Waomi, nyokoya woho wa ngandji kaki la Kristo!

L’OTSHO w’ekomelo wa lɔsɛnɔ lande la lanɛ la nkɛtɛ, Yeso akatɛ apɔstɔlɔ ande wa kɔlamelo ate: “Olembe w’uyuyu mbamumunyusha, dia nyu mbukana ngandji. Nyukani ngandji uku akamanyuki ngandji. Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joa. 13:34, 35) Eelo, Akristo wa mɛtɛ pombaka mbokana ngandji.

Ɔpɔstɔlɔ Paulo akatɛ waomi w’Akristo ɔnɛ: “Nyu waumi, nyulangi wadienyu, uku akalangi Kristu ekelizia, akandayakimo dikambu diato.” (Ef. 5:25) Ngande wakoka omi l’Okristo kamba la dako dia lo Afundelo sɔ lo diwala diande, djekoleko naka wadɛnde ekɔ Ɔmɛnyi wa Jehowa?

Kristo akalange etshumanelo

Bible mbutaka ɔnɛ: “Dieli la waumi mbuka wadiewo ngandji uku wukawo alimba awo. Untu luka wadendi ngandji, ambuyauka ndame. Nduku untu lahetsha dimba diandi, keli ndi atudileshaka, atudilamaka, uku Kristu la ekelizia.” (Ef. 5:28, 29) Yeso akokaka ambeki ande ngandji. Kânga mbakiwɔ anto wele kema kokele, nde akâsalɛka akambo l’ɔlɔlɔ ndo la lɔsɛngɔ. Oko wakandakombolaka ‘ndjaɛnya le etshumanelo lo lotombo latɔ,’ nde akaleke mbidja yimba lo waonga w’ɛlɔlɔ w’ambeki ande.​—Ef. 5:27.

Oko wakɛnya Kristo ngandji le etshumanelo, mbahomba omi mɛnya wadɛnde ngandji kawokande lo ɛtɛkɛta ndo lo etsha. Wadi lalangema oma le omɛnde ndjaokaka dimɛna ndo mongaka la ɔngɛnɔngɛnɔ. Lo wedi okina, womoto, kânga lele la diangɔ efula kokaka shisha ɔngɛnɔngɛnɔ naka omɛnde mbɔnyɔlaka ndo hawodje yimba.

Ngande wakoka omi mɛnya dia nde nangaka wadɛnde? La ntondo ka anto akina, nde kambaka la ɛtɛkɛta w’amɛna lo dikambo diande ndo mbândolaka lo woho wosukɛnde. Naka wadɛnde akakimanyiya dia dui dimɔtshi di’ɔlɔlɔ salema lo nkumbo, nde hahombe mengenga dia mbutɛ anto akina. Nde pombaka mbɛnya ngandji kawokande etena kewɔ vɔ ahende ato. Mbokimɛ lo lonya, mbɔmɔnɛmɔnɛ, mbokumbatɛ ndo mbândola mbeyaka mɛnama oko towuiwui ta totshitshɛ, koko awui asɔ wekɔ ohomba efula le womoto.

“Ndi huki sonyi dia mbaeta ati: [analengo]”

Yeso Kristo “huki sonyi dia [mbelɛ ambeki ande w’akitami] ati: [analengo].” (Heb. 2:11, 12, 17) Naka wɛ ekɔ omi l’Okristo, kete ohɔka dia wadɛyɛ ekɔ nto kadiyɛ ka lo nyuma. Woho wakandayakimɔ le Jehowa ekɔ dui di’ohomba efula ndeka dɔkɔlɔkɔ dia diwala, oyadi nde akabatizama la ntondo kana l’ɔkɔngɔ wa nyu tshukana. Etena kalɔmbande wadɛyɛ dia nde mbisha kɔmatɛrɛ, ɔnangɛso lalɔmbɔla losanganya mbelɛka wadɛyɛ ɔnɛ: “Kadiyɛso.” Nde ekɔ nto kadiyɛ aha tsho lo Mbalasa ka Diolelo koko ndo la ngelo. Ekɔ ohomba mbosalɛ akambo la lɔsɛngɔ ndo la loshilambo la ngelo woho wosalɛyɛ lo Mbalasa ka Diolelo.

Naka wɛ ekɔ la waɛsɛ l’etshumanelo, kete tena dimɔtshi wɛ mbeyaka monga l’okakatanu dia monga la wɛdimo lam’asa ɛkɛndɛ wa l’etshumanelo la wa lo nkumbo. Okambelo wa dimɛna lam’asa dikumanyi la ekambi wakimanyiya ndo naka dikumanyi mbishaka anto akina elimu ɛmɔtshi, dui sɔ mbeyaka mbâkimanyiya dia vɔ ndeka monga la etena ka monga kâmɛ la akadiyɛwɔ woleki monga l’ohomba awɔ, mbuta ate wadɛwɔ. Tohɛke dia anangɛso akina kokaka kotsha ɛkɛndɛ wele la yɛ l’etshumanelo, koko paka wɛmɛ oto mbakadje kɔhi ya diwala wɛ la wadɛyɛ.

Ndo nto, wɛ mbele ɔtɛ wa wadɛyɛ. Bible mbutaka ɔnɛ: “Ote a pami tshe eli Kristu, la ote a wumuntu eli pami.” (1 Kor. 11:3) Ngande wahombayɛ kamba la lowandji layɛ? La ngandji tshɛ, koko aha lo kalolɛka mbala la mbala divɛsa dia la diko nɛ ndo lo tɛtɛka dia nde kɔlɛmiya. Kɛnɛ kahombama dia kamba la lowandji layɛ lo yoho ya dimɛna ele mbokoya Yeso Kristo lo yoho yasalɛyɛ wadɛyɛ akambo.​—1 Pet. 2:21.

“Engenyi ami mbenyu”

Yeso akelɛ ambeki ande ate angɛnyi ami. Nde akawatɛ ate: “Dimi hanyeti ntu nti: Ekambi, ne dia ukambi heyi katsha uwandji andi. Keli dimi lambunyeta nti: Engenyi, ne dia lambunyewuya akambu tshe wakamuki le Papa.” (Joa. 15:14, 15) Yeso akasawolaka dimɛna nde la ambeki ande. Vɔ wakasalaka akambo kâmɛ. “Jesu la ambeki andi” wakelamɛ lo fɛtɛ kɛmɔtshi ka diwala la Kana. (Joa. 2:2, sho mbɛnganyisha alɛta ango.) Vɔ waki la ahole amɔtshi wakawangɛnangɛnaka ntshɔ lɛkɔ, ɛnyɛlɔ l’ekambɔ ka Ngɛtɛsɛmanɛ. Bible mbutaka dia “Jesu akatshokaka leko tena efula la ambeki andi.”​—Joa. 18:2.

Lo mɛtɛ, wadi nangaka ndjaoka dia nde ekɔ ɔngɛnyi wa ma ma w’omɛnde. Ekɔ mɛtɛ ohomba efula dia waa wadi la waomi mongaka la tena dia ndjangɛnyangɛnyaka kâmɛ! Nyokambɛke Nzambi kâmɛ. Nyekake Bible kâmɛ. Nyetshake wenya kâmɛ. Nyosembolake ekolo kâmɛ, nyosawolake ndo nyɔlɛke kâmɛ. Tanyongake tsho atshukanyi, koko nyonge ndo angɛnyi w’eshika.

Nde ‘akâlange polo l’ekomelo’

Yeso ‘akalange ambeki ande polo l’ekomelo.’ (Joa. 13:1) Waomi amɔtshi hawokoya Yeso Kristo lo dikambo sɔ. Vɔ mbeyaka kalɛ ‘wadi la lo nshi yawɔ y’ɔlɔngɔlɔngɔ,’ ondo dia tshuka ɔnɛ leke dikɛnda.​—Mal. 2:14, 15.

Akina, ɛnyɛlɔ oko ɔnangɛso Willi wekɔ lo mbokoya Kristo. L’ɔtɛ wa hemɔ ka wolo kaki la nde, wadi aki Willi aki l’ohomba w’ekokelo l’edja k’ɛnɔnyi efula. Ngande wakayaoke Willi lo dikambo sɔ? Nde akate ate: “Nshi tshɛ dimi mbɔsaka wadɛmi oko woshasha w’oma le Nzambi ndo dimi mbɔngɛnangɛnaka. Ambeta ɛnɔnyi 60 wakamatshike dɔkɔlɔkɔ dia mbokokɛka oyadi lo tena di’ɔlɔlɔ kana dia kɔlɔ. Hambohɛki dɔkɔlɔkɔ sɔ pondjo.”

Waomi w’Akristo le, nyokoya woho wa ngandji kaki la Kristo. Nyoke wadɛnyu woka Nzambi wɔma ngandji, vɔ wekɔ akadiyɛnyu ndo angɛnyi anyu w’eshika.

[Osato wa lo lɛkɛ 20]

Onde wadɛyɛ mbele ɔngɛnyi ayɛ w’oshika?

[Osato wa lo lɛkɛ 20]

‘Tetemala nanga wadɛyɛ’