Ɔtɛkɛta wa Jehowa wekɔ la lɔsɛnɔ
Akambo w’ohomba w’oma lo mikanda wa Tesalonika ndo wa Timote
ETSHUMANELO k’oyoyo ka la Tɛsalɔnika kakahomana la ɔlɔshamelo tatɛ oma kam’akatatema etena kaki ɔpɔstɔlɔ Paulo lɛkɔ. Ɔnkɔnɛ, etena kakakalola Timɔtɛ oma lɛkɔ la alapɔlɔ wa dimɛna ele ondo l’ɛnɔnyi 20 l’ɛmɔtshi, Paulo akatshutshuyama dia fundɛ ase Tɛsalɔnika mukanda dia mbândola ndo mbâkeketsha. Ondo mukanda ɔsɔ wakafundama oya l’ekomelo k’ɔnɔnyi 50 T.D., wekɔ mukanda wa ntondo wakasambiyama wakafunde Paulo. Yema tshitshɛ oma lâsɔ, nde akafundɛ Akristo wa la Tɛsalɔnika mukanda ande wa hende. Mbala kɛsɔ nde akalɔngɔsɔla tokanyi ta kɔlɔ taki la ase Tɛsalɔnika amɔtshi ndo akâkeketsha dia vɔ tshikala nge lo mbetawɔ.
Ɛnɔnyi oko dikumi oma lâsɔ, Paulo aki la Makɛdɔniya ndo Timɔtɛ aki l’Ɛfɛsɔ. Paulo akafundɛ Timɔtɛ ndo akokeketsha dia nde tshikala l’Ɛfɛsɔ woho wa nde ndɔshana la embetsha wa kashi waki l’atei w’etshumanelo ta dia lo nyuma. Etena kakahɛnyahɛnyama Akristo efula l’ɔkɔngɔ wa dja ndanya Rɔma lo 64 T.D., Paulo akayofundɛka Timɔtɛ mukanda ande wa hende. Vɔ wekɔ mukanda w’ekomelo wakasambiyama wakandafunde. Ɛlɔ kɛnɛ, sho lawɔ kokaka kondja wahɔ oma l’ekeketshelo ndo l’alako wakasha Paulo lo mikanda ande ɛnɛi ɛsɔ.—Heb. 4:12.
‘NYƆSƐNAKE’
Paulo akandola ase Tɛsalɔnika l’ɔtɛ wa ‘olimu awɔ wa kɔlamelo, wa la ngandji ndo l’ɔtɛ w’ekikelo kaki lawɔ.’ Nde akawatɛ dia vɔ waki ‘elongamelo kande, ɔngɛnɔngɛnɔ ande, ndo dɛmbɔ diande dia koso.’—1 Tes. 1:3; 2:19.
L’ɔkɔngɔ wa nde keketsha Akristo wa la Tɛsalɔnika dia vɔ sambana la elongamelo ka eolwelo, Paulo akate ate: “Lushi la Khumadiondjo layuya uku atuyakaka uvi l’utshu.” Nde akâlake dia vɔ ‘sɛnaka’ ndo ndjalamaka.—1 Tes. 4:16-18; 5:2, 6.
Ekadimwelo lo ambola w’oma l’Afundelo:
4:15-17—Waa na ‘wɔsama lo wange dia tohomana la Nkumadiɔndjɔ lo loowa,’ ndo ngande wasalema dui sɔ? Anto asɔ ele Akristo w’akitami wele la lɔsɛnɔ l’etena ka wôngelo wa Kristo lo lowandji la Diolelo. Vɔ ‘pomanaka la Nkumadiɔndjɔ’ Yeso lo ahole wa l’olongo wahɛnama. Koko, dia vɔ kondja diɛsɛ sɔ, vɔ pombaka tavwe ko ndjolɔ oko ditongami dia lo nyuma. (Romo 6:3-5; 1 Kor. 15:35, 44) Lam’ele wôngelo wa Kristo wamboshilaka tatɛ, Akristo w’akitami wavɔ nshi nyɛ hawototshikala lo diombo. Vɔ ‘mbɔsamaka,’ mbuta ate mbolwamaka lo kamula ka sso.—1 Kor. 15:51, 52.
5:23—Kakɔna kakalange Paulo mbuta etena kakandalɔmbaka dia kokɛ anango “lo yimba, lo lomu [ndo] lo demba”? Paulo akatɛkɛtaka dia yimba, lomu ndo demba dia etshumanelo k’Akristo k’otondo mbidja ndo Akristo w’akitami wa la Tɛsalɔnika. Lo dihole dia nde nɔmba tsho dia etshumanelo kokamɛ, nde akalɔmbaka dia Nzambi kokɛ “yimba,” mbuta ate ekanelo kawɔ ka yimba. Nde akalɔmbɛ nto dia “lomu,” mbuta ate dia lɔsɛnɔ latɔ ndo dia “demba,” mbuta ate olui w’otondo w’akitami. (1 Kor. 12:12, 13, Dyookaneelo dy’Oyooyo) Ɔnkɔnɛ, dɔmbɛlɔ sɔ diakɛnyaka woho wakayakiyanyaka Paulo efula dikambo dia etshumanelo.
Wetshelo le so:
1:3, 7; 2:13; 4:1-12; 5:15. Yoho ya dimɛna ya ndaka onto ele mbândola ndo mbôkeketsha dia nde sala kɛnɛ kele ɔlɔlɔ.
4:1, 9, 10. Atɛmɔdi waki Jehowa pombaka tetemala pama lo nyuma.
5:1-3, 8, 20, 21. Oko wayasukana lushi laki Jehowa, “tuyali ki, tolote engawo ka mbetawo la ngandji; tulimbe dembo dia kusu la elungamelu ka panda.” Ndo nto, sho pombaka mbidja yimba l’Ɔtɛkɛta wa prɔfɛsiya waki Nzambi, mbuta ate Bible.
“NYUSHIKIMALI”
Lo mengesola ɛtɛkɛta wakate Paulo lo mukanda ande wa ntondo, ondo anto amɔtshi wa l’etshumanelo wakate ɔnɛ ‘wôngelo wa Nkumadiɔndjɔ’ waya suke. Dia nɔngɔsɔla kanyi yawɔ, Paulo akate kɛnɛ kakahombe ‘salema ntondo.’—2 Tes. 2:1-3.
Paulo akâkeketsha ɔnɛ: “Nyushikimali; nyukimeli akambu wakanyetshama.” Nde akawadjangɛ dia vɔ “mumo uma le anya[wɔ] tshe, akanga a nende.”—2 Tes. 2:15; 3:6.
Ekadimwelo lo ambola w’oma l’Afundelo:
2:3, 8—Ele ‘ɔmɔnyɔdi w’ɛlɛmbɛ,’ ndo ngande wayondolanyema? ‘Ɔmɔnyɔdi’ ɔsɔ ele olui w’ewandji w’ɛtɛmwɛlɔ wa lo Lokristokristo. Ɔnɛ lele la lotshungɔ la mbewoya anto wa kɔlɔ dombwelo diaki Nzambi ndo mbidjanga dia vɔ ndjakema ele “Diui,” mbuta ate Yeso Kristo, Yɛmba awui yoleki woke yaki Nzambi. (Joa. 1:1) Ɔnkɔnɛ, sho kokaka mbuta ɔnɛ Yeso ayolanya ɔmɔnyɔdi w’ɛlɛmbɛ ɔsɔ la ‘nyuma [wolo wakamba olimu] k’oma l’onyɔ ande.’
2:13, 14—Ngande wele Akristo w’akitami ‘wakasɔnama oma k’etatelo dia kondja panda’? Olui w’Akristo w’akitami wakasɔnama ntondo etena kakasangoya Jehowa dia kanula ya womoto yayoyominola Satana l’ɔtɛ. (Etat. 3:15) Jehowa akate nto kɛnɛ kakawahombe kotsha, olimu wakawahombe kamba, ndo ehemba wakahombe pomana la wɔ. Lo yoho shɔ mbakandawaelɛ.
Wetshelo le so:
1:6-9. Dombwelo diaki Jehowa sɔnaka.
3:8-12. Hatohombe mbisha tɛkɛ nɛndɛ lo woho wamboleka sukana lushi laki Jehowa dia sho tona dia kotsha ehomba aso etena kakambaso olimu w’esambishelo. Naka hatokambe olimu, kete sho kokaka ndjokoma kanga nɛndɛ ndo “kanga esaku lu akambu wa kana.”—1 Pet. 4:15.
“ULAMAKI DIKAMBU DIAKAWAKUTELA”
Paulo akatɛ Timɔtɛ dia nde ‘ndɔ ta di’ɔlɔlɔ ndo kukutɛ mbetawɔ la nkum’otema k’ɔlɔlɔ.’ Ɔpɔstɔlɔ Paulo akɛnya kɛnɛ kahomba onto kotsha dia monga l’ɛkɛndɛ l’etshumanelo. Ndo nto, Paulo akalɔmbɛ Timɔtɛ dia ‘sɛka ɛkɔndɔ wa kashi wasekola kɛnɛ kele ekila.’—1 Tim. 1:18, 19; 3:1-10, 12, 13; 4:7.
Paulo akafunde ate: “Tuhangwelaki ekumanyi.” Nde akatɛ Timɔtɛ ate: “Ulamaki dikambu diakawakutela, oseke eteketateketa wa kolo la aui wa tamu uma le antu waha la yimba ya mete.”—1 Tim. 5:1; 6:20.
Ekadimwelo lo ambola w’oma l’Afundelo:
1:18; 4:14—“Aui w’amvutshi” akɔna wakatɛkɛtama lo dikambo dia Timɔtɛ? Ondo awui asɔ waki prɔfɛsiya mɔtshi yendana la ɔkɛndɛ wakahombe ndjonga la Timɔtɛ l’etshumanelo k’Akristo wakatama l’ekimanyielo ka nyuma k’ekila etena kakembola Paulo osomba wa Lustɛra lo lɔkɛndɔ lande la hende la misiɔnɛrɛ. (Etsha 16:1, 2) Lo kamba la “aui w’amvutshi” asɔ, dikumanyi dia l’etshumanelo ‘wakahɛ ɔlɔngɔlɔngɔ Timɔtɛ anya’ lo woho wakawôkitsha lânde dia kamba olimu ɔmɔtshi wa shikaa.
2:15—Ngande wele womoto “ayushimbamela lu diutelu dia ana”? Wotelo la okokelo w’ana ndo kamba tumu ya la ngelo kokaka kimanyiya womoto dia nde ‘shimbamɛ’ oma lo awui wa ‘vate vate ndo ndjatambiya l’awui w’anto akina.’—1 Tim. 5:11-15.
3:16—Ele sheke y’ekila y’omamemelo wa Nzambi? Mbeya dia kana anto wayonga l’okitanyiya wa kokele lo lowandji laki Jehowa kana bu aki sheke l’edja k’ɛnɔnyi efula. Yeso akasha okadimwelo lo nama olowanyi wa kokele le Nzambi polo ndo lo nyɔi kande.
6:15, 16—Onde ɛtɛkɛta ɛnɛ mendanaka la Jehowa Nzambi kana la Yeso Kristo? Ɛtɛkɛta ɛnɛ mendanaka la Yeso Kristo ɔnɛ lele wɛnamelo ande wekɔ lo nembetshiyama. (1 Tim. 6:14) Lo mbɛdika Yeso la nkumi ya dikanga ndo nkumi y’ana w’anto, Yeso oto mbele “Umbuledi” ndo ndamɛ kele la eongelo kahavu. (Dan. 7:14; Romo 6:9) Kam’akandadɛ l’olongo wahɛnama ndoko onto la la nkɛtɛ ‘lakoka mbɛna’ la washo.
Wetshelo le so:
4:15. Oyadi eke esadi wambotokoma Okristo kana aya edja, sho pombaka sala la wolo dia tetemala pama lo nyuma.
6:2. Naka tekɔ lo kamba olimu laka wonyaso Okristo, kete lo dihole dia nyanga wahɔ aso hita oma le nde, sho pombaka monga suke dia mbôkambɛ ndeka ndo woho wakokaso kambɛ onto lele l’andja w’etshumanelo.
‘OSAMBISHAKE ƆTƐKƐTA L’ETETE’
Dia nɔngɔsɔla Timɔtɛ dikambo dia ekakatanu waki la ntondo kande, Paulo akafunde ate: “[Nzambi] kuntusha utema a woma, keli ndi akatusha utema a wulu la wa ngandji ndu wa ndjakimela.” Nde akatɛ Timɔtɛ ate: “Ukambi wa Khumadiondjo hahumbi ndjala la tamu, keli ayali la memakana le antu tshe, lama mbetsha.”—2 Tim. 1:7; 2:24.
Paulo akalake Timɔtɛ ate: “ushikikali lu akambu wakayeki ndu wakayetawo.” Wetshelo wa waa apɔsta wakatadianganaka, diakɔ diele ɔpɔstɔlɔ Paulo akalake omendji w’ɔlɔngɔlɔngɔ Timɔtɛ ate: ‘Osambishake ɔtɛkɛta l’etete, owahokole, owahangwe ndo owakeketsha.’—2 Tim. 3:14; 4:2.
Ekadimwelo lo ambola w’oma l’Afundelo:
1:13—‘Lokongɛ l’ɛtɛkɛta w’eshika’ kɛdikɛdi na? ‘Ɛtɛkɛta w’eshika’ ele “aui wa Khumesu Jesu Kristu,” mbuta ate wetshelo wa mɛtɛ wa Akristo. (1 Tim. 6:3) Kɛnɛ kaketshaka Yeso ndo kakandasale kakɔtɔnɛka l’Ɔtɛkɛta waki Nzambi, diakɔ diele etelo k’ɔnɛ ‘ɛtɛkɛta w’eshika’ kokaka mendana la wetshelo tshɛ wa lo Bible. Wetshelo ɛsɔ kokaka tokimanyiya dia mbeya kɛnɛ katɔlɔmba Jehowa. Sho kukutɛka lokongɛ lɔsɔ lo salaka kɛnɛ kekaso oma lo Bible.
4:13—Ele “abuku wa dikuhu”? “Abuku wa dikuhu” asɔ mendanaka la efundelo wakafundama lo dikoho dia nyama. Ondo Paulo akalɔmbaka wɛɔmbɔ wa Afundelo wa lo Hɛbɛru dia mbaeka etena kakinde lo lokanu la Rɔma. Ondo wɛɔmbɔ ɛmɔtshi wakafundama lo akatshi amɔtshi welɛwɔ papyrus koko ekina lo dikoho dia nyama.
Wetshelo le so:
1:5; 3:15. Ɔkɔkɔ woleki waki Timɔtɛ la mbetawɔ le Yeso Kristo ele nɛ dia nde aketshama efundelo w’ekila oma ko kiɛndakɛnda yande. Ekɔ mɛtɛ ohomba dia ambutshi kana yimba dimɛna dimɛna lo kɛnɛ kendana la woho wakotshawɔ ɔkɛndɛ ɔsɔ le Nzambi ndo le anawɔ!
1:16-18. Etena kahomana asekaso ambetawudi l’ehemba, kahɛnyahɛnyamawɔ kana kadjamawɔ lo nkanu, sho pombaka nɔmbaka lo wahɔ awɔ ndo sala kɛnɛ tshɛ kakokaso sala dia mbakimanyiya.—Tuk. 3:27; 1 Tes. 5:25.
2:22. Akristo, djekoleko ɛlɔngɔlɔngɔ l’esekaseka hawohombe ndjakiyanya amboleka dikambo dia ɛnamelo kawɔ, tɔkɛnyɔ, mishiki, tena dia diomuyelo, nkɛndɔ, asawo w’anyanya ndo awui akina wafɔna la wasɔ lo yɛdikɔ nyɛ yele waya paka la yema ya wenya tshitshɛ tsho dia ndjasha lo awui wa lo nyuma.
[Osato wa lo lɛkɛ 31]
Mukanda akɔna wakayofundaka ɔpɔstɔlɔ Paulo l’ekomelo?