Tonge la ngandji kahahekɔ pondjo
‘Ngandji mbikikɛka akambo tshɛ. Ngandji hahekɔ pondjo.’—1 KOR. 13:7, 8.
1. a) Ngande watɛkɛta anto mbala efula lo dikambo dia ngandji? b) Otsha le waa na ndo lo akambo akɔna waleka anto mɛnya ngandji kawɔ?
AWUI efula wambofundama lo kɛnɛ kendana la ngandji. Anto wambotondja nkembo dia ntɛtɛmɔla ndo ntombola dionga sɔ lo yoho ya tshambandeko. Ngandji ekɔ ɛngɔ kɛmɔtshi koleki ohomba le anto tshɛ. Koko, mbala efula abuku ndo waa filmɛ kiɛnyaka lo ɛkɔndɔ wa ngandji wa lɔfɔnya ndo abuku la filmɛ yakɔ yambololanɛ lo ahole wasondjawɔ diangɔ. Lonyangu ko, anto waya bu la ngandji ka mɛtɛ otsha le wanyawɔ ndo otsha le Nzambi. Kɛnɛ kakatama lo Bible lo dikambo dia nshi y’ekomelo kekɔ lo nkotshama. Anto “wayuyalanga, wayulanga ukundji, [wayoyala] anangi wa engenongeno, wuleki wa [Nzambi].”—2 Tim. 3:1-5.
2. Ɔhɛmwɛlɔ akɔna watosha Bible lo dikambo dia ngandji ka kɔlɔ?
2 Anto wekɔ la dikoka dia mɛnya ngandji kawɔ, koko Ɔtɛkɛta waki Nzambi tɔhɛmɔlaka lo kɛnɛ kendana la yoho ya ngandji ka kɔlɔ. Ndo Bible mɛnyaka kɛnɛ katomba naka onto ambonɛ woho wa ngandji kɛsɔ l’otema ande. (1 Tim. 6:9, 10) Onde wɛ mbohɔka kɛnɛ kakafunde ɔpɔstɔlɔ Paulo lo dikambo dia Dɛmasi? Kânga mbakinde ɔngɛnyi waki Paulo, Dɛmasi akayokoma lo nanga akambo wa l’andja ɔnɛ. (2 Tim. 4:10) Ɔpɔstɔlɔ Joani akahɛmɔla Akristo lo kɛnɛ kendana la wâle ɔsɔ. (Adia 1 Joani 2:15, 16.) Nanga andja ɔnɛ ndo diangɔ dia lɔkɔ diahemala la mbeta ndo mboka yadiɔ hɔtɔnɛ la ngandji kaki Nzambi koye oma le nde.
3. Okakatanu akɔna wele la so, ndo dui sɔ tondjaka ambola akɔna?
3 Kânga mbeso kema wa l’andja ɔnɛ, tâkasɛnɛ lɔkɔ. Ɔnkɔnɛ, tekɔ la okakatanu dia mbewɔ kanyi ya kɔlɔ yele l’anto lo dikambo dia ngandji. Ekɔ ohomba diaha sho monga la yoho ya ngandji ka kɔlɔ kɛsɔ. Lâsɔ, sho pombaka monga la ngandji kohikami lo atɔndɔ wa lo Bible otsha le anto akɔna? Akambo akɔna watokimanyiya dia sho monga la ngandji kakikɛ akambo tshɛ ndo kahahekɔ pondjo? Ngande wakoka lɔkɛwɔ lɔsɔ tokondjiyɛ wahɔ oma ko kakianɛ ndo monga la shɛngiya lo nshi yaso yayaye? Tekɔ l’ohomba wa nkondja ekadimwelo wɔtɔnɛ la kanyi yaki Nzambi dia sho mbeya nɔmbwama dimɛna.
Tohamia ngandji kokaso Jehowa
4. Ngande wayotohamia ngandji kokaso Nzambi?
4 Mpamia, kokaka nembetshiya nɔngɔsɔla kana nkeketsha ohamelo w’ɛngɔ kɛmɔtshi. Tɔshi ɛnyɛlɔ k’okambi wa dikambɔ wasala la wolo dia nɔngɔsɔla nkɛtɛ ndo dia monɛ ntɔngɔ lɔkɔ. Nde nongamɛka dia ntɔngɔ shɔ ntomba ndo mbola. (Heb. 6:7) Woho akɔ wâmɛ mbele, ngandji kokaso Nzambi pombaka mpama. Kakɔna kalɔmbama dia ngandji kɛsɔ mpama? Sho pombaka nɔngɔsɔla nkɛtɛ y’ɔlɔlɔ y’otema aso lɛnɛ akonɛma lɔtɔngɔ l’akambo wa mɛtɛ wa Diolelo. Sho kokaka nsala dui sɔ lo mbekaka Ɔtɛkɛta waki Nzambi l’etete dia mfudia ewo kaso kendana la nde. (Kol. 1:10) Mbɔtɔka ndo mbishaka kɔmatɛrɛ lo nsanganya ya l’etshumanelo mbala la mbala ayotokimanyiya dia sho mfudia ewo kaso. Onde tekɔ lo ntetemala mbidja welo l’onto ndo l’onto dia monga la ewo k’efula?—Tuk. 2:1-7.
5. a) Wetshelo akɔna wakokaso nkondja lo kɛnɛ kendana la waonga waki Jehowa woleki weke? b) Akokaso mbuta lo kɛnɛ kendana la losembwe, lomba ndo nkudu kaki Nzambi?
5 Jehowa tosholɛka lonto lande lo tshimbo y’Ɔtɛkɛta ande. Naka tayekaka Afundelo ndo tayoyakondjaka ewo kaki Jehowa yema yema, kete tayoleka mana waonga ande fundo, mbuta ate losembwe, nkudu, lomba, ndo lâdiko di’akambo asɔ tshɛ, ngandji kande koleki tshɛ. Jehowa mɛnyaka losembwe lande lo akambo ande tshɛ ndo lo ɛlɛmbɛ ande wa kokele. (Euh. 32:4; Osam. 19:7) Naka sho nkana yimba lo elimu tshɛ w’etongelo waki Jehowa, kete tayamba dia lomba loleki tshɛ lele la nde. (Osam. 104:24) Andja ɔnɛ mɛnyaka nto dia Jehowa mbele Kiɔkɔ ya wolo wahashilaki pondjo.—Is. 40:26.
6. Ngande wakatoke Nzambi ngandji, ndo shɛngiya yakɔna yele la dui sɔ le so?
6 Kakɔna kakokaso mbuta lo kɛnɛ kendana la dionga diaki Nzambi diaheme tshɛ, mbuta ate ngandji? Dionga sɔ diekɔ la shɛngiya le so sho tshɛ. Nde akɛnya ngandji kɛsɔ lo nkimɔ tshungo dia ntshungola anto tshɛ. (Adia Romo 5:8.) Tshungo kɛsɔ kekɔ dikambo di’anto wa l’andja w’otondo, koko paka wanɛ wele la lowando lo ngandji kaki Nzambi ndo wele la mbetawɔ le Ɔnande mbayokondja wahɔ oma lɔkɔ. (Joa. 3:16, 36) Woho waketawɔ Nzambi dia Yeso mvɔ nyɔi k’olambo dikambo dia pɛkato yaso pombaka totshutshuya dia sho lawɔ mbôka ngandji.
7, 8. a) Kakɔna kalɔmbama dia sho mɛnya ngandji kokaso Nzambi? b) La ntondo k’akambo akɔna wakitanyiya ekambi waki Nzambi wadjango ande?
7 Ngande wakokaso mɛnya ngandji kokaso Nzambi lo menda kɛnɛ tshɛ kambondotosalɛ? Ɔtɛkɛta wakasambiyama waki Nzambi kadimolaka l’ɔlɔlɔ tshɛ ɔnɛ: “Ngandji ka [Nzambi] kene, dia shu nama elembe andi: ku elembe andi hawuleki wutshu.” (1 Joa. 5:3) Eelo, ngandji kokaso Jehowa Nzambi totshutshuyaka dia sho nkitanyiya wadjango ande. Ɔsɔ ekɔ ɔkɔkɔ ɔmɔtshi watotshutshuya dia nsambisha awui wele la wahɔ le anto akina wendana la Diolelo ndo la lokombo lande. Nsala ngasɔ oma lo efula k’awui wele l’etema aso mɛnyaka dia sho kitanyiyaka wadjango waki Nzambi l’eyango w’amɛna.—Mat. 12:34.
8 Anangɛso l’akadiyɛso wa l’andja w’otondo weko lo ntetemala nkitanyiya wadjango waki Nzambi, kânga mbahomanawɔ l’anto wele la wendjudi ndo watona losango la Diolelo. Vɔ hawohekɔ dia nkotsha olimu awɔ tshɛ lo tshɛ. (2 Tim. 4:5) Woho akɔ wâmɛ mbele, sho keketshamaka dia mbewoya anto akina ewo ka Nzambi ndo nkitanyiya wadjango ande.
Ɛkɔkɔ wokaso Nkumɛso Yeso Kristo ngandji
9. Ekakatanu akɔna wakakikɛ Yeso, ndo kakɔna kakotshutshuya dia mbakikɛ?
9 Lâdiko dia mboka Nzambi ngandji, tekɔ l’ɛkɔkɔ efula watotshutshuya dia mboka ndo Ɔnande ngandji. Kânga mbahatatɛnaka Yeso, naka sho mbeya awui efula wendana la nde, kete tayohamia ngandji kawokaso. (1 Pet. 1:8) Naa ekakatanu ɛmɔtshi wakakikɛ Yeso? Etena kakandasalaka lolango la She, Yeso akahetshama ohetshamahetshama, akahɛnyahɛnyama, wakɔsɔngwɛ awui wa kashi ndo wakɔtɛngɛ. Wakawɔnyɔla lo toho tokina. (Adia Joani 15:25.) Ngandji kakokaka Yeso She lele l’olongo akôtshutshuya dia nde mbikikɛ ehemba ɛsɔ tshɛ. Ndo oko wakandatshutshuyama la ngandji, nyɔi kande k’olambo kakonge tshungo lo wahɔ w’anto efula.—Mat. 20:28.
10, 11. Lam’ele Kristo akatovwɛ, welo akɔna wahombaso mbidja?
10 Woho wakatshikala Yeso la kɔlamelo totshutshuyaka dia sho mbôkoya. Naka tayokana yimba lo kɛnɛ kakatosalɛ Kristo, kete ngandji kawokaso kayofula. Oko weso ambeki ande, sho pombaka nsala la wolo dia mpɛtshahɛtsha ndo ntetemala mɛnya ngandji kele oko ka Kristo dia sho ntetemala nkitanyiya didjango diatɔlɔmba dia nsambisha Diolelo ndo mbetɛ anto ambeki.—Mat. 28:19, 20.
11 Dia mɛnya dia sho lawɔ mbokaka Kristo ngandji kakandoke anto tshɛ, sho pombaka nkotsha ɔkɛndɛ aso la ntondo k’ekomelo ndja. (Adia 2 Koreto 5:14, 15.) Ngandji kakɛnya Kristo mbakôkimanyiyaka dia nde nkotsha kɛnɛ kakasangoya Nzambi lo dikambo di’anto. Ndo ɛnyɛlɔ kakatotshikɛ Kristo dia sho kiyela la kɔlamelo mbakimanyiya ɔmɔmɔ la l’atei aso dia monga l’ɔkɛndɛ ɔmɔtshi lo sangwelo diaki Nzambi. Dui sɔ nɔmbaka dia sho mpɛtshahɛtsha dimɛna dimɛna ngandji kokaso Nzambi lo yɛdikɔ yɛdimi la akoka aso. (Mat. 22:37) Lo nkitanyiya kɛnɛ kaketsha Yeso ndo lo nama wadjango ande, sho mɛnyaka dia sho mbolangaka ndo ɔnɛ tambɔsa yɛdikɔ dia sho nsukɛ lowandji laki Nzambi oyadi kakɔna kayotomba oko wakadisale Yeso.—Joa. 14:23, 24; 15:10.
Toyele mboka ka ngandji koleki ɔlɔlɔ
12. Kakɔna kakalange Paulo mbuta lo nkamba la etelo k’ɔnɛ “mbuka kuleki ololo”?
12 Ɔpɔstɔlɔ Paulo akokoyaka Kristo. Lam’ele nde akayelaka wanya wa Kristo la kɔlamelo tshɛ, Paulo akatɛka anango akambo hwe hwe etena kakandâkeketshaka dia vɔ mbôkoya. (1 Kor. 11:1) Kânga mbakandakeketsha Akristo wa la Kɔrɛtɔ dia vɔ ntetemala nyanga l’ohetoheto tshɛ weshasha wa nyuma ɛmɔtshi waki lo ntambe ka ntondo, ɛnyɛlɔ oko woshasha wa nkɔnɔla elando, ntɛkɛta lo ɛtɛkɛta ekina, Paulo akawaɛnya dia aki dikambo dikina dioleki ɔlɔlɔ diakawahombe mbesa. Lo 1 Koreto 12:31, nde akalembetshiya ate: ‘Koko dimi lekɔ lo nyɛnya mboka koleki ɔlɔlɔ.’ Avɛsa woyelanyi la divɛsa sɔ mɛnyaka dia ɔsɔ aki mboka ka ngandji koleki ɔlɔlɔ. Lo yoho yakɔna yakaleke mboka kɛsɔ ɔlɔlɔ? Paulo akâlembetshiya kɛnɛ kakandalange mbuta. (Adia 1 Koreto 13:1-3.) Otondonga onto ɔmɔtshi aki l’akoka amɔtshi wa lânde ndo akasalaka akambo wa weke, koko nde komonga la ngandji, wahɔ akɔna wotonga l’akambo asɔ na? Ndoko wahɔ! Oko wakandatshutshuyama la nyuma kaki Nzambi, nde akâlembetshiya dikambo dia mɛtɛ dia diambo sɔ. Ande shɛngiya ya diambo yakonge la dikambo sɔ etena kakandâlembetshiyadiɔ lee!
13. a) Ele divɛsa dia l’ɔnɔnyi 2010? b) Lo woho akɔna wele ngandji hahekɔ pondjo?
13 Oma lâsɔ, Paulo akalembetshiya kɛnɛ kele ngandji ndo kɛnɛ ketɔ bu. (Adia 1 Koreto 13:4-8.) Kakianɛ, tɔshi etena ka menda kana sho kotshaka kɛnɛ kalɔmba ngandji. Toleke ndjasha l’etenyi k’ekomelo ka divɛsa 7 ndo l’ɔnɔngɔ wa ntondo wa divɛsa 8, avɛsa wata ɔnɛ: ‘Ngandji mbikikɛka akambo tshɛ. Ngandji hahekɔ pondjo.’ Ɔsɔ mbele divɛsa dia l’ɔnɔnyi 2010. Tolembete dia lo divɛsa 8 Paulo akate dia weshasha wa nyuma, mbidja ndo mbuta akambo wahataye ndo ntɛkɛta lo ɛtɛkɛta ekina waki l’anto lo etshumanelo k’Akristo kaki keke ka nkengama, wayoshila. Koko ngandji kayotshikalaka pondjo pondjo. Jehowa ekɔ mɛtɛ ngandji ndo nde bu l’ekomelo. Ɔnkɔnɛ, ngandji hatohekɔ pondjo. Tɔ kayotshikalaka nshi tshɛ oko dionga diaki Nzambi kaso ka pondjo.—1 Joa. 4:8.
Ngandji mbikikɛka akambo tshɛ
14, 15. a) Ngande wakoka ngandji tokimanyiya dia mbikikɛ ehemba? b) Lande na kakatone ɔnangɛso ɔmɔtshi lele ɔlɔngɔlɔngɔ dia nsekola ɛlɛmbɛ waki Nzambi?
14 Kakɔna kakimanyiya Akristo dia vɔ mbikikɛ oyadi ehemba ndo ekakatanu akɔna tshɛ wahomana la wɔ? Ekɔ ngandji kohikami lo atɔndɔ wa lo Bible. Ngandji kɛsɔ hakomɛ tsho lo ndjahombia diangɔ dia l’emunyi. Tɔ konyaka onto dia nama olowanyi ande ndo mbetawɔ nshisha lɔsɛnɔ lande l’ɔtɛ wa Kristo. (Luka 9:24, 25) Tokane yimba lo kɔlamelo yaki l’Ɛmɛnyi wa Jehowa wakasoyama lo mpango ya nkanu ndo yakawakambishaka anto ntumu ya wolo etena kakalɔmaka Ta dia hende di’andja w’otondo ndo l’ɔkɔngɔ wa ta sɔ.
15 Ɔlɔngɔlɔngɔ ɔmɔtshi waki Ɔmɛnyi wa Jehowa lo wodja wa Allemagne wakawelɛka Wilhelm shikikɛka dikambo sɔ. Lo dihole dia nde nsekola ɛlɛmbɛ waki Nzambi, nde akalame kɔlamelo yande etena kakawalɔmbɛ asɔlayi w’aseka Nazi dia mbokanda. Lo mukanda wakandafundɛ nkumbo kande dia ndakana la wɔ, nde akate ate: “Lâdiko di’akambo tshɛ, sho pombaka mboka Nzambi ngandji oko wakatodjangɛ Ɔnɔmbɔdi aso Yeso Kristo. Naka sho mbeta lo wedi ande, kete nde ayoyotofuta.” Lo sawo dimɔtshi diakatombe lo Tshoto y’Etangelo, ose nkumbo kande ɔmɔtshi akate ate: “Lo tena di’ekakatanu, sho takasalaka la wolo oko nkumbo dia ngandji kakatokaka Nzambi mbetaka nshi tshɛ lo dihole dia ntondo.” Dionga dia ngasɔ mbele l’anangɛso efula wele lo nkanu lo wodja wa Arménie, Corée du sud, Érythrée ndo lo wedja ekina. Ngandji koka anangɛso l’akadiyɛso asɔ Jehowa kakatshikala nge.
16. Ɛhɛnyɔhɛnyɔ akɔna wakakikɛ anangɛso wa lo wodja wa Malawi?
16 Lo ahole efula, ekakatanu wa weho la weho wekɔ lo mbidja mbetawɔ ndo etete k’anangɛso l’akadiyɛso l’ohemba. L’edja k’ɛnɔnyi 26, ewandji wa lɛɛta wa lo wodja wa Malawi wakashimbe olimu w’Ɛmɛnyi wa Jehowa, wakâhɛnyahɛnya ndo wakâsoya efula. Vɔ wakafutama l’ɔtɛ w’ekikelo kawɔ. Etena kakawatatɛ mpɛnyahɛnyama, aki Ɛmɛnyi wa Jehowa oko 18 000 lo wodja ɔsɔ. Ɛnɔnyi 30 l’ɔkɔngɔ, lofulo l’apandjudi lakalekana 38393. Etombelo wa ngasɔ mbakondja ndo Ɛmɛnyi wa Jehowa wa lo wedja ekina.
17. Kakɔna kakasale anto amɔtshi wakalɔshama oma le nkumbo yawɔ, ndo kakɔna kakâkimanyiya dia mbikikɛ ɛhɛnyɔhɛnyɔ ɛsɔ?
17 Woho walɔshama ekambi waki Nzambi lo tshɛ kawɔ oma le anto k’anto ntshikitana la woho walɔshama amɔtshi l’atei awɔ oma le ase nkumbo yawɔ. Ase nkumbo kana ewotɔ aso wa kasuke mbeyaka tɔhɛnyahɛnya. Onde Yeso kotatshi dia dikambo sɔ diayosalema? Ngasɔ mbakandate ndo Ɛmɛnyi wa Jehowa wekɔ lo mɛna mɛtɛ k’ɛtɛkɛta ɛsɔ. (Mat. 10:35, 36) Ana waya l’ɛnɔnyi dikumi l’ɛmɔtshi wekɔ lo mbikikɛ ɔlɔshamelo oma le ambutshi awɔ wele kema ambetawudi. Amɔtshi wakatshanyema oma le nkumbo yawɔ, koko Ɛmɛnyi wa Jehowa ekina wakâlongola la ngandji tshɛ. Akina wakasɛkama oma le ambutshi awɔ. Kakɔna kakakimanyiya anto asɔ dia mbikikɛ akambo asɔ na? Aha tsho ngandji kokawɔ nkumbo kaso k’onto l’ɔnango mbakâkimanyiya, koko lâdiko di’akambo asɔ tshɛ, ngandji ka mɛtɛ kokawɔ Jehowa la Ɔnande mbakaleke mbâkimanyiya.—1 Pet. 1:22; 1 Joa. 4:21.
18. Ngande wele ngandji kakikɛ akambo tshɛ kimanyiyaka atshukanyi w’Akristo?
18 Ekɔ akambo akina wa lo lɔsɛnɔ walɔmba dia sho monga la ngandji kakikɛ akambo tshɛ. L’atei wa diwala, ngandji kimanyiyaka atshukanyi dia vɔ nkitanyiya ɛtɛkɛta waki Yeso wata ɔnɛ: “Untu tamamitulaki kene kakamamanya [Nzambi].” (Mat. 19:6) Etena kahomanawɔ la “asui lu alimba,” atshukanyi w’Akristo pombaka mbohɔ dia Jehowa ekɔ la dihole di’ohomba efula lo diwala diawɔ. (1 Kor. 7:28) Ɔtɛkɛta ande mbutaka ɔnɛ: ‘Ngandji mbikikɛka akambo tshɛ’ ndo ɔnɛ wadi l’omi wakɛnɛmɔla dionga sɔ mongaka la kɔlamelo lam’asawɔ ndo diwala diawɔ tshikalaka pondjo.—Kol. 3:14.
19. Kakɔna kakatombe l’atei w’ekambi waki Nzambi l’ɔkɔngɔ wa mpokoso y’oma lo diangɔ diakatongama?
19 Ngandji tokimanyiyaka dia mbikikɛ akambo tshɛ lo tena diatokomɛ mpokoso y’oma lo diangɔ diakatongama. Kɛsɔ mbakasalema lo sidɛ ka wodja wa Pérou etena kakadidima nkɛtɛ ndo kakalanya lɔpɛpɛ lɔmɔtshi la wolo lelɛwɔ Katrina ɛtshi ka nkɛtɛ kɛmɔtshi ka lo wodja w’États-Unis. Anangɛso efula wakashisha mvudu ndo diangɔ diawɔ lo mpokoso shɔ. Ngandji kakatshutshuya tshumanelo di’Ɛmɛnyi wa Jehowa dia l’andja w’otondo dia vɔ mbakimanyiya ndo anangɛso efula wakayakimɔ la lolango dia mbakɛ mvudu ndo nɔngɔsɔla Mbalasa ya Diolelo. Awui asɔ wakɛnya dia anangɛso mbokanaka ngandji ndo kananɛka lo tena tshɛ ndo l’atei w’ekakatanu tshɛ.—Joa. 13:34, 35; 1 Pet. 2:17.
Ngandji hahekɔ pondjo
20, 21. a) Lande na kele ngandji la nɛmɔ dioleki tshɛ? b) Lande na kambotoyashikikɛ dia ndjela mboka ka ngandji?
20 Tekɔ lo mɛna di’ekɔ ohomba ndjela mboka ka ngandji koleki ɔlɔlɔ l’atei w’ekambi waki Jehowa ɛlɔ kɛnɛ. Lo mɛtɛ, tɔ mbeta la ntondo lo awui tshɛ wele la so. Tolembete woho wakadje ɔpɔstɔlɔ Paulo dikako vɔlɛ lo dikambo dia mɛtɛ sɔ. Ntondotondo, nde akate dia weshasha wa nyuma wayoshila ndo ɔnɛ etshumanelo k’Akristo kayokeketala. Oma lâsɔ, nde akadihiya lo mbuta ate: “Kakiane, ambutshikala mbetawo, la elungamelu, la ngandji. Akambu aso asatu, dikambu diuleki wuki l’atei awo ku ngandji.”—1 Koreto 13:13.
21 L’ekomelo, akambo wetawɔso wayokotshama, lâsɔ hatonga ohomba nto dia sho ntetemala monga la mbetawɔ l’akambo akɔ. L’ɔkɔngɔ wa diangɔ tshɛ nkoma eyoyo, hatotonga nto l’elongamelo l’akambo walongamɛso ɛlɔ kɛnɛ l’asolo walomɔlomɔ dia vɔ nkotshama. Ko kayotota lo kɛnɛ kendana la ngandji? Tɔ hahekɔ pondjo, mbuta ate tɔ kayotshikalaka pondjo pondjo. Oko wakongɛso lɔsɛnɔ la pondjo, tekɔ l’eshikikelo dia mɛna ndo ndeka nshihodia toho tokina ta ngandji ka Nzambi. Lo nsala lolango laki Nzambi lo ndjela mboka ka ngandji koleki ɔlɔlɔ kahahekɔ pondjo, sho kokaka ntshikala pondjo pondjo.—1 Joa. 2:17.
Ngande wayoyokadimola?
• Lande na kahombaso mbewɔ yoho ya ngandji ka kɔlɔ?
• Ngandji kokaka tokimanyiya dia sho mbikikɛ akambo akɔna?
• Lo woho akɔna wahahekɔ ngandji pondjo?
[Efundelo wa l’etei w’odingɔ wa lo lɛkɛ 27]
Divɛsa dia l’ɔnɔnyi 2010 ele: ‘Ngandji mbikikɛka akambo tshɛ. Ngandji hahekɔ pondjo.’—1 Kor. 13:7, 8.
[Osato wa lo lɛkɛ 25]
Ngandji ka Nzambi totshutshuyaka dia nsambisha
[Osato wa lo lɛkɛ 26]
Ngandji kahahekɔ kakakimanyiya anangɛso l’akadiyɛso wa lo wodja wa Malawi dia vɔ mbikikɛ ehemba