Wadi waki edo ndo waomi waki edo

ehomba akɔna wele la wɔ?

ko ngande wakokayɛ mbakimanyiya?

Lushi lɔmɔtshi Jeanne akakitsha mbo ya ndɛ la mɛsa lo kuku ka luudu lande nɛ dia nde aki la ndjala. Wodjima waki l’etei ka kuku kakɔ. Esadi eto, nde akɛnyi dia nde akakitsha alɔnga w’akale ahende la mɛsa . . . ndo nde akatatɛ nsekuma la delo. Nde aki la mbekelo ka nkitsha alɔnga w’akale ahende la mɛsa. Lâsɔ ko omende ambovɔ ambeta ɛnɔnyi ehende.

WANƐ wahatavushaka elonganyi awɔ mongaka l’okakatanu dia nshihodia lɔkɔnyɔ l’efula longa l’onto lambovusha olonganyi ande. Lo mɛtɛ, anto ndjetawɔka dia lakiwɔ la ngandji ambovɔ mɛtɛ paka l’ɔkɔngɔ wa nshi efula. Beryl laki l’ɛnɔnyi 72, kokoka mbetawɔ nyɔi ka la shashimuya kakavu omɛnde. Nde akate ate: “Ɔsɔ ekɔ mɛtɛ kashi. Dimi kokoka mbetawɔ ɔnɛ nde hatɔtɔtɔka lo soko dia luudu laso nto.”

L’ɔkɔngɔ wa vɔ mpembola anto amɔtshi lonya kana lokolo, vɔ ndjokaka mbala mɔtshi oko lonya kana lokolo lakɔ lekekɔ. Woho akɔ wâmɛ mbele, mbala mɔtshi atshukanyi wele la lɔkɔnyɔ l’ɔtɛ wakawavusha elonganyi awɔ ndjɛnaka elonganyi akɔ l’atei w’anto kana ndjokashimɔka mbala mɔtshi dia wekɔ lo nsawola la wɔ.

Mbala efula angɛnyi ndo ase nkumbo hawoteyaka kɛnɛ kakokawɔ nsala etena kavusha lakiwɔ la ngandji olonganyi ande. Onde wɛ mbeyaka onto ɔmɔtshi lakavusha olonganyi ande? Ko, ngande wakokayɛ mbokimanyiya? Ahombayɛ mbeya dia wɛ nkimanyiya wadi waki edo kana waomi waki edo dia vɔ ntondoya lɔkɔnyɔ lele la wɔ? Ngande wakokayɛ nkimanyiya wadi waki edo la waomi waki edo dia vɔ nyomonga l’ɔngɛnɔngɛnɔ lo lɔsɛnɔ?

Akambo wahatahombe nsala

Nyɔi ka lakiwɔ la ngandji mbeyaka ntshutshuya angɛnyi ndo ase nkumbo k’otshukanyi lambovusha olonganyi ande dia vɔ nkitshakitsha nshi yahombande ndelaka l’ɔtɛ wa lɔkɔnyɔ lele la nde. Koko, onyangiyangi ɔmɔtshi wakakɔnya wadi waki edo la waomi waki edo 700 akafunde ate: “Ndoko dihole diɛnyinshawɔ lofulo la nshi ‘shikaa’ lahomba ɔnɛ lambovusha monga la lɔkɔnyɔ.” Ɔnkɔnɛ, lo dihole dia wɛ mpemba dia nshimba otshukanyi wambovusha olonganyi ande dia nde ndela, shande diaaso dia nde mɛnya lɔkɔnyɔ lele la nde.​—Etatelu 37:34, 35; Jobo 10:1.

Kânga mbele mbeyaka monga dimɛna dia wɛ nkimanyiya otshukanyi wambovusha olonganyi ande dia nɔngɔsɔla okundelo, tɔsake dia wɛ mbahomba mbɔsa yɛdikɔ y’ekomelo yendana l’awui tshɛ w’okundelo. Omi aki odo lele l’ɛnɔnyi 49 lelɛwɔ Paul mbutaka ɔnɛ: “Aki dimɛna woho wakatshikɛ wanɛ wakambisha ekimanyielo kaki la mi ohomba diaaso dia dimi nɔmbɔla akambo tshɛ wendana l’okundelo wa wadɛmi. Woho wakasalema okundelo wa wadɛmi dimɛna akambisha ɔngɛnɔngɛnɔ efula. Lakɔshi dia ɔsɔ mbaki dui di’ekomelo diakamakoke nsala dia mbosha nɛmɔ.”

Lo mɛtɛ, wanɛ wambovusha elonganyi awɔ wekɔ l’ohomba w’ekimanyielo kɛmɔtshi. Wadi aki odo lele l’ɛnɔnyi 68 lelɛwɔ Eileen mbutaka ate: “Aki tshondo y’okakatanu le mi dia dimi nɔngɔsɔla okundelo w’omɛmi nɛ dia yimba yami komonga la edie. Diɛsɛ ko, ɔnami la pami nde la wadɛnde wakakimanyiya.”

Ndo nto, tokake wɔma dia ntɛkɛta akambo wendana l’olonganyi wakavu. Beryl lakatatɛkɛtshi dikambo diande la diko mbutaka ate: “Angɛnyi ami wakakimanyiya woho w’anyanya. Koko, lakɛnyi dia anto efula wakoke wɔma dia ntɛkɛta akambo wendana la John y’omɛmi. Aki oko nde komonga la lɔsɛnɔ ndo dui sɔ diakanyangiyaka yema.” L’edjedja ka wonya, wadi waki edo la waomi waki edo mbeyaka ndjokombola dia ntɛkɛta hwe hwe akambo wendana l’elonganyi awɔ wakawavusha. Onde wɛ mbohɔka dui dimɔtshi dia dimɛna diakasale ɔnɛ lakavu kana ɔkɔndɔ ɔmɔtshi wa dimɛna wendana la nde? Naka ngasɔ, kete tɛwɔ olonganyi wele la lɔsɛnɔ. Tetawɔke dia wɔma kokaloya ɛkɔngɔkɔngɔ. Naka wɛ mɛnaka dia nde ayokohokamɛ, kete tɛnde kɛnɛ kakayangɛnangɛnaka le olonganyi ande wakavu ndo kandji kele la yɛ lo dikambo diande. Kɛsɔ mbeyaka nkimanyiya elonganyi wele la lɔkɔnyɔ dia vɔ nshihodia dia anto akina wekɔ lo mbakimanyiya dia vɔ ntondoya lɔkɔnyɔ lele la wɔ.​—Romo 12:15.

Etena kakimanyiyayɛ wanɛ wakavusha, ewɔ dia mbâhɛ wotsho lâdiko dia tshuka lo mbasha alako wamboleka. Totshutshuyake olonganyi wakavusha dia nde mbɔsa tɛdikɔ l’esasesase.a Lo dihole dia nsala ngasɔ, onga la shɛnɔndi ndo yambola ɔnɛ: ‘Ahombami nsala dia nkimanyiya ɔngɛnyi kana owotɔ ami dia nde mbikikɛ nyɔi k’olonganyi ande?’

Kɛnɛ kakoyɛ nsala

L’ɔkɔngɔ wa nyɔi k’olonganyi, ondo olonganyi wotshikadi la lɔsɛnɔ ayonga l’ohomba w’ekimanyielo ka shikaa. Shi wɛ kokaka mbokatɛ yangɔ ya ndɛ, mbisha angɛndangɛnda esongo kana sawoya olonganyi wele la lɔkɔnyɔ?

Ndo nto, wɛ pombaka mbeya dia apami ntshikitana la wamato lo kɛnɛ kendana la woho watondoyawɔ opoko awɔ. Ɛnyɛlɔ, lo wedja ɛmɔtshi, olekanyi yɛdikɔ ya l’atei atei ya waomi waki edo ndjotshukanaka nto ngɔndɔ 18 l’ɔkɔngɔ wa nyɔi k’elonganyi awɔ, koko wadi waki edo salaka dui sɔ paka lo pai. Oma lende aya otshikitanu ɔsɔ?

Otshikitanyi la woho wafɔnya anto efula, aha l’ɔtɛ wa nsaki ya dieyanelo tsho mbatshukana waomi waki edo l’ɔkɔngɔ wa nyɔi ka wadiɛwɔ. Lo mɛtɛ, nsaki ka monga l’onto la mbutɛka toseke tawɔ tshɛ mbakoka nkonya waomi waki edo dia vɔ ndjaoka opoko l’ɔkɔngɔ wa nyɔi ka wadiɛwɔ. Lo wedi okina, mbala efula anto toshaka wadi waki edo ekimanyielo dia vɔ mbikikɛ lɔkɔnyɔ lele la wɔ kânga mbele angɛnyi wa waomɛwɔ towaohɛka mbala mɔtshi. Kânga mbakokawɔ ndjadja lo wâle wa tshukana l’onto lahawateye dimɛna, nsaki ka monga l’onto la mbutɛka toseke tawɔ tshɛ mbatshutshuya waomi waki edo dia ntshukana l’ɔkɔngɔ wa nyɔi ka wadiɛwɔ dia vɔ ntondoya opoko awɔ. Mbokɛmaka hwe dia wadi waki edo mbaleka monga l’akoka wa ntondoya lɔkɔnyɔ laya oma lo ndjaoka opoko l’ɔkɔngɔ wa nyɔi ka waomɛwɔ.

Oyadi ɔngɛnyi ayɛ kana owotɔ ayɛ ekɔ pami kana womoto, kakɔna kakokayɛ nsala dia mbâmuya wotsho w’onto layaoka opoko? Wadi aki odo lele l’ɛnɔnyi 49 lelɛwɔ Helen mbutaka ɔnɛ: “Anto efula kombolaka dia nkimanyiya, koko hawokimanyiya. Mbala efula, vɔ tombutɛka ɔnɛ: ‘Naka wɛ ekɔ l’ohomba wa dimi kokimanyiya, ko wɛ mbutɛmi.’ Koko, lakangɛnangɛnaka etena kakambutɛka anto amɔtshi ɔnɛ: ‘Lekɔ lo tatshu tosomba diangɔ lo lobingu. Onde dimi kokaka ntshɔ la yɛ?’” Omi aki odo lelɛwɔ Paul lakavusha wadɛnde la hemɔ ka kansɛrɛ, mbutaka lande na kakandangɛnangɛnaka di’onto ɔmɔtshi mbelɛ dia vɔ ntshɔ dihole dimɔtshi. Nde mbutaka ate: “Tena dimɔtshi, wanɛ wambovusha elonganyi awɔ hawokombola nsawola l’anto kana nsawola la wɔ dikambo di’elonganyi awɔ wakavu. Koko, l’ɔkɔngɔ wa vɔ mbetsha dikɔlɔ dimɔtshi kâmɛ l’angɛnyi awɔ, vɔ toyaokaka dimɛna ndo hawotoyaokaka opoko nto. Vɔ mbeyaka dia anto ndjakiyanyaka lo dikambo diawɔ ndo dui sɔ mbakimanyiyaka dia vɔ ntondoya.”b

Tena diahombaso ndeka nkimanyiya wadi waki edo kana waomi waki edo

Helen akɛnyi dia nde akaleke monga l’ohomba w’ekimanyielo etena kakatatɛ ewotɔ ande suke la tshɛ ndjasha l’elimu awɔ wa lushi la lushi. Nde ekɔ lo mbuta ate: “Angɛnyi ndo ewotɔ ndjaka ndjokimanyiya ɔnɛ lambovusha l’etatelo. Oma lâsɔ, vɔ ndjokalolaka l’elimu awɔ. Koko, ɔnɛ lambovusha tetemalaka monga la lɔkɔnyɔ.” Mbeya dia ngasɔ mbasalema akambo ayokimanyiya angɛnyi w’eshika dia vɔ monga suke dia nkimanyiya ɔnɛ lambovusha olonganyi ande l’edja k’etena k’otale.

Ondo wadi aki odo kana omi aki odo mbeyaka monga l’ohomba w’onto ɔmɔtshi monga kâmɛ la nde lo nshi ya fɛtɛ ya eohwelo, ɛnyɛlɔ fɛtɛ ka eohwelo ka lushi la diwala kana ka lushi la nyɔi k’olonganyi ande. Eileen lakatatɛkɛtshi dikambo diande la diko mbutaka dia ɔnande la pami laya opalanga mbokimanyiyaka diaha nde ndjaoka opoko lushi la fɛtɛ ka eohwelo ka lushi la diwala diande. Nde mbutaka ate: “Ɔnɔnyi tshɛ, dimi la ɔnami la pami le Kevin tɛngɔlaka kâmɛ lushi l’otondo. Lushi lɔsɔ sho tɔlɛka mbo ya ndɛ kâmɛ ndo sho tosalaka dikambo sɔ paka dimi la nde ato.” Shi wɛ kokaka mfunda tena diatolekaka owotɔ ayɛ kana ɔngɛnyi ayɛ lakavusha olonganyi ande monga l’ohomba w’ekimanyielo? Oma lâsɔ, wɛ kokaka nkongɛ dia wɛ kana anto akina monga kâmɛ la nde lo tena dia ngasɔ.​—Tukedi 17:17.

Anto amɔtshi wakɛnyi dia wanɛ wakavusha elonganyi awɔ kokaka monga kiɔkɔ y’esambelo. Annie lakavusha omɛnde ambeta ɛnɔnyi enanɛi mbutaka ɛtɛkɛta wayela ɛnɛ lo kɛnɛ kendana la lɔngɛnyi lakandɔtɔ nde la wadi aki odo ɔmɔtshi: “Woho wakandayashikikɛ dia ntondoya lɔkɔnyɔ laki la nde akonge la shɛngiya ya wolo le mi ndo akakeketsha dia dimi ntetemala ntshɔ otsha la ntondo.”

Eelo, l’ɔkɔngɔ wa vɔ ntondoya tena dia lɔkɔnyɔ, wadi waki edo la waomi waki edo kokaka mbisha ɛnyɛlɔ kakoka anto akina mbokoya ndo mbasha elongamelo. Wadi waki edo ahende watɛkɛtama lo Bible, mbuta ate Ruta nde la Naomi k’okilo ande, wakakeketshama oma lo woho wakawakimanyiyana. Ɔkɔndɔ wananda otema ɔsɔ mɛnyaka woho wakakimanyiyama wamato ahende asɔ dia ntondoya lɔkɔnyɔ laki la wɔ oma lo woho wakawakimanyiyana.​—Ruta 1:15-17; 3:1; 4:14, 15.

Etena ka nkɔnɔ

Dia vɔ nyomotatɛ nsala akambo wakawasalaka ntondo, atshukanyi wakavusha elonganyi awɔ pombaka monga la wɛdimo lam’asa nsala akambo wɛnya dia vɔ mbohɔka wakiwɔ wa ngandji wakavu ndo nkotsha ehomba awɔ vɔamɛ. Sɔlɔmɔna nkumekanga ka lomba akeyaka dia “etena ka ndela” kekɔ. Koko, nde akate nto dia ekɔ ‘etena ka nkɔnɔ.’​—Undaki 3:3, 4.

Paul lakatatɛkɛtshi dikambo diande la diko mbutaka dia kema dui dia wɔdu dia atshukanyi wakavusha elonganyi awɔ mbohɛ lɔsɛnɔ lakawasɛnaka ntondo kâmɛ l’elonganyi awɔ lo mbuta ɔnɛ: “Dimi la wadɛmi taki oko dikaka la nkɛtɛ. Lonyangu ko, nde akayovɔka ko lakatshikala dimɛ. Dui sɔ diakambishaka lɔkɔnyɔ l’efula.” L’ɔtɛ wa kɔlamelo yele la wɔ otsha le elonganyi awɔ wakavu, anto amɔtshi hawoyolangaka ntshika dia ntɛkɛta akambo wendana la lɔsɛnɔ lakawasɛnaka ntondo lo diwala. Anto akina ndjambolaka dia kana naka vɔ monga l’ɔngɛnɔngɛnɔ hɛnya dia vɔ bu la kɔlamelo otsha le elonganyi awɔ. Ɔnkɔnɛ, vɔ totonaka dia mɛngola kâmɛ l’anto akina. Ngande wakokayɛ nkimanyiya wadi waki edo ndo waomi waki edo dia vɔ nkɔnɔ, mbuta ate dia vɔ ntetemala nsala akambo wokowosalaka lo lɔsɛnɔ?

Dikambo dia ntondo diakokayɛ nsala ele, nkimanyiya onto lakavusha dia nde kotɛ tokanyi tande. Herbert lakavusha wadɛnde ambeta ɛnɔnyi esamalo mbutaka ate: “Hâkoke mbohɛ tena diakapokamɛka wanɛ wakayaka dia ndjomenda etena kakamohɔka kana kakamawatɛka dikambo dimɔtshi diaki lo yimba yami. Dimi mbeyaka nte aha dimi mbakalekaka mbeya mbidja anto lo demba, koko lakangɛnangɛnaka woho wakayadjaka anto lo dihole diami.” Paul akaleke munandema oma l’akambo wakôsalɛka ɔngɛnyi ande wambotshunda lo woho wakandawombolaka kɛnɛ kakandasalaka dia ntondoya lɔkɔnyɔ laki la nde. Paul mbutaka ate: “Lakangɛnangɛnaka woho wakandasawolaka la mi asawo w’oma k’ɛse otema la lotutsha tshɛ ndo lakawotɛka mbala efula woho waki yonge yami.”​—Tukedi 18:24.

Lo nkɛnɛmɔla nsaki yele oko lonyangu, ndjaɛndja onongo kana kɛlɛ, otshukanyi wambovusha olonganyi ande mɛnyaka dia nde ekɔ suke dia mbetawɔ kɛnɛ kambôkomɛ. Kɛnɛ kakakimanyiya nkumekanga Davidi dia nde nkondja wolo wa “[m]unela uma lu kete” lo mbetawɔ nyɔi k’ɔnande la pami la dikɛnda kakawoshaka pâ, ele woho wakandadihwɛ Jehowa Nzambi ɔngɛnyi ande woleki tshɛ otema.​—2 Samuele 12:19-23.

Kânga mbele mbeyaka monga tshondo y’okakatanu oma l’etatelo, atshukanyi wambovusha elonganyi awɔ pombaka ndjotatɛ nsala akambo wakawasalaka ntondo. Shi wɛ kokaka mbodja l’ɔnɔngɔ w’anto wakoka kokimanyiya l’elimu ayɛ wa lushi la lushi, ɛnyɛlɔ ntshɔ tosomba diangɔ lo lobingu kana tosembola ekolo la dikɔlɔ dimɔtshi? Shi wɛ kokaka nɔmba ɔngɛnyi ayɛ dia nde kosalɛ tshumutumu mɔtshi? Ɔsɔ ekɔ yoho kina yakokayɛ nkimanyiya atshukanyi wakavusha elonganyi awɔ wayaoka dia wekɔ epoko. Ɛnyɛlɔ, wɛ mbeyaka mbalɔmba dia vɔ namaka anayɛ kana ketsha woho wa nkatɛ weho ɛmɔtshi wa mbo ya ndɛ. Shi vɔ kokaka kokimanyiya dia nɔngɔsɔla ahole amɔtshi wambolana luudu layɛ? Lâdiko dia vɔ kokimanyiya l’elimu ayɛ, mbalɔmba dia vɔ nsala awui wa ngasɔ mbeyaka mbashikikɛ ɔnɛ lɔsɛnɔ lawɔ lekɔ l’oyango.

Naka atshukanyi wakavusha elonganyi awɔ ndjihwɛ anto akina etema, kete vɔ mbeyaka nyomonga la nsaki ka nsɛna ndo ndjadjɛ eyango w’eyoyo lo lɔsɛnɔ. Kɛsɔ mbakakomɛ Yonette wadi aki odo lele l’ɛnɔnyi 44. Nde mbutaka ate: “Laki l’okakatanu dia ntatɛ nsala elimu ami wa lushi la lushi, nkamba la falanga yami ndo nkotsha ehomba w’anami asato.” Koko, l’edjedja ka wonya, Yonette akayonga l’akoka wa ndjalɔngɔsɔla dimɛna ndo mbeya nsawola l’anande. Ndo nto, nde akɛnyi dia ekɔ ohomba mbetawɔ osukɔ w’oma le angɛnyi ande wa ma ma.

“Woshasha wa lɔsɛnɔ hawoshisha nɛmɔ diawɔ”

Dia vɔ mbisha ekimanyielo kahombama, angɛnyi l’ewotɔ w’otshukanyi wakavusha olonganyi ande pombaka mɛna akambo la sso di’ɔlɔlɔ. Otshukanyi wakavusha olonganyi ande mbeyaka ntetemala monga la lɔkɔnyɔ l’edja ka ngɔndɔ efula kana k’ɛnɔnyi efula. Lo mɛtɛ, “sui dia utema andi” mbeyaka monga wolo efula.​—1 Khumi ya Dikanga 8:38, 39.

Lo tena dia ngasɔ mbonga otshukanyi wambovusha olonganyi ande l’ohomba w’ekimanyielo kahombama diaha nde nkɔmɔ ndo mbɔsa dia ekɔ okalema. Osukɔ wa ngasɔ wakakimanyiya atshukanyi efula wakavusha elonganyi awɔ dia vɔ ndjadjɛ eyango w’eyoyo lo lɔsɛnɔ lawɔ. Omi aki odo lele l’ɛnɔnyi 60 lelɛwɔ Claude ndo laya osambisha wa lo tena tshɛ l’Afrikɛ mbutaka ate: “Woshasha wa lɔsɛnɔ hawoshisha nɛmɔ diawɔ kânga l’ɔkɔngɔ w’onto mvusha olonganyi ande.”

Etena kavusha onto olonganyi ande lɔsɛnɔ tshikitanaka. Koko, wanɛ watshikala la lɔsɛnɔ l’ɔkɔngɔ wa nyɔi ka lakiwɔ la ngandji kokaka nkimanyiya anto akina efula.​—Undaki 11:7, 8.

[Nɔtɛ ya l’ɛse ka dikatshi]

[Efundelo wa l’etei w’odingɔ wa lɛtɛ 27]

Angɛnyi w’eshika mongaka suke dia nkimanyiya ɔnɛ lambovusha olonganyi ande l’edja k’etena k’otale

[Kiombo/​Osato wa lo lɛtɛ 25]

Momba kana ntshumba?

Helen lakavusha omɛnde ambeta ɛnɔnyi engana eto ekɔ lo mbuta ate: “Lakombe diangɔ di’omɛmi efula. Lambɛna dia lam’atete nshi, diangɔ sɔ kimanyiyakami dia dimi mbohɔ akambo w’amɛna. Dimi konanga ntshumba diangɔ tshɛ mbala kakɔ ɔtɔi nɛ dia tokanyi t’onto kokaka ndjotshikitana l’edjedja ka wonya.”

Lo wedi okina, Claude lakavusha wadɛnde ambeta ɛnɔnyi etanu ekɔ lo mbuta ate: “Lo kanyi yami, halɛnyi dia ekɔ ohomba momba diangɔ dia wadɛmi dia dimi ntetemala mbôhɔ. Dimi fɔnyaka dia ntshumba diangɔ dia wadɛmi mbakakimanyiya dia mbetawɔ ɔnɛ nde ambovɔ mɛtɛ ndo dia nkitshakitsha lɔkɔnyɔ laki la mi.”

Ɛtɛkɛta wele la diko engo mɛnyaka dia anto wekɔ la tokanyi totshikitanyi lo kɛnɛ kendana la kɛnɛ kahombawɔ nsala la diangɔ diatshika wakiwɔ wa ngandji wavɔ. Ɔnkɔnɛ, angɛnyi wa shikaa ndo ewotɔ w’atshukanyi wakavusha elonganyi awɔ pombaka mbewɔ dia mbatshutshuya la wolo dia vɔ mbetawɔ tokanyi tawɔ lo kɛnɛ kendana la dikambo sɔ.​—Ngalatiya 6:2, 5.

[Esato wa lo lɛkɛ 25]

Onde ekɔ nshi shikaa yahombayɛ ndeka mbisha ekimanyielo?

[Osato wa lo lɛkɛ 25]

Tohɛke dia mbêlɛ dia nyu ntshɔ dihole dimɔtshi

[Esato wa lo lɛkɛ 26]

Lɔmba wadi la waomi waki edo dia kokimanyiya l’elimu ayɛ wa lushi la lushi kana dia nyu tosembola ekolo