Totane ekeketshelo lo akambo wa lo nyuma
‘Nyɛmbɛ lɔkɔhɔ lami, ko nyu nyayotana ekeketshelo lo anima anyu.’—MAT. 11:29.
1. Yɛdikɔ yakɔna yakɔshi Jehowa l’Okongo wa Sinai, ndo lande na?
SHEKE y’Ɛlɛmbɛ yakadjama l’Okongo wa Sinai yaki ndo la yɛdikɔ yendana la osalelo wa Sabato ka lomingu la lomingu. Lo tshimbo ya Mɔsɛ laki yɛmb’awui yande, Jehowa akadjangɛ wodja w’Isariyɛlɛ ate: “Ukambaki ulimu aye nshi shamalu; kumuyaki lushi l’esambeli, dia ngombe kaye ndu punda kaye mumuya, dia ona pami a fumbi kaye ka umuntu ndu ona ongendangenda ndjala la mumuya.” (Etum. 23:12) Eelo, l’ɔtɛ wa nɛmɔ diakandashaka wanɛ waki l’ɛse k’Ɛlɛmbɛ, Jehowa akɔshi yɛdikɔ yoludi la ngandji lo nsɔna lushi la diomuyelo lakahombaka ekambi ande “mumuya.”
2. Ɛlɔlɔ akɔna wakakondjaka ase Isariyɛlɛ lo nɛmiya Sabato?
2 Onde lushi la Sabato aki tsho lushi la diomuyelo? Kema, ɔsɔ aki lushi l’ohomba lo ɔtɛmwɛlɔ wakatɛmɔlaka ase Isariyɛlɛ Jehowa. Nɛmiya lushi la Sabato akashaka ɛtɛ wa nkumbo etena ka vɔ mbetsha ase nkumbo yawɔ dia “nkendakendaka ololo lu mbuka ka [Jehowa].” (Etat. 18:19) Lushi lɔsɔ lakashaka ase nkumbo ndo angɛnyi diaaso dia vɔ nkana yimba lo akambo wakasale Jehowa ndo ngɛnangɛna dia monga kâmɛ. (Is. 58:13, 14) Kɛnɛ kakaleke ohomba ele, Sabato aki didjidji dia etena kayokondja anto ekeketshelo ka mɛtɛ lo Ɛlɔmbwɛlɔ ka Kristo k’ɛnɔnyi kinunu. (Romo 8:21) Ko kayotota dia nshi yaso nyɛ? Lende ndo woho akɔna wakoka Akristo wa mɛtɛ wayasha lo mboka ya Jehowa ntana ekeketshelo ka ngasɔ?
Totane ekeketshelo oma le
asekaso Akristo
3. Lo yoho yakɔna yakasukanɛ Akristo wa lo ntambe ka ntondo, ndo dui sɔ diaki l’etombelo akɔna?
3 Ɔpɔstɔlɔ Paulo akelɛ etshumanelo k’Akristo ɔnɛ “ekoho la usuko w’akambu wa mete.” (1 Tim. 3:15) Akristo wa ntondo wakakondja osukɔ w’efula lo keketshana ndo lo mbodiana lo ngandji lam’asawɔ. (Ef. 4:11, 12, 16) Lam’akinde l’Ɛfɛsɔ, Paulo akakondja ekeketshelo oma le ase etshumanelo ka la Kɔrɛtɔ wakaye ndjowenda. Lo menda shɛngiya yaki la dikambo sɔ le nde, Paulo akate ate: “Dimi lakangenangena lam’akayi Stefana, la Forotunato, la Akayiko. . . . Ne dia vo wakakikitsha utema ami.” (1 Kor. 16:17, 18) Woho akɔ wâmɛ mbele, etena kakatshu Tito la Kɔrɛtɔ dia tokamba la anango wa lɛkɔ, Paulo akakaloyɛ etshumanelo ka la Kɔrɛtɔ mukanda lo mbuta ate: “Nyu tshe mbakasalanganya utema andi.” (2 Kor. 7:13) Popo ndo ɛlɔ kɛnɛ, Ɛmɛnyi wa Jehowa tanaka ekeketshelo ka mɛtɛ oma lo lɔngɛnyi lakeketsha lele lam’asawɔ la asekawɔ Akristo.
4. Ngande watokeketsha nsanganya ya l’etshumanelo?
4 Lo ndjela akambo wakakokomɛ, wɛ ambɛna dia nsanganya ya l’etshumanelo yekɔ kiɔkɔ ya ɔngɛnɔngɛnɔ w’efula. Lɛkɔ, ‘sho keketshanaka oma lo mbetawɔ k’onto l’onto.’ (Romo 1:12) Anangɛso la akadiyɛso w’Akristo kema tsho anto weyana la so lo tshanda mɔshi tsho. Koko vɔ wekɔ angɛnyi wa mɛtɛ, anto wokaso ngandji ndo walɛmiyaso. Sho kondjaka ɔngɛnɔngɛnɔ w’efula ndo esambelo lo sanganaka la wɔ mbala la mbala lo nsanganya yaso.—File. 7.
5. Ngande wakokaso keketshana lo nsanganya ya weke?
5 Nsanganya yaso ya weke yasalema l’ɔnɔnyi yekɔ kiɔkɔ kina y’ekeketshelo. Lâdiko dia tosha ashi wa lɔsɛnɔ w’akambo wa mɛtɛ w’oma lo Bible, Ɔtɛkɛta wa Nzambi, nsanganya ya weke shɔ toshaka diaaso dia ‘nanula’ lɔngɛnyi laso. (2 Kor. 6:12, 13) Ko kayotota naka tekɔ la ɔsɔnyi ndo tekɔ l’okakatanu dia mbekesanɛ l’anto akina? Yoho mɔtshi ya mbeyana la anangɛso la akadiyɛso ele ndjasha efula l’elimu wasalema lo nsanganya ya weke. L’ɔkɔngɔ wa nde mbisha ekimanyielo lo losanganya lɔmɔtshi la wedja efula, kadiyɛso kɛmɔtshi akate ate: “Dimi kombeyaka anto efula lâdiko dia ase nkumbo kami la angɛnyi ami angana. Koko etena kakamasha lonya lo wɔmbɛlɔ wa dihole dia losanganya, lakahomana la anangɛso ndo la akadiyɛso efula! Ɔsɔ aki mɛtɛ diaaso di’ɔngɛnɔngɛnɔ efula!”
6. Naa yoho mɔtshi yakokaso ntana ɔngɛnɔngɛnɔ etena keso lo vakashi?
6 Ase Isariyɛkɛ waki la mbekelo ka tshɔka la Jerusalɛma dia tɔtɛmɔla lo afɛstɔ asato wakasalemaka ɔnɔnyi tshɛ. (Etum. 34:23) Mbala efula vɔ wakahombaka ntshika dikambɔ diawɔ ndo awui awɔ w’okanda ko munda lɔkɛndɔ la nshi efula l’ekolo l’etadimbo woludi la watshu. Koko, otshwelo w’otsha lo tɛmpɛlɔ ɔsɔ akashaka wanɛ wakatshɔka lɛkɔ ‘ɔngɛnɔngɛnɔ w’efula’ lo woho ‘wakawatɛmɔlaka Jehowa’ lo waaso asɔ. (2 Ek. 30:21) Woho akɔ wâmɛ mbele, ɛlɔ kɛnɛ ekambi waki Jehowa efula mɛnaka dia nkumbo yawɔ mongaka l’ɔngɛnɔngɛnɔ efula etena katshɔwɔ tembola Bɛtɛlɛ kana mvudu nkina ya filialɛ y’Ɛmɛnyi wa Jehowa yosukanyi la wɔ. Onde wɛ hakoke mbɔsa ekongelo ka tembola ahole asɔ lo vakashi yayaye?
7. a) Ngande wakoka afɛstɔ wasalaso monga la wahɔ le so? b) Kakɔna kakoka nkimanyiya dia difɛstɔ monga diaaso di’ɔlɔlɔ ndo di’ekeketshelo?
7 Sho kokaka nto nkondja ekeketshelo lo monga kâmɛ la nkumbo yaso ndo la angɛnyi aso lo afɛstɔ amɔtshi. Sɔlɔmɔna, nkumekanga ka lomba akate ate: “Nduku diese diuleki le untu uku nde la no, la ngenyangenya utema andi [oma] l’ulimu andi.” (Und. 2:24) Afɛstɔ hawotɔngɛnyangɛnya tsho, koko vɔ keketshaka nto dimama dia ngandji dia lam’asaso l’asekaso Akristo etena kayangaso dia mbaeya dimɛna. Dia nkimanyiya dia difɛstɔ monga diaaso di’ɔlɔlɔ ndo di’ekeketshelo, ayoleka dimɛna anto monga yema tshitshɛ ndo ndjashikikɛ dia awui wayɔlɔmbwama dimɛna, djekoleko naka wanu wayoyala.
Olimu w’esambishelo tokeketshaka
8, 9. a) Ɛnya otshikitanu waki lam’asa losango laki Yeso la laki afundji la Afarisɛ. b) Wahɔ akɔna wakondjaso lo nsambisha anto akina akambo wa mɛtɛ wa lo Bible?
8 Yeso aki l’ohetoheto l’olimu w’esambishelo ndo nde akakeketsha ambeki ande dia vɔ mbôkoya. Dikambo sɔ mɛnamaka lo ɛtɛkɛta wayela ɛnɛ: “Diango dia dinela dieko efula, keli ekambi mbeli tshitshe. Okone nyolombe Khumadiondjo, kanga dinela, keli ndi atumi ekambi lu dinela diandi.” (Mat. 9:37, 38) Losango laketshaka Yeso laki mɛtɛ losango lakeketsha, mbuta ate “lukumu l’ololo.” (Mat. 4:23; 24:14) Lɔ lakatshikitana etale la ɛlɛmbɛ wa wetsho wakatshutshuyaka Afarisɛ anto la wolo dia nkitanyiya.—Adia Mateu 23:4, 23, 24.
9 Etena kewoyaso anto akina losango la Diolelo, sho mbashaka ekeketshelo ka lo nyuma ndo l’etena kakɔ kâmɛ, sho fudiaka eokelo kaso ndo lowando l’oma k’ɛse otema lele la so lo akambo wa mɛtɛ wa lo Bible. Omembi w’esambo akate ate: “Nyandulaki [Jehowa]! Ne dia mimbelaka [Nzambi k]asu esambu wa diandu mbeli ololo.” (Osam. 147:1) Onde sho kokaka mfudia ɔngɛnɔngɛnɔ wakondjaso lo tombolaka Jehowa lo nsambishaka asukanyi aso?
10. Onde etombelo w’ɛlɔlɔ wakondjaso l’esambishelo nemanɛka la woho wetawɔ kana watona anto losango laso? Lembetshiya.
10 Ekɔ mɛtɛ dia, lo bɛtshi dia nkɛtɛ dimɔtshi anto efula mbetawɔka lokumu l’ɔlɔlɔ oleki lo bɛtshi dikina. (Adia Etsha 18:1, 5-8.) Naka wɛ ekɔ lo mbidjasɛ l’ɛtshi ka nkɛtɛ kele anto hawoleke mbetawɔ losango la Diolelo, kete sala la wolo dia mbika washo lo etombelo w’ɛlɔlɔ wakondjayɛ oma l’esambishelo. Ohɔ dia welo watetemalayɛ mbidja dia mbewoya lokombo la Jehowa kema anyanya. (1 Kor. 15:58) Ndo nto, etombelo w’ɛlɔlɔ wakondjaso l’esambishelo halemanɛ la woho wetawɔ kana watona anto lokumu l’ɔlɔlɔ. Sho kokaka monga l’eshikikelo dia Jehowa ayosala dia wanɛ wakoka mbetawɔ losango la Diolelo nkondja diaaso dia mboka losango lakɔ.—Joa. 6:44.
Ɔtɛmwɛlɔ wa lo nkumbo tokeketshaka
11. Ɔkɛndɛ akɔna wakasha Jehowa ambutshi, ndo ngande wakokawɔ mbokotsha?
11 Ambutshi woka Nzambi wɔma wekɔ l’ɔkɛndɛ wa mbetsha anawɔ awui wendana la Jehowa ndo la mboka yande. (Euh. 11:18, 19) Naka wɛ ekɔ ombutshi, onde wɛ ndjaombɛka etena ka mbetsha anayɛ awui wendana la Shɛso ka ngandji kele l’olongo? Dia kokimanyiya dia wɛ nkotsha ɔkɛndɛ w’ohomba ɔsɔ ndo nkotsha ehomba w’ase nkumbo kayɛ, Jehowa ekɔ lo tosha mbo ya ndɛ ya lo nyuma yakeketsha tshavutshavu lo tshimbo ya abuku, periodikɛ, bandɛ vidɛo ndo bandɛ kasɛtɛ.
12, 13. a) Ngande wakoka ase nkumbo nkondja wahɔ oma lo Ɔtɛmwɛlɔ wa lo nkumbo wa la dikɔlɔ? b) Ngande wakoka ambutshi ndjashikikɛ dia ɔtɛmwɛlɔ awɔ wa lo nkumbo wekɔ kiɔkɔ y’ekeketshelo?
12 Lâdiko dia lâsɔ, ɔhɔmbɔ wa kɔlamelo ndo wa kɛsɔ akɔsɛ tɛdikɔ tendana la Ɔtɛmwɛlɔ wa lo nkumbo wa la dikɔlɔ. Ɔsɔ ekɔ dikɔlɔ diakasɔnama dia salaka wekelo wa Bible lo nkumbo lomingu tshɛ. Anto efula wambɛna dia yɛdikɔ shɔ mbakimanyiyaka dia vɔ ndeka monga kâmɛ lo ngandji ndo yɔ yambokeketsha diɔtɔnganelo diasawɔ la Jehowa. Ko ngande wakoka ambutshi ndjashikikɛ dia ɔtɛmwɛlɔ awɔ wa lo nkumbo wekɔ kiɔkɔ y’ekeketshelo ka lo nyuma?
13 Ɔtɛmwɛlɔ wa lo nkumbo wa la dikɔlɔ watohekoyake ase nkumbo. Tekɔ lo ntɛmɔla ‘Nzambi k’ɔngɛnɔngɛnɔ’ ndo nde nangaka dia sho monga l’ɔngɛnɔngɛnɔ etena kɔtɛmɔlaso. (1 Tim. 1:11; Fil. 4:4) Monga la dikɔlɔ dia lânde dia kɛtshanyaka akambo wa lo nyuma w’oma lo Bible ekɔ tshondo y’ɔtshɔkɔ. Ambutshi kokaka tshikitanyaka toho tawɔ ta mbetsha, lo nkamba la ekanelo ka yimba ndo lo salaka eyangelo. Ɛnyɛlɔ, ambutshi amɔtshi wakasha Brandon, ɔnawɔ ɔmɔtshi l’ɛnɔnyi dikumi dia nde nembetshiya ɔtɛ a dui wata ɔnɛ: “Lande na kakakambe Jehowa la oloyi dia ntɛkɛta dikambo dia Satana?” Dui sɔ diakakiyanya Brandon nɛ dia nde nangaka eloyi ndo nde akanyange lo mboka dia Jehowa akakambe la oloyi dia ntɛkɛta dikambo dia Satana. Nkumbo mɔtshi salaka adramɛ wa lo Bible lo tena dimɔtshi ndo ose nkumbo tshɛ mbɔsaka dihole di’onto ɔmɔtshi la lo dramɛ. Onto l’onto mbadiaka etenyi kande oma lo Bible kana kikɛnyaka oko kɛnyɔ. Toho ta wetshelo tɔsɔ ngɛnyangɛnyaka ana ndo tɔ mbakimanyiyaka dia vɔ ndjatambiya lo wekelo ndo dui sɔ kimanyiyaka dia atɔndɔ wa lo Bible munanda etema awɔ.a
Tewɔ awui wakoka tɔkɔmɔla
14, 15. a) Ngande wambofulanɛ ekiyanu ndo awui wadja lɔsɛnɔ lo wâle lo nshi y’ekomelo nyɛ? b) Naa ekakatanu ekina wakoka mpomana la so?
14 Lo nshi nyɛ y’ekomelo ka dikongɛ nɛ di’akambo dia kɔlɔ, ekiyanu ndo awui wadja lɔsɛnɔ lo wâle wamboleka fulanɛ. Miliyɔ y’anto bu la elimu ndo wekɔ lo diɛnɛ la ekakatanu ekina wendana la ekondjelo. Kânga wanɛ wele l’elimu mɛnaka dia difuto diakondjawɔ hawakimanyiya dia nkotsha ehomba wa nkumbo yawɔ dimɛna. (Ɛdika la Hangai 1:4-6.) Ewandji wa pɔlitikɛ ndo ewandji ekina wambohekɔ minya awui wa terɔrismɛ ndo tɔkɔkɔ tokina ta awui wa kɔlɔ. Anto efula wambɔkɔmɔ l’ɔtɛ wa munga yawɔ hita.—Osam. 38:4.
15 Akristo wa mɛtɛ hawohandwe oma lo ekakatanu woye oma lo dikongɛ nɛ di’akambo diaki Satana. (1 Joa. 5:19) Lo tena dimɔtshi, ambeki waki Kristo mbeyaka mpomana l’ekakatanu ekina etena kasalawɔ la wolo dia ntshikala la kɔlamelo le Jehowa. Yeso akate ate: “Naka vo wakansuya, wayunyusuya ndu nyu.” (Joa. 15:20) Koko, kânga etena ‘kasoyamaso,’ teye dia sho “tatasekama.” (2 Kor. 4:9) Lande na kediɔ ngasɔ?
16. Kakɔna kakoka tokimanyiya diaha sho nshisha ɔngɛnɔngɛnɔ aso?
16 Yeso akate ate: “Nyuyi le mi, nyu tshe watukambaka ndu weli la wetshu wa wulu, ku dimi layunyu[keketsha].” (Mat. 11:28) Lo monga la mbetawɔ k’efula lo olambo wa tshungo wa Kristo, sho mongaka oko anto wayakitsha lo anya waki Jehowa. Lo nsala ngasɔ, sho kondjaka ‘wolo woleki wɔnɛ wokongaka la onto.’ (2 Kor. 4:7) “Ukimanyidi,” mbuta ate nyuma k’ekila kaki Nzambi keketshaka mbetawɔ kaso lo yoho ya diambo woho ɔnɛ wele sho mongaka la akoka wa mbikikɛ pâ ndo asui aha la sho nshisha ɔngɛnɔngɛnɔ.—Joa. 14:26; Jak. 1:2-4.
17, 18. a) La ntondo ka yimba yakɔna yahombaso ndjalama? b) Etombelo akɔna wakoka monga naka onto ndjasha l’ɛngɛnɔngɛnɔ ande hita?
17 Ɛlɔ kɛnɛ, Akristo wa mɛtɛ pombaka ndjalama diaha sɛngiyama la dionga di’ase andja ɔnɛ diatshutshuya anto dia nyanga ɔngɛnɔngɛnɔ. (Adia Efeso 2:2-5.) Naka hatosadi ngasɔ, kete sho mbeyaka ndjɔkɔ lo “saki ka dimba, ndu saki ka ashu, ndu utaku a lumu.” (1 Joa. 2:16) Kana sho mbeyaka ndjɔfɔnya ɔfɔnyafɔnya ɔnɛ nkotsha nsaki yaso ya demba ayotosha ɔngɛnɔngɛnɔ. (Romo 8:6) Ɛnyɛlɔ, anto amɔtshi wakayoyashaka lo ɔnwɛlɔ wa nɔnɔ dia wolo ndo wanu wa tshambandeko, lo wendelo w’esato wɛnyawɔ anto etakataka, lo tɔkɛnyɔ ta tshambandeko kana l’akambo wa mindo wakoka monga la shɛngiya lo timba tawɔ. “Kesu” yaki Satana yekɔ l’oyango wa minganyiya anto lo mbakonya dia vɔ monga la kanyi ya kɔlɔ lo kɛnɛ kendana la ɔngɛnɔngɛnɔ.—Ef. 6:11.
18 Lo mɛtɛ, kema kɔlɔ ndɛ, nnɔ kana ndjakimɔ lo weho ɛmɔtshi wa tɔkɛnyɔ naka sho nsala akambo asɔ la wɛdimu. Koko, hatohombe mbetawɔ dia akambo asɔ mbɔsa dihole dia ntondo lo lɔsɛnɔ laso. Wɛdimo ndo ndjakimɛ ekɔ ohomba, djekoleko lo menda etena kɛnɛ kasɛnaso. Eyango wa lomombo koka ndjonga wotsho le so polo lo sho ndjokoma ‘tosuwasuwa kana anto wahatɔ elowa lo kɛnɛ kendana la ewo k’oshika ka Nkumɛso Yeso Kristo.’—2 Pet. 1:8.
19, 20. Ngande wakokaso ntana ekeketshelo ka mɛtɛ?
19 Naka sho mbɔtɔnganyiya tokanyi taso la wadjango waki Jehowa, kete tayɛna dia ɛngɛnɔngɛnɔ tshɛ watosha andja ɔnɛ wekɔ wa tshanda mɔtshi tsho. Mɔsɛ akɛnyi mɛtɛ ka dikambo sɔ, ndo sho lawɔ mbadiɛna. (Heb. 11:25) Kɛnɛ kele mɛtɛ ele ekeketshelo ka mɛtɛ, mbuta ate ekeketshelo kela ɔngɛnɔngɛnɔ ndɔ ɔlɔ w’efula ndo wa pondjo ndjaka oma lo nsala lolango la Shɛso lele l’olongo.—Mat. 5:6.
20 Nyɛsɔ totetemale ntana ekeketshelo lo akambo wa lo nyuma. Lo nsala ngasɔ, tekɔ lo “ntuna akambu wa dionyo la saki y’akambo wa la kete . . . [etena kakongaso] elungamelu kasu k’otshoko la enelo ka lutumbu la [Nzambi k]asu [k]a wuki ndu la Ushimbedi Jesu Kristu.” (Tito 2:12, 13) Ɔnkɔnɛ, nyɛsɔ toyashikikɛ dia ntshikala l’ɛse ka lɔkɔhɔ laki Yeso lo nɛmbɛka lowandji ndo ɛlɔmbwɛlɔ kande. Lo nsala ngasɔ, tayokondja ɔngɛnɔngɛnɔ wa mɛtɛ ndo ekeketshelo ka mɛtɛ!
[Nɔtɛ ka l’ɛse ka dikatshi]
a Dia mbeya awui akina wendana la woho wakokanyu nsala dia wekelo wa lo nkumbo monga la awui w’amɛna ndo washa wetshelo, nyende lo Olimu aso wa Diolelo wa Ngɔndɔ ka dikumi l’ahende 1990, lɛkɛ 1-2, lo Falase.
Ngande wayoyokadimola?
• Ngande watana ekambi waki Jehowa ekeketshelo ɛlɔ kɛnɛ?
• Lo yoho yakɔna yele esambishelo tokeketshaka sho la wanɛ wasambishaso?
• Kakɔna kakoka ɛtɛ wa nkumbo nsala dia ndjashikikɛ dia ɔtɛmwɛlɔ awɔ wa lo nkumbo wekɔ kiɔkɔ y’ekeketshelo?
• Akambo akɔna watɔkɔmɔla lo nyuma?
[Osato wa lo lɛkɛ 26]
Naka sho mɛmba lɔkɔhɔ la Yeso, kete tayonga la tɔkɔkɔ efula t’ekeketshelo