‘Nyɛsɔ tokimɔke olambo wa Jehowa’

ETENA kakosalɛ onto ɔmɔtshi dikambo di’ɔlɔlɔ, ngande wɛnyayɛ lowando layɛ? Tɔsɛdingole woho wakɛnya ewandji w’alembe wa lo Isariyɛlɛ lowando lawɔ l’ɔkɔngɔ wa vɔ ndɔsha ase Midiyana. Ta diakalɔma l’ɔkɔngɔ wa ase Isariyɛlɛ nsala pɛkato kendana la ntɛmɔla Baala-Pɛɔrɛ. Nzambi akakimanyiya wodja ande dia vɔ nɛndja ndo diangɔ dia dimbo diakakahanyema le alembe 12 000 ndo le ase Isariyɛlɛ akina. Lo yoho yɔtɔnɛ la ɛlɔmbwɛlɔ kaki Jehowa, alembe wakakimɔ tenyi dimɔtshi dia diangɔ dia dimbo le ɛlɔmbɛdi ndo ase Isariyɛlɛ akina wakakimɔ yɛdikɔ yakɔ yâmɛ le ase Lɛwi.—Wal. 31:1-5, 25-30.

Koko, ewandji w’alembe konanga komɛ lâsɔ ato. Vɔ wakatɛ Mɔsɛ vate: “Shu ekambi aye takali efula k’andoshi wa ta wakatshu la su lu ta, ku nduku otoi akashisho.” Vɔ wakɔshi yɛdikɔ ya nkimɔ paonyi la dɛngalɛnga efula oko olambo wa Jehowa. Yɛdikɔ ya paonyi la dɛngalɛnga sɔ diakalekana kilɔ 190.—Wal. 31:49-54.

Ndo ɛlɔ kɛnɛ, anto efula tshutshuyamaka dia mɛnya lowando lawɔ lo kɛnɛ kasalɛ Jehowa. Ndo nto, aha ekambi waki Nzambi wakayakimɔ le nde eto mbele la lowando le nde. Tɔsɛdingole ɛnyɛlɔ ka shufɛlɛ mɔtshi ya mutuka yakɛmbɛ anto dia ntshɔ la nkalola oma lo losanganya la wedja efula lakasalema lo sɛkɛ dimɔtshi dia tɔkɛnyɔ dia la Bologne lo wodja wa Italie lo 2009. Lam’ele nde aki shufɛlɛ ya ki ndo yaki la diewo, wanɛ wakandɛmbɛ lo mutuka wakɔshi yɛdikɔ ya mbofundɛ mukanda wa eokelo ka losaka ndo mbokotshɛ yema ya dikuta kâmɛ la dibuku Bible etshatɔ mɛtɛ? Lam’akawawosha, shufɛlɛ shɔ akate ate: “Lambolongola mukanda la dibuku nɛ l’ɔngɛnɔngɛnɔ, koko lambokaloya falanga nɛ dia dimi nangaka nsukɛ otondjelo w’ekanda dia nyu ntetemala nkamba olimu wakambanyu. Kânga mbêmi kema Ɔmɛnyi wa Jehowa, dimi nangaka nkimɔ woshasha ɔnɛ nɛ dia lambɛna dia ngandji mbanyotshutshuya dia nkamba olimu ɔnɛ.”

Yoho mɔtshi ya mɛnya lowando lele la yɛ lo kɛnɛ kakosalɛ Jehowa ele lo nkimɔ weshasha dia nsukɛ olimu w’Ɛmɛnyi wa Jehowa wakambema l’andja w’otondo. (Mat. 24:14) Toho tasɔna anto amɔtshi dia nkimɔ weshasha shilama lo kiombo yele lanɛ l’ɛse.

[Kiombo ya lo lɛkɛ 20, 21]

TOHO TAKIMƆ ANTO AMƆTSHI WESHASHA

DIA NSUKƐ OLIMU WA L’ANDJA W’OTONDO

Anto efula mombaka yema ya dikuta dia todja lo tɔshɛtɛshɛtɛ tofundami ɔnɛ: “Olimu wa l’andja w’otondo.”

Ngɔndɔ tshɛ, tshumanelo tomɛka Bɛtɛlɛ k’Ɛmɛnyi wa Jehowa ka lo wodja awɔ falanga shɔ. Weshasha wa la lolango wendana la falanga kokaka tomama mbala kakɔ ɔtɔi lo lokombo la Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483 kana tomɛ Bɛtɛlɛ k’Ɛmɛnyi wa Jehowa kalɔmbɔla olimu lo wodja anyu. (Onto lalanga nkimɔ falanga koka nto ndjitoma lo Bɛtɛlɛ ka lo wodja wende.) Shɛkɛ kokaka tomama lo adrɛsɛ wa la diko ongo ndo mfunda lokombo “Watchtower.” Onto koka nkimɔ dɛngalɛnga kana diangɔ dikina di’oshinga wolo oko woshasha. Onto lakimɔ diangɔ sɔ pombaka mfunda yema ya mukanda yɛnya dia ekɔ woshasha.

YƐDIKƆ YENDANA LA ƆSƆNDJƐLƆ WA FALANGA

Onto koka nsɔndja Watch Tower Bible and Tract Society of Pennsylvania falanga dia nsukɛ olimu wa l’andja w’otondo. Koko naka nde oyiyanga, kete wayowokaloyayɔ. Dia mbeya awui efula lo dikambo sɔ, fundɛ Biro waki Omombi wa falanga ndo toma mukanda akɔ lo adrɛsɛ wa la diko ongo kana telefɔnɛ lo numɛlɔ kɛnɛ (718) 560-7500.

WEHO EKINA WAKIMƆMA WESHASHA DIA NSUKƐ ƆTƐMWƐLƆ

Lâdiko dia nkimɔ falanga, ekɔ nto toho tokina takimɔma weshasha dia nsukɛ olimu w’esambishelo ka Diolelo wasalema l’andja w’otondo. L’atei wa toho takɔ mbele ndo:

Asiransɛ wa lɔsɛnɔ: Onto mbeyaka mbuta dia Watch Tower Bible and Tract Society of Pennsylvania mbɔsaka falanga yande ya pasiɔ kana yahomba lɛɛta mbofutaka.

Kɔntɛ ya lo bankɛ: Onto mbeyaka mbuta dia l’ɔkɔngɔ wa nyɔi kande ko vɔ mbisha Watch Tower Bible and Tract Society of Pennsylvania falanga yande yele lo bankɛ lo ndjela kɛnɛ kalɔmba bankɛ kawɔ.

Diangɔ diakatômbe kana falanga yokolami lɛɛta: Onto mbeyaka mbisha Watch Tower Bible and Tract Society of Pennsylvania lotshungɔ la nkamba la diangɔ diakandômbe kana falanga yande yokolami lɛɛta.

Lokombo kana luudu: Onto koka mbisha Watch Tower Bible and Tract Society of Pennsylvania lokombo kana luudu lande ndo naka lɔkɔ mbodjashinde, kete nde mbeyaka mbuta dia Watch Tower Bible and Tract Society of Pennsylvania ndjoliɔsa l’ɔkɔngɔ wa nyɔi kande ndo tosinya mikanda laka lɛɛta dia lolango lande nɛmiyama.

Tɛstama: Onto koka nsala tɛstama ketawɔma le lɛɛta dia mbisha Watch Tower Bible and Tract Society of Pennsylvania lotshungɔ la ndjɔsa diangɔ kana falanga yande l’ɔkɔngɔ wa nyɔi kande.

Dia nkimɔ weho wa weshasha ɛsɔ nɔmbamaka dia onto lakimɔ takanyi yimba dimɛna dimɛna la ntondo.

Dia mbeya awui akina lo kɛnɛ kendana la nkimɔ weho wa weshasha ɛsɔ, fundɛ Ɛmɛnyi wa Jehowa lo adrɛsɛ wele l’ɛse kana elɛ Bɛtɛlɛ ka lo wodja anyu lo telefɔnɛ.

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefɔnɛ: (845) 306-0707