wakananula Nzambi olongo oko dihɔndɔ,’ omembi w’esambo akɔshi Jehowa oko onto lɔlɔtshi kɛnɛmɔ l’ɔtɛ wa dikoka dioleki diambo diele Lande dia tonga. (Adia Osambu 104:1, 2.) Kɛnɛmɔ ndo woke woke wa Otungi, kanga nkudu tshɛ lahɛnama, mɛnamaka oma lo diangɔ diɛnama diakandatonge.
7, 8. Ngande wɛnya diangɔ diele l’olongo kɛnɛmɔ ndo lotombo laki Jehowa?
7 Tɔshi ɛnyɛlɔ ka galaksi kelɛwɔ Voie lactée. Lo galaksi kɛsɔ kele la miliyara la miliyara ya tɔɔtɔ, waa planɛtɛ, ndo ngɔndɔ la wonya, nkɛtɛ mɛnamaka oko yangɔ ya tshitshɛ efula oko fushi ya nkɛtɛ ɔtɔi lo disɛnga dia woke efula. Galaksi kɛsɔ twamɛ kekɔ la tɔɔtɔ ndekana miliyara lokama! Naka onto mbadia yɔɔtɔ ɔtɔi lo sekɔndɛ tshɛ aha la momuya lushi l’otondo, mbuta ate wenya 24, kete nde ayohomba sala ɛnɔnyi ndekana 3000 dia mbadia tɔɔtɔ miliyara 100.
8 Naka Voie lactée keto kekɔ la tɔɔtɔ miliyara 100, kayotota dia galaksi nkina yotshikadi? Waa nomb’ewo mbɔsaka dia andja ɔnɛ wekɔ la galaksi lam’asa miliyara 50 polo lo miliyara 125 ndo ɔnɛ Voie lactée ekɔ ɔtɔi ɔmɔtshi l’atei wa galaksi shɔ. Lâsɔ andja ɔnɛ w’otondo wekɔ la tɔɔtɔ tongana? Yimba y’onto hakoke mbeya lofulo la tɔɔtɔ tele l’andja ɔnɛ. Koko Jehowa “atalaka efula ka toto, atutoleka kumbu to tshe.” (Osam. 147:4) Lo menda kɛnɛmɔ ndo lotombo l’efula lele la Jehowa, onde hatotshutshuyama dia tombola lokombo lande la woke?
9, 10. Ngande wɛnya mapa kana mbo ya ndɛ yatosha Otungi aso lomba lande?
9 Nyɛsɔ tɔtɛkɛtake kakianɛ dia mapa, ɛngɔ kɛmɔtshi keyama efula. Jehowa ekɔ onto “Lakatungi ulungu la kete,” ndo nde “katuleshaka avushi ndjala.” (Osam. 146:6, 7) “Nemo ndo lutumbu” laki Nzambi mɛnamaka lo elimu ande wa weke, mbidja ndo tombatomba diatondja diangɔ diasala anto mapa. (Adia Osambu 111:1-5.) Yeso aketsha ambeki ande dia nɔmbaka Nzambi ɔnɛ: “Utusha mbu ya nde ya la lushi la lushi elo.” (Mat. 6:11) Lo ɔtɛkɛta wakafundama Bible, tshɛkɛta yokambi lawɔ lanɛ ele “mapa,” mbuta ate “otosha mapa aso wa lushi l’ɛlɔ.” Mapa mbakalekaka ndɛ anto efula wa lo nshi y’edjedja, mbidja ndo ase Isariyɛlɛ. Kânga mbɔsama mapa oko bu mbo ya ndɛ ya wotsho, diangɔ diakamba lawɔ dia katɛ mapa ndo woho wokatɛwɔ ekɔ dui dia diambo.
10 Etena kakafundamaka Bible, ase Isariyɛlɛ wakakambaka la shima k’eponga ndo l’ashi dia sala mapa. Tena dimɔtshi wakakambaka la wodoya l’okatelo wa mapa. Diangɔ diakawasanganyaka dia tondja mapa sɔ diekɔ la diɔtɔnganelo lam’asadiɔ. Koko ndoko onto lashihodia dimɛna dimɛna diɔtɔnganelo diele lam’asa diangɔ sɔ. Ndo nto, yoho yesheshama mapa l’otema ekɔ dui dikina dia diambo. Diakɔ diakembe omembi w’esambo ate: “[Jehowa] li, ndi elimu aye efula li! La [lo]mba mbakayêtungi tshe.” (Osam. 104:24) Onde ndo wɛ lawɔ mbatshutshuyama dia tombola Jehowa l’ɔtɛ w’elimu ande?
Shɛngiya yakɔna yele la kɛnɛmɔ ndo lɔnɛnɛ laki Jehowa le so?
11, 12. Kana yimba lo elimu w’etongelo waki Nzambi kokaka monga la shɛngiya yakɔna le so?
11 Aha paka sho mbôngi nomb’ewo l’awui wa tɔɔtɔ ko sho mambiyama la woho wonga olongo l’otsho kana ombewi wa chimie dia sho ngɛnangɛna mapa. Koko dia sho shihodia woke woke w’Otungi aso, sho pombaka mbɔsa etena ka kana yimba la elimu w’anya ande. Shɛngiya yakɔna yakoka monga l’okanelo wa yimba wa ngasɔ le so? Vɔ wekɔ la shɛngiya ya woho wâmɛ la nyɛ yonga la okanelo wa yimba lo yoho kina lo elimu waki Jehowa.
12 Lo kɛnɛ kendana l’akambo wa weke wakasalɛ Jehowa ekambi Ande, Davidi akembe ate: “Dimi layukanaka yimba dia lutumbu la wuki aye, ndu dia elimu aye wa mamba.” (Osam. 145:5) Sho mɛnyaka dia sho kanaka yimba lo elimu ɛsɔ lo mbekaka Bible ndo lo kanaka yimba la kɛnɛ kadiaso. Shɛngiya yakɔna yele la okanelo wa yimba wa ngasɔ? Lowando lele laso lo kɛnɛ kendana la kɛnɛmɔ ndo lɔnɛnɛ laki Jehowa layohama. Ndo nto, tayotshutshuyama dia tombola Jehowa l’ɛnyɛlɔ ka Davidi lakate ɔnɛ: “Dimi layusanyaka dia wuki aye.” (Osam. 145:6) Kana yimba lo elimu wa mamba waki Nzambi ayokeketsha diɔtɔnganelo dia lam’asaso la Jehowa ndo ayototshutshuya dia mbewoya anto akina awui wendana la nde la waasaso ndo l’eshikikelo tshɛ. Onde tekɔ lo sambisha lokumu l’ɔlɔlɔ l’ohetoheto ndo tekɔ lo kimanyiya anto akina dia vɔ monga la lowando lo kɛnɛ kendana la kɛnɛmɔ, lɔnɛnɛ ndo lowandji laki Jehowa Nzambi?
Yeso akakɛnɛmɔla kɛnɛmɔ kaki Nzambi lo yoho ya kokele
13. a) Lo ndjela Danyele 7:13, 14, Jehowa akandasha Ɔnande? b) Oko wende Nkumekanga, ngande wasalɛ Yeso ambolami ande akambo?
13 Yeso Kristo, Ɔnaki Nzambi akasambisha lokumu l’ɔlɔlɔ l’ohetoheto ndo akasha She lele l’olongo kɛnɛmɔ. Jehowa akasha Ɔnande ɛtɔi lakandote kɛnɛmɔ ka lânde lo mbosha ‘lowandji la diolelo.’ (Adia Danyele 7:13, 14.) Koko, Yeso bu la lotamanya ndo nde mbɔtshiyaka anto lo demba. Nde ekɔ Omboledi wa kɛtshi weya elelo wele la ambolami ande ndo nde mbashaka kɛnɛmɔ ndo mbalɛnyaka. Tɔsɛdingole ɛnyɛlɔ ɔtɔi kɛnya woho wakasalɛka Yeso, Nkumekanga kakasɔnama anto wakahomanaka la nde akambo, djekoleko wanɛ wakahetshamaka.
14. Ngande wakɔsamaka akanga wa sudi l’Isariyɛlɛ w’edjedja?
14 Mbala efula anto waki la hemɔ ka sudi lo nshi y’edjedja wakatatshɔka yema yema otsha lo nyɔi. Demba dia wanɛ waki la hemɔ kɛsɔ diakatalanaka yema yema. Kɔnɔla kanga sudi akɔsamaka oko dikambo dia wolo efula oko mbolola onto oma lo nyɔi. (Wal. 12:12; 2 Khum. 5:7, 14) Akanga wa sudi wakɔsamaka oko anto wele mindo ndo takawahombe nsɛna kâmɛ l’anto akina. Etena kakawasukanaka la anto, vɔ wakahombaka mbuta la dui dia wolo ɔnɛ: “Mindu, mindu!” (Lew. 13:43-46) Kanga sudi aki oko onto lambovɔ. Lo ndjela ɛkɔndɔ w’ewandji w’ɛtɛmwɛlɔ w’ase Juda, kanga sudi tshɛ akahombaka mangana l’ose Juda yɛdikɔ ya mɛtɛlɛ 1,7. Ɛkɔndɔ ɛmɔtshi mbutaka dia etena kakɛnaka owandji ɔmɔtshi w’ose Juda kanga sudi kânga l’etale, nde akawokaka ave diaha nde sukana la nde.
15. Kakɔna kakasalɛ Yeso kanga sudi ɔmɔtshi?
15 Koko tende kɛnɛ kakasale Yeso etena kakaye kanga sudi le nde ndo kakɔndɔlɔmbɛ dia nde mbɔ̂kɔnɔla. (Adia Mako 1:40-42.) Lo dihole dia mbotshanya, Yeso akoke pami kaki konangemaka oma le anto akina kɛsɔ kɛtshi ndo akɔlɛmiya. Le Yeso, pami kɛsɔ aki la pâ ndo l’ohomba w’ekimanyielo. L’otema woludi la kɛtshi, Yeso akasalɛ pami kɛsɔ dui dimɔtshi aha la tshimbatshimba. Nde akasukana la nde, akawonanda ndo akɔkɔnɔla.
16. Wetshelo akɔna wambotokondja oma lo yoho yakasalɛka Yeso anto akina akambo?
16 Oko weso ambeki waki Yeso, ngande wakokaso mbokoya yoho yakandakɛnɛmɔla kɛnɛmɔ ka She? Yoho mɔtshi ele, mbeya dia anto tshɛ pombaka mbɔsama la kɛnɛmɔ ndo nɛmiyama, oyadi dihole, yônge kana ɛnɔnyi wele lawɔ. (1 Pet. 2:17) Lo yoho ya lânde, wanɛ wele la yema ya lowandji, ɛnyɛlɔ waomi, ambutshi, dikumanyi di’Akristo pombaka mbɔsa wanɛ walamawɔ la nɛmɔ. Lo sala ngasɔ, vɔ mbâkimanyiyaka dia nama nɛmɔ diele lawɔ. Lo mbika epole ɔsɛkɛ ɔnɛ ɔsɔ ekɔ ɔkɛndɛ w’Okristo tshɛ, Bible mbutaka ɔnɛ: “Nyukani ngandji uku untu l’onangu; nyolemianya.”—Romo 12:10.
Tɛnya kɛnɛmɔ l’ɔtɛmwɛlɔ
17. Wetshelo akɔna wakokaso kondja oma l’Afundelo lo kɛnɛ kendana la kɛnɛmɔla kɛnɛmɔ etena katɛmɔlaso Jehowa?
17 Bible mɛnyaka dia sho pombaka mbidja yambalo ya lânde dia kɛnɛmɔla kɛnɛmɔ etena katɛmɔlaso Jehowa. Undaki 5:1 mbutaka ɔnɛ: “Ulamaki dikaka diaye lam’ayuyotoka lu luudu la [Nzambi ka mɛtɛ].” Etena kakiwɔ lo dihole di’ekila, wakadjangɛ Mɔsɛ la Jashua dia minya sabata oma l’ekolo awɔ. (Etum. 3:5; Jas. 5:15) Vɔ wakahombaka sala ngasɔ dia mɛnya wɔma wɔsɔhanyemi la dilɛmiɛlɔ waki lawɔ. Ɛlɔmbɛdi w’ase Isariyɛlɛ wakadjangemɛ dia ndɔta ehako wa linɛnɛ dia “nkumba utakataka awo.” (Etum. 28:42, 43) Dui sɔ diakakimanyiyaka diaha tenyi diawɔ dia demba dia sɔnyi mɛnama etena kakawakambaka lo elambwelo. Onto tshɛ la lo nkumbo k’ɔlɔmbɛdi akahombaka sukɛ ɛlɛmbɛ waki Nzambi wendana la kɛnɛmɔ.
18. Ngande wakɛnɛmɔlaso kɛnɛmɔ lo yoho yatɛmɔlaso Jehowa?
18 Kɛnɛmɔ kendana l’awui w’ɔtɛmwɛlɔ mendanaka la lokumu ndo dilɛmiɛlɔ. Dia sho monga anto wakoka nongola lokumu ndo nɛnyama, sho pombaka sala akambo la dilɛmiɛlɔ. Kɛnɛmɔ kahombaso kɛnɛmɔla hahombe monga ka lâdiko di’ɛlɔmɔ. Tɔ pombaka monga k’oma k’ɛse otema. (1 Sam. 16:7; Tuk. 21:2) Kɛnɛmɔ pombaka monga etenyi kɛmɔtshi ka lonto laso ndo monga la shɛngiya lo lɔkɛwɔ laso, lo dionga diaso, lo diɔtɔnganelo diasaso l’anto akina kana lo woho wayaɔsaso shoamɛ. Lo mɛtɛ, sho pombaka kɛnɛmɔlaka kɛnɛmɔ tena tshɛ ndo lo dui tshɛ diataso ndo diasalaso. Lo kɛnɛ kendana la lɔkɛwɔ laso, dionga diaso, ɔlɔtɔ aso ndo woho walɔngɔsɔlaso divo diaso, sho pombaka ndjela ɛtɛkɛta waki ɔpɔstɔlɔ Paulo wata ɔnɛ: “Tukitshiyaki untu utamba a ntakanya nduku yema, ne dia ekambelu kasu katukonywama. Keli lu akambu tshe, shu tatuyaenyaka uku ekambi wa [Nzambi].” (2 Kor. 6:3, 4) Sho pombaka ‘nɛngaka wetshelo waki Nzambi, Oshimbedi aso l’akambo tshɛ.’—Tito 2:10.
Totetemale kɛnɛmɔla kɛnɛmɔ ka dimɛna
19, 20. a) Naa yoho yoleki dimɛna ya mbisha anto akina kɛnɛmɔ? b) Lo kɛnɛ kendana la kɛnɛmɔ, yɛdikɔ yakɔna yambotɔsa?
19 Akristo w’akitami wele “akendji wa Kristu” kɛnɛmɔlaka kɛnɛmɔ. (2 Kor. 5:20) “Ekoko ekina” wâsukɛ la kɔlamelo tshɛ mbɔsamaka la nɛmɔ oko wewɔ atomami wa Diolelo dia Mɛsiya. Dikɛndji kana otomami tɛkɛtaka la dihonga tshɛ ndo la kɛnɛmɔ lo wahɔ wa lowandji la wodja ande. Ɔnkɔnɛ, sho pombaka tɛkɛta la kɛnɛmɔ ndo la dihonga tshɛ dia sukɛ Diolelo diaki Nzambi. (Ef. 6:19, 20) Etena kɛmbɛso anto akina ‘nkumu y’ɔlɔlɔ ya ɛngɔ kɛmɔtshi ka dimɛna efula,’ shi sho mbashaka kɛnɛmɔ?—Is. 52:7.
20 Sho pombaka mbɔsa yɛdikɔ ya tombola Nzambi lo monga la lɔkɛwɔ lɔtɔnɛ la kɛnɛmɔ kande. (1 Pet. 2:12) Nyɛsɔ tongake nshi tshɛ la dilɛmiɛlɔ di’efula otsha le nde, ndo otsha le asekaso atɛmɔdi ndo tɔlɛmiyake ɔtɛmwɛlɔ ande efula. Ndo tambolongamɛ dia Jehowa lɔlɔtshi kɛnɛmɔ ndo lɔnɛnɛ, ayɔngɛnangɛna yoho yɔ̂tɛmɔlaso la kɛnɛmɔ tshɛ.
[Nɔte ka l’ɛse ka dikatshi]
a Ɛtɛkɛta waki Davidi wa l’Osambu 8 mendanaka lo yoho ya didjidji la Yeso Kristo pami ka kokele.—Heb. 2:5-9.
Ngande wayoyokadimola?
• Shihodia woke woke wa kɛnɛmɔ kele la Jehowa pombaka monga la shɛngiya yakɔna le so?
• Wetshelo akɔna wakokaso kondja lo kɛnɛ kendana la kɛnɛmɔ oma lo kɛnɛ kakasalɛ Yeso kanga sudi ɔmɔtshi?
• Ngande wakokaso tombola Jehowa la kɛnɛmɔ?
[Osato wa lo lɛkɛ 12]
Jehowa ngande wakandasha Abɛlɛ kɛnɛmɔ?
[Osato wa lo lɛkɛ 14]
Elimu wa weke wa Jehowa mɛnamaka kânga lo mapa kana mbo ya ndɛ yatoshande
[Osato wa lo lɛkɛ 15]
Wetshelo akɔna wambotokondja lo kɛnɛ kendana la kɛnɛmɔ oma lo kɛnɛ kakasalɛ Yeso kanga sudi ɔmɔtshi?
[Osato wa lo lɛkɛ 16]
Tɛmɔla Jehowa la kɛnɛmɔ nembetshiyaka mbôtombola