Onde wɛ âkɔhɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka kadimola ambola wayela anɛ:
• Etena kakɔna kakatshu waa astrɔlɔgɛ dia tenda Yeso?
Ekadimwelo kɛmɔtshi ka Bible mbutaka ɔnɛ: “Waa astrɔlɔgɛ kotshɔ dia tenda Yeso lo elelo ka nyama l’otsho wa eotwelo kande oko wakasale anami w’ɛkɔkɔ. Vɔ wakayotshɔka ngɔndɔ mɔtshi l’ɔkɔngɔ.” Koko l’etena kɛsɔ Yeso aki ‘ɔna dikɛnda’ ndo akasɛnaka lo nkumbo kɛmɔtshi. (Mat. 2:7-11) Otondonga waa astrɔlɔgɛ wakatshu tenda Yeso l’otsho wakandotɔ ndo wakɔtɔlɛ paonyi la weshasha ekina w’oshinga wolo, onde Mariya otolambola tofudu tohende toto nshi 40 l’ɔkɔngɔ?—1/1, lɛkɛ 31
• Kakɔna kakoka anto efula sala dia ngɔnya nsɛnɔ yawɔ?
Onto ɔmɔtshi kokaka ndjambola ɔnɛ: ‘Onde dimi kokaka tshikitanya akambo wele lami ndo mbetɛ yoho yami ya lɔsɛnɔ ɔsɛlɛngɛ?’ Amy akasale ngasɔ. Nde aki l’ɔngɔnyi efula koko nde komonga la ɔngɛnɔngɛnɔ. Nde akɛnyi dia kamba olimu lo andja ɔnɛ akokonya suke la nde shisha mbetawɔ kande. Diakɔ diele, nde akɔshi yɛdikɔ ya mbidja wahɔ wa Diolelo lo dihole dia ntondo ndo nde aki la akoka wa monga ombatshi mboka lo tshanda mɔtshi. Amy mbutaka ate: “Kakianɛ, loyaoka dia lekɔ lo kamba olimu w’ɔlɔlɔ oleki woho wakamayaokaka” etena kakamatawesaka eyango wa l’emunyi.—1/15, lɛkɛ 19.
• Kakɔna kakakoke kimanyiya wa mama mɔtshi dia vɔ ndjaoka ɔnɛ wambokotsha ɔkɛndɛ awɔ?
Waa mama efula kambaka elimu lo andja wa nkumbo. Amɔtshi salaka ngasɔ dia kotsha ehomba wa nkumbo woleki ohomba ndo akina dia vɔ kondja falanga efula diaha mendɛ le anto akina kana dia vɔ somba diangɔ di’eshinga wolo. Ndo akina nto salaka ngasɔ, nɛ dia vɔ ngɛnangɛnaka olimu awɔ. Waa mama y’Akristo wekɔ l’ɔkɛndɛ w’ohomba efula lo nkumbo, djekoleko etena keke ana tɔkɛndakɛnda. Waa mama mɔtshi wakasɔnɛ dia mbetshaka wenya yema tshitshɛ lo elimu awɔ kana tshika elimu akɔ woho wa vɔ monga la akoka wa ndjasha tshɛ le nkumbo yawɔ dia vɔ kotsha ɛkɛndɛ awɔ dimɛna.—Ngɔ. 4-6, lɛkɛ 26-29.
• Dia “lolonga” lakɔna lakatɛkɛta Yeso lo ɛtɛkɛta ande wofundami lo Mateu 24:34?
Yeso akakambe mbala efula la tshɛkɛta “lolonga” lo yoho ya kɔlɔ etena kakandatɛkɛta la anto wa kɔlɔ kana lo dikambo diawɔ. Koko nde kosala ngasɔ etena kakandatɛkɛtaka la ambeki ande, waki suke la nongola nyuma k’ekila. Vɔ wakahombe monga wanɛ waki la akoka wa shihodia awui wele lo Mateu 24:32, 33. Ɔnkɔnɛ, mɛnamaka dia Yeso akatɛkɛta dikambo dia ambeki ande w’akitami wanɛ waki lo ntambe ka ntondo ndo dikambo sɔ kotshamaka lo nshi yaso nyɛ.—15/2, lɛkɛ 23-24.
• Ngande waki Ɛlɛmbɛ oko ombetsha, oko wɔtɛkɛtamidiɔ lo Ngalatiya 3:24?
Mbala efula ombetsha wa lo nshi y’edjedja aki ɔhɔmbɔ wakawakokaka mbɛkɛ otema ndo nde akakambaka oko ose olimu wakakokɛka ɔna ndo wakayashikikɛka dia kɛnɛ kakombolɛ ombutshi ɔnande kekɔ lo kotshama. Woho akɔ wâmɛ mbele, Ɛlɛmbɛ wakakokɛ ase Juda oma lo tɔsɛngiya ta kɔlɔ, oko tshukanelo dia la apanganu. Oko wakidiɔ lo dikambo dia ombetsha w’ɔna, Ɛlɛmbɛ waki oko ombetsha lo tshanda mɔtshi, edja ndo lam’akaye Kristo.—Ngɔ. 4-6, lɛkɛ 18-21.
• Lo ndjela Jakoba 3:17, waonga akɔna wahombaso kɛnɛmɔla?
Oko weso pudipudi, sho pombaka pembola losambi l’akambo wa kɔlɔ esadi eto. (Etat. 39:7-9) Sho pombaka monga nto anangi wa ki ndo mbewɔ ɔsɔmbwanelo kana etsha wadja ki kaso lo wâle. Ɔnkɔnɛ, ɔmɔmɔ wa l’atei aso la dia ndjambola ɔnɛ: ‘Onde dimi mbeyamaka oko onto lalanga ki kana lakidja lo wâle? Onde dimi manaka mbala la mbala la anto akina? Onde dimi mbanyangiyaka kana halɔkɔhɛ nyanga etena kasalɛwɔ dui dimɔtshi? Kana onde dimi lekɔ suke dia dimanyiyana ndo bu suke dia tshininala dia anto akina ndjela tokanyi tami hita?’—15/3, lɛkɛ 24-25.
• Lande na kakakɔnɔya Yeso pami kaki tshungu yema yema? (Mako 8:22-26)
Bible hasha olembetshiyelo wa shikaa. Koko, ondo la ntondo ka dikambo sɔ, lo kɔnɔla pami kaki tshungu kɛsɔ yema yema, Yeso akawosha diaaso dia nde ndjaekesanyiya la osase. Kɛsɔ kakahombe mɛnya woho wakayashaka Yeso la ngandji tshɛ le pami kaki tshungu kɛsɔ.—Ngɔ. 4-6, lɛkɛ 25.