Yasukanya la Nzambi
Papa koleki tshɛ dimɛna
“PAPA.” Tshɛkɛta shɔ kɛnɛmɔlaka nsaki y’oma k’ɛs’otema yela la anto. Papa kele mɛtɛ la ngandji otsha le anande mbakimanyiyaka dia vɔ tondoya lo lɔsɛnɔ. Diakɔ mɛtɛ dielɛ Bible Jehowa Nzambi ɔnɛ ‘Papa.’ (Mateu 6:9) Jehowa ekɔ Papa ka woho akɔna na? Dia kadimola lo dimbola sɔ, nyɛsɔ tende kɛnɛ kakate Jehowa lo dikambo dia Yeso etena kakandabatizama. Ɛtɛkɛta watondjiyɛ papa anande mɛnyaka woho w’ombutshi wende.
Oya lo Ngɔndɔ ka dikumi 29 tena diaso nɛ, Yeso akatshu l’ɔkɛdi wa Jɔrɔdana dia tobatizama. Bible mɛnyaka kɛnɛ kakete lo mbuta ɔnɛ: “Lam’akabatizama Jesu, kem’edja ndi akatumbi uma l’ashi. Nyulungi, ulungu akadihwama, ku ndi akenyi nyuma ka [Nzambi] ayahulo uku fudu k’inga, akayuwahema. Ku diui diakayi uma l’ulungu ati: On’ami la ngandji one, ndi atongenyangenyaka ololo.”a (Mateu 3:16, 17) Ɛtɛkɛta woludi la ngandji wakatondja Jehowa ndamɛ ɛsɔ, tɛnyaka woho wa Papa kende mɛtɛ. Tende awui asato wakatɛkɛta Jehowa lo dikambo di’Ɔnande.
Ntondotondo, lo kamba la tshɛkɛta “On’ami,” Jehowa akalange mbuta ɔnɛ, ‘lekɔ l’ɔngɛnɔngɛnɔ dia monga Papa kayɛ.’ Papa kele la shɛnɔdi kotshaka nsaki k’efula kele la anande ka nde mbaetawɔ ndo mbadja yimba. Ana nangaka vɔ mbashikikɛ ɔnɛ vɔ wekɔ anto wele la nɛmɔ dia lânde lo nkumbo. Ohokanyiya woho wakayaoke Yeso, kânga etena kakandakome opalanga, dia mboka ɛtɛkɛta wa lowando wa ngasɔ oma l’onyɔ wa Papa kande!
Dui dia hende, lo mbelɛ Ɔnande ɔnɛ Ɔnami “la ngandji,” Jehowa akakɛnɛmɔla lo sɛkɛ ngandji kakandokaka Yeso. Aki oko Papa aki lo mbotɛ ɔnɛ: ‘Dimi kolangaka.’ Papa ka dimɛna mbutɛka anande dia nde mbalangaka efula. Ɛtɛkɛta wa ngasɔ woludi la ngandji ka mɛtɛ k’oma le ombutshi kimanyiyaka ana dia vɔ mbola dimɛna. Yeso akanandema efula etena kakandoke ɛtɛkɛta wa She wakɛnyaka ngandji kakandawokaka!
Dui dia sato, oma l’ɛtɛkɛta w’ɔnɛ: ‘Dimi lamboketawɔ,’ Jehowa akɛnya woho wakandetawɔka Ɔnande. Ekɔ oko Jehowa akate ate: ‘Ɔnami lee, lambɔngɛnangɛna kɛnɛ kamboyosala.’ Papa kele la ngandji nyangaka waaso wa mbutɛ anande dia nde ngɛnangɛnaka kɛnɛ katawɔ kana kasalawɔ. Ana keketshamaka ndo mongaka la dihonga etena kokawɔ ambutshi wawatɛ dia vɔ mbangɛnangɛnaka. Ekɔ mɛtɛ dia Yeso akahombe ngɛnangɛna efula lo mboka dia She akɔngɛnangɛnaka!
Lo mɛtɛ, ndoko Papa kɛdimi la Jehowa. Onde otema ayɛ kombolaka dia monga la papa ka ngasɔ? Naka eelo, kete wɛ koka keketshama lo mbeya dia wɛ koka monga la diɔtɔnganelo dia ngasɔ la Jehowa. Naka la mbetawɔ tshɛ, wɛ mbeka awui wendana la nde ndo wɛ nyanga dia sala lolango lande l’otema ɔtɔi, kete nde ayoketawɔ. Bible mbutaka ɔnɛ: ‘Yasukanya la Nzambi ko nde ayosukana la yɛ.’ (Jakoba 4:8) Kakɔna kayoleka kosha lotui tshitshi oko monga la diɔtɔnganelo dia ma ma la Jehowa Nzambi, ɔnɛ lele Papa koleki tshɛ dimɛna na?
[Nɔte ka l’ɛse ka dikatshi]
a Lo ndjela ɔkɔndɔ wa woho akɔ wâmɛ wele lo Evanjiliɔ wa Luka, Jehowa akakambe la okitɔ “wɛ” lo mbuta ate: ‘Wɛ ekɔ Ɔnami la ngandji; dimi lamboketawɔ.’—Luka 3:22.