Etena kakɔna kayoya Diolelo diaki Nzambi?
“KHUMADIONDJO, undi we ayulwela Isariyele diulelu lu etena [kɛnɛ]?” (Etsha 1:6) Apɔstɔlɔ wakakombolaka efula dia mbeya etena kakahombe Yeso shikikɛ Diolelo diande. Ɛlɔ kɛnɛ, ɛnɔnyi oko 2 000 l’ɔkɔngɔ diko, anto wakatetemala kombola efula dia mbeya: Etena kakɔna kayoya Diolelo diaki Nzambi?
Lam’ele Yeso aketɛ Diolelo ɔtɛ w’esambishelo kande, wɛ kokaka fɔnya dia nde akatɛkɛta dia dikambo sɔ. Eelo nde akaditɛkɛta! Nde akatɛkɛta mbala efula dikambo dia etena kɛmɔtshi ka shikaa kakandelɛ ɔnɛ ‘wôngelo’ ande. (Mateu 24:37) Wôngelo ɔsɔ kakatanyema efula la eshikikelo ka Diolelo diaki Mɛsiya. Wôngelo ɔsɔ kɛdikɛdi na? Tɔsɛdingole akambo wa mɛtɛ anɛi wakɛnɛmɔla Bible lo kɛnɛ kendana la wôngelo wa Kristo.
1. Wôngelo wa Kristo wakahombe ndjotatɛ edja efula l’ɔkɔngɔ wa nyɔi kande. Yeso akasha wɛɛla ɔmɔtshi wakandayaɛdika la pami kɛmɔtshi “[k]akatshu lu kete kina y’etali dia ntuyalungwela diulelu.” (Luka 19:12) Ngande wakakotshama wɛɛla wa prɔfɛsiya ɔsɔ? Lo mɛtɛ, Yeso akavu ndo akolwama; oma lâsɔ nde akatshu “lu kete kina y’etali,” mbuta ate l’olongo. Oko wakadite Yeso lo wɛɛla okina wa woho akɔ wâmɛ, okalwelo ande lo lowandji la nkumekanga wakahombe monga paka ‘l’ɔkɔngɔ w’etena k’otale.’—Mateu 25:19.
Ɛnɔnyi ɛmɔtshi l’ɔkɔngɔ wa Yeso mbudɛ l’olongo, ɔpɔstɔlɔ Paulo akafunde ate: “Koko Kristo lawɔ akalambola cɔi yakɔ y’olambo dikambo dya munga, olambo ɔnɛ watakambe lotumu laakiwɔ ponjo ponjo, ko l’ɔkɔngɔ nde akatojaasɛ lo lonya l’omi la [Nzambi]. Kankiyaanɛ, lɛkɔ koondokonga dya [Nzambi] nkica andɔshi waakinde oko lohona [l’ɛse k]’ekolo waakinde.” (Heberu 10:12, 13, Dyookaneelo Dy’Oyooyo.) Ɔnkɔnɛ, l’ɔkɔngɔ wa Yeso koma l’olongo nde akahombe kongɛ etena k’otale. Etena kɛsɔ kakakomɛ lam’akahenya Jehowa Nzambi Ɔnande oko Nkumekanga ka Diolelo dia Mɛsiya diakalakema edja efula. Dikambo sɔ diakasalema etena kakatatɛ wôngelo wa Kristo. Onde anto wa la nkɛtɛ wakakoke mɛna dikambo dia diambo sɔ?
2. Wôngelo ɔsɔ hawɛnama lo washo w’anto. Tohɔ dia Yeso akatɛkɛta dikambo dia djembetelo ya wôngelo ande. (Mateu 24:3) Otondongaka wôngelo ande wakahombe mɛnama lo washo w’anto, onde djembetelo mɔtshi yotonga ohomba? Tɔshi ɛnyɛlɔ kɛnɛ: Ohɔsa dia wɛ ambotshɔ dia tenda ndjale kɛmɔtshi ka woke. Wɛ mbeyaka mɛna tolembetelo ta lo mboka tatakɔlɔmbɔla otsha lo ndjale, koko etena kakomayɛ l’omamu wa ndjale kɛsɔ, ênda woke woke atɔ, onde wɛ ayolongamɛ dia mɛna djembetelo kina l’ashi yofundami la alɛta a weke ɔnɛ “ndjale ka woke” tɔ kɛnɛ? Ndooko! Shi wɛ hatonga l’ohomba wa djembetelo lam’ele wɛmɛ ekɔ lo mɛna ndjale la washo ayɛ?
Yeso akasha djembetelo ya wôngelo ande, aha la mɛnya dikambo dimɔtshi diakoka anto mɛna la washo, koko dia mbakimanyiya dia vɔ shihodia dikambo dimɔtshi diayosalema l’olongo. Ɔnkɔnɛ, Yeso akate ate: “Diulelu dia [Nzambi hadioya] la tulimbitelu t’antu mbeya.” (Luka 17:20) Ko ngande wakoka djembetelo shɔ mɛnya anto wa la nkɛtɛ ɔnɛ wôngelo wa Kristo wakatatɛ?
3. Wôngelo wa Yeso wakahombe mɛnama oma l’etena k’efukutanu efula waki lanɛ la nkɛtɛ. Yeso akate dia wôngelo ande oko Nkumekanga l’olongo wayɛnama la nkɛtɛ oma lo ata, ndjala, adidimu wa nkɛtɛ, hemɔ ndo ɛɔnywɛlɔ k’ɛlɛmbɛ. (Mateu 24:7-12; Luka 21:10, 11) Kakɔna kakahombe monga lo kiɔkɔ ya shɔkɔ shɔ tshɛ na? Bible nembetshiyaka ɔnɛ Satana, “umbuledi a kete nye” ekɔ la kɛlɛ ka wolo nɛ dia nde mbeyaka ate etena kambôtshikalɛ kaya tshitshɛ, nɛ dia wôngelo wa Kristo oko Nkumekanga wambotatɛka. (Joani 12:31; Enyelo 12:9, 12) Tolembetelo tɛnama tɛnya kɛlɛ kaki Satana ndo wôngelo wa Kristo tekɔ efula lo nshi yaso nyɛ. Djekoleko tatɛ lo 1914, ɔnɔnyi wetawɔ ambewi w’ɛkɔndɔ dia etshikitanu wa weke wakasalema, l’ɔnɔnyi ɔsɔ mbakɛnama tolembetelo tɔsɔ l’andja w’otondo lo yoho yakitɔ tatɛnamaka.
Akambo asɔ tshɛ mbeyaka mbɔsama oko nkumu ya kɔlɔ, koko yɔ bu nkumu ya kɔlɔ. Vɔ mɛnyaka dia Diolelo diaki Mɛsiya diekɔ lo mbolɛ kakianɛ l’olongo. Kem’edja nto, Diolelo diaki Mɛsiya diayolɛ lâdiko dia nkɛtɛ k’otondo. Ko ngande wakoka anto mbeya akambo efula wendana la Diolelo sɔ woho wa vɔ mbetawɔ ɛlɔmbwɛlɔ kadiɔ ndo monga ambolami adiɔ na?
4. Wôngelo wa Yeso mɛnamaka oma l’olimu w’esambishelo wasalema l’andja w’otondo. Yeso akate dia wôngelo ande wayonga oko “nshi ya Noa”.a (Mateu 24:37-39) Nɔa komonga tsho ɔsɛdi a waato; nde akikɔ nto ‘osambisha w’akambo w’ɔlɔlɔ.’ (2 Petero 2:5) Nɔa akewola anto dia elombwelo k’oma le Nzambi kaki k’emembe. Yeso akate dia ambeki ande wa la nkɛtɛ wayosala olimu wa woho akɔ wâmɛ l’etena ka wôngelo ande. Nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”—Mateu 24:14.
Oko wakatadiɛnyi lo sawo dietshi, Diolelo diaki Nzambi diayolanya mandji tshɛ ya l’andja ɔnɛ. Olimu w’esambishelo kimanyiyaka anto dia mbeya ɔnɛ kem’edja lowandji la l’olongo lɔsɔ layanga mbekɛ lonya, ndo vɔ mbishaka anto tshɛ diaaso dia vɔ shimbamɛ l’elanyelo kayaye ndo monga ambolami wa Diolelo diakɔ. Dimbola di’ohomba diɔ nɛ: Kakɔna kayoyosala?
Onde Diolelo diaki Nzambi diayonga lokumu l’ɔlɔlɔ le yɛ?
Losango lakasambishaka Yeso lakashaka anto elongamelo kahakoke mbɛdikama. Ɛnɔnyi nunu l’ɔkɔngɔ w’ɔtɔmbɔkwɛlɔ wakonge lo Ɛdɛna, Jehowa Nzambi akɔshi yɛdikɔ ya shikikɛ lowandji layohomba mbidja awui l’ɔnɔngɔ, lo kaloya anto wa kɔlamelo otsha lo eongelo kakasangoya Nzambi dikambo diawɔ oma k’etatelo, mbuta ate nsɛna pondjo pondjo lo paradiso ka la nkɛtɛ. Kakɔna kakoka ndeka mbisha onto ɔngɛnɔngɛnɔ naka aha ewo k’ɔnɛ lowandji lɔsɔ lakalakema edja efula lekɔ lo mbolɛ kakianɛ l’olongo na? Ɔsɔ bu lokanyi lɔmɔtshi laheyama ɔtɛ l’ekolo koko ekɔ dikambo dia mɛtɛ!
Kakianɛ, Nkumekanga kakasɔnama oma le Nzambi ekɔ lo mbolɛ l’atei w’atunyi ande. (Osambu 110:2) L’andja ɔnɛ wa kɔlɔ wambangana la Nzambi, Mɛsiya ekɔ lo kotsha lolango laki She lendana la nyanga anto tshɛ wakombola mbeya Nzambi dimɛna dimɛna ndo mbɔtɛmɔla “lo nyuma la lu mete.” (Joani 4:24) Elongamelo ka nsɛna pondjo pondjo l’ɛse k’ɛlɔmbwɛlɔ ka Diolelo diaki Nzambi kamboshama le anto wa nkoho tshɛ, wa nɔnga tshɛ ndo weho tshɛ. (Etsha 10:34, 35) Tambokokeketsha dia wɛ mbetawɔ diaaso dia dimɛna efula diele la ntondo kayɛ sɔ. Eka akambo wendana la Diolelo diaki Nzambi oma ko kakianɛ, dia wɛ ndjɔngɛnangɛna la lɔsɛnɔ la pondjo l’ɛse k’ɛlɔmbwɛlɔ kadiɔ kosembwe!—1 Joani 2:17.
[Nɔte ka l’ɛse ka dikatshi]
a Ɛtɛkɛta waki Yeso kimanyiyaka dia mingola kanyi ya kɔlɔ yasha dikadimwelo dimɔtshi dia Bible tshɛkɛta “wôngelo.” Dikadimwelo dimɔtshi ndjikadimolaka ɔnɛ “oyelo,” “okomelo,” kana “okalwelo.” Tɔtɛkɛta tɔsɔ tshɛ nembetshiyaka etena kɛmɔtshi ka mondo. Koko, tolembete dia Yeso kɔmbɛdika wôngelo ande la Mvula k’elola kaki lo nshi ya Nɔa, dikambo diakasalema l’etena kɛmɔtshi, koko la “nshi ya Noa,” mbuta ate etena k’otale ka wolo efula. Oko wakidiɔ l’etena kɛsɔ, lo wôngelo wa Kristo anto wayoyasha tshɛ l’elimu awɔ wa lushi la lushi aha la mbidja yimba l’ɔhɛmwɛlɔ washama.
[Esato wa lo lɛkɛ 8, 9]
Nsango ya kɔlɔ yokaso lushi tshɛ mɛnyaka dia akambo w’ɔlɔlɔ waya suke
[Efundelo wɛnya kanga]
Antiaircraft gun: U.S. Army photo