‘Nyakoke lokumu la ekikelo ka Jɔbɔ’
‘Nyakoke lokumu la ekikelo ka Jɔbɔ ndo nyakɛnyi woho wakakandola Jehowa dikambo diande, nyakɛnyi dia Jehowa ndola la ngandji ndo la kɛtshi.’—JAKOBA 5:11.
1, 2. Ekakatanu akɔna wakahomana la atshukanyi amɔtshi wa la Pologne?
ETENA kakɔtɔ osomba wa Danzing (welamɛ nshi nyɛ ɔnɛ Gdańsk), wa lo nɔrdɛ ka Pologne l’anya w’alembe waki Hitler, ko Harald Abt atakotsha ɔnɔnyi wa nde koma Ɔmɛnyi wa Jehowa. Oma lâsɔ, lɔsɛnɔ lakakome wolo ndo wâle wa mamba le Akristo wa mɛtɛ wa l’osomba ɔsɔ. Alembe waki Hitler wakawelɛka wa Gestapo wakatshutshuya Harald la wolo dia sinya mukanda ɔmɔtshi dia mɛnya dia nde ambotona mbetawɔ kande, koko nde akatone. L’ɔkɔngɔ wa nde mbetsha mingu mɔtshi lo lokanu, wakatome Harald lo pango ka lokanu ka Sachsenhausen. Lɛkɔ, wakawanɛka ndo wakɔkɔmɔlaka mbala la mbala. Owandji ɔmɔtshi w’alembe akɛnya Harald dihole diakawatshumbaka edo w’anto ndo akawotɛ ate: “L’ɔkɔngɔ wa nshi 14 wɛ ayodiakema ko odio ayɛ mbikadjema lo dihole nɛ naka wɛ halange sɛka mbetawɔ kayɛ.”
2 Etena kakawande Harald ko wadɛnde Elsa akalɔnya yana yawɔ ya yimato ya ngɔndɔ dikumi. Koko waa Gestapo kotshika Elsa. Kombeta edja, wakɔhɔtɔla ɔna, ko wakatome lo pango kɛmɔtshi ka la Auschwitz kakawadiakaka anto. Koko nde la Harald wakatshikala la lɔsɛnɔ ɛnɔnyi efula. Lo Tshoto y’Etangelo ya Ngɔndɔ ka nɛi 15, 1980 lo Falase, sho kokaka mbadia ɔkɔndɔ wendana la asui awɔ ndo woho wakawakikɛ. Harald akafunde ate: “Lo tshɛ, laketsha ɛnɔnyi 14 wa lɔsɛnɔ lami lo pango ya nkanu ndo lo nkanu l’ɔtɛ wa mbetawɔ kami le Nzambi. Wakamimbola vate: ‘Onde wadɛ akakokimanyiya dia mbikikɛ ekakatanu ɛsɔ tshɛ?’ Eelo, nde aki ekimanyielo ka wolo le mi! Lakeyaka oma k’etatelo dia nde hatonaki mbetawɔ kande pondjo ndo ewo ka dikambo sɔ akasukɛ efula. Lakeyaka dia nde ayɔngɛnangɛna dimi ndjakema lo dihole dia dimi shisha kɔlamelo yami ko vɔ tshungolami. . . . Elsa akakikɛ asui efula lo nshi yakinde lo pango ya lokanu ya l’Allemagne.”
3, 4. a) Bɛnyɛlɔ diaki waa na diakoka keketsha Akristo dia mbikikɛ? b) Lande na katokeketsha Bible dia sɛdingola kɛnɛ kakakomɛ Jɔbɔ?
3 Mbikikɛ asui kema dui dia tshitshɛ, oko wakoka Ɛmɛnyi wa Jehowa efula shikikɛ dikambo sɔ. L’ɔkɔkɔ ɔsɔ mbalaka Bible Akristo tshɛ ɔnɛ: “Nyendi amvutshi wakataka diui lu lukumbu la Khumadiondjo.” (Jakoba 5:10) Lo ɔkɔndɔ w’anto w’otondo, ekambi efula waki Nzambi wakahɛnyahɛnyama tshanana. Ɛnyɛlɔ ka “ului a wuki w’emenyi,” kokaka tokeketsha dia tetemala ndawɔ lowango laso l’Okristo la ekikelo.—Heberu 11:32-38; 12:1.
4 Lo Bible, Jɔbɔ ekɔ ɛnyɛlɔ ka dimɛna efula ka onto laki la ekikelo. Jakɔba akafunde ate: ‘Tambonyotɛ shate: Wanɛ tshɛ wele la ekikelo wekɔ la ɔtshɔkɔ. Nyu nyakoke lokumu la ekikelo ka Jɔbɔ ndo nyakɛnyi woho wakakandola Jehowa dikambo diande, nyakɛnyi dia Jehowa ndola la ngandji ndo la kɛtshi.’ (Jakoba 5:11) Kɛnɛ kakakomɛ Jɔbɔ tɛnyaka ɛtshɔkɔ wakongɛ akanga wa kɔlamelo watshɔkwama oma le Jehowa. Dui dioleki ohomba ele, kɛnɛ kakakomɛ Jɔbɔ tosholɛka akambo wa mɛtɛ wakoka tokimanyiya etena keso l’asui. Dibuku dia Jɔbɔ tokimanyiyaka dia kadimola ambola anɛ: Etena keso l’ehemba, lande na kahombaso sala la wolo dia mbeya akambo w’ohomba wendana l’ehemba akɔ? Waonga akɔna watokimanyiya dia mbikikɛ? Ngande wakokaso keketsha asekaso Akristo wasowa?
Teye otondo wa dikambo tshɛ dimɛna
5. Naa dui dioleki ohomba diahombaso mbohɔka etena kahomanaso la ekakatanu ndo la ehemba?
5 Dia sho nama wɛdimo aso wa lo nyuma etena keso l’asui, sho pombaka mbeya kɛnɛ tshɛ kendana la asui akɔ. Naka hatosadi ngasɔ, kete ekakatanu wele laso mbeyaka ndjotokonya ko hatoyoyasha efula l’awui wa lo nyuma. Dui dioleki ohomba ele kɔlamelo yaso le Nzambi. Shɛso lele l’olongo tɔlɔmbaka dui dimɔtshi diakoka minanda etema aso lo mbuta ate: “On’ami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.” (Tukedi 27:11) Ande diɛsɛ dia lânde diele laso lee! Kânga mbeso la wɛɔdu ndo mbasalaso munga, sho kokaka ngɛnyangɛnya Otungi aso. Sho salaka dui sɔ etena katotshutshuya ngandji kokaso Jehowa dia shika tanga la ntondo k’ekakatanu ndo k’ehemba. Ngandji ka mɛtɛ k’Okristo mbikikɛka akambo tshɛ. Tɔ hakitaka tatala.—1 Koreto 13:7, 8.
6. Ngande wɔnyɔla Satana Jehowa ndo polo lo yɛdikɔ yakɔna?
6 Dibuku dia Jɔbɔ mɛnyaka hwe dia Satana mbɔnyɔla Jehowa. Diɔ mɛnyaka nto dionga dia kɔlɔ diele la otunyi ɔsɔ wahɛnama ndo nsaki kande ka ndanya diɔtɔnganelo diasaso la Nzambi. Oko wadiɛnya kɛnɛ kakakomɛ Jɔbɔ, Satana mbutaka dia ekambi tshɛ waki Jehowa mbokambɛka l’ɔtɛ w’eyango wa lokaki ndo nde nyangaka dia mɛnya ɔnɛ ngandji kokawɔ Nzambi kokaka la mbɔla yɔɔ. Aya ɛnɔnyi nunu wende lo mbidja Jehowa tɔfwɛfwɛ. Etena kakakashema Satana oma l’olongo, dui dimɔtshi diakokɛma oma l’olongo diawelɛ ɔnɛ “osongwedi wa anyasu” ndo diakate ɔnɛ nde atasɔngwɛka ‘la ntondo ka Nzambi ndo la yanyi ndo l’otsho.’ (Enyelo 12:10) Lo mbikikɛ la kɔlamelo tshɛ, sho kokaka mɛnya di’awui watɔsɔngwɛnde kema mɛtɛ.
7. Ngande wakokaso nɛndja wɛɔdu aso wa demba?
7 Sho pombaka mbohɔ dia Diabolo ayokamba l’asui wakoka monga laso dia tanganya la Jehowa. Etena kakɔna kakandahembe Yeso? Aki etena kaki Yeso la ndjala l’ɔkɔngɔ wa nde kila mbo ya ndɛ nshi efula. (Luka 4:1-3) Koko wolo wa lo nyuma waki la Yeso wakokimanyiya dia shika tanga la ntondo k’ehemba waki Diabolo. Ekɔ mɛtɛ ohomba efula sho kamba la wolo aso wa lo nyuma dia nɛndja wɛɔdu aso tshɛ wa demba, wele mbala mɔtshi ndja oma lo hemɔ kana lotshundu! Kânga “dimba diasu diatuvokaka,” sho hatohekɔ nɛ dia “utema asu atuyalaka la lumu lushi la lushi.”—2 Koreto 4:16.
8. a) Ngande wakoka tokanyi ta kɔlɔ monga la etombelo wa kɔlɔ? b) Dionga diakɔna diaki la Yeso?
8 Ndo nto, tokanyi ta kɔlɔ kokaka ndanya lonyuma laso. Onto kokaka ndjambola ɔnɛ: ‘Lande na katshika Jehowa dikambo nɛ?’ L’ɔkɔngɔ wa vɔ mbotshɛ dui dimɔtshi dia kɔlɔ, okina kokaka ndjambola ate: ‘Ngande wakoka ɔnalengo la lo etshumanelo salɛmi dui dia nganɛ?’ Tokanyi tɔsɔ kokaka tokonya dia minya yimba l’awui woleki ohomba, ko mbika washo paka lo ekakatanu wele laso. Lonyangu laki la Jɔbɔ l’ɔtɛ wa kɛnɛ kakawotɛka angɛnyi ande asato wa kɔlɔ lakaleke mbosha pâ lo yimba oleki hemɔ ka lo demba kaki lande. (Jobo 16:20; 19:2) Woho akɔ wâmɛ mbakɛnya ɔpɔstɔlɔ Paulo dia kɛlɛ k’otale kokaka ‘mbisha Diabolo dihole kana diaaso.’ (Efeso 4:26, 27) Lo dihole dia nyangɛ kana mboka anto kɛlɛ kana ndeka kana yimba lo awui wa kɔlɔ wotosalewɔ, ekɔ dimɛna dia Akristo mbokoya Yeso lo ‘tshika akambo tshɛ l’anya wa ɔnɛ latolomboshaka la losembwe,’ mbuta ate le Jehowa Nzambi. (1 Petero 2:21-23) Monga la “tukanyi” taki la Yeso kokaka tokimanyiya efula dia ndɔshana la Satana.—1 Petero 4:1.
9. Eshikikelo kakɔna katosha Nzambi lo dikambo dia wetsho wahombaso mɛmba ndo l’ehemba wahomana laso?
9 Lâdiko dia tshɛ, hatohombe pondjo mbɔsa ekakatanu aso oko djembetelo yɛnya dia Nzambi hayotɔngɛnangɛna. Tokanyi ta kɔlɔ ta ngasɔ takasha Jɔbɔ pâ efula etena kakotondjɛ wanɛ wakandɔsaka oko asambi ande ɛtɛkɛta wa kɔlɔ. (Jobo 19:21, 22) Bible toshikikɛka ɔnɛ: “Ne dia [Nzambi] hahimbama la akambu wa kolo, ku ndi hahimbi untu.” (Jakoba 1:13) Lo wedi okina, Jehowa ndakaka dia tokimanyiya dia sho mɛmba wetsho aso tshɛ ndo dia toshimbɛ oma l’ehemba tshɛ watokomɛ. (Osambu 55:22; 1 Koreto 10:13) Lo ndjasukanyaka la Nzambi lo tena di’asui, sho kokaka mɛna akambo la sso di’ɔlɔlɔ ndo mbidja Satana otshumba.—Jakoba 4:7, 8.
Ekimanyielo dia mbikikɛ
10, 11. a) Kakɔna kakakimanyiya Jɔbɔ dia mbikikɛ? b) Ngande wele monga la nkum’otema k’ɔlɔlɔ akakimanyiya Jɔbɔ?
10 Kânga mbaki Jɔbɔ l’atei w’ekakatanu wa wolo ndo mbakotondjɛka asambi ande wa kashi ɛtɛkɛta wa kɔlɔ ndo mbakinde kombeyaka shikaa kiɔkɔ ya ekakatanu ande, Jɔbɔ koshisha olowanyi ande. Naa wetshelo wakokaso kondja oma lo ekikelo kande? Aha la tâmu, kɛnɛ kakaleke mbokimanyiya dia tondoya aki kɔlamelo yande le Jehowa. ‘Nde akokaka Nzambi wɔma ndo akoke kɔlɔ ɔkɔngɔ.’ (Jobo 1:1) Ɔsɔ aki yoho yande ya lɔsɛnɔ. Jɔbɔ akatone dia mboka Jehowa ɔkɔngɔ, kânga mbakinde koshihodiaka lande na kakokomɛ mpokoso shɔ tshɛ la shashimoya. Jɔbɔ aketawɔ dia nde pombaka kambɛ Nzambi oyadi lo tena di’ɔlɔlɔ kana dia kɔlɔ.—Jobo 1:21; 2:10.
11 Dui dikina diakakeketsha Jɔbɔ ko nkum’otema k’ɔlɔlɔ kaki lande. Etena kakandɛnyi dia nde ayanga mvɔ, nde akakeketshama lo mbeya dia nde akasale tshɛ dia kimanyiya anto akina, akakitanyiya ɛlɛmbɛ wosembwe waki Jehowa ndo ɔnɛ nde akewɔ weho tshɛ w’ɔtɛmwɛlɔ wa kashi.—Jobo 31:4-11, 26-28.
12. Kakɔna kakasale Jɔbɔ oma lo ekimanyielo kakandalongola oma le Elihu?
12 Ekɔ mɛtɛ dia Jɔbɔ aki l’ohomba w’ekimanyielo dia tshikitanya kanyi yande l’akambo amɔtshi. Ndo nde aketawɔ ekimanyielo kɛsɔ l’okitshakitsha tshɛ ndo dui sɔ diakokimanyiya dia nde mbikikɛ dimɛna. Jɔbɔ akahokamɛ dako dia lomba diaki Elihu la dilɛmiɛlɔ tshɛ ndo aketawɔ engwelo kaki Jehowa. Nde akasuya ate: “Dimi lakateketaka akambu wakimi kumana fundu, akambu wa mamba wundeki wulu, wakimi kunimbitela. Diako mbamumuyamia, mbamumuyatshumuya ludjashi lu ditshu la l’utuku.” (Jobo 42:3, 6) Kânga mbakawɛnyaka hemɔ pâ, Jɔbɔ akangɛnangɛna nɛ dia woho wakandatshikitanya ekanelo kande ka yimba akosukanya la Nzambi. Jɔbɔ akate ate: “Kakiane dimi lambulimbitela nti: We [Jehowa] mbeyaka ntsha akambu tshe.” (Jobo 42:2) Diɛsɛ oma lo woho wakolembetshiya Jehowa woke woke Ande, mbakashihodia Jɔbɔ dimɛna dihole diaki lande la ntondo ka Otungi.
13. Ngande wele dionga dia mbokana kɛtshi diakakimanyiya Jɔbɔ?
13 L’ekomelo, Jɔbɔ akasha ɛnyɛlɔ ka dimɛna efula ka kɛtshi. Asambi ande wa kashi wakawosha pâ efula l’asolo, koko etena kakatɛ Jehowa Jɔbɔ dia nɔmba dikambo diawɔ, nde akasale dikambo sɔ. L’ɔkɔngɔ diko, Jehowa akayɔkɔnɔlaka Jɔbɔ oma lo hemɔ kande. (Jobo 42:8, 10) Lo mɛtɛ, lonyangu hakoke tokimanyiya dia mbikikɛ, koko ngandji ndo kɛtshi kokaka tokimanyiya. Mbewɔ dia mombanɛ tokumbɛkumbɛ kokaka tokeketsha lo nyuma ndo Jehowa tshɔkɔlaka onto lahombanɛ tokumbɛkumbɛ.—Mako 11:25.
Andaki wa tomba watokimanyiya dia mbikikɛ
14, 15. a) Naa waonga wakoka kimanyiya ondaki dia nkɔnɔla anto akina? b) Lembetshiya lande na kakatondoya Elihu dia kimanyiya Jɔbɔ.
14 Wetshelo okina wakokaso kondja oma l’ɔkɔndɔ waki Jɔbɔ ele nɛmɔ diele la andaki wa tomba. “Lu nshi ya pa [vɔ wa]tuyalaka” oko anangɛso. (Tukedi 17:17) Koko, oko wadiɛnya kɛnɛ kakakomɛ Jɔbɔ, andaki amɔtshi kokaka pumuya onto lo dihole dia mbɔkɔnɔya. Ondaki w’ɔlɔlɔ la dia monga la kɛtshi, la dilɛmiɛlɔ ndo ɔlɔlɔ, oko Elihu. Dikumanyi ndo Akristo akina wambotshunda lo nyuma mbeyaka konya anangɛso wadiɛnɛ la ekakatanu dia vɔ tshikitanya ekanelo kawɔ ka yimba. Ndo lo kɛnɛ kendana la tshikitanya ekanelo ka yimba ka anangɛso asɔ, andaki kokaka kondja wetshelo oma lo dibuku dia Jobo.—Ngalatiya 6:1; Heberu 12:12, 13.
15 Ekɔ wetshelo efula wakokaso kondja oma lo woho wakakandola Elihu awui waki lam’asa Jɔbɔ la angɛnyi ande. Nde akahokamɛ etena k’otale la ntondo ka nde ndjokadimola lo awui wa kashi wakataka angɛnyi waki Jɔbɔ. (Jobo 32:11; Tukedi 18:13) Elihu akete Jɔbɔ lo lokombo lande ndo akɔsama oko ɔngɛnyi le nde. (Jobo 33:1) Otshikitanyi la asambi asato wa kashi waki Jɔbɔ asɔ, Elihu kondjaɔsa dia nde ndeka Jɔbɔ. Nde akate ate: “Dimi lakatungama lu kete y’omoma uku we.” Nde konanga dia mbahɛ Jɔbɔ wotsho lâdiko dia tshuka lo kamba la ɛtɛkɛta waha la yimba. (Jobo 33:6, 7; Tukedi 12:18) Lo dihole dia nde mɔnyɔla Jɔbɔ l’ɔtɛ wa lɔkɛwɔ lande l’edjedja, Elihu akawandola l’ɔtɛ w’ɔlɔlɔ ande. (Jobo 33:32) Kɛnɛ kakaleke ohomba ele, Elihu akɛnaka akambo oko akawaɛnaka Nzambi ndo nde akakimanyiya Jɔbɔ dia ndeka kana yimba lo woho wele ndoko lushi lakasale Jehowa akambo aha la losembwe. (Jobo 34:10-12) Nde akakeketsha Jɔbɔ dia mendɛ le Jehowa, lo dihole dia nde nyanga dia mɛnya ɔlɔlɔ ande hita. (Jobo 35:2; 37:14, 23) Dikumanyi di’Akristo ndo anto akina kokaka mɛtɛ kondja wahɔ oma lo wetshelo ɛsɔ.
16. Ngande wakakome asambi asato waki Jɔbɔ dihomɔ diaki Satana?
16 Dako dia lomba diaki Elihu diakatshikitana la ɛtɛkɛta wa kɔlɔ waki Elifazɛ, Bilidadɛ la Zɔfara. Jehowa akawatɛ ate: “Nyu konteketa aui w’usimbwi lu dikambu diami.” (Jobo 42:7) Kânga mbakawataka dia waki la tokanyi t’ɛlɔlɔ, vɔ waki oko dihomɔ diaki Satana, koko komonga angɛnyi wa kɔlamelo. Oma l’etatelo vɔ akɔ asato wakate dia Jɔbɔ ndamɛ mbaki lo kiɔkɔ ya mpokoso yakokomɛ. (Jobo 4:7, 8; 8:6; 20:22, 29) Elifazɛ lo wedi ande akate dia Nzambi kema la wɛkamu le ekambi ande ndo oyadi onto ekɔ la losembwe kana kema, Nde hete. (Jobo 15:15; 22:2, 3) Elifazɛ akamamatanyiya Jɔbɔ awui wa kɔlɔ wakinde kosala. (Jobo 22:5, 9) Elihu, lo wedi ande akakeketsha Jɔbɔ lo nyuma. Mbala tshɛ oyango ɔsɔ mbele la ondaki wele la ngandji.
17. Kakɔna kahombaso mbohɔka etena keso l’atei w’ekakatanu?
17 Ekɔ wetshelo okina wakokaso kondja oma lo dibuku dia Jobo lo kɛnɛ kendana la ekikelo. Nzambi kaso ka ngandji sɛdingolaka ekakatanu wele laso ndo nde nangaka ndo ekɔ l’akoka wa tokimanyiya lo toho totshikitanyi. Lo etatelo, takatɛkɛtshi dia kɛnɛ kakakomɛ Elsa Abt. Tokane yimba lo ɛtɛkɛta w’ekomelo wakandate ate: “La ntondo ka vɔ mundami, lakadia mukanda waki kadiyɛso kɛmɔtshi kakate dia lam’ele onto l’atei w’ekakatanu wa wolo, nyuma ka Jehowa mboshaka yimba ya wɔlamu. Lakafɔnyaka dia nde akadjaka yema y’oshimu esɔ. Koko lam’akamakome dimɛ l’atei w’ekakatanu, lakasuya dia nde akate mɛtɛ. Kɛsɔ mbakamoke ndo dimi. Ekɔ wolo onto shihodia dikambo sɔ, naka ekakatanu watawokomɛ. Eelo, kɛsɔ mbakakomɛ mɛtɛ. Jehowa kimanyiyanaka.” Elsa kɔtɛkɛta dia kɛnɛ kakoka Jehowa sala kana kakandasale nunu di’ɛnɔnyi lo nshi ya Jɔbɔ. Nde akatɛkɛta dia nshi yaso nyɛ. Eelo, “Jehowa kimanyiyanaka!”
Onto lakikɛ ekɔ l’ɔngɛnɔngɛnɔ
18. Ɛtshɔkɔ akɔna wakakondja Jɔbɔ oma lo ekikelo kande?
18 Tɔtɔi toto l’atei aso mbakoka pomana la weho w’ehemba wa wolo wakahomana la Jɔbɔ. Koko oyadi ehemba wakoka tela dikongɛ di’akambo nɛ, tekɔ la ɛkɔkɔ w’eshika wa nama olowanyi aso oko Jɔbɔ. Ekikelo akakimanyiya Jɔbɔ dia ndjonga la lɔsɛnɔ loleki dimɛna. Ekikelo akôlowanya tshɛ lo tshɛ lo mbosha akoka tshɛ wahombama. (Jakoba 1:2-4) Tɔ kakakeketsha diɔtɔnganelo diaki lam’asande la Nzambi. Jɔbɔ akasuya ate: “Dimi lakukaka lukumu l’akambu aye lu atui, keli kakiane lambukena la ashu ami.” (Jobo 42:5) Satana akɛnama kanga kashi lo woho wakinde kokoka shishɛ Jɔbɔ olowanyi ande. Ɛnɔnyi nkama l’ɔkɔngɔ, Jehowa akatetemala tɛkɛta di’okambi ande Jɔbɔ oko ɛnyɛlɔ k’akambo w’ɔlɔlɔ. (Ezekiyele 14:14) Ɔkɔndɔ wendana la kɔlamelo ndo la ekikelo kande, keketshaka ekambi waki Nzambi wa nshi nyɛ.
19. Lande na kɔsayɛ dia ekɔ dimɛna mbikikɛ?
19 Etena kakafundɛ Jakɔba Akristo wa lo ntambe ka ntondo dikambo dia ekikelo, nde akakanyiyaka dikambo dia ɔngɛnɔngɛnɔ wela ekikelo. Ndo nde akakambe la ɛnyɛlɔ kaki Jɔbɔ dia mbaohola dia Jehowa tshɔkɔlaka efula ekambi ande wa kɔlamelo. (Jakoba 5:11) Lo Jobo 42:12, sho mbadiaka ɔnɛ: “Okone [Jehowa] akatshokola Jobo lu nshi yandi ya l’okongo, uleki nshi yandi ya ntundu.” Kɛnɛ tshɛ kakashisha Jɔbɔ, Nzambi akofudiɛtɔ l’ahende ndo nde akasɛnɛ edja ndo akonge la lɔsɛnɔ l’ɔngɛnɔngɛnɔ. (Jobo 42:16, 17) Woho akɔ wâmɛ mbele, pâ ndo asui tshɛ wakokaso mbikikɛ lo nshi y’ekomelo ya dikongɛ nɛ di’akambo yayonyɛma l’andja w’oyoyo waki Nzambi ndo tayohɛ pâ yakɔ tshɛ. (Isaya 65:17; Enyelo 21:4) Tambokaka dia ekikelo kaki Jɔbɔ ndo tamboyashikikɛ dia mbokoya ɛnyɛlɔ kaki Jɔbɔ oma l’ekimanyielo ka Jehowa. Bible ndakaka ɔnɛ: “Untu lakikitala l’ehimba eko la otshoko, ne dia lam’ayunduleka ehimba wulu, ndi ayulungula dembo dia kusu dia lumu, diakalaki Khumadiondjo wane wûlanga.”—Jakoba 1:12.
Ngande wayoyokadimola?
• Ngande wakokaso ngɛnyangɛnya otema wa Jehowa?
• Lande na kahatahombe mbuta dia ekakatanu aso mɛnyaka dia Nzambi hatɔngɛnangɛna?
• Kakɔna kakakimanyiya Jɔbɔ dia mbikikɛ?
• Ngande wakokaso mbokoya Elihu lo keketsha asekaso ambetawudi?
[Osato wa lo lɛkɛ 20]
Ondaki w’ɔlɔlɔ mongaka la kɛtshi, la dilɛmiɛlɔ ndo ɔlɔlɔ
[Esato wa lo lɛkɛ 21]
Elsa la Harald Abt