Jɔbɔ aki la ekikelo ndo la olowanyi
“We akalimbitela ukambi ami Jobo? Nduku untu la kete uku ndi, untu l’ololo ndu l’usimbwi, latukaka [Nzambi] wɔma, ndu lambukadimo uma lu kolo.”—JOBO 1:8.
1, 2. a) Mpokoso yakɔna yakakomɛ Jɔbɔ la shashimoya? b) Kɔndɔla woho wa lɔsɛnɔ laki la Jɔbɔ la ntondo ka mpokoso shɔ.
JƆBƆ aki onto ɔmɔtshi lakɛnamaka dia nde aki la diangɔ woho w’anyanya, ɛnyɛlɔ: Ɔngɔnyi, lokumu, yônge y’ɔlɔlɔ ndo nkumbo k’ɔngɛnɔngɛnɔ. Oma lâsɔ, mpokoso shato ya weke yakokomɛ la shashimoya. Nde akashisha ɔngɔnyi ande lo kamula ka sso. Oma lâsɔ nto, anande tshɛ wakadiakema la lɔpɛpɛ la wolo. Kombeta edja, nde akandama la hemɔ ka wolo kakotondja atshutshu demba di’otondo. Dikambo diande mboleki tɛkɛtama lo dibuku dia lo Bible diɔlame lokombo lande.—Jobo, tshapita 1 ndo 2.
2 Jɔbɔ akakume l’otema ate: “Utunduyala ndjali uku akimi ntundu.” (Jobo 3:3; 29:2) Etena katokomɛ mpokoso kɛmɔtshi, sho tshɛ kombolaka monga la woho wa lɔsɛnɔ lakiso lalɔ la ntondo ka mpokoso kakɔ tokomɛ. Jɔbɔ aki la lɔkɛwɔ la dimɛna ndo losembwe ndo akɛnamaka dia nde akakokamɛka oma lo mpokoso. Anto wa lokumu wakɔlɛnyaka ndo wakayangaka alako le nde. (Jobo 29:5-11) Nde aki l’ɔngɔnyi, koko aha ɔngɔnyi mbakɔsaka dihole dia ntondo lo lɔsɛnɔ lande. (Jobo 31:24, 25, 28) Etena kakandahomanaka la wadi waki edo ndo la ana wa tshike waki lo dihombo, nde akakimanyiyaka. (Jobo 29:12-16) Nde aki la kɔlamelo le wadɛnde.—Jobo 31:1, 9, 11.
3. Jehowa ngande wakandɔsaka Jɔbɔ?
3 Jɔbɔ aki onto ɔlɔlɔ nɛ dia nde akatɛmɔlaka Nzambi. Jehowa akate ate: “Nduku untu la kete uku ndi, untu l’ololo ndu l’usimbwi, latukaka [Nzambi] wɔma, ndu lambukadimo uma lu kolo.” (Jobo 1:1, 8) Koko kânga mbaki Jɔbɔ la olowanyi, mpokoso yakayokonyaka lo lɔsɛnɔ la shɔkɔ. Nde akashisha kɛnɛ tshɛ kaki lande. Pâ, ɔkɛi ndo lonyangu lakayodjaka lonto lande la mɛtɛ l’ohemba.
4. Lande na kahombaso sɛdingola ehemba wakakomɛ Jɔbɔ?
4 Lo mɛtɛ, aha Jɔbɔ oto mbaki okambi waki Nzambi wakadiɛnɛ la mpokoso. Ɛlɔ kɛnɛ, Akristo efula kokaka mɛna esadi eto dia awui wakakomɛ Jɔbɔ fɔnaka la wâkomɛ. L’ɔtɛ wa dikambo sɔ, ekɔ ambola ahende wakokaso sɛdingola: Naka sho mbohɔ ehemba wakakomɛ Jɔbɔ, ngande wakoka dui sɔ tokimanyiya etena katokomɛ mpokoso kɛmɔtshi? Ndo ngande wakoka ehemba wakakomɛ Jɔbɔ tetsha dia sho mboka anto akina wasoya kɛtshi?
Dui diendana la kɔlamelo ndo ohemba wendana la olowanyi
5. Lo kanyi yaki Satana, lande na kakakambɛka Jɔbɔ Nzambi?
5 Kɛnɛ kakakomɛ Jɔbɔ tshikitana la kɛnɛ kakakomɛ anto akina. Aha la Jɔbɔ mbeya, Diabolo akate dia Jɔbɔ ekɔ lo kambɛ Nzambi l’ɔtɛ w’eyango wa lokaki. Etena kakakotola Jehowa yambalo y’anande wa lo nyuma lo waonga w’ɔlɔlɔ waki la Jɔbɔ etena kakiwɔ lo losanganya lɔmɔtshi l’olongo, Satana akate ate: “Undi, Jobo mbukaka [Nzambi] woma wukuka? We kumbudinga lukumbu dia mbulama, ndi la wa lu luudu landi la diango diandi tshe?” Lo mbuta ngasɔ, Satana akɛnya dia eyango wa lokaki mbaki la Jɔbɔ, ndo ngasɔ mbatande ndo lo dikambo di’ekambi ekina tshɛ waki Nzambi. Satana akatɛ Jehowa ate: “Uhusimbula lunya laye kakiane, unandi kene tshe keli la ndi. Mete, ndi ayukoseka kaku.”—Jobo 1:8-11.
6. Naa dui di’ohomba diakonyiya Satana?
6 Ɔsɔ aki dui di’ohomba efula. Satana akɔnyɔla yoho yakamba Jehowa la lowandji lande. Onde Nzambi kokaka mɛtɛ nɔmbɔla andja w’otondo la ngandji? Onde lokaki mbayoyodja otshumba l’ekomelo oko wakate Satana? Jehowa akasha Diabolo lotshungɔ la pemba Jɔbɔ, ele la eshikikelo dia okambi Ande ayotshikala la olowanyi ndo la kɔlamelo. Ɔnkɔnɛ, Satana akela Jɔbɔ mpokoso lahatanya. Etena kakakite Satana tatala lo ɛlɔshɛlɔ ande wa ntondo, nde akayotatshaka Jɔbɔ hemɔ ka wolo. Diabolo akate ate: “Diuwu lu diuwu. Kene tshe keli la untu, ndi nkikimoka ne dia lumu landi.”—Jobo 2:4.
7. Lo toho takɔna tadiɛnɛ ekambi waki Nzambi wa nshi nyɛ la woho w’ehemba wakakomɛ Jɔbɔ?
7 Kânga mbele Akristo efula hawodiɛnɛ ɛlɔ kɛnɛ oko wakadiɛnɛ Jɔbɔ, asui wa weho la weho wekɔ lo mbakomɛ. Efula wekɔ lo pɛnyahɛnyama kana wekɔ la ekakatanu wa lo nkumbo. Ekakatanu wendana la ekondjelo ndo la yônge ya demba kokaka monga la etombelo wa kɔlɔ efula. Amɔtshi wakashisha nsɛnɔ yawɔ l’ɔtɛ wa mbetawɔ kawɔ. Lo mɛtɛ, hatokoke mbuta dia Satana mbatela mpokoso tshɛ yatokomɛ. Ekakatanu ɛmɔtshi koka tokomɛ l’ɔtɛ wa munga yaso hita kana l’ɔtɛ wa eongelo kakatahowɔ. (Ngalatiya 6:7) Ndo sho tshɛ diɛnɛka la etombelo wa kɔlɔ w’oma lo lotshundu l’osombe ndo la mpokoso y’oma lo diangɔ diakatongama. Bible mɛnyaka hwe dia lo etena kɛnɛ, Jehowa hakokɛ ekambi ande lo dihindo oma lo mpokoso shɔ.—Undaki 9:11.
8. Ngande wakoka Satana nyanga dia kamba la asui wele laso?
8 Koko, Satana koka kamba la asui watokomɛ dia ndanya mbetawɔ kaso. Ɔpɔstɔlɔ Paulo akate woho wakandasoyama la “tende lu dimba [diande], dikendji dia Satana,” diakatetemala ‘mbɔhɛnyahɛnya.’ (2 Koreto 12:7) Oyadi okakatanu ɔsɔ waki wa lo demba, ɛnyɛlɔ hemɔ ka lo washo kana ɛngɔ kekina, Paulo akashihodia dia Satana akakoke kamba la okakatanu akɔ dia mbôshishɛ ɔngɛnɔngɛnɔ ndo olowanyi ande. (Tukedi 24:10) Ɛlɔ kɛnɛ, Satana kokaka tshutshuya ase nkumbo, asekaso wa la kalasa ndo kânga mandji ya tohadi dia pɛnyahɛnya ekambi waki Nzambi lo toho tɔmɔtshi.
9. Lande na kahahombe ekakatanu kana ɔlɔshamelo tokashimola lo yoho yamboleka?
9 Ngande wakokaso tondoya ekakatanu ɛsɔ? Ele lo mbaɔsa oko diaaso dia tetemala mɛnya Jehowa ngandji kawokaso ndo woho wasukɛso lowandji lande. (Jakoba 1:2-4) Oyadi kakɔna kele lo kiɔkɔ y’ekakatanu aso, naka sho shihodia ohomba wa monga la kɔlamelo le Nzambi, kete dui sɔ diayotokimanyiya dia nama wɛdimo aso wa lo nyuma. Ɔpɔstɔlɔ Petero akafundɛ Akristo ate: “Elangemi ami, tanyambaki dia akambu wa wulu weli l’atei anyu, wambuya le nyu dia nyuhimba, nyati: Dikambu di’uyuyu diambuya le su.” (1 Petero 4:12) Ndo Paulo akate ate: “Ndu wane tshe walanga ndjala la lumu l’ololo le Kristu Jesu, wayusuwa.” (2 Timote 3:12) Satana ekɔ lo tetemala mɔnyɔla olowanyi wele la Ɛmɛnyi wa Jehowa, oko wakandɔnyɔla waki Jɔbɔ. Ɔnkɔnɛ, Bible mɛnyaka dia lo nshi nyɛ y’ekomelo mamboleka Satana ndɔshana la ekambi waki Nzambi.—Enyelo 12:9, 17.
Eokelo ka kɔlɔ kaki la Jɔbɔ ndo alako amɔtshi wa kɔlɔ wakandalongola
10. Jɔbɔ akahomana la okakatanu akɔna?
10 Jɔbɔ akahomana l’okakatanu wahatakombola pomana la wɔ. Nde kombeyaka lande na kakokomɛ mpokoso shɔ. Jɔbɔ akafɔnya ɔfɔnyafɔnya dia ‘Jehowa kakasha ndo kakɔshi.’ (Jobo 1:21) Ondo Satana akayange dia mbisha Jɔbɔ kanyi y’ɔnɛ Nzambi mbele lo kiɔkɔ y’asui ande.
11. Lembetshiya kɛnɛ kakasale Jɔbɔ lo menda mpokoso yakokomɛ.
11 Jɔbɔ akakɔmɔ heyama kânga mbakandatone dia sɛka Nzambi, oko wakokeketsha wadɛnde. (Jobo 2:9, 10) Nde akate dia ‘anto wa kɔlɔ wekɔ la lɔsɛnɔ la dimɛna loleki lande.’ (Jobo 21:7-9) Ondo nde akayambola ate: ‘Lande na kambisha Nzambi dilanya dia nganɛ?’ Tena dimɔtshi nde akakombola mvɔ. Nde akate ate: “Utuyetawo mbishemi lu Dihuli di’edu, utuyetawo namami lu usheshe, edja ndu lam’ambukitakita kele kaye!”—Jobo 14:13.
12, 13. Ngande wakanandema Jɔbɔ la ɛtɛkɛta waki angɛnyi ande asato?
12 Jɔbɔ aki la angɛnyi asato wakaye ndjowenda, oko dia ‘ndjosamba ndo dia ndjokeketsha.’ (Jobo 2:11) Koko vɔ waki mɛtɛ ‘asambi wa kɔlɔ.’ (Jobo 16:2) Jɔbɔ akakoke kondja ekimanyielo oma le angɛnyi ande wakandakoke kitshɛ wetsho ande, koko angɛnyi ande asato wakayolekaka mbotshindja wɔɔngɔ ndo mbahɛ lonyangu lâdiko dia lɔnɛ laki lande.—Jobo 19:2; 26:2.
13 Ɔnkɔnɛ, Jɔbɔ akakoke mɛtɛ ndjambola ɔnɛ: ‘Lande na paka dimi? Ambomokongola kasowami nganɛ?’ Angɛnyi ande wakawotɛ awui waki komonga mɛtɛ. Vɔ wakawotɛ dia nde aki lo sowa l’ɔtɛ wa pɛkato mɔtshi ya weke yakandasale. Elifazɛ akawombola ate: “Untu akona laha la unungu lakalanyema? Keli le mi, dimi menaka nti: Waku watukambaka uhedia, ndu watuneka kolo, watunaka wuhu ako.”—Jobo 4:7, 8.
14. Lande na kahatakoke mbuta mbala kakɔ ɔtɔi ɔnɛ kapanda ekɔ lo sowa l’ɔtɛ wa lɔkɛwɔ lande la kɔlɔ?
14 Eelo, ekakatanu koka tomba naka sho monɛ lo demba lo dihole dia monɛ lo nyuma. (Ngalatiya 6:7, 8) Lo dikongɛ nɛ, ekakatanu koka tokomɛ oyadi lɔkɛwɔ la ngande lele laso. Ndo nto, hatokokaki mbuta pondjo dia onto laha l’onongo koka kokamɛ lo mpokoso tshɛ. Yeso Kristo laki komonga ‘la akambo wa kɔlɔ ndo lakayakakitola la atshi wa pɛkato,’ akavu nyɔi ka pâ l’otamba w’asui ndo ɔpɔstɔlɔ Jakɔba akavu nyɔi ka ovwedi. (Heberu 7:26; Etsha 12:1, 2) Kanyi ya kɔlɔ yaki la Elifazɛ la asekande ahende yakatshutshuya Jɔbɔ dia mamɛ lokumu lande l’ɔlɔlɔ ndo tɛtɛ dia nde kema la onongo. Ondo awui wa kashi wakawate w’ɔnɛ Jɔbɔ ekɔ lo sowa l’ɔtɛ wa kɔlɔ kakandasale akonge la shɛngiya lo kanyi yaki la Jɔbɔ lo dikambo dia losembwe laki Nzambi.—Jobo 34:5; 35:2.
Woho wa kondja ekimanyielo lo tena di’asui
15. Kanyi yakɔna yakoka tokimanyiya dia sho ndɔshana l’asui?
15 Onde ekɔ wetshelo ɔmɔtshi wakokaso kondja oma lo kɛnɛ kakakomɛ Jɔbɔ? Sho kokaka mbɔsa dia mpokoso, hemɔ, kana ɛhɛnyɔhɛnyɔ wambotokomɛ okomɛkomɛ. Sho koka ndjɛna dia weho w’ekakatanu ɛsɔ hawokomɛ anto akina paka sho ato. (Osambu 73:3-12) Tena dimɔtshi, sho koka ndjaoka ambola w’ohomba anɛ: ‘Onde ngandji kokami Nzambi mbatshutshuya dia mbokambɛ oyadi kakɔna kakoka komɛmi? Onde dimi nangaka mbisha Jehowa “okadimwelo wa nde mbisha ɔnɛ Latosolaka?”’ (Tukedi 27:11; Mateu 22:37) Hatohombe mbetawɔ pondjo dia tokanyi t’anyanya t’anto akina tokonya dia monga la tâmu lo kɛnɛ kendana la ekimanyielo kahomba tosha Shɛso lele l’olongo. Okristo ɔmɔtshi wa kɔlamelo lakasowe ɛnɔnyi efula la hemɔ kahakɔnɔ esadi akate mbala kɛmɔtshi ate: “Dimi mbeyaka dia oyadi tshɛ katshika Jehowa dia tɔ komɛmi, dimi layetawɔ kikikɛ. Dimi mbeyaka dia nde ayombisha wolo wemi la ohomba. Nde okombishaka wolo wemi la ohomba.”
16. Ɔtɛkɛta wa Nzambi ngande wakimanyiyawɔ wanɛ wele l’atei w’ekakatanu?
16 Sho mbamboleka shihodia toho takamba la Satana oleki Jɔbɔ. “Shu mbeyaka ditshelu diandi,” kana eyango ande wa kɔlɔ. (2 Koreto 2:11) Ndo nto, tekɔ la ɛtɛkɔ ka lomba lɛnɛ akokaso toka. Lo Bible, sho tanaka ɛkɔndɔ w’apami la wamato wa kɔlamelo wakakikɛ weho tshɛ w’ehemba. Ɔpɔstɔlɔ Paulo lakasowe oleki Akristo efula akafunde ate: “Akambu tshe wakawafundi ntundu wakafundama dia ntulakanya dia shu ndjala la elungamelu uma lu etetemalu la uma lu ekikitshelu ka lu afundelu.” (Romo 15:4) Ɔmɛnyi wa Jehowa ɔmɔtshi wa l’Erɔpɛ akadjama lo lokanu l’ɔtɛ wa mbetawɔ kande lo etena kakalɔmaka Ta dia ntondo di’andja w’otondo. Nde akengɔnya l’onto ɔmɔtshi mbo ya ndɛ yakandahombe ndɛ nshi shato la Bible. Nde mbutaka ate: “Wengɔnyelo ɔsɔ wakonge la wahɔ efula le mi! Kânga mbakimi la ndjala ka lo demba, lakalongola mma dia lo nyuma diakakimanyiya dimi l’anto akina lo asui aso lo nshi y’ofukutanu shɔ. Leke la Bible kɛsɔ polo nd’ɛlɔ.”
17. Tɛdikɔ takɔna takɔshi Nzambi takoka tokimanyiya dia mbikikɛ?
17 Lâdiko w’ekeketshelo k’oma lo Afundelo, tekɔ la dihomɔ efula diatokimanyiya dia shihodia Bible diatosha ɛlɔmbwɛlɔ ka dimɛna dia ndɔshana la ekakatanu. Naka sho sala eyangelo lo Index des publications de la Société Watch Tower, kete tayotana ɔkɔndɔ w’Okristo ɔmɔtshi lakahomana la woho w’okakatanu wele laso. (1 Petero 5:9) Koka monga nto ohomba mbutɛ dikumanyi kana Akristo akina wambotshunda ekakatanu wele laso. Kɛnɛ koleki ele, oma lo tshimbo ya dɔmbɛlɔ sho koka kondja ekimanyielo oma le Jehowa ndo oma le nyuma kande k’ekila. Ngande wakashike Paulo tanga la ntondo ka ‘mbala’ yaki Satana? Ele lo mbeka dia ndjaɛkɛ lo wolo waki Nzambi. (2 Koreto 12:9, 10) Nde akafunde ate: “Dimi mbeyaka ntsha akambu tshe la wulu wa one latunkikitshaka.”—Filipi 4:13.
18. Ngande wakoka anyaso Akristo tosha ekeketshelo kahombama?
18 Ɔnkɔnɛ, sho kokaka kondja ekimanyielo ndo hatohombe mengenga dia kiyanga. Tukedi 24:10 mbutaka ɔnɛ: “Naka we ayokomo lu lushi la pa, wulu aye weli tshitshe.” Oko wakoka wɛdiya mana esongo wa luudu ko lɔ monga lo wâle mbakoka ɔkɔmwɛlɔ w’otema mbidja olowanyi aso w’Okristo lo wâle. Dia tondoya wâle ɔsɔ, Jehowa tosukɛka lo tshimbo y’asekaso ambetawudi. Ondjelo ɔmɔtshi akɛnama le Yeso ndo akôkeketsha l’otsho wakawawonde. (Luka 22:43) Lam’akandatatshɔka otsha la Rɔma lo lokanu, Paulo “akuki [Nzambi] lusaka, akakikitala” etena kakandɛnyi anango lo Kituka k’Apiyo la lo Pango shato. (Etsha 28:15) Ɔmɛnyi wa Jehowa ɔmɔtshi wa l’Allemagne akohɔ ekimanyielo kakandalongola etena kakandakome lo pango ka lokanu kakawelɛka Ravensbrück, lâsɔ ko nde eke la ɛnɔnyi dikumi l’ɛmɔtshi. Nde akate ate: “Okristo ɔmɔtshi w’osekami akanongola la wangasanu tshɛ kam’akandamɛnyi. Kadiyɛso kekina ka kɔlamelo akakimanyiya ndo akakome oko ombutshi ami wa lo nyuma.”
‘Onga la kɔlamelo’
19. Kakɔna kakakimanyiya Jɔbɔ dia shika tanga lo welo waki Satana?
19 Jehowa akate lo dikambo dia Jɔbɔ dia nde “ambushikikala lu uluwanyi andi.” (Jobo 2:3) Kânga mbakandakɔmɔ otema ndo mbakinde kombeyaka lande na kakinde lo sowa, ndoko lushi lakayɛkayɛka Jɔbɔ lo kɔlamelo yande. Jɔbɔ komanguna mbetawɔ kande. Nde akatɛtɛ ate: “Edja ndu lam’ayumukitshiya, dimi halunya akambu ami w’usimbwi uma le mi.”—Jobo 27:5.
20. Lande na kahombaso mbikikɛ?
20 Mbɔsa yɛdikɔ ya ngasɔ ayotokimanyiya dia nama kɔlamelo yaso l’atei w’ekakatanu tshɛ, mbuta ate la ntondo k’ehemba kana k’ɔlɔshamelo. Yeso akatɛ etshumanelo ka la Smurina ate: “Tukaki akambu wayangaye nsuwa woma. Ulungi, uhimbanyi uyanga mbidja amotshi anyu lu lukanu dia nyuhimba, keli nyu nyayusuwa nshi dikumi. Utetemali edja ndu lu nyoi, ku dimi layukusha dembo dia kusu dia lumu.”—Enyelo 2:10.
21, 22. Etena kakikɛso asui, sho kokaka keketshama lo mbeya dui diakɔna?
21 Lo andja ɔnɛ walɔmbwama oma le Satana, ekikelo ndo olowanyi aso wayɔtɔ l’ohemba. Koko, Yeso toshikikɛka dia naka sho mbika washo lo kɛnɛ katokongɛ, kete hatotoka wɔma. Kɛnɛ kele ohomba ele nama kɔlamelo yaso. Ɔpɔstɔlɔ Paulo akate ate: ‘Asui wele wa lo tshanda mɔtshi tsho,’ kele “lutumbu,” kana woshasha watolaka Jehowa ‘wele woke efula ndo tshikalaka pondjo.’ (2 Koreto 4:17, 18) Kânga asui wa Jɔbɔ waki wa lo tshanda mɔtshi tsho lo mbɛdika la ɛnɔnyi w’ɔngɛnɔngɛnɔ waki lande la ntondo ndo l’ɔkɔngɔ w’ehemba ande.—Jobo 42:16.
22 Ekɔ tena dimɔtshi dia lo lɔsɛnɔ diakokaso mɛna di’oko ehemba wambotokama kana mɛna di’oko asui aso wekɔ wolo mbikikɛ. Lo sawo diayela, tayɔsɛdingola woho wakoka kɛnɛ kakakomɛ Jɔbɔ tosha wetshelo ekina lo dikambo dia ekikelo. Tayɔsɛdingola nto toho tokina takokaso keketsha anto akina wele lo asui.
Ngande wayoyokadimola?
• Kakɔna kakate Satana lo kɛnɛ kendana la olowanyi wa Jɔbɔ?
• Lande na kahahombe asui tokashimoya amboleka?
• Ngande watokimanyiya Jehowa dia mbikikɛ?
[Esato wa lo lɛkɛ 15]
Sala eyangelo, sawola l’Akristo wambotshunda ndo dɔmbɛlɔ koka tokimanyiya dia mbikikɛ