Lande na nɛmiya esombe?
OTAMBA ɔmɔtshi wamboleka anto munda foto l’andja w’otondo tanemaka l’omamu w’ashi a wake wele lo osomba wa Californie, lo wodja wa États-Unis. Otamba akɔ mbelamɛka ɔnɛ Tshɔi y’Osenge. Anto mbutaka dia otamba ɔsɔ wambɔsɛna ndekana ɛnɔnyi 250. L’ɔtɛ wa ekikelo kawɔ, otamba w’olangala ɔsɔ kotolaka yambalo y’anto lo toho efula. Ɛnyɛlɔ, otamba ɔsɔ keketshama la ɛkɔdi wa mbolo wakawakeleka lɔkɔ ndo la ave wakawakenge la tshina diawɔ.
Tshɔi y’Osenge shɔ toholaka dikambo dia Akristo w’esombe wele l’atei aso, wanɛ wambɛnya ekikelo ka wolo. Yoho mɔtshi ya diambo yasalawɔ dui sɔ ele lo nsambisha lokumu l’ɔlɔlɔ. Ɔprɔfɛta Jɔɛlɛ akatatshi dia “esumbi” wayewoya losango la lo Bible. (Joe. 2:28-32; Etsha 2:16-21) Ohokanyiya yema wenya w’efula wetshawɔ lo nkimanyiya anto akina l’otema ɔtɔi dia vɔ mbeya awui wendana la “lukumu l’ololo . . . la diulelu”! (Mat. 24:14) Apandjudi amɔtshi wa Diolelo waya esombe wambokikɛ ɛhɛnyɔhɛnyɔ ndo ekakatanu l’edja k’ɛnɔnyi efula. Naka osongo w’osenge w’anyanya mbeyamaka lo ekikelo kawɔ ndo keketshamaka la ave ndo la ɛkɔdi wa mbolo, kete hoke esombe wele l’atei aso! Shi vɔ sunganaka mbidjama yimba ndo nɛmiyama?
Jehowa Nzambi akadjangɛ ekambi ande w’edjedja ɔnɛ: “Kunelaki la ntundu ka kanga ndjui. Kolemiaki usumbi.” (Lew. 19:32) Ɛlɔ kɛnɛ, l’atei w’ekambi waki Jehowa, sho tanaka bɛnyɛlɔ di’amɛna efula di’esombe wa kɔlamelo ‘wambɔkɛndakɛnda la Nzambi’ l’edja k’ɛnɔnyi akumi. (Mika 6:8) Oko watetemalawɔ nkamba la atɔndɔ wa l’Afundelo, ɛtɛ awɔ wa ndjwe wekɔ mɛtɛ “lufule la nemo.”—Tuk. 16:31.
Ɔpɔstɔlɔ Paulo akatɛ ɔlɔngɔlɔngɔ Timɔtɛ ɔnɛ: “Tuhangwelaki ekumanyi, keli ôsengesenge uku sho” ndo “dikumanyi di’amantu uku wanyo.” (1 Tim. 5:1, 2) Lo mɛtɛ, Timɔtɛ akahombaka ‘memala’ la ntondo ka kanga ndjwe. Ɔnkɔnɛ, mbokɛmaka dia Jehowa nongamɛka dia sho mbisha esombe kɛnɛmɔ oma lo yoho yaso ya ntɛkɛta.
Romo 12:10 mbutaka ɔnɛ: ‘Lo kɛnɛ kendana la nɛmiyana, nyosha ɛnyɛlɔ.’ Lo mɛtɛ, emendji wa l’etshumanelo nɛmiyaka Akristo w’esombe. Koko onto tshɛ la l’atei aso pombaka mbisha ɛnyɛlɔ lo kɛnɛ kendana la nɛmiyana.
Lo mɛtɛ, ase nkumbo wekɔ l’ɔkɛndɛ wa lânde wa nkokɛ ambutshi awɔ ndo watshɛwɔ. Lo kɛnɛ kendana la Tshɔi y’Osenge, anto wakayange toho ta nkimanyiya otamba ɔsɔ ndo wekɔ lo ntetemala nsala dikambo sɔ. Oma lɔkɔ, sho pombaka nyanga toho ta nkimanyiya ambutshi aso ndo watshɛso waya esombe dia vɔ nama kɛnɛmɔ kawɔ. Ɛnyɛlɔ, mbahokamɛ dimɛna ayotokimanyiya diaha sho ntɛtɛ dia nsala akambo lo shoamɛ, aha la mbidja yimba lo tokanyi tawɔ.—Tuk. 23:22; 1 Tim. 5:4.
Esombe wele l’atei aso wekɔ la nɛmɔ di’efula le Jehowa. Nde hakalɛ. (Osam. 71:18) Nzambi ka mɛtɛ mbakeketshaka dia vɔ ntetemala mbôkambɛ la kɔlamelo. Nyɛsɔ sho lawɔ totetemale nsukɛ ndo mbɔsa esombe la nɛmɔ.
[Esato wa lo lɛkɛ 7]
Oko Tshɔi y’Osenge yele l’ohomba w’osukɔ, mbele ndo esombe wekɔ l’ohomba wa sho mbâsalɛ akambo la kɛnɛmɔ ndo la dilɛmiɛlɔ
[Efundelo wɛnya kanga]
American Spirit Images/age fotostock