Tɔsɛmanele la Satana, ko nde ayotolawɔ!

“Nyukitanyiaki aui wa [Nzambi]. Nyosemaneli la [Diabolo], ku ndi ayunyulawo.”​—JAKOBA 4:7.

1, 2. a) Naa dionga dia kɔlɔ diaki Diabolo diɛnama oma lo ɛtɛkɛta wofundami lo Isaya tshapita 14? b) Ambola akɔna wayotɔsɛdingola?

DIABOLO ekɔ ɛnyɛlɔ koleki tshɛ k’otako. Lotamanya lande mɛnyamaka lo ɛtɛkɛta wakafunde Isaya ɔprɔfɛta waki Nzambi. Ɛnɔnyi ndekana 100 la ntondo ka Babilɔna ndjokoma lowandji laheme andja w’otondo, ekambi waki Jehowa wakɛnyama oko watɛ “khum’ekanga ka Babilona” ɛtɛkɛta ɛnɛ: “We kakataka l’utema aye wati: Dimi layumbela utsha l’ulungu, layedia kiti kami ka diulelu ladiku dia toto ta [Nzambi], [nkumi ya dikanga ya l’ɔlɔndji wa Davidi] . . . Layuyaete uku Khum’Ulungu.” (Isaya 14:3, 4, 12-15; Walelu 24:17) Lotamanya laki “khum’ekanga ka Babilona” lakafɔnɛ la dionga diaki Satana, ‘jambizambi ya dikongɛ di’akambo nɛ.’ (2 Koreto 4:4) Koko otako waki Satana wayokomɛ la mpokoso, oko wakakomɛ ɔlɔndji w’ewandji wa la Babilɔna lo yoho ya sɔnyi.

² Koko, edja tshɛ keke Diabolo, sho mbeyaka ndjambola ambola wele oko: Onde sho pombaka mboka Satana wɔma? Lande na katshutshuyande anto dia pɛnyahɛnya Akristo? Ngande wakokaso mbewɔ diaha mundama oma le Diabolo?

Onde sho pombaka mboka Diabolo wɔma?

3, 4. Lande na kele Akristo w’akitami ndo asekawɔ ɛkɔkɔ ekina hawoke Diabolo wɔma?

³ Akristo w’akitami kondjaka ekeketshelo oma lo ɛtɛkɛta ɛnɛ waki Yeso Kristo: “Tukaki akambu wayangaye nsuwa woma. Ulungi, [Diabolo] uyanga mbidja amotshi anyu lu lukanu dia nyuhimba, keli nyu nyayusuwa nshi dikumi. Utetemali edja ndu lu nyoi, ku dimi layukusha dembo dia kusu dia lumu.” (Enyelo 2:10) Akitami kâmɛ la asekawɔ wele l’elongamelo ka nsɛna la nkɛtɛ hawoke Diabolo wɔma. Woho wahawawoke wɔma ɔsɔ haye oma lo dihonga diakotɔ lawɔ. Vɔ hawowoke wɔma nɛ dia vɔ wekɔ la wɔma wɔsɔhanyi la dilɛmiɛlɔ otsha le Nzambi ndo vɔ ‘ndjashɛka lo ahafu ande.’​—Esambu 34:9; 36:7.

⁴ Ambeki wa ntondo waki Yeso Kristo waki la dihonga; ɔnkɔnɛ, oyadi asui wakakomɛ, vɔ wakatshikala la kɔlamelo polo lo nyɔi. Vɔ kokoka mboka kɛnɛ tshɛ kakakoke Satana Diabolo mbasalɛ wɔma, nɛ dia vɔ wakeyaka dia Jehowa hakalɛki pondjo wanɛ wele la kɔlamelo otsha le Nde. Woho akɔ wâmɛ mbele, Akristo w’akitami ndo asekawɔ wamboyakimɔ wamboyashikikɛ diaha shisha kɔlamelo yawɔ le Nzambi kânga la ntondo ka weho w’ɛhɛnyɔhɛnyɔ wa wolo. Koko, ɔpɔstɔlɔ Paulo akɛnya dia Diabolo kokaka ndjakisha. Onde dui sɔ hadiokoke tokiya wɔma?

5. Kakɔna katetsha Heberu 2:14, 15?

⁵ Paulo akate dia Yeso akonge la emunyi la dikila dia “ndi nembia laki la wulu a nyoi, letawo vati: Uhimbanyi, uma lu nyoi kandi; la dia ndi ntshungula wane tshe wakatshungama uma lu fumbi ka woma a nyoi.” (Heberu 2:14, 15) Oko ɔnɛ “laki la wulu a nyoi,” Satana akalɔmbɔla Judasɛ Isakariyɔtɛ ndo akakambe la ewandji w’ase Juda ndo w’ase Rɔma dia ndjaka Yeso. (Luka 22:3; Joani 13:26, 27) Koko, oma lo nyɔi kande k’olambo, Yeso akatshungola anto wele atshi wa pɛkato oma lo lowandji laki Satana ndo toshaka diaaso dia sho kondja lɔsɛnɔ la pondjo.​—Joani 3:16.

6, 7. Polo lo yɛdikɔ yakɔna yele Diabolo la wolo wa ndjakisha?

⁶ Polo lo yɛdikɔ yakɔna yele Diabolo la wolo wa ndjakisha? Oma k’etena kakatatɛ Satana ntsha awui wa kɔlɔ, kashi ndo ɛlɔmbwɛlɔ kande akela nyɔi l’atei w’anto. Dui sɔ diekɔ ngasɔ nɛ dia Adama akatshe pɛkato ndo akasambiya nkumbo k’anto pɛkato la nyɔi. (Romo 5:12) Ndo nto, ekambi waki Satana wa la nkɛtɛ wakahɛnyahɛnya atɛmɔdi waki Jehowa, tena dimɔtshi polo ndo lo nyɔi, oko akawasale lo dikambo dia Yeso Kristo.

⁷ Koko, sho hatohombe kanyiya ɔnɛ Diabolo kokaka ndjaka onto tshɛ lalangande ndjaka. Nzambi kokɛka wanɛ wele Wande ndo nde hetawɔki pondjo dia Satana shila atɛmɔdi ande tshɛ wa mɛtɛ oshiki. (Romo 14:8) Mɛtɛ, Jehowa tshikaka dia ɛhɛnyɔhɛnyɔ komɛ ekambi ande, ndo amɔtshi mvɔka oma lo ta diatɔlɔsha Diabolo. Koko, Afundelo mbishaka elongamelo ka dimɛna efula ka eolwelo ka wanɛ wele lo “buku di’euhwelu” diaki Nzambi ndo Diabolo hakoke sala kânga dikambo ɔtɔi dia shimba okaloyelo ɔsɔ wa lɔsɛnɔ!​—Malaki 3:16; Joani 5:28, 29; Etsha 24:15.

Lande na kahɛnyahɛnya Satana ekambi waki Nzambi?

8. Lande na kahɛnyahɛnya Diabolo ekambi wa Nzambi?

⁸ Naka tekɔ ekambi wa Nzambi wa kɔlamelo, kete ekɔ ɔkɔkɔ ɔmɔtshi w’oshika watɔhɛnyahɛnya Diabolo. Oyango ande ele wa ndanya mbetawɔ kaso. Tekɔ la diɔtɔnganelo di’oshika la Shɛso lele l’olongo, ndo Satana nangaka dia dilanya. Kɛsɔ hahombe tambiya. Lo Ɛdɛna, Jehowa akewoya dia lohetsho layonga lam’asa “umuntu” ande la didjidji la “ului” ndo lam’asa ‘tokanula’ tawɔ. (Etatelu 3:14, 15) Afundelo mɛnyaka Diabolo oko “ului w’edjedja” ndo vɔ mɛnyaka dia etena kambôtshikalɛ kaya bu efula ndo ɔnɛ nde ekɔ la kɛlɛ k’efula. (Enyelo 12:9, 12) Oko watatetemala lohetsho lele lam’asa ‘tokanula’ tɔsɔ tohende, wanɛ tshɛ wakambɛ Jehowa la kɔlamelo kokaka nongamɛ dia pɛnyahɛnyama. (2 Timote 3:12) Onde wɛ mbeyaka ɔkɔkɔ wa mɛtɛ watshutshuya Satana dia pɛnyahɛnya ekambi wa Nzambi?

9, 10. Dimbola diakɔna diakonyiya Diabolo, ndo ngande wendana dui sɔ la dionga di’anto?

⁹ Diabolo akonyiya dimbola diendana la lowandji la l’andja w’otondo. Nde akônyiya nto dimbola dikina diɔtɔnɛ la dia ntondo, mbuta ate nde akadje tâmu lo dikambo dia kɔlamelo y’anto otsha le Otungi awɔ. Satana akahɛnyahɛnya Jɔbɔ onto ɔlɔlɔ. Lande na? Dia ndanya olowanyi waki Jɔbɔ otsha le Jehowa. L’etena kɛsɔ, wadi aki Jɔbɔ la ‘asambi ande wa kɔlɔ’ asato wakasale lolango laki Diabolo. Oko wɛnyamidiɔ lo dibuku dia Jobo, Diabolo akadje tɔfwɛfwɛ la Nzambi, lo sɛma ɔnɛ ndoko onto layotshikala la kɔlamelo le Nzambi naka nde mbahemba. Koko, Jɔbɔ akatshikala la kɔlamelo, ɔnkɔnɛ nde akɛnya dia Satana ekɔ kanga kashi. (Jobo 1:8–2:9; 16:2; 27:5; 31:6) Diabolo ekɔ lo pɛnyahɛnya Ɛmɛnyi wa Jehowa ɛlɔ kɛnɛ lo welo wadjande dia ndanya kɔlamelo yawɔ ndo dia mɛnya ɔnɛ ɛsɛmɔ ande wekɔ mɛtɛ.

¹⁰ Mbeya ɔnɛ Diabolo ekɔ lo tela ɛhɛnyɔhɛnyɔ nɛ dia nde nyangaka la wolo tshɛ dia ndanya kɔlamelo yaso otsha le Nzambi tokimanyiyaka dia sho monga la dihonga ndo la wolo. (Euhwelu k’Elembe 31:6) Nzambi kaso ekɔ Omboledi wa lâdiko, ndo nde ayotokimanyiya dia sho nama olowanyi aso. Nyɛsɔ toyangake mbala tshɛ woho wa ngɛnyangɛnya otema waki Jehowa lo monga la kɔlamelo le nde, dia nde mbeya mbisha ɔmɔnyɔdi wa woke, Satana Diabolo okadimwelo.​—Tukedi 27:11.

‘Otoshimbele oma le kanga kɔlɔ’

11. Kakɔna kalembetshiya dɔmbɛlɔ di’ɔnɛ ‘totokonyake lo ehemba’?

¹¹ Monga la kɔlamelo kema dui dia wɔdu; kɛsɔ nɔmbaka dia sho salaka dɔmbɛlɔ di’oma k’ɛse otema. Ɛtɛkɛta wa lo dɔmbɛlɔ di’ɛnyɛlɔ wekɔ ohomba efula. Yeso akate ate: ‘Totokonyake lo ehemba, kele otoshimbele oma le kanga kɔlɔ.’ (Mateu 6:13) Jehowa hatohembe dia sho sala pɛkato. (Jakoba 1:13) Koko, Afundelo tɛkɛtaka tena dimɔtshi dia nde tosalaka akambo lo woho watshikande dia vɔ salema. (Ruta 1:20, 21) Ɔnkɔnɛ, lam’alɔmbaso oko wakadiɛnya Yeso, sho nɔmbaka Jehowa diaha nde mbetawɔ dia sho nkɔ lo ehemba. Nde ayotohokamɛ, nɛ dia tekɔ la eshikikelo kɛnɛ k’oma lo Afundelo k’ɔnɛ: “[Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.”​—1 Koreto 10:13.

12. Lande na kalɔmbaso ɔnɛ: ‘Otoshimbele oma le kanga kɔlɔ’?

¹² L’ɔkɔngɔ wa nde tɛkɛta dikambo dia ehemba lo dɔmbɛlɔ di’ɛnyɛlɔ, Yeso akate ate: ‘Otoshimbele oma le kanga kɔlɔ.’ Akadimudi amɔtshi wa Bible mbutaka ɔnɛ: “Otonya oma lee Nkanga kɔɔlɔ, “ (Dyookaneelo dy’Oyooyo) kana “Utushimbeli uma lo kolo.” Koko, lo Afundelo, tshɛkɛta ‘otoshimbele oma lo’ ekɔ lo kambema lo kɛnɛ kendana la anto, ndo Evanjiliɔ waki Mateu mbutaka hwe dia Diabolo ekɔ “Uhimbanyi,” mbuta ate tshondo y’onto. (Mateu 4:3, 11) Ɔnkɔnɛ, ekɔ ohomba dia sho nɔmbaka dia shimbamɛ oma le ‘kanga kɔlɔ,’ Satana Diabolo. Nde totshutshuyaka la wolo dia sho salɛ Nzambi kɔlɔ. (1 Tesalonika 3:5) Etena kasalaso dɔmbɛlɔ di’ɔnɛ ‘otoshimbele oma le kanga kɔlɔ,’ sho nɔmbaka Shɛso lele l’olongo dia nde tɔlɔmbɔla ndo tokimanyiya diaha sho mundama le Diabolo.

Tatokesamake oma le Diabolo

13, 14. Lande na kakahombe ase Kɔrɛtɔ tshikitanya dionga diawɔ otsha le pami kakatshe akambo wa mindo l’etshumanelo?

¹³ Etena kakakeketsha Paulo Akristo wa la Kɔrɛtɔ dia kimwanɛ, nde akafunde ate: “Keli lam’ayunyudimanyia untu kolo yandi, ndu dimi layûdimanyia akambu wakamudimanyia. Dimi lakudimanyia lu ashu a Kristu dikambu dianyu, ne dia Satana atukutuleka wulu: shu mbeyaka ditshelu diandi.” (2 Koreto 2:10, 11) Diabolo mbeyaka tonda lo toho efula, ko lande na kakate Paulo awui wofundami asɔ?

¹⁴ Paulo akahangwɛ ase Kɔrɛtɔ nɛ dia vɔ waketawɔ dia pami kɛmɔtshi kakasalaka awui wa mindo tshikala lo etshumanelo. Dikambo sɔ diakangɛnyangɛnya Satana, lo woho wakɔnywama etshumanelo lo mbetawɔ ‘woho wa monanyi kɛsɔ kaki kosalemaka kanga le ase wedja.’ Oma lâsɔ, otshi wa kɔlɔ ɔsɔ akayotshanyemaka. (1 Koreto 5:1-5, 11-13) L’ɔkɔngɔ diko, otshi wa kɔlɔ ɔsɔ akayoyatshumoyaka. Otondonga ase Kɔrɛtɔ wakatone dia mbodimanyiya ndo mbokaloya l’etshumanelo, tshike Diabolo otoyakesa lo yoho kina. Lo yoho yakɔna? Vɔ wotonga anto w’etema wolo oko dive ndo wahokana kɛtshi, oko Satana ndamɛ. Naka pami kakayatshumoya kɛsɔ ndjokoma dia “[nɛmbiama] la lunyangu landi utamanya” ndo ndjotshika dia tɛmɔla Nzambi, kete dikumanyi wotonga l’onongo la ntondo ka Jehowa Nzambi ka kɛtshi. (2 Koreto 2:7; Jakoba 2:13; 3:1) Omalɔkɔ, ndoko Okristo wa mɛtɛ ɔtɔi layokombola mbokoya Satana lo monga ngala, otema wolo ndo hokana kɛtshi.

Tambokokamɛ la dihomɔ dia ta diaki Nzambi

15. Ta diakɔna dialɔso, ndo ahombama dia mbidja otshumba lo ta sɔ?

¹⁵ Naka sho nangaka shimbamɛ oma le Diabolo, kete sho pombaka ndɔshana lo nyuma la welo wa nyuma ya kɔlɔ. Dia sho mbidja ditongami dia lo nyuma dia kɔlɔ diele la wolo efula sɔ otshumba sho pombaka ndɔta “eloto tshe wa ta wa [Nzambi].” (Efeso 6:11-18) L’atei w’ɛlɔtɔ ɛsɔ mbele ndo “engawo k’akambu w’ololo.” (Efeso 6:14) Nkumekanga Saulo ka l’Isariyɛlɛ w’edjedja kokitanyiya Nzambi ndo akadiɛnɛ lo woho waki nyuma k’ekila komonga nto la nde. (1 Samuele 15:22, 23) Koko, naka sho salaka akambo la losembwe ndo ndɔta ɛlɔtɔ tshɛ wa ta wa lo nyuma, kete tayokondja nyuma k’ekila kaki Nzambi ndo tayokokamɛ dimɛna oma le Satana la andjelo ande wa kɔlɔ, mbuta ate ɛdiɛngɛ.​—Tukedi 18:10.

16. Ngande wakokaso tetemala la kokamɛ oma le welo wa nyuma ya kɔlɔ?

¹⁶ Dia sho tetemala ndjakokɛ oma lo welo wa nyuma ya kɔlɔ, sho pombaka mbadiaka ndo mbekaka Ɔtɛkɛta wa Nzambi mbala la mbala, kamba dimɛna la ekanda watomba lo tshimbo ya ‘olami wa kɔlamelo.’ (Luka 12:42) Ɔnkɔnɛ, tayolodja timba taso l’akambo wa lo nyuma w’amɛna, lo ndjela dako diaki Paulo diata ɔnɛ: “Anyasu, diui diami dia ndjihelu ne nti: Akambu weli mete, akambu weli la kenemo, akambu w’usimbwi, akambu weli pudipudi, akambu weli amena, akambu weli la lukumu l’ololo; naka dikambu di’ololo dieko, naka dikambu dia mandula dieko, nyukan[ake yimba] dia akambu aso.”​—Filipi 4:8.

17. Kakɔna kayotokimanyiya dia sho monga apandjudi wa tomanamana wa lokumu l’ɔlɔlɔ?

¹⁷ Jehowa tokimanyiyaka dia sho monga la “elongoswelo ka lukumu l’ololo la ki l’ekhulu.” (Efeso 6:15) Wɔtwɛlɔ wa lo nsanganya y’Akristo wa mbala la mbala tokimanyiyaka dia sho mbewoya lokumu l’ɔlɔlɔ la Diolelo diaki Nzambi. Ande ɔngɛnɔngɛnɔ wakondjaso lo kimanyiya anto akina dia vɔ mbeya akambo wa mɛtɛ waki Nzambi ndo vɔ monga la lotshungɔ la lo nyuma lee! (Joani 8:32) “Yombo ya nyuma, yako yeli diui dia [Nzambi],” yekɔ ohomba dia sho ndjakokɛ oma lo wetshelo wa kashi ndo “mpandjula wembe wa ta.” (Efeso 6:17; 2 Koreto 10:4, 5) Lo kamba la yewo tshɛ la Ɔtɛkɛta wa Nzambi wakafundama, Bible tokimanyiyaka dia sho mbetsha akambo wa mɛtɛ ndo tokokɛka diaha sho nkɔ lo lokeso la Diabolo.

18. Ngande wakokaso “nshikikala la ntundu ka kesu tshe ya [Diabolo]”?

¹⁸ Paulo akatatɛ la sawo diande di’ɛlɔtɔ aso wa lo nyuma lo mbuta ate: “Nyukikitali le Khumadiondjo, ndu lu wulu wa wulu andi tshe. Nyolote eloto tshe wa ta wa [Nzambi], dia nyu mbeya nshikikala la ntundu ka kesu tshe ya uhimbanyi.” (Efeso 6:10, 11) Tshɛkɛta ya lo Grɛkɛ yokadimɔmi ɔnɛ “nshikikala” mendanaka la ɔsɔlayi wemadi lo dihole diande. Kânga mbele Satana ekɔ lo kamba la dihomɔ efula lo welo wadjande dia ndanya kâmɛ kaso, fukutanya wetshelo aso, kana toshishɛ kɔlamelo yaso otsha le Nzambi, sho memalaka lo dihole diaso lo ta dia lo nyuma dialɔso. Koko, Diabolo hatondoya ndoko yema lo ɛlɔshanyelo ande ndo nde hatondoyaki pondjo!a

Tɔsɛmanele la Diabolo, ko nde ayotolawɔ

19. Naa yoho mɔtshi ya pangakalɛ Diabolo?

¹⁹ Sho kokaka tondoya lo ta diaso dia lo nyuma dialɔshanaso la Diabolo ndo la welo wa nyuma ya kɔlɔ wele lo ɛlɔmbwɛlɔ kande. Sho ndoko la ɔkɔkɔ ɔtɔi wa mboka Satana wɔma, nɛ dia ombeki Jakɔba akafunde ate: “Nyukitanyiaki . . . [Nzambi]. Nyosemaneli l[a Diabolo], ku ndi ayunyulawo.” (Jakoba 4:7) Yoho mɔtshi yakokaso sɛmanɛ la Satana ndo la ditongami dia lo nyuma dia kɔlɔ diakamba kâmɛ la nde ele mbewɔ dia monga la wɔ la losambi l’akambo tshɛ wendana l’ɔtɛmwɛlɔ w’ɛdiɛngɛ kana ditshelo dia maji ndo la anto wasala akambo asɔ. Afundelo mɛnyaka hwe dia ekambi waki Jehowa la dia tona dia mbishola awui woshami kana ndjasha l’awui wa diendja dia tɔɔtɔ, mbuta akambo wahataye ndo lo ɔtɛmwɛlɔ w’ɛdiɛngɛ. Naka sho ndjasha efula l’elimu w’Akristo ndo monga la mbetawɔ ka wolo, kete hatotoka wɔma ɔnɛ onto ɔmɔtshi ayotosenga.​—Walelu 23:23; Euhwelu k’Elembe 18:10-12; Isaya 47:12-15; Etsha 19:18-20.

20. Ngande wakokaso sɛmanɛ la Diabolo?

²⁰ Sho ‘sɛmanɛka la Diabolo’ lo ndjela atɔndɔ ndo akambo wa mɛtɛ wa lo Bible ndo lo shika tanga la wolo la ntondo kande. Andja salaka akambo oko Satana nɛ dia nde mbele jambizambi yawɔ. (2 Koreto 4:4) Ɔnkɔnɛ, sho tonaka nto waonga wa l’andja ɔnɛ wele oko lotamanya, lokaki, awui wa mindo, awui wa ngala ndo mposa ka lomombo. Sho mbeyaka dia Diabolo akalawɔ etena kakashike Yeso ekolo lo kamba l’Afundelo lam’akandohembe l’oswe. (Mateu 4:4, 7, 10, 11) Woho akɔ wâmɛ mbele Satana ‘ayotolawɔ’ naka sho ndjakitshakitsha tshɛ le Jehowa ndo ndjaɛkɛ le Nde lo dɔmbɛlɔ. (Efeso 6:18) La osukɔ waki Jehowa Nzambi ndo wa Ɔnande la ngandji, ndoko onto lakoka tosalɛ kɔlɔ oyadi Diabolo.​—Osambu 91:9-11.

[Nɔte ka l’ɛse ka dikatshi]

Ayoyokadimola?

• Onde sho pombaka mboka Satana Diabolo wɔma?

• Lande na kahɛnyahɛnya Satana Akristo?

• Lande na kalɔmbaso dia shimbamɛ oma le ‘kanga kɔlɔ’?

• Ngande wakokaso mbidja otshumba lo ndɔta ɛlɔtɔ wa ta wa lo nyuma?

[Osato wa lo lɛkɛ 8]

Ambeki wa ntondo waki Kristo waki la dihonga wakatshikala la kɔlamelo polo lo nyɔi

[Osato wa lo lɛkɛ 9]

Diabolo hakoke shimba Jehowa dia nde mbolola wanɛ wele lo yimba yande

[Osato wa lo lɛkɛ 10]

Onde wɛ nɔmbaka dia shimbamɛ oma le ‘kanga kɔlɔ’?

[Osato wa lo lɛkɛ 11]

Onde wɛ ambɔlɔta ‘ɛlɔtɔ tshɛ wa ta wa Nzambi’?