Yasukanya la Nzambi
Olami wayakiyanya dikambo diayɛ
‘ONDE Nzambi ndjakiyanyaka dikambo diami?’ Naka wɛ amboyaokaka dimbola sɔ, kete eya dia ndo anto akina wamboyaokakadiɔ. Efula ka l’atei aso wambohomanaka la ekakatanu ndo tena dimɔtshi takayambola dia kana Otungi wa andja wa woke ɔnɛ mbidjaka yimba lo kɛnɛ katokomɛ. Ekɔ ohomba sho mbeya okadimwelo wa dimbola nɛ: Onde Jehowa Nzambi ndjakiyanyaka dikambo diaso l’onto ndo l’onto? Etena kakinde la nkɛtɛ, Yeso loleki mbeya Jehowa akasha wɛɛla ɔmɔtshi washa okadimwelo wananda otema.
Lo mbɛdika Jehowa la olami w’ɛkɔkɔ wadja ɛkɔkɔ ande yimba, Yeso akate ate: “Naka untu la ekoko lukama, ku ndi ambushisha omotshi, ndi hatshiki akumi divwa la divwa lu akuna, dia tuyanga one wushishwi? Lam’ayunduwena, mete kanyutelami nti: Ongenongeno andi le one wushishwi, ayuleka ongenongeno andi le akumi divwa la divwa wahashishwi. Okone Shenyu leli l’ulungu halangi nduku kiendakenda [shishɔ].” (Mateu 18:12-14) Tende woho wakɛnya Yeso nganɛ wayakiyanya Jehowa la ngandji tshɛ dikambo di’ɔtɛmɔdi Ande tshɛ.
Olami akayaokaka dia nde ekɔ l’ɔkɛndɛ wa kokɛ ɔkɔkɔ ande tshɛ. Naka ɔkɔkɔ ɔmɔtshi wamboshishɔ, nde akahombaka mbeya ɔkɔkɔ akɔ. Nde akeyaka ɔkɔkɔ tshɛ oma lo lokombo lakandawosha. (Joani 10:3) Olami wayakiyanya dikambo di’ɛkɔkɔ ande takandahombaka mpekɔ nyanga ɔkɔkɔ edja ndo vɔ wambɛnama. Onde lo ntshɔ dia toyanga ɔkɔkɔ wamboshishɔ, nde hatotshika ɛkɔkɔ ekina 99 lo wâle? Mbala efula alami w’ɛkɔkɔ mongaka dihole diâmɛ ndo vɔ tshikaka dia ɛkɔkɔ awɔ sɔhana.a Ɔnkɔnɛ, olami wotshwe toyanga ɔkɔkɔ wamboshishɔ mbeyaka tshika lo tshanda mɔtshi dia osekande olami mbêndɛka ɛkɔkɔ wotshikadi. Etena katanande ɔkɔkɔ wakashishɔ aha la vɔ pomɔ, nde mongaka mɛtɛ la ɔngɛnɔngɛnɔ. Nde ayɛmba ɔkɔkɔ akɔ l’ahɛka, ayowolama dimɛna ndo ayotshɔ la wɔ polo lɛnɛ akandatshiki ɛkɔkɔ ekina.—Luka 15:5, 6.
Lo nembetshiya wɛɛla ɔsɔ, Yeso akate dia Nzambi halange dia “nduku kiendakenda [shishɔ].” La ntondo ka nde mbisha wɛɛla ɔsɔ, Yeso akahɛmɔla ambeki ande diaha vɔ ‘takanya ɔmɔtshi wa l’atei wa tɔkɛndakɛnda tele la mbetawɔ le nde.’ (Mateu 18:6) Ko lâsɔ, kakɔna katetsha wɛɛla waki Yeso lo dikambo dia Jehowa? Vɔ tetshaka dia nde ekɔ Olami wayakiyanya efula dikambo dia ɛkɔkɔ ande, mbidja ndo ‘wa totshitshɛ,’ mbuta ate anto wakoka mbɔsama oko totonto t’anyanya oma le ase andja ɔnɛ. Eelo, lo washo wa Nzambi, ɔtɛmɔdi ande tshɛ ekɔ onto la lânde ndo lɔsande la nɛmɔ.
Naka wɛ nangaka ndjashikikɛ dia wɛ ekɔ la nɛmɔ lo washo wa Nzambi, lande na kahayeke akambo efula wendana la Jehowa Nzambi, Olami wa Woke ɔsɔ, ndo woho wakokayɛ ndjasukanya la nde na? Lo sala ngasɔ, wɛ kokaka ndjonga la woho w’eshikikelo kaki l’ɔpɔstɔlɔ Petero, ɔnɛ lele ondo akoke etena kakashaka Yeso wɛɛla wa ɔkɔkɔ wakashishɔ. Petero akayofunda l’ɔkɔngɔ ate: “Nyukitsha ukananu anyu tshe le [Nzambi], ne dia ndi atunyukanelaka.”—1 Petero 5:7.
[Nɔte ka l’ɛse ka dikatshi]
a Kakitola ɛkɔkɔ wambɔsɔhana komongaka dui dia wolo, nɛ dia ɔkɔkɔ tshɛ ndjelaka dui di’olami awɔ.—Joani 10:4.