Anto w’ɛlɔlɔ wayotombolaka Nzambi pondjo pondjo

‘Onto ɔlɔlɔ ayohɔmaka ndo losembwe lande layotshikalaka pondjo pondjo.’​—OSAM. 112:6, 9.

1. a) Naa nshi yayaye ya diambo efula yakongɛ wanɛ wɔsama oma le Nzambi oko anto w’ɔlɔlɔ? b) Dimbola diakɔna dionyiyama?

ANDE nshi yayaye ya diambo efula yakongɛ wanɛ wɔsama oma le Nzambi oko anto w’ɔlɔlɔ lee! Vɔ wayɔngɛnangɛna dia nyomoleka mbeka waonga w’amɛna waki Jehowa. Etema awɔ wayolola la lotombo etena kayowotalekaka mbeka awui wendana l’elimu w’etongelo waki Nzambi. Dui dimɔtshi di’ohomba efula dialɔmbama dia sho ndjɛna nshi yayaye ya diambo efula shɔ ele ‘losembwe,’ dionga diokami epole ɔsɛkɛ lo Osambo 112. Ko ngande wakoka Jehowa Nzambi k’ekila ndo kosembwe mbɔsa anto wa kɔlɔ oko anto w’ɔlɔlɔ? Oyadi welo wa ngande wadjaso dia sala kɛnɛ kele ɔlɔlɔ, sho salaka munga ndo mbala mɔtshi munga ya weke efula.​—Romo 3:23; Jak. 3:2.

2. Naa ahindo ahende wakasale Jehowa oma lo ngandji kande?

² La ngandji tshɛ, Jehowa akalɔngɔsɔla woho w’anto wa kɔlɔ mbɔsama oko anto w’ɔlɔlɔ. Ngande wakandasale dikambo sɔ na? Ntondotondo, nde akasangola lo dihindo lɔsɛnɔ l’Ɔnande lakandokaka ngandji ko lidja lo dikundju dia ɔna womoto ɔmɔtshi l’emuma dia nde ndjotɔ oko onto la kokele. (Luka 1:30-35) Oma lâsɔ, l’ɔkɔngɔ wa Yeso ndjakema oma le atunyi ande, Jehowa akasale dihindo dikina dia woke. Nzambi akolola Yeso oko etongami ka lo nyuma ka lotombo.​—1 Pet. 3:18.

3. Lande na kakangɛnangɛna Nzambi dia mbisha Ɔnande difuto dia lɔsɛnɔ la l’olongo?

³ Jehowa akasha Yeso difuto diaki komonga la nde ntondo ka nde ndja la nkɛtɛ, mbuta ate lɔsɛnɔ lahalanyema l’olongo. (Heb. 7:15-17, 28) Jehowa akangɛnangɛna mbosha difuto sɔ nɛ dia Yeso akatshikala la kɔlamelo l’atei w’ehemba wa wolo. Lo yoho shɔ mbakasha Yeso She okadimwelo woleki dimɛna lo ɛtɛkɛta waki Satana w’ɔnɛ anto kambɛka Nzambi olimu l’ɔtɛ w’ɛkɔkɔ wa lokaki, koko aha l’ɔtɛ wa ngandji kawokawɔ.​—Tuk. 27:11.

4. a) Etena kakakalola Yeso l’olongo, kakɔna kakandasale dikambo diaso, ndo Jehowa akandasale? b) Ngande wayaokayɛ lo kɛnɛ kakasale Jehowa nde la Yeso lo dikambo diayɛ?

⁴ Yeso akasale akambo efula lam’akandakalola l’olongo. Nde ‘akɛnama la ntondo ka Nzambi dikambo diaso’ ele la nɛmɔ dia “dikila diandi ndame.” Shɛso ka ngandji kele l’olongo aketawɔ olambo w’oshinga a wolo waki Yeso oko “ulambu wa ntulambwela dia [pɛkato] yasu.” Oma lɔkɔ, sho kokaka kambɛ ‘Nzambi kasɛna olimu w’ekila’ la ‘nkum’etema ya pudipudi.’ Dui sɔ toshaka ɛkɔkɔ wa mbetawɔ ɛtɛkɛta wa mbɔtwɛlɔ w’Osambu 112, wata ɔnɛ: ‘Nyotombole Yah’!​—Heb. 9:12-14, 24; 1 Joa. 2:2.

5. a) Ahombaso sala dia sho mbɔsamaka oko anto w’ɔlɔlɔ oma le Nzambi? b) Lo toho takɔna tokongɛmi Osambu 111 ndo Osambu 112?

⁵ Dia sho tetemala mbetawɔma le Nzambi, sho pombaka monga la mbetawɔ lo dikila diakatshola Yeso. Sho pombaka mbishaka Jehowa losaka lushi tshɛ lo dikambo dia ngandji k’efula kakandatoke. (Joa. 3:16) Sho pombaka nto tetemala mbekaka Ɔtɛkɛta waki Nzambi ndo sala tshɛ dia nsɛna lo yoho yɔtɔnɛ la losango lele lɔkɔ. Osambu 112 wekɔ l’alako w’amɛna efula le anto tshɛ wakombola monga la nkum’etema ya pudipudi la ntondo ka Nzambi. Osambu ɔnɛ mbɔtɔnɛka la Osambu 111. Esambu akɔ ehende tatɛka l’ɛtɛkɛta wa diambo wata ɔnɛ: ‘Nyotombole Yah’! kana “Aleluya!” Ndo ɛtɛkɛta akɔ ndjelana la ɛnɔngɔ 22 w’ɛtɛkɛta wa lɔlɛnga ndo ɔnɔngɔ tshɛ tatɛta la dɛta ɔtɔi dia l’alɛta 22 wa lo alfabɛtɛ wa lo Hɛbɛru.a

Ɛkɔkɔ wa monga l’ɔngɛnɔngɛnɔ

6. Lo ndjela Osambu 112, ngande watshɔkwama “untu” loka Nzambi wɔma?

⁶ “Untu latukaka [Jehowa] woma atuyalaka la otshoko. Ndi katongenangenaka utamanya l’elembe andi. Tukanula tandi wayuyalaka akanga a wulu la kete. Lolonga l’antu w’ololo wayuyala l’otshoko.” (Osam. 112:1, 2, sho mbɛnganyisha alɛta l’avɛsa wa lo sawo nɛ di’otondo.) Tolembete dia omembi w’esambo ambɔtɛkɛta ntondo dia “untu” ko oma lâsɔ nde ambɔyɔtɛkɛta l’etenyi k’ekomelo ka divɛsa 2 dia “antu w’ololo.” Kɛsɔ mɛnyaka dia Osambu 112 kokaka mendana la olui w’anto kana l’anto efula. Lo sukɛ kanyi shɔ, ɔpɔstɔlɔ Paulo akasambiyama dia nde mɛnya dia Osambu 112:9 mendanaka l’Akristo wa lo ntambe ka ntondo. (Adia 2 Koreto 9:8, 9.) Osambu ɔnɛ mɛnyaka dimɛna woho wakoka ambeki waki Kristo wele la nkɛtɛ ɛlɔ kɛnɛ monga l’ɔngɛnɔngɛnɔ!

7. Lande na kahomba ekambi waki Nzambi mbôka wɔma w’ɔlɔlɔ, ndo ngande wahombayɛ mbɔsa wadjango waki Nzambi?

⁷ Oko wɛnyishamidiɔ lo Osambu 112:1, Akristo wa mɛtɛ asɔ mongaka l’ɔngɛnɔngɛnɔ w’efula etena kakɛndakɛndawɔ ‘lo wɔma wa Jehowa.’ Wɔma w’ɔlɔlɔ ɔsɔ wa tona dia mbônyangiya mbakimanyiyaka dia shika ekolo la ntondo ka yimba y’andja ɔnɛ waki Satana. Vɔ “[w]atongenangenaka utamanya” lo mbekaka Ɔtɛkɛta waki Nzambi ndo lo kitanyiyaka wadjango ande. Kɛsɔ mendanaka ndo la didjango dia sambisha lokumu l’ɔlɔlɔ la Diolelo lo nkɛtɛ k’otondo. Vɔ salaka la wolo dia mbetɛ anto wa lo wedja tshɛ ambeki etena kewolawɔ anto wa kɔlɔ dia oyelo wa lushi l’elombwelo laki Nzambi.​—Ezek. 3:17, 18; Mat. 28:19, 20.

8. a) Ngande wambofutama ekambi waki Nzambi wakayakimɔ le nde ɛlɔ kɛnɛ l’ɔtɛ w’ohetoheto awɔ? b) Ɛtshɔkɔ akɔna wakongɛ wanɛ wele l’elongamelo ka nsɛna lanɛ la nkɛtɛ?

⁸ L’ɔtɛ wakitanyiyawɔ wadjango asɔ, ekambi waki Nzambi wele la nkɛtɛ ɛlɔ kɛnɛ wambolekana miliyɔ esambele. Akoka mbidja tamu dia wodja ande waya “akanga a wulu la kete” na? (Joa. 10:16; Eny. 7:9, 14) Ndo nto, ande ‘ɛtshɔkɔ’ wayowokondja etena kayokotsha Nzambi sangwelo diande lee! Lo tshɛ kawɔ, wanɛ wele l’elongamelo ka nsɛna lanɛ la nkɛtɛ, wayokokamɛ lo ‘fɔnu ka woke’ kayaye dia kenga “kete y’uyuyu” lɛnɛ “ayudjase akambu w’ololo.” L’edjedja ka wonya, ehandɔ wa lo Aramangɛdɔna wayoleka ‘tshɔkwama.’ Vɔ wayonga suke dia nongola miliyɔ y’anto wayolwama. Ande elongamelo ka diambo lee! Oma lâsɔ, wanɛ “[w]atongenangenaka utamanya” lo wadjango waki Nzambi wayokoma kokele ndo wayonga la “ndjadjasela ka lutumbu l’ana a [Nzambi]” pondjo.​—2 Pet. 3:13; Romo 8:21.

Tokambe l’ekundji aso la lomba

9, 10. Ngande wambokamba Akristo wa mɛtɛ la ekundji wa lo nyuma ndo wayotshikala kɔlamelo yawɔ pondjo pondjo?

⁹ “Ongonyi weko lu luudu landi, ku ololo andi atutshikalaka pundju. Lu dikambu di’untu ololo usasi atohetaka l’udjima, le one leli uluwanyi, luludi too la ketshi la ngandji.” (Osam. 112:3, 4) Lo nshi yakafundamaka Bible, ekambi ɛmɔtshi waki Nzambi wakeyamaka oma lo lomombo la l’emunyi laki la wɔ. Ndo lo yoho kina, wanɛ wetawɔma oma le Nzambi komaka akanga w’ɛngɔnyi kânga naka dikambo sɔ hadiosalema lo yoho ya l’emunyi. Lo mɛtɛ, efula ka wanɛ wasɔna dia ndjakitshakitsha la ntondo ka Nzambi mbeyaka monga weola ndo mɔnywama oko wakidiɔ lo nshi ya Yeso. (Luka 4:18; 7:22; Joa. 7:49) Koko oyadi onto ekɔ la diangɔ dia l’emunyi efula kana bu, nde kokaka monga ɔngɔnyi lo nyuma.​—Mat. 6:20; 1 Tim. 6:18, 19; adia Jakoba 2:5.

¹⁰ Akristo w’akitami kâmɛ la wanyawɔ ɛkɔkɔ ekina kahanaka la anto akina ɔngɔnyi awɔ wa lo nyuma. Diakɔ ‘diahɛtawɔ’ lo andja wa wodjima waki Satana oko ‘osase le anto w’ɔlɔlɔ.’ Vɔ mpɛtaka oko osase lo kimanyiya anto akina dia kondja wahɔ oma lo ekundji wa lo nyuma wa lomba ndo ewo kaki Nzambi. Andɔshi wekɔ lo pemba dia memadia olimu w’esambishelo, koko vɔ hawototondoya. Ɔnkɔnɛ, etombelo wambonga l’olimu w’ɔlɔlɔ ɔsɔ ‘wayotshikalaka pondjo.’ Lo tshikala la kɔlamelo l’atei w’ehemba, ekambi waki Nzambi kokaka monga l’eshikikelo ɔnɛ wayɔsɛnaka pondjo pondjo, mbuta ate ‘wayotshikalaka pondjo.’

11, 12. Naa toho tɔmɔtshi takamba ekambi waki Nzambi la diangɔ dia l’emunyi diele la wɔ?

¹¹ Ekambi waki Nzambi, oyadi olui w’akitami kana wanɛ wakenga “ului a wuki,” wakɛnya dia wekɔ la lokaho lo kɛnɛ kendana la diangɔ dia l’emunyi. Osambu 112:9 mbutaka ɔnɛ: “Ndi atukahaka, atushaka ahumbi.” Mbala efula Akristo wa mɛtɛ ɛlɔ kɛnɛ mbishaka wanyawɔ ndo kânga asukanyi awɔ wele lo dihombo weshasha wa l’emunyi. Vɔ kambaka nto la diangɔ diawɔ dia l’emunyi dia sukɛ wanɛ wambohomana la mpokoso. Weshasha ɛsɔ mbishaka ɔngɛnɔngɛnɔ oko wakadite Yeso.​—Adia Etsha 20:35; 2 Koreto 9:7.

¹² Ndo nto, tokanyiya dikambo dia falanga yatomba dia tondja periodikɛ kɛnɛ lo ɛtɛkɛta 172, wele efula ka l’atei awɔ tɛkɛtamaka oma le ase weola. Tokanyiya nto woho ɔnɛ watondjama periodikɛ kɛnɛ, ɛnyɛlɔ oko l’ɔtɛkɛta w’akanga wa mpoke ndo l’ɔtɛkɛta w’akanga wa totshungu.

Nde ekɔ ɔlɔlɔ ndo la losembwe

13. Waa na wakatotshikɛ bɛnyɛlɔ dioleki amɛna lo kɛnɛ kendana la kimanyiya anto l’ɔlɔlɔ tshɛ, ndo ngande wakokaso mbokoya ɛnyɛlɔ kawɔ?

¹³ ‘Onto ɔlɔlɔ atokanaka kɛtshi ndo atɔsɔndjanyaka.’ (Osam. 112:5) Aha la tâmu, wɛ ambɛnaka dia aha nshi tshɛ mbele anto wakimanyiya anto akina anto w’ɔlɔlɔ. Anto amɔtshi kimanyiyaka anto akina dia mbaɛnya ɔnɛ vɔ wekɔ la ekondjelo kâleki. Wɛ hatɔngɛnangɛnaka dia nongola ekimanyielo oma le onto lakɔsa oko ɛngɔ k’anyanya kana lɛna dia wɛ ekɔ lo mbosanya. Lo yoho yotshikitanyi ekɔ dimɛna kimanyiyama oma le onto ɔlɔlɔ. Jehowa mbele ɛnyɛlɔ koleki woke ka Onto lashana diangɔ lele ɔlɔlɔ ndo l’ɔngɛnɔngɛnɔ. (1 Tim. 1:11; Jak. 1:5, 17) Yeso Kristo akakɛnɛmɔla lo yoho ya kokele ɛnyɛlɔ ka She k’onto ɔlɔlɔ. (Mako 1:40-42) Ɔnkɔnɛ, dia sho mbɔsama oko anto w’ɔlɔlɔ oma le Nzambi, sho pombaka kimanyiyanaka la lokaho tshɛ ndo l’ɔlɔlɔ tshɛ, djekoleko etena kashaso wanyaso anto ekimanyielo ka lo nyuma.

14. Naa toho tɔmɔtshi takokaso ‘ntshaka akambo aso la losembwe’?

¹⁴ ‘Nde atotshaka akambo ande la losembwe.’ (Osam. 112:5) Oko wakadiatatami, olui w’okambi wa kɔlamelo ekɔ lo kokɛ wahɔ wa Nkumɛnde lo yoho yɔtɔnɛ la losembwe laki Jehowa. (Adia Luka 12:42-44.) Dui sɔ mɛnamaka oma lo ɛlɔmbwɛlɔ k’oma l’Afundelo kalongola dikumanyi diele mbala mɔtshi pombaka kandola akambo wendana la pɛkato ya weke l’etshumanelo. Yoho yasala olui w’ɔhɔmbɔ akambo la losembwe mɛnamaka nto lo ɛlɔmbwɛlɔ k’oma lo Bible kashawɔ tshumanelo tshɛ, mvudu ya waa misiɔnɛrɛ tshɛ ndo mvudu ya Bɛtɛlɛ lo kɛnɛ kendana l’ɔkɛndɛkɛndɛlɔ ayɔ. Losembwe halɔmbama tsho le dikumanyi koko ndo le Akristo akina lo yoho yasalanɛwɔ akambo ndo yasalɛwɔ anto wele kema ambetawudi akambo ndo l’awui w’okanda.​—Adia Mika 6:8, 11.

Ɛtshɔkɔ wayokondja anto w’ɔlɔlɔ

15, 16. a) Nkumu ya kɔlɔ yalongola anto lo andja ɔnɛ yekɔ la shɛngiya yakɔna le anto w’ɔlɔlɔ? b) Kakɔna kamboyashikikɛ ekambi waki Nzambi dia vɔ tetemala sala?

¹⁵ “Untu ololo hayusutshasutshama, la euhwelu kandi katutshikalaka pundju. Ndi ha[t]uka kumu ya kolo woma. Utema andi ambukikitala, atekamaka le [Jehowa]. Utema andi ambushikikala, ndi hayuka woma, edja ndu lam’ayundena kene kalangandi le atunyi andi.” (Osam. 112:6-8) Nshi nyɛ mbamboleka anto nongola nkumu ya kɔlɔ, ɛnyɛlɔ oko nkumu yendana l’awui w’ata, awui wa terɔrismɛ, hemɔ y’eyoyo ndo hemɔ y’edjedja yakashishɔ ko yambokalola nto, wola ndo nkumu yendana la ɛhɔndɛlɔ ka hiɛlɛlɛ. Wanɛ wɔsama oko anto w’ɔlɔlɔ oma le Nzambi hawokoke pandɔ oma l’etombelo wa nkumu ya kɔlɔ shɔ, koko vɔ hawoke nshi yayaye wɔma. Kele, etema awɔ “[w]ambukikitala” ndo “[w]ambushikikala” nɛ dia wekɔ lo nongamɛ nshi yayaye l’eshikikelo tshɛ weya dia andja w’oyoyo wa losembwe waki Jehowa waya suke. Etena katomba mpokoso kɛmɔtshi, vɔ wekɔ l’akoka wa mbikikɛ mpokoso kakɔ nɛ dia vɔ ndjaɛkɛka le Jehowa dia nde mbasukɛ. Nde hetawɔki pondjo dia anto ande w’ɔlɔlɔ “nsutshasutshama,” mbuta ate nde mbâkimanyiyaka ndo mbashaka wolo wa vɔ mbikikɛ.​—Fil. 4:13.

¹⁶ Ekambi waki Nzambi pombaka nto ndɔshana la lohetsho ndo la emamatanya w’oma le andɔshi awɔ, koko welo wadja andɔshi awɔ dia mbashimba dia sambisha wayotetemala mbɔtɔka l’ashi. Ndo ekambi waki Nzambi wayotetemala tshikala nge aha la sutshasutshama l’olimu wakawalongola oma le Jehowa wa sambisha anto lokumu l’ɔlɔlɔ la Diolelo ndo mbetɛ anto wa lo wedja tshɛ wetawɔ losango lawɔ ambeki. Aha la tâmu, ondo anto w’ɔlɔlɔ wayoleka pɛnyahɛnyama oko wataleke ekomelo sukana. Lohetsho lɔsɔ layokoma lo kondoko yalɔ etena kayɔlɔsha Satana Diabolo lelamɛ ɔnɛ Ngɔngɔ ka la Mangɔngɔ atɛmɔdi waki Nzambi wa lo andja w’otondo. Lo etena kɛsɔ, sho ‘tayendaka atunyi aso’ etena kayowolanyema tshɛ lo tshɛ lo yoho ya sɔnyi. Ɔsɔ ayonga mɛtɛ diɛsɛ dia woke dia mɛna woho wayokidiama lokombo laki Jehowa tshɛ lo tshɛ!​—Ezek. 38:18, 22, 23.

Nde “ayediama la lutumbu”

17. Anto w’ɔlɔlɔ “[w]ayediama la lutumbu” lo yoho yakɔna?

¹⁷ Ande ɔngɛnɔngɛnɔ wayonga la so dia sho tombolaka Jehowa kâmɛ, aha la ndɔshama oma le Diabolo la andja ande nto lee! Wanɛ tshɛ wɔsama oko anto w’ɔlɔlɔ oma le Nzambi wayotombolaka Jehowa l’ɔngɛnɔngɛnɔ pondjo pondjo. Vɔ hawotɔlɛndjama pondjo nɛ dia Jehowa ndakaka nto ɔnɛ “ote” w’onto ɔlɔlɔ “[w]ayediama la lutumbu.” (Osam. 112:9) Anto w’ɔlɔlɔ wayɔngɛnangɛna etena kayowɛna woho wayolanyema atunyi tshɛ wa lowandji laki Jehowa.

18. Ngande wayokotshama ɛtɛkɛta wa ndjihelo wa lo Osambu 112?

¹⁸ “Lam’ayena untu a kolo dikambu ne, ndi ayuka kele. Ndi ayokeketanya anyu, ayushisho. Lulangu l’untu a kolo layushila.” (Osam. 112:10) Wanɛ tshɛ watetemala ndɔsha ekambi waki Nzambi “[w]ayushisho” kem’edja l’ɔtɛ w’ɔkɔmiya ndo wa lohetsho lawɔ. Nsaki kawɔ ka mɛna ekomelo k’olimu aso kayoshila lo ‘fɔnu ka woke’ kayaye.​—Mat. 24:21.

19. Dui diakɔna diakokaso monga l’eshikikelo lɔkɔ?

¹⁹ Onde ndo wɛ mbayonga l’atei w’anto wayohandɔ lo elanyelo ka woke kɛsɔ? Ko naka wɛ ambovɔ l’ɔtɛ wa hemɔ kana wa lotshundu l’osombe la ntondo k’elanyelo k’andja ɔnɛ waki Satana, onde wɛ ayonga l’atei wa “antu w’ololo” wayolwama? (Etsha 24:15) Wɛ kokaka kadimola ɔnɛ eelo, naka wɛ tetemala monga la mbetawɔ l’olambo wa tshungo waki Yeso ndo wɛ mbokoya Jehowa l’ɛnyɛlɔ ka wanɛ wele “untu” ɔlɔlɔ latɛkɛtama lo Osambu 112 ekɔ didjidji diawɔ. (Adia Efeso 5:1, 2.) Jehowa ayosala dia anto asɔ ndo etsha awɔ w’ɔlɔlɔ ‘mbohɔmaka’ pondjo pondjo. Jehowa ayowaohɔka ndo ayowaokaka ngandji pondjo pondjo.​—Osam. 112:3, 6, 9. 

[Nɔte ka l’ɛse ka dikatshi]

Ambola wa kana la wɔ yimba

• Naa ɛkɔkɔ ɛmɔtshi watotshutshuya dia mbutaka “Aleluya”?

• Naa awui amɔtshi wasalema nshi nyɛ wangɛnyangɛnya Akristo wa mɛtɛ?

• Jehowa nangaka anto wele la lokaho la woho akɔna?

[Osato wa lo lɛkɛ 25]

Dia sho tetemala mbetawɔma le Nzambi, sho pombaka monga la mbetawɔ lo dikila diakatshola Yeso

[Esato wa lo lɛkɛ 26]

Weshasha aso wa la lolango kokaka kimanyiya anangɛso wakahomana la mpokoso ndo dia tondja ekanda walembetshiya Bible