Diolelo diaki Nzambi kɛdikɛdi na?

KAKƆNA kaki ɔtɛ a dui w’esambishelo kaki Yeso? Lo ndjela Yeso ndamɛ, aki Diolelo diaki Nzambi. (Luka 4:43) Etena kakahokamɛka anto lam’akandatɛkɛtaka, vɔ wakokaka mɛtɛ woho wakandatɛkɛtaka mbala efula dikambo dia Diolelo sɔ. Onde vɔ wakikɔ l’ohokohoko? Onde vɔ wakawombola aki Diolelo sɔ? Ndooko. Ambola wa ngasɔ hawotanema ndoko yema l’Evanjiliɔ. Ko onde anto asɔ wakeyaka Diolelo diaki Nzambi dimɛna?

Kɛnɛ kele mɛtɛ ele, Afundelo w’edjedja wakɔsaka ase Juda oko ekila wakatɛkɛtaka dia Diolelo sɔ, lo mɛnya l’ɛtɛkɛta wananda otema ndo wokɛma hwe kɛnɛ kalembetshiya Diolelo diakɔ ndo kɛnɛ kayodiosala. Ɛlɔ kɛnɛ, sho kokaka mbeka akambo efula wendana la Diolelo oko wakasale ase Juda lo kamba la Bible. Nyɛsɔ tɔsɛdingole akambo wa mɛtɛ esambele wetsha Bible lo dikambo dia Diolelo. Akambo asato wa ntondo wakeyamaka dimɛna le ase Juda wa lo nshi ya Yeso ndo le wanɛ wakasɛnaka la ntondo ka nde ndja. Akambo asato wayela, Yeso kana apɔstɔlɔ ande mbakayowaeyanyaka lo ntambe ka ntondo. Dikambo di’ekomelo diamboyeyama hwe lo nshi yaso nyɛ.

1. Diolelo diaki Nzambi diekɔ lowandji la mɛtɛ, layotshikala pondjo pondjo. Prɔfɛsiya ka ntondo ka lo Bible kakɛnya dia Nzambi akahombe tomɛ anto wa kɔlamelo oshimbedi. Oshimbedi ɔsɔ welamɛ ɔnɛ ‘kanula’ ayonya ekakatanu kana asui tshɛ wakatatɛ oma l’ɔtɔmbɔkwɛlɔ waki Adama la Eva ndo Satana. (Etatelu 3:15) Edja efula l’ɔkɔngɔ, wakayotɛka Davidi nkumekanga ka kɔlamelo dikambo dimɔtshi di’ɔngɛnɔngɛnɔ efula diendana la ‘kanula’ shɔ kana Mɛsiya. Nde akahombe ndjonga Nkumekanga lâdiko dia Diolelo dimɔtshi. Diolelo sɔ diakahombe tshikitana la waolelo akina tshɛ. Diɔ diakahombe tshikala pondjo pondjo.​—2 Samuele 7:12-14.

2. Diolelo diaki Nzambi diayolanya mandji tshɛ y’anto. Ɔprɔfɛta Danyɛlɛ akalongola ɛnɛlɔ kɛmɔtshi kendana la woho wakayahɔnaka mandji yakayahemɛka andja w’otondo, oma lo nshi shɔ polo lo nshi yaso nyɛ. Tende woho wayokoma ɛnɛlɔ kɛsɔ lo kondoko: “Lu nshi ya khumi ya dikanga yako [y’ekomelo y’anto, Nzambi] leli l’ulungu ayutundja diulelu diahalanaki pundju. Dio hadiuyala l’okongo a wudja ukina. Dio diayulanya waulelu ako tshe, diayâshila ushiki, ku dio diame diayushikikala pundju.” Ɔnkɔnɛ, waolelo tshɛ kana mandji tshɛ ya l’andja ɔnɛ, kâmɛ la ata awɔ, ɔsɔkishelo awɔ ndo awui awɔ wa kɔta mishiko wayonyɛma lo pondjo. Oko wadiɛnya prɔfɛsiya ka Danyɛlɛ, kem’edja Diolelo diaki Nzambi diayanga mbolɛ lâdiko dia nkɛtɛ k’otondo. (Danyele 2:44, 45) Diolelo sɔ bu tsho dikambo dia mɛtɛ, koko diɔ to mbayolɛ lâdiko dia nkɛtɛ.a

3. Diolelo diaki Nzambi diayokumiya ata, hemɔ, ndjala ndo nyɔi. Prɔfɛsiya ya lo Bible yananda otema mɛnyaka kɛnɛ kayosala Diolelo diaki Nzambi lanɛ la nkɛtɛ. Diolelo sɔ diayosala kɛnɛ kahatasalaka ndo kahasalaki mandji y’ana w’anto lanɛ la nkɛtɛ. Ohokanyiya yema, ekoma tshɛ w’ata wayolanyema lo pondjo! “Ndi atukumiyaka ata pulu ndu lu kuma ya kete.” (Osambu 46:9) Ndoko dɔkɔtɛlɛ, lopitadi kana hemɔ kayoyala nto. “Nduku untu ludjashi . . . ayuta ati: Dimi la kandji!” (Isaya 33:24) Ndjala, wola wa mbo ya ndɛ, kana olelo wa kɔlɔ hatonga nto. “Kete ya l’ete w’akuna yayongonyaka mbu ya nde efula.” (Osambu 72:16) Awui w’etanda, waombo, ahole wombawɔ edo la kandji kela awui asɔ hatonga nto. Nyɔi, otunyi aso wa wolo efula mbayoyonyɛma l’ekomelo. Nzambi ‘ayonya nyɔi pondjo. Nkumadiɔndjɔ Jehowa ayokitola asɔi oma lo washo w’anto tshɛ.’​—Isaya 25:8.

4. Diolelo diaki Nzambi diekɔ la Omboledi wakasɔnama oma le Nzambi. Mɛsiya kondjasɔna ndamɛ dia monga Omboledi kana sɔnama oma le anto wele kema kokele. Jehowa Nzambi ndamɛ mbakɔ̂sɔnɛ. Tshɛkɛta Mɛsiya kana Kristo mɛnyaka ɔnɛ nde akasɔnama oma le Nzambi. Tɔtɛkɛta takɔ tohende nembetshiyaka ɔnɛ: ‘Okitami.’ Ɔnkɔnɛ, Nkumekanga kɛsɔ akakitama esɔ kana akalongola ɔkɛndɛ wa lânde oma le Jehowa. Nzambi akate lo dikambo diande ate: “Enda ukambi ami latumusukelaka. Osonami ami, latongenangenaka utema ami. Dimi lakawahe [nyuma k]ami, ndi ayutela wedja dia dialelu di’ololo.” (Isaya 42:1; Mateu 12:17, 18)) Akɔna oleki Otungi aso mbeya woho w’Omboledi weso l’ohomba na?

5. Omboledi wa lo Diolelo diaki Nzambi akɛnya lo washo w’anto tshɛ dia nde kokaka mbolɛ. Yeso y’ose Nazarɛta mbaki Mɛsiya wakalakema. Nde akotɔ lo nkumbo kakasɔnɔla Nzambi. (Etatelu 22:18; 1 Ekondo 17:11; Mateu 1:1) Lam’akinde la nkɛtɛ, nde akakotsha prɔfɛsiya efula yakendanaka la Mɛsiya yakafundama ntambe efula la ntondo. Nde akeyanyama oma l’olongo dia nde mbaki Mɛsiya. Ngande wakasalema dikambo sɔ? Nzambi akatɛkɛta oma l’olongo, lo mbeyanya oko Ɔnande; andjelo wakɛnya dia Yeso mbaki Mɛsiya wakalakema; ndo Yeso akasale ahindo mbala efula la ntondo ka nkama kana ya nunu di’anto. Nde akasale akambo asɔ tshɛ lo wolo waki Nzambi.b Yeso akɛnya mbala la mbala woho w’Omboledi wayondoyala. Nde komonga tsho la wolo wa kimanyiya anto, koko nde aki ndo la nsaki ka mbakimanyiya. (Mateu 8:1-3) Nde aki la ngandji, la kɛtshi, la dihonga ndo la okitshakitsha. Ɔkɔndɔ wa kɛnɛ tshɛ kakandasale lam’akinde lanɛ la nkɛtɛ wekɔ lo Bible dikambo dia anto tshɛ walanga mbadia.

6. Diolelo diaki Nzambi diekɔ l’anto 144 000 wayolɛ kâmɛ la Kristo. Yeso akate dia anto akina mbidja ndo apɔstɔlɔ ande, wayolɛ kâmɛ la nde l’olongo. Nde akelɛ olui ɔsɔ ɔnɛ: “Limba la tshitshe l’ekoko.” (Luka 12:32) L’ɔkɔngɔ diko, ɔpɔstɔlɔ Joani akate dia lemba la tshitshɛ l’ɛkɔkɔ lɔsɔ layokoma tshɛtshɛ anto 144 000. Vɔ wayonga l’olimu w’ɔngɛnɔngɛnɔ efula l’olongo, mbuta ate wayolɛ oko nkumi ya dikanga ndo wayokamba oko ɛlɔmbɛdi kâmɛ la Kristo.​—Enyelo 5:9, 10; 14:1, 3.

7. Diolelo diaki Nzambi diolɛ kakianɛ l’olongo, diekɔ suke la tatɛ mbolɛ lâdiko dia nkɛtɛ k’otondo. Dikambo dia mɛtɛ di’esambele nɛ diekɔ ɔmɔtshi l’atei w’akambo woleki ɔngɛnɔngɛnɔ wakokaso mbeka. Bible mɛnyaka hwe dia Yeso akalongola lowandji lande oko Nkumekanga l’olongo. Kakianɛ, nde ekɔ lo mbolɛ lɛkɔ ndo kem’edja nde ayolɛ lâdiko dia nkɛtɛ k’otondo ndo ayokotsha prɔfɛsiya ya lotombo yakatashidi mbuta. Ko ngande wakokaso shikikɛ ɔnɛ Diolelo diaki Nzambi diekɔ lo mbolɛ kakianɛ? Ndo etena kakɔna kayodiotatɛ mbolɛ lâdiko dia nkɛtɛ?

[Nɔte ya l’ɛse ka dikatshi]