Ekadimwelo lo ambola anyu

◼ Ngande wahomba mbɔtshiyama osambo wa mbɔtwɛlɔ wa lo Kalasa k’olimu wa teokrasi, wa lo Losanganya l’olimu, wa lo Sawo dia lo sɛkɛ ndo wa lo Wekelo wa Tshoto y’Etangelo, ndo oma le onto akɔna?

Numɛlɔ k’osambo tshɛ wa mbɔtwɛlɔ wa lomingu tshɛ la Kalasa k’olimu wa teokrasi kekɔ lo Ekongelo ka Kalasa k’olimu wa teokrasi kele lo dikatshi di’okotsha dia Olimu aso wa Diolelo wa Ngɔndɔ ka dikumi. Osambo wa mbɔtwɛlɔ ndo wa ndjihelo wa Losanganya l’olimu la lomingu tshɛ wekɔ lo lɛkɛ 2 la Olimu aso wa Diolelo. Woho akɔ wâmɛ mbele, numɛlɔ y’esambo wa Wekelo wa Tshoto y’Etangelo wa lomingu la lomingu tanemaka lo lɛkɛ 2 la numɛlɔ tshɛ ka Tshoto y’Etangelo. Esambo wahomba membama wekɔ etenyi kɛmɔtshi ka losanganya kɔtshiyawɔ ndo oma lɔkɔ vɔ pombaka mbɔtshiyama oma le ɔnangɛso lalɔmbɔla etenyi kakɔ ka losanganya koko aha oma le ɔnangɛso lɔlɔmbɔdi etenyi k’oma la mbeta.

Ɛnyɛlɔ, omendji wa Kalasa k’olimu wa teokrasi ayoyayola ampokami, ayɔtshiya osambo wa mbɔtwɛlɔ, ayɔlɔmbɔla kalasa ndo oma lâsɔ ayɔlɔmba ɔtɛkɛtshi wa ntondo wa lo Losanganya l’olimu dia nde mbidɛ lo lɔyɛnga. Ɔnangɛso lalɔmbɔla etenyi ka Losanganya l’olimu mbahomba mbɔtshiya osambo wa mbɔtwɛlɔ wa Losanganya l’olimu.

Woho akɔ wâmɛ mbele, Sawo dia lo sɛkɛ pombaka mbɔtshiyama oma le ɔnɔmbɔdi. Nde ayoyayola anto tshɛ la wangasanu ndo ayowalɔmba dia vɔ memba kâmɛ osambo wa mbɔtwɛlɔ wakasɔnɛ ɔtɛkɛtshi. Ɔnɔmbɔdi (kana ondo ɔnangɛso okina lakoka lakasɔnama la ntondo) ayodihola losanganya la dɔmbɛlɔ. Nde ayɔtshiya ɔtɛkɛtshi ndo ayota ɔtɛ a dui wa sawo dia lo sɛkɛ. L’ɔkɔngɔ wa sawo, lo dihole dia ɔnɔmbɔdi mbuta lo tshena pe kɛnɛ k’oma la mbuta ɔtɛkɛtshi, nde ayota lo tshena pe ɛtɛkɛta wɛnya lowando lo wetshelo woshami. Nde ayewoya ɔtɛ a dui wa sawo dia lo sɛkɛ dia lomingu layaye ndo oma lâsɔ nde ayɔlɔmba anto tshɛ dia vɔ tshikala lo ahole awɔ dia ndjela Wekelo wa Tshoto y’Etangelo. Kema ohomba ɔnɔmbɔdi mumbola ampokami dia kana wayolanga tomɛ ase etshumanelo ka ɔtɛkɛtshi w’ɔngɛndangɛnda mɔyɔ. Oma lâsɔ, ɔnɔmbɔdi wa losanganya ayelɛ ɔnɔmbɔdi wa Wekelo wa Tshoto y’Etangelo lo lɔyɛnga.

Ɔnɔmbɔdi wa Wekelo wa Tshoto y’Etangelo ayɔtshiya osambo wa mbɔtwɛlɔ wele etenyi kɛmɔtshi ka wekelo akɔ. Nde ayɔlɔmbɔla wekelo lo yoho yɔtɔnɛ la alako wendana la dikambo sɔ wambotondjaka ɔhɔmbɔ ndo oma lâsɔ nde ayewoya osambo wa komelo. Ɔnɔmbɔdi wa Wekelo wa Tshoto y’Etangelo ayɔlɔmba ɔnangɛso lakasha sawo dia lo sɛkɛ dia nde komiya la dɔmbɛlɔ.

Ndjela atɔndɔ asɔ ayokimanyiya dia nsanganya yaso ya l’etshumanelo nɔmbwamaka lo yoho yakɔ ɔtɔi.