Tokimɔke l’otema ɔtɔi ndo l’ɔngɛnɔngɛnɔ
LO KƐNƐ kendana la weshasha, ɔpɔstɔlɔ Paulo akafunde ate: “Untu l’untu akimo uku akandati l’utema andi” ndo nde akakotsha ate: “Aha la lunyangu, aha la khudu, ne dia [Nzambi] nangaka untu latukimoka l’ongenongeno.” (2 Kor. 9:7) Jehowa hatshutshuya ndoko onto la wolo dia nsukɛ ɔtɛmwɛlɔ wa mɛtɛ. Nde tshikaka dia ekambi ande mɛnya omamemelo awɔ le nde lo nkimɔ weshasha l’ɔngɛnɔngɛnɔ. Oma ko nshi y’edjedja, ekambi ande wokokimɔka weshasha l’ɔngɛnɔngɛnɔ. Tɔsɛdingole bɛnyɛlɔ sato.
L’ɔkɔngɔ wa nde ntondja ase Isariyɛlɛ oma l’Edjibito, Jehowa akalɔmbɛ dia vɔ mbika tabɛrnakɛlɛ. Lam’ele waki l’ohomba wa diangɔ dia mbika tabɛrnakɛlɛ, wakalɔmbɛ ana w’ase Isariyɛlɛ dia vɔ nkimɔ weshasha. Ko vɔ wakakimɔ paonyi, fɛsa ndo diangɔ dikina dia nɛmɔ “untu l’untu uku akûsukuya utema andi.” Anto wakakimɔ diangɔ efula polo ndo lo diewoyelo ndjoshama ɔnɛ ambokoka.—Etum. 35:5, 21; 36:6, 7.
Etena kakawayohomba mbika tɛmpɛlɔ ɛnɔnyi nkama l’ɔkɔngɔ, ekambi waki Nzambi wakakondja diaaso nto dia mɛnya woho wasukɛwɔ ɔtɛmwɛlɔ wa mɛtɛ. Nkumekanga Davidi akakimɔ diangɔ efula dia nsukɛ olimu ɔsɔ ndo akalɔmbɛ anto akina dia vɔ mbisha lonya. Vɔ wakasale dikambo sɔ l’otema ɔtɔi. Weshasha wa paonyi la wa fɛsa eto wakandakimɔ waki la nɛmɔ diolekanyi miliyara 100 ya dɔlara! Wodja wakangɛnangɛna lo woho wakawasha Jehowa weshasha awɔ la lolango.—1 Ek. 29:3-9; 2 Ek. 5:1.
Ambeki waki Yeso wa lo ntambe ka ntondo vɔ lawɔ wakakɛnɛmɔla yimba ya lokaho la l’ɔngɛnɔngɛnɔ ya ngasɔ. Lo lushi la Pɛntɛkɔsta ka lo 33 T.D., anto oko 3 000 wakabatizama ndo efula l’atei awɔ kombidjasɛka la Jerusalɛma. Dia nkimanyiya wanɛ waki komonga l’ekondjelo k’efula dia vɔ ntshikala l’osomba ɔsɔ dia vɔ nkondja diaaso dia mbeya akambo wendana la mbetawɔ kawɔ k’oyoyo, Akristo wakakɔngɔla akuta dia mbakimanyiya. Anangɛso wakasondja diangɔ diaki la wɔ ndo wakasha apɔstɔlɔ akuta dia vɔ nkimanyiya wanɛ waki lo dihombo. Jehowa mɛtɛ akangɛnangɛna efula lo mɛna woho wakawakɛnɛmɔla mbetawɔ ndo ngandji kawɔ!—Etsha 2:41-47.
Ɛlɔ kɛnɛ, Akristo wekɔ lo ntetemala nsukɛ ɔtɛmwɛlɔ wa pudipudi lo kimɔka la lolango ndo l’ɔngɛnɔngɛnɔ tshɛ wenya awɔ, wolo awɔ ndo diangɔ diawɔ dikina. Kiombo yayela mɛnyaka toho tɔmɔtshi takokayɛ nsala dikambo sɔ.
[Kiombo ya lo lɛkɛ 18, 19]
TOHO TAKIMƆ ANTO AMƆTSHI WESHASHA
DIA SUKƐ OLIMU WA L’ANDJA W’OTONDO
Anto efula mombaka yema ya dikuta dia todja lo tɔshɛtɛshɛtɛ tofundami ɔnɛ: “Olimu wakambema l’andja w’otondo.”
Ngɔndɔ tshɛ tshumanelo ntomɛka Bɛtɛlɛ k’Ɛmɛnyi wa Jehowa ka lo wodja awɔ falanga shɔ. Falanga shɔ pombaka tomama mbala kakɔ ɔtɔi lo lokombo la Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483. Onto lalanga nkimɔ falanga koka nto ndjitoma lo Bɛtɛlɛ ka lo wodja awɔ. (Onto kokaka ntoma nto weshasha wa la lolango wɛnyami lanɛ l’ɛse lo Bɛtɛlɛ k’Ɛmɛnyi wa Jehowa kalɔmbɔla olimu lo wodja awɔ.) Tɔshɛkɛ ta falanga kokaka tomama lo adrɛsɛ wa la diko ongo ndo mfunda lokombo “Watchtower.” Onto kokaka nkimɔ dɛngalɛnga kana diangɔ dikina di’oshinga wolo oko woshasha. Onto lakimɔ diangɔ sɔ pombaka mfunda yema ya mukanda yɛnya dia ekɔ woshasha.
YƐDIKƆ YENDANA LA ƆSƆNDJƐLƆ WA FALANGA
Onto koka nsɔndja Watch Tower Bible and Tract Society of Pennsylvania falanga dia nsukɛ olimu wa l’andja w’otondo. Koko naka nde oyiyanga, kete wayowokaloyayɔ. Dia mbeya awui efula lo dikambo sɔ, fundɛ Biro waki Omombi wa falanga ndo toma mukanda akɔ lo adrɛsɛ wa la diko ongo kana telefɔnɛ lo numɛlɔ kɛnɛ (718) 560-7500.
WEHO EKINA WAKIMƆMA WESHASHA DIA NSUKƐ ƆTƐMWƐLƆ
Lâdiko dia nkimɔ falanga, ekɔ nto toho tokina takimɔma weshasha dia nsukɛ olimu w’esambishelo ka Diolelo wasalema l’andja w’otondo. L’atei wa toho takɔ mbele ndo:
Asiransɛ wa lɔsɛnɔ: Onto mbeyaka mbuta dia Watch Tower Bible and Tract Society of Pennsylvania mbɔsaka falanga yande ya pasiɔ kana yahomba lɛɛta mbofutaka.
Kɔntɛ ya lo bankɛ: Onto mbeyaka mbuta dia l’ɔkɔngɔ wa nyɔi kande ko vɔ mbisha Watch Tower Bible and Tract Society of Pennsylvania falanga yande yele lo bankɛ lo ndjela kɛnɛ kalɔmba bankɛ kawɔ.
Diangɔ diakatômbe kana falanga yokolami lɛɛta: Onto mbeyaka mbisha Watch Tower Bible and Tract Society of Pennsylvania lotshungɔ la nkamba la diangɔ diakandômbe kana falanga yande yokolami lɛɛta kana nde mbisha Watch Tower Bible and Tract Society of Pennsylvania lotshungɔ la ndjɔsa diangɔ diande l’ɔkɔngɔ wa nyɔi kande.
Lokombo kana luudu: Onto koka mbisha Watch Tower Bible and Tract Society of Pennsylvania lokombo kana luudu lande ndo naka lɔkɔ mbodjashinde kete nde mbeyaka mbuta dia Watch Tower Bible and Tract Society of Pennsylvania ndjoliɔsa l’ɔkɔngɔ wa nyɔi kande ndo tosinya mikanda laka lɛɛta dia lolango lande nɛmiyama.
Tɛstama: Onto koka sala tɛstama ketawɔma le lɛɛta dia mbisha Watch Tower Bible and Tract Society of Pennsylvania lotshungɔ la ndjɔsa diangɔ kana falanga yande l’ɔkɔngɔ wa nyɔi kande.
Dia kimɔ weho wa weshasha ɛsɔ nɔmbamaka dia onto lakimɔ takanyiyisha dimɛna la ntondo.
Dia mbeya awui akina lo kɛnɛ kendana la kimɔ weho wa weshasha ɛsɔ, fundɛ Ɛmɛnyi wa Jehowa lo adrɛsɛ wele l’ɛse kana elɛ Bɛtɛlɛ ka lo wodja anyu lo telefɔnɛ.
Watch Tower Bible and Tract Society of Pennsylvania
100 Watchtower Drive
Patterson, New York 12563-9204
Telefɔnɛ: (845) 306-0707